ⴰⵙⵇⵇⵉⵎ ⵏ ⵉⵎⵓⵔⴰ ⵉⵙⵖⵣⵏ ⴰⵙⵏⴼⴰⵔ ⵏ ⵓⵙⵍⴳⵏ ⵏ ⵓⵙⴱⴷⴷⵉ ⵏ ⵢⵉⵔⵉⴷ ⵏ ⵉⴷⵔⵉⵎⵏ ⴷ ⵙⵎⵎⵓⵙⵜ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ

ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵓⵎⴰⴽⵕⴰⴹ, ⴰⵙⵉⵏⴰⵙ 20 ⵉⴱⵔⵉⵔ 2021, ⴰⵙⵏⴼⴰⵔ ⵏ ⵓⵙⵍⴳⵏ ⵏ ⵓⵙⴱⴷⴷⵉ ⵏ ⵢⵉⵔⵉⴷ ⵏ ⵉⴷⵔⵉⵎⵏ, ⴷ ⵙⵎⵎⵓⵙⵜ ⵜⵎⵢⴰⵇⵇⴰⵏⵉⵏ ⴷ ⵔⵓⵙⵉⵢⴰ ⴷ ⵓⴽⵕⴰⵏⵢⴰ ⴷ ⵜⵎⵜⵜⴰ ⵎⵓⵏⵏⵉⵏ, ⴳ ⵜⵖⵉⵎⵉⵜ ⵜⴰⴳⴷⵓⴷⴰⴷⵏⵜ ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⵜⵉⵍⵉⵜ ⵏ ⵎⴰⵙⵙ ⵎⵓⵃⴰⵎⵎⴰⴷ ⴱⵏ ⵄⴰⴱⴷⵍⵇⴰⴷⵔ ⴰⵎⴰⵡⵙⴰⵙ ⵏ ⵣⵔⴼⵜ ⴷ ⵎⴰⵙⵙⴰ ⵏⵓⵣⵀⴰ ⵍⵡⴰⴼⵉ ⵜⴰⵎⴰⵡⵙⴰⵙⵜ ⵜⴰⵎⴰⵔⵉⵜ ⵉⵜⵜⵓⵙⵎⴰⴳⴰⵍⵏ ⵙ ⵉⵎⵖⵔⵉⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ.

ⵖ ⵓⵙⵎⵏⵉⴷ ⵏ ⵜⵎⵢⴰⵇⵇⴰⵏⵉⵏ, ⵜⵙⴷⴷⵉⴷ ⵎⴰⵙⵙⴰ ⵏⵓⵣⵀⴰ ⵍⵡⴰⴼⵉ ⵎⴰⵙ ⵍⵍⴰⵏⵜ ⵜⵎⵢⴰⵇⵇⴰⵏⵉⵏ ⴰⴷ ⴳ ⵉⵙⵡⴰⵍⴰⵜⵏ ⵉⵙⵜⵔⴰⵜⵉⵊⵉⵢⵏ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴳ ⵓⵙⴷⵓⵙ ⴷ ⵓⵙⵎⵢⴰⵏⴰⵡ ⵏ ⵜⴷⵔⴰⵡⵉⵏ ⴳ ⴽⵓ ⵉⴳⵔⴰⵏ ⵉⴷⵉⴱⵍⵓⵎⴰⵙⵉⵢⵏ ⴷ ⵉⵙⵔⵜⴰⵏⵏ ⴷ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⵡⵏⴹⴰⵏⵏ, ⴽⴽⵓⵥⵜ ⵜⵙⵉⵏⵔⴰⵏⵉⵏ ⴷ ⵔⵓⵙⵉⵢⴰ ⴷ ⵓⴽⵕⴰⵏⵉⵢⴰ, ⵢⴰⵜ ⵜⴰⴳⵜⵉⵔⴰⵏⵜ ⵙ ⵖⵎⴽ ⴰⴷ:

- ⴰⵙⵏⴼⴰⵔ ⵏ ⵓⵙⵍⴳⵏ 77.20 ⴼ ⵓⵎⵢⴰⵡⴰⵙ ⴳ ⵢⵉⴳⵔ ⵏ ⵜⴳⵯⵎⵔⵜ ⵜⴰⵢⵍⴰⵏⵜ ⵏⴳⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵔⵓⵙⵉⵢⴰ, ⵜⵜⵓⵣⵎⵎⴰⵎ ⴳ ⵕⵕⴱⴰⵟ ⴳ 14 ⵛⵓⵜⴰⵏⴱⵉⵔ 2020 ⴷ ⵎⵓⵙⴽⵓ ⴳ 14 ⴽⵟⵓⴱⵕ 2020;

- ⴰⵙⵏⴼⴰⵔ ⵏ ⵓⵙⵍⴳⵏ 18.20 ⴼ ⵓⵎⵢⴰⵡⴰⵙ ⴰⵣⵔⴼⴰⵏ ⴳ ⵓⵎⵏⵏⵉ ⴰⵎⴷⵏⴰⵏ ⴷ ⵓⵏⵙⴱⴰⴱ ⵏⴳⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵓⴽⵕⴰⵏⵉⵢⴰ, ⵜⵜⵓⵣⵎⵎⴰⵎ ⴳ ⵎⵕⵕⴰⴽⵛ ⴳ 21 ⴽⵟⵓⴱⵕ 2019;

- ⴰⵙⵏⴼⴰⵔ ⵏ ⵓⵙⵍⴳⵏ 17.20 ⴼ ⵡⴰⵙⵙⴰⵢ ⵏ ⵉⵡⴷⴰⵏ ⴼ ⵉⵍⵍⴰ ⵓⵚⵕⴰⴹ ⵏⴳⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵓⴽⵕⴰⵏⵉⵢⴰ, ⵜⵜⵓⵣⵎⵎⴰⵎ ⴳ ⵎⵕⵕⴰⴽⵛ ⴳ 21 ⴽⵟⵓⴱⵕ 2019;

- ⴰⵙⵏⴼⴰⵔ ⵏ ⵓⵙⵍⴳⵏ 16.20 ⴼ ⵜⵡⵉⵙⵉ ⵜⴰⵣⵔⴼⴰⵏⵜ ⴳ ⵓⵎⵏⵏⵉ ⴰⵏⴱⴽⴰⴹ ⴷ ⵜⵉⴽⴽⵉ ⵏ ⵉⵎⴱⵏⴽⴰⴹⵏ ⵏⴳⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵓⴽⵕⴰⵏⵉⵢⴰ, ⵜⵜⵓⵣⵎⵎⴰⵎ ⴳ ⵎⵕⵕⴰⴽⵛ ⴳ 21 ⴽⵟⵓⴱⵕ 2019;

- ⴰⵙⵏⴼⴰⵔ ⵏ ⵓⵙⵍⴳⵏ 75.20 ⵉ ⵓⵎⵛⴰⵛⴽⴰ ⵏⴳⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵜⵎⵜⵜⴰ ⵎⵓⵏⵏⵉⵏ ⴼ ⵓⵙⴽⵔ ⵏ ⵓⵙⵉⵔⴰ ⵏ ⵓⵖⴰⵡⴰⵙ ⵏ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ ⴷ ⵓⵙⴰⵏⵓⵏ ⴳ ⵉⴼⵔⵉⵇⵢⴰ, ⵜⵜⵓⵣⵎⵎⴰⵎ ⴳ 6 ⴽⵟⵓⴱⵕ 2020.

ⵡⴰⵜⵜⵙⵏⵜ ⵜⵎⵢⴰⵇⵇⴰⵏⵉⵏ ⴷ ⵓⴽⵕⴰⵏⵉⵢⴰ ⴰⵙⴷⵓⵙ ⵏ ⵓⵎⵢⴰⵡⴰⵡⴰⵙ ⴳ ⵢⵉⴳⵔ ⴰⵣⵔⴼⴰⵏ, ⵜⵡⴰⵜⵜⵙ ⵜⵎⵢⴰⵇⵇⴰⵏⵜ ⴷ ⵔⵓⵙⵉⵢⴰ ⴰⵙⵎⵖⵔ ⴷ ⵓⵙⵖⵓⴷⵓ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ ⴳ ⵢⵉⴳⵔ ⵏ ⵜⴳⵯⵎⵔⵜ ⵜⴰⵢⵍⴰⵏⵜ ⴷ ⵜⴷⵎⵙⴰ ⵏⵏⵙ. ⵜⵡⴰⵜⵜⵙ ⵜⵎⵢⴰⵇⵇⴰⵏⵜ ⵏ ⵓⵎⵢⴰⵡⴰⵙ ⴷ ⵜⵎⵜⵜⴰ ⵎⵓⵏⵏⵉⵏ ⴰⵙⵏⴰⵍ ⵏ ⵉⵖⴰⵡⴰⵙⵏ ⵏ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ ⴳ ⵜⵙⵜⵔⴰⵜⵉⵊⵉⵜ ⵍⵍⵉ ⵜⵙⵖⵣⵏ ⵜⵎⴰⴷⴷⴰⵙⵜ ⵙ ⵓⵎⴰⴽⵕⴰⴹ ⴳ 2006.

ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵏⴼⴰⵔ ⵏ ⵓⵙⵍⴳⵏ 12.18 ⵏ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ ⴰⵏⴱⴽⴰⴹ ⴷ ⵓⵙⵍⴳⵏ 43.05 ⴼ ⵓⵙⴱⴷⴷⵉ ⵏ ⵢⵉⵔⵉⴷ ⵏ ⵉⴷⵔⵉⵎⵏ. ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ ⵏ ⵜⵣⵔⴼⵜ ⵎⴰⵙ ⴳⴰⵏ ⵉⴱⴽⴽⴰⴹⵏ ⵏ ⵢⵉⵔⵉⴷ ⵏ ⵉⴷⵔⵉⵎⵏ ⵡⵉⴷⴰ ⵣⵣⵔⴰⵢⵏⵉⵏ ⵉⵡⵜⵜⴰ, ⴳⵉⵏ ⵡⵉⴷⴰ ⵀⵔⵛⵏⵉⵏ. ⵢⵉⵏⵉ ⵎⴰⵙ ⵜⴳⴰ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴰⵎⵙⴽⴰⵔ ⴳ ⵜⵎⴰⴷⴷⴰⵙⵉⵏ ⴷ ⵜⴳⵔⴰⵡⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵜⵙⴳⴰⵡⴰⵏⵉⵏ, ⴰⵔ ⵜⴷⵔⵔⵓ ⵓⵍⴰ ⴳ ⵜⵓⴳⴳⴰⵙ ⵜⵉⴳⵔⴰⵖⵍⴰⵏⵉⵏ ⵏ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ ⴷ ⵓⴱⴽⴽⴰⴹ ⵃⵎⴰ ⴰⴷ ⵜⵎⵙⴰⵙⴰ ⵙ ⵉⵙⵖⴰⵡⵏ ⵏⵏⵙ ⴷ ⵓⵙⵎⵙⴰⵙⴰ ⵏ ⵉⵣⵣⵔⴰⴼⵏ ⵏⵏⵙ ⵉⵏⴰⵎⵓⵔⵏ ⵍⵍⵉ ⵣⴷⵉⵏⵉⵏ ⴷ ⵉⵎⵔⵙⵉ ⴷ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ.

ⵉⵡⴰⵜⵜⴰⵙ ⵓⵙⵏⴼⴰⵔ ⴰⴹⴼⵕ ⵏ ⵉⴷⵔⵉⵎⵏ ⵡⴰⵔⵓⵍⴳⵉⵏⵏ, ⵉ ⵓⴽⵓⵙ ⵏⵏⵙⵏ ⴷ ⵓⵙⵎⵙⴰⵙⴰ ⵏ ⵓⵏⴳⵔⴰⵡ ⴰⵣⵣⵔⴰⴼ ⴰⵏⴰⵎⵓⵔ ⴷ ⵉⵙⴰⵖⵓⵍⵏ ⵉⴳⵔⴰⵖⵍⴰⵏⵏ ⵏ ⵜⵔⴰⴱⴱⵓⵜ ⵏ ⵜⵡⵓⵔⵉ ⵜⴰⵥⵕⴼⴰⵏⵜ, ⴷ ⵓⵣⵣⵔⴰⵢ ⵏ ⵜⵎⵓⴽⵔⵉⵙⵉⵏ ⵏ ⵓⵙⵍⴳⵏ ⵉⵍⵍⴰⵏ ⵖⵉⵍⴰⴷ. ⵢⵉⵡⵉ ⴷ ⵓⵙⵍⴳⵏ ⵜⵉⵏⴼⴳⵓⵔⵉⵏ ⴷ ⵡⴰⵜⵉⴳⵏ ⵏⵏⵙⵏⵜ ⵍⵍⵉ ⴷ ⵙⵙⴼⴼⵓⵖⵏⵜ ⵜⵏⴱⴰⴹⵉⵏ ⵏ ⵜⵉⴹⴰⴼ, ⴷ ⵓⵙⴷⵓⵙ ⵏ ⵜⵉⴹⴰⴼ ⵜⴰⴳⵯⵏⵙⴰⵏⵜ ⴷ ⵜⵓⵎⴰⵢⵉⵏ ⵢⴰⴹⵏⵉⵏ.

ⵖ ⵓⵎⴹⴰⴽⴰⵕ, ⵙⴰⵡⵍⵏ ⵉⴳⵏⵙⴰⵙⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴼ ⵡⴰⵜⵉⴳ ⵏ ⵓⵙⵏⴼⴰⵔ ⴰⴷ ⴷ ⵉⵙⵖⵡⴰⵏ ⵏⵏⵙ ⵉⴳⵔⴰⵖⵍⴰⵏⵏ ⵏ ⵜⵎⴰⵣⵉⵔⵜ ⵏⵏⵖ ⴷ ⵓⵙⴷⵓⵙ ⵏ ⵓⴷⵖⴰⵔ ⵏ ⵍⵎⵖⵔⵉⴱ ⴳ ⵓⵍⴷⴰⵢ ⵏ ⵉⵙⵙⴰⵔⵓⵜⵏ ⴷ ⵉⵙⵙⵥⵕⴼⵏ ⵏ ⴱⵕⵕⴰ, ⴷ ⵓⵙⴷⵓⵙ ⵏ ⵓⴷⵖⴰⵔ ⵏⵏⵙ ⴳ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ.

ⵖⵔⵉⵏ ⵉⵎⵓⵔⴰ ⵉ ⴽⵉⴳⴰⵏ ⵏ ⵜⵉⴹⴰⴼ ⵉ ⵓⵙⴱⴷⴷⵉ ⵏ ⵉⴱⴽⴽⴰⴹⵏ ⵏ ⵢⵉⵔⵉⴷ ⵏ ⵉⴷⵔⵉⵎⵏ ⴷ ⵓⵙⴽⵔ ⵏ ⵜⵓⵎⴰⵢⵉⵏ ⵏ ⵓⴹⵕⵉⵚ ⴰⵣⵣⵔⴰⴼ. ⵉⵡⵙⵏⵜ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴳ ⵓⵙⵖⵓⴷⵓ ⵏⵏⵙ ⵙ ⵉⵙⵏⴼⵍⵏ ⵖ ⵜⵜⵓⵇⴱⴰⵍⵏ 32 ⵙⴳ 85.