ⴰⵙⵉⵡⴹ ⴼ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 29 ⵛⵓⵜⴰⵏⴱⵉⵔ 2020

ⵉⵙⵏⵎⴰⵍⴰ ⵓⵙⵉⵔⴰ ⵏ ⵓⵙⵇⵇⵉⵎ ⵜⴰⵙⵏⵎⵓⵏⵉ ⵏⵏⵙ ⵜⴰⵏⵎⵍⴰⵙⵙⵜ ⵍⵍⵉ ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵉⵅⴼ ⵏ ⵓⵙⵇⵇⵉⵎ, ⴰⵙⵙ ⵏ ⵓⵙⵉⵏⴰⵙ 29 ⵛⵓⵜⴰⵏⴱⵉⵔ 2020, ⵍⵍⴰⵏ ⵖ ⵓⵖⴰⵡⴰⵙ ⵏ ⵜⵡⵓⵔⵉⵡⵉⵏ ⵏⵏⵙ ⵉⵎⵔⵙⵉⵡⵏ ⵥⵍⵉⵏⵉⵏ ⵙ ⵜⵡⵓⵔⵉ ⵏ ⵜⵉⴹⴰⴼ ⴷ ⵜⵉⵏ ⵓⵣⵣⵔⴰⴼ ⴷ ⵜⵣⴷⴰⵢⵜ ⵏ ⵓⵙⵇⵇⵉⵎ ⴷ ⴽⵔⴰ ⵏ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ.

ⵖ ⵜⵣⵡⵉⵔⵉ ⵏ ⵜⵙⵎⵓⵏⵉ ⴰⴷ, ⵉⵙⵙⴽⵜⵉ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵉⵎⵎⵓⵙⵙⵓⵜⵏ ⵉⵏⴰⵎⵓⵔⵏ ⵏ ⵉⵎⴰⵍⴰⵙⵙⵏ ⴳⴳⵓⵔⴰⵏⵉⵏ, ⵉⵍⵉⵏ ⴳⵉⵙⵏ ⵉⵏⴰⵡⵏ ⵉⵎⴰⵜⵜⵓⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⵙ ⵜⵎⵍⴷⴰ ⵏ ⵜⴼⵓⴳⵍⴰ ⵏ ⵓⴷⴰⴱⵓ ⴷ ⵜⴳⵔⴰⵡⵍⴰ ⵏ ⵓⴳⵍⵍⵉⴷ ⴷ ⵓⵎⴰⴷⴰⵏ, ⵖ ⵉⵙⵔⵙ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵃⴼⴹ ⵕⴱⴱⵉ ⵉⵙⴰⵡⵓⵔⵏ ⵏ ⵜⵡⵓⵔⵉ ⵖ ⵓⵙⵡⵉⵔ ⴰⵏⴰⵎⵓⵏ ⴷ ⵓⴷⵎⵙⴰⵏ.

ⵖⵎⴽ ⵍⵍⵉ ⴷ ⵉⵙⵙⴽⵜⵉ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵜⵓⴳⴳⴰⵙ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵖ ⵜⵉⵣⵉ ⵉⵍⵍⴰⵏ ⵏⴳⵔ ⵙⵏⴰⵜ ⵜⵙⵓⵜⵍⵉⵏ ⵖ ⵓⵙⵖⵣⵏ ⵏ ⵉⵎⵕⵚⵓⵎⵏ ⵏ ⵉⵙⵍⴳⵏⵏ ⵍⵍⵉ ⴷ ⵜⵉⵡⵉ ⵜⵏⴰⴼⵓⵜ ⵜⴰⵏⴰⵎⵓⵔⵜ ⴷ ⵜⵉⴹⴰⴼ ⵏ ⵜⵎⴰⵡⴰⵙⵉⵏ ⵥⵍⵉⵏⵉⵏ ⵖ ⵓⵙⵡⵓⴷⴷⵓ ⵏ ⵉⴳⵔⴰⵏ ⵓⴷⴷⵉⵔⵏ ⵏ ⵜⴷⵓⵙⵉ ⴷ ⵓⵙⵙⵍⵎⴷ ⴷ ⵜⴷⵎⵙⴰ ⴷ ⵓⵥⵕⴼ ⴷ ⵜⴼⵍⵍⴰⵃⵜ ⴷ ⵓⵙⵡⵓⵔⵉ ⴷ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵜⵎⴰⵍⵍⴰⵢⵜ ⴷ ⵜⴷⵍⵙⴰ ⴷ ⵜⵄⵄⵓⵔⵎⴰ ⴷ ⵜⵓⵏⵏⵓⵏⵜ.

ⵉⴱⴷⴷ ⵓⵙⵉⵔⴰ ⵏ ⵓⵙⵇⵇⵉⵎ ⵓⵍⴰ ⴼ ⵜⵉⵍⴰⵍⵜ ⵏ ⵜⵙⵇⵇⵉⵎⵉⵏ ⵖ ⵓⵙⵏⵜⵉ ⵏ ⵓⵎⴹⴰⴽⴰⵕ ⵏ ⴽⵔⴰ ⵏ ⵉⴹⵕⵉⵚⵏ ⵉⵣⵣⵔⴰⴼⵏ ⵙⵜⴰⵡⵀⵎⵎⴰⵏⵉⵏ ⴰⵎ ⴰⵙⵏⴼⴰⵔ ⵏ ⵓⵏⴳⵎⴰⵎ ⴰⵏⴰⵎⵓⵔ ⵉ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ ⴼ ⵉⵍⵍⴰ ⵓⵎⴹⴰⴽⴰⵕ ⵉⴷⵔⴰⵏ ⵖ ⵜⵙⵇⵇⵉⵎⵜ ⵏ ⵜⵣⵔⴼⵜ ⴷ ⵓⵣⵣⵔⴰⴼ ⴷ ⵉⵣⵔⴼⴰⵏ ⵏ ⵓⴼⴳⴰⵏ.

ⵉⵎⴷⴰⵡⴰⵍ ⵓⵙⵉⵔⴰ ⵓⵍⴰ ⴼ ⵜⵢⵢⴰⴼⵓⵜ ⵜⴰⵣⵣⵔⴰⴼⵜ ⵍⵍⵉ ⵙⵎⵏⵉⴷⵏⵜ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵖ ⵓⵙⴰⵜⵉ ⵏ ⵜⵙⵓⵎⴰⵔ ⵏ ⵉⵙⵍⴳⵏⵏ ⴰⵎ ⴰⵙⵍⴳⵏ ⴰⵎⴰⴷⴷⴰⵙ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⴱⵔⵉⴷⵜ ⵜⴰⵖⵔⵎⴰⵏⵜ ⴷ ⵜⵏⵓⴼⵍⴰⵢⵜ ⵜⴰⵔⵓⵍⴳⵉⵏⵜ ⴷ ⵓⵎⵣⴰⵔⴰⵢ ⵏ ⵜⵏⵓⴼⴰ.

ⵖ ⵜⵡⵓⵔⵉ ⵏ ⵜⵉⴹⴰⴼ, ⵉⵙⵙⴽⵜⵉ ⴷ ⵓⵙⵉⵔⴰ ⵏ ⵓⵙⵇⵇⵉⵎ ⵜⴰⵢⵢⴰⴼⵓⵜ ⵉⵥⵉⵍⵏ ⵏ ⵜⵙⵓⵜⵍⵜ ⵉⵣⵔⵉⵏ ⵖ ⵢⵉⴳⵔ ⵏ ⵉⵙⵇⵙⵉⵜⵏ ⵉⵎⵉⵡⴰⵏⵏ ⵉⵏⵎⵍⴰⵙⵙⵏ, ⵙ ⵓⵎⵙⴰⵙⴰ ⴷ ⵓⵎⵏⵏⵉ 268 ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⴼⴼⵖ ⵓⵙⵉⵔⴰ ⵏ ⵓⵙⵇⵇⵉⵎ ⴰⴷ ⴳⵉⵏ ⵉⵙⵇⵙⵉⵜⵏ ⵍⵍⵉ ⴷ ⵉⴹⴼⵕ ⵓⵎⴹⴰⴽⴰⵕ ⵙ ⵓⵙⵔⵓⵙ ⵏ ⵓⵙⴳⵓⵎ ⵏⵖ ⵙⵉⵏ ⵖ ⴽⵔⴰⵢⴳⴰⵜ ⵜⵉⵖⵉⵎⵉⵜ.

ⵙ ⵜⵖⵜⴰⵙⵜ ⵍⵍⵉ ⴰⴷ ⵉⵍⵍⴰⵏ, ⴷ ⴰⵢⵍⵍⵉ ⴷ ⵉⵡⵉⵏ ⵉⵎⵛⴰⵡⴰⵕⵏ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ , ⵔⴰⴷ ⵢⵉⵍⵉ ⵓⵖⴰⵡⴰⵙ ⵏ ⵜⵡⵓⵔⵉⵡⵉⵏ ⵏ ⵉⵙⵇⵙⵉⵜⵏ ⵉⵎⵉⵡⴰⵏⵏ ⵏ ⵡⴰⵢⵢⵓⵔ ⵏ ⴽⵟⵓⴱⵕ ⴼ ⵉⴳⵔⴰⵏ ⵏ ⵓⵙⵙⵍⵎⴷ ⴷ ⵜⴼⵍⵍⴰⵃⵜ  ⵖ ⵜⵖⵉⵎⵉⵜ ⵏ 12 ⴽⵟⵓⴱⵕ ⴷ ⵜⴷⵓⵙⵉ ⴷ ⵜⴳⵯⵏⵙⴰⵏⵜ ⵖ ⵜⵖⵉⵎⵉⵜ ⵏ 26 ⴽⵟⵓⴱⵕ 2020.

ⵖ ⵎⴰ ⴷ ⵉⵥⵍⵉⵏ ⵙ ⵜⵖⵉⵎⵉⵜ ⵏ ⵉⵙⵇⵙⵉⵜⵏ ⵥⵍⵉⵏⵉⵏ ⵙ ⵜⵙⵔⵜⵉⵜ ⵜⴰⵎⴰⵜⴰⵢⵜ ⵍⵍⵉ ⴼ ⵔⴰⴷ ⵉⵔⴰⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵉⴼⴼⵖ ⵓⵙⵉⵔⴰ ⵏ ⵓⵙⵇⵇⵉⵎ ⴰⴷ ⵜⵉⵍⵉ ⴰⵙⵙ ⵏ 19 ⴽⵟⵓⴱⵕ 2020 ⴼ:” ⵜⴰⵙⵔⵜⵉⵜ ⵜⵓⵏⴱⵉⴹⵜ ⴷ ⵜⵣⵣⵉⴳⵣⵉⵏ ⵏ ⵓⵙⵓⵔⵙ ⵏ ⵓⴱⴰⵢⵢⵓⵕ”.

ⵉⵎⴷⴰⵡⴰⵍ ⵓⵍⴰ ⵓⵙⵉⵔⴰ ⴼ ⵜⵢⵢⴰⴼⵓⵜ ⵏ ⵜⵙⵎⵉⴳⴰⵍ ⵏ ⵓⵙⴰⴳⴳⵯ ⵍⵍⵉ ⴼ ⴰⴷ ⵉⵍⵍⴰ ⵓⵎⵛⴰⵛⴽⴰ ⴰⵎⴳⴳⴰⵔⵓ ⴰⴷ ⵜⵜⵓⵙⴽⵉⵔⵏⵜ, ⵉⵙⵙⴽⵜⵉ ⴷ ⵜⵉⵖⵜⴰⵙⵉⵏ ⵏⵏⵙ ⵖ ⵓⵎⵏⵉⴷ ⴰⴷ, ⵉⵙⴷⴷⵉⴷ ⴼ ⵡⴰⵜⵉⴳ ⵏ ⵜⵡⵓⵔⵉ ⴰⴷ ⵏ ⵜⵉⴹⴰⴼ ⵉⴳⴰⵏ ⵢⴰⵏ ⵉⵎⵉⵙⵙ ⵏ ⵓⵙⴷⵓⵙ ⵏ ⵜⵉⵍⵉⵜ ⵏ ⵓⵙⵇⵇⵉⵎ ⵖ ⴽⵓ ⵉⵙⴰⵡⵓⵔⵏ ⴷ ⵜⵎⵔⵙⴰⵍ ⵍⵍⵉ ⴷ ⵉⵇⵇⴰⵏ ⵓⴹⴼⵕ ⵉⵕⵡⴰⵏ.

ⵖ ⵓⵎⵏⵉⴷ ⴰⴷ, ⵉⵖⵔⴰ ⵓⵙⵉⵔⴰ ⵏ ⵓⵙⵇⵇⵉⵎ ⴷ ⵉⵎⵛⴰⵛⴽⴰ ⴷ ⴼ ⵜⵓⵜⵔⴰ ⵏ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⴰⴷ ⵜⵉⵍⵉ ⵜⵙⵎⵉⴳⵍⵜ ⵏ ⵓⵙⴰⴳⴳⵯ ⵜⴰⵎⵙⵉⴽⵓⴷⵜ ⴼ ⵜⵏⵎⴰⵇⵇⴰⵙⵉⵏ  ⵍⵍⵉ ⵜⴱⵕⵎ ⵜⵎⴰⵡⴰⵙⵜ ⵏ ⵜⴷⵓⵙⵉ ⵖ ⵓⵙⴱⴷⴷⵉ ⵏ ⵜⵎⴰⵣⵉⵔⵜ ⵏⵏⵖ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ. ⵢⵉⵍⵉ ⵓⵙⵎⵓⵏ ⵏ ⵙⵏⴰⵜ ⵜⵓⵜⵔⴰⵡⵉⵏ ⵖ ⵉⵎⵔⵙⵉ ⴰⴷ ⵖ ⵢⴰⵜ ⵜⵙⵎⵉⴳⵍⵜ ⵏ ⵓⵙⴰⴳⴳⵯ ⵉⴳⴰⵏ ⵢⴰⵜ.

ⵖ ⵎⴰ ⴷ ⵉⵥⵍⵉⵏ ⴷ ⵜⵓⵜⵔⴰ ⵏ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ ⴷ ⵉⵎⵖⵔⴰⴱⵉⵢⵏ ⵏ ⵜⵎⵉⵣⴰⵔ ⵏⴱⵕⵕⴰ, ⴼ ⵜⵙⵎⵉⴳⵍⵜ ⵏ ⵓⵙⴰⴳⴳⵯ ⵜⴰⵎⵙⵉⴽⵓⴷⵜ ⴼ ⵜⵉⴷⵜ ⵏ ⵜⵉⵍⴰⵡⵜ ⵖ ⴷⴷⵔⵏ ⵜⴰⵣⵣⴰⵏⵉⵏ ⴷ ⵜⵎⵖⴰⵔⵉⵏ ⴷ ⵉⵏⵎⵓⵔⴰⵏ ⵉⵎⵖⵔⴰⴱⵉⵏ ⵍⵍⵉ ⵏⵏ ⵖⴰⵎⴰⵏⵉⵏ ⵖ ⴽⵔⴰ ⵏ ⵜⵎⵉⵣⴰⵔ ⵖ ⵍⵍⴰⵏⵜ ⵜⵎⵓⴽⵔⵉⵙⵉⵏ ⴰⵎ ⵙⵓⵔⵢⴰ ⴷ ⵍⵄⵉⵕⴰⵇ, ⵉⵙⵙⴽⵜⵉ ⴷ ⵎⴰⵙⵙ ⴰⵏⵙⵙⵉⵅⴼ ⵜⴰⵖⵜⴰⵙⵜ ⵉⵣⵔⵉⵏ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵉⵣⴷⵉⵏ ⴷ ⵓⵎⵏⵉⴷ ⵏ ⵜⴱⵔⵉⴷⵜ, ⵉⵙⴷⴷⵉⴷ ⴼ ⵡⴰⵜⵉⴳ ⵏ ⵜⵓⵜⵔⴰ ⴰⴷ ⵖ ⵍⵍⴰⵏ ⵉⵎⵏⴰⴷⵏ ⵉⵏⴰⵎⵓⵔⵏ ⴷ ⵉⵏⴼⴳⴰⵏⵏ ⴷ ⵡⵉⵏ ⵜⵡⵉⵣⵉ.

ⵍⵍⵉⵖ ⵉⴱⴷⴷ ⵓⵙⵉⵔⴰ ⵏ ⵓⵙⵇⵇⵉⵎ ⴼ ⴽⵓ ⵉⵎⵏⴰⴷⵏ ⵣⴷⵉⵏ ⴷ ⵉⵎⵔⵙⵉ ⴰⴷ, ⵉⵎⵛⴰⵛⴽⴰ ⴷ ⴼ ⵜⵓⵜⵔⴰ, ⵖⵎⴽ ⵍⵍⵉ ⵔⴰⴷ ⵜⵉⵍⵉ ⵜⵎⵢⴰⵣⴰⵏⵜ ⵉ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵖ ⵉⵎⵔⵙⵉ ⴰⴷ.

ⵖⵎⴽ ⵍⵍⵉ ⵉⵎⴷⴰⵡⴰⵍ ⵓⵙⵉⵔⴰ ⵏ ⵓⵙⵇⵇⵉⵎ ⴼ ⵜⵓⵜⵔⴰ ⵏ ⵜⵙⵇⵇⵉⵎⵜ ⵏ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⴷ ⵜⵥⴹⴰⵕⵜ ⴷ ⵉⵣⵓⵖⴰⵣ ⴷ ⵡⴰⵡⴰⵏⴰⴹ ⵖ ⵜⵍⵍⴰ ⵜⵉⵖⵔⵉ ⵉ ⵓⵙⵉⵔⴰ ⵃⵎⴰ ⴰⴷ ⴷ ⵉⵎⵛⴰⵛⴽⴰ ⴼ ⵜⵓⵜⵔⴰ ⵏ ⵓⴹⴼⵕ ⵏ ⵜⵙⵎⵉⴳⵍⵜ ⵏ ⵓⵙⴰⴳⴳⵯ ⵜⴰⵎⵙⵉⴽⵓⴷⵜ ⴼ ⵉⵣⵓⵖⴰⵣ ⵏ ⵉⵎⵍⴰⵍⵏ, ⵉⵎⵛⴰⵛⴽⴰ ⴷ ⵓⵙⵉⵔⴰ ⴼ ⵜⵓⵜⵔⴰ ⴰⴷ.

ⵖ ⵎⴰ ⴷ ⵉⵥⵍⵉⵏ ⴷ ⵜⵓⵜⵔⴰ ⵏ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⴼ ⵓⵙⵓⵔⵙ ⵏ ⵉⵙⴳⵏⴰⴼⵏ ⴷ ⵉⵙ ⵓⵊⴰⴷⵏ ⴷ ⵜⵣⵣⵉⴳⵣⵜ ⵉⵜⵜⵓⵎⴽⴰⵏⵏ ⵏ ⵓⴱⴰⵢⵢⵓⵕ ⴷ ⵓⵙⵎⵏⵉⴷ ⵏ ⵜⵏⵓⴼⴰ ⵏ ⵜⴷⵓⵙⵉ, ⵉⴼⴽⴰ ⵓⵙⵉⵔⴰ ⴰⵎⵛⴰⵛⴽⴰ ⵏⵏⵙ ⴰⵎⵣⵡⴰⵔⵓ ⵢⵉⵏⵉ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵓⵙⵔⵓⵙ ⵏ ⵉⵙⴳⵏⴰⴼⵏ ⴷ ⵓⴱⵟⵟⵓ ⵏⵏⵙⵏ ⴰⵊⵢⵓⵖⵕⴰⴼⵉ ⴷⴰⵜ ⵏ ⵓⵣⵣⵔⴰⵢ ⴰⵎⴳⴳⴰⵔⵓ ⵏ ⵉⵎⵔⵙⵉ.

ⵖ ⵜⵣⴷⴰⵢⵜ ⵏ ⵓⵙⵇⵇⵉⵎ ⴷ ⴽⵔⴰ ⵏ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ, ⵉⵥⵕⴰ ⵓⵙⵉⵔⴰ ⵎⵏⵏⴰⵡ ⵉⵏⵇⵇⵉⵙⵏ ⵍⵍⵉ ⴰⵙ ⴷ ⵉⵚⵕⴼ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵡⵏⴹⴰⵏ, ⴳⵉⵙⵏ ⴰⵏⵇⵇⵉⵙ ⴰⵙⴳⴳⵯⵙⴰⵏ ⴷ ⵜⴰⵏⵏⴰⵢⵜ ⵏ ⵓⵙⵇⵇⵉⵎ ⵖ ⵓⵙⵉⴷⴼ ⴰⵙⴳⴰⵡⴰⵏ ⵏ ⵍⵎⵖⵔⵉⴱ ⵖ ⵉⴼⵔⵉⵇⵢⴰ, ⵖⵎⴽ ⵍⵍⵉ ⵉⵥⵕⴰ ⴰⵏⵇⵇⵉⵙ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴼ ⵉⵙⵖⵢⵢⵓⵜⵏ ⵏ ⵊⵕⴰⴷⴰ, ⴷ ⵓⵏⵇⵇⵉⵙ ⴰⵙⴳⴳⵯⵙⴰⵏ ⵏ ⵓⵏⴳⵎⴰⵎ ⴰⵏⴰⵎⵓⵔ ⵉ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ. ⵉⵍⵍⴰ ⵓⵙⵎⴰⵜⴰ ⵏ ⵉⵏⵇⵇⵉⵙⵏ ⴰⴷ ⴼ ⴽⵓ ⵉⴳⵎⴰⵎⵏ ⵏ ⵓⵙⵇⵇⵉⵎ.

ⵜⵍⵍⴰ ⵜⵖⵜⴰⵙⵜ ⴰⴷ ⵉⴳ ⵉⵎⵔⵙⵉ ⵏ ⵜⵣⴷⴰⵢⵜ ⵏ ⵓⵙⵇⵇⵉⵎ ⴷ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ ⵢⴰⵏ ⵖ ⵉⵙⴳⵓⵎⵏ ⵏ ⵜⵙⵎⵓⵏⵉ ⴷ ⵢⵓⵛⴽⴰⵏ ⵏ ⵓⵙⵇⵇⵉⵎ.