ⴰⵙⵉⵡⴹ ⴼ ⵜⵙⵎⵓⵏⵉ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⵢⵏⴰⵙ 28 ⵛⵓⵜⴰⵏⴱⵉⵔ 2020

ⵉⵙⵏⵎⴰⵍⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵜⴰⵙⵎⵓⵏⵉ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⵙⵙ ⵏ ⵡⴰⵢⵏⴰⵙ 28 ⵛⵓⵜⴰⵏⴱⵉⵔ 2020, ⵜⵥⵍⵉ ⵉ ⵓⵖⴰⵡⴰⵙ ⴰⵢⵢⵓⵔⴰⵏ ⴷ ⵓⵏⵎⵍⴰⵙⵙ ⵖ ⵓⵎⵏⵉⴷ ⵏ ⵜⵉⴹⴰⴼ, ⴷ ⵓⵙⵓⵊⴷ ⵏ ⵓⵖⴰⵡⴰⵙ ⴰⵢⵢⵓⵔⴰⵏ ⴷⴰⵜ ⵏ ⵓⵙⵖⵣⵏ ⵏⵏⵙ ⴷⴰⵔ ⵓⵙⵉⵔⴰ ⵏ ⵓⵙⵇⵇⵉⵎ ⵙ ⵓⵎⵛⴰⵛⴽⴰ ⴷ ⵜⵏⴱⴰⴹⵜ ⵙ ⵓⵣⵣⴳⵉⵔ ⴷ ⵜⵙⴷⴷⴰⵔⵜ ⵜⴰⵎⵣⵡⴰⵔⵓⵜ ⵖ ⵓⵎⵏⵏⵉ 262 ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ.

ⵖ ⵜⵉⴹⴰⴼ ⵜⴰⵏⵎⵍⴰⵙⵙⵜ, ⵙⵎⵏⵉⴷⵏⵜ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴰⵣⵣⵔⴰⵢ ⵏⵏⵙⵏⵜ ⵉ ⵜⵉⵔⵎⵉⵜ ⵉⵣⵔⵉⵏ ⵏ ⵓⵙⵇⵇⵉⵎ ⵖ ⵜⵙⵓⵜⵍⵜ ⵏ ⵉⴱⵔⵉⵔ 2020, ⵖ ⵍⵍⴰⵏ ⵉⵎⵔⵙⵉⵡⵏ ⴳⴰⵏⵉⵏ ⵡⵉⵏ ⵜⵉⵣⵉ ⴰⵏⵏ, ⵉⵎⵎⴰⵖ ⴳⵉⵙ ⵓⵙⵇⵇⵉⵎ ⴰⴷ ⵉⴹⴼⵕ, ⵙ ⵉⵙⵇⵙⵉⵜⵏ ⵍⵍⵉ ⴷ ⵉⴹⴼⵕ ⵓⵎⴹⴰⴽⴰⵕ, ⵉⵅⵎⵎⵉⵎⵏ ⵏ ⵡⴰⵎⴰⵏ ⴰⵎⴰⵜⴰⵢ ⴰⵏⴰⵎⵓⵔ ⵖ ⵉⴳⵔⴰⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵓⵙⴰⵏⵏ ⴷ ⵉⵣⵔⴼⴰⵏⵏ.

ⵉ ⵓⵙⵖⵓⴷⵓ ⴷ ⵓⵙⵏⵎⴰⵍⴰ ⵏ ⵜⵡⵓⵔⵉ, ⵎⴷⴰⵡⴰⵍⵏ ⵉⵎⴷⵔⴰⵡⵏ ⵖ ⵜⵙⵎⵓⵏⵉ ⴰⴷ ⵖ ⵉⵎⵔⵙⵉ ⵏ ⵓⵙⵓⵊⴷ ⵏ ⵓⵙⵏⴼⴰⵔ ⵏ ⵓⵖⴰⵡⴰⵙ ⴰⵢⵢⵓⵔⴰⵏ ⵍⵍⵉ ⴷ ⵢⵓⵛⴽⴰⵏ ⴷ ⴰⵢⵍⵍⵉ ⵜⵔⴰ ⵜⵉⵣⵉ ⴰⴷ, ⵖⵉⴽ ⴰⵏⵏ ⴰⴼ ⵉⵍⵍⴰ ⵓⵙⵜⴰⵢ ⵏ ⵉⴳⵔⴰⵏ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵜⴼⵍⵍⴰⵃⵜ ⴷ ⵜⴷⵓⵙⵉ ⴷ ⵜⴳⵯⵏⵙⴰⵏⵜ ⵖ ⵉⴳⵔⴰⵏ ⴼ ⵔⴰⴷ ⵜⵉⵍⵉ ⵜⵉⴹⴰⴼ ⵖ ⵡⴰⵢⵢⵓⵔ ⵏ ⴽⵟⵓⴱⵕ.

ⵖ ⵜⵉⴹⴰⴼ ⵜⴰⵢⵢⵓⵔⴰⵏⵜ ⵉⵥⵍⵉⵏ ⵙ ⵉⵙⵇⵙⵉⵜⵏ ⵏ ⵜⵙⵔⵜⵉⵜ ⵜⴰⵎⴰⵜⴰⵢⵜ, ⵍⵍⵉ ⴼ ⵔⴰⴷ ⵉⵔⴰⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵉⵍⵍⴰ ⵓⵎⵛⴰⵛⴽⴰ ⴰⴷ ⵜⵉⵍⵉ ⴼ:”ⵜⴰⵙⵔⵜⵉⵜ ⵜⵓⵏⴱⵉⴹⵜ ⵖ ⵜⵣⵣⵉⴳⵣⵜ ⵏ ⵓⵙⵓⵔⵙ ⵏ ⵓⴱⴰⵢⵢⵓⵕ”, ⵉⵖ ⵉⵍⵍⴰ ⵓⵙⵖⵣⵏ ⵏⵏⵙ ⵉⴳⴳⵓⵔⴰⵏ ⴷⴰⵔ ⵓⵙⵉⵔⴰ ⵙ ⵓⵎⵛⴰⵛⴽⴰ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ, ⵔⴰⴷ ⵜⴳ ⴰⵙⵇⵙⵉ ⴰⵙⴳⵓⵎⴰⵏ ⴷ ⵉⴹⴼⵕ ⵓⵎⴹⴰⴽⴰⵕ.

ⵖ ⵜⵣⴷⴰⵢⵉⵏ ⵏ ⵓⵙⵇⵇⵉⵎ ⴷ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ, ⵥⵕⴰⵏ ⵉⵎⴷⵔⴰⵡⵏ ⵖ ⵜⵙⵎⵓⵏⵉ ⴰⴷ ⵙⵉⵏ ⵉⵏⵇⵇⵉⵙⵏ ⵏ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵡⵏⴹⴰⵎ:

- ⴰⵎⵣⵡⴰⵔⵓ: ⴰⵏⵇⵇⵉⵙ ⴰⵙⴳⴳⵯⵙⴰⵏ ⵏ 2019 ⵖ ⵉⵍⵍⴰ ⵓⵣⵣⵔⴰⵢ ⵏ ⵓⵙⵓⵔⵙ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵡⵏⴹⴰⵏ ⵏ 2019, ⵙ ⵉⵙⵖⵍⴰⴼ ⵍⵍⵉ ⵔⴰⴷ ⵢⴰⵡⵙ ⵖ ⵓⴼⵓⵖ ⵖ ⵜⴰⵙⵙⴰⵙⵜ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ ⵉⵣⴷⵉⵏ ⴷ ⵓⴱⴰⵢⵢⵓⵕ ⵏ ⴽⵓⴼⵉⴷ 19 ⴷ ⵓⵙⵓⵔⵙ ⴰⴷⵎⵙⴰⵏ ⴷ ⵓⵏⴰⵎⵓⵏ ⵏ ⵜⵙⴳⴳⵉⵡⵉⵏ ⵃⴰⴷⴰⵏⵉⵏ ⵜⵉⵖⵔⵎⵉⵏ ⵏ ⵙⴱⵜⴰ ⴷ ⵎⵍⵉⵍⵉⵢⵢⴰ ⵜⵜⵢⴰⵎⴰⵥⵏⵉⵏ ⵖⵎⴽ ⴰⵏⵏ ⴷ ⵉⵙⴳⵓⵎⵏ ⵣⴷⵉⵏⵉⵏ ⴷ ⴽⵓ ⵜⵉⵍⴰⵍ ⵏ ⵉⵏⴳⵎⴰⵎⵏ ⵏ ⵓⵙⵇⵇⵉⵎ;

- ⵡⵉⵙ ⵙⵉⵏ: ⵉⴳⴰ ⵜⴰⵏⵏⴰⵢⵜ ⵏ ⵓⵙⵇⵇⵉⵎ ⴼ ⵉⵎⵔⵙⵉ ⵏ ⵓⵙⵉⴷⴼ ⴰⵙⴳⴰⵡⴰⵏ ⵏ ⵍⵎⵖⵔⵉⴱ ⵖ ⵉⴼⵔⵉⵇⵢⴰ ⵍⵍⵉ ⵉⵙⵓⵊⴰⴷ ⵓⵙⵇⵇⵉⵎ ⵉⵍⵉⵏ ⴳⵉⵙ ⵉⵎⵏⴰⴷⵏ ⵏ ⵓⵙⵉⴷⴼ ⴰⴷ ⴷ ⵜⵎⴰⵎⴽⵉⵏ ⵏ ⵜⴷⵔⴰⵡⵜ ⴷ ⵜⴱⵔⵉⴷⵉⵏ ⵏ ⵓⵙⴷⵓⵙ ⵏⵏⵙ.

ⵥⵕⴰⵏ ⵉⵎⴷⵔⴰⵡⵏ ⵖ ⵜⵙⵎⵓⵏⵉ ⴰⴷ ⵓⵍⴰ ⴰⵏⵇⵇⵉⵙ ⴰⵙⴳⵓⵎⴰⵏ ⵍⵍⵉ ⵉⵙⵓⵊⴰⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴼ ⵉⵙⵖⵢⵢⵓⵜⵏ ⵏ ⵊⵕⴰⴷⴰ, ⴳⵉⵙ ⵉⵙⵉⵙⴼⵉⵡⵏ ⴼ ⵉⵎⵏⵜⵉⵍⵏ ⵉⵙⵓⵖⴰⵍ ⵏ ⵓⵏⵇⵇⵉⵙ ⴷ ⵉⵡⵜⵜⴰⵙⵏ ⵏⵏⵙ ⴷ ⵓⵎⵏⴰⴹ ⵏ ⵉⵙⵖⵢⵢⵓⵜⵏ ⴷ ⵜⵣⵣⵉⴳⵣⵜ ⵏⵏⵙⵏ ⵜⴰⴽⵕⵓⵏⵓⵍⵓⵊⵉⵜ ⴷ ⵉⵙⵡⵓⴷⴷⵓⵜⵏ ⵍⵍⴰⵏⵉⵏ ⴷ ⵜⵡⵓⵔⵉ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵙⵇⵇⵉⵎⵜ ⵏⵏⵙ ⵜⴰⵏⵎⵏⴰⴹⵜ ⴷ ⵜⴰⵏⵏⴰⵢⵉⵏ ⵍⵍⵉ ⵉⵙⵎⵏⵉⴷ ⴼ ⵓⵎⵚⴰⵕⴰⴹ ⵏ ⵡⵉⵍⵍⵉ ⵜⵛⵓⴽⴽⴰ ⵜⵣⵔⴼⵜ ⴷ ⵜⵎⵔⴳⴰⵍ ⵏⵏⵙ ⴷ ⵜⵙⵖⵍⴰⴼ ⵏⵏⵙ ⵜⵉⵎⴰⵜⴰⵢⵉⵏ.

ⵉⵥⵕⴰ ⵎⴰⵙⵙ ⴰⵏⵙⵙⵉⵅⴼ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴰⵏⵇⵇⵉⵙ ⴰⵙⴳⴳⵯⵙⴰⵏ ⵍⵍⵉ ⵉⵙⵓⵊⴰⴷ ⵓⵏⴳⵎⴰⵎ ⴰⵏⴰⵎⵓⵔ ⵉ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ ⵖ ⵍⵍⴰⵏ ⵉⵙⴳⵓⵎⵏ ⵣⴷⵉⵏⵉⵏ ⴷ ⵓⵣⵣⵔⴰⵢ ⵏ ⵓⵙⵓⵔⵙ ⵏ ⵓⵙⴳⵓⴼⵙⵓ ⴷ ⵜⵣⵣⵉⴳⵣⵜ ⵏⵏⵙ ⵖ ⵓⵙⵡⵉⵔ ⴰⵏⴰⵎⵓⵔ, ⴷ ⵉⵙⴳⵓⵎⵏ ⵣⴷⵉⵏⵉⵏ  ⴷ ⵜⵡⵓⵔⵉ ⵏ ⵓⵏⴳⵎⴰⵎ ⴷ ⵜⵉⵍⴰⵍ ⵏⵏⵙ.