ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵏⴼⴰⵔ ⵏ ⵓⵙⵍⴳⵏ 27.22 ⴼ ⵓⵙⴼⵍⵙ ⴰⴷⵓⵙⴰⵏ ⴰⴷⵙⵍⴰⵏ
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵢⵏⴰⵙ 8 ⵏⵓⵡⴰⵏⴱⵉⵔ 2022, ⴰⵙⵏⴼⴰⵔ ⵏ ⵓⵙⵍⴳⵏ 27.22 ⵉ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ 65.00 ⵉⴳⴰⵏ ⴰⵙⵍⴳⵏ ⵏ ⵓⵙⴼⵍⵙ ⴰⴷⵓⵙⴰⵏ ⴰⴷⵙⵍⴰⵏ, ⴳ ⵜⵖⵉⵎⵉⵜ ⵜⴰⵣⵣⵔⴰⴼⵜ ⵍⵍⵉ ⵉⵙⵙⵉⵅⴼ ⵎⴰⵙⵙ ⵎⵓⵃⴰⵎⵎⴰⴷ ⵓⵣⵣⵉⵏ ⴰⵎⴰⵔⵉ ⵏ ⵓⵏⵙⵙⵉⵅⴼ, ⵉⵃⴰⴹⵕ ⵎⴰⵙⵙ ⵅⴰⵍⵉⴷ ⴰⵢⵜ ⵟⵟⴰⵍⴱ ⴰⵎⴰⵡⵙⴰⵙ ⵏ ⵜⴷⵓⵙⵉ ⴷ ⵓⴼⵔⴰⴳ ⴰⵏⴰⵎⵓⵏ, ⴷ ⵎⴰⵙⵙ ⵎⵓⵚⵟⴰⴼⴰ ⴱⴰⵢⵜⴰⵙ ⴰⵎⴰⵡⵙⴰⵙ ⴰⵎⴰⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵜⵣⴷⴰⵢⵉⵏ ⴰⴽⴷ ⵓⴱⵕⵍⴰⵎⴰⵏ ⴰⵎⵙⵙⵉⵅⵍ ⴰⵎⴰⴷⴷⵓⴷ ⵙ ⵉⵙⵎ ⵏ ⵜⵏⴱⴰⴹⵜ.
ⵉⴳⴰ ⵓⵙⵏⴼⴰⵔ ⴰⴷ ⵏ ⵓⵙⵍⴳⵏ ⵡⴰⴷ ⵉⵙⵜⴰⵡⵀⵎⵎⴰⵏ ⵉⴽⵛⵎⵏ ⴳ ⵓⵙⴰⵜⵉ ⵏ ⵓⵙⴰⵡⵓⵔ ⵏ ⵓⴼⵔⴰⴳ ⴰⵏⴰⵎⵓⵏ, ⵉⵣⴷⵉ ⴷ ⵓⵙⵍⴳⵏ ⴰⵙⴰⵜⵉ 09.21 ⴼ ⵓⵙⵎⴰⵜⴰ ⵏ ⵓⴼⵔⴰⴳ ⴰⵏⴰⵎⵓⵏ ⵉ ⵎⴰⵕⵕⴰ ⵏ ⵉⵎⵖⵔⵉⴱⵉⵢⵏ ⵍⵍⵉ ⵉⴳⴰⵏ ⵜⴰⴳⵔⴰⵡⵍⵍⴰ ⵜⴰⵏⴰⵎⵓⵏⵜ ⵏ ⵓⵙⵖⵓⴷⵓ ⵏ ⵜⵓⴷⵔⵜ ⵏ ⵉⵎⵖⵔⵉⴱⵉⵢⵏ.
ⵉⴱⴷⴷ ⵓⵙⵍⴳⵏ ⴰⴷ ⴼ ⵉⵙⵡⴰⵍⴰⵢⵏ ⵉⴳⵍⴷⴰⵏⵏ ⵉⵎⴰⵢⵢⵓⵢⵏ, ⵉⴱⴷⴷ ⵓⵍⴰ ⴼ ⴽⵕⴰⴹⵜ ⵜⵔⵙⴰⵍ ⴳⴰⵏⵉⵏ: ⴰⵙⴽⵔ ⵏ ⵓⵙⴰⵡⵓⵔ ⵏ ⵓⴼⵔⴰⴳ ⴰⵏⴰⵎⵓⵏ ⴷ ⵓⵎⵓⴽⵏ ⵏ ⵓⵏⴳⵔⴰⵡ ⴰⴷⵓⵙⴰⵏ ⵙ ⵓⵙⵎⴰⵜⴰ ⵏ ⵓⵙⴼⵍⵙ ⵓⵛⵛⵉⵍ ⴰⴷⵙⵍⴰⵏ ⵙⴳ ⵜⵎⵓⴹⴰⵏ, ⴰⵙⵎⴰⵜⵜⵉ ⵙⴳ ⵓⵏⴳⵔⴰⵡ ⵏ ⵜⵡⵉⵣⵉ ⵜⴰⵙⵏⵉⵊⵊⵉⵜ ⵙ ⵓⵏⴳⵔⴰⵡ ⵏ ⵓⵙⴼⵍⵙ ⵓⵛⵛⵉⵍ ⴰⴷⵙⵍⴰⵏ ⵙⴳ ⵜⵎⵓⴹⴰⵏ, ⴰⴼⵔⴰⴳ ⵏ ⵓⵎⵎⵉⵥⵏ ⵉ ⵚⴰⵃⴰ ⵏ ⵜⴷⴰⵍⵡⵉⵏ ⵎⵓ ⵉⵚⴰⵃⴰ ⵓⵏⴳⵔⴰⵡ ⵏ ⵜⵡⵉⵣⵉ ⵏ ⵜⵙⵏⵉⵊⵊⵉⵜ.
ⵉⵍⵍⴰ ⴳ ⵓⵙⵍⴳⵏ ⴰⴷ ⴰⵚⴰⵃⴰ ⵙⴳ ⵉⵙⵏⵉⵊⵊⵉⵜⵏ, ⴰⵙⵖⵣⵏ ⵏ ⵓⵣⵎⵎⴻⵎ ⴰⵏⴰⵎⵓⵏ ⵉⵎⵓⵏⵏ ⴷ ⵜⴼⴰⴷⴰ ⵏ ⵓⴽⵛⵓⵎ ⵙ ⵓⵏⴳⵔⴰⵡ ⴰⴷ, ⴰⵙⵡⵓⴷⴷⵓ ⵏ ⵏ ⵓⵏⴳⵔⴰⵡ ⴰⴷ ⵙⴳ ⵓⴼⵏⵉⵇ ⴰⵏⴰⵎⵓⵔ ⵏ ⵜⵏⴼⵔⵓⵜ ⵜⴰⵏⴰⵎⵓⵏⵜ.
ⵔⴰⴷ ⵉⵡⴰⵍⴰ ⵓⵡⴰⵏⴽ ⴰⵥⴰⵥⵓ ⴰⵥⵕⴼⴰⵏ ⵏ ⵓⵙⵏⴼⴰⵔ ⴰⴷ ⵏ ⵓⵙⵍⴳⵏ, ⴳ ⵢⵉⴳⵔ ⴰⵎⴰⵜⴰⵢ ⴷ ⵓⵙⵍⵉⴳ, ⴷ ⵓⵙⴰⵜⵉ ⵏ ⵡⴰⴷ ⵉⴳⴳⵓⵔⴰⵏ ⴳ ⵎⴰⴷ ⵉⵥⵍⵉⵏ ⵙ ⵡⴰⵜⵉⴳ ⴰⵙⵖⵍⴰⵏ ⴰⴼⴰⴷ ⴰⴷ ⵉⵥⴹⵉⵕ ⵓⵡⴰⵏⴽ ⵉ ⵓⵙⴼⵍⵙ ⵏ ⵓⵥⴰⵥⵓ ⴰⵥⵕⴼⴰⵏ ⴷ ⵓⴼⵔⴰⴳ ⵏ ⵉⵏⵎⵓⵔⴰⵏ ⵙⴳ ⴳⴰⵔ ⵜⵉⵎⵙⴽⴰⵔ ⴳ ⵓⴼⵔⵓ ⵏ ⵡⴰⵜⵉⴳ ⵏ ⵜⵙⵏⵉⵊⵊⵉⵜ.