ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙⵎⵎⵓⵙ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴼ ⵢⵉⴳⵔ ⵏ ⵜⴼⵍⵍⴰⵃⵜ ⴷ ⵜⴼⴰⵜⵉⵜ ⵏ ⵉⵢⴰⴼⵓⵜⵏ ⵏ ⵜⴼⵍⵍⴰⵃⵜ
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 08 ⵢⵓⵏⵢⵓ 2021, ⵙ ⵓⵎⴰⴽⵕⴰⴹ ⵙⵎⵎⵓⵙ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴼ ⵢⵉⴳⵔ ⵏ ⵜⴼⵍⵍⴰⵃⵜ ⴷ ⵜⴼⴰⵜⵉⵜ ⵏ ⵉⵢⴰⴼⵓⵜⵏ ⵏⵏⵙ, ⵜⵉⵍⵉ ⵜⴰⴳⵯⵉⵜ ⵏ ⵜⴰⵡⵙⵓⴷⵔⵉⵏ ⵏ ⵉⵎⵛⵛⵉⵡⴰⵕ, ⴳ ⵜⵖⵉⵎⵉⵜⵉⵏ ⵜⵉⴳⴷⵓⴷⴰⵏⵉⵏ ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ, ⵙ ⵜⵉⵍⵉⵜ ⵏ ⵎⴰⵙⵙ ⵄⴰⵣⵉⵣ ⴰⵅⵏⵓⵛ ⴰⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴷ ⵜⴳⵎⵔⵜ ⵜⴰⵢⵍⴰⵏ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ.
ⴳ ⵜⵣⵡⵉⵔⵉ, ⵜⵙⴰⵡⵍ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴼ ⵓⴷⴷⵀⵛⵔ ⵏⵏⵙⵏ ⵎⵏⵉⴷ ⵏ ⵓⵙⵏⴼⴰⵔ ⵏ ⵜⵖⵜⴰⵙⵜ ⴳ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⴼ “ⵓⵙⵎⵔⵙ ⵉⵜⵜⵓⵏⵏⴰⵏ ⵏ ⵉⵎⵥⵢⴰⵏⵏ ⵙⴳ ⵜⵉⵏⴱⴰⴹⵉⵏ ⵜⵉⵎⵖⵔⵉⴱⵉⵢⵉⵏ”. ⵙⴷⴷⵉⴷⵏ ⵉⴷ ⵎⴰⵙⵙ ⵉⵎⵓⵔⴰ ⵎⴰⵙ ⴷ ⴰⵙⵎⵔⵙ ⵏ ⵜⵎⵙⴰⵔⵜ ⵏ ⵓⵣⵡⴰⴳ, ⴳ ⵎⴰⴷ ⵉⵥⵍⵉⵏ ⵙ ⵉⵎⵥⵢⴰⵏⵏ, ⵉⴳⴰ ⵜⵉⵔⵎⵉⵜ ⵏ ⵓⵙⴽⵛⵎ ⵏ ⵓⵕⵓⴱⴱⴰ ⴳ ⵜⵎⵓⴽⵔⵉⵙⵜ ⵜⴰⵙⵉⵏⵔⴰⵏⵜ ⵊⴰⵔ ⵍⵎⵖⵔⵉⴱ ⴷ ⵚⴱⴰⵏⵢⴰ, ⴰⴳⵯⵉⵏ ⵜⴰⵙⵔⵜⵉⵜ ⵏ ⵙⵉⵏ ⵡⵓⴷⵎⴰⵡⵏ ⵙⴳ ⵚⴱⴰⵏⵢⴰ, ⴱⴷⵔⵏ ⴰⵖⵓⵍⵉⴼ ⵏⵏⵙⵏ ⵎⵏⵉⴷ ⵏ ⵓⵙⵏⵓⴱⴳ ⵏ ⵚⴱⴰⵏⵢⴰ ⵏ ⵢⴰⵏ ⵓⴼⴳⴰⵏ ⵍⵍⵉ ⵜⴹⴼⵕ ⵜⵣⵔⴼⵜ ⵏⵏⵙ ⵙ ⵉⴱⴽⴽⴰⴹⵏ ⵏⵏⵙ ⵎⵏⵉⴷ ⵏ ⵉⵚⴱⵍⵢⵓⵏⵏ, ⵙ ⵜⵓⵔⴰⴳⵜ ⵏ ⵓⵎⵓⴷⴷⵓ ⵉⵜⵜⵓⵥⵡⵡⴰⵕⵏ.
ⵖⵔⵉⵏ ⵉⵎⵓⵔⴰ ⵉⵎⵖⵔⵉⴱⵉⵢⵏ ⵉ ⵉⵏⴳⴳⵯⴰ ⵏⵏⵙⵏ ⴳ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⵃⵎⴰ ⴰⴷ ⵓⵔ ⵢⵉⵍⵉ ⵓⵙⴽⵛⵎ ⵏ ⵜⵎⵓⵏⵜ ⵏ ⵓⵕⵓⴱⴱⴰ ⴳ ⵜⵎⵓⴽⵔⵉⵙⵜ ⵜⴰⵙⵉⵏⵔⴰⵏⵜ ⵊⴰⵔ ⵍⵎⵖⵔⵉⴱ ⴷ ⵚⴱⴰⵏⵢⴰ, ⵉⵏⵉⵏ ⵎⴰⵙ ⵜⴳⴰ ⵜⵙⵇⵇⵉⵎⵜ ⵜⴰⴱⵕⵍⴰⵎⴰⵏⵉⵜ ⵉⵛⵛⴰⵔⵏ ⵊⴰⵔ ⵍⵎⵖⵔⵉⴱ ⴷ ⵜⴰⵎⵓⵏⵜ ⵏ ⵓⵕⵓⴱⴱⴰ ⵉⵎⵉⵙⵙ ⵉⵙⵜⴰⵡⵀⵎⵎⴰ ⵉ ⵓⵎⵙⴰⵡⴰⵍ ⵊⴰⵔ ⵏⵏⵙⵏ, ⵉⵏⵉⵏ ⵎⴰⵙ ⵉⵣⴷⵉ ⵍⵎⵖⵔⵉⴱ ⴷ ⵜⵎⵓⵏⵜ ⵏ ⵓⵕⵓⴱⴱⴰ ⵙ ⵜⵣⴷⴰⵢⵉⵏ ⴷⵓⵙⵏⵉⵏ, ⵖⵎⴽ ⵍⵍⵉ ⵣⵣⵉⴳⵉⵣⵏⵜ ⵙ ⵜⵖⴰⵔⴰⵙⵜ ⵉⵥⵉⵍⵏ, ⵙⴷⴷⵉⴷⵏ ⵎⴰⵙ ⵉⴳⴰ ⵍⵎⵖⵔⵉⴱ ⴰⵎⴷⵔⴰⵡ ⵉⵥⵉⵍⵏ ⵉⵙⴽⴰⵔⵏ ⵙ ⵜⵎⵔⵉⵙⵉⵏ ⵏⵏⵙ ⵙ ⵜⵖⴰⵔⴰⵙⵜ ⵉⵙⵎⴷⵏ ⴳ ⵓⵙⵎⵔⵙ ⵏ ⵓⵣⵡⴰⴳ, ⵖⵎⴽ ⵍⵍⵉ ⵙⵏⴰⵍⵏ ⵜⴰⴷⵉⴱⵍⵓⵎⴰⵙⵉⵜ ⵜⴰⵎⵖⵔⵉⴱⵉⵜ ⴷ ⵓⵙⵡⵓⵔⵉ ⵏⵏⵙ ⴼ ⵓⵎⵣⴰⵖ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⴷ ⵜⵏⵓⴼⴰ ⴰⵜⵜⵓⵢⵏⵉⵏ ⵏ ⵜⴳⵍⴷⵉⵜ.
ⵉⵙⴷⴷⵉⴷ ⵎⴰⵙⵙ ⵄⴰⵣⵉⵣ ⴰⵅⵏⵓⵛ, ⴰⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴷ ⵜⴳⵎⵔⵜ ⵜⴰⵢⵍⴰⵏⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ, ⵎⴰⵙ ⵉⵙⵖⴰⵡⵙⴰ ⵓⵙⴰⵜⵉ ⴰⵣⵣⵔⴰⴼ ⵏ ⵜⴼⵍⵍⴰⵃⵜ ⴰⵙⴷⵓⵙ ⴷ ⵓⵙⵔⵅⵓ ⵏ ⵓⴽⵛⵎ ⵙ ⵡⴰⵢⴷⴰ ⵃⵎⴰ ⴰⴷ ⵉⵏⵏⵓⵕⵥⵎ ⴼ ⵉⴷ ⴱⴰⴱ ⵏ ⵓⵙⵙⴰⵔⵓ ⵉⵡⴷⴰⵏ ⵓⵍⴰ ⵜⵉⵎⵙⵏⵜⵉⵢⵉⵏ, ⴰⵢⵍⵍⵉ ⵔⴰⴷ ⵢⴰⵍⵍ ⴳ ⵓⴼⴰⵔⵙ ⴷ ⵜⵢⴰⴼⵓⵜ ⴷ ⵓⵙⵡⵓⵔⵉ ⴳ ⵓⵎⴰⴹⴰⵍ ⴰⴼⴰⵔⴰⵏ ⵙ ⵓⴼⵔⴰⴳ ⵏ ⵓⴼⵔⵉⵙ ⴰⵏⴼⵍⴰⵃ ⵏ ⵉⴽⴰⵍⵉⵡⵏ, ⵉⵇⵇⴰⵏ ⴷ ⵓⵙⵏⴼⵍ ⵏ ⵜⵓⵎⴰⵢⵉⵏ ⵜⵉⵣⵣⵔⴰⴼⵉⵏ ⵍⵍⵉ ⴳⴰⵏⵉⵏ ⵜⴰⴱⴱⴰⵢⴹⴰⵕⵜ ⴷⴰⵜ ⵏ ⵓⴽⵛⵓⵎ ⵙ ⵡⴰⵢⴷⴰ ⴷ ⵓⵙⵓⵜⴳ ⵏ ⵓⵟⵟⵓⴼ.
ⵉⵡⴰⵜⵜⵙ ⵓⵙⵏⴼⴰⵔ ⵏ ⵓⵙⵍⴳⵏ 63.18 ⵉ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⴹⴰⵀⵉⵕ ⴰⵛⴰⵔⵉⴼ ⵉⴳⴰⵏ ⴰⵙⵍⴳⵏ 1.72.277 ⵏ 22 ⴷⵓ ⵍⵇⵉⵄⴷⴰ 1392 (29 ⴷⵓⵊⴰⵏⴱⵉⵔ 1972) ⵉ ⵜⵉⴽⴽⵉ ⵏ ⴽⵔⴰ ⵏ ⵉⴼⵍⵍⴰⵃⵏ ⵉⴽⴰⵍⵉⵡⵏ ⵏ ⵜⴼⵍⵍⴰⵃⵜ ⵍⵍⴰⵏⵉⵏ ⴳ ⵡⴰⵢⴷⴰ ⵏ ⵓⵡⴰⵏⴽ, ⴷ ⵓⴼⵓⴽⴽⵓ ⵏ ⵜⵎⵓⴽⵔⵉⵙⵜ ⵏ ⵉⴼⵍⵍⴰⵃⵏ ⵓⵔ ⵟⵟⴰⴼⵏⵉⵏ ⴰⵙⵍⴽⵉⵏ ⵏ ⵡⴰⵍⴰⵢ ⵏ ⵓⴼⵓⵙ, ⴳⴰⵏ 10000 ⵏ ⵓⴼⵍⵍⴰⵃ ⵙⵡⵓⵔⵉⵏⵉⵏ ⴳ 130.000 ⵀⵉⴽⵟⴰⵕ ⴳ ⵓⵙⵎⴽⵍ ⵏ ⵜⵎⵓⴽⵔⵉⵙⵉⵏ ⵍⵍⵉ ⴷ ⵉⵡⵉⵏⵜ ⵜⵓⵎⴰⵢⵉⵏ ⵜⵉⵣⵔⴼⴰⵏⵉⵏ ⵍⵍⴰⵏⵉⵏ ⴳ ⵓⵙⵍⴳⵏ ⵏ ⵓⵎⵓⴽⵏ ⴰⵏⴼⵍⴰⵃ.
ⵉⵡⴰⵜⵜⵙ ⵓⵙⵏⴼⴰⵔ ⵏ ⵓⵙⵍⴳⵏ 62.19 ⵉ ⵓⵙⵔⵓⵙ ⵏ ⵜⵓⵎⴰⵢⵉⵏ ⴼ ⵎⵙⵓⵖⵜ ⵏ ⵜⵎⵙⵙⵓⵔⵉⵏ ⵏ ⵜⵡⵉⵙⵉ ⴷ ⵜⵎⵙⵙⵓⵔⵉⵏ ⵏ ⵍⵓⵚⵓⵉⵜ ⴰⵢⴷⴰ ⵏ ⵜⴼⵍⵍⴰⵃⵜ ⴱⵕⵕⴰ ⵏ ⵜⵖⵔⵎⵉⵏ, ⴰⵙⴽⵔ ⵏ ⵜⵣⵣⵓⵍⵉⵏ ⴳ ⵜⴼⵍⵍⴰⵃⵜ ⴷ ⵡⴰⵍⴰⵢ ⵏ ⵓⴼⴰⵔⵙ ⴷ ⵜⵢⴰⴼⵓⵜ ⵏ ⵜⴼⵔⴽⵉⵏ. ⵔⴰⴷ ⴰⵡⵙⵏ ⵙⵉⵏ ⵉⵙⵏⴼⴰⵔⵏ ⴳ ⵓⵙⵎⵖⵔ ⵏ ⵓⵙⵓⵔⵙ ⴰⴷⵎⵙⴰⵏ ⴷ ⵓⵏⴰⵎⵓⵏ ⵏ ⵉⴼⵍⵍⴰⵃⵏ ⴳ ⵓⵙⵎⵖⵔ ⵏ ⵓⵙⵙⴰⵔⵓ ⴳ ⵡⴰⵢⴷⴰ ⵏ ⵜⴼⵍⵍⴰⵃⵜ ⴷ ⵓⵙⴷⵓⵙ ⵏ ⵓⵙⵙⵥⵕⴼ ⴷ ⵉⵕⵟⵟⴰⵍⵏ.
ⵉⴱⴷⴷⵉⴷ ⵎⴰⵙⵙ ⴰⵅⵏⵓⵛ ⴼ ⵜⵓⴳⴳⴰⵙ ⵏ ⵓⵙⵉⵔⴰ ⴰⵏⴰⵎⵓⵔ ⵏ ⵜⴼⴰⵜⵉⵜ ⵜⴰⴷⵓⵙⴰⵏⵜ ⵏ ⵉⵢⴰⴼⵓⵜⵏ ⵏ ⵓⵜⵛⵓ ⴳ ⵓⵙⵡⵓⵜⵜⵓ ⵏ ⵜⵎⵓⴽⵔⵉⵙⵉⵏ ⵎⵏⵉⴷ ⵏ ⵜⵙⵔⵜⵉⵜ ⵉⵙⵎⴷⵏ ⴷⴰⵜ ⵏ ⵜⴼⴰⵜⵉⵜ ⵜⴰⴷⵓⵙⴰⵏⵜ, ⵍⵍⵉ ⵉⴳⴰⵏ ⵜⴰⵎⵣⵡⴰⵔⵓⵜ ⴷⴰⵔ ⵜⴳⵍⴷⵉⵜ ⴳ ⵓⵎⵏⴰⴹ ⵏ ⵜⵏⴰⵥⴰⵕⵉⵏ ⵛⵛⵓⴽⴽⴰⵏⵉⵏ ⵉⵙⵖⴰⵍⵏ ⵉⴳⵔⴰⵖⵍⴰⵏⵏ ⴷ ⵉⵣⵣⵔⴰⴼⵏ ⵏ ⵜⴼⴰⵜⵉⵜ ⵜⴰⴷⵓⵙⴰⵏⵜ ⴷ ⵜⵉⵏ ⵉⵎⵖⵉⵢⵏ ⴷ ⵓⵙⵎⵔⵙ ⵏ ⵉⴱⴰⵢⴳⵓⵏⵏ, ⴷ ⵓⵙⵎⵣⴰⵣⴰⵍ ⵏ ⵉⵙⵍⴳⵏⵏ ⵉⵏⴰⵎⵓⵔⵏ ⴷ ⵡⵉⵏ ⵜⵎⵉⵣⴰⵔ ⵎⵓ ⵉⵜⵜⴷⴷⵓ ⵓⵢⴰⴼⵓ ⴰⵎⵖⵔⵉⴱⵉ ⵃⵎⴰ ⴰⴷ ⵓⵔ ⵉⵍⵉⵏ ⵉⵡⵜⵜⴰ ⵏ ⵡⵉⵏ ⴷⴷⵉⵡⴰⵏⴰ ⴷ ⵉⴷⵓⵙⴰⵏⵏ.
ⵉⵡⴰⵜⵜⵙ ⵓⵙⵏⴼⴰⵔ ⵏ ⵓⵙⵍⴳⵏ 76.17 ⴼ ⵓⴼⵔⴰⴳ ⵏ ⵉⵎⵖⵉⵢⵏ, ⴰⵙⵔⵓⵙ ⵏ ⵜⵎⵙⴽⴰⵔ ⵜⵉⵣⵔⴼⴰⵏⵉⵏ ⵉ ⵓⴼⵔⴰⴳ ⵏ ⵉⵎⵖⵉⵢⵏ, ⴳ ⵓⵎⵏⴰⴹ ⴳ ⵍⵍⴰⵏ ⵉⴱⴰⵢⵢⵓⵕⵏ ⵍⵍⵉ ⵔⴰⴷ ⵉⴹⵕⵕⵓ ⴰⵢⴷⴰ ⴰⵏⴰⵎⵓⵔ ⵏ ⵉⵎⵖⵉⵢⵏ, ⴷ ⵓⵙⴽⵔ ⵏ ⵜⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵜⴳⵍⴷⵉⵜ.
ⵉⵡⴰⵜⵜⵙ ⵓⵙⵏⴼⴰⵔ ⵏ ⵓⵙⵍⴳⵏ 34.18 ⴼ ⵉⵢⴰⴼⵓⵜⵏ ⵏ ⵓⴼⵔⴰⴳ ⵏ ⵉⵎⵖⵉⵢⵏ ⴰⵙⵎⴰⵢⵏⵓ ⵏ ⵓⵙⵍⴳⵏ 95.24 , ⴰⵛⴽⵓ ⵉⵍⵍⴰ ⵓⵎⴰⵢⵏⵓ ⴰⴳⵔⴰⵖⵍⴰⵏ ⴰⵎⴰⵙⵙⴰⵏ ⴼ ⵜⵉⴹⴼ ⵏ ⵉⴱⴰⵢⴳⵓⵜⵏ ⵏ ⵉⴱⴰⵢⵢⵓⵕⵏ ⵏ ⵜⴼⵍⵍⴰⵃⵜ ⴷ ⵓⵙⵏⵎⴰⵍⴰ ⵏ ⵓⵙⵖⵏⵣⵉ. ⵉⴽⵛⵎ ⴳ ⵜⵙⵜⵔⴰⵜⵉⵊⵉⵜ ⵜⵓⵏⴱⵉⴹⵜ ⵉ ⵜⴼⵍⵍⴰⵃⵜ ⵉⵙⵓⵍⵏ ⵉⴳⴰⵏ ⵜⴰⵎⵙⵜⴳⴳⴰⵔⵜ ⴷ ⵓⴹⵎⵏ ⵏ ⵜⴼⴰⵜⵉⵜ ⵏ ⵓⴼⴳⴰⵏ ⴷ ⵓⵎⵓⴷⵔ ⴷ ⵡⴰⵡⵏⴰⴹ ⴷ ⵓⵙⵎⴰⵢⵏⵓ ⵏ ⵉⵙⵡⵓⴷⴷⵓⵜⵏ ⴷ ⵜⴼⴰⴷⵉⵡⵉⵏ ⵏ ⵓⵙⵎⵔⵙ ⵏ ⵜⵎⵜⵜⵉⵡⵉⵏ ⴰⴷ.
ⵉⵡⴰⵜⵜⵙ ⵓⵙⵏⴼⴰⵔ ⵏ ⵓⵙⵍⴳⵏ 53.18 ⴼ ⵉⵢⴰⴼⵓⵜⵏ ⵏ ⵓⵙⴱⵍⵙ ⵏ ⵉⵎⵖⵉⵢⵏ ⴰⵙⵡⵓⵜⵜⵓ ⵏ ⵜⴼⴰⴷⵉⵡⵉⵏ ⵏ ⵓⵙⵎⵏⵉⴷ ⵏ ⵉⵢⴰⴼⵓⵜⵏ ⴳ ⵓⴳⴰⴷⴰⵣ ⴷ ⵓⵙⴽⵛⵎ ⴷ ⵓⴱⵟⵟⵓ ⵏⵏⵙⵏ ⵙ ⵉⵙⴰⵖⵓⵍⵏ ⵉⴳⵔⴰⵖⵍⴰⵏⵏ ⴼ ⵓⴼⵔⴰⴳ ⵏ ⵜⴷⵓⵙⵉ ⵏ ⵓⴼⴳⴰⵏ ⴷ ⵓⵎⵓⴷⵔ ⴷ ⵡⴰⵡⵏⴰⴹ.
ⵙⴰⵡⵍⵏ ⵉⵎⵓⵔⴰ ⵉⴳⵏⵙⴰⵙⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⴼ ⵓⵙⵓⵜⴳ ⵏ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴰⴷ, ⵔⴰⴷ ⴰⵡⵙⵏ ⴳ ⵓⵙⴽⵔ ⵏ ⵜⴷⵉⵏⴰⵎⵉⵜ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ ⴳ ⵢⵉⴳⵔ ⴰⴼⴰⵔⴰⵏ ⵙ ⵜⵉⴽⴽⵉ ⵏ ⵉⴼⵙⵙⴰⵢⵏ ⵉ ⵜⵎⵓⴽⵔⵉⵙⵉⵏ ⵜⵉⵣⵔⴼⴰⵏⵉⵏ ⴷ ⵓⵙⵎⴽⵍ ⵏ ⵜⵎⵓⴽⵔⵉⵙⵉⵏ ⵏ ⵜⴼⵍⵍⴰⵃⵜ ⴷ ⵓⵙⵀⵡⵏ ⵏ ⵜⴱⵔⵉⴷⵉⵏ ⴷ ⵓⵣⵓⵛⵛⵍ ⵏ ⵉⴱⴹⵉⵢⵏ ⵏ ⵜⵣⵔⴼⵜ ⵍⵍⵉ ⴷⴰⵔ ⵜⴰⵣⴷⴰⵢⵜ, ⵙⵓⵜⴳⵏ ⵉⵎⵓⵔⴰ ⵜⴰⵙⵏⵜⴰⵢⵜ ⵜⴰⵣⵣⵔⴰⴼⵜ ⴼ ⵉⵙⵓⵖⴰⵍ ⵏ ⵜⴼⴰⵜⵉⵜ ⴷ ⵓⴼⵔⴰⴳ ⵏ ⵜⴳⵎⵉ ⵜⴰⵏⴼⵍⴰⵃⵜ ⵜⴰⵙⵓⵍⴰⵏⵜ ⴷ ⵜⵏⴼⵔⵓⵜ ⵜⴰⴷⵓⵙⴰⵏⵜ ⵏ ⵉⵏⵎⵓⵔⴰⵏ ⴷ ⵉⵏⵙⵎⵓⵔⵏ ⴷ ⵉⴼⵍⵍⴰⵃⵏ.
ⵜⵍⵍⴰ ⵜⴰⴳⵯⵉⵜ ⵏ ⵜⵙⵓⵎⵔⵜ ⵏ ⵓⵙⵍⴳⵏ ⴼ ⵓⴼⵓⴽⴽⵓ ⵏ ⵓⵏⴳⵔⴰⵡ ⵏ ⵜⴰⵡⵙⵓⴷⵔⵉⵏ ⵏ ⵉⵎⵛⵛⵉⵡⴰⵕ, ⵉⵜⵜⵓⵙⵏⴼⴰⵍ, ⵔⴰⴷ ⵉⵜⵜⵓⵚⵕⵉⴼ ⵉ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵉ ⵜⵖⵔⵉ ⵜⵉⵙ ⵙⵏⴰⵜ.