ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵉⵎⵓⵔⴰ ⵜⵉⵖⵉⵎⵉⵜ ⵜⴰⴳⴷⵓⴷⴰⵏⵜ ⵉ ⵓⵙⵎⵏⵉⴷ ⴷ ⵓⵎⴹⴰⴽⴰⵕ ⵏ ⵓⵏⵇⵇⵉⵙ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵉⵜⵜⵓⵙⵎⴰⴳⴰⵍⵏ ⵙ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴼ ⵓⵙⵙⵍⵎⴷ ⴰⵎⵣⵡⴰⵔⵓ
ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 15 ⵢⵓⵏⵢⵓ 2021, ⵜⵉⵖⵉⵎⵉⵜ ⵜⴰⴳⴷⵓⴷⴰⵏⵜ ⵉ ⵓⵙⵎⵏⵉⴷ ⴷ ⵓⵎⴹⴰⴽⴰⵕ ⵏ ⵓⵏⵇⵇⵉⵙ ⵏ ⵜⵔⴰⴱⴱⵓⵜ ⵏ ⵜⵡⵓⵔⵉ iⵜⵜⵓⵙⵎⴰⴳⴰⵍⵏ ⵙ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴼ ⵓⵙⵙⵍⵎⴷ ⴰⵎⵣⵡⴰⵔⵓ, ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵍⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵜⵉⵍⵉⵜ ⵏ ⵎⴰⵙⵙ ⵙⴰⵄⵉⴷ ⴰⵎⵣⴰⵣⵉ ⴰⵎⴰⵡⵙⴰⵙ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵉⵍⵖ ⴰⵣⵣⵓⵍⴰⵏ ⴷ ⵓⵙⵙⵍⵎⴷ ⴰⵎⴰⵜⵜⵓⵢ ⴷ ⵓⵔⵣⵣⵓ ⴰⵎⴰⵙⵙⴰⵏ, ⴷ ⵎⴰⵙⵙ ⵄⵓⵜⵎⴰⵏ ⵍⴼⵉⵔⴷⴰⵡⵙ ⴰⵎⴰⵡⵙⴰⵙ ⵏ ⵜⴷⵍⵙⴰ ⴷ ⵉⵄⵔⵔⵉⵎⵏ ⴷ ⵜⵓⵏⵏⵓⵏⵜ.
ⴳ ⵜⵣⵡⵉⵔⵉ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵜⵜⵓⵙⵏⵎⴰⵍⴰ ⵜⵖⵉⵎⵉⵜ ⵙ ⵉⴱⴹⵉⵢⵏ ⵏ ⵓⵎⵏⵏⵉ 100 ⵏ ⵓⴷⵓⵙⵜⵓⵔ ⴷ ⵓⵎⵏⵏⵉ 278 ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ, ⵜⴳ ⴰⵙⵔⵙ ⵡⵉⵙ ⴽⴽⵓⵥ ⴳ ⵜⵡⵓⵔⵉ ⵏ ⵓⵙⵇⵇⵉⵎ ⴳ ⵢⵉⴳⵔ ⵏ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵜⵜⵓⴱⴷⴰⵔⵏⵉⵏ ⴳ ⵓⴷⵓⵙⵜⵓⵔ , ⵢⵉⵍⵉ ⴷⴰⵔⵙⵏⵜ ⵡⴰⵜⵉⴳ ⵉⵙⵜⴰⵡⵀⵎⵎⴰⵏ, ⵎⴽ ⵉⵍⵍⴰⵏ ⵓⵍⴰ ⴳ ⵓⵏⵇⵇⵉⵙ ⵏ ⵜⵙⵇⵇⵉⵎⵜ ⵉⵥⵍⵉⵏ ⵙ ⵡⴰⵏⴰⵡ ⵓⵏⴳⵉⵎ ⵉⵖⵔⴰⵏ ⵉ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵙⵍⴰⵡⴰⵏ ⴰⴽⴽⵯ ⴰⵙⵓⵜⴳ ⴰⴱⵕⵍⴰⵎⴰⵏⵉ.
ⵉⵙⵉⵙⴼⵉⵡ ⵎⴰⵙⵙ ⵍⵎⴰⵍⴽⵉ ⵎⴰⵙ ⵉⵍⵍⴰ ⵓⵙⵙⵍⵎⴷ ⴰⵎⵣⵡⴰⵔⵓ ⴳ ⵓⴳⵯⵏⵙ ⵏ ⵓⵏⴳⵔⴰⵡ ⴰⵙⴳⵯⵎⴰⵏ, ⵉⵙⵓⵜⴳ ⴰⵅⵎⵎⴻⵎ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴳ ⵓⵙⴰⵡⵓⵔ ⴰⴷ ⴰⵅⴰⵜⴰⵔ, ⵉⵙⵙⴽⵯⵜⵉ ⴷ ⵜⴰⴱⵔⴰⵜ ⵜⴰⴳⵍⴷⴰⵏ ⵉ ⵉⵎⴷⵔⴰⵡⵏ ⴳ ⵡⴰⵙⵙ ⴰⵏⴰⵎⵓⵔ ⴼ ⵓⵙⵙⵍⵎⴷ ⴰⵎⵣⵡⴰⵔⵓ ⴳ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ:
“ⵓⵔ ⴼⵍⵍⴰⵡⵏ ⵉⵃⴱⵉ ⵡⴰⵜⵉⴳ ⵏ ⵓⵙⵙⵍⵎⴷ ⴰⵎⵣⵡⴰⵔⵓ ⴳ ⵓⵎⵓⴽⵏ ⵏ ⵓⵏⴳⵔⴰⵡ ⵏ ⵓⵙⴳⵎⵉ, ⵍⵍⵉⵖ ⵉⴳⴰ ⵜⴰⵔⵙⵍⵜ ⵉⴷⵓⵙⵏ ⵖ ⵉⵜⵜⵓⵙⵏⵜⴰ ⴽⵓ ⴰⵎⵓⴽⵏ, ⵍⵍⵉⵖ ⴰ ⵢⴰⴽⴽⴰ ⵉ ⵡⴰⵔⵔⴰⵡ ⵜⵉⵙⵓⴳⴰⵔ ⵏ ⵓⵏⵍⵉ ⴷ ⵜⵓⵙⵙⵏⴰ, ⴰⵔ ⴰⵙⵏⵜ ⵜⵜⴰⵡⵙⵏ ⴳ ⵓⴽⵛⵓⵎ ⵉⴱⵙⵓⵙⵏ ⵙ ⵜⵖⵔⵉ, ⴷ ⵓⵎⵓⵔⵙ ⴳ ⵓⴱⵔⵉⴷ ⵏⵏⵙⵏ ⵏ ⵓⵙⵙⵍⵎⴷ, ⵖⵎⴽ ⴰⵏⵏ ⴷ ⵓⵙⵙⵉⵣⴷⵔ ⵏ ⵓⵖⵓⵍ ⴷ ⵜⵏⴰⴱⴱⴰⵢⵜ ⵜⴰⵏⵎⵍⴰⵏⵜ”.
ⵜⵙⵎⵏⵉⴷ ⵎⴰⵙⵙⴰ ⵖⵉⵜⴰ ⴱⴰⴷⵔⵓⵏ, ⵜⴰⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⴷ ⵉⴷ ⵎⴰⵙⵙ ⵉⵎⵏⵇⵇⴰⵙⵏ ⵊⴰⵎⴰⵍ ⴱⵏⵛⵇⵔⵓⵏ ⴽⴰⵔⵉⵎⵉ ⴷ ⵃⴰⵙⴰⵏ ⵄⴰⴷⵉⵍⵉ ⴰⵣⴳⵣⵍ ⵏ ⵓⵏⵇⵇⵉⵙ, ⵙⴰⵡⵍⵏ ⴼ: ⵜⴱⵔⵉⴷⵜ ⵏ ⵜⵡⵓⵔⵉ, ⵉⵙⵓⵖⴰⵍ ⵏ ⵓⵙⵓⵜⴳ, ⵜⵉⵎⵓⴽⵔⵉⵙⵉⵏ ⵙⵍⴰⵡⴰⵏ ⵜⵉⴷ ⵏ ⴽⵓⴼⵉⴷ 19. ⵜⴽⴽⴰ ⴷ ⵜⵔⴰⴱⴱⵓⵜ ⴰⴳⵏⴰⵔ ⴷ ⵎⵔⵡⵜ ⵏ ⵜⵎⵔⵙⴰⵍ ⴳ ⴽⴽⵓⵥⵜ ⵜⵎⵏⴰⴹⵉⵏ: ⵕⵕⴱⴰⵟ, ⵙⴰⵍⴰ, ⵍⵇⵏⵉⵟⵕⴰ, ⵛⵛⵔⴳ, ⴷⴷⴰⵅⵍⴰ ⵡⴰⴷⵉ ⴷⴷⴰⵀⴰⴱ, ⵜⵉⴳⵎⵎⵉ ⵜⵓⵎⵍⵉⵍⵜ ⵚⵟⵟⴰⵟ. ⵜⵜⵓⵙⴽⴰⵔⵏⵜ ⵜⵙⵎⵓⵏⴰⵢ ⴰⴽⴷ ⵉⵎⵙⵜⴳⴳⴰⵔⵏ ⴳ ⵢⵉⴳⵔ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵜⵓⵏⵏⵓⵏⵜ ⴷ ⵉⵄⵔⵔⵉⵎⵏ , ⴷ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⴰⵏ.
ⵉⴱⴷⴷ ⵓⵏⵇⵇⵉⵙ ⴼ ⵓⵙⵓⵜⴳ ⵏ ⵉⵖⴰⵡⴰⵙⵏ ⵣⵔⵉⵏⵉⵏ ⴳ ⵉⵍⵍⴰ ⵓⵎⵇⵇⵏ ⴰⵏⴰⵎⵓⵔ ⵉ ⵓⵙⴳⵎⵉ ⴷ ⵓⵙⵎⵓⵜⵜⴳ, ⴰⵖⴰⵡⴰⵙ ⴰⵖⴰⵡⴰⵍ 2000-2015, ⴰⵙⵓⵜⴳ ⵉⴹⴼⵕⵏ ⴰⵖⴰⵡⴰⵙ ⴰⵏⴰⵎⵓⵔ ⵏ ⵓⵙⵎⴰⵜⴰ ⴷ ⵓⵙⵎⵖⵔ ⵏ ⵓⵙⵙⵍⵎⴷ ⴰⵎⵣⵡⴰⵔⵓ 2018-2028.
ⵜⴼⴼⵖ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵙ ⴽⵉⴳⴰⵏ ⵏ ⵜⵙⵓⵎⵔⵉⵏ ⵉ ⵓⵙⴱⵓⵖⵍⵓ ⴷ ⵓⵙⵖⵓⴷⵓ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵏ ⵓⵙⵙⵍⵎⴷ ⴰⵎⵣⵡⴰⵔⵓ ⴷ ⵓⵙⵎⴰⵇⵍ ⵏ ⵓⴷⵔⵉⵣ ⵏⵏⵙ ⴼ ⵉⵎⵏⵜⴰⵢⵏ, ⴷ ⵓⵣⵣⵔⴰⵢ ⵏ ⵡⴰⵏⴰⵡ ⵏ ⵓⵙⵎⵓⵜⴳⴳ ⵙⵍⴰⵡⴰⵏ ⴰⴽⴽⵯ ⴳ ⵓⵎⵏⴰⴹ ⵏ ⵓⴱⴰⵢⵢⵓⵕ, ⴰⵙⵙⴰⵔⵓ ⴳ ⵓⵙⵎⵖⵔ ⴷ ⵓⵔⵣⵣⵓ ⴼ ⵜⵎⴰⵎⴽⵉⵏ ⵏ ⵉⵎⴰⵍ ⵏ ⵓⵙⵙⵍⵎⴷ ⵏ ⵜⴰⵣⵣⴰⵏⵉⵏ ⴰⴷ.
ⵢⵉⵡⵉ ⴷ ⵓⵏⵇⵇⵉⵙ ⵉⵙⵖⵍⴰⴼ ⴼ ⵓⵏⴱⴰⴹ ⵏ ⵢⵉⴳⵔ, ⴰⵢⵍⵍⵉ ⵔⴰⴷ ⵢⴰⵍⵍ ⴳ ⵓⵏⵛⴽⴽ ⵏ ⵉⵎⵙⴱⵖⵔⵏ ⴷ ⵓⵙⵙⵕⵚⵓ ⵏ ⵓⵎⵢⴰⵙ ⵏⴳⵔ ⵜⵖⵔⵎⵉⵏ ⴷ ⵉⴼⴰⵔⴰⵏ, ⴰⵙⵎⴰⵢⵏⵓ ⵏ ⵉⵙⵍⴳⵏⵏ, ⴰⵙⵖⵔⵜ ⵏ ⵜⵓⵚⴽⵉⵡⵉⵏ ⴷ ⵉⵎⵉⵡⴰ ⵉⵏⵎⵍⴰⵏⵏ, ⴰⵙⴽⵔ ⵏ ⵜⵎⴰⴷⵔⴰⵡⵉⵏ ⴰⴽⴷ ⵉⵎⵙⴽⴰⵔⵏ ⴳ ⵢⵉⴳⵔ, ⴰⵙⵖⵓⴷⵓ ⵏ ⵓⵙⵓⵔⵙ ⴷ ⵜⵉⵙⵓⵜⵍⵉⵏ ⵏ ⵓⵙⵡⵓⵔⵉ ⵏ ⵉⵎⵙⴳⵎⴰⵏⵏ, ⴰⵙⵓⵊⴷ ⵏ ⵓⵙⵥⵕⴼ, ⴰⵙⵉⴷⴼ ⵏ ⵜⴰⵔⵡⴰ ⵏ ⵉⵎⵣⵡⴰⴳⵏ ⵉⴼⵔⵉⵇⵉⵢⵏ ⴷ ⵉⵎⵔⴳⵓⵙⵏ ⴳ ⵓⵏⴳⵔⴰⵡ ⴰⴷ.
ⴳ ⵓⵙⵡⵉⵔ ⴰⵙⴳⵎⴰⵏ ⴷ ⵓⴱⵉⴷⴰⴳⵓⵊⵉ, ⵉⵙⴷⴷⵉⴷ ⵓⵏⵇⵇⵉⵙ ⴼ ⵓⵣⵣⵔⴰⵢ ⵏ ⵉⵖⴰⵡⴰⵙⵏ ⴷ ⵜⵎⵢⴰⴷⴰⵙⵉⵏ ⵜⵉⵙⴳⵎⴰⵏⵉⵏ, ⴰⵙⵡⵉⵏⴳⵎ ⴳ ⵓⵙⵙⵍⵎⴷ ⵉⵎⵎⵔⴽⵙⵏ ⵉⴱⴷⴷⵏ ⴼ ⵓⵙⵎⵓⵏ ⵊⴰⵔ ⵓⵙⵎⵓⵜⵜⴳ ⵙ ⵜⵉⵍⵉⵜ ⴷ ⵉⴼⵙⵙⴰⵢⵏ ⵉⵜⵉⴽⵏⵓⵍⵓⵊⵉⵢⵏ ⴱⴷⴷⵏⵉⵏ ⴼ ⵓⵙⴷⵔⵓ ⵏ ⵉⴷ ⴱⴰⴱⴰⵜⵙⵏ ⵏ ⵉⵏⵍⵎⴰⴷⵏ ⴳ ⵜⴳⵎⵉ ⵏⵏⵙⵏ, ⴰⵙⵓⵊⴷ ⵏ ⵜⵙⵔⵜⵉⵜ ⵜⴰⵙⴳⵎⴰⵏⵜ ⵏ ⵓⵙⵉⴷⴼ.
ⵙⴷⴷⵉⴷⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⴼ ⵡⴰⵜⵉⴳ ⵏ ⵓⵙⵙⵍⵎⴷ ⴰⵎⵣⵡⴰⵔⵓ ⵉ ⵜⴰⵙⵓⵜⵉⵏ ⴷ ⵢⵓⵛⴽⴰⵏ, ⵙⵓⵜⴳⵏ ⵜⵓⴳⴳⴰⵙ ⵏ ⵓⵙⵓⵊⴷ ⵏ ⵉⵏⵇⵇⵉⵙⵏ ⵖⵔⵏ ⵉ ⵓⵙⵔⵓⵙ ⵏ ⵓⵙⴰⵜⵉ ⴰⴱⵉⴷⴰⴳⵓⵊⵉ ⵉⵎⵙⴰⵙⴰⵏ ⴷ ⵜⴼⵔⴽⴰ ⵏ ⵓⵙⵙⵍⴷ ⴰⴷ ⴼ ⵜⴱⵔⵉⴷⵉⵏ ⵏ ⵓⵙⵙⵍⵎⴷ ⴷ ⵉⵙⴰⵖⵓⵍⵏ ⵏ ⵜⵉⵕⵡⵉ, ⴰⵙⵖⵣⵏ ⵏ ⵓⵙⵎⴰⵇⵇⵍ ⴼ ⵓⵙⵎⵓⵜⵜⴳ ⵏ ⵉⵎⵙⴳⵎⴰⵏ ⵙ ⵓⵡⵇⵇⵔ ⵏ ⵓⵎⵏⵣⴰⵢ ⵏ ⵏ ⵜⵎⵣⴳⴳⵏⵜ ⴷ ⵜⵎⵙⴳⴰⴷⴷⴰⵢⵜ ⵜⴰⴷⵖⴰⵔⴰⵏⵜ.
ⴱⴷⴷⵏ ⵉⵎⵓⵔⴰ ⵓⵍⴰ ⴼ ⵜⵎⵓⴽⵔⵉⵙⵉⵏ ⵏ ⵢⵉⴳⵔ ⵏ ⵓⵙⵙⵍⵎⴷ ⴰⵎⵣⵡⴰⵔⵓ ⴳ ⵜⴼⵔⴽⴰ ⵉⵣⵔⵉⵏ, ⴰⵢⵍⵍⵉ ⵉⵙⴱⴷⴷⵏ ⵜⴰⵣⵣⵉⴳⵣⵜ ⵏⵏⵙ, ⵉⴳ ⴰⵙⵙⵍⵎⴷ ⴰⵇⴱⵓⵔ ⵉⵛⵃⴰⵏ ⴳ ⵓⵔ ⵍⵍⵉⵏ ⵉⵙⴰⵖⵓⵍⵏ ⵏ ⵜⵉⵕⵡ ⴷ ⵓⵎⵙⴰⵙⴰ, ⵙⴷⴷⵉⴷⵏ ⵎⴰⵙ ⵉⴳⴰ ⵓⵎⵇⵇⵏ ⴰⵏⴰⵎⵓⵔ ⵉ ⵓⵙⴳⵎⵉ ⴷ ⵓⵙⵎⵓⵜⵜⴳ ⴰⵥⵎⴰⵥⵥⵍ ⵉⵙⵜⴰⵡⵀⵎⵎⴰⵏ ⴳ ⵓⵙⵔⵙ ⵏ ⵓⵏⴳⵔⴰⵡ ⵏ ⵓⵙⵙⵍⵎⴷ ⴳ ⵉⵅⴰⵜⵔ ⵓⵙⵙⵍⵎⴷ ⴰⵎⵣⵡⴰⵔⵓ.
ⵉⵙⵓⵜⴳ ⵓⵎⴰⵡⵙⴰⵙ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵉⵍⵖ ⴰⵣⵣⵓⵍⴰⵏ ⴷ ⵓⵙⵙⵍⵎⴷ ⴰⵎⴰⵜⵜⵓⵢ ⴷ ⵓⵔⵣⵣⵓ ⴰⵎⴰⵙⵙⴰⵏ ⵜⴰⵏⵏⴰⵢⵉⵏ ⴷ ⵉⵙⵖⵍⴰⴼ ⵏ ⵓⵏⵇⵇⵉⵙ ⴰⴷ, ⴷ ⵓⵅⵎⵎⴻⵎ ⵏ ⵉⵎⵓⵔⴰ ⴳ ⵓⵏⴳⵔⴰⵡ ⴰⵙⴳⵎⴰⵏ. ⵉⵙⴷⴷⵉⴷ ⵎⴰⵙ ⵉⴱⴷⴷ ⵓⵏⵇⵇⵉⵙ ⵏ ⵡⴰⵏⴰⵡ ⴰⵏⴳⵎⵓ ⴰⵎⴰⵢⵏⵓ ⴼ ⵓⵙⴽⵔ ⵏ ⵓⵏⴳⵔⴰⵡ ⵉⵙⵎⴷⵏ ⵉ ⵓⵎⵓⵔⵙ ⴰⵙⴳⵎⴰⵏ ⵙ ⵙⵎⵎⵓⵙ ⵉⴼⵔⴷⴰⵙ ⴳ ⵉⵍⵍⴰ ⵓⵙⵎⵖⵔ ⵏ ⵓⵙⵙⵍⵎⴷ ⴰⵎⵣⵡⴰⵔⵓ ⵙ ⵜⵙⵔⵜⵉⵜ ⵉⴷⵓⵙⵏ ⵏ ⵜⵎⵥⵉ ⵜⴰⵎⵣⵡⴰⵔⵓⵜ.
ⵉⵙⴷⴷⵉⴷ ⵓⵍⴰ ⴼ ⵡⴰⵜⵉⴳ ⵉⴷⵓⵙⵏ ⵏ ⵓⵖⴰⵡⴰⵙ ⴰⵏⴰⵎⵓⵔ ⵉ ⵓⵙⵎⴰⵜⴰ ⴷ ⵓⵙⵎⵖⵔ ⵏ ⵓⵙⵙⵍⵎⴷ ⴰⵎⵣⵡⴰⵔⵓ ⵙⴳ 18 ⵢⵓⵍⵢⵓⵣ 2018, ⵉⵙⵎⵏⵉⴷ ⵓⵍⴰ ⵜⴰⵣⵣⵉⴳⵣⵜ ⵏ ⵓⵙⴽⴰⵏ ⴳ ⵓⵙⵙⵍⵎⴷ ⴰⵎⵣⵡⴰⵔⵓ, ⵉⴼⴽ ⵓⵎⵍⴰⵏ ⴼ ⴽⵉⴳⴰⵏ ⵏ ⵉⵙⵖⵍⴰⴼ ⵏ ⵓⵏⵇⵇⵉⵙ ⴰⴷ.
ⵉⵙⴰⵡⵍ ⵓⵎⴰⵡⵙⴰⵙ ⵏ ⵜⴷⵍⵙⴰ ⴷ ⵉⵄⵔⵔⵉⵎⵏ ⴷ ⵜⵓⵏⵏⵓⵏⵜ ⴼ ⵡⴰⵜⵉⴳ ⵏ ⵓⵙⵙⵍⵎⴷ ⴰⵎⵣⵡⴰⵔⵓ ⴳ ⵓⵚⴽⵓ ⵏ ⵡⴰⵣⵣⴰⵏ, ⴷ ⵎⴰⴷ ⵉⵥⵍⵉⵏ ⵙ ⵓⵙⵏⵎⴰⵍⴰ ⵏ ⵜⵓⵔⵜⵉⵜⵉⵏ ⵏ ⵉⵎⵥⵢⴰⵏⵏ ⴷ ⵓⵙⵏⴼⴰⵔ ⵏ ⵓⵙⵎⴰⵜⴰ ⵏⵏⵙⵏⵜ ⵙ ⵜⵎⴷⵔⴰⵡⵜ ⴳⵔ ⵉⴳⵔⴰⵏ ⴰⵎⴰⵜⴰⵢ ⴷ ⵓⵙⵍⵉⴳ, ⵉⴼⴽ ⴽⵉⴳⴰⵏ ⵏ ⵉⵙⵉⵙⴼⵉⵡⵏ.
