ⴰⵏⵎⵓⵇⴰⵔ ⴰⴱⵕⵍⴰⵎⴰⵏⵉ ⴰⴳⵔⴰⵖⵍⴰⵏ ⵏ ⵜⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⴷ ⵜⵓⵜⵔⴰⵡⵉⵏ ⴼ:”ⵜⴰⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⴷ ⵓⵙⵇⵙⵉ ⵏ ⵜⵉⵕⵡⵉ”

ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⴷ ⵜⵓⵜⵔⴰⵡⵉⵏ ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵡⴰⵙ 28 ⵉⵏⵏⴰⵢⵔ 2021, ⴰⵏⵎⵓⵇⴰⵔ ⴰⴱⵕⵍⴰⵎⴰⵏⵉ ⴰⴳⵔⴰⵖⵍⴰⵏ ⵙ ⵓⴼⵉⵣⵢⵓⴽⵓⵏⴼⵉⵕⵓⵏⵚ ⴼ :” ⵜⴰⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⴷ ⵓⵙⵇⵙⵉ ⵏ ⵜⵉⵕⵡⵉ”, ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⴰⵎⴰⵔⵉ ⵕⴰⵛⵉⴷ ⵍⵄⴰⴱⴷⵉ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⴰⴷ, ⵙ ⵓⴷⵔⴰⵡ ⵏ ⵉⴳⵏⵙⴰⵙⵏ ⵏ ⵉⴱⵕⵍⴰⵎⴰⵏⵏ ⵏ ⵍⴽⵉⴱⵉⴽ ⴷ ⵍⴰⵍⵎⴰⵏ ⴷ ⴱⵕⵉⵟⴰⵏⵢⴰ.

ⵉⵜⵜⵓⵙⴽⴰⵔ ⵓⵏⵎⵓⵇⴰⵔ ⵙ ⵓⴷⵔⴰⵡ ⴷ ⵜⵎⵔⵙⵍⵜ ⵡⵉⵙⵜⵎⵉⵏⵙⵜⵔ ⵉ ⵜⴷⵉⵎⵓⵇⵔⴰⵟⵉⵜ, ⴳ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵜⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵜⵍⵍⴰ ⵜⵓⵙⵙⵏⴰ ⵏ ⵜⵉⵔⵎⵉⵜⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵓⵎⵓⵔⵙ ⴳ ⵢⵉⴳⵔ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ, ⵃⵎⴰ ⴰⴷ ⵢⵉⵍⵉ ⵓⵙⴱⵓⵖⵍⵓ ⵏ ⵓⵙⵡⵓⵔⵉ ⴰⴱⵕⵍⴰⵎⴰⵏⵉ ⴷ ⵜⵓⵍⴽⵉⵎⵉⵏ ⵏ ⵉⵏⵎⵓⵔⴰⵏ, ⵢⵉⵍⵉ ⵓⵙⵏⴼⵍ ⵏ ⵜⵉⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ.

ⵖ ⵜⴳⵓⵔⵉ ⵏⵏⵙ, ⵉⵏⵏⴰ ⵎⴰⵙⵙ ⵍⵄⴰⴱⴷⵉ ⵎⴰⵙ ⵜⴳⴰ ⵜⵉⵡⵉⵙ ⵏ ⵉⴱⵕⵍⴰⵎⴰⵏⵏ ⵉⵎⴷⴷⵓⴽⴽⴰⵍ ⵜⴰⵎⴰⵜⴰⵔⵜ ⵏ ⵓⵎⵓⵔⵙ, ⴰⵢⵍⵍⵉ ⵔⴰⴷ ⵢⴰⵡⵙ ⴳ ⵓⵙⵏⴼⵍ ⵏ ⵜⵉⵔⵎⵉⵜⵉⵏ ⴼ ⵉⵎⴰⵙⵙⴰⵏ ⵉⴱⵕⵍⴰⵎⴰⵏⵉⵢⵏ ⵏ ⵓⵏⵢⴰⵍⴽⴰⵎ ⴷ ⵜⵓⵍⴽⵉⵎⵉⵏ ⵏ ⵉⵏⵎⵓⵔⴰⵏ ⴷ ⵉⵎⴰⵍⵏ ⵏⵏⵙⵏⵜ. ⵉⴱⴷⴷ ⵎⴰⵙⵙ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⴼ ⵡⴰⵜⵉⴳ ⵏ ⵜⴷⵉⵎⵓⵇⵔⴰⵟⵉⵜ ⵏ ⵜⴳⵏⵙⴰⵙⵜ ⵉⴳⴰⵏ ⴰⵖⴱⴰⵍⵓ ⵏ ⵜⵢⴰⵏⵜ ⵍⵍⵉⵖ ⵜⴳⴰ ⵢⴰⵜ ⴳ ⵜⵉⵔⵙⴰⵍ ⵏ ⵜⵎⵜⵜⵉ, ⵢⵉⵏⵉ ⵎⴰⵙ ⵜⴳⴰ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⵓⵍⵜⵎⴰⵙ ⵎⵥⵥⵉⵏ ⵉ ⴽⵉⴳⴰⵏ ⵏ ⵜⵢⴰⵏⵜ ⴷ ⵜⵡⵉⵣⵉ ⴷ ⵜⴷⵉⵏⴰⵎⵉⵜ ⵜⴰⵏⴰⵎⵓⵏⵜ ⴷ ⵜⵓⵏⴳⵉⵎⵜ. ⵢⴰⵡⵉ ⴷ ⵎⴰ ⴷ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⴳ ⵓⵎⵏⵉⴷ ⴰⴷ:”ⵉⴽ ⵏⵏⴰ ⵜⴳⴰ ⵜⵓⵍⴳⵉⵏⵜ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵏⵎⵓⵔⴰⵢⵜ ⵜⴰⵣⴰⵢⴽⵓⵜ, ⵉⵇⵇⴰⵏ ⴷ ⴰⴷ ⵢⵉⵍⵉ ⵓⵙⵎⴰⴷ ⵏⵏⵙ ⵙ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⵜⴰⵎⴰⵢⵏⵓⵜ, ⴰⵢⵍⵍⵉ ⵔⴰⴷ ⴰⵖ ⵢⴰⵡⵙ ⴰⴷ ⵢⵉⵍⵉ ⵚⴰⵃⴰ ⵙⴳ ⵜⵉⵎⵓⵣⴰⵢⵉⵏ ⵜⵉⵏⴰⵎⵓⵔⵉⵏ ⴷ ⵜⵙⴳⴰⵡⴰⵏⵉⵏ, ⴷ ⵡⴰⵎⵓⵏ ⴰⵖⵔⵎⴰⵏ ⵉⵙⵡⵓⵔⵉⵏ, ⴷ ⴽⵓ ⵉⵎⵙⴽⴰⵔⵏ ⵓⴷⴷⵉⵔⵏ ⵏ ⵜⵎⵜⵜⵉ, ⴷ ⵉⵖⴱⵓⵍⴰ ⵏⵏⵙ ⴷ ⵉⵙⵓⵔⴰ ⵏⵏⵙ, ⵉⴽ ⵏⵏⴰ ⴳⴰⵏ ⵉⴷⵖⴰⵔⵏ ⵏⵏⵙ, ⵉⵟⵟⴰⴼⵏ ⴰⵙⵡⵉⵔ ⵏⵏⵙ ⴷⴰⵔⵏⵖ, ⴷ ⵓⵎⵏⵉⴷ ⵏⵏⵙ ⵉⵜⵜⵓⵇⵔⵏ ⵖ ⵜⵖⴰⵡⵙⴰ ⵜⴰⵎⴰⵜⴰⵢⵜ, ⴳ ⵢⵉⴳⵔ ⵏ ⵓⴱⴰⴹ ⵏ ⵓⵙⵍⴳⵏ ⴷ ⵓⵡⴰⵏⴽ ⵏ ⵜⵎⵔⵙⴰⵍ”.  

ⵢⵉⵏⵉ ⵎⴰⵙⵙ ⵍⵄⴰⴱⴷⵉ ⵎⴰⵙ ⵉⵟⵟⴰⴼ ⵉⵏⴰⵡ ⴰⴷ ⵜⴰⵖⵍⴰⵖⴰⵍⵜ ⵏⵏⵙ ⴷⴰⵔ ⵡⴰⵍⵍⵉ ⵉⵙⴽⵔⵏ ⴰⴷⵓⵙⵜⵓⵔ, ⵍⵍⵉⵖ ⵉⵙⵔⵙ ⵜⵉⵔⵙⴰⵍ ⵜⵉⵎⵣⵡⵓⵔⴰ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⵙ ⴽⵓ ⵉⵎⵏⴰⴷⵏ ⵏⵏⵙ ⵉⵏⴰⵎⵓⵔⵏ ⴷ ⵉⵏⴰⴽⴰⵍⵏ. ⵉⴹⴼⵕ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⴷⵉⵏⴰⵎⵉⵜ ⵏ ⵓⴷⵓⵙⵜⵓⵔ ⵏ 2011 ⵍⵍⵉⵖ ⵉⵙⵡⵓⵔⵉ ⴳ ⵓⵙⴰⵡⵓⵔ ⴰⴷ ⴰⵏⴰⵎⵓⵔ ⴰⵅⴰⵜⴰⵔ. ⵖⵎⴽ ⵍⵍⵉ ⵉⵏⵏⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵉⵎ ⵏ ⵉⵎⵓⵔⴰ, ⴳ ⵜⵉⵏⴰⵡⵜ ⵜⴰⵎⴰⵙⵙⴰⵏⵜ ⴼ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⴳ 25 ⴱⵕⴰⵢⵕ 2020, ⴷ ⵓⵏⵎⵓⵇⴰⵔ ⵏ ⵓⵎⵙⴰⵡⴰⴹ ⴷ ⵡⴰⵎⵓⵏ ⴰⵖⵔⵎⴰⵏ ⴼ ⵉⵙⵖⵡⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵙⵏⵜⴰⵢⵜ ⵏ ⵜⵎⴷⵔⴰⵡⵜ ⵉ ⵜⵏⴱⴰⴹⵜ ⵉⵕⵥⵎⵏ ⵏⵖ ⴰⴱⵕⵍⴰⵎⴰⵏ ⵉⵏⵏⵓⵕⵥⵎⵏ ⴳ 23 ⵎⴰⵢⵢⵓ 2019, ⵉⵙⴰⵡⵍ ⴼ ⵜⵎⵙⴽⴰⵔ ⵏ ⵓⵙⵇⵇⵉⵎ ⵖ ⵓⵙⴽⵔ ⵙ ⵓⴷⵓⵙⵜⵓⵔ ⴳ ⵓⵎⵏⵉⴷ ⴰⴷ ⵙ ⵓⵙⴽⵔ ⵏ “ⵜⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⴷ ⵜⵢⴰⵏⵜ ⵜⴰⵎⵙⵙⵓⴳⵓⵔⵜ ⴳ ⵓⵏⴳⵔⴰⵡ ⵏ ⵓⵙⵇⵇⵉⵎ ⵉⴱⴷⴷⵏ ⴼ ⵜⵓⵍⴽⵉⵎⵉⵏ ⴷ ⵜⵓⵜⵔⴰⵡⵉⵏ ⵏ ⵓⵣⵣⵔⴰⴼ, ⵃⵎⴰ ⴰⴷ ⵢⵉⵍⵉ ⵓⴱⵕⵍⴰⵎⴰⵏ ⵏ ⵡⴰⴷⴰⵙ, ⵉⵍⵍⴰⵏ ⴷ ⵉⵅⵎⵎⵉⵎⵏ ⵏ ⵡⴰⵎⵓⵏ ⴷ ⵓⵣⵓⵣⵣⵔ ⵏ ⵜⴷⵍⵙⴰ ⵏ ⵜⴷⵉⵎⵓⵇⵔⴰⵟⵉⵜ ⴳ ⵢⵉⴳⵔ ⵉⴳⴳⵓⵜⵏ ⴷ ⵓⵏⵢⴰⵍⴽⴰⵎ ⴷ ⵓⴳⴷⵓⴷ ⵏ ⵉⵄⵔⵔⵉⵎⵏ”.

ⵜⵙⴷⴷⵉⴷ ⵎⴰⵙⵙⴰ ⴷⵉⵏⴰ ⵎⵓⵍⵃⵉⵎ, ⵜⴰⵏⵎⵀⴰⵍⵜ ⵏ ⵉⵖⴰⵡⴰⵙⵏ ⵏ ⵡⵉⵎⵉⵏⴳ ⴰⵏⴰⵎⵎⴰⵙ ⴷ ⵉⵥⵥⵍⵎⴹ ⵏ ⵉⴼⵔⵉⵇⵢⴰ, ⴳ ⵜⵎⵔⵙⵍⵜ ⵏ ⵡⵉⵙⵜⵎⵉⵏⵙⵜⵔ ⵉ ⵜⴷⵉⵎⵓⵇⵔⴰⵟⵉⵜ ⴼ ⵡⴰⵜⵉⴳ ⵏ ⵉⵎⵔⵙⵉ ⵖ ⵓⵙⴷⵓⵙ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⴳ ⵓⵙⴽⵔ ⵏ ⵜⵖⵜⴰⵙⵜ ⴷ ⵜⵙⵔⵜⴰⵢ ⵜⵉⵎⴰⵜⴰⵢⵉⵏ ⵉⴱⴷⴷⵏ ⴼ ⵜⵎⵙⴽⵔⵜ ⵜⴰⴷⵉⵎⵓⵇⵔⴰⵟⵉⵜ ⵉⵕⵡⴰⵏ, ⵜⴳ ⵜⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⴷ ⵜⵓⵜⵔⴰⵡⵉⵏ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵖⵔⵉⴱⵉ ⴰⵙⴽⵔ ⵏ ⵓⴷⵓⵙⵜⵓⵔ ⴰⴷⵉⵎⵓⵇⵔⴰⵟⵉ ⵏ 2011. ⵉⴳ ⵓⵏⵎⵓⵇⴰⵔ ⴰⴷ ⴳ ⵓⵎⵏⴰⴹ ⵏ ⵓⵙⵡⵓⵔⵉ ⵙ ⵜⵣⵣⵉⴳⵣⵉⵏ ⵜⵉⵜⵉⴽⵏⵓⵍⵓⵊⵉⵢⵉⵏ ⴷ ⵜⴱⴰⴷⵓⵜⵉⵏ ⵏ ⵜⵡⵉⵙⵉ  ⵍⵍⵉ ⴷ ⵜⵉⵡⵉ ⴽⵓⵕⵓⵏⴰ ⵃⵎⴰ ⴰⴷ ⵙⴰⵡⵍⵏ ⵉⵏⵎⵓⵔⴰⵏ ⴼ ⵜⴰⵏⵏⴰⵢⵉⵏ ⵏⵏⵙⵏ ⴼ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⵙ ⴰⵢⵍⵍⵉ ⵉⵍⵍⴰⵏ ⴳ ⵓⵎⵏⴰⴹ ⵓⵍⴳⵉⵏ ⴷ ⵓⵏⴰⵎⵓⵔ ⵏ ⴽⵓ ⴰⵡⴰⵏⴽ.

ⵙⴰⵡⵍⵏ ⵉⴳⵏⵙⴰⵙⵏ ⵏ ⵉⴱⵕⵍⴰⵎⵏⵏ ⴼ ⵜⵉⵔⵎⵉⵜⵉⵏ ⵏⵏⵙⵏ ⴷ ⵜⴱⵔⵉⴷⵉⵏ ⴷ ⵉⵎⴰⵙⵙⵏ ⵏ ⵓⵙⵔⵓⵙ ⵏ ⵜⵓⵍⴽⵉⵎⵉⵏ, ⴳ ⵉⵍⵍⴰ ⵓⵙⴰⵜⵉ ⵓⵍⴳⵉⵏ, ⴷ ⵉⵎⴰⵙⵙⵏ ⴷ ⵜⵖⵡⴰⵙⵉⵡⵉⵏ ⵏ ⵓⵙⵡⵓⴷⴷⵓ, ⴷ ⵜⴱⵔⵉⴷⵜ ⵏ ⵓⵏⵢⴰⵍⴰⴽⴰⵎ, ⴷ ⵜⵥⴹⴰⵕⵉⵏ ⵜⵉⵜⵉⴽⵏⵓⵍⵓⵊⵉⵢⵉⵏ ⵏ ⵉⵎⵉⵥ ⵏⵏⵙⵏⵜ ⵙ ⵜⵖⴰⵔⴰⵙⵜ ⵜⴰⵍⵉⴽⵟⵕⵓⵏⵉⵜ ⴷ ⵓⵎⵢⴰⵡⴰⴹ ⴷ ⵉⵏⵎⵓⵔⴰⵏ ⴷ ⵉⴱⵕⵍⴰⵎⴰⵏⵉⵢⵏ ⴷ ⵓⴷⵔⵉⵣ ⵏ ⵜⵓⵍⴽⵉⵍⵎⵉⵏ ⴳ ⵜⵙⵔⵜⵉⵜ ⵜⴰⵎⴰⵜⴰⵢⵜ.

ⵜⵏⴽⴷ ⵜⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⴷ ⵜⵓⵜⵔⴰⵡⵉⵏ ⴳ ⵓⵙⵇⵇⵉⵎ ⵏ ⵉⵎⵓⵔⴰ  ⴰⵙⵎⵏⵉⴷ ⴼ ⵜⵔⵙⴰⵍ ⵜⵉⵣⵔⴼⴰⵏⵉⵏ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⴷ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ, ⵜⵖⴰⵔⴰⵙⵜ ⵏ ⵓⵙⵡⵓⵔⵉ ⵏⵜ ⵙⵇⵇⵉⵎⵜ, ⵜⵉⵎⵥⵍⴰⵢ ⵏⵏⵙ, ⵜⴱⵔⵉⴷⵉⵏ, ⵉⵣⵎⴰⵣ, ⵜⵎⵓⴽⵔⵉⵙⵉⵏ ⴷ ⵉⵎⵓⴽⵏⵏ ⵉ ⵓⵙⵖⵓⴷⵓ ⵏ ⵜⴱⵔⵉⴷⵜ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ, ⵙ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⵜⵜⵓⴼⴽⴰⵏⵉⵏ ⵉ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵉ ⵓⵙⵖⵣⵏ ⵏⵏⵙⵏⵜ.

ⴳ ⵜⴳⵉⵔⴰ, ⵉⵙⵎⵏⵉⴷ ⵎⴰⵙⵙ ⵕⴰⵛⵉⴷ ⵍⵄⴰⴱⴷⵉ ⵜⵉⵙⵖⵍⴰⴼ ⵏ ⵓⵏⵎⵓⵇⴰⵔ, ⵉⴱⴷⴷ ⴼ ⵉⵎⵣⵔⴰⵢⵏ ⵍⵍⴰⵏⵉⵏ ⵏⴳⵔ ⵉⵡⴰⵏⴽⵏ ⴳ ⵓⵎⵏⵉⴷ ⵏ ⵜⵉⴽⴽⵉ ⵏ ⵜⵓⵍⴽⵉⵎⵉⵏ ⴷ ⵜⵓⵜⵔⴰⵡⵉⵏ ⵉ ⵓⵣⵣⵔⴰⴼ, ⴳ ⵉⴹⵕⵉⵚⵏ ⴷ ⵜⵖⴰⵔⴰⵙⵡⵉⵏ ⵏ ⵓⵙⵉⴷⴼ ⵏ ⵉⵏⵎⵓⵔⴰⵏ ⴷ ⵜⴱⵔⵉⴷⵉⵏ ⴷ ⵓⵣⵔⴼ ⴰⴷ ⵉⵍⵉⵏⵜ ⵜⵢⴰⴼⵓⵜⵉⵏ ⵕⵡⴰⵏⵉⵏ.

ⵜⵉⵍⵉ ⵜⵖⵓⵔⵉ ⵉ ⵓⵙⴽⵔ ⵏ ⵉⵏⵎⵓⵇⴰⵔⵏ ⵉⵙⴳⴳⵯⵙⴰⵏⵏ ⴼ ⵜⴱⵔⵉⴷⵉⵏ ⴷ ⵉⵙⵍⴳⵏⵏ ⴼ ⵜⵓⵍⴽⵉⵎⵉⵏ ⴷ ⵜⵓⵜⵔⴰⵡⵉⵏ ⵉ ⵓⵙⵏⴼⵍ ⵏ ⵜⴰⵏⵏⴰⵢⵉⵏ ⴷ ⵜⵎⵓⵣⴰⵢⵉⵏ ⴷ ⵓⵙⴽⵔ ⵏ ⵓⵥⵟⵟⴰ ⴰⴱⵕⵍⴰⵎⴰⵏⵉ ⴼ ⵜⴷⵉⵎⵓⵇⵔⵟⵉⵜ ⵜⴰⵎⴰⴷⵔⴰⵡⵜ ⴳ ⵉⴱⵕⵎⵍⴰⵎⴰⵏⵏ. ⴷ ⵓⵙⵎⵓⵏ ⵏ ⵜⵎⵢⴰⴷⴰⵙⵉⵏ ⴳ ⵢⴰⵏ ⵓⵎⴰⵏⴰⵔ ⵏ ⵜⵡⵓⵔⵉ ⴳ ⵍⵍⴰⵏ ⵉⵍⵓⴳⵏⵏ ⴼ ⵜⵎⵙⴽⴰⵔ ⵥⵉⵍⵏⵉⵏ ⴳ ⵢⵉⴳⵔ ⴰⴷ ⵙ ⴽⵕⴰⴹ ⵉⵎⵏⴰⴷⵏ:

ⴰⵎⵣⵡⴰⵔⵓ ⴼ ⵜⵎⴰⵎⴽⵜ ⵏ ⵓⵙⴽⵔ ⵏ ⵓⵣⵔⴼ, ⵡⵉⵙ ⵙⵉⵏ ⴼ ⵓⵙⴽⵔ ⵏⵏⵙ, ⵡⵉⵙ ⴽⵕⴰⴹ ⴼ ⵜⵢⴰⴼⵓⵜⵉⵏ.

ⴰⵏⵏⵓⵕⵥⵎ ⵏ ⵉⵙⴰⵡⵓⵔⵏ ⴼ ⵉⵙⵏⴼⵍⵏ ⴷ ⵇⵇⴰⵏⵉⵏ ⵉ ⵓⵎⵓⴽⵏ ⵏ ⵉⵣⵣⵔⴰⴼⵏ ⴼ ⵉⵎⴰⵍ ⵉⵕⵡⴰⵏ ⵏ ⵜⵎⵔⴰⵔⵓⵜ ⵏ ⵉⵏⵎⵓⵔⴰⵏ.

ⴰⵙⴼⵔⴽ ⵙ ⵓⴷⵔⵉⵣ ⴰⵏⵎⵓⵏ ⴷ ⵓⵙⵔⵜⴰⵏ ⵏ ⵓⵏⵢⴰⵍⴽⴰⵎ ⵏ ⵉⴱⵕⵍⴰⵎⴰⵏⵏ ⴷ ⵜⵓⵍⴽⵉⵎⵉⵏ ⴷ ⵜⵓⵜⵔⴰⵡⵉⵏ ⵏ ⵉⵏⵎⵓⵔⴰⵏ, ⴰⵢⵍⵍⵉ ⵔⴰⴷ ⵉⵙⴽⵔ ⵢⴰⵜ ⵜⵏⴳⴰⴷⴷⴰⵢⵜ ⵜⴰⵏⴰⵎⵓⵏⵜ ⴷ ⵜⵙⵔⵜⴰⵏⵜ ⵏⴳⵔ ⵉⵏⵎⵓⵔⴰⵏ ⴷ ⵉⴱⵕⵍⴰⵎⴰⵏⵏ ⴷ ⵓⵙⴷⵓⵙ ⵏ ⵜⵣⴷⴰⵢⵜ ⵊⴰⵔ ⵏⵏⵙⵏ.

ⴰⵙⴷⵓⵙ ⵏ ⵓⴼⵔⴰⴽ ⵙ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⴳ ⵓⵙⵕⵚⵓ ⵏ ⵓⵔⴳⴳⵉⴳ ⴰⵙⵔⵜⴰⵏ ⴷ ⵓⵔⵎⴰⵙ ⵏ ⵉⵎⵓⵙⵙⵓⵜⵏ ⵉⵏⴰⵎⵓⵏⵏ ⴷ ⵜⵎⵔⴰⵔⵓⵜ ⴷ ⵉⵏⵎⵓⵔⴰⵏ ⴷ ⵓⵙⵓⵊⴷ ⵏ ⵉⵎⴰⵍⵏ ⵍⵍⴰⵏⵉⵏ ⴳ ⵓⵎⵏⵉⴷ ⵏ ⵜⵎⵔⴰⵔⵓⵜ ⴷ ⵜⵓⵍⴽⵉⵎⵉⵏ ⴷ ⵜⵓⵜⵔⴰⵡⵉⵏ ⴳ ⵢⵉⴳⵔ ⵏ ⵓⵣⵣⵔⴰⴼ ⵙⵎⵏⵉⴷⵏ ⵉⵏⵎⵓⵔⴰⵏ.

* ⴰⴼⵉⴷⵢⵓ ⵏ ⵓⵏⵎⵓⵇⴰⵔ(28 ⵉⵏⵏⴰⵢⵔ 2021)