ⴰⵙⵇⵇⵉⵎ ⵏ ⵉⵎⵓⵔⴰ ⵉⵙⵖⵣⵏ ⴰⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵓⵟⵟⵓⵏ 65.20 ⵉ ⵓⵙⴳⴳⵯⴰⵙ ⴰⵥⵕⴼⴰⵏ 2021 ⴷ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 43.20 ⴼ ⵜⵏⵓⴼⴰ ⵏ ⵜⵎⵢⵉⵎⴰⵏⵜ ⴼ ⵉⵏⵚⵉⵕⵉⴼⵏ ⵉⵍⵉⴽⵟⵕⵓⵏⵉⵢⵏ
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵓⵙⵉⵏⴰⵙ 08 ⴷⵓⵊⴰⵏⴱⵉⵔ 2020, ⵙ ⵜⵓⴳⵜ ⴰⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵓⵟⵟⵓⵏ 65.20 ⵏ ⵓⵙⴳⴳⵯⴰⵙ 2021, ⵙ ⵓⵎⴰⴽⵕⴰⴹ ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 43.20 ⴼ ⵜⵏⵓⴼⴰ ⵏ ⵜⵎⵢⵉⵎⴰⵏⵜ ⴼ ⵉⵏⵚⵉⵕⵉⴼⵏ ⵉⵍⵉⴽⵟⵕⵓⵏⵉⵢⵏ, ⵖ ⵜⵖⵉⵎⵉⵜ ⵜⴰⴳⴷⵓⴷⴰⵏⵜ ⵍⵍⵉ ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⵜⵉⵍⵉⵜ ⵏ ⵎⴰⵙⵙ ⵎⵓⵚⵟⴰⴼⴰ ⵔⵔⴰⵎⵉⴷ ⴰⵎⴰⵡⵙⴰⵙ ⵏ ⵓⵡⴰⵏⴽ ⵉⵜⵜⵓⵙⵎⴰⴳⴰⵍⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵣⴷⴰⵢⵉⵏ ⴷ ⵓⴱⵕⵍⴰⵎⴰⵏ, ⴷ ⵎⴰⵙⵙ ⵎⵓⵃⴰⵎⵎⴰⴷ ⴱⵏ ⵛⴰⵄⴱⵓⵏ, ⴰⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ, ⴷ ⵎⴰⵙⵙ ⵄⴰⴱⴷ ⵍⵍⴰⵟⵉⴼ ⵍⵓⴷⵉⵢⵉ ⴰⵎⴰⵡⵙⴰⵙ ⴰⵎⴰⵔⵉ ⴷⴰⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵜⵜⵓⵙⵎⴰⴳⴰⵍⵏ ⵙ ⵜⵎⵙⵙⵓⴳⵓⵔⵜ ⵏ ⵓⵎⵣⴰⵖ ⴰⵏⴰⵎⵓⵔ.
ⵖ ⵓⵎⴹⴰⴽⴰⵕ, ⵙⴷⴷⵉⴷⵏ ⵉⴳⵏⵙⴰⵙⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵎⴰⵙ ⵍⵍⴰⵏⵜ ⵜⵏⴰⵥⴰⵕⵉⵏ ⵜⵉⴷⵎⵙⴰⵏⵉⵏ ⵜⵉⵅⴰⵜⴰⵔⵉⵏ ⴷⴰⵜ ⵏ ⵜⴳⵍⴷⵉⵜ ⵖ ⵓⵣⵎⵣ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⴱⴷⴷⵏ ⴼ ⵡⴰⵜⵉⴳ ⵏ ⵓⵙⵙⴰⵔⵓ ⵖ ⵉⴳⵔⴰⵏ ⵉⵏⴰⵎⵓⵏⵏ, ⵙⵓⵜⴳⵏ ⴰⵙⵏⴼⴰⵔ ⵏ ⵓⵙⵎⴰⵜⴰ ⵏ ⵓⵙⴼⵍⵙ ⴰⴷⵓⵙⴰⵏ ⴷ ⵓⵏⴰⵎⵓⵏ ⵍⵍⵉ ⵉⵙⴽⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ.
ⵉⵏⵉⵏ ⵎⴰⵙ ⴷ ⴰⵙⵙⵉⴷⵔ ⵏ ⵜⴷⵎⵙⴰ ⵉⵍⵍⴰ ⵖ ⵓⵙⵓⵜⴳ ⵏ ⵉⵢⴰⴼⵓⵜⵏ ⵉⵏⴰⵎⵓⵔⵏ ⴷ ⵓⵙⵏⴰⵍ ⵏ ⵜⵎⵙⵙⵏⵜⴰⵢ ⵜⵉⵎⵖⵔⵉⴱⵉⵢⵉⵏ, ⴷ ⵓⵙⵎⵖⵔ ⵏ ⵜⵙⵓⴳⵔⵜ ⵏ ⵎⵙⵓⵖⵜ, ⴷ ⵓⵙⴽⵔ ⵏ ⵉⵙⵏⴼⴰⵔⵏ ⵉⵅⴰⵜⴰⵔⵏ, ⵙⵓⵜⴳⵏ ⴰⵙⴽⵔ ⵏ ⵓⴼⵏⵉⵇ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵓⵙⵙⴰⵔⵓ ⵉⴳⴰⵏ ⴰⴼⵏⵉⵇ ⵍⵍⵉ ⵔⴰⴷ ⵢⴰⵡⵙ ⵖ ⵓⵎⵃⵉⵣⵡⴰⵔ ⴰⴷⵎⵙⴰⵏ ⴷ ⵓⴹⴼⵕ ⵏ ⵉⵙⵏⴼⴰⵔⵏ ⵉⵅⴰⵜⴰⵔⵏ ⴷⴼⴼⵉⵔ ⵏ ⴽⵓⵕⵓⵏⴰ.
ⵙⴷⵉⴷⴷⵏ ⵉⴷ ⵎⴰⵙⵙ ⵉⵎⵓⵔⴰ ⵉⵎⵓⵔⵙⵏ ⵏ ⵍⵎⵖⵔⵉⴱ ⵖ ⵜⵎⵙⴰⵔⵜ ⵜⴰⵏⴰⵎⵓⵔⵜ ⵜⴰⵎⵣⵡⴰⵔⵓⵜ ⴷ ⵓⵙⴼⵍⵙ ⵏ ⵓⵙⴰⴽⴰ ⵏ “ⵍⴳⵔⴳⴰⵔⴰⵜ” ⵙ ⵓⴼⵔⴰ ⴷ ⵜⵣⵣⵓⵍⵜ ⵢⴰⵜⵜⵓⵢⵏ ⵏ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⵏⵙⵙⵉⵅⴼ ⴰⵎⴰⵜⵜⵓⵢ ⵏ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⴷ ⵓⵏⵙⵙⵉⵅⴼ ⵏ ⵜⵔⵙⴰⵍ ⵏ ⵜⵎⴰⵖⵜ ⵜⴰⵎⴰⵜⴰⵢⵜ, ⵙⴰⵡⵍⵏ ⴼ ⵓⵙⵓⵜⴳ ⵏ ⵉⵎⵉⵥ ⵏ ⵓⵎⴰⴷⴰⵏ ⴰⵎⵖⵔⵉⴱⵉ ⴼ ⵜⵎⵙⴰⵔⵜ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ.
ⵙ ⵖⵎⴽ ⴰⴷ ⴰⵙ ⵉⵜⵜⵓⵙⵎⴰⴷ ⵓⵙⵖⵣⵏ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵏ 2021 ⵖ ⵜⵖⵔⵉ ⵜⵉⵙ ⵙⵏⴰⵜ ⵖ ⵓⴱⵕⵍⴰⵎⴰⵏ, ⵔⴰⴷ ⵉⵜⵜⵓⵙⴽⵉⵔ ⴷⴼⴼⵉⵔ ⵏ ⵓⵣⵓⵣⵣⵔ ⵏⵏⵙ ⵖ ⵓⵖⵎⵉⵙ ⴰⵎⴰⴷⴷⵓⴷ.
ⵖ ⵓⵙⵎⵏⵉⴷ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 43.20 ⵉⵣⴷⵉⵏ ⴷ ⵜⵏⵓⴼⴰ ⵏ ⵜⵎⵢⵉⵎⴰⵏⵜ ⴼ ⵉⵏⵚⵉⵕⵉⴼⵏ ⵉⵍⵉⴽⵟⵕⵓⵏⵉⵢⵏ, ⵉⵙⴷⴷⵉⴷ ⵎⴰⵙⵙ ⵄⴰⴱ ⵍⵍⴰⵟⵉⴼ ⵍⵓⴷⵉⵢⵉ ⴰⵎⴰⵡⵙⴰⵙ ⴰⵎⴰⵔⵉ ⴷⴰⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵜⵜⵓⵙⵎⴰⴳⴰⵍⵏ ⵙ ⵜⵎⵙⵙⵓⴳⵓⵔⵜ ⵏ ⵓⵎⵣⴰⵖ ⴰⵏⴰⵎⵓⵔ, ⵎⴰⵙ ⵉⴳⴰ ⵓⵙⵏⴼⴰⵔ ⴰⴷ “ⵜⴰⵔⵙⵍⵜ ⵜⴰⴷⵙⵍⴰⵏⵜ ⵉⵙⵜⴰⵡⵀⵎⵎⴰⵏ ⵉ ⵉⴹⵕⵉⵚⵏ ⵀⵎⵎⴰⵏⵉⵏ ⵉⴳⵔⴰⵏ ⵏ ⵜⵏⴼⵔⵓⵜ ⵜⴰⵙⵉⴱⵔⵏⵉⵜ ⴷ ⵜⵎⵢⵉⵎⴰⵏⵜ ⵜⴰⵎⵓⵟⵟⵓⵏⵜ”. ⵢⵉⵏⵉ ⵎⴰⵙ ⵜⵙⴱⵣⵣⵉⵣ ⵜⵣⵣⵉⴳⵣⵜ ⵜⴰⵎⵓⵟⵟⵓⵏⵜ ⵖ ⵜⴳⵍⴷⵉⵜ ⴰⴷ ⵢⵉⵍⵉ ⵓⵙⵓⵊⴷ ⵏ ⵓⵙⵓⵔⵙ ⵏ ⵜⵎⵢⵉⵎⴰⵏⵜ ⵍⵍⵉ ⵔⴰⴷ ⵢⵓⵎⵓ ⴽⵓ ⵜⵉⵏⵓⴼⴰ ⵜⵉⵎⵓⵟⵟⵓⵏⵉⵏ ⵉⵙⵓⵊⵉⴷ ⵉ ⵉⵎⵙⴽⴰⵔⵏ ⵉⴷⵎⵙⴰⵏⵏ ⴷ ⵜⵎⵙⵙⵓⴳⵓⵔⵉⵏ ⵜⵉⴳⴷⵓⴷⴰⵏⵉⵏ ⵢⴰⵏ ⵓⵏⵎⵏⴰⴹ ⴰⵣⵔⴼⴰⵏ ⵢⵉⵡⵙⵏ ⴰⴷ ⵉⵍⵉⵏⵜ ⵜⵏⵓⴼⴰ ⵜⵉⵎⴰⵢⵏⵓⵜⵉⵏ ⵉⴹⵎⵏⵏ ⴰⴼⵔⴰⴳ ⴰⵣⵔⴼⴰⵏ ⵉ ⵉⵏⵎⵓⵔⴰⵏ ⴷ ⵓⵙⵙⵔⵇⴱ ⵏⵏⵙⵏ ⴼ ⵓⵙⵡⵓⵔⵉ ⵙ ⵉⵏⵚⵉⵕⵉⴼⵏ ⵉⵍⵉⴽⵟⵕⵓⵏⵉⵢⵏ.
ⵔⴰⴷ ⵉⵙⴽⵔ ⵓⵙⵏⴼⴰⵔ ⴰⴷ ⴰⵙⴰⵜⵉ ⴰⵣⵔⴼⴰⵏ ⵍⵍⵉ ⵔⴰⴷ ⵉⵔⴰⵔ ⴼ ⵉⵙⵖⴰⵡⵙⴰⵜⵏ ⵏ ⵉⵎⵙⴽⴰⵔⵏ ⵉⴷⵎⵙⴰⵏⵏ ⵉⴳⴷⵓⴷⴰⵏⵏ ⴷ ⵓⵙⵍⵉⴳⵏ ⴷ ⵜⵎⵙⵙⵓⴳⵓⵔⵉⵏ ⵜⵉⴳⴷⵓⴷⴰⵏⵉⵏ ⴷ ⵉⵏⵎⵓⵔⴰⵏ, ⵙ ⵓⵙⵏⵎⴰⵍⴰ ⵏ ⵉⵣⵎⵎⵉⵎⵏ ⵉⵍⵉⴽⵟⵕⵓⵏⵉⵢⵏ ⴷ ⵜⵏⴼⴰ ⵏ ⵓⵚⵉⴼⴹ ⴰⵍⵉⴽⵟⵕⵓⵏⵉ ⵉⵜⵜⵓⴹⵎⴰⵏⵏ ⴷ ⵓⵎⵢⵉⵎⴰⵏ ⵖ ⵉⵙⵉⵜⵏ ⵏ ⴰⵏⵜⵉⵔⵏⵉⵜ.
ⵉⵡⴰⵜⵜⵙ ⵓⵍⴰ ⴰⵙⵔⵙ ⵏ ⵓⵙⴰⵜⵉ ⴰⵣⵔⴼⴰⵏ ⵉⴱⵙⵓⵙⵏ ⴷ ⵉⵎⵛⴰⵛⴽⴰⵏ ⴷ ⴽⵓ ⵉⵏⵢⴰⵍⴽⴰⵎⵏ ⴷ ⵓⵙⵉⵙⴼⵉⵡ ⵏ ⵓⴷⵔⵉⵣ ⴰⵣⵔⴼⴰⵏ ⵉ ⵓⵣⵎⵎⴻⵎ ⴰⵍⵉⴽⵟⵕⵓⵏⵉ ⵙ ⵡⴰⵏⴰⵡⵏ ⵏⵏⵙⵏ, ⵓⵔ ⵉⵜⵜⵎⴽⵏ ⴰⴷ ⵜⵉⵍⵉ ⵜⴰⴳⵯⵉⵜ ⵏ ⵓⴷⵔⵉⵣ ⵏⵏⵙⵏ ⴰⵣⵔⴼⴰⵏ, ⵏⵖ ⵜⴰⴳⵯⵉⵜ ⵏⵏⵙⵏ ⵍⵍⵉⵖ ⴳⴰⵏ ⵉⵍⵉⴽⵟⵕⵓⵏⵉⵢⵏ, ⴷ ⵓⵙⵎⵖⵔ ⵏ ⵉⴳⵔ ⵏ ⵓⵙⵎⵔⵙ ⵏ ⵓⵣⵔⴼ ⵏ ⵖⵉⵍⴰⴷ ⵃⵎⴰ ⴰⴷ ⵢⴰⵎⵓ ⵜⵉⵜⴳⴰⵔⵉⵏ ⵍⵍⵉ ⵙⴽⵔⵏⵜ ⵜⵎⵔⵙⴰⵍ ⵏ ⵓⵙⴼⵍⵙ ⴷ ⵉⵏⴳⵎⴰⵎⵏ ⵍⵍⵉ ⵜⵏⵜ ⵉⵔⵡⴰⵙⵏ.