ⴰⵎⴹⴰⴽⴰⵕ ⵏ ⵓⵎⴰⴳⵔⴰⴷ 49 ⵏ ⵓⵙⵍⴳⵏ ⵏ ⵜⵓⵡⵊⴰ ⴳ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵉⵜⵜⵓⵙⵎⴰⴳⴰⵍⵏ ⵙ ⵢⵉⵙⴽⵉⵍ ⴷ ⵓⵙⴰⵎⵓ

ⵜⵙⴽⵔ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵉⵜⵜⵓⵙⵎⴰⴳⴰⵍⵏ ⵙ ⵢⵉⵙⴽⵉⵍ ⴷ ⵓⵙⴰⵎⵓ ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵡⴰⵙ 25 ⵎⴰⵕⵚ 2021, ⴰⵙⵙ ⵏ ⵜⵖⵔⵉ ⴼ « ⵓⵎⴰⴳⵔⴰⴷ 49 ⵏ ⵓⵙⵍⴳⵏ ⵏ ⵜⵓⵡⵊⴰ : ⴰⵙⴽⵔ ⴷ ⵜⵓⵜⵔⴰ ⵏ ⵓⵙⵏⴼⵍ », ⵙ ⵜⵉⵍⵉⵜ ⵏ ⵉⵎⵙⴽⴰⵔⵏ ⴷ ⵉⵎⵙⵜⴳⴳⴰⵔⵏ ⴷ ⵉⴳⵏⵙⴰⵙⵏ ⵏ ⵜⵎⵙⵎⵓⵏⵉⵏ ⵏ ⵜⵎⵖⴰⵔⵉⵏ.

ⵜⵙⵙⵉⵅⴼ ⴰⵏⵎⵓⵇⴰⵔ ⴰⴷ ⵎⴰⵙⵙⴰ ⴼⴰⵟⵉⵎⴰ ⵥⵥⴰⵀⵕⴰ ⵏⴰⵣⵉⵀ, ⵜⴰⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵉⵜⵜⵓⵙⵎⴰⴳⴰⵍⵏ ⵙ ⵢⵉⵙⴽⵉⵍ ⴷ ⵓⵙⴰⵎⵓ, ⵍⵍⵉ ⵉⵙⴰⵡⵍⵏ ⴼ ⵎⴰⴷ « ⵢⵉⵡⵉ ⵓⵙⵍⴳⵏ ⵏ ⵜⵓⵡⵊⴰ ⵙⴳ 2004 ⵖ ⵓⵎⵏⵉⴷ ⵏ ⵜⵣⴷⴰⵢⵉⵏ ⵊⴰⵔ ⵜⵓⵡⵊⴰ ⵜⴰⵎⵖⵔⵉⴱⵉⵜ, ⵙ ⵎⴰⴷ ⵉⵎⵙⴰⵙⴰⵏ ⴷ ⵉⵙⵡⴰⵍⴰⵢⵏ ⵏ ⵍⵉⵙⵍⴰⵎ ». ⵜⴱⴷⴷ ⴼ ⵓⵎⵏⴰⴹ ⵏ ⵓⵎⴰⴳⵔⴰⴷ 49 ⵍⵍⵉ ⴷ ⵢⵉⵡⵉⵏ ⵙⵏⴰⵜ ⵜⵔⵙⴰⵍ « ⵜⴰⵙⵉⵎⴰⵏⵜ ⵜⴰⵥⵕⴼⴰⵏⵜ ⵏ ⵜⵎⵖⴰⵔⵜ ⴷ ⵓⵔⴳⴰⵣ, ⴷ ⵓⴼⵔⴰⴳ ⵏ ⵜⵓⴳⴳⴰⵙ ⵏ ⴽⵓ ⵢⴰⵏ ⴷ ⵉⵥⴰⵥⵓⵢⵏ ⵉ ⵜⴳⵎⵉ ⵏ ⵜⴷⵔⵉⵎⵜ ⵏ ⵜⵓⵡⵊⴰ, ⵍⵍⵉⵖ ⵜⵙⵡⵓⵔⵉ ⵜⵎⵖⴰⵔⵜ ⴳ ⵓⴳⵯⵏⵙ ⵏ ⵜⴰⴷⴷⴰⵔⵜ ».

ⵜⵉⵏⵉ ⵎⴰⵙⵙⴰ ⵏⴰⵣⵉⵀ, ⵎⴰⵙ « ⵉⵙⵖⵣⵏ ⵓⵙⵏⴼⴰⵔ ⵙ ⵓⵎⴰⴳⵔⴰⴷ ⴰⴷ « ⴰⵢⵍⵍⵉ ⵉⵍⵍⴰⵏ ⴳ ⴽⵔⴰ ⵏ ⵜⵙⴳⴳⵉⵡⵉⵏ, ⴰⵢⵍⵍⵉ ⵉⵜⵜⵓⵙⵙⴰⵏⵏ ⵙ ⵜⵎⴰⵣⵣⴰⵍⵜ ⵍⵍⵉⵖ ⵜ ⵉⵙⵏⴼⵍ ⵙⴳ ⵜⴰⵎⵢⵓⵔⵜ ⴰⵔ ⴰⵣⵔⴼ ⵉⵍⵍⴰⵏ ⴳ ⵓⵙⵍⴳⵏ ⵏ ⵜⵓⵡⵊⴰ ⵉ ⵓⵣⵓⵣⵣⵔ ⵏ ⵡⴰⵜⵉⴳⵏ ⵏ ⵜⵏⴳⴰⴷⴷⴰⵢⵜ ⵊⴰⵔ ⵓⵔⴳⴰⵣ ⴷ ⵜⵎⵖⴰⵔⵜ ».

ⵜⵙⴰⵡⵍ ⵎⴰⵙⵙⴰ ⵜⴰⵏⵙⵙⵉⵅⴼⵜ ⴼ ⵜⵎⵓⴽⵔⵉⵙⵉⵏ ⵏ ⵓⵙⴽⵔ ⵏ ⵓⵎⴰⴳⵔⴰⴷ ⴰⴷ, ⵜⴰⵡⵉⴷ ⵓⵟⵟⵓⵏⵏ ⵏ ⵜⵎⴰⵡⴰⵙⵜ ⵏ ⵜⵣⵔⴼⵜ ⵏ 2015 ⵍⵍⵉ ⵜⵜⵉⵏⵉⵏ ⵎⴰⵙ ⵍⵍⴰⵏⵜ 0.5 % ⵏ ⵜⵎⵖⵓⵏⵉⵏ ⴳ ⵓⵎⵏⵉⴷ ⵏ ⵓⵙⵡⵓⴷⴷⵓ ⵏ ⵉⴷⵔⵉⵎⵏ ⴳ ⵓⵎⵏⵉⴷ ⴰⴷ, «  ⴷ ⵎⴰⵙ ⵉⴷⵔⵓⵙ ⵍⵉⵊⵜⵉⵀⴰⴷ ⵏ ⵜⵣⵔⴼⵜ ⴳ ⵓⵙⵓⵜⴳ ⵏ ⵜⵡⵉⵙⵉ ⵏ ⵜⵎⵖⴰⵔⵜ ⴳ ⵜⴳⵎⵉ ⵏ ⵉⴷⵔⵉⵎⵏ ⵏ ⵜⵓⵡⵊⴰ, ⵖⵎⴽ ⴰⵏⵏ ⴷ ⵍⴼⵉⵇⵀ, ⵓⵔ ⵉⵍⵍⵉ ⴰⵙⵎⴽⵍ ⵏ ⵜⵎⵓⴽⵔⵉⵙⵉⵏ ⵏ ⵓⵎⴰⴳⵔⴰⴷ 49 ». ⴰⴷ ⵜⵏⵏⴰ ⵜⵏⵙⵙⵉⵅⴼⵜ.

ⵜⵙⵎⵏⵉⴷ ⵎⴰⵙⵙⴰ ⵡⴰⴼⴰ ⵍⵍⵓⴷⴰ, ⵜⴰⵏⵙⵙⵉⵅⴼⵜ ⵏ ⵜⵏⴰⴼⵓⵜ ⵏ ⵜⵎⵙⴰⵔⵉⵏ ⵏ ⵜⵎⵖⴰⵔⵉⵏ ⴳ ⵜⵎⴰⵡⴰⵙⵜ ⵏ ⵜⵣⵔⴷⵜ, ⵜⴰⵢⴰⴼⵓⵜ ⵏ ⵓⵙⴽⵔ ⵏ ⵓⵙⵍⴳⵏ ⵏ ⵜⵓⵡⵊⴰ ⴷ ⵓⵎⴰⴳⵔⴰⴷ 49 ⴷ ⵉⵎⵏⴰⴷⵏ ⵏ ⵓⵙⵏⴼⵍ ⵏⵏⵙ.

ⵜⵉⵏⵉ ⵎⴰⵙⵙⴰ ⵍⵍⵓⴷⴰ, « ⴰⵎⴰⴳⵔⴰⴷ ⴰⴷ ⴳⵉⵙ ⵜⵉⵔⵙⴰⵍ ⴼ ⵓⵎⵏⵉⴷ ⴰⵥⵕⴼⴰⵏ ⵏⴳⵔ ⵓⵔⴳⴰⵣ ⴷ ⵜⵎⵖⴰⵔⵜ ⵏⵏⵙ ⵉⴱⴷⴷⵏ ⴼ ⵜⵏⴳⴰⴷⴷⴰⵢⵜ, ⴰⵔ ⴰⵙⵏ ⵉⵜⵜⴰⵡⵙ ⴳ ⵓⵙⵡⵓⴷⴷⵓ ⵏ ⵜⴷⵔⵉⵎⵜ ⵏⵏⵙⵏ, ⵙ ⵓⵙⵙⴰⵔⵓ ⵏⵖ ⴰⴱⵟⵟⵓ. ⴽⵓⵢⴰⵏ ⵖⵓⵔⵙ ⵜⴰⵙⵉⵎⴰⵏⵜ ⵜⴰⵥⵕⴼⴰⵏⵜ ⵙⵔⵙ ⵉⵥⵍⵉⵏ. ⵥⴹⴰⵕⵏ ⵓⵍⴰ ⴰⴷ ⵙⴽⵔⵏ ⵜⴰⵎⵖⵓⵏⵜ ⵉ ⵓⵙⵙⴰⵔⵓ ⴷ ⵓⴱⵟⵟⵓ ⵏ ⵉⴷⵔⵉⵎⵏ ⵎⵓⵏⵏⵉⵏ ⴳ ⵓⵣⵎⵣ ⴳ ⵜⴰⵀⵍⵏ, ⵉⵖ ⵎⵎⵣⵔⵉⵏ ⵥⴹⴰⵕⵏ ⴰⴷ ⴼⵜⵓⵏ ⴷⴰⵔ ⵜⵙⵏⴱⴹⴰⵢⵜ, ⴽⵓⵢⴰⵏ ⵉⴼⴽ ⵜⵉⵎⵏⵜⵍⵉⵏ ⵏⵏⵙ ⵙ ⵎⴰⴷ ⵉⵍⵍⴰⵏ ⴳ ⵜⵔⵙⴰⵍ ⵜⵉⵎⴰⵜⴰⵢⵉⵏ ».

ⴷⴼⴼⵉⵔ, ⵉⴼⴽⴰ ⵎⴰⵙⵙ ⴱⵏⵏⴰⵚⵕ ⴱⵏⴷⵄⵉⵊⵓ, ⴰⴳⵏⵙⴰⵙ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵜⵏⴱⴰⴹⵜ ⵜⴰⵣⵔⴼⴰⵏⵜ, ⵜⴰⵙⵏⵙⵉ ⵜⴰⵣⵔⴼⴰⵏⵜ ⵏ ⵓⵎⴰⴳⵔⴰⴷ 49 ⴼ ⵓⵙⵡⵓⴷⴷⵓ ⵏ ⵉⴷⵔⵉⵎⵏ ⵛⵛⴰⵔⵏⵉⵏ ⵊⴰⵔ ⵓⵔⴳⴰⵣ ⴷ ⵜⵎⵖⴰⵔⵜ ⵏⵏⵙ.

ⵍⵍⴰⵏⵜ ⵓⵍⴰ ⵜⴽⵛⵛⵓⵎⵉⵏ ⵏ ⵜⴳⵏⵙⴰⵙ ⵏ ⵜⵎⵙⵎⵓⵏⵉⵏ ⵏ ⵜⵎⵖⴰⵔⵉⵏ : ⴰⵏⵎⵓⵇⴰⵔ ⴰⵥⵥⴰⵀⵕ ⵏ ⵜⵎⵖⴰⵔⵜ ⵜⴰⵎⵖⵔⵉⴱⵉⵜ, ⵜⴰⵎⵙⵎⵓⵏⵜ ⵏ ⵓⴳⵕⴹ ⵏ ⵜⵎⵖⴰⵔⵜ ⵜⴰⵎⴰⵣⵉⵖⵜ, ⵜⴰⵎⵙⵎⵓⵏⵜ ⵜⴰⵎⵖⵔⵉⴱⵉⵜ ⵏ ⵓⴼⵔⴰⴳ ⵏ ⵜⵓⵡⵊⴰ, ⵜⴰⵎⵓⵏⵜ ⵏ ⵜⵡⵓⵔⵉ ⵏ ⵜⵎⵖⴰⵔⵉⵏ, ⵊⵓⵙⵓⵔ, ⵉⴼⴰⵙⵙⵏ ⵉⵍⴻⵍⵍⵉⵢⵏ. ⴷ ⵜⴽⵛⵛⵓⵎⵉⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴳⵔⴰⵡⵜ ⵜⴰⵏⴰⵎⵓⵔⵜ ⵏ ⵍⵄⴷⵓⵍ.

ⵉⴼⴼⵖ ⵡⴰⵙⵙ ⵏ ⵜⵖⵓⵔⵉ ⵙ ⵉⵙⵖⵍⴰⴼ ⴼ ⵓⵛⵛⵉⵍ ⵏ ⵓⵙⴼⵔⴽ ⴷ ⵓⵙⵎⵏⵉⴷ ⵏ ⵜⵙⵓⵎⵔⵉⵏ ⵏ ⵓⵙⴳⵎⵉ ⴷ ⵓⵙⵙⵍⵎⴷ ⵏ ⵡⴰⵎⵓⵏ ⴰⵎⵖⵔⵉⴱⵉ, ⴰⴼⵔⴰⴳ ⵏ ⵜⵓⵡⵊⴰ ⵜⴰⵎⵖⵔⵉⴱⵉⵜ ⵙ ⴽⵓ ⵉⴼⵔⴷⴰⵙ ⵏⵏⵙ ⴰⵔⴳⴰⵣ ⵜⴰⵎⵖⴰⵔⵜ ⴷ ⵡⴰⵔⵔⴰⵡⵏ, ⴰⵙⵎⵀⵍ ⵏ ⵜⵎⵔⵙⵍⵜ ⵏ ⵜⵡⵉⵙⵉ ⵜⴰⵏⴰⵎⵓⵏⵜ ⴳ ⵓⵙⴽⵔ ⵏ ⵉⵔⵣⵣⵓⵜⵏ ⵉⵏⴰⵎⵓⵏⵏ ⴼ ⵡⴰⴷⴷⴰⴷ ⵉⵥⵍⵉⵏ ⴷ ⵉⴷⵔⵉⵎⵏ ⴷ ⵓⵙⵓⵜⴳ ⵏ ⵜⵡⵓⵔⵉ ⵏ ⵜⴳⵯⵎⵎⴰ ⴷ ⵜⵓⴳⴳⴰⵙ ⵏ ⵜⵎⵖⴰⵔⵜ.