ⵜⵕⵥⵎ ⵜⵔⴰⴱⴱⵓⵜ ⵏ ⵜⵡⵓⵔⵉ ⵜⴰⵙⴳⵓⵎⴰⵏⵜ ⵉⵜⵜⵓⵙⵎⴰⴳⴰⵍⵏ ⵙ ⵢⵉⵙⴽⵉⵍ ⴷ ⵓⵙⴰⵎⵓ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵣⵔⴰⵡⵜ ⴼ “ⵜⴱⴰⵕⵍⵎⴰⵏⵉⵢⵉⵏ: ⴰⵎⵣⵔⵓⵢ, ⵜⴰⵢⴰⴼⵓⵜ, ⵉⵎⵏⵉⴷⵏ”

ⵜⵙⵏⵎⴰⵍⴰ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵉⵜⵜⵓⵙⵎⴰⴳⴰⵍⵏ ⵙ ⵢⵉⵙⴽⵉⵍ ⴷ ⵓⵙⴰⵎⵓ ⵜⵉⵏⴰⵡⵜ ⵉ ⵓⵕⵥⵥⵓⵎ ⵏ ⵜⵣⵔⴰⵡⵜ ⴼ ⵜⴱⴰⵕⵍⴰⵎⴰⵏⵉⵢⵉⵏ: ⴰⵎⵣⵔⵓⵢ, ⵜⴰⵢⴰⴼⵓⵜ, ⵉⵎⵏⵉⴷⵏ, ⴰⴽⵡⴰⵙ 8 ⵉⴱⵔⵉⵔ 2021 ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⵜⵎⴷⵔⴰⵡⵜ ⴷ ⵜⵎⵙⵎⵓⵏⵜ ⵙⵉⵎⵙⵉⵎ ⵜⴰⴷⵔⴰⵡⵜ ⵜⴰⵏⵎⵓⵔⵉ ⴷ ⵜⵉⵍⵉⵜ ⵏ ⵉⴳⵏⵙⴰⵙⵏ ⵙⴳ ⵡⴰⵎⵓⵏ ⴰⵖⵔⵎⴰⵏ ⵏ ⵜⵎⵖⴰⵔⵉⵏ ⴷ ⵉⴽⴰⴷⵉⵎⵉⵢⵏ.

ⵜⵙⵙⵉⵅⴼ ⵎⴰⵙⵙⴰ ⴼⴰⵟⵉⵎⴰ ⵥⵥⴰⵀⵕⴰ ⵏⴰⵣⵉⵀ, ⵜⴰⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵏ ⵜⵡⵓⵔⵉ ⵜⴰⵙⴳⵓⵎⴰⵏⵜ ⵉⵜⵜⵓⵙⵎⴰⴳⴰⵍⵏ ⵙ ⵢⵉⵙⴽⵉⵍ ⴷ ⵓⵙⴰⵎⵓ, ⵍⵍⵉ ⵉⵏⵏⴰⵏ ⴳ ⵜⴳⵓⵔⵉ ⵏⵏⵙ ⴰⵜⵉⴳ ⵏ ⵉⵎⵔⵙⵉ ⵏ ⵜⴱⵕⵍⴰⵎⴰⵏⵉⵢⵉⵏ.

ⵉⵍⵍⴰ ⵓⵎⴹⴰⴽⴰⵕ ⴼ ⵓⵣⵣⵔⴰⵢ ⵏ ⵜⵉⵔⵎⵉⵜ ⵜⴰⴱⵕⵍⴰⵎⴰⵏⵉⵜ ⵏ ⵜⵎⵖⴰⵔⵜ ⴷ ⵜⵡⵉⵙⵉ ⵏⵏⵙ ⴳ ⵜⵓⴷⵔⵜ ⵜⴰⵙⵔⵜⴰⵏⵜ ⵙⴳ 1993 ⵍⵍⵉⵖ ⴽⵛⵎⵏⵜ, ⵜⵉⴽⵍⵉⵜ ⵉⵣⵡⴰⵔⵏ, ⵙⵏⴰⵜ ⵜⵎⵖⴰⵔⵉⵏ ⵜⵉⵎⵔⵙⵍⵜ ⵜⴰⵣⵣⵔⴰⴼⵜ ⵎⴰⵙⵙⴰ ⴱⴰⴷⵉⵄⴰ ⵚⵇⵍⵉ ⴷ ⵎⴰⵙⵙⴰ ⵍⴰⵟⵉⴼⴰ ⴱⵏⵏⴰⵏⵉ ⵙⵎⵉⵔⵙ ⴳ ⵉⵙⵜⴰⵢⵏ ⵓⵙⵔⵉⴷⵏ ⴷⴰⵜ ⵏ ⵜⵉⵍⵉⵜ ⵏ ⵍⴽⵓⵟⴰ ⴳ 2002.

ⵜⵉⵏⵉ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵎⴰⵙ ⵜⵕⵥⴰ ⵜⵉⵔⵎⵉⵜ ⴰⴷ ⵉⵙⴽⵔⴰⴼ ⵏ ⵜⴷⵍⵙⴰ ⵉⵍⵍⴰⵏ ⴳ ⵡⴰⵎⵓⵏ ⴰⵎⵖⵔⵉⴱⵉ ⴳ ⵉⵍⵍⴰ ⵡⴰⵡⵜⵎ ⴳ ⵜⵉⵍⵉⵜ ⴳ ⵜⵎⴰⵙⴰⵢⵉⵏ, ⵜⵕⵥⵎ ⵜⵉⵔⵎⵉⵜ ⴰⴷ ⴰⵎⴹⴰⴽⴰⵕ ⴰⴳⴷⵓⴷⴰⵏ ⴷ ⵓⵏⴰⵎⵓⵏ ⴼ ⵜⴳⵏⵙⴰⵙⵜ ⵏ ⵜⵎⵖⴰⵔⵉⵏ ⴳ ⵓⴱⵕⵍⴰⵎⴰⵏ, ⵍⵍⵉⵖ ⴷ ⵜⵎⵍⴰ ⵜⵉⵔⵎⵉⵜ ⵏ 1993 ⵜⴰⵙⵓⴳⵔⵜ ⵉⵥⵉⵍⵏ ⵏ ⵜⵎⵖⴰⵔⵜ ⴷ ⵜⵡⵓⵔⵉ ⵏⵏⵙ ⴳ ⵓⴳⵏⵙ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ ⴷ ⵓⴳⵏⵙⴻⵙ ⵏⵏⵙ ⵏ ⵜⵎⵜⵜⵉ. ⵜⵙⴷⴷⵉⴷ ⵎⴰⵙ ⴷ ⴷ ⵜⵉⵍⵉⵜ ⵏ ⵜⵎⵖⴰⵔⵜ ⴳ ⴽⵓ ⵉⵣⵎⴰⵣ ⵉⵣⵣⵔⴰⴼⵏ ⵜⴱⴷⴷ ⴼ ⵜⵡⵓⵔⵉ ⴷ ⵓⵏⵄⴰⵔ ⵏ ⵜⵎⵙⴰⵔⵉⵏ ⵏ ⵜⵎⵓⵔⵜ ⵙ ⵜⵖⴰⵔⴰⵙⵉⵏ ⵜⵉⴷⵙⵜⴰⵔⵉⵏ ⵙ ⵓⵣⵣⵔⴰⴼ ⴷ ⵜⵉⴹⴰⴼ ⴷ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⵜⵉⵏⵉ ⵎⴰⵙ ⵔⴰⴷ ⵜⵜⵓⴼⴽⵉⵏ ⵓⵟⵟⵓⵏⵏ ⴳ ⵜⵉⵏⴰⵡⵜ ⴰⴷ ⴼ ⵓⵎⵓⵔⵙ ⵏ ⵜⵉⵔⵎⵉⵜ ⴰⴷ.

ⵜⵙⴰⵡⵍ ⵎⴰⵙⵙⴰ ⵏⴰⵣⵉⵀ ⴼ ⵜⵎⵓⴽⵔⵉⵙⵏⵉⵏ ⵣⴷⵉⵏⵉⵏ ⴷ ⵜⵉⵏⵡⵉⵜ ⵜⴰⵙⵔⵜⴰⵏⵜ ⴷ ⵓⵙⵎⴰⵜⵜⵉ ⴰⴷⵉⵎⵓⵇⵔⴰⵟⵉ, ⵍⵍⵉ ⵔⴰⴷ ⵢⴰⵡⵙ ⴳ ⵓⵙⵎⵖⵔ ⵏ ⵓⵙⴽⵔ ⵏ ⵜⵎⵖⴰⵔⵜ ⴳ ⵜⵎⵙⵙⵓⴳⵓⵔⵜ ⵏ ⵜⵖⴰⵡⵙⴰ ⵜⴰⵎⴰⵜⴰⵢⵜ ⴷ ⵓⴳⵏⵙⴻⵙ ⵏ ⵉⵏⵎⵓⵔⴰⵏ, ⴷ ⵓⵏⵢⴰⵍⴽⴰⵎ ⵏ ⵉⴼⵔⴷⴰⵙ ⵏ ⵓⴱⵕⵍⴰⵎⴰⵏ ⴷ ⵜⵉⵍⵉⵜ ⵉⴼⴰⵡⵏ ⵏ ⵜⵎⵖⴰⵔⵜ ⵃⵎⴰ ⴰⴷ ⵜⵉⵍⵉ ⴳ ⵉⴷⵖⴰⵔⵏ ⵏ ⵜⵎⴰⵙⴰⵢⵜ ⵎⴽ ⵉⵍⵍⴰⵏ ⴳ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵜⵉⵏⵉ ⵎⴰⵙ ⴷ ⵜⵍⵉⵜ ⵏ ⵜⵎⵖⴰⵔⵜ ⴳ ⵓⵙⵡⵉⵔ ⴰⵣⵣⵔⴰⴼ ⵓⵔ ⵜⵎⵙⴰⵙⴰ ⴷ ⵜⴳⵏⵙⴻⵙⵜ ⵍⵍⵉ ⵙ ⴷ ⵉⵇⵇⴰⵏ ⴰⴷ ⴷⴰⵔⵙ ⵜⵉⵍⵉ ⴳ ⵓⵎⵏⵉⴷ ⵏ ⵓⵙⴰⵎⵓ ⴷ ⵓⵙⵉⵥⴹⵕ ⴰⵙⵔⵜⴰⵏ ⵏ ⵜⵎⵖⴰⵔⵜ.

ⵜⵉⵏⵉ ⵎⴰⵙⵙⴰ ⵏⴰⵣⵉⵀ ⵎⴰⵙ ⵔⴰⴷ ⴷ ⴰⵡⵉⵏ ⵉⵙⵇⵙⵉⵜⵏ ⴰⴷ ⵉⵙⵖⵍⴰⴼ ⴼ ⵓⵏⵄⴰⵔ ⴷⴰⵔ ⵜⴳⵔⴰⵡⵉⵏ ⵜⵉⵙⵔⵜⴰⵏⵉⵏ ⵉ ⵓⵙⵎⵖⵔ ⵏ ⵜⴳⵏⵙⴻⵙⵜ ⵏ ⵜⵎⵖⴰⵔⵜ ⴷ ⵉⵙⵜⴰⵢⵏ ⴷ ⵓⵛⴽⴰⵏⵉⵏ ⴳ  ⵓⵙⵡⵉⵔ ⴰⴷⵖⴰⵔⴰⵏ ⴷ ⵓⵙⵉⵥⴹⵕ ⴰⵙⵔⵜⴰⵏ  ⵏ ⵜⵎⵖⴰⵔⵜ ⴳ ⵍⵎⵖⵔⵉⴱ.

ⵜⵏⵏⴰ ⵎⴰⵙⵙⴰ ⵃⴰⵍⵉⵎⴰ ⵍⵊⵓⵏⴷⵉ ⵜⴰⵏⵎⵀⴰⵍⵜ ⵏ ⵜⵎⵙⵎⵓⵏⵜ ⵙⵉⵎⵙⵉⵎ ⵜⴰⴷⵔⴰⵡⵜ ⵜⴰⵏⵎⵓⵔⵉ ⵎⴰⵙ ⴷ ⴷ ⵜⵇⵇⴰⵏ ⵜⵖⵔⵉ ⵜⴰⴽⴰⴷⵉⵎⵉⵜ ⵏ ⵜⵡⵉⵙⵉ ⵏ ⵜⵎⵖⴰⵔⵜ ⴳ ⵜⵓⴷⵔⵜ ⵜⴰⴱⵕⵍⴰⵎⴰⵏⵉⵜ, ⵙ ⵜⵎⵙⵓⵜⵍⵜ ⵜⴰⴷⵙⵜⴰⵔⵜ ⴷ ⵜⵎⵣⵔⴰⵢⵜ ⴷ ⵜⵙⵔⵜⴰⵏⵜ ⴷ ⵜⵏⴰⵎⵓⵏⵜ ⵏ ⵜⵉⵔⵎⵉⵜⵉⵏ ⴰⴷ, ⵜⵉⵏⵉ ⵎⴰⵙ ⵜⴳⴰ ⵜⵣⵔⴰⵡⵜ ⴰⴷ ⵙⴳ ⵉⵅⵎⵎⵉⵎⵏ ⵏ ⵜⵎⵙⵎⵓⵏⵜ ⵉ ⵡⴰⴷⴰⵙ ⵏ ⵓⵏⵖⵎⵉⵙ ⵙⴳ ⴰⵏⵎⵓⵔⵉ ⴷ ⵓⵙⵏⴼⵍ ⵏ ⵓⴼⵔⴰⴽ ⵏⵏⵙ ⴰⵙⵔⵜⴰⵏ ⵉ ⵓⵎⴹⴰⴽⴰⵕ ⴰⵏⴰⵎⵓⵏ ⵃⵎⴰ ⴰⴷ ⵢⵉⵍⵉ ⵓⵙⵉⵥⴹⵕ ⴰⵙⵔⵜⴰⵏ ⵢⵓⵎⴰⵏ ⵏ ⵜⵎⵖⴰⵔⵉⵏ.

ⵉⵙⴰⵡⵍ ⵎⴰⵙⵙ ⴱⵏⵢⵓⵏⵙ ⵍⵎⴰⵔⵣⵓⵇⵉ, ⴰⵎⵔⵣⵓ ⴷ ⵓⵙⴰⵍⵎⴰⴷ ⵏ ⵓⵣⵔⴼ ⴰⵎⴰⵜⴰⵢ ⴳ ⵜⵖⵉⵡⴰⵏⵜ ⵏ ⵉⵣⵔⴼⴰⵏ ⵏ ⵡⵓⵊⴷⴰ, ⵍⵍⵉ ⵉⵍⵍⴰⵏ ⴼ ⵜⵣⵔⴰⵡⵜ ⴰⴷ, ⵉⵙⴰⵡⵍ ⴼ ⵜⵎⵓⴽⵔⵉⵙⵉⵏ ⵍⵍⵉ ⴷⵉⴷⵙ ⵣⴼⵉⵏⵉⵏ ⴰⵎ: ⴰⵙⴰⵖⵓⴷ ⵓⵏⵜⵉⵎ, ⵜⵉⵜⴳⴰⵔⵉⵏ ⴷ ⵉⵏⵇⵇⵉⵙⵏ . ⵜⴱⴷⴷ ⵜⵣⵔⴰⵡⵜ ⴰⴷ ⴼ ⵓⵙⵎⵓⵏ ⵏ ⵓⵟⵟⵓⵏⵏ ⵣⴷⵉⵏⵉⵏ ⴷ ⵉⵙⵇⵙⵉⵜⵏ ⵉⵎⵉⵡⴰⵏⵏ ⴷ ⵓⵙⵜⴰⵢ ⵏ ⵉⵙⴳⵓⵎⵏ ⵙⴳ ⵜⵓⴷⵔⵜ ⵜⴰⴱⵕⵍⴰⵎⴰⵏⵉⵜ ⴰⵎ ⵉⵙⵇⵙⵉⵜⵏ ⵉⵎⵉⵡⴰⵏⵏ ⴷ ⵉⵎⴰⵔⴰⵢⵏ ⴷ ⵓⵣⵣⵔⴰⴼ ⵙ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⴷ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ. ⵢⵉⵏⵉ ⵎⴰⵙⵙ ⵍⵎⴰⵔⵣⵓⵇⵉ ⵎⴰⵙ ⵔⴰⴷ ⵉⵙⵎⵓⵏ ⵡⴰⵔⵔⴰ ⴰⴷ ⵜⵉⵙⵓⵎⵔⵉⵏ ⴼ ⵜⵎⵓⴽⵔⵉⵙⵉⵏ ⵣⴷⵉⵏⵉⵏ ⴷ ⵜⵎⴰⵙⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵍⵍⵉ ⵔⴰⴷ ⵉⴳ ⵜⴰⵙⵉⵍⴰ ⵏ ⵓⵏⵄⴰⵔ ⵉ ⵜⵡⵉⵍⴰ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵓⵛⴽⴰⵏⵉⵏ.

ⴳ ⵓⵎⵏⵉⴷ ⵏⵏⵙ, ⵜⵙⴷⴷⵉⴷ ⵎⴰⵙⵙⴰ ⴼⴰⵟⵉⵎⴰ ⵥⵥⴰⵀⵕⴰ ⵀⵉⵔⴰⵜ, ⵜⴰⵙⵍⵎⴰⴷⵜ ⵏ ⵓⵣⵔⴼ ⴰⵎⴰⵜⴰⵢ ⴳ ⵜⵖⵉⵡⴰⵏⵜ ⵏ ⵜⵉⵟⵡⴰⵏ, ⵎⴰⵙ ⵉⴳⴰ ⵡⴰⵡⵜⵜⴰⵙ ⴰⵔⵣⵣⵓ ⵏ ⵉⵎⴰⵙⵙⵏ ⵉ ⵓⵙⵏⴰⵍ ⴷ ⵓⵙⴷⵓⵙ ⵏ ⵓⴷⵖⴰⵔ ⵏ ⵜⵎⵖⴰⵔⵜ ⴳ ⵉⵙⵜⴰⵢⵏ, ⵍⵍⵉ ⴼ ⵜⴱⴷⴷ ⵜⵣⵔⴰⵡⵜ, ⵜⵉⵏⵉ ⵎⴰⵙ ⴷ ⵉⵇⵇⴰⵏ ⵓⵙⵎⵖⵔ ⵏ ⵡⴰⵔⵔⴰ ⴰⴽⴰⴷⵉⵎⵉ ⴰⴷ ⵢⴰⵎⵓ ⵉⵎⴰⵙⵙⵏ ⵉ ⵓⵔⵎⴰⵙ ⵏ ⵜⵏⴰⵥⴰⵕⵉⵏ ⵏ ⵜⵎⵖⴰⵔⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵙ ⵓⵙⵎⵣⴰⵣⴰⵍ ⴷ ⵜⵉⵔⵎⵉⵜⵉⵏ ⵜⴰⵄⵕⴰⴱⵉⵏ ⴷ ⵜⴳⵔⴰⵖⵍⴰⵏⵉⵏ.

ⴳ ⵓⵎⴹⴰⴽⴰⵕ, ⴼⴽⴰⵏ ⵉⴽⴰⴷⵉⵎⵉⵢⵏ ⴷ ⵉⴳⵏⵙⴰⵙⵏ ⵏ ⵡⴰⵎⵓⵏ ⴰⵖⵔⵎⴰⵏ ⴷ ⵜⵎⵓⵔⴰ ⵜⴰⵏⵏⴰⵢⵉⵏ ⴼ ⵜⵣⵔⴰⵡⵜ ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵥⵍⵉⵏ ⴷ ⵜⵓⴷⵔⵜ ⵜⴰⴱⵕⵍⴰⵎⴰⵏⵉⵜ ⵉ ⵓⵙⵎⵖⵔ ⵏ ⵜⵣⵔⴰⵡⵜ.