ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵓⵎⴰⴽⵕⴰⴹ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴼ ⵓⴼⵔⴰⴳ ⴰⵏⴰⵎⵓⵏ ⴷ ⵓⵏⴳⵎⴰⵎ ⴰⵏⴰⵎⵓⵔ ⵉ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵓⵎⴰⴽⵕⴰⴹ, ⴰⵢⵏⴰⵙ 15 ⵎⴰⵕⵚ 2021, ⵙⵉⵏ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴳ ⵓⵖⴰⵡⴰⵙ ⵏ ⵜⵙⵓⵜⵍⵜ ⵜⴰⵣⵣⵔⴰⴼⵜ ⵉⵥⵍⵉⵏ, ⴼ ⵓⴼⵔⴰⴳ ⴰⵏⴰⵎⵓⵏ ⴷ ⵓⵏⴳⵎⴰⵎ ⴰⵏⴰⵎⵓⵔ ⵉ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ, ⴳ ⵜⵖⵉⵎⵉⵜ ⵜⴰⴳⴷⵓⴷⴰⵏⵜ ⵍⵍⵉ ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵜⵉⵍⵉⵜ ⵏ ⵎⴰⵙⵙ ⵎⵓⵃⴰⵎⵎⴰⴷ ⴱⵏ ⵛⴰⵄⴱⵓⵏ ⴰⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ.
ⴳ ⵓⵙⵎⵏⵉⴷ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⴰⵙⴰⵜⵉ 09.21 ⴼ ⵓⴼⵔⴰⴳ ⴰⵏⴰⵎⵓⵏ, ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⴷ “ⴰⵙⵏⴼⴰⵔ ⴰⴷ ⵉⴳⴰ ⵡⵉⵏ ⵎⵉⴷⴷⵏ ⵛⵃⴰⵏⵉⵏ ⴷ ⵜⴰⵡⵊⵉⵡⵉⵏ ⵎⵓ ⴷⵔⵓⵙⵏⵜ ⵜⵖⵔⴰⴷ ⵎⴳⴰⵍ ⵏ ⵉⵎⵉⵣⵉⵢⵏ ⵏ ⵜⵎⵥⵉ ⴷ ⵜⵎⴰⴹⵓⵏⵜ ⴷ ⵜⵓⵙⵙⵔⴰ ⴷ ⵓⴽⵓⵙ ⵏ ⵜⵡⵓⵔⵉ”, ⵢⵉⵏⵉ ⵎⴰⵙ ⴷ 22 ⵎⵍⵢⵓⵏ ⵏ ⵓⵎⵖⵔⵉⴱⵉ ⴷⵉⴳⵙⵏ 11 ⵎⵍⵢⵓⵏ ⵍⵍⴰⵏ ⴳ ⵔⴰⵎⵉⴷ ⴷ ⵉⵎⵙⵡⵓⵔⵉⵢⵏ ⴷ ⵉⵙⴱⴱⴰⴱⵏ ⴷ ⵉⴼⵍⵍⴰⵃⵏ ⴷ ⵉⵃⵔⴰⵢⴼⵉⵢⵏ ⴷ ⵉⴷ ⴱⴰⴱ ⵏ ⵜⵡⵓⵔⵉ ⵜⵉⵍⴻⵍⵍⵉ ⵉⵚⴰⵃⴰ ⴰⵙⵏ ⵓⵙⴼⵍⵙ ⵓⵛⵛⵉⵍ ⴰⴷⵙⵍⴰⵏ ⴳ ⵜⵎⴰⴹⵓⵏⵜ ⴷ ⵜⵏⵓⴼⴰ ⴷ ⵉⵙⵉⵊⵊⵉⵜⵏ ⵚⴰⵃⴰⵏⵉⵏ ⵉ ⵉⵎⵙⵡⵓⵔⵉⵢⵏ ⴳ ⵢⵉⴳⵔ ⵓⵙⵍⵉⴳ ⵖⵉⵍⴰⴷ.
ⵓⵡⴰⵜⵜⴰⵙ ⵓⵙⵏⴼⴰⵔ ⵏ ⵓⵙⵍⴳⵏ ⴰⵙⴰⵜⵉ ⴰⵙⵎⴰⵜⴰ ⵏ ⵓⵙⴼⵍⵙ ⵓⵛⵛⵉⵍ ⴰⴷⵙⵍⴰⵏ ⵙⴳ ⵜⵎⴰⴹⵓⵏⵜ ⵃⵎⴰ ⴰⴷ ⵉⵙⵎⴰⵜⴰ ⵉⵡⴷⴰⵏ ⵙⵖⴰⵡⵙⴰⵏⵉⵏ ⴳ ⵓⵏⴳⵔⴰⵡ ⵏ ⵜⵡⵉⵣⵉ ⵏ ⵜⵙⵏⵉⵊⵊⵉⵜ ⴷ ⵓⵙⴽⵔ ⵏ ⵓⵙⴼⵍⵙ ⴰⴷ ⵉ ⵉⴷ ⴱⴰⴱ ⵏ ⵜⵣⵣⵓⵍⵉⵏ ⴷ ⵉⵎⵙⵡⵓⵔⵉⵢⵏ ⵉⵙⵉⵎⴰⵏⵏ ⴷ ⵡⵉⴷⴰ ⵓⵔ ⵙⴽⴰⵔⵏⵉⵏ ⴽⵔⴰ ⵏ ⵜⵡⵓⵔⵉ ⵉⵥⵍⵉⵏ, ⵙ ⵓⵖⴰⵡⴰⵙ ⴰⵣⵎⵣⴰⵏ ⵉⴳⴰⴷⴷⴰⵏ. ⵉⵡⴰⵜⵜⵙ ⵓⵍⴰ ⴰⵙⵎⴰⵜⴰ ⵏ ⵜⵖⵔⴰⴷ ⵏ ⵜⵓⵡⵊⴰ ⴷ ⵓⵙⵎⵖⵔ ⵏ ⵜⵙⵉⵍⴰ ⵏ ⵉⵎⵍⵜⴰⵖⵏ ⴳ ⵉⵏⴳⵔⴰⵡⵏ ⵏ ⵜⵏⴰⴼⵜ.
ⴳ ⵓⵎⴹⴰⴽⴰⵕ, ⵙⵓⵜⴳⵏ ⵉⴷ ⵎⴰⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⴰⵙⵏⴼⴰⵔ ⵉ ⵓⵙⵔⵚⵓ ⵏ ⵜⵣⵔⴼⵜ ⵜⴰⵏⴰⵎⵓⵏⵜ ⵉ ⵓⴽⵛⵎ ⵙ ⵜⵏⵓⴼⴰ ⴹⵎⵏⵏⵉⵏ ⴰⴷⴷⵓⵔ ⵏ ⵓⵏⵎⵓⵔⵉ ⴷ ⵉⵙⵖⴰⵡⵙⴰⵜⵏ ⵏⵏⵙ, ⴼⴽⵉⵏ ⵜⴰⵏⵏⴰⵢⵉⵏ ⴼ ⵜⵡⵉⵙⵉ ⵏ ⵉⵡⴷⴰⵏ ⵉⵎⵏⵜⴰⵢⵏ, ⴷ ⵓⵙⴷⵓⵙ ⵏ ⵓⵏⴱⴰⴹ ⴳ ⵓⵙⵡⵓⴷⴷⵓ ⵏ ⵓⵙⵏⴼⴰⵔ, ⴷ ⵓⵙⵡⵓⴷⴷⵓ ⴰⵥⵕⴼⴰⵏ ⵏ ⵓⵙⴼⵍⵙ ⴰⵏⴰⵎⵓⵏ, ⴷ ⵓⵣⴷⴷⵓⵢ ⵏⴳⵔ ⵉⵖⴰⵡⴰⵙⵏ ⵉⵏⴰⵎⵓⵏⵏ, ⴷ ⵜⵙⵓⵎⵔⵉⵏ ⵍⵍⵉ ⵔⴰⴷ ⵉⵙⵎⵔⵙ ⴰⵙⵏⴼⴰⵔ.
ⴳ ⵜⵖⵉⵎⵉⵜ ⴰⴷ, ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵏⴼⴰⵔ ⵏ ⵓⵙⵍⴳⵏ 46.19 ⴼ ⵓⵏⴳⵎⴰⵎ ⴰⵏⴰⵎⵓⵔ ⵉ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ, ⵉⵍⵍⴰⵏ ⴳ ⵓⵙⵎⴰⵢⵏⵓ ⵏ ⵜⵎⵥⵍⴰⵢ ⴰⵙ ⵉⴼⴽⴰ ⵓⴷⵓⵙⵜⵓⵔ ⵏ 2011 ⵙ ⵓⵎⵏⵏⵉ 36 ⵏ ⵓⵏⴳⵎⴰⵎ ⴰⴷ.
ⴷⴰ ⵉⵙⴰⵡⴰⵍ ⵓⵙⵏⴼⴰⵔ ⵏ ⵓⵙⵍⴳⵏ ⴼ ⵜⵎⵥⵍⴰⵢ ⵏ ⵓⵏⴳⵎⴰⵎ ⴰⴷ ⴷ ⵓⵥⵟⵟⴰ ⴷ ⵓⵙⵏⵎⴰⵍⴰ ⴷ ⵜⵔⵙⴰⵍ ⵏ ⵜⵡⵓⵔⵉ ⵏⵏⵙ ⴷ ⵡⴰⴷⴷⴰⴷⵏ ⵏ ⵓⵎⵣⴰⵔⴰⵢ. ⵔⴰⴷ ⵢⴰⵡⵙ ⵓⵏⴳⵎⴰⵎ ⴳ ⵜⵓⴳⴳⴰⵙ ⵜⵉⵏⴰⵎⵓⵔⵉⵏ ⵏ ⵓⵙⴱⴷⴷⵉ ⵏ ⵓⵙⴳⵓⴼⵙⵓ ⴷ ⵓⵙⴽⵔ ⵏ ⵓⵏⴱⴰⴹ ⵉⵥⵉⵍⵏ, ⴷ ⵓⵣⵓⵣⵣⵔ ⵏ ⵡⴰⵜⵉⴳⵏ ⵏ ⵜⵣⴷⴳⵉ ⴷ ⵜⵎⴰⴼⴰⵡⵜ, ⵙ ⵓⵙⴽⵔ ⵏ ⵜⵙⵖⴰⵍ ⵜⵜⵓⵙⵙⴰⵏⵏⵉⵏ ⴼ ⵉⵏⴳⵎⴰⵎⵏ ⵏ ⵓⵙⴱⴷⴷⵉ ⵏ ⵓⵙⴳⵓⴼⵙⵓ, ⴳ ⵜⵍⵍⴰ ⵜⵙⵉⵎⴰⵏⵜ ⴷ ⵓⵙⵎⵖⵔ ⵏ ⵉⴳⵔⴰⵏ ⵏ ⵜⵡⵓⵔⵉ ⴷ ⵓⵙⵎⵓⵏ ⵊⴰⵔ ⵓⵏⴱⴰⴹ ⴷ ⵡⴰⵔⴰⵢ ⴷ ⵓⵙⴱⴷⴷⵉ.
ⵔⴰⴷ ⵢⵉⵍⵉ ⵓⵙⵏⴼⴰⵔ ⴰⴷ ⴷⴼⴼⵉⵔ ⵏ ⵓⵙⵖⵣⵏ ⵉⵙⵎⴷⵏ ⵙⴳ ⵓⴱⵕⵍⴰⵎⴰⵏ ⵙ ⵙⵉⵏ ⵉⵙⵇⵇⵉⵎ, ⵙ ⵓⵙⵎⵍ ⵏ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⴷ ⵓⵏⴼⵍⵓⵙ ⵏⵏⵙ ⴰⵎⴰⵜⴰⵢ ⵏ ⵓⵏⴳⵎⴰⵎ.