ⴰⵏⵎⵓⵇⴰⵔ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵓⵏⵇⵇⵉⵙ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵉ ⵜⵙⵓⵜⵍⵜ 65 ⵏ ⵜⵙⵇⵇⵉⵎⵜ ⵏ ⵓⵙⵓⵔⵙ ⵏ ⵜⵎⵖⴰⵔⵜ ⴳ ⵜⵎⵜⵜⴰ ⵎⵓⵏⵏⵉⵏ

ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵕⴰⵙ 10 ⵎⴰⵕⵚ 2021, ⴰⵏⵎⵓⵇⴰⵔ ⴼ ⵓⵙⵎⵏⵉⴷ ⵏ ⵓⵏⵇⵇⵉⵙ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴼ ⵜⵙⵓⵜⵍⵜ 65 ⵏ ⵜⵙⵇⵇⵉⵎⵜ ⵏ ⵓⵙⵓⵔⵙ ⵏ ⵜⵎⵖⴰⵔⵜ, ⵙ ⵜⴷⵔⴰⵡⵜ ⴷ ⵜⵎⴰⵡⴰⵙⵜ ⵏ ⵜⵡⵉⵣⵉ ⴷ ⵜⴳⵎⵉ ⵜⴰⵏⴰⵎⵓⵏⵜ ⴷ ⵢⵉⵙⴽⵉⵍ, ⴷ ⵜⵡⵉⵙⵉ ⵏ ⵎⴰⵙⵙⴰ ⵜⴰⵎⴰⵔⵉⵜ ⵙⴰⵄⵉⴷⴰ ⴰⵢⵜ ⴱⵓⵄⵍⵉ ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵎⴰⵙⵙⴰ ⴼⴰⵟⵉⵎⴰ ⵥⵥⴰⵀⵕⴰ ⵏⴰⵣⵉⵀ ⵜⴰⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵏ ⵜⵡⵓⵔⵉ ⵜⴰⵙⴳⵓⵎⴰⵏⵜ ⵉⵜⵜⵓⵙⵎⴰⴳⴰⵍⵏ ⴷ ⵢⵉⵙⴽⵉⵍ ⴷ ⵓⵙⴰⵎⵓ ⴳ ⵓⵙⵇⵇⵉⵎ, ⴷ ⵎⴰⵙⵙⴰ ⵜⴰⵎⴰⵡⵙⴰⵙⵜ ⵊⴰⵎⵉⵍⴰ ⵍⵎⵚⵍⵍⵉ, ⴷ ⵎⴰⵙⵙ ⵄⴰⴱⴷ ⵍⵄⴰⵍⵉ ⵃⴰⵎⵉ ⴷⴷⵉⵏ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵓⵙⵍⵎⴷ ⴷ ⵜⵖⴰⵡⵙⵉⵡⵉⵏ ⵜⵉⴷⵍⵙⴰⵏⵉⵏ ⴷ ⵜⵏⴰⵎⵓⵏⵉⵏ ⴳ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⴷ ⵉⵙⵜ ⵎⴰⵙⵙⴰ ⵜⵉⵎⵓⵔⴰ ⴷ ⵉⴷ ⵎⴰⵙⵙ ⵉⵎⵓⵔⴰ.

ⴳ ⵜⴳⵓⵔⵉ ⵏⵏⵙ, ⵜⵏⵏⴰ ⵎⴰⵙⵙⴰ ⵊⴰⵎⵉⵍⴰ ⵍⵎⵚⵍⵍⵉ, ⵜⴰⵎⴰⵡⵙⴰⵙⵜ ⵏ ⵜⵡⵉⵣⵉ ⴷ ⵜⴳⵎⵉ ⵜⴰⵏⴰⵎⵓⵏⵜ ⴷ ⵢⵉⵙⴽⵉⵍ ⴷ ⵓⵙⴰⵎⵓ, ⵎⴰⵙ ⵉⴳⴰ ⵓⵏⵎⵓⵇⴰⵔ ⴰⴷ ⴰⵙⵓⵊⴷ ⵏ ⵜⵡⵉⵙⵉ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵜⵙⵓⵜⵍⵜ 65 ⵏ ⵜⵙⵇⵇⵉⵎⵜ ⵏ ⵓⵙⵓⵔⵙ ⵏ ⵜⵎⵖⴰⵔⵜ ⴳ ⵜⵎⵜⵜⴰ ⵎⵓⵏⵏⵉⵏ ⴷ ⵓⵙⵎⵏⵉⴷ ⵏ ⵓⵙⵏⴼⴰⵔ ⵏ ⵓⵏⵇⵇⵉⵙ ⴰⵏⴰⵎⵓⵔ ⵏ ⵜⵎⴰⵡⴰⵙⵜ ⴳ ⵜⵎⵢⴰⴷⴰⵙⵜ ⵏ ⵓⴷⵔⴰⵡ ⵙ ⵜⵡⵉⵙⵉ ⵏ ⵉⴳⵔⴰⵏ ⵓⵏⴱⵉⴹⵏ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴷ ⵡⴰⵎⵓⵏ ⴰⵖⵔⴰⵎⵏ ⴷ ⵓⴱⵕⵍⴰⵎⴰⵏ.

ⵜⵉⵏⵉ ⵎⴰⵙⵙⴰ ⵍⵎⵚⵍⵍⵉ, ⵎⴰⵙ ⵉⴳⴰ ⵓⵏⵎⵓⵇⴰⵔ ⴰⴷ ⴰⵙⵓⵔⵙ ⴰⴷⵙⵍⴰⵏ ⴳ ⵉⵎⵛⴰⵡⴰⵕⵏ ⵏ ⵜⵎⴰⵡⴰⵙⵜ ⵙ ⵜⵎⵢⴰⴷⴰⵙⵜ ⵏ ⵓⴷⵔⴰⵡ ⴷ ⴽⵓ ⵉⵎⵙⴽⴰⵔⵏ ⵉ ⵓⵎⴹⴰⴽⵕ ⴷ ⵓⵙⵖⵓⴷⵓ ⵏ ⵓⵙⵏⴼⴰⵔ ⵏ ⵓⵏⵇⵇⵉⵙ ⴰⵏⴰⵎⵓⵔ ⵏ ⵜⵙⵇⵇⵉⵎⵜ ⵏ ⵜⵎⵖⴰⵔⵜ ⵙ ⵓⴼⴰⵔⵙ ⴰⵣⵣⵔⴰⴼ ⴷ ⵜⵉⴹⴰⴼ ⵜⴰⴱⵕⵍⴰⵎⴰⵏⵉⵜ ⴷ ⵜⵉⵍⴰⵍⵜ ⵜⴰⴷⵉⴱⵍⵓⵎⴰⵙⵉⵜ ⴷ ⵜⵉⵍⴰⵍ ⵏ ⵓⵥⵏⵥⵕ ⴷ ⵓⵙⵎⵓⵜⵜⴳ, ⵍⵍⵉ ⵉⵎⵎⴰⵍⴰⵏ ⵓⵎⵎⵉⵥⵏ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ, ⴷ ⵓⵙⵎⵏⵉⴷ ⵏ ⵜⵓⴳⴳⴰⵙ ⵜⴰⵏⴰⵎⵓⵔⵜ ⴳ ⵓⵙⵉⵥⴹⵕ ⴷ ⵓⵙⵎⵖⵔ ⵏ ⵉⵣⵔⴼⴰⵏ ⵏ ⵜⵎⵖⴰⵔⵜ ⴳ ⴽⵓ ⵉⴳⵔⴰⵏ.

ⵜⵙⴷⴷⵉⴷ ⵎⴰⵙⵙⴰ ⵜⴰⵎⴰⵡⵙⴰⵙⵜ ⵎⴰⵙ ⴷ ⴰⵙⴷⵔⵓ ⵏ ⵓⴱⵕⵍⴰⵎⴰⵏ ⴳ ⵓⵎⵛⴰⵡⴰⵕ ⴼ ⵓⵏⵇⵇⵉⵙ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴳ ⵜⵙⵓⵜⵍⵜ 65 ⵏ ⵜⵙⵇⵇⵉⵎⵜ ⵏ ⵜⵎⵖⴰⵔⵜ, ⵢⵉⵡⵉ ⵜ ⴷ ⵓⴷⵖⴰⵔ ⵏ ⵜⵎⵔⵙⵍⵜ ⴰⴷ ⴳ ⵓⵙⵎⵖⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵣⵔⴼⴰⵏ ⵏ ⵜⵎⵖⴰⵔⵜ, ⵙ ⵓⴼⴰⵔⵙ ⴰⵣⵣⵔⴰⴼ ⴷ ⵜⵉⴹⴰⴼ ⵜⴰⴱⵕⵍⴰⵎⴰⵏⵉⵜ ⴷ ⵜⴷⵉⴱⵍⵓⵎⴰⵙⵉⵜ ⴷ ⵜⵉⵍⴰⵍ ⵏ ⵓⵥⵏⵥⵕ ⴷ ⵓⵙⵎⵓⵜⴳ, ⵜⵉⵏⵉ ⵎⴰⵙ ⵜⵎⵎⴰⵖ ⵜⵎⵔⵙⵍⵜ ⵉ ⴽⵉⴳⴰⵏ ⵏ ⵓⵙⵉⵥⴹⵕ ⵏ ⵜⵎⵖⴰⵔⵜ ⴳ ⵉⴳⵔⴰⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⵙⵔⵜⴰⵏⵏ ⴷ ⵉⴷⵙⵍⴰⵏⵏ ⴷ ⵉⵡⵏⴹⴰⵏⵏ.

ⵉⵍⵍⴰ ⴳ ⵓⵏⵎⵓⵇⴰⵔ ⴰⴷ ⵉⵥⵉⵕ ⵏ ⵜⵎⵙⴽⴰⵔ ⴳ ⵢⵉⴳⵔ ⵏ ⵜⴷⵔⴰⵡⵜ ⵏ ⵜⵎⵖⴰⵔⵜ ⴳ ⴽⵓ ⵉⵙⵡⵉⵔⵏ ⵙⵍⴰⵡⴰⵏ ⴰⴽⴽⵯ ⴳ ⵓⴷⵔⴰⵡ ⵏ ⵜⵎⵖⴰⵔⵉⵏ ⴳ ⵜⵖⵜⴰⵙⵉⵏ ⴷ ⵓⵙⴱⴷⴷⵉ ⵏ ⴽⵓ ⵓⴷⵎⴰⵡⵏ ⵏ ⵓⵙⵏⵓⵃⵢⵓ ⴷ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵉⵏ. ⵜⵉⵏⵉ ⵎⴰⵙⵙⴰ ⵜⴰⵎⴰⵡⵙⴰⵙⵜ ⵎⴰⵙ ⵜⵎⵎⴰⵖ ⵜⴳⵍⴷⵉⵜ, ⵙ ⵉⵙⵡⴰⵍⴰⵢⵏ ⴰⵜⵜⵓⵢⵏⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴼ ⵜⵉⵍⵉⵜ ⵏ ⵜⴷⵍⵙⴰ ⵏ ⵢⵉⵙⴽⵉⵍ ⴷ ⵓⵙⴰⵎⵓ ⴷ ⵓⵙⵖⵓⴷⵓ ⵏ ⵉⵙⵍⴳⵏⵏ ⵎⴳⴰⵍ ⵏ ⵓⵙⵏⵓⵃⵢⵓ. ⵜⵙⵓⵜⴳ ⵜⴰⵡⵓⵔⵉ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ ⴷ ⵉⴳⵔⴰⵏ ⵓⵏⴱⵉⴹⵏ ⴷ ⴽⵉⴳⴰⵏ ⵏ ⵜⵎⵔⵙⴰⵍ ⴳ ⵓⵙⴷⵓⵙ ⵏ ⵜⵙⵓⴳⴰⵔ ⴷ ⵓⴹⴼⵕ ⴷ ⵓⵙⵙⵥⵕⴼ ⵏ ⵉⵙⵏⴼⴰⵔⵏ. ⵜⵉⵏⵉ ⵎⴰⵙ ⵜⵙⴰⵡⵍ ⵜⵎⵏⴹⴰⵡⵜ ⴼ ⴰⴷ ⵓⵔ ⵢⵉⵍⵉ ⵓⵙⵏⵓⵃⵢⵓ ⵎⴳⴰⵍ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⴳ ⴽⵓ ⵉⴳⵔⴰⵏ, ⴷ ⵉⵇⵇⴰⵏ ⴷ ⴰⴷ ⵢⵉⵍⵉ ⵓⴼⵔⵉⵙ ⴰⴷⵙⵜⴰⵔ ⴼ ⵢⵉⵙⴽⵉⵍ , ⵙ ⴽⵉⴳⴰⵏ ⵏ ⵉⵙⵍⴳⵏⵏ ⴰⵎ ⵉⵙⵍⴳⵏⵏ ⵉⵎⴰⴷⴷⴰⵙⵏ ⵏ ⵓⴱⵕⵍⴰⵎⴰⵏ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵉⴽⴰⴱⴰⵕⵏ ⵉⵙⵔⵜⴰⵏⵏⵏ ⴷ ⵓⵙⵍⴳⵏ ⵏ ⵜⵡⵓⵔⵉ, ⴷ ⵓⵙⴽⵔ ⵏ ⵜⴳⵔⴰⵡⵜ ⵏ ⵢⵉⵙⴽⵉⵍ ⴷ ⵓⵙⴱⴷⴷⵉ  ⵏ ⵓⴷⵎⴰⵡⵏ ⵏ ⵓⵙⵏⵓⵃⵢⵓ.

ⵜⵙⴰⵡⵍ ⵎⴰⵙⵙⴰ ⵙⴰⵄⵉⴷⴰ ⴰⵢⵜ ⴱⵓⵄⴰⵍⵉ, ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ, ⴼ ⵓⴷⵖⴰⵔ ⵉⵙⵜⴰⵡⵀⵎⵎⴰⵏ ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵜⵎⵙⴰⵔⵜ ⵏ ⵜⵎⵖⴰⵔⵉⵏ ⴷ ⵉⵣⵔⴼⴰⵏ ⵏⵏⵙⵏⵜ, ⵜⴳ ⵜⴰⵖⴰⵡⵙⴰ ⵜⴰⴷⵙⵍⴰⵏⵜ ⴳ ⵓⴱⵔⵉⴷ ⵏ ⵓⵙⴽⵔ ⵏ ⵡⴰⵎⵓⵏ ⴰⴷⵉⵎⵓⵇⵔⴰⵟⵉ ⴰⵎⴰⵢⵏⵓ.

ⵜⵉⵏⵉ ⵎⴰⵙⵙⴰ ⴰⵢⵜ ⴱⵓⵄⴰⵍⵉ ⵎⴰⵙ ⵜⵍⴽⵎ ⵜⵎⵖⴰⵔⵜ ⴰⵙⵡⵉⵔ ⴰⴷ ⴳ ⵜⴳⵍⴷⵉⵜ ⵙ ⵉⵙⴳⵓⴷⵉⵢⵏ ⴷ ⵜⴼⴰⴷⵉⵡⵉⵏ ⵏ ⵓⵎⵣⵔⵓⵢ ⴷ ⵜⵉⵔⴰⵜ ⵜⴰⵙⵔⵜⴰⵏⵜ ⵍⵍⵉ ⵉⵙⵎⵖⵔⵏ ⴰⵙⵓⵔⵙ ⵏⵏⵙ ⴳ ⵜⵎⵔⵙⴰⵍ ⵏ ⵓⵙⵜⴰⵢ ⴷ ⵓⵙⵎⵖⵔ ⵏ ⵢⵉⵙⴽⵉⵍ ⴷ ⵓⵙⵉⵙⵙⵏ ⵙ ⵉⵣⵔⴼⴰⵏ ⵉⴷⵎⵙⴰⵏⵏ ⵙⴳ ⵡⵉⵢⵢⴰⴹ. ⵜⵉⵏⵉ ⵎⴰⵙ ⴷ ⵇⵇⴰⵏⵜ ⴽⵉⴳⴰⵏ ⵏ ⵜⵓⴳⴳⴰⵙ ⵉ ⵓⵙⵎⵖⵔ ⵏ ⵉⵙⵓⵔⵙⵏ ⵉⴷⵎⵙⴰⵏⵏ ⵏ ⵜⵎⵖⴰⵔⵉⵏ ⴷ ⵓⵙⴷⵓⵙ ⵏ ⵜⵉⵍⵉⵜ ⵏⵏⵙⵏⵜ ⴳ ⵡⴰⵎⵎⴰⵙⵏ ⵏ ⵜⵖⵜⴰⵙⵜ ⵙ ⴰⵢⵍⵍⵉ ⵉⵍⵍⴰⵏ ⴳ ⵉⵖⴰⵡⴰⵙⵏ ⴷ ⵜⵙⵔⵜⴰⵢ ⵜⵉⵏⴰⵎⵓⵔⵉⵏ ⴳ ⵢⵉⴳⵔ ⴰⴷ.

ⴳ ⵓⵎⵏⵉⴷ ⵏⵏⵙ, ⵜⵏⵏⴰ ⵜⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵏ ⵜⵡⵓⵔⵉ ⵜⴰⵙⴳⵓⵎⴰⵏⵜ ⵉⵜⵜⵓⵙⵎⴰⴳⴰⵍⵏ ⵙ ⵢⵉⵙⴽⵉⵍ ⴷ ⵓⵙⴰⵎⵓ ⴳ ⵓⵙⵇⵇⵉⵎ ⵏ ⵉⵎⵓⵔ, ⵎⴰⵙⵙⴰ ⴼⴰⵟⵉⵎⴰ ⵥⵥⴰⵀⵕⴰ ⵏⴰⵣⵉⵀ, ⵎⴰⵙ ⵉⴳⴰ ⵓⵏⵇⵇⵉⵙ ⵍⵍⵉ ⵔⴰⴷ ⵉⵜⵜⵓⵙⵎⵏⵉⴷ ⴷⴰⵜ ⵏ ⵜⵙⵓⵜⵍⵜ 65 ⵏ ⵜⵙⵇⵇⵉⵎⵜ ⴼ ⵓⵙⵓⵔⵙ ⵏ ⵜⵎⵖⴰⵔⵜ, ⴰⵣⵎⵣⵣⵓ ⴼ ⵓⵣⵣⵔⴰⵢ ⵏ ⵓⵙⵓⵔⵙ ⵏ ⵜⵎⵖⴰⵔⵜ ⵜⴰⵎⵖⵔⵉⴱⵉⵜ ⵙ ⵜⵜⵓⴳⴳⴰⵙ ⵜⵜⵓⵙⴽⴰⵔⵏⵉⵏ.

ⵜⵉⵏⵉ ⵎⴰⵙ ⴷ ⵜⴰⵎⵖⴰⵔⵜ ⴳ ⵍⵎⵖⵔⵉⴱ ⵜⵥⴹⴰⵕ ⴰⴷ ⵜⵙⴽⵔ ⵉⵥⵎⵓⵥⵥⴰⵍ ⴳ ⴽⵓ ⵉⵙⵡⵉⵔⵏ ⴷ ⵓⵎⵎⵉⵥⵏ ⴳ ⵉⴳⵔⴰⵏ ⵉⵙⵔⵜⴰⵏⵏ ⴷ ⵉⴷⵎⵙⴰⵏⵏ ⴷ ⵉⵣⵔⴼⴰⵏⵏ, ⵜⴱⴷⴷ ⴼ ⵜⵣⴷⴰⵢⵜ ⵊⴰⵔ ⵜⴰⵎⵙⴰⵔⵜ ⵏ ⵜⵎⵖⴰⵔⵜ ⴷ ⵓⵎⵎⴰⵜⵉ ⴰⴷⵉⵎⵓⵇⵔⴰⵟⵉ ⴳ ⵍⵎⵖⵔⵉⴱ, « ⵉⴳⴰ ⵓⵙⵎⵖⵔ ⵏ ⵓⵙⵓⵔⵙ ⵏ ⵜⵎⵖⴰⵔⵜ ⵜⴰⵔⵙⵍⵜ ⵏ ⵓⵙⴷⵓⵙ ⵏ ⵓⵎⵎⴰⵜⵜⵉ ⴷ ⵓⵚⴽⵓ ⵏ ⵓⵡⴰⵏⴽ ⴰⵎⴰⵢⵏⵓ ⴷ ⵓⵣⵓⵣⵣⵔ ⵏ ⵜⴷⵍⵙⴰ ⴷ ⵡⴰⵜⵉⴳⵏ ⵏ ⵢⵉⵙⴽⵉⵍ ⴳ ⵓⵙⴰⵎⵓ ⴳ ⵡⴰⵎⵓⵏ ».

ⴳ ⵓⵏⵎⵓⵇⴰⵔ ⴰⴷ, ⴹⴼⵕⵏ ⵉⴳⵎⴰⵎⵏ ⵏ ⵓⴱⵕⵍⴰⵎⴰⵏ, ⴰⵙⵎⵏⵉⴷ ⴼ ⵓⵙⵏⴼⴰⵔ ⵏ ⵓⵏⵇⵇⵉⵙ ⵏ ⵜⴳⵍⴷⵉⵜ ⵉ ⵜⵙⵓⵜⵍⵜ 65 ⵏ ⵜⵙⵇⵇⵎⵜ ⵏ ⵓⵙⵓⵔⵙ ⵏ ⵜⵎⵖⴰⵔⵜ ⵍⵍⵉ ⵔⴰⴷ ⵢⵉⵍⵉ ⴼ « ⵓⴷⵔⴰⵡ ⵏ ⵜⵎⵖⴰⵔⵜ ⴳ ⵜⵓⴷⵔⵜ ⵜⴰⵎⴰⵜⴰⵢⵜ ⴷ ⵓⵙⴽⵔ ⵏ ⵜⵖⵜⴰⵙⵜ ⵙ ⵜⵓⵛⵛⵔⴽⴰ ⴷ ⵓⵙⴽⵔ ⵏ ⵢⵉⵙⴽⵉⵍ ⴳⵔ ⵓⵔⴳⴰⵣ ⴷ ⵜⵎⵖⴰⵔⵜ ⴷ ⵓⵙⴱⴷⴷⵉ ⵏ ⵜⴽⵕⴹⵉ ».

ⵢⵉⵡⵉ ⴷ ⵓⵙⵏⴼⴰⵔ ⵏ ⵓⵏⵇⵇⵉⵙ ⵏ ⵜⴳⵍⴷⵉⵜ ⵜⵓⵙⵙⵏⴰ ⵙ ⵓⵙⴰⵜⵉ ⴰⵎⵔⵙⵍⴰⵏ ⴼ ⵓⵙⵎⵖⵔ ⵏ ⵓⵙⵓⵔⵙ ⵏ ⵜⵎⵖⴰⵔⵜ ⵙ ⵉⵎⵏⴰⴷⵏ ⵏⵏⵙ ⴷ ⵉⵖⴰⵡⴰⵙⵏ ⴷ ⵜⵙⵔⵜⴰⵢ ⴷ ⵉⵣⵣⵔⴰⴼⵏ, ⴷ ⵉⵙⵖⵡⴰⵏⵏ ⵉⴳⵔⴰⵖⵍⴰⵏⵏ ⵏ ⵜⴳⵍⴷⵉⵜ ⴳ ⵓⵙⵎⵖⵔ ⵏ ⵉⵣⵔⴼⴰⵏ ⵏ ⵜⵎⵖⴰⵔⵜ ⴷ ⵉⵙⵏⴼⴰⵔⵏ ⵜⵜⵓⵙⴽⴰⵔⵏⵉⵏ ⴷ ⵡⵉⴷⴰ ⵍⵍⴰⵏⵉⵏ.

ⵍⵍⴰⵏ ⴳ ⵓⵏⵇⵇⵉⵙ ⵓⵟⵟⵓⵏⵏ ⴼ ⵜⴷⵔⴰⵡⵜ ⵏ ⵜⵎⵖⴰⵔⵜ ⵜⴰⵎⵖⵔⵉⴱⵉⵜ ⴳ ⵜⵓⴷⵔⵜ ⵜⴰⵎⴰⵜⴰⵢⵜ ⴷ ⵓⵙⴽⵔ ⵏ ⵜⵖⵜⴰⵙⵜ ⴷ ⵉⵙⵡⵓⴷⴷⵓⵜⵏ ⴷ ⵉⵣⵣⵔⴰⴼⵏ ⴼ ⵓⵙⴱⴷⴷⵉ ⵏ ⵓⵙⵏⵓⵃⵢⵓ ⵎⴳⴰⵍ ⵏ ⵜⵎⵖⴰⵔⵜ ⴷ ⵜⴽⵕⴹⵉ ⴷ ⵓⵙⴷⵓⵙ ⵏ ⵓⵙⵉⵥⴹⵕ ⴰⴷⵎⵙⴰⵏ ⵏ ⵜⵎⵖⴰⵔⵉⵏ, ⴷ ⵓⵎⵎⵉⵥⵏ ⵜⵜⵓⵙⴽⴰⵔⵏⵉⵏ ⵉ ⵚⴰⵃⴰ ⵏ ⵜⵎⵖⴰⵔⵜ ⴳ ⵜⴳⵍⴷⵉⵜ.

ⴳ ⵓⵎⴹⴰⴽⴰⵕ, ⵙⴰⵡⵍⵏⵜ ⵉⵙⵜ ⵎⴰⵙⵙⴰ ⵜⵉⵎⵓⵔⴰ ⴼ ⵜⵏⵇⴰⴹ ⵏ ⵓⵏⵇⵇⵉⵙ, ⴰⵎ ⴰⵙⵙⴰⵔⵓ ⴰⵏⴼⴳⴰⵏ ⵉⵥⵍⵉⵏ ⵙ ⵜⵎⵖⴰⵔⵜ ⵙ ⵓⵙⵍⵎⴷ ⴷ ⵓⵙⴼⵔⴽ, ⴷ ⵓⵙⴷⵓⵙ ⵏ ⵜⵉⵍⴰⵍⵜ ⵜⴰⴱⵉⴷⴰⴳⵓⵊⵉⵜ ⵏ ⵓⵙⵎⴰⵏ ⴷ ⵓⵣⵓⵣⵣⵔ ⵏ ⵜⴷⵍⵙⴰ ⵏ ⵢⵉⵙⴽⵉⵍ, ⴷ ⵓⵙⵎⵔⵙⵍ ⵏ ⵜⴳⵔⴰⵡⵉⵏ ⵜⵉⴷⵙⵜⴰⵔⵉⵏ ⵉ ⵓⵙⵉⵥⴹⵕ ⵏ ⵜⵎⵖⴰⵔⵜ ⴳ ⵉⵣⵔⴼⴰⵏ ⵏⵏⵙ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵙⵍⴰⵏⵏ ⴷ ⵉⵡⵏⴹⴰⵏⵏ.