ⴰⵙⵉⵔⴰ(2016-2021):
ⵉⵙⴰⵡⴰⵍ ⵎⴰⵙⵙ ⵎⵓⵃⴰⵎⵎⴰⴷ ⵡⴰⵣⵣⵉⵏ, ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴼ ⵜⵎⵢⴰⴷⴰⵙⵜ ⵜⵉⵏⴻⵍⵍⵉⵜ ⴷ ⵜⵎⴰⴷⵔⴰⵡⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴳ ⵓⵙⵎⴽⵍ ⵏ ⵓⵣⵡⴰⴳ
ⵉⵙⵙⵉⵅⴼ ⵎⴰⵙⵙ ⵎⵓⵃⴰⵎⵎⴰⴷ ⵡⴰⵣⵣⵉⵏ, ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵉⵎ ⵏ ⵉⵎⵓⵔⴰ, ⴰⴽⴰⴱⴰⵕ ⵏ ⵓⵙⵇⵇⵉⵎ, ⴰⴽⵡⴰⵙ 04 ⴱⵕⴰⵢⵕ 2021, ⴳ ⵜⵙⵎⵓⵏⵉ ⵏ ⵜⵙⵇⵇⵉⵎⵜ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ ⵏ ⵜⵎⵜⵜⴰ ⵉⵎⵓⵏⵏ ⵏ ⴳⵔⵡ ⵏ ⴰⵙⵢⴰ (ⵉⵙⴽⵡⴰ) ⴷ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵏ ⵓⵣⵡⴰⴳ, ⴼ “ⴰⵎⵙⴰⵡⴰⵍ ⵏ ⵉⴱⵕⵍⴰⵎⴰⵏⵏ ⴰⵄⵕⴰⴱⵏ ⴼ ⵓⵙⵎⵏⵉⴷ ⴰⵏⵎⵏⴰⴹ ⵏ ⵓⵎⵙⴰⵙⴰ ⴰⴳⵔⴰⵖⵍⴰⵏ ⵉ ⵓⵣⵡⴰⴳ ⵏ ⵓⴼⵔⴰ ⴷ ⵓⵍⴳⵉⵏ ⴳ ⵙⴳⴰ ⵜⴰⵄⵕⴰⴱⵜ” ⵙ ⵓⴼⵉⵣⵢⵓⴽⵓⵏⴼⵉⵕⵓⵏⵙ.
ⵉⵏⵏⴰ ⵎⴰⵙⵙ ⵎⵓⵃⴰⵎⵎⴰⴷ ⵡⴰⵣⵣⵉⵏ ⵎⴰⵙ ⵜⴱⴷⴷ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴼ ⵓⵙⵡⵓⴷⴷⵓ ⴰⵏⵍⵉ ⴷ ⵓⵎⴷⵔⴰⵡ ⵏ ⵓⵣⵡⴰⴳ, ⵜⴳ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⵜⴰⵎⵣⵡⴰⵔⵓⵜ ⴳ ⵉⴼⵔⵉⵇⵢⴰ ⵍⵍⵉ ⵉⵙⵎⵏⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵍⵍⵉ ⵙⵜⵉⵏ ⵉⵅⴰⵜⴰⵔⵏ ⵏ ⵉⵡⴰⵏⴽⵏ ⵉⴼⵔⵉⵇⵉⵢⵏ ⴳ 2017 ⴷ ⴰⵎⵣⵡⴰⵔⵓ ⵏ ⵜⴰⵎⵓⵏⵜ ⵏ ⵉⴼⵔⵉⵇⵢⴰ ⴳ ⵉⵎⵔⵙⵉ ⵏ ⵓⵣⵡⴰⴳ, ⵜⴰⵜⴳⴰⵔⵜ “ ⴰⵖⴰⵡⴰⵙ ⴰⴼⵔⵉⵇⵉ ⴼ ⵓⵣⵡⴰⴳ” ⴳ ⵓⵏⵎⵓⵇⴰⵔ ⵏ ⵜⴰⵎⵓⵏⵜ ⵜⴰⴼⵔⵉⵇⵉⵜ ⵜⴰⵎⴳⴳⴰⵔⵓⵜ ⴳ ⴰⴷⵉⵙ ⴰⴱⴰⴱ, ⵍⵍⵉ ⵉⵍⵍⴰⵏ ⵙ ⵜⵎⵢⴰⴷⴰⵙⵜ ⵜⴰⵎⴰⴷⵔⴰⵡⵜ ⵢⵓⵎⴰⵏ, ⵜⴳ ⵜⴰⵢⴰⴼⵓⵜ ⵏ ⵓⵎⵛⴰⵡⴰⵕ ⴷ ⵉⵡⴰⵏⴽⵏ , ⵉⵍⵉⵏ ⴳⵉⵙ ⵉⵙⵡⵉⵏⴳⵉⵎⵏ ⴷ ⵜⵙⵓⵎⵔⵉⵏ ⵏ ⵜⵎⵔⵙⴰⵍ ⵜⵓⵏⵚⵉⴱⵉⵏ, ⴷ ⵡⴰⵎⵓⵏ ⴰⵖⵔⵎⴰⵏ ⴷ ⵉⵎⵔⵣⵓⵜⵏ.
ⵉⵙⵙⴽⵜⵉ ⴷ ⵎⴰⵙⵙ ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⴽⵔ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴳ ⵜⴳⵉⵔⴰ ⵏ 2018 ⵏ ⵓⴳⵔⴰⵡ ⴰⴱⵕⵍⴰⵎⴰⵏⵉ ⴰⴳⵔⴰⵖⵍⴰⵏ ⴼ ⵓⵣⵡⴰⴳ, ⴳ ⵉⵍⵍⴰ ⵓⵙⵖⵣⵏ ⵏ ⵓⵎⵇⵏ ⴰⵎⴰⴹⵍⴰⵏ ⵉ ⵉⵣⵡⴰⴳ ⵏ ⵓⴼⵔⴰ ⵓⵍⴳⵉⵏ, ⴷ ⵓⵙⵖⵣⵏ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⵙ ⵓⵎⴰⴽⵕⴰⴹ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 01.19 ⴼ ⵓⵙⴽⵔ ⵏ ⵓⵙⵖⵉⵎ ⵏ ⵓⵎⵥⵕⴰⵢ ⴰⴼⵔⵉⵇⵉ ⵏ ⵓⵣⵡⴰⴳ ⵙ ⵓⵙⵎⵀⵍ ⵏ ⵓⵎⵙⴰⵙⴰ ⵏⴳⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵜⵎⵓⵏⵜ ⵜⴰⴼⵔⵉⵇⵉⵜ. ⵍⵍⵉ ⵉⵙⵙⵏⵜⵉⵏ ⵜⴰⵡⵓⵔⵉ ⵏⵏⵙ ⴳ ⵜⴳⵉⵔⴰ ⵏ ⴷⵓⵊⴰⵏⴱⵉⵔ ⵉⵣⵔⵉⵏ ⵉⴳ ⵉ ⵓⵎⵏⵥⴰⵡ ⴰⴼⵔⵉⵇⵉ ⵢⴰⵏ ⵉⵎⵉⵙⵙ ⵉⵕⵡⴰⵏ ⵍⵍⵉ ⵔⴰⴷ ⵉⵔⴰⵔ ⴼ ⵉⵙⵖⴰⵡⵙⴰⵜⵏ ⵏⵏⵙ ⵏ ⵜⵉⴷⵜ ⵉ ⵓⵔⵎⴰⵙ ⵢⴰⵙⵜⵡⴰⵏ ⵏ ⵓⵣⵡⴰⴳ, ⴷ ⵓⵙⵖⵓⴷⵓ ⵏ ⵓⵙⵎⵓⵏ ⴷ ⵓⵙⴼⵙⵉ ⴷ ⵓⵙⵏⴼⵍ ⵏ ⵓⵎⵍⴰⵏ ⵏⴳⵔ ⵜⵎⵉⵣⴰⵔ ⵏ ⵉⴼⵔⵉⵇⵢⴰ.
ⴳ ⵜⵙⵓⵜⵍⵜ ⴳ ⵉⴷⴷⵔ ⵓⵎⴰⴹⴰⵍ ⴰⵙⵙ ⴰⴷ ⴳ ⵉⵍⵍⴰ ⵓⴱⴰⵢⵢⵓⵕ ⵏ ⴽⵓⴼⵉⴷ 19, ⵉⵣⵎⵎⵉⵎ ⵎⴰⵙⵙ ⵡⴰⵣⵣⵉⵏ ⵎⴰⵙ ⵜⴱⴷⴷ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴼ ⵓⵙⵓⵊⴷ ⵏ ⵓⵙⵎⴰⵇⵍ ⴰⵎⴰⵢⵏⵓ ⵏ ⵓⵏⴱⴰⴹ ⴳ ⵢⵉⴳⵔ ⵏ ⵓⵣⵡⴰⴳ ⵙ ⵜⵎⵢⴰⴷⴰⵙⵜ ⵢⵓⵎⴰⵏ ⵉⵛⵛⴰⵔⵏ, ⴳ ⵉⵍⵍⴰ ⵡⴰⴷⴷⵓⵔ ⴷ ⵜⵓⴷⵔⵜ ⵉⵥⵉⵍⵏ ⵉ ⵉⵎⵣⵡⴰⴳⵏ, ⴷ ⵓⵙⵎⴰⴷ ⵏ ⵜⵓⴳⴳⴰⵙ ⵜⵜⵓⵙⴽⴰⵔⵏⵉⵏ ⵉ ⵓⴼⵓⴽⴽⵓ ⵏ ⵜⵎⵓⴽⵔⵉⵙⵉⵏ ⵏⵏⵙ ⵜⵉⵣⵔⴼⴰⵏⵉⵏ ⴷ ⵜⴷⵎⵙⴰⵏⵉⵏ.
ⵢⵉⵏⵉ ⵎⴰⵙⵙ ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵟⵟⴰⴼⵏ ⵉⴱⵕⵍⴰⵎⵏ ⵜⵉⵎⴰⵙⴰⵢⵉⵏ ⵥⵍⵉⵏⵉⵏ ⴳ ⵢⵉⴳⵔ ⴰⴷ, ⵙ ⵓⵙⵖⵣⵏ ⵏ ⵉⵣⵣⵔⴰⴼⵏ ⴷ ⵓⵙⵙⵔⵇⴱ ⵏ ⵜⵏⴱⴰⴹⵉⵏ ⵉ ⵓⵙⴽⵔ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵏ ⵓⵙⵉⴷⴼ, ⴷ ⵓⵣⵓⵣⵣⵔ ⵏ ⵜⴷⵍⵙⴰ ⵏ ⵓⵎⵢⵉⴷⵉⵔ ⴷ ⵓⴼⵔⴰ ⴷ ⵓⵡⵇⵇⵔ ⵏ ⵓⵣⵔⴼ ⴳ ⵓⵎⵣⴰⵔⴰⵢ, ⴷ ⵓⵡⵇⵇⵔ ⵏ ⵡⵉⵢⵢⴰⴹ, ⴷ ⵜⵏⴳⴰⴷⴷⴰⵢⵜ ⴷ ⵓⵙⵉⵜⵜⵉ ⵏ ⵡⴰⵔⵜⴰⵢⵔⵉ ⴷ ⵓⵣⵣⵔⴰⵢ ⵏ ⴳⴰⵔ ⵉⵙⵡⵉⵏⴳⵉⵎⵏ ⴼ ⵉⵎⵣⵡⴰⴳⵏ, ⵉⵖⵔ ⵉ ⵓⵙⵔⵅⵓ ⵏ ⵜⴳⵎⵉ ⴳ ⵜⵎⵉⵣⴰⵔ ⵏ ⵓⵣⵡⴰⴳ, ⴷ ⵓⴼⵓⴽⴽⵓ ⵏ ⵉⵎⴰⵖⵏ ⵙ ⵓⴼⵔⴰ ⴷ ⵡⴰⵔⴰⵢ ⴷ ⵓⵙⵎⴽⵍ ⵏ ⵜⵎⵏⵜⵉⵍⵉⵏ ⵏ ⵜⵎⵓⴽⵔⵉⵙⵜ ⴰⴷ.
ⵉⵍⵍⴰ ⴳ ⵓⴽⴰⴱⴰⵕ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⵓⵍⴰ ⵎⴰⵙⵙ ⵎⵓⵃⴰⵎⵎⴰⴷ ⵣⵡⵉⵜⵏ, ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⴱⵕⵕⴰ ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ ⴷ ⵉⵎⵖⵔⵉⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⵉⴳ ⵡⴰⵡⴰⵜⵜⴰⵙ ⵏ ⵜⵙⵎⵓⵏⵉ ⴰⴷ ⵙⵙⵏⵏ ⵉⴱⵕⵍⴰⵎⴰⵏⵉⵢⵏ ⵜⴰⵣⵣⵉⴳⵣⵜ ⵉⴳⴳⵓⵔⴰⵏ ⴳ ⵓⵏⴱⴰⴹ ⵏ ⵓⵣⵡⴰⴳ ⴳ ⵉⵙⵡⵉⵔⵏ ⵉⵎⴰⴹⵍⴰⵏⵏ ⴷ ⵉⵏⵎⵏⴰⴹⵏ, ⴷ ⵓⵙⵙⵔⵇⴱ ⵏ ⵓⵎⵙⴰⵡⴰⵍ ⴰⵏⵎⵏⴰⴹ, ⴷ ⵓⵙⵏⴼⵍ ⵏ ⵜⵉⵔⵎⵉⵜⵉⵏ ⴼ ⵜⵉⵍⴰⵍⵜ ⵏ ⵉⴱⵕⵍⴰⵎⴰⵏⵏ ⴳ ⵓⵙⵎⴽⵍ ⵏ ⵓⵣⵡⴰⴳ, ⴷ ⵓⵎⴹⴰⴽⴰⵕ ⵏ ⵜⴱⵔⵉⴷⵉⵏ ⵥⵉⵍⵏⵉⵏ ⴼ ⵜⵡⵉⵙⵉ ⵏ ⵉⴱⵕⵍⴰⵎⴰⵏⵉⵢⵏ ⴳ ⵓⵣⵣⵔⴰⵢ ⴰⵏⵎⴰⵏⴰⴹ ⵏ ⵓⵎⵙⴰⵙ ⴰⵎⴰⴹⵍⴰⵏ ⵉ ⵓⵣⵡⴰⴳ ⵏ ⵓⴼⵔⴰ ⵉⴳⴰⵏ ⵓⵍⴳⵉⵏ.
