ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⴰⵙⵉⵡⴹ ⴼ ⵜⵙⵎⵓⵏⵉ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, 28 ⵉⴱⵔⵉⵔ 2020
ⵉⵙⴽⵔ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵜⴰⵙⵎⵓⵏⵉ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⵙⵙ ⵏ ⵓⵙⵉⵏⴰⵙ 28 ⵉⴱⵔⵉⵔ 2020, ⵜⵥⵍⵉ ⵉ ⵓⵎⴹⴰⴽⴰⵕ ⴼ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ ⴷ ⵓⵙⵏⵎⴰⵍⴰ ⵏ ⵜⵡⵓⵔⵉⵡⵉⵏ ⵏⵏⵙ.
ⵖ ⵓⵙⵏⵎⴰⵍⴰ ⵏ ⵜⵖⵉⵎⵉⵜⵉⵏ ⵥⵍⵉⵏⵉⵏ ⵙ ⵉⵙⵇⵙⵉⵜⵏ ⵉⵎⵉⵡⴰⵏⵏ ⵉⵏⵎⵍⴰⵙⵙⵏ, ⵙⵙⴽⵜⵉⵏ ⴷ ⵉⵎⴷⵔⴰⵡⵏ ⴰⵜⵉⴳ ⵏ ⵉⴳⵔⴰⵏ ⴼ ⵉⵍⵍⴰ ⵓⵎⵛⴰⵛⴽⴰ ⴰⴷ ⵉⵍⵉⵏ ⵖ ⵜⵖⵉⵎⵉⵜⵉⵏ ⵜⵉⵏⵎⵍⴰⵙⵙⵉⵏ ⵙ ⵉⵙⵇⵙⵉⵜⵏ ⵍⵍⵉ ⴷ ⵉⴹⴼⵕ ⵓⵎⴹⴰⴽⴰⵕ, ⴰⵢⵍⵍⵉ ⵉⴳⴰⵏ ⵜⴰⵎⵔⴰⵔⵓⵜ ⵏ ⵜⵎⵙⵓⵜⵍⵜ ⴰⴷ ⵉⵥⵍⵉⵏ ⴷ ⵉⵅⵎⵎⵉⵎⵏ ⵏ ⵓⵎⵏⴰⴷ ⴰⵎⴰⵜⴰⵢ ⴰⵏⴰⵎⵓⵔ.
ⵙⴰⵡⵍⵏ ⵉⴼⵔⴷⴰⵙ ⵏ ⵓⵙⵇⵇⵉⵎ ⵎⴰⵙ ⴷ ⵉⵇⵇⴰⵏ ⴰⴷ ⵜⵣⵣⵉⴳⵣ ⵜⵡⵓⵔⵉ ⵏ ⵜⵉⴹⴰⴼ ⵙ ⴰⴷ ⵜⵉⵍⵉ ⵜⵏⴰⴼⵓⵜ ⵜⴰⵎⴰⵜⵜⵓⵢⵜ ⵏ ⵜⵎⵓⵔⵜ ⵖ ⵓⴳⵯⵏⵙ ⵏ ⵜⵎⵙⴽⵔⵜ ⵜⴰⴱⵕⵍⴰⵎⴰⵏⵉⵜ ⵖ ⵉⴳⵔⴰⵏ ⵏ ⵓⵣⵣⵔⴰⴼ ⴷ ⵜⵉⴹⴰⴼ, ⴱⴷⴷⵏ ⴼ ⵜⵉⵕⵡⵉ ⵏ ⵜⵉⴹⴰⴼ ⵉⵍⵍⴰⵏ ⵙ ⵓⵣⵓⵣⵣⵔ ⵓⵙⵔⵉⴷ ⵏ ⵜⵖⵉⵎⵉⵜⵉⵏ ⵏ ⵜⵙⵇⵇⵉⵎⵉⵏ ⴷ ⵡⴰⵜⵉⴳ ⵏ ⵉⵎⵔⵙⵉⵡⵏ ⴼ ⵜⵍⵍⴰ ⵜⵉⴹⴰⴼ ⵜⴰⵏⵎⵍⴰⵙⵙⵜ.
ⵣⵎⵎⵉⵎⵏ ⵉⵎⴷⵔⴰⵡⵏ ⴰⵎⵓⵔⵙ ⵏ ⵜⵎⵉⵜⴰⵔ ⵜⵉⵎⵣⵡⵓⵔⴰ ⵏ ⵓⵣⵣⵔⴰⵢ ⵏ ⵓⵏⴳⵔⴰⵡ ⵏ ⵉⵙⵇⵙⵉⵜⵏ ⵉⵎⵉⵡⴰⵏⵏ ⵍⵍⵉ ⵉⵙⵙⵏⵜⵉ ⵓⵙⵇⵇⵉⵎ ⴰⵔ ⵙⵔⵙ ⵉⵙⴽⴰⵔ, ⵙ ⵜⵖⴰⵔⴰⵙⵜ ⵏ ⵉⵙⵇⵙⵉⵜⵏ ⵥⵍⵉⵏⵉⵏ ⵙ ⵉⴳⵔⴰⵏ, ⵍⵍⵉ ⴷ ⵉⴹⴼⵕ ⵓⵎⴹⴰⴽⴰⵕ, ⴰⵢⵍⵍⵉ ⴷ ⵢⵉⵡⵉⵏ ⴰⵙⵡⵓⴷⴷⵓ ⵓⵏⵥⵉⵥ ⵏ ⵡⴰⴽⵓⴷ ⴷ ⵜⵓⵙⵙⵏⴰ ⵎⵇⵇⵓⵔⵏ ⵏ ⵢⵉⴳⵔ ⴼ ⵍⵍⴰⵏ ⵉⵙⵇⵙⵉⵜⵏ.
ⵖ ⵜⵙⵎⵓⵏⵉ ⴰⴷ, ⵉⵍⵍⴰ ⵓⵎⴹⴰⴽⴰⵕ ⵓⵍⴰ ⴼ ⵓⵣⵣⵔⴰⴼ, ⵉⵍⵍⴰ ⵓⵎⵛⴰⵛⴽⴰ ⵎⴰⵙ ⴷ ⵉⵇⵇⴰⵏ ⴰⴷ ⵜⵉⵍⵉ ⵜⵡⵓⵔⵉ ⵖ ⵓⵙⵔⵙ ⵏ ⵉⵣⵣⵔⴰⴼⵏ ⵍⵍⵉ ⵜⵔⴰ ⵜⴼⵔⴽⴰ ⴰⴷ, ⴷⴼⴼⵉⵔ ⵏ ⵓⵎⴹⴰⴽⴰⵕ ⴷ ⵓⵙⵏⴼⵍ ⵏⵏⵙⵏ ⵉⵖ ⵙⵔⵙ ⵙⵖⴰⵡⵙⴰⵏ. ⵉⵇⵇⴰⵏ ⴷ ⵓⵍⴰ ⴰⴷ ⵜⵙⵎⴷ ⵜⴱⵔⵉⴷⵜ ⵜⴰⵣⵣⵔⴰⴼⵜ ⵉⵍⵍⴰⵏ ⵖ ⵓⵎⴰⴳⵔⴰⴷ 81 ⵏ ⵓⴷⵓⵙⵜⵓⵔ, ⵜⵉⵏ ⵉⵙⵏⴼⴰⵔⵏ ⵏ ⵉⵎⵕⵚⵓⵎⵏ ⵙ ⵉⵙⵍⴳⵏⵏ.
ⵖ ⵓⵏⴳⵔⴰⵡ ⴰⵣⵣⵔⴰⴼ ⵏ ⵜⴷⵓⵙⵉ, ⵙⴷⴷⵉⴷⵏ ⵉⵎⴷⵔⴰⵡⵏ ⵎⴰⵙ ⴷ ⵉⵇⵇⴰⵏ ⴰⴷ ⵜⴰⵡⵙ ⵜⵎⵔⵙⵍⵜ ⵖ ⵓⵙⵖⵔⵜ ⵏ ⵓⴹⵕⵉⵚ ⴰⵣⵣⵔⴰⴼ ⴷ ⵓⵣⵣⵔⴰⵢ ⵏⵏⵙ ⴷ ⵓⵙⴽⵔ ⵏ ⵜⵣⵔⴰⵡⵉⵏ ⴼⵍⵍⴰⵙ, ⵙ ⵓⵎⵛⴰⵡⴰⵕ ⴷ ⵉⵎⵙⴽⴰⵔⵏ ⵖ ⵢⵉⴳⵔ ⴰⴷ.
ⵖ ⵓⵙⴷⵓⵙ ⵏ ⵓⵏⵏⵓⵕⵥⵎ ⵏ ⵜⵎⵔⵙⵍⵜ ⴼ ⵡⴰⵎⵓⵏ, ⵜⵎⴷⴰⵡⴰⵍ ⵜⵙⵎⵓⵏⵉ ⴼ ⵓⵣⵣⵔⴰⵢ ⵏ ⵓⵙⴰⵜⵉ ⴰⵣⵣⵔⴰⴼ ⵏ ⵜⵓⵜⵔⵉⵡⵉⵏ ⴷ ⵜⵓⵍⴽⵉⵎⵉⵏ ⴷ ⵜⵎⵓⴽⵔⵉⵙⵉⵏ ⵏ ⵓⵎⴰⵖⵏⵓ ⵉⵍⵍⴰⵏ ⵖ ⵜⵎⵙⴽⴰⵔ, ⴳⴰⵏ ⵉⵙⵖⵍⴰⴼ ⵍⵍⵉ ⵙ ⵜⴼⴼⵓⵖ ⵜⵉⵏⴰⵡⵜ ⵜⴰⵎⵙⵙⴰⵏⵜ ⵍⵍⵉ ⵉⵙⵏⵎⴰⵍⴰ ⵓⵙⵇⵇⵉⵎ ⵖ ⴱⵕⴰⵢⵕ ⵉⵣⵔⵉⵏ, ⵉⵖⵔ ⴰⴷ ⵢⵉⵍⵉ ⵓⵎⴹⴰⴽⴰⵕ ⵉⴷⵔⴰⵏ ⴷⴰⵔ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⵃⵎⴰ ⴰⴷ ⵉⵍⵉⵏ ⵉⵎⵓⴽⵏⵏ ⵉⵜⵜⵓⵙⴰⴳⴳⴰⵍⵏ.
ⵜⵙⴰⵡⵍ ⵜⵙⵎⵓⵏⵉ ⵓⵍⴰ ⴼ ⵓⵙⵏⵎⴰⵍⴰ ⵏ ⵜⵖⵉⵎⵉⵜ ⵜⵓⵙⵎⵉⴷⵜ ⵏ ⵓⵣⵣⵔⴰⴼ ⴰⵙⵙ ⵏ ⵓⴽⵡⴰⵙ 30 ⵉⴱⵔⵉⵔ ⵖ ⵜⵙⵔⴰⴳⵜ ⵜⵉⵙ ⵙⵏⴰⵜ ⵏ ⵜⴷⴳⴳⵯⴰⵜ. ⵍⵍⴰⵏ ⵖ ⵓⵖⴰⵡⴰⵙ ⵏ ⵜⵡⵓⵔⵉ ⵏⵏⵙ ⴽⵕⴰⴹ ⵉⵙⵏⴼⴰⵔⵏ ⵏ ⵉⵙⵍⴳⵏⵏ, ⵔⴰⴷ ⴳⵉⵙ ⵢⵉⵍⵉ ⵓⵙⵖⵣⵏ ⵏ ⵙⵉⵏ ⵉⵎⵕⵚⵓⵎⵏ ⵙ ⵓⵙⵍⴳⵏ ⴼ ⵓⵙⵔⵙ ⵏ ⵉⴱⴹⵉⵢⵏ ⵥⵍⵉⵏⵉ ⵙ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⴷ ⵜⵎⵙⴽⴰⵔ ⵏ ⵓⵙⵉⵡⴹ ⵏⵏⵙⵏ, ⵡⵉⵙ ⵙⵉⵏ ⵉⵥⵍⵉ ⵙ ⵓⵣⵔⴰⵢ ⵏ ⵓⵙⴽⵯⴼⵍ ⵏ ⵉⵙⵙⵥⵕⴼⵏ ⵏ ⴱⵕⵕⴰ, ⴷ ⵓⵙⵏⴼⴰⵔ ⵉⵥⵍⵉⵏ ⵙ ⵓⵙⵔⵙ ⵏ ⵉⴱⴹⵉⵢⵏ ⵥⵍⵉⵏⵉⵏ ⵙ ⵜⵣⵣⵉⴳⵣⵜ ⵏ ⵉⵏⴳⵎⴰⵎⵏ ⵏ ⵜⵎⵙⵙⵓⴳⵓⵔⵜ ⵏ ⵜⵎⵙⵙⵓⵔⵉⵏ ⵏ ⵜⵡⵉⵣⵉ ⴷ ⵜⵎⴰⵎⴽⵉⵏ ⵏ ⵓⵙⴽⴰⵔ ⵏ ⵜⵙⵎⵓⵏⴰⵢ ⵏⵏⵙⵏⵜ ⵜⵉⵎⴰⵜⴰⵢⵉⵏ ⵖ ⵜⵉⵣⵉ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ.