ⵜⴰⵙⵇⵇⵉⵎⵜ ⵜⴰⴱⵕⵍⴰⵎⴰⵏⵉⵜ ⵉⵛⵛⴰⵔⵏ ⵏⴳⵔ ⵍⵎⵖⵔⵉⴱ ⴷ ⵜⵎⵓⵏⵜ ⵏ ⵓⵕⵓⴱⴱⴰ “ⵜⵙⵙⵀⵔⵛ ⵜⴰⵖⵜⴰⵙⵜ ⵏ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ, ⵜⵙⵙⵅⵛⵏ ⵜⵉⵔⵎⵉⵜⵉⵏ ⵏ ⴽⵔⴰ ⵏ ⵜⵙⴳⴳⵉⵡⵉⵏ”
ⵜⵙⵏⵎⴰⵍⴰ ⵜⵙⵇⵇⵉⵎⵜ ⵜⴰⴱⵕⵍⴰⵎⴰⵏⵉⵜ ⵉⵛⵛⴰⵔⵏ ⵏⴳⵔ ⵍⵎⵖⵔⵉⴱ ⴷ ⵜⵎⵓⵏⵜ ⵏ ⵓⵕⵓⴱⴱⴰ, ⴰⵢⵏⴰⵙ 14 ⵢⵓⵏⵢⵓ 2021, ⵜⴰⵙⵎⵓⵏⵉ ⵉⵖⴰⵡⵍⵏ ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵛⴰⵡⵉ ⴱⵍⵄⵙⵙⴰⵍ ⴷ ⵜⵉⵍⵉⵜ ⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵙⴳ ⵓⴱⵕⵍⴰⵎⴰⵏ ⴳ ⴽⵓ ⵜⵉⵔⵓⴱⴱⴰ, ⴷⴼⴼⵉⵔ ⵏ ⵜⵖⵜⴰⵙⵜ ⵏ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⴳ 10 ⵢⵓⵏⵢⵓ ⴼ ⵜⴰⵣⵣⴰⵏⵉⵏ ⴷ ⵓⵣⵡⴰⴳ.
ⵜⵙⵙⵀⵔⵛ ⵜⵙⵇⵇⵉⵎⵜ ⵜⴰⵖⵜⴰⵙⵜ ⵉⴳⴰⵏ ⵎⴳⴰⵍ ⵏ ⵜⵎⴰⴷⵔⴰⵡⵜ ⵉⵙⵎⵓⵏⵏ ⵍⵎⵖⵔⵉⴱ ⴷ ⵜⵎⵓⵏⵜ ⵏ ⵓⵕⵓⴱⴱⴰ, ⵜⵙⵙⵅⵛⵏ ⵓⵍⴰ ⵜⵉⵔⵎⵉⵜⵉⵏ ⵏ ⴽⵔⴰ ⵏ ⵜⵙⴳⴳⵉⵡⵉⵏ ⴳ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⵉⵔⴰⵏ ⴰⵙⵏⴼⵍ ⵏ ⵜⴰⵙⵙⴰⵙⵜ ⵜⴰⵙⵉⵏⵔⴰⵏⵜ ⵏⴳⵔ ⵍⵎⵖⵔⵉⴱ ⴷ ⵚⴱⴰⵏⵢⴰ ⵙ ⵓⵙⴽⵛⵎ ⵏ ⵜⵎⵓⵏⵜ ⵏ ⵓⵕⵓⴱⴱⴰ.
ⵜⵎⴷⴰⵡⴰⵍ ⵜⵙⵇⵇⵉⵎⵜ ⵓⵍⴰ ⴼ ⵓⵙⵎⵔⵙ ⵏ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⵙⴳ ⵚⴱⴰⵏⵢⴰ ⴳ ⵜⴰⵙⵙⴰⵙⴰⵜ ⵜⴰⵙⵉⵏⵔⴰⵏⵜ, ⵜⵉⵜⵜⵉⵏ ⴼ ⵜⵎⴰⵙⴰⵢⵜ ⵏⵏⵙ ⴳ ⵓⵎⵏⵉⴷ ⴰⴷ ⵍⵍⵉⵖ ⵜⵙⵏⵓⴱⴳ ⴰⵅⴰⵜⴰⵔ ⵏ ⵎⴰⵔⵓⵔ ⵏ ⴱⵓⵍⵉⵙⴰⵕⵢⵓ, ⴷ ⵜⵉⵔⵎⵉⵜⵉⵏ ⵏⵏⵙ ⴳⴳⵓⵜⵏⵉⵏ ⵎⴳⴰⵍ ⵏ ⵜⵎⵙⴰⵔⵉⵏ ⴼ ⵉⵍⵍⴰ ⵓⵎⴰⴽⵕⴰⴹ ⴰⵏⴰⵎⵓⵔ ⴳ ⵍⵎⵖⵔⵉⴱ: ⵜⴰⵎⵙⴰⵔⵜ ⵏ ⵜⵏⵣⵔⵓⴼⵜ ⵜⴰⵎⵖⵔⵉⴱⵉⵜ.
ⵜⵉⵏⵉ ⵜⵙⵇⵇⵉⵎⵜ ⴳ ⵓⵚⵉⵡⴹ ⵏⵏⵙ ⴰⵏⵖⵎⴰⵙ ⵎⴰⵙ ⵜⴳⴰ ⵜⵖⵜⴰⵙⵜ ⵏ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⵡⴰⵔⴰⵙⵉⵙⵙⵏ ⵏ ⵜⵎⵙⴽⴰⵔ ⴷ ⵜⵢⴰⴼⵓⵜⵉⵏ ⵍⵍⵉ ⵉⵙⴽⵔ ⵍⵎⵖⵔⵉⴱ ⴷ ⵜⵎⵓⵏⵜ ⵏ ⵓⵕⵓⴱⴱⴰ ⵙ ⵜⵎⵢⵉⵎⴰⵏⵜ ⵉⵛⵛⴰⵔⵏ ⴷ ⵓⴷⵔⵓ ⵏ ⵓⵎⵍⴰⵏ ⴷ ⵜⵡⵓⵔⵉ ⵉⵛⵛⴰⵔⵏ ⵉ ⵓⵙⴱⴷⴷⵉ ⵏ ⵜⴻⵟⵟⵓⵕⴼⴰ ⴷ ⵓⵣⵡⴰⴳ ⵡⴰⵔⵓⵍⴳⵉⵏ.
ⵜⵙⴷⴷⵉⴷ ⵜⵙⵇⵇⵉⵎⵜ ⵎⴰⵙ ⴷ ⵓⵔ ⵜⵎⵙⴰⵙⴰ ⵜⵖⵜⴰⵙⵜ ⵏ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⴷ ⵡⴰⴷⴷⴰⴷⵏ ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ ⴷ ⵜⵎⵔⵙⴰⵍ ⵢⴰⴹⵏⵉⵏ ⵜⵉⴳⵔⴰⵖⵍⴰⵏⵉⵏ ⵍⵍⵉ ⵙⴽⵔⵏⵉⵏ ⴳ ⵍⵎⵖⵔⵉⴱ ⴰⵎⴷⵔⴰⵡ ⴰⵙⵜⵔⴰⵜⵉⵊⵉ ⴷ ⵡⴰⵏⴰⵡ ⴳ ⵜⵏⴼⵔⵓⵜ ⴷ ⵓⵔⴳⴳⵉⴳ ⴷ ⵜⴳⵎⵉ ⴳ ⵢⴰⵜ ⵜⵙⴳⴰ ⴳ ⵍⵍⴰⵏⵜ ⵜⵎⵓⴽⵔⵉⵙⵉⵏ.
ⵜⵙⵓⵜⴳ ⵜⵙⵇⵇⵉⵎⵜ ⵉⵛⵛⴰⵔⵏ ⵉⵙⵡⴰⵍⴰⵢⵏ ⵉⴳⵍⴷⴰⵏⵏ ⴰⵜⵜⵓⵢⵏⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴼ ⵓⴼⵓⴽⴽⵓ ⵉⵙⵎⴷⵏ ⵏ ⵜⵎⵙⴰⵔⵜ ⵏ ⵜⴰⵣⵣⴰⵏⵉⵏ ⵡⴰⵔ ⵉⴷ ⴱⴰⴱ ⵏⵏⵙⵏ, ⵍⵍⵉⵖ ⴳⴰⵏⵜ ⵜⵎⵙⴽⴰⵔ ⴷ ⵜⴱⵔⵉⴷⵉⵏ ⵍⵍⴰⵏⵉⵏ ⵜⴰⴱⴱⴰⵢⴹⴰⵕⵜ ⴷⴰⵜ ⵏ ⵓⴼⵓⴽⴽⵓ ⵉⵙⵎⴷⵏ ⵏ ⵓⵎⵓⴽⵔⵉⵙ ⴰⴷ. ⵖⵔⵉⵏ ⵉ ⵉⵏⴳⴳⵯⴰ ⵏⵏⵙⵏ ⴳ ⵓⵕⵓⴱⴱⴰ ⵉ ⵓⵙⵎⵀⵍ ⵏ ⵜⵙⵇⵇⵉⵎⵜ ⵜⴰⴱⵕⵍⴰⵎⴰⵏⵉⵜ ⵉⵛⵛⴰⵔⵏ ⵏⴳⵔ ⵍⵎⵖⵔⵉⴱ ⴷ ⵜⴰⵎⴰⵏⵜ ⵏ ⵓⵕⵓⴱⴱⴰ ⵍⵍⵉ ⵉⵜⵜⴰⵡⵙⵏ ⴳ ⵓⵎⵙⴰⵡⴰⵍ ⴰⴱⵕⵍⴰⵎⴰⵏⵉ ⴷ ⵓⵎⵢⴰⵡⴰⵙ ⵉⵛⵛⴰⵔⵏ ⴼ ⵜⵎⵙⴰⵔⵉⵏ ⵜⵉⵏⴰⵎⵎⴰⵙⵉⵏ ⴼ ⵜⵎⴷⵔⴰⵡⵜ ⵊⴰⵔ ⵏⵏⵙⵏ.
ⵜⵙⵓⵜⴳ ⵜⵙⵇⵇⵉⵜ ⵉⴳⵎⴰⵎⵏ ⵏ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⵍⵍⵉ ⵓⵔ ⵍⵍⵉⵏⵉⵏ ⴷ ⵜⵉⵔⵎⵉⵜⵉⵏ ⵏ ⴽⵔⴰ ⵏ ⵜⵙⴳⴳⵉⵡⵉⵏ, ⵍⵍⵉⵖ ⴼⵔⴽⵏ ⵙ ⵜⴷⵓⵙⵉ ⵏ ⵜⵎⴷⵔⴰⵡⵜ ⵊⴰⵔ ⵜⴰⵎⵓⵏⵜ ⵏ ⵓⵕⵓⴱⴱⴰ ⴷ ⵍⵎⵖⵔⵉⴱ ⵍⵍⵉ ⵉⴳⴰⵏ ⴰⵎⴷⵔⴰⵡ ⵏ ⵜⵎⵢⵉⵎⴰⵏⵜ ⴷ ⵓⵖⵣⴰⵏ, ⵖⵎⴽ ⴰⵏⵏ ⴷ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ, ⴷ ⵜⵎⵓⵏⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⴰⵄⵕⴰⴱⵜ ⴷ ⵜⴰⴼⵔⵉⵇⵉⵜ, ⵜⴰⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⵓⵙⵍⵉⵎ, ⵜⴰⴳⵔⴰⵡⵜ ⵏ ⵉⵡⴰⵏⴽⵏ ⴰⵄⵕⴰⴱⵏ, ⴰⵙⵇⵇⵉⵎ ⵏ ⵓⵎⵢⴰⵡⴰⵙ ⴰⵅⴰⵍⵉⵊⵉ, ⴼ ⵜⵡⵓⵉⵣⵉ ⵏⵏⵙⵏ ⴰⴽⴷ ⵜⴰⴳⵍⴷⵉⵜ ⵜⴰⵎⵖⵔⵉⴱⵉⵜ ⵎⴳⴰⵍ ⵏ ⵜⵖⵜⴰⵙⵜ ⵏ ⵓⵕⵓⴱⴱⴰ.
ⵜⵙⴷⴷⵉⴷ ⵜⵙⵇⵇⵉⵎⵜ ⴼ ⵜⵣⵣⵉⴳⵣⵜ ⵏ ⵜⵡⵓⵔⵉ ⴷ ⵉⵎⴷⵔⴰⵡⵏ ⵏⵏⵙ ⴳ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⵉ ⵓⵙⴷⵓⵙ ⵏ ⵜⵢⴰⴼⵓⵜⵉⵏ ⴷ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⴷ ⵜⵎⴰⴷⵔⴰⵡⵜ ⵊⴰⵔ ⵍⵎⵖⵔⵉⴱ ⴷ ⵜⵎⵓⵏⵜ ⵏ ⵓⵕⵓⴱⴱⴰ, ⴷ ⵓⵎⵙⴰⵡⴰⵍ ⵓⵙⵔⵉⴷ ⴷ ⵜⵔⵓⴱⴱⴰ ⵜⵉⵙⵔⵜⴰⵏⵉⵏ ⵍⵍⴰⵏⵉⵏ ⴳ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⴼ ⵜⴰⵏⵏⴰⵢⵉⵏ ⴳ ⴽⵓ ⵉⴳⵔⴰⵏ.