ⴰⵙⵉⵡⴹ ⴰⵎⴳⴳⴰⵔⵓ ⵏ ⵜⵙⵎⵓⵏⵉ ⵉⵛⵛⴰⵔⵏ ⵏ ⵜⵙⵇⵇⵉⵎⵜ ⵜⴰⵎⵖⵍⴰⵍⵜ ⵏ ⵓⵙⵖⵏⵣⵉ ⴷ ⵜⴷⵉⵡⴰⵏⵜ ⴷ ⵜⵣⵡⴰⴳⵜ, ⴷ ⵜⵙⵇⵇⵉⵎⵜ ⵜⴰⵎⵖⵍⴰⵍⵜ ⵏ ⵡⴰⵙⵙⴰⵢ ⴷ ⵜⵎⴳⵓⵔⵉ ⴷ ⵉⵏⵢⴰⵍⴽⴰⵎⵏ ⴷ ⵜⵥⴹⴰⵕⵜ ⴷ ⵜⵎⴰⵙⵙⴰⵏⵉⵏ ⴷ ⵜⵉⴽⵏⵓⵍⵓⵊⵉⵜ ⵖ ⵓⴱⵕⵍⴰⵎⴰⵏ ⴰⴼⵔⵉⵇⵉ ⵏ ⵓⴱⵕⵍⴰⵎⴰⵏ ⵏ ⴽⵓ-ⴰⴼⵔⵉⵇⵢⴰ, 6 ⵎⴰⵕⵚ 2020

ⴰⵙⵉⵡⴹ ⴰⵎⴳⴳⴰⵔⵓ ⵏ ⵓⴱⵕⵍⴰⵎⴰⵏ ⵏ ⴽⵓ-ⴰⴼⵔⵉⵇⵢⴰ

ⵏⴽⴽⵏⵉ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵜⴰⵎⵖⵍⴰⵍⵜ ⵏ ⵓⵙⵖⵏⵣⵉ ⴷ ⵜⴷⵉⵡⴰⵏⵜ ⴷ ⵜⵣⵡⴰⴳⵜ, ⴷ ⵜⵙⵇⵇⵉⵎⵜ ⵜⴰⵎⵖⵍⴰⵍⵜ ⵏ ⵡⴰⵙⵙⴰⵢ ⴷ ⵜⵎⴳⵓⵔⵉ ⴷ ⵉⵏⵢⴰⵍⴽⴰⵎⵏ ⴷ ⵜⵥⴹⴰⵕⵜ ⴷ ⵜⵎⴰⵙⵙⴰⵏⵉⵏ ⴷ ⵜⵉⴽⵏⵓⵍⵓⵊⵉⵜ ⵖ ⵓⴱⵕⵍⴰⵎⴰⵏ ⴰⴼⵔⵉⵇⵉ,

ⵍⵍⵉⵖ ⵏⵙⵔⵙ ⴰⵎⵏⵏⵉ ⵡⵉⵙ ⴽⵕⴰⴹ ⵏ ⵓⵙⵍⴳⵏ ⴰⵎⵙⴽⴰⵔ ⵏ ⵜⴰⵎⵓⵏⵜ ⵜⴰⴼⵔⵉⵇⵉⵜ ⵉⵡⴰⵜⵜⵙⵏ ⴰⵙⴷⵓⵙ ⵏ ⵜⴷⵔⴰⵡⵜ ⵏ ⵉⵎⴰⴷⴰⵏⵏ ⵉⴼⵔⵉⵇⵉⵢⵏ ⵖ ⵜⵣⵣⵉⴳⵣⵜ ⵏ ⵜⵖⵜⴰⵙⵉⵏ ⵉⵟⵟⴰⴼⵏ ⵉⴷⵔⵉⵣⵏ ⵖ ⵜⵓⴷⵔⵜ ⵏⵏⵙⵏ ⵜⴰⴽⵓⵢⴰⵙⵜ, ⵜⵉⵏⵏⵓⴱⴹⴰ ⵉⵥⵉⵍⵏ ⴷ ⵓⵃⵟⵟⵓ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⵙⵀⵡⵏ ⴷ ⵓⵣⵣⴳⵉⵔ ⵉⵕⵡⴰⵏ ⵏ ⵜⵙⵔⵜⴰⵢ ⵏ ⵜⴰⵎⵓⵏⵜ ⵜⴰⴼⵔⵉⵇⵉⵜ ⴷ ⵉⵡⵜⵜⴰⵙⵏ ⵏⵏⵙ, ⴷ ⵜⵡⵉⵙⵉ ⵖ ⵓⴱⵓⵖⵍⵓ ⵏ ⵉⵎⴰⴷⴰⵏⵏ ⵉⴼⵔⵉⵇⵉⵢⵏ,

ⵏⵎⵎⴰⵇⵇⴰⵔ ⵖ ⵓⵙⵖⵉⵎ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⵖ ⵕⵕⴱⴰⵟ ⵙⴳ 2 ⴰⵔ 6 ⵎⴰⵕⵚ 2020 ⵖ ⵜⵙⵎⵓⵏⴰⵢ ⵜⵓⵍⴳⵉⵏⵉⵏ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ ⵉ ⵓⵎⴹⴰⴽⴰⵕ ⴼ ⵜⵎⵙⴰⵔⵉⵏ ⵣⴷⵉⵏⵉⵏ ⴷ ⵓⵙⵖⵏⵣⵉ ⵏⴳⵔ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⵉⴳⴰⵏ ⴰⵣⵣⴳⵉⵔ ⵏ ⵜⵙⴳⴰ ⵜⵉⵍⴻⵍⵍⵉⵜ ⵏ ⵓⵙⵖⵏⵣⵉ ⴰⵎⵏⵥⴰⵡ ⴰⴼⵔⵉⵇⵉ, ⴷ ⵓⵙⵀⵡⵏ ⵏ ⵓⵙⵖⵏⵣⵉ ⴷ ⵓⵏⴳⵔⴰⵡ ⴰⴷⵉⵡⴰⵏⵉ ⴰⵎⵖⵔⵉⴱⵉ, ⵖⵎⴽ ⴰⵏⵏ ⴷ ⵓⵃⵟⵟⵓ ⵏ ⵜⵎⵓⵛⴰ ⵜⵉⵏⵉⵎⴰⵏⵉⵏ ⴷ ⵜⴷⴰⵎⵙⴰ ⵜⴰⵎⵓⵟⵟⵓⵏⵜ,   

ⵍⵍⵉⵖ ⴷ ⵏⵓⵙⵉ ⵉⵙⵍⴳⵏⵏ ⵉⵍⵍⴰⵏ ⵖ ⵉⵙⵡⵉⵔⵏ ⴰⵏⵎⵏⴰⴹ ⴷ ⵓⵎⵏⵥⴰⵡ ⴷ ⵓⴳⵔⴰⵖⵍⴰⵏ ⵏ ⵓⵙⵀⵡⵏ ⵏ ⵉⵙⵏⴼⵍⵏ ⵏ ⵓⵙⵖⵏⵥⵉ, ⴷ ⵓⵙⴷⵓⵙ ⵏ ⵓⵙⵖⵏⵣⵉ ⵏⴳⵔ ⵜⵉⵎⵉⵣⴰⵔ ⵏ ⵉⴼⵔⵉⵇⵢⴰ, ⵖ ⵉⵍⵍⴰ ⵓⵎⵛⴰⵛⴽⴰ ⵏ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵏ ⵓⵙⵖⵏⵣⵉ ⵉⵥⵍⵉⵏ ⴷ ⵓⵙⵀⵡⵏ ⵏ ⵓⵙⵖⵏⵣⵉ, ⴷ ⵓⵎⵛⴰⵛⴽⴰ ⵏ ⵜⵙⴳⴰ ⵏ ⵓⵙⵖⵏⵣⵉ ⵉⵍⴻⵍⵍⵉ ⴰⵎⵏⵥⴰⵡ ⵉⵜⵜⵓⵣⵎⵎⴰⵎⵏ ⵖ ⵎⴰⵕⵚ 2020 ⵖ ⵜⵎⴷⵉⵏⵜ ⵏ ⴽⵉⴳⴰⵍⵉ, ⵕⵡⴰⵏⴹⴰ, ⵙ ⵜⵖⵜⴰⵙⵜ ⵏ ⵜⴰⵎⵓⵏⵜ ⵜⴰⴼⵔⵉⵇⵉⵜ (Ext/Assembly/AU/Dec.1(x)),

ⵍⵍⵉⵖ ⴷ ⵏⵙⵙⴽⵯⵜⵉ ⵙ ⵜⵎⵔⵉⵙⵜ ⵏ ⵉⵏⵙⵙⵉⵅⴼⵏ ⵏ ⵉⵡⴰⵏⴽⵏ ⴷ ⵜⵏⴱⴰⴹⵉⵏ ⵉ ⵓⵙⵔⵇⴱ ⵏ ⵓⵙⵖⵏⵣⵉ ⵏⴳⵔ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⴷ ⵓⵅⵎⵎⴻⵎ ⵖ ⵜⴳⵎⵉ ⵏ ⵓⵎⵏⵥⴰⵡ ⴰⴼⵔⵉⵇⵉ;

ⴰⵔ ⴷ ⵏⵙⵙⴽⵯⵜⵉ ⵜⴰⵎⵙⵙⴽⵜⵉⵜ 2063 ⵏ ⵜⴰⵎⵓⵏⵜ ⵜⴰⴼⵔⵉⵇⵉⵜ ⵖ ⵉⵍⵍⴰ ⵓⵙⵎⴰⵇⵇⵍ ⵏ ⵓⵎⵏⵥⴰⵡ ⵍⵍⵉ ⵔⴰⴷ ⴷ ⵢⴰⵡⵉ ⵓⵎⵓⵙⵙⵓ ⵏ ⵉⵡⴷⴰⵏ ⴷ ⵉⴷⴳⴰⵔⵏ ⴷ ⵜⴳⵓⵔⴰ ⴷ ⵜⵏⵓⴼⴰ ⵙ ⵓⵙⵎⵖⵔ ⵏ ⵓⵙⵖⵏⵣⵉ ⴷ ⵓⵙⵙⴰⵔⵓ ⵏⴳⵔ ⵜⵎⵉⵣⴰⵔ ⵏ ⵉⴼⵔⵉⵇⵢⴰ, ⴷ ⵓⵙⵖⵓⴷⵓ ⵏ ⵓⵙⵡⵉⵔ ⵏ ⵉⴼⵔⵉⵇⵢⴰ ⵖ ⵓⵙⵖⵏⵣⵉ ⴰⴳⵔⴰⵖⵍⴰⵏ ;

ⵍⵍⵉⵖ ⵏⵙⵔⵙ ⵜⵉⵎⵓⴽⵔⵉⵙⵉⵏ ⵉⵍⵍⴰⵏ ⴷⴰⵜ ⵏ ⵓⵙⵖⵏⵣⵉ ⵏ ⵓⴱⵕⵓⵟⵓⴽⵓⵍ ⵏ ⵜⵎⵢⴰⵇⵇⵏⵜ ⵉⵙⴽⵔⵏ ⵜⴰⴳⵔⴰⵡⵜ ⵜⴰⴷⵎⵙⴰⵏⵜ ⵜⴰⴼⵔⵉⵇⵉⵜ, ⵖ ⵎⴰ ⴰⴷ ⵉⵣⴷⵉⵏ ⴷ ⵜⵍⴻⵍⵍⵉ ⵏ ⵓⵎⵎⴰⵜⵜⵉ ⵏ ⵉⵡⴷⴰⵏ, ⴷ ⵓⵣⵔⴼ ⵖ ⵜⵣⴷⵓⵖⵜ, ⴷ ⵓⵣⵔⴼ ⵖ ⵓⵔⴳⴳⵉⴳ;

ⵍⵍⵉⵖ ⵏⵣⵎⵎⴻⵎ ⵜⵉⵍⴰⵍⵜ ⵉⵙⵜⴰⵡⵀⵎⵎⴰⵏ ⵏ ⵜⴻⵜⵉⴽⵏⵓⵍⵓⵊⵉⵜ ⵏ ⵉⵏⵖⵎⵉⵙⵏ ⴷ ⵉⵏⵢⴰⵍⴽⴰⵎⵏ ⵖ ⵜⴳⵎⵉ ⵜⴰⵏⴰⵎⵓⵏⵜ ⴷ ⵜⴷⵎⵙⴰⵏⵜ ⵏ ⵉⴼⵔⵉⵇⵢⴰ;

ⵍⵍⵉⵖ ⴷⴰⵔⵏⵖ ⴰⵖⵉⵍⵓⴼ ⵎⴰⵙ ⴷ ⵉⵇⵇⴰⵏ ⵓⵣⵣⴳⵉⵔ ⵏ ⵢⴰⵏ ⵉⵎⵉⵙⵙ ⵏ ⵓⵙⴱⴷⴷⵉ ⵏ ⵉⵎⵉⵣⵉⵢⵏ ⵣⴷⵉⵏⵉⵏ ⴷ ⵓⵙⵎⵔⵙ ⵏ ⵜⵎⵓⵛⴰ ⵜⵉⵍⵉⴽⵟⵕⵓⵏⵉⵢⵉⵏ ⴷ ⵉⵙⴷⴰⵡⵏ ⴼ ⵉⵡⴷⴰⵏ ⵃⵎⴰ ⴰⴷ ⵢⵉⵍⵉ ⵓⵡⵇⵇⵔ ⵏ ⵜⵎⵥⵍⴰⵢⵉⵏ ⴷ ⵜⴷⵔⴼⵉⵏ ⵉⵎⵓⵏⵏ ⴷ ⵓⵙⴷⵓⵙ ⴷ ⵓⵣⵣⵉⴳⵣ ⵏ ⵜⴻⵜⵉⴽⵏⵓⵍⵓⵊⵉⵜ ⵏ ⵉⵏⵖⵎⵉⵙⵏ ⴷ ⵉⵏⵢⴰⵍⴽⴰⵎⵏ ⵖ ⵜⵎⵉⵣⴰⵔ ⴳⴰⵏⵉⵏ ⵉⴳⵎⴰⵎⵏ ⵖ ⵜⵎⵓⵏⵜ ⵜⴰⴼⵔⵉⵇⵉⵜ ;

ⵍⵍⵉⵖ ⵏⵥⵕⴰ ⵎⴰⵙ ⵓⵔ ⵟⵟⴰⴼⵏⵜ ⵜⵓⴳⵜ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⴰⵙⴰⵜⵉ ⴰⵣⵣⵔⴰⴼ ⴷ ⵢⵓⵙⴰⵏ ⴷ ⵜⵎⵙⵙⵓⴳⵓⵔⵜ ⵏ ⵜⵎⵓⵛⴰ ⵜⵉⵏⵉⵎⴰⵏⵉⵏ ⴷ ⵓⵃⵟⵟⵓ ⵏⵏⵙⵏⵜ ;

ⵍⵍⵉⵖ ⵏⵅⵎⵎⴻⵎ ⴱⴰⵀⵔⴰ ⵖ ⵓⵙⴱⴷⴷⵉ ⵏ ⵓⴱⴽⴽⵉⴹ ⴰⵙⵉⴱⵉⵔⵏⵉ ⵍⵍⵉⵖ ⵓⵔ ⵍⵍⵉⵏ ⵉⵙⴰⵜⵉⵢⵏ ⵉⵣⵔⴼⴰⵏⵏ ⵏ ⵓⵃⵟⵟⵓ ⵏ ⵜⵎⵓⵛⴰ ⵜⵉⵏⵉⵎⴰⵏⵉⵏ ⵖ ⵉⴼⵔⵉⵇⵢⴰ,

ⵖⵎⴽ ⴰⵏⵏ ⴽⵓⵍⵍ ⴰⴼ ⴷ ⵏⵎⵛⴰⵛⴽⴰ ⴼ:

1-   ⵖ ⵓⵎⵏⵉⴷ ⵏ ⵓⵙⵎⵖⵔ ⵏ ⵓⵙⵖⵏⵣⵉ ⵏⴳⵔ ⵜⵎⵉⵣⴰⵔ ⵏ ⵉⴼⵔⵉⵇⵢⴰ:

1.1   ⴰⵔ ⵏⵜⵜⵓⵚⵚⵓ ⵉⴱⵕⵍⴰⵎⴰⵏⵉⵢⵏ ⵏ ⵉⵡⴰⵏⴽⵏ ⵓⵔ ⵉⵣⵎⵎⴻⵎⵏ ⵉ ⵓⵙⴼⵔⴽ ⵏ ⵜⵏⴱⴰⴹⵉⵏ ⵏⵏⵙⵏ ⵙ ⵓⵣⵓⵛⵛⵍ ⵏ ⵓⵣⵎⵎⴻⵎ ⴷ ⵓⵙⵖⵣⵏ ⵏ ⵓⵎⵛⴰⵛⴽⴰ ⵏ ⵜⵙⴳⴰ ⵜⵉⵍⴻⵍⵍⵉⵜ ⵜⴰⵎⵏⵥⴰⵡⵜ ⵜⴰⴼⵔⵉⵇⵉⵜ ⵏ ⵓⵙⵖⵏⵣⵉ ⵉⵖ ⵓⵔⵜⴰ ⵉⵍⴽⵉⵎ 1 ⵢⵓⵏⵢⵓ 2020 ⵉⴳⴰⵏ ⵜⵉⵣⵉ ⵏ ⵓⵙⵎⵀⵍ ⵏ ⵓⵎⵛⴰⵛⴽⴰ;

1.2   ⵏⵥⵥⵓⵥⴹ ⵖ ⵉⴱⵕⵍⴰⵎⴰⵏⵉⵢⵏ ⴰⴷ ⵖⵔⵉⵏ ⵉ ⵉⵡⴰⵏⴽⵏ ⵏⵏⵙⵏ ⵉ ⵓⵣⵎⵎⴻⵎ ⴼ ⵓⴱⵕⵓⵟⵓⴽⵓⵍ ⵉⴹⴼⵕⵏ ⵜⴰⵎⵢⴰⵇⵇⴰⵏⵜ ⵜⴰⵎⵙⴽⴰⵔⵜ ⵏ ⵜⴳⵔⴰⵡⵜ ⵜⴰⴷⵎⵙⴰⵏⵜ ⵜⴰⴼⵔⵉⵇⵉⵜ ⴷ ⵓⵙⵖⵣⵏ ⵏⵏⵙ, ⵜⴰⴷ ⵉⵣⴷⵉⵏ ⴷ ⵜⴷⵔⴼⵉⵜ ⵏ ⵓⵎⵎⴰⵜⵜⵉ ⵏ ⵉⵡⴷⴰⵏ, ⴷ ⵓⵣⵔⴼ ⵏ ⵜⵣⴷⵓⵖⵜ, ⴷ ⵓⵣⵔⴼ ⵖ ⵓⵔⴳⴳⵉⴳ;

1.3   ⴰⵔ ⵏⴰⵇⵔⴰ ⵉ ⵉⵡⴰⵏⴽⵏ ⵉⴼⵔⵉⵇⵉⵢⵏ ⵉ ⵡⴰⵣⵣⴰⵣ ⵏ ⵓⵙⴽⴰⵔ ⵏ ⵓⵙⵎⵖⵔ ⴰⴷⵎⵙⴰⵏ ⴰⵙⴳⴰⵡⴰⵏ ⴷ ⵓⵙⴷⵓⵙ ⵏ ⵓⵔⵣⵣⵓ ⴰⵎⴰⵙⵙⴰⵏ ⵃⵎⴰ ⴰⴷ ⵉⴱⴷⴷ ⵓⵏⴳⵣⵓ ⵉⵍⵍⴰⵏ ⵖ ⵉⵙⵓⴳⴰⵎ ⵉⵏⴼⴳⴰⵏⵏ;

1.4   ⴰⵔ ⵏⵜⵜⵓⵚⵚⵓ ⴰⴱⵕⵍⴰⵎⴰⵏ ⴰⴼⵔⵉⵇⵉ ⵉ ⵓⵣⵓⵛⵛⵍ ⵏ ⵓⵙⴽⴰⵔ ⵏ ⵓⵙⵍⴳⵏ ⴰⵣⵓⵔⵜ ⵃⵎⴰ ⴰⴷ ⵢⵉⵍⵉ ⵓⵙⴳⵉⴷⵉⵉ ⵏ ⵉⵣⵣⵔⴰⴼⵏ ⵏ ⵓⵔⴳⴰⵢ ⴷ ⵜⴷⵉⵡⴰⵏⵜ, ⵉ ⵓⵙⵀⵡⵏ ⵏ ⵓⵏⴳⵔⴰⵡ ⴰⴷⵉⵡⴰⵏⵉ ⴷ ⵜⵣⵣⵉⴳⵣⵜ ⵏ ⵉⵙⵏⴼⵍⵏ ⵏ ⵓⵙⵖⵏⵣⵉ ⵏⴳⵔ ⵜⵎⵉⵣⴰⵔ ⴷ ⵓⵙⵔⵇⴱ ⵏ ⵓⵙⵎⵖⵔ ⵏ ⵜⵎⵔⵙⴰⵍ ⵜⵉⴼⵔⵉⵇⵉⵢⵉⵏ ⵙ ⵓⵣⵣⵉⴳⵣ ⵏ ⵉⵙⴷⴷⵉⵢⵏ ⵏ ⵡⴰⵜⵉⴳⵏ;

1.5   ⴰⵔ ⵏⵜⵜⵓⵚⵚ ⵉⴱⵕⵍⴰⵎⴰⵏⵉⵢⵏ ⵉ ⵓⵙⴼⵔⴽ ⵏ ⵜⵎⵉⵣⴰⵔ ⵏⵏⵙⵏ ⵙ ⵓⵣⵓⵛⵛⵍ ⵏ ⵓⵙⴽⴰⵔ ⵏ ⵜⴷⴰⴱⵓⵜⵉⵏ ⵉⵜⵜⴰⵡⵙⵏ ⴼ ⵍⴰⵏⵜⵉⵔⵏⵉⵜ ⵉ ⵚⴰⵃⴰ ⵏ ⵉⵎⵙⵡⵔⵏ ⵉⴷⵎⵙⴰⵏⵏ ⵉⵜⵜⵓⵙⵖⵣⵏⵏ;

1.6   ⴰⵔ ⵏⵙⵙⵔⵖⵓⴷ ⵜⴰⴳⵍⴷⵉⵜ ⵜⴰⵎⵖⵔⵉⴱⵉⵜ ⴼ ⵜⵢⴰⴼⵓⵜ ⵏⵏⵙ ⵉⵥⵉⵍⵏ ⵖ ⵢⵉⴳⵔ ⵏ ⵓⵙⵀⵡⵏ ⵏ ⵉⵙⴼⵍⵏ ⵏ ⵓⵙⵖⵏⵣⵉ;

2-   ⵖ ⵢⵉⴳⵔ ⵏ ⵓⵃⵟⵟⵓ ⵏ ⵜⵎⵓⵛⴰ ⵜⵉⵏⵉⵎⴰⵏⵉⵏ:

1.2 ⴰⵔ ⵏⵜⵜⵓⵚⵚⵓ ⵉⴱⵕⵍⴰⵎⴰⵏⵉⵢⵏ ⵉ ⵓⵙⴼⵔⴽ ⵏ ⵉⵡⴰⵏⴽⵏ ⵏⵏⵙⵏ ⵙ ⵓⵣⵓⵛⵛⵍ ⵏ ⵓⵣⵎⵎⴻⵎ ⴷ ⵓⵙⵖⵣⵏ ⵏ ⵜⵎⵢⴰⵇⵇⴰⵏⵜ ⵏ ⵜⴰⵎⵓⵏⵜ ⵜⴰⴼⵔⵉⵇⵉⵜ ⵉⵥⵍⵉⵏ ⴷ ⵜⵏⴼⵔⵓⵜ ⵜⴰⵙⵉⴱⵉⵔⵏⵉⵜ ⴷ ⵓⵃⵟⵟⵓ ⵏ ⵜⵎⵓⵛⴰ ⵜⵉⵏⵉⵎⴰⵏⵉⵏ ⴷ ⵓⵙⴽⵛⵎ ⵏⵏⵙ ⵖ ⵓⵣⵣⵔⴰⴼ ⴰⵏⴰⵎⵓⵔ;

2.2 ⴰⵔ ⵏⴰⵇⵔⴰ ⵉ ⵓⴱⵕⵍⴰⵎⴰⵏ ⴰⴼⵔⵉⵇⵉ ⵉ ⵓⵙⵔⵇⴱ ⵏ ⵉⵡⴰⵏⴽⵏ ⵉⴼⵔⵉⵇⵉⵢⵏ ⵃⵎⴰ ⴰⴷ ⵜⵜⵔⵙⵏ ⵉⵙⴰⵜⵉⵢⵏ ⵉⵣⵔⴼⴰⵏⵏ ⵏ ⵓⵃⵟⵟⵓ ⵏ ⵜⵎⵓⵛⴰ ⵜⵉⵏⵉⵎⴰⵏⵉⵏ ⴷ ⵓⵙⴽⴰⵔ ⵏ ⵢⴰⵜ ⵜⵏⴱⴰⴹⵜ ⵜⴰⵏⴰⵎⵓⵔⵜ ⵏ ⵓⵙⵡⵓⴷⴷⵓ ⵏⵏⵙⵏⵜ;

2.3 ⵖ ⵜⴳⵉⵔⴰ, ⴰⵔ ⵏⵜⵜⵓⵚⵚⵓ ⴰⴱⵕⵍⴰⵎⴰⵏ ⴰⴼⵔⵉⵇⵉ ⴰⴷ ⵉⵖⵔ ⵉ ⵜⴰⵎⵓⵏⵜ ⵜⴰⴼⵔⵉⵇⵉⵜ ⴰⴷ ⵜⵙⴽⵔ ⵢⴰⵏ ⵓⵏⴳⵔⴰⵡ ⴰⴼⵔⵉⵇⵉ ⴰⵎⴰⵜⴰⵢ ⵏ ⵓⵃⵟⵟⵓ ⵏ ⵜⵎⵓⵛⴰ ⵜⵉⵏⵉⵎⴰⵏⵉⵏ ⵏ ⵉⵏⵎⵓⵔⴰⵏ ⴷ ⵜⵎⵔⵙⴰⵍ ⵖ ⵉⴼⵔⵉⵇⵢⴰ.

ⵉⵜⵜⵓⵙⴽⴰⵔ ⵖ ⵕⵕⴱⴰⵟ, 6 ⵎⴰⵕⵚ 2020.