ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⴰⵙⵉⵡⴹ ⵏ ⵜⵙⵎⵓⵏⵉ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⵢⵏⴰⵙ 8 ⵢⵓⵏⵢⵓ 2020
ⵉⵙⵏⵎⴰⵍⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⵍⴰⴽⵉ ⵜⴰⵙⵎⵓⵏⵉ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⵙⵙ ⵏ ⵡⴰⵢⵏⴰⵙ 8 ⵢⵓⵏⵢⵓ 2020, ⵜⵥⵍⵉ ⵉ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ ⵖ ⵓⵣⵣⵔⴰⴼ ⴷ ⵜⵉⴹⴰⴼ.
ⵖ ⵜⵣⵡⵉⵔⵉ ⵏ ⵜⵙⵎⵓⵏⵉ, ⴱⴷⴷⵏ ⵉⵎⴷⵔⴰⵡⵏ ⴼ ⵜⵖⵜⴰⵙⵜ ⵏ ⵜⵙⵏⴱⴹⴰⵢⵜ ⵜⴰⴷⵙⵜⴰⵔⵜ ⵓⵟⵟⵓⵏ 106/20, ⵉⵏⵉⵏ ⵎⴰⵙ ⴷⴰⵔⵙ ⴰⵜⵉⴳ ⴰⵅⴰⵜⴰⵔ ⵍⵍⵉⵖ ⵜⵍⵇⵎ ⵉ ⵍⵉⵊⵜⵉⵀⴰⴷ ⵏ ⵓⵣⵓⵔⴼ ⴰⴷⵙⵜⴰⵔ ⵢⴰⵏ ⵓⵙⵙⴹⴼⵕ ⴰⵎⴰⵢⵏⵓ ⴷ ⵢⴰⵜ ⵜⵙⴰⵖⵓⵍⵜ ⵖ ⵜⵡⵓⵔⵉ ⵜⴰⵣⵣⵔⴰⴼⵜ ⴷ ⵜⴱⵕⵍⴰⵎⴰⵏⵉⵜ ⵙ ⵓⵎⴰⵜⴰ.
ⵜⵙⴷⴷⵉⴷ ⵜⵙⵎⵓⵏⵉ ⴼ ⵡⴰⵜⵉⴳ ⵏ ⵓⵎⴹⴰⴽⴰⵕ ⴰⴷⵙⵜⴰⵔ ⴷ ⵓⵣⵣⵔⴰⴼ ⵍⵍⵉ ⵉⵙⵙⵎⵖⵔⵏ ⵉⴳⵔ ⴰⵏⴰⵎⵓⵔ, ⵉⴼⴽ ⵓⵍⴰ ⵢⴰⵜ ⵜⴷⵉⵏⴰⵎⵉⵜ ⵢⵉⵡⵙⵏ ⵃⵎⴰ ⴰⴷ ⵉⵍⵉⵏ ⵉⵙⴳⵓⴷⵉⵢⵉⵏ ⵉⵣⵣⵔⴰⴼⵏ ⴱⴰⵀⵔⴰ ⵅⴰⵜⵔⵏⵉⵏ.
ⵖ ⵜⵡⵓⵔⵉ ⵏ ⵓⵙⵇⵇⵉⵎ, ⵖ ⵎⴰ ⴷ ⵉⵥⵍⵉⵏ ⵙ ⵜⵖⵉⵎⵉⵜ ⵏ ⵓⵏⵙⵙⵉⵅⴼ ⵏ ⵜⵏⴱⴰⴹⵟ ⵉⵣⴷⵉⵏ ⵙ ⵜⵙⵔⵜⵉⵜ ⵜⴰⵎⴰⵜⴰⵢⵜ, ⵙⴷⴷⵉⴷⵏ ⵉⴼⵔⴷⴰⵙ ⵏ ⵓⵙⵇⵉⵎ ⴼ ⵡⴰⵜⵉⴳ ⵏ ⵓⵙⴰⴽⵓⴷ ⵍⵍⵉ ⴰⵙ ⵉⵜⵜⵓⵥⵍⴰⵢⵏ ⵍⵍⵉⵖ ⴷ ⵉⵎⵎⴰⴳⴳⴰⵔ ⴷ ⵜⴳⵉⵔⴰ ⵏ ⵓⵣⵎⵣ ⵏ ⵓⵥⵍⴰⵢ ⴰⴷⵓⵙⴰⵏ, ⵃⵎⴰ ⴰⴷ ⵜⴼⴽ ⵉⵙⵉⵙⴼⵉⵡⵏ ⴼ ⵓⵖⴰⵡⴰⵙ ⵏ ⵜⵏⴱⴰⴹⵜ ⴷ ⵜⵙⵜⵔⴰⵜⵉⵊⵉⵜ ⵏⵏⵙ ⵉ ⵓⵣⵔⴰⵢ ⵏ ⵜⴼⵔⴽⴰ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ.
ⵖⵎⴽ ⵍⵍⵉ ⵜⵎⴷⴰⵡⴰⵍ ⵜⵙⵎⵓⵏⵉ ⴼ ⵉⵎⵔⵙⵉ ⵏ ⵜⵖⵉⵎⵉⵜⵉⵏ ⵜⵉⵏⵎⵍⴰⵙⵙⵉⵏ ⵥⵍⵉⵏⵉⵏ ⵉ ⵉⵙⵇⵙⵉⵜⵏ ⵉⵎⵉⵡⴰⵏⵏ, ⵜⵙⴷⴷⵉⴷ ⴼ ⵡⴰⵜⵉⴳ ⵏ ⵉⵎⵔⵙⵉⵡⵏ ⵍⵍⵉ ⵜⵣⵣⵔⵉ ⵜⵉⴹⴰⴼ ⵙ ⵜⵣⴷⴰⵢⵜ ⴷ ⵉⵙⵓⵔⵙⵏ ⵏ ⵖⵉⵍⴰⴷ ⴷ ⵜⵣⵣⵉⴳⵣⵉⵏ ⵏⵏⵙⵏ ⵖ ⵉⵙⵡⵉⵔⵏ ⵏ ⵜⴷⵎⵙⴰ ⴷ ⵜⵏⴼⵔⵓⵜ ⴷ ⵡⴰⵎⵓⵏ ⵖ ⵜⵎⴰⵣⵉⵔⵜ ⵏⵏⵖ, ⵙⴷⴷⵉⴷⵏ ⵉⴼⵔⴷⴰⵙ ⵏ ⵓⵙⵇⵇⵉⵎ ⵎⴰⵙ ⴷ ⵉⵇⵇⴰⵏ ⴰⴷ ⵉⵍⵉⵏⵜ ⴱⴰⵀⵔⴰ ⵜⵓⴳⴳⴰⵙ ⵖ ⵉⵎⴰⵍⴰⵙⵙⵏ ⵍⵍⵉ ⴷ ⵓⵛⴽⴰⵏⵉⵏ ⴰⴷ ⵢⵉⵍⵉ ⵓⵎⵢⴰⵏⴰⵡ ⵏ ⵜⵥⵉⴹⴰⵕ ⵏ ⵜⵉⴽⴽⵉ ⵏ ⵉⵙⵇⵙⵉⵜⵏ ⵙ ⵓⵙⴽⵛⵎ ⵏ ⵉⴳⵔⴰⵏ ⵉⵎⴰⵡⵙⴰⵙⵏ ⴳⴳⵓⵜⵏⵉⵏ ⵖ ⴽⵔⴰⵢⴳⴰⵜⵜ ⵜⵉⵖⵉⵎⵉⵜ ⵙ ⵓⵙⵡⵓⴷⴷⵓ ⵉⵥⵉⵍⵏ ⵏ ⵓⵣⵎⵣ, ⴰⵢⵍⵍⵉ ⵔⴰⴷ ⵢⴰⵡⵙ ⵖ ⵜⵉⵕⵡⵉ ⴷ ⵚⴰⵃⴰ ⵏ ⵜⵡⵓⵔⵉ ⴰⴷ ⵙ ⵢⴰⵜ ⵜⴽⴽⵍⵉⵜ.
ⵖ ⵓⵣⵣⵔⴰⴼ, ⵎⵍⴰⵏ ⴷⴰⵖ ⵉⴼⵔⴷⴰⵙ ⵏ ⵓⵙⵇⵇⵉⵎ ⵜⵉⵥⵥⵓⵥⵜ ⵏⵏⵙⵏ ⴰⴷ ⵟⵟⴼⵏⵜ ⵜⵙⵏⵜⴰⵢⵉⵏ ⵏ ⵉⴳⵎⴰⵎⴰⵏ ⵏ ⵓⵙⵇⵇⵉⵎ ⴰⵜⵉⴳ ⵏⵏⵙⵏⵜ, ⵍⵍⵉⵖ ⵙⴷⴷⵉⴷⵏⵜ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵎⴰⵙ ⴷ ⵉⵇⵇⴰⵏ ⴰⴷ ⵜⵉⵍⵉ ⵜⵡⵓⵔⵉ ⵙⵇⵇⵉⵇⵏ ⵙ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⴷ ⵓⵙⴰⴽⵓⴷ ⴰⵢⵢⵓⵔⴰⵏ ⵏ ⵓⵙⵖⵉⵡⵙ ⵏⵏⵙⵏⵜ ⴷ ⵓⵙⵖⵜⵙ ⴷ ⵓⵙⵏⴼⵍ ⵏⵏⵙⵏⵜ ⵉⵖ ⴷ ⵇⵇⴰⵏⵏ.
ⵣⵎⵎⵉⵎⵏ ⵉⴷ ⵎⴰⵙⵙ ⴷ ⵎⴰⵙⵙⴰ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵜⴰⵢⴰⴼⵓⵜ ⵉⵥⵉⵍⵏ ⵏ ⵜⵡⵓⵔⵉ ⵏ ⵓⵙⵇⵇⵉⵎ ⵖ ⵓⵣⵎⵣ ⵏ ⵓⵥⵍⴰⵢ ⴰⴷⵓⵙⴰⵏ ⵖ ⵉⴳⵔⴰⵏ ⵏ ⵓⵣⵣⵔⴰⴼ ⴷ ⵜⵉⴹⴰⴼ, ⵙⴷⴷⵉⴷⵏ ⴼ ⵡⴰⵜⵉⴳ ⵏ ⵓⵍⵜⴰⵖ ⵖ ⵓⵚⴽⵓ ⵏ ⵉⵎⵛⴰⵛⴽⴰⵏ ⵍⵍⵉ ⴷ ⵣⵣⵡⴰⵔⵏⵉⵏ ⵜⴰⵏⴰⴼⵓⵜ ⵜⴰⵎⴰⵜⵜⵓⵢⵜ ⵏ ⵜⵎⵓⵔⵜ, ⵉⵎⵛⴰⵛⴽⴰⵏ ⴰⴷ ⵍⵍⵉ ⴷ ⵉⵡⵉⵏⵉⵏ ⴰⴷ ⵉⵍⵉⵏ ⵉⴹⵕⵉⵚⵏ ⵉⵣⵣⵔⴰⴼⵏ ⵍⵍⵉ ⵙⴳⴰⴷⴷⴰⵏⵉⵏ ⵉⴳⵔⴰⵏ ⴳⴳⵓⵜⵏⵉⵏ ⵖ ⵜⵓⴷⵔⵜ ⵜⴰⵏⴰⵎⵓⵔⵜ, ⵉⵍⵉⵏⵜ ⵓⵍⴰ ⵜⵙⵏⵜⴰⵢⵉⵏ ⵏ ⵜⵉⴹⴰⴼ ⵍⵍⵉ ⵙⵙⵉⵙⴼⵉⵡⵏⵉⵏ ⵜⵓⴳⵜ ⵏ ⵜⵎⵙⴰⵔⵉⵏ ⵉⵡⵉⵏⵉⵏ ⴰⵅⵎⵎⴻⵎ ⵏ ⵉⵏⵎⵓⵔⴰⵏ ⵖ ⵜⵎⵓⵔⵜ.
ⵖ ⵎⴰ ⴷ ⵉⵥⵍⵉⵏ ⵙ ⵓⵙⴰⴽⵓⴷ ⵏ ⵓⵙⵔⵓⵙ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵜⵥⵕⴼⵜ ⵉⵜⵜⵓⵙⵏⴼⴰⵍⵏ, ⵜⵎⴷⴰⵡⴰⵍ ⵜⵙⵎⵓⵏⵉ ⴼ ⵜⵖⴰⵔⴰⵙⵉⵏ ⵍⵍⵉ ⵔⴰⴷ ⵢⴰⵡⵙ ⴰⴷ ⵢⵉⵍⵉ ⵓⵎⵓⵔⵙ ⵏ ⵓⵙⴱⴷⴰⴷ ⴰⴷ ⴰⵣⵣⵔⴰⴼ ⴷ ⵓⵜⵓⵢ ⵏⵏⵙ ⵙ ⴽⵓ ⵜⵉⴼⴰⴷⵉⵡⵉⵏ ⵜⵉⴷⵙⵜⴰⵔⵉⵏ ⴷ ⵜⵣⵣⵔⴰⴼⵉⵏ.