ⴰⵙⵇⵇⵉⵎ ⵏ ⵉⵎⵓⵔⴰ ⵉⵙⵖⵣⵏ ⴰⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵉⵜⵜⴰⵡⵙⵏⴼⴰⵍⵏ ⵓⵟⵟⵓⵏ 35.20 ⵏ ⵓⵙⴳⴳⵯⴰⵙ ⴰⵥⵕⴼⴰⵏ 2020 ⴷⴼⴼⵉⵔ ⵏ ⵓⵙⵏⴼⵍ ⵏⵏⵙ
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⵖ ⵜⴳⵉⵔⴰ ⵏ ⵢⵉⴹ ⵏ ⵡⴰⵢⵏⴰⵙ 13 ⵢⵓⵍⵢⵓⵣ 2020 ⵙ ⵜⵓⴳⵜ ⴰⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵉⵜⵜⴰⵡⵙⵏⴼⴰⵍⵏ ⵓⵟⵟⵓⵏ 35.20 ⵏ ⵓⵙⴳⴳⵯⴰⵙ ⴰⵥⵕⴼⴰⵏ 2020, ⵖ ⵜⵖⵉⵎⵉⵜ ⵜⴰⴳⴷⵓⴷⴰⵏⵜ ⵍⵍⵉ ⵉⵙⵙⵉⵅⴼ ⵓⵏⵙⵙⵉⵅ ⵏ ⵓⵙⵇⵇⵉⵎ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵙ ⵜⵉⵍⵉⵜ ⵏ ⵎⴰⵙⵙ ⵎⵓⵃⴰⵎⵎⴰⴷ ⴱⵏ ⵛⴰⵄⴱⵓⵏ ⴰⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ.
ⵉⵥⵍⵉ ⵓⵙⵇⵇⵉⵎ ⵏ ⵉⵎⵓⵔⴰ ⴽⴽⵓⵥⵜ ⵜⵖⵉⵎⵉⵜⵉⵏ ⵜⵉⴳⴷⵓⴷⴰⵏⵉⵏ ⵖ 8 ⵏ ⵜⵙⵔⴰⴳⵉⵏ ⵉ ⵜⵏⴽⴷⴰ ⵏ ⵓⵙⵏⴼⴰⵔ ⴷ ⵜⵖⵔⵉ ⴷ ⵓⵎⴹⴰⴽⴰⵕ ⵏ ⵙⵉⵏ ⵉⴳⵣⵣⵓⵎⵏ ⵏⵏⵙ, ⴷ ⵓⵙⵙⴼⵍⴷ ⵉ ⵜⵎⵔⴰⵔⵓⵜ ⵏ ⵎⴰⵙⵙ ⴰⵎⴰⵡⵙⴰⵙ ⴼ ⵜⴽⵛⵛⵓⵎⵉⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴷⴰⵜ ⵏ ⵓⵙⵜⴰⵢ ⵏ ⵓⵙⵏⴼⴰⵔ ⴽⵓⵍⵍⵓ ⵜ.
ⵉⵡⵙⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵙ ⵜⵉⵕⵡⵉ ⵖ ⵓⵙⵖⵓⴷⵓ ⵏ ⵓⵙⵏⴼⴰⵔ ⵖ ⵓⵎⴹⴰⴽⴰⵕ ⴰⵎⴰⵜⴰⵢ ⴷ ⵉⵣⵓⵣⵣⵔⵏ. ⵜⵙⴽⵔ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵜⵏ ⵚⴹⵉⵚⵜ ⵜⵙⵎⵓⵏⴰⵢ ⵖ ⴽⴽⵓⵥ ⵓⵙⵙⴰⵏ ⵙ 24 ⴷ ⵓⵣⴳⵏ ⵏ ⵜⵙⵔⴰⴳⵉⵏ ⵏ ⵜⵡⵓⵔⵉ, ⵙⵡⵓⵔⵉⵏ ⴳⵉⵙⵏⵜ ⵉⵎⵓⵔⴰ ⴳⵉⵏⵜ ⴰⵣⵎⵣⵣⵓ ⵏ ⵓⵙⵓⵜⴳ ⵏ ⵉⵖⴰⵡⴰⵙⵏ ⴷ ⵜⵙⵔⵜⴰⵢ ⵏ ⵉⴳⵔⴰⵏ ⵓⵏⴱⵉⴹⵏ ⴷ ⵓⵙⵎⵀⵍ ⵏ ⵜⵓⵎⴰⵢⵉⵏ ⵏ ⵓⵙⵍⴳⵏ ⴰⵎⴰⴷⴷⴰⵙ ⵏ ⵓⵥⵕⴼ.
ⵍⴽⵎⵏⵜ ⵜⵙⵓⵎⵔⵉⵏ ⵏ ⵉⵙⵏⴼⵍⵏ ⵍⵍⵉ ⴼⴽⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵎⴰ ⴷ ⵉⴳⴰⵏ 75 ⵏ ⵓⵙⵏⴼⵍ, ⴳⵉⵏ ⵡⵉⵏ ⵜⵓⴳⵜ ⵓⵍⴰ ⵜⵓⵣⵍⵜ, ⵜⵜⵓⵇⴱⵉⵍⵏ ⴳⵉⵙⵏ 11 ⵏ ⵓⵙⵏⴼⵍ. ⵙ ⵓⵎⵏⵏⵉ 212 ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵜⵜⵔⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵜⵉⵎⵓⵛⴰ ⴷ ⵉⵙⵙⵉⵙⴼⵉⵡⵏ ⵢⴰⴹⵏⵉⵏ ⵃⵎⴰ ⴰⴷ ⵢⵉⵍⵉ ⵓⵙⴷⵓⵙ ⵏ ⵓⵎⴹⴰⴽⴰⵕ ⴰⴱⵕⵍⴰⵎⴰⵏⵉ ⵏ ⵓⵙⵏⴼⴰⵔ ⵏ ⵓⵙⵍⴳⵏ.
ⵖ ⵓⵎⴹⴰⴽⴰⵕ, ⵏⵏⴰⵏⵜ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵏ ⵎⴰⵙ ⵉⵍⵍⴰ ⵓⵙⵏⴼⴰⵔ ⴰⴷ ⵖ ⵓⵎⵏⴰⴹ ⴰⵏⴰⵎⵓⵔ ⵖ ⵜⵍⵍⴰ ⵜⵣⵣⵉⴳⵣⵜ ⵏ ⵜⴰⵙⵙⴰⵙⵜ ⵜⴰⴷⵓⵙⴰⵏⵜ ⵏ ⴽⵓⴼⵉⴷ 19, ⴷ ⵉⴷⵔⵉⵣⵏ ⵏⵏⵙ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ, ⴰⵢⵍⵍⵉ ⵢⵓⵊⵊⴰⵏ ⴰⴷ ⵢⵉⵍⵉ ⵓⵣⵣⵔⴰⵢ ⵏ ⵜⵎⵣⵡⵓⵔⴰ ⵍⵍⴰⵏⵉⵏ ⵖ ⵓⵙⵍⴳⵏ ⵏ ⵓⵥⵕⴼ ⵏ 2020 ⴷ ⵓⵙⵖⵣⵏ ⵏ ⵓⵙⵍⴳⵏ ⵏ ⵓⵥⵕⴼ ⵉⵜⵜⴰⵡⵙⵏⴼⴰⵍⵏ ⵉ ⵓⵙⴳⴳⵯⴰⵙ ⵏ 2020.
ⵙⵓⵜⴳⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵉⵎⴰⵏ ⵏ ⵜⵡⵉⵣⵉ ⴷ ⵓⵎⵛⴰⴱⴱⴰⴽ ⵍⵍⵉ ⴷ ⵎⵍⴰⵏ ⴽⵓ ⵉⴼⵔⴷⴰⵙ ⵏ ⵓⵎⴰⴷⴰⵏ ⴰⵎⵖⵔⵉⴱⵉ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵙⵓⵜⴳⵏ ⴰⵙⴽⵔ ⵏ ⵜⵙⵇⵇⵉⵎⵜ ⵏ ⵜⵉⴹⴰⴼ ⵜⴰⴷⵎⵙⴰⵏⵜ ⴷ ⵜⵎⵙⴽⴰⵔ ⵏ ⵡⴰⵔⴰⵢ ⵍⵍⵉ ⵙ ⵜⵣⵡⴰⵔ ⵜⵎⴰⵣⵉⵔⵜ ⵏⵏⵖ ⵉ ⵓⵙⴱⴷⴷⵉ ⵏ ⵜⵎⴰⴹⵓⵏⵜ ⴷ ⵓⵃⵟⵟⵓ ⵏ ⵜⴷⵓⵙⵉ ⵏ ⵉⵏⵎⵓⵔⴰⵏ, ⵙⵍⴰⵡⴰⵏ ⴰⴽⴽⵯ ⴰⵙⴽⵔ ⵏ ⵓⴼⵏⵉⵇ ⵉⵥⵍⵉⵏ ⵙ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ.
ⴱⴷⴷⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵡⴰⵜⵉⴳ ⵏ ⵓⵙⵏⴰⵍ ⵏ ⵜⵎⵙⴰⵙⵜⵍⵜ ⵏ ⵓⵙⵙⴰⵔⵓ ⴰⴳⴷⵓⴷⴰⵏ ⵍⵍⵉ ⵔⴰⴷ ⵉⵙⴽⵔ ⵜⴰⵏⵓⴼⵍⴰⵢⵜ ⴷ ⵜⴰⵣⵣⵓⵍⵉⵏ, ⴷ ⵓⵙⵡⵉⵏⴳⵎ ⵖ ⵉⴼⵙⵙⴰⵢⵏ ⵏ ⵜⵣⵣⵉⴳⵣⵜ ⵏ ⵜⴷⵎⵙⴰ ⵜⴰⵏⴰⵎⵓⵔⵜ, ⵙⴷⴷⵉⴷⵏ ⵎⴰⵙ ⴷ ⵉⵇⵇⴰⵏ ⵓⵙⵙⵔⵇⴱ ⵏ ⵓⵙⵙⴰⵔⵓ ⴷ ⵜⵎⴳⵓⵔⵉ ⵉⵏⴰⵎⵓⵔⵏ, ⵜⵉⵍⵉ ⵜⵣⵡⵉⵔⵉ ⴷⴰⵔ ⵓⵔⵣⵣⵓ ⴰⵎⴰⵙⵙⴰⵏ, ⴷ ⵓⵙⵏⴳⴰⴷⴷⴰ ⵏ ⵜⵎⵣⵡⵓⵔⴰ, ⴷ ⵓⵙⵏⵍⵍⵉ ⵏ ⵜⵎⵇⵕⴰⴹ ⵜⵉⴳⴷⵓⴷⴰⵏⵉⵏ, ⵖⵔⵉⵏ ⵉ ⵓⵙⵏⴰⵍ ⵏ ⵓⵙⵙⴰⵔⵓ ⵓⵙⵍⵉⴳ, ⴷ ⵓⵅⵎⵎⴻⵎ ⵖ ⵓⵎⴰⴹⴰⵍ ⴰⴼⴰⵔⴰⵏ ⴷ ⵜⴷⵓⵍⴰ ⵛⵃⴰⵏⵉⵏ.
ⵉⵡⵙⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵃⵎⴰ ⴰⴷ ⵜⵉⵍⵉ ⵜⵉⵕⵡⵉ ⵖ ⵓⵙⵍⴳⵏ ⵏ ⵓⵥⵕⴼ ⵉⵜⵜⴰⵡⵙⵏⴼⴰⵍⵏ ⵏ ⵉ ⵓⵙⴳⴳⵯⴰⵙ 2020, ⴳⴰⵏ ⵉⵙⵏⴼⵍⵏ ⵏⵏⵙⵏ ⵡⵉⵏ ⵓⵔⴳⴰⵢ ⴼ ⵓⴽⵛⵓⵎ, ⴷ ⵓⵔⴳⴰⵢ ⴼ ⵜⵎⵙⵙⵓⵔⵉⵏ, ⴷ ⵓⵔⴳⴰⵢ ⴼ ⵡⴰⵜⵉⴳ ⴷ ⵉⵣⵓⵢⵢⴷⵏ, ⴷ ⵜⵖⵔⴰⴷ ⵏ ⵓⵣⵎⵎⴻⵎ, ⵉⴳ ⵡⴰⵡⵜⵜⴰⵙ ⴰⵙⵡⵓⵜⵜⵓ ⵏ ⵉⴷⵔⵉⵣⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⵏ ⵓⴱⴰⵢⵢⵓⵕ ⴼ ⵉⵎⵙⵡⵓⵔⵉⵢⵏ ⴷ ⵜⵎⵙⵙⵏⵜⴰⵢ ⴷ ⵉⴷ ⴱⴰⴱ ⵏ ⵓⵙⵙⴰⵔⵓ ⵖ ⵢⵉⴳⵔ ⵓⵙⵍⵉⴳ.
ⵉⴳⴰ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵉⵜⵜⴰⵡⵙⵏⴼⴰⵍⵏ ⵓⵟⵟⵓⵏ 35.20 ⵏ ⵓⵙⴳⴳⵯⴰⵙ ⴰⵥⵕⴼⴰⵏ 2020, ⴰⵙⵏⴼⴰⵔ ⴰⵎⵣⵡⴰⵔⵓ ⵏ ⵓⵥⵕⴼ ⵉⵜⵜⴰⵡⵙⵏⴼⴰⵍⵏ ⵎⵍⵍⵉⵖ ⵉⵍⵍⴰ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 130.13 ⵉⵣⴷⵉⵏ ⴷ ⵓⵙⵍⴳⵏ ⵏ ⵓⵥⵕⴼ, ⵉⴱⴷⴷ ⴼ ⵜⵔⵙⴰⵍ ⵏ ⵓⴹⴼⵕ ⵏ ⵓⵖⵓⵍ ⴰⵎⴹⴼⵓⵕ ⵏ ⵜⵉⵍⴰⵍⵜ ⵜⴰⴷⵎⵙⴰⵏⵜ ⴷ ⵓⵃⵟⵟⵓ ⵏ ⵜⵣⵣⵓⵍⵉⵏ ⴷ ⵡⴰⵣⵣⴰⵣ ⵏ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ.