ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵉⵖⵔⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉ ⴽⵉⴳⴰⵏ ⵏ ⵓⵙⵎⵓⵙⵙⵓ ⵉ ⵓⴹⴼⵕ ⵏ ⵓⵙⵏⴼⴰⵔ ⴰⵏⴰⵎⵓⵏ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ
ⵉⵖⵔⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉ ⴽⵉⴳⴰⵏ ⵏ ⵓⵙⵎⵓⵙⵙⵓ ⵉ ⵓⴹⴼⵕ ⵏ ⵓⵙⵏⴼⴰⵔ ⴰⵏⴰⵎⵓⵏ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵍⵍⵉ ⵉⵡⴰⵜⵜⵙⵏ ⴰⵙⵎⴰⵢⵏⵓ ⴷ ⵜⴷⵉⵎⵓⵇⵔⴰⵟⵉⵜ ⴷ ⵓⵙⴱⴷⴷⵉ ⵏ ⵓⵥⵍⴰⴹ ⴷ ⵓⵙⵎⴰⵜⵜⵉ ⴼ ⵜⵙⴳⴰ, ⴳ ⵓⵎⵏⴰⴹ ⵉⵥⵍⵉⵏ ⴳ ⵉⵜⵜⵔⵙ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⴼ ⴽⵓ ⵉⵡⴰⵏⴽⵏ ⵏ ⵓⵎⴰⴹⴰⵍ, ⵢⵉⵏⵉ : « ⵉⵇⵇⴰⵏ ⴷ ⴰⴷ ⵏⵙⵓⵜⴳ ⵛⵉⴳⴰⵏ ⴰⵜⵉⴳ ⴷ ⵓⵏⵛⴽ ⴷ ⵡⴰⵏⴰⵡ ⵏ ⵎⴰ ⵔⴰⴷ ⵉⵜⵜⵓⵙⴽⵉⵔ ⴳ ⵓⵣⵎⵣ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵙ ⵜⵏⴰⵔⴰ ⵏⵏⵙ ⵉⵙⵙⴼⴰⵡⵏ ⵉⴳⴰⵏ ⵜⴰⵎⵣⵡⴰⵔⵓⵜ ».
ⵉⵙⴷⴷⵉⴷ ⵎⴰⵙ ⵉⵎⵓⵔⵙ ⵍⵎⵖⵔⵉⴱ ⴳ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19 ⵙ ⵜⵏⴰⵔⴰ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴷ ⵓⵍⵜⴰⵖ ⵏ ⴽⵓ ⵜⵉⵎⵔⵙⴰⵍ ⴷ ⵉⵎⵙⴽⴰⵔⵏ, ⵜⴳ « ⵜⵉⵔⵎⵉⵜ ⴷ ⵡⴰⴷⴷⴰⴷ ⴰⵎⵖⵔⵉⴱⵉ ⵉⵥⵉⵍⵏ, ⵉⴳⴰⵏ ⵜⴰⵎⵣⵡⴰⵔⵓⵜ, ⵍⵍⵉ ⵙⵓⵜⴳⵏⵜ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ, ⵉⵎⴷⵔⴰⵡⵏ ⵉⴱⵕⵕⴰⵏⵉⵢⵉⵏ, ⴷ ⵉⵎⵥⵕⴰⵢⵏ ⵉⵎⵙⵖⴰⵔⵓⵜⵏ ».
ⵉⵜⵜⵓⵏⵏⴰ ⵎⴰⵢⴰ ⵏⵏ ⴳ ⵜⴳⵓⵔⵉ ⵏⵏⵙ ⴳ ⵓⵕⵥⵥⵓⵎ ⵏ ⵜⵙⵓⵜⵍⵜ ⵜⵉⵙ ⵙⵏⴰⵜ ⴳ ⵓⵙⴳⴳⵯⴰⵙ ⴰⵣⵣⵔⴰⴼ ⵡⵉⵙ ⵙⵎⵎⵓⵙ ⴳ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵎⵔⴰⵡⵜ, ⴰⵙⵉⵎⵡⴰⵙ 9 ⵉⴱⵔⵉⵔ 2021, ⵖ ⵉⵙⴷⴷⵉⴷ ⴼ ⵓⴼⵔⴰⴳ ⵏ ⵜⵣⵡⵓⵔⵉ ⵏ ⵍⵎⵖⵔⵉⴱ ⴷ ⵜⴷⵓⵙⵉ ⵏⵏⵙ ⴷ ⵜⵣⵣⵉⴳⵣⵜ ⵏⵏⵙ ⵉⵣⴷⵉⵏ ⴷ ⵓⵙⵕⵚⵓ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ, ⴷ ⵓⵎⵛⴰⴱⴱⴰⴽ ⴰⴽⴷ ⵜⵉⵎⵔⵙⴰⵍ, ⴷ ⵓⵙⵡⵓⵔⵉ ⵙ ⵓⵎⵙⴰⵡⴰⵍ ⴳ ⵓⵎⵓⴽⵏ ⵏ ⴽⵓ ⵜⵉⵎⵙⴰⵔⵉⵏ.
ⵉⵙⵉⵙⴼⵉⵡ ⵎⴰⵙ ⵔⴰⴷ ⵉⵣⵣⵉⴳⵣ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵙⵓⵜⵍⵜ ⴰⴷ ⴳ ⵓⵎⵏⵉⴷ ⵏ ⵓⵣⵣⵔⴰⴼ ⵉ ⵓⵙⵖⵣⵏ ⵏ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⵍⵍⴰⵏⵉⵏ ⴷⴰⵔ ⵓⵙⵇⵇⵉⵎ, ⴷ ⵓⵣⵣⵔⴰⵢ ⵏ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⵍⴽⵎⵏⵉⵏ 229 ⵏ ⵜⵙⵓⵎⵔⵜ ⵃⵎⴰ ⴰⴷ ⵢⵉⵍⵉ ⵓⵙⵎⵖⵔ ⵏ ⵜⵙⵏⵜⴰⵢⵜ ⵜⴰⵣⵣⵔⴰⴼⵜ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ, ⵃⵎⴰ ⴰⴷ ⵢⵉⵍⵉ ⵓⵙⵕⵚⵓ ⵏ ⵜⵎⵥⵍⴰⵢⵜ ⴷ ⵓⵙⴽⵔ ⵏ ⵓⴷⵓⵙⵜⵓⵔ.
ⵔⴰⴷ ⵜⵣⵣⵉⴳⵣ ⵓⵍⴰ ⵜⴰⵡⵓⵔⵉ ⵏ ⵜⵉⴹⴰⴼ ⵏ ⵓⵙⵇⵇⵉⵎ ⵙ ⵓⵙⵖⵉⵡⵙ ⵏ ⵉⵙⵇⵙⵉⵜⵏ ⴼ ⵜⵙⵔⵜⵉⵜ ⵜⴰⵎⴰⵜⴰⵢⵜ ⴷ ⵜⵙⵔⵜⴰⵢ ⵏ ⵉⴳⵔⴰⵏ, “ⵔⴰⴷ ⵏⵎⵎⴰⵖ ⴰⴷ ⵏⵢⴰⵍⴽⴰⵎ ⴷ ⵎⴰⴷ ⵙⵉⴳⴳⵉⵍⵏ ⵉⵏⵎⵓⵔⴰⵏ ⴷ ⵜⵏⵎⵓⵔⴰⵜⵉⵏ, ⴷ ⴰⴷ ⵏⵙⵎⴽⵍ ⵜⵉⵎⵙⴰⵔⵉⵏ ⵏ ⵡⴰⵎⵓⵏ ⵙ ⵓⵎⵙⴰⵡⴰⵍ ⵉⵀⴷⴷⵏⵏ ⴷ ⵓⵎⵢⴰⵡⴰⵙ ⴷ ⵓⵙⵎⴰⴷ ⵊⴰⵔ ⵜⵉⵏⴱⴰⴹⵉⵏ”.
ⵔⴰⴷ ⵜⵜⵓⵙⵎⵉⴷⵏⵜ ⵓⵍⴰ ⵜⵙⵎⵉⴳⴰⵍ ⵏ ⵓⵙⴰⴳⴳⵯ ⵍⵍⵉ ⴼ ⵙⵡⵓⵔⵉⵏⵜ ⵜⵙⵇⵇⵉⵎⵏ ⵜⵉⴱⵕⵍⴰⵎⴰⵏⵉⵢⵉⵏ, ⵍⵍⵉⵖ ⵙⵎⵓⵏⵏⵜ ⴰⵜⵉⴳ ⵏ ⵜⵉⴹⴰⴼ ⴷ ⵜⵡⵓⵔⵉ ⵜⴰⴱⵉⴷⴰⴳⵓⵊⵉⵜ ⴷ ⵡⴰⴽⴰⵣ ⵏ ⵓⵙⵓⵔⵙ ⵏ ⴽⵉⴳⴰⵏ ⵏ ⵜⵎⵔⵙⴰⵍ ⴷ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⴷ ⵜⵙⵓⵎⵔⵉⵏ ⴷ ⵉⵙⵖⵍⴰⴼ ⵉ ⵓⵙⵖⵓⴷⵓ ⵏ ⵜⵙⵔⵜⴰⵢ ⴰⴷ ⴷ ⵓⵣⵣⵔⴰⵢ ⵏ ⵜⵎⵓⴽⵔⵉⵙⵉⵏ ⵏⵏⵙⵏⵜ, ⴳⴰⵏⵜ ⵜⵙⵎⵉⴳⴰⵍ ⴰⴷ ⵜⴰⵎⵜ.
ⵔⴰⴷ ⵢⵉⵍⵉ ⵓⵍⴰ ⵓⵙⵎⵏⵉⴷ ⴷ ⵓⵎⴹⴰⴽⴰⵕ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵉⵜⵜⵓⵙⵎⴰⴳⴰⵍⵏ ⵙ ⵓⵣⵣⵔⴰⵢ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴳ ⵉⵎⵔⵙⵉ ⵏ ⵓⵙⵙⵍⵎⴷ ⴰⵎⵏⵣⵓ, ⴷ ⵓⵎⴹⴰⴽⴰⵕ ⴷ ⵓⵙⵖⵏⵓ ⵏ ⵓⵏⵇⵇⵉⵙ ⵏ ⵜⵔⴰⴱⴱⵓⵜ ⵏ ⵜⵡⵓⵔⵉ ⵜⴰⵙⴳⵓⵎⴰⵏⵜ ⵉⵜⵜⵓⵙⵎⴰⴳⴰⵍⵏ ⵙ ⵓⵏⴳⵔⴰⵡ ⴰⴷⵓⵙⴰⵏ ⵃⵎⴰ ⴰⴷ ⵢⵉⵍⵉ ⵓⵙⵓⵊⴷ ⵏ ⵓⵎⵏⵉⴷ ⴰⵏⴰⵎⵓⵔ ⵏ ⵓⵎⵓⴽⵏ ⵏ ⵓⵏⴳⵔⴰⵡ ⴰⴷⵓⵙⴰⵏ.
ⵉⴱⴷⵔ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⴷ ⵜⴰⵙⵓⵜⵍⵜ ⴰⴷ ⵜⴰⵣⵣⵔⴰⴼⵜ ⵜⵣⵡⴰⵔ ⵜⵜ ⵜⵙⵓⵜⵍⵜ ⵉⵥⵍⵉⵏ ⵉⴳⴰⵏ ⵜⵉⵙ ⴽⵕⴰⴹⵜ ⴳ ⵜⵡⴰⵍⴰ ⵜⵉⵙ ⵎⵔⴰⵡⵜ, ⵉⵙⵖⵣⵏ ⴳⵉⵙ ⵓⵙⵇⵇⵉⵎ ⵏ ⵉⵎⵓⵔⴰ ⵜⵥⴰ ⵏ ⵉⴹⵕⵉⵚⵏ ⵉⵎⴰⴷⴷⴰⵙⵏ ⴷ ⵉⵏⵎⵢⴰⵔⵏ “ ⴳⴰⵏ ⵉⴹⵕⵉⵚⵏ ⵟⵟⴰⴼⵏⵉⵏ ⴰⵜⵉⴳ ⵏⵏⵙⵏ ⴰⵙⵔⵜⴰⵏ ⴷ ⵓⵎⵔⵙⵍⴰⵏ, ⴳⴰⵏ ⵉⵣⵣⵔⴰⴼⵏ ⵏ ⵉⵙⵜⴰⵢⵏ ⵍⵍⵉ ⵔⴰⴷ ⵉⵜⵜⵓⵙⴽⵉⵔ ⴳ ⵜⵎⴰⵣⵉⵔⵜ ⵏⵏⵖ ⴳ ⵓⵙⴳⴳⵯⴰⵙ ⴰⴷ, ⴷ ⵡⵉⵢⵢⴰⴹ ⴳⴰⵏⵉⵏ ⵡⵉⵏ ⵓⵏⴱⴰⴹ ⴷ ⵜⵎⴰⴼⴰⵡⵜ ⵍⵍⵉ ⵙ ⵉⵇⵇⵍ ⵓⵎⵏⵉⴷ ⴰⵎⴰⵜⴰⵢ ⴳ ⵓⵎⵏⴰⴹ ⵏ ⵓⵙⴽⵔ ⵏ ⵓⴷⵓⵙⵜⵓⵔ ⵏ 2011”.