ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵏⴼⴰⵔ ⵏ ⵓⵙⵍⴳⵏ ⴼ ⵓⵙⵎⵔⵙ ⵓⵍⴳⵉⵏ ⵏ ⵍⴽⵉⴼ ⴷ ⵓⵙⵏⴼⴰⵔ ⵏ ⵓⵙⵍⴳⵏ ⴼ ⵓⵙⴱⴷⴷⵉ ⵏ ⵢⵉⵔⵉⴷ ⵏ ⵉⴷⵔⵉⵎⵏ
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵕⴰⵙ 26 ⵎⴰⵢⵢⵓ 2021, ⵙ ⵜⵓⴳⵜ ⴰⵙⵏⴼⴰⵔ ⵏ ⵓⵙⵍⴳⵏ ⴼ ⵓⵙⵎⵔⵙ ⵓⵍⴳⵉⵏ ⵏ ⵍⴽⵉⴼ, ⵙ ⵓⵎⴰⴽⵕⴰⴹ ⴰⵙⵏⴼⴰⵔ ⵏ ⵓⵙⵍⴳⵏ ⴼ ⵓⵙⴱⴷⴷⵉ ⵏ ⵢⵉⵔⵉⴷ ⵏ ⵉⴷⵔⵉⵎⵏ ⵖ ⵜⵉⵖⵔⵉ ⵜⵉⵙ ⵙⵏⴰⵜ, ⵖ ⵜⵖⵉⵎⵉⵜ ⵜⴰⴳⴷⵓⴷⴰⵏⵜ ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⵜⵉⵍⵉⵜ ⵏ ⵎⴰⵙⵙ ⵄⴰⴱⴷⵍⵡⴰⴼⵉ ⵍⴼⵜⵉⵜ ⴰⵎⴰⵡⵙⴰⵙ ⵏ ⵜⴳⵯⵏⵙⴰⵏⵜ ⴷ ⵎⴰⵙⵙ ⵎⵓⵃⴰⵎⵎⴰⴷ ⴱⵏ ⵄⴰⴱⵍⵇⴰⴷⵔ ⴰⵎⴰⵡⵙⴰⵙ ⵏ ⵜⵣⵔⴼⵜ.
ⴳ ⵓⵙⵎⵏⵉⴷ ⵏ ⵓⵙⵏⴼⴰⵔ ⵏ ⵓⵙⵍⴳⵏ 13.21 ⴼ ⵓⵙⵎⵔⵙ ⵓⵍⴳⵉⵏ ⵏ ⵍⴽⵉⴼ, ⵉⵏⵏⴰ ⵎⴰⵙⵙ ⵍⴼⵜⵉⵜ ⵎⴰⵙ ⵉⵎⵙⴰⵙⴰ ⵓⴹⵕⵉⵙ ⴰⴷ ⴷ ⵉⵙⵏⴼⵍⵏ ⵏ ⵓⵏⴳⵔⴰⵡ ⴰⵎⴰⴹⵍⴰⵏ ⵏ ⵜⵉⴹⴰⴼ ⵏ ⵉⵙⴷⵓⵀⴷⵓⵢⵏ, ⵢⵉⵏⵉ ⵎⴰⵙ ⴱⴷⴷⴰ ⵉⵍⵍⴰ ⵍⵎⵖⵔⵉⴱ ⴷ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⴼ ⵉⵙⴷⵓⵀⴷⵓⵢⵏ, ⵉⵙⵔⵙ ⵉⴹⵕⵉⵚⵏ ⵉⵣⵣⵔⴰⴼⵏ ⴷ ⵓⵙⴰⵏⵉⵏ. ⵢⵉⵏⵉ ⵎⴰⵙ ⵎⵍⴰⵏ ⵉⵔⵣⵣⵓⵜⵏ ⵉⵎⴰⵙⵙⴰⵏ ⴼ ⵓⵙⵎⵔⵙ ⵓⵍⴳⵉⵏ ⵏ ⵍⴽⵉⴼ ⴳ ⵎⵏⵏⴰⵡ ⵉⴳⵔⴰⵏ. ⵙⵔⵙⵏⵜ ⵓⵍⴰ ⵜⵎⵜⵜⴰ ⵎⵓⵏⵏⵉⵏ ⴳ ⴷⵓⵊⴰⵏⴱⵉⵔ 2020 ⵉⵙⵖⵍⴰⴼ ⵏ ⵜⵎⴰⴷⴷⴰⵙⵜ ⵜⴰⵎⴰⴹⵍⴰⵏⵜ ⵏ ⵜⴷⵓⵙⵉ ⵉⵜⵜⵉⵏⵉⵏ ⵎⴰⵙ ⵓⵔ ⵉⴳⵉ ⵍⴽⵉⴼ ⴰⵢⴰⴼⵓ ⵉⵀⵔⵛⵏ, ⵉⵟⵟⴼ ⴰⵜⵉⴳ ⵏⵏⵙ ⴳ ⵜⵙⵏⵉⵊⵊⵉⵜ.
ⵢⵉⵏⵉ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⵎⵎⴰⵖⵏ ⵉⵡⴰⵏⴽⵏ ⵏ ⵓⵎⴰⴹⴰⵍ ⵉ ⵓⵙⵎⵖⵔ ⵏ ⵜⴼⵍⵍⴰⵃⵜ ⵏ ⵍⴽⵉⴼ, ⵢⵉⵍⵉ ⵚⴰⵃⴰ ⴳ ⵉⵙⴽⵛⵓⵎⵏ ⵏⵏⵙ ⴳⴰⵏⵉⵏ ⵓⵍⴳⵉⵏⵏ, ⵢⵉⵏⵉ ⵎⴰⵙ ⵜⵙⴽⵔ ⵜⵎⴰⵡⴰⵙⵜ ⵜⵉⵣⵔⴰⵡⵉⵏ ⴼ ⵓⵙⵎⵖⵔ ⵏ ⵜⵎⵖⵉⵜ ⵏ ⵍⴽⵉⴼ ⴳ ⵓⵙⵡⵉⵔ ⴰⵏⴰⵎⵓⵔ ⵉ ⵜⵙⵏⵉⵊⵊⵉⵜ ⴷ ⵓⵙⴼⴰⵍⴽⵉ ⴷ ⵜⵎⴳⵓⵔⵉ ⴳ ⵓⵙⵡⵉⵔ ⴰⴷⵎⵙⴰⵏ ⴷ ⵓⵏⴰⵎⵓⵏ.
ⴳ ⵓⵎⴹⴰⴽⴰⵕ ⴰⵎⴰⵜⴰⵢ, ⵙⴰⵡⵍⵏ ⵉⴳⵏⵙⴰⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴼ ⵓⵙⵓⵜⴳ ⵏ ⵓⵙⵏⴼⴰⵔ ⴰⴷ ⴷ ⵓⵙⴽⵔ ⵏⵏⵙ, ⵎⵛⴰⵛⴽⴰⵏ ⴷ ⵓⵍⴰ ⴼ ⵡⴰⵜⵉⴳ ⵏ ⵓⵙⵕⵚⵓ ⵏ ⵜⴳⵎⵉ ⴳ ⵜⵙⴳⴳⵉⵡⵉⵏ ⴳ ⵉⵍⵍⴰ ⵍⴽⵉⴼ, ⵜⵜⵓⴼⴽⵉⵏ ⵉⴼⵙⵙⴰⵢⵏ ⵉ ⵉⵎⴽⵔⴰⵣⵏ, ⴷ ⵓⵙⴱⴷⴷⵉ ⵏ ⵜⵎⵢⴰⴷⴰⵙⵉⵏ ⵓⵔ ⴷ ⵢⵓⵙⴰⵏ, ⴷ ⵓⵙⴽⵔ ⵏ ⵜⴳⵎⵉ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ ⴳⵉⵙⵏⵜ.
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵜⵉⵖⵔⵉ ⵜⵉⵙ ⵙⵏⴰⵜ,ⴰⵙⵏⴼⴰⵔ ⵏ ⵓⵙⵍⴳⵏ 12.18 ⵉ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ ⴰⵏⴱⴽⴰⴹ ⴷ ⵓⵙⵍⴳⵏ 43.05 ⵉ ⵓⵙⴱⴷⴷⵉ ⵏ ⵢⵉⵔⵉⴷ ⵏ ⵉⴷⵔⵉⵎⵏ, ⵉⵡⴰⵜⵜⵙ ⵜⵉⴹⴰⴼ ⵏ ⵉⴷⵔⵉⵎⵏ ⵡⴰⵔⵓⵍⴳⵉⵏⵏ ⴷ ⵓⴹⴼⵕ ⵏⵏⵙⵏ ⵉ ⵓⴽⵓⵙ ⵏⵏⵙ, ⴷ ⵓⵎⵙⴰⵙⴰ ⵏ ⵓⵏⴳⵔⴰⵡ ⴰⵣⵣⵔⴰⴼ ⴰⵏⴰⵎⵓⵔ ⴷ ⵉⵙⵓⵖⴰⵍ ⵉⴳⵔⴰⵖⵍⴰⵏⵏ ⵏ ⵜⵔⴰⴱⴱⵓⵜ ⵏ ⵜⵡⵓⵔⵉ ⵜⴰⵥⵕⴼⴰⵏⵜ, ⴷ ⵓⵣⵣⵔⴰⵢ ⵏ ⵜⵎⵓⴽⵔⵉⵙⵉⵏ ⵏ ⵓⵙⵍⴳⵏ ⵉⵍⵍⴰⵏ.
ⵙ ⵓⵙⵖⵣⵏ ⴰⴷ, ⵔⴰⴷ ⵢⵉⵍⵉ ⵓⵣⵣⴳⵉⵔ ⵏ ⵓⵙⵏⴼⴰⵔ ⴰⴷ ⴷⴼⴼⵉⵔ ⵏ ⵓⵣⵓⵣⵣⵔ ⴳ ⵓⵖⵎⵉⵙ ⴰⵎⴰⴷⴷⵓⴷ, ⵜⵓⵎⴰⵢⵉⵏ ⵏ ⵜⵙⴷⴷⴰⵔⵜ ⵜⴰⵎⵣⵡⴰⵔⵓⵜ ⴳ ⵓⵎⵏⵏⵉ 38 ⴼ ⵜⵎⵥⵍⴰⵢⵉⵏ ⵏ ⴽⵔⴰ ⵏ ⵜⵙⵏⴱⴹⴰⵢⵉⵏ ⴼ ⵉⴱⴽⴽⴰⴹⵏ ⵏ ⵢⵉⵔⵉⴷ ⵏ ⵉⴷⵔⵉⵎⵏ ⵓⵔ ⵔⴰⴷ ⵉⵍⵉⵏⵜ ⴰⴱⵍⴰ ⵙ ⵜⵉⵍⵉⵜ ⵏ ⵓⴹⵕⵉⵚ ⴰⵎⴰⴷⴷⴰⵙ ⵉⵍⵍⴰⵏ ⴳ ⵓⵎⵏⵏⵉ.