ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⴼ ⵜⵡⵓⵔⵉ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵉⵜⵜⵓⵙⵎⴰⴳⴰⵍⵏ ⵙ ⵓⵣⵣⵔⴰⵢ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴼ ⵓⵙⵙⵍⵎⴷ ⴰⵎⵣⵡⴰⵔⵓ

ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵕⴰⵙ 02 ⵢⵓⵏⵢⵓ 2021, ⴳ ⵓⵙⵖⵉⵎ ⵏ ⵓⵙⵇⵇⵉⵎ ⵜⴰⵙⵎⵓⵏⵉ ⴼ ⵜⵡⵓⵔⵉ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵉⵜⵜⵓⵙⵎⴰⴳⴰⵍⵏ ⵙ ⵓⵣⵣⵔⴰⵢ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴼ ⵓⵙⵙⵍⵎⴷ ⴰⵎⵣⵡⴰⵔⵓ, ⵜⵥⵍⵉ ⵉ ⵓⴹⴼⵕ ⵏ ⵜⵣⵣⵉⴳⵣⵜ ⵏ ⵜⵡⵓⵔⵉⵡⵉⵏ ⵏⵏⵙ.

ⵉⵏⵏⴰ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵙⴰⵙⴰ ⵏ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⴰⴷ ⵉⴳ ⵓⵙⵙⵍⵎⴷ ⴰⵎⵣⵡⴰⵔⵓ ⵡⵉⵙ ⴽⴽⵓⵥ ⴳ ⵓⵣⵣⵔⴰⵢ ⵙⴳ 2015 ⴳ ⵓⵏⵢⴰⵍⴽⴰⵎ ⴷ ⵎⴰⵙ ⴰ ⵉⵜⵜⵇⵍ ⵡⴰⵎⵓⵏ ⴰⵎⵖⵔⵉⴱⵉ, ⴳ ⵓⵙⴰⵜⵉ ⵏ ⵉⵙⵡⴰⵍⴰⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵍⵍⵉ ⵉⵏⵏⴰⵏ ⴳ ⵜⴱⵔⴰⵜ ⵏⵏⵙ ⵜⴰⵎⴰⵜⵜⵓⵢⵜ ⵉ ⵉⵎⴷⵔⴰⵡⵏ ⴳ ⵡⴰⵙⵙ ⴰⵏⴰⵎⵓⵔ ⴼ ⵓⵙⵙⵍⵎⴷ ⴰⵎⵣⵡⴰⵔⵓ ⴳ ⵚⵚⵅⵉⵔⴰⵜ 2018:

“ⵓⵔ ⴼⵍⵍⴰⵡⵏ ⵉⵃⴱⵉ ⵡⴰⵜⵉⴳ ⵏ ⵓⵙⵙⵍⵎⴷ ⴰⵎⵣⵡⴰⵔⵓ ⴳ ⵓⵎⵓⴽⵏ ⵏ ⵓⵏⴳⵔⴰⵡ ⵏ ⵓⵙⴳⵎⵉ, ⵍⵍⵉⵖ ⵉⴳⴰ ⵜⴰⵔⵙⵍⵜ ⵉⴷⵓⵙⵏ ⵖ ⵉⵜⵜⵓⵙⵏⵜⴰ ⴽⵓ ⴰⵎⵓⴽⵏ, ⵍⵍⵉⵖ ⴰ ⵢⴰⴽⴽⴰ ⵉ ⵡⴰⵔⵔⴰⵡ ⵜⵉⵙⵓⴳⴰⵔ ⵏ ⵓⵏⵍⵉ ⴷ ⵜⵓⵙⵙⵏⴰ, ⴰⵔ ⴰⵙⵏⵜ ⵜⵜⴰⵡⵙⵏ ⴳ ⵓⴽⵛⵓⵎ ⵉⴱⵙⵓⵙⵏ ⵙ ⵜⵖⵔⵉ, ⴷ ⵓⵎⵓⵔⵙ ⴳ ⵓⴱⵔⵉⴷ ⵏⵏⵙⵏ ⵏ ⵓⵙⵙⵍⵎⴷ, ⵖⵎⴽ ⴰⵏⵏ ⴷ ⵓⵙⵙⵉⵣⴷⵔ ⵏ ⵓⵖⵓⵍ ⴷ ⵜⵏⴰⴱⴱⴰⵢⵜ ⵜⴰⵏⵎⵍⴰⵏⵜ”.

ⵉⵙⴷⴷⵉⴷ ⵎⴰⵙⵙ ⵍⵎⴰⵍⴽⵉ ⵎⴰⵙ ⴳⴰⵏ ⵉⵙⵡⴰⵍⴰⵢⵏ ⵉⴳⵍⴷⴰⵏⵏ, ⵉⵙⴰⵖⵓⵍⵏ ⵉⴷⵙⵍⴰⵏⵏ ⵉ ⵜⵡⵓⵔⵉ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⴳ ⵡⴰⴽⴰⵣ ⴷ ⵓⵙⵓⵎⵔ ⵏ ⵉⴽⵛⵓⵎⵏ ⵏ ⵓⵎⵓⴽⵏ ⵙ ⵎⴰⴷ ⵉⵣⴷⵉⵏ ⵊⴰⵔ ⵓⵙⴳⵎⵉ ⴷ ⵓⵙⵉⵍⵖ ⵙ ⵎⴰⴷ ⵢⴰⴽⴽⴰⵏ ⵜⴰⵢⴰⴼⵓⵜ ⴷ ⵢⵉⵙⴽⵉⵍ ⴷ ⵜⵉⵕⵡⵉ ⴷ ⵓⵙⵎⴰⵜⴰ ⴷ ⵜⵓⴳⵜ ⵏ ⵓⵙⴽⴰⵏ ⴰⵏⵎⵍⴰⵏ, ⴷ ⵓⵣⵔⴼ ⵏ ⵓⴽⵛⵓⵎ ⵙ ⵜⵏⴰⴼⵓⵜ ⵏ ⵓⵙⵙⵍⵎⴷ ⴰⴷⵙⵍⴰⵏ ⵎⴽ ⵉⵍⵍⴰⵏ ⴳ ⵓⴷⵓⵙⵜⵓⵔ ⵏ ⵜⴳⵍⴷⵉⵜ.

ⵉⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⵓⴳⴳⴰⵙ ⵏ ⵉⴳⵎⴰⵎⵏ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ ⴳ ⵓⵙⵎⵓⵏ ⵏ ⵓⵎⵍⴰⵏ ⴷ ⵓⵟⵟⵓⵏⵏ ⴷ ⵓⵣⵔⵔⵓ ⵏ ⵜⵙⵔⵜⴰⵢ ⴼ ⵓⵙⵙⵍⵎⴷ ⴰⵎⵣⵡⴰⵔⵓ, ⴷ ⵓⵙⴽⵔ ⵏ ⵉⵔⵣⵣⵓⵜⵏ ⴳ ⵡⴰⴽⴰⵍ ⴷ ⵜⵙⵎⵓⵏⵉ ⴷ ⵉⵎⵙⵜⴳⴳⴰⵔⵏ ⵓⵏⴱⵉⴹⵏ ⵉⵏⴰⵎⵎⴰⵙⵏ ⴷ ⵉⴷⵖⴰⵔⴰⵏⵏ ⴷ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⴰⵏ, ⵉⵣⵎⵎⵉⵎ ⵙ ⵓⵙⵓⵏⴼⵓ ⴰⵙⵎⴰⴷ ⵏ ⵜⵔⴰⴱⴱⵓⵜ ⵏ ⵓⵏⵇⵇⵉⵙ ⵏⵏⵙ, ⵔⴰⴷ ⵉⵜⵜⵓⵙⵎⵏⵉⴷ ⴳ ⵜⵖⵉⵎⵉⵜ ⵜⴰⴳⴷⵓⴷⴰⵏⵜ ⴳ ⵡⴰⵢⵢⵓⵔ ⴷ ⵢⵓⵛⴽⴰⵏ.

ⵉⵙⵓⵜⴳ ⵓⵍⴰ, ⴳ ⵓⵎⵏⴰⴹ ⴰⴷ, ⵜⴰⵡⵓⵔⵉ ⵏ ⵓⵙⵎⵖⵔ ⵏ ⵜⵡⵓⵔⵉ ⵏ ⵓⴳⴳⴰⵔ ⵏ ⵓⵙⴳⴳⵯⴰⵙ, ⵉⴳⴰ ⵍⵃⴰⵍ ⴰⵣⵣⵔⴰⵢ ⵏ ⵜⵡⵓⵔⵉ ⴷⴼⴼⵉⵔ ⵏ ⵓⵎⵇⵇⵏ ⴰⵏⴰⵎⵓⵔ ⵏ ⵓⵙⴳⵎⵉ ⴷ ⵓⵙⵉⵍⵖ, ⴷ ⵓⵖⴰⵡⴰⵙ ⴰⵖⴰⵡⴰⵍ ⵊⴰⵔ 2000 ⴰⵔ 2015, ⴷ ⵓⵣⵣⵔⴰⵢ ⵏ ⵓⵖⴰⵡⴰⵙ ⴰⵏⴰⵎⵓⵔ ⵏ ⵓⵙⵎⴰⵜⴰ ⴷ ⵓⵙⵎⵖⵔ ⵏ ⵓⵙⵙⵍⵎⴷ ⴰⵎⵣⵡⴰⵔⵓ 2018-2028, ⴷ ⵜⵉⵖⵔⵉ ⵏ ⵉⵎⴰⵍ ⵏ ⵢⴰⵏ ⵉⴳⵔ  ⵉⴳⴰⵏ ⵡⵉⵏ ⵍⵎⵖⵔⵉⴱ ⵏ ⵉⵎⴰⵍ. ⵉⵙⵓⵜⴳ ⵓⵍⴰ ⵉⵎⴰⵏ ⵏ ⵓⵎⵙⴰⵙⴰ ⴼ ⵜⴱⵔⵉⴷⵜ ⵏ ⵜⵡⵓⵔⵉ , ⴰⵢⵍⵍⵉ ⵉⵎⵎⴰⵍⴰⵏ ⴰⵏⴰⵡ ⴰⵏⴰⵎⵓⵔ ⵏ ⵜⵙⵔⵜⵉⵜ ⵏ ⵓⵣⵣⵔⴰⵢ ⴷ ⵓⴷⵖⴰⵔ ⵏⵏⵙ ⴳ ⵉⵅⵎⵎⵉⵎⵏ ⵏⵏⵖ ⵉⵏⴰⵎⵓⵔⵏ.