ⴰⵙⵉⵡⴹ ⴼ ⵜⴷⵔⴰⵡⵜ ⵏ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴳ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ, ⵜⴰⵙⵓⵜⵍⵜ 28, 1 ⴰⵔ 10 ⵢⵓⵏⵢⵓ 2023
ⴰⵔ ⵉⴷⵔⵔⵓ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⵙ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴳ ⵜⵙⵓⵜⵍⵜ ⵜⵉⵙ 28 ⵏ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ ⵍⵍⵉ ⵜⵙⵏⵎⴰⵍⴰ ⵜⵎⴰⵡⴰⵙⵜ ⵏ ⵉⵄⵔⵔⵉⵎⵏ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ ⵙⴳ 1 ⴰⵔ 11 ⵢⵓⵏⵢⵓ 2023 ⵙ ⵜⵏⴰⵔⴰ ⵜⴰⵎⴰⵜⵜⵓⵢⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚⴰ ⴰⴷ ⵜ ⵉⵏⵚⵕ ⵕⴱⴱⵉ, ⵙ ⵢⴰⵏ ⵓⵙⴼⵙⵔ ⵢⵓⵇⵇⵔⵏ ⴰⵚⴽⵓ ⵏ ⵓⵙⵖⵉⵎ ⵏ ⵓⴱⵕⵍⴰⵎⴰⵏ ⴷ ⵓⴷⵖⴰⵔ ⵏⵏⵙ ⴰⴷⵙⵜⴰⵔ. ⵍⵍⵉⵖ ⵉⵍⵍⴰ ⵉⴼⵔⴰⴽ ⵙ ⵜⵉⵍⴰⵍⵜ ⵏ ⵜⴷⵍⵙⴰ ⴷ ⵜⵎⴰⵙⵙⴰⵏⵉⵏ ⴷ ⵓⵙⵎⵖⵔ ⵏ ⵓⴼⵔⴰⴽ ⴰⵏⴰⵎⵓⵔ ⴷ ⵓⵙⵎⵖⵔ ⵏ ⵡⴰⵎⵓⵏ.
ⵜⴳⴰ ⵜⴷⵔⴰⵡⵜ ⴰⴷ ⵜⵉⵙ ⵙⵏⴰⵜ ⵉ ⵓⵙⴷⵓⵙ ⵏ ⵓⵎⵎⵉⵥⵏ ⵏ ⵜⵡⵉⵣⵉ ⵜⴰⴱⵕⵍⴰⵎⴰⵏⵉⵜ ⴳ ⵜⵙⵓⵜⵍⵜ ⵉⵣⵔⵉⵏ ⵍⵍⵉ ⵢⵉⵡⵙⵏ ⵉ ⵜⵎⵔⵙⵍⵜ ⵜⴰⵣⵣⵔⴰⴼⵜ ⴳ ⵓⵙⵎⵖⵔ ⵏ ⵓⵏⵏⵓⵕⵥⵎ ⵏⵏⵙ ⴷ ⵓⵎⵢⴰⵡⴰⴹ ⵏⵏⵙ ⴰⴽⴷ ⴰⴳⴷⵓⴷ ⵉⵥⵉⵍⵏ ⵍⵍⵉ ⴷ ⵉⵔⵣⴰⴼⵏ ⴰⵙⴼⵙⵔ ⵙⵍⴰⵡⵏ ⴰⴽⴽⵯ ⵉⵎⴰⵙⵙⴰⵏⵏ ⴷ ⵉⵎⴰⵔⴰⵜⵏ ⴷ ⵉⵎⵖⵔⴰⵏ ⴷ ⵉⵎⵣⵔⴰⵡ ⴷ ⵉⵏⵍⵎⴰⴷⵏ ⵏ ⵜⵉⵏⵎⴰⵍ ⴷ ⵜⵙⴷⴰⵡⵉⵢⵉⵏ ⴷ ⵉⵙⵉⵏⴰⴳⵏ ⵉⵎⴰⵜⵜⵓⵢⵏ, ⵍⵍⵉ ⴳⴰⵏⵉⵏ ⵜⴰⵔⵙⵍⵜ ⵏ ⵜⴳⵎⵉ ⵜⴰⵎⴰⵜⴰⵢⵜ ⴷ ⵓⵙⵕⵚⵓ ⵏ ⵜⵔⵙⴰⵍ ⵏ ⵡⴰⵎⵓⵏ ⵏ ⵜⵓⵙⵙⵏⴰ ⴷ ⵓⵙⴷⵓⵙ ⵏ ⵜⵣⵡⵉⵔⵉ ⵜⴰⵎⵖⵔⵉⴱⵉⵜ ⴷ ⵓⵙⵏⵥⵕ ⴰⴷⵍⵙⴰⵏ ⴰⴳⵔⴰⵖⵍⴰⵏ ⵏ ⵜⴳⵍⴷⵉⵜ.
ⵎⴽ ⴰⵙⴳⴳⵯⴰⵙ ⵉⵣⵔⵉⵏ, ⵔⴰⴷ ⵉⵥⵕ ⵓⴳⴷⵓⴷ ⴰⵙⴼⵙⵔ ⴰⴱⵕⵍⴰⵎⴰⵏⵉ ⵙ ⵉⴷⵍⵉⵙⵏ ⴷ ⵜⴻⵜⴳⴰⵔⵉⵏ ⴷ ⵉⵎⴰⵙⵙⵏ ⵉⵍⵉⴽⵕⵓⵏⵉⵢⵏ ⵍⵍⵉ ⵜⵙⴽⵔ ⵜⵎⵔⵙⵍⵜ ⵜⴰⵣⵣⵔⴰⴼⵜ ⴳ ⵓⵙⴰⵜⵉ ⵏ ⵜⵙⵎⵉⴳⴰⵍ ⵏⵏⵙ, ⴷ ⵓⵙⴷⵓⵙ ⵏ ⵉⵣⵎⴰⵣ ⴷ ⵉⵙⵓⵔⵙⵏ ⴳ ⵉⵏⵢⴰⵍⴽⵎⵏ ⵏⵏⵙ ⵉⴳⵯⵏⵙⴰⵏⵏ ⴷ ⵡⵉⵏ ⴱⵕⵕⴰ, ⵖⵎⴽ ⴰⵏⵏ ⴷ ⵉⵙⵉⵙⴼⵉⵡⵏ ⵍⵍⵉ ⵔⴰⴷ ⵙⵎⵏⵉⴷⵏ ⵉⵎⵙⵡⵓⵔⵉⵢⵏ ⵏ ⵓⴱⵕⵍⴰⵎⴰⵏ.
ⵜⵍⵍⴰ ⵜⵎⵙⴽⵔⵜ ⴰⴷ ⵜⴰⴱⵕⵍⴰⵎⴰⵏⵉⵜ ⴳ ⵓⵏⵎⵓⵇⵇⴰⵔ ⴰⴷ ⴰⴷⵍⵙⴰⵏ ⴰⵙⴳⴳⵯⵙⴰⵏ ⵉⵙⵜⴰⵡⵀⵎⵎⴰⵏ ⵍⵍⵉ ⵢⵉⵡⵉⵏ ⴰⵅⵎⵎⴻⵎ ⵏ ⵡⴰⵎⵓⵏ, ⴳ ⵓⵙⴰⵜⵉ ⵏ ⵜⵙⵔⵜⵉⵜ ⵏ ⵓⴱⵕⵍⴰⵎⴰⵏ ⴳ ⵎⴰⴷ ⵉⵥⵍⵉⵏ ⵙ “ⵓⴱⵕⵍⴰⵎⴰⵏ ⵉⵏⵏⵓⵕⵥⵎⵏ” ⵍⵍⵉ ⵉⵡⴰⵜⵜⵙⵏ ⵜⴰⵎⴰⴼⴰⵡⵜ ⴷ ⵓⵙⴽⵔ ⵏ ⵓⵣⵔⴼ ⴰⴷⵙⵜⴰⵔ ⴳ ⵎⴰⴷ ⵉⵥⵍⵉⵏ ⵙ ⵜⵎⵓⵛⴰ, ⴷ ⵓⵙⵔⵅⵓ ⵏ ⵓⵙⵙⵏ ⵏ ⵓⴱⵕⵍⴰⵎⴰⵏ ⴳ ⵎⴰⴷ ⵉⵥⵍⵉⵏ ⵙ ⵓⵚⴽⵓ ⵏⵏⵙ ⴷ ⵜⵙⵎⵉⴳⴰⵍ ⵏⵏⵙ ⵜⵉⴷⵙⵜⴰⵔⵉⵏ ⴷ ⵉⵏⴳⵎⴰⵎⵏ ⵏⵏⵙ, ⴰⵢⵍⵍⵉ ⵔⴰⴷ ⵉⵙⴷⵓⵙ ⴰⴼⵔⴰⴽ ⴰⵙⵔⵜⴰⵏ ⵏ ⵉⵏⵎⵓⵔⴰⵏ ⴷ ⵜⵉⵍⵉⵜ ⵜⴰⵎⵔⵙⵍⴰⵏⵜ ⴷ ⵓⵅⵎⵎⴻⵎ ⴳ ⵜⵖⴰⵡⴰⵙ ⵜⴰⵎⴰⵜⴰⵢⵜ ⴷ ⵓⵙⵎⵖⵔ ⵏ ⵜⴷⵍⵙⴰ ⴷ ⵜⵎⵙⴽⵔⵜ ⵜⴰⴷⵉⵎⵓⵇⵔⴰⵟⵉⵜ ⴳ ⵜⵎⴰⵣⵉⵔⵜ ⵏⵏⵖ.