ⴰⵙⵖⵣⵏ ⵙ ⵓⵎⴽⵕⴰⴹ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 25.20 ⵉⵣⴷⵉⵏ ⵙ ⵓⵙⵔⵙ ⵏ ⵉⵙⵡⵓⴷⴷⵓⵜⵏ ⵥⵍⵉⵏⵉⵏ ⵉ ⵉⴷ ⴱⴰⴱ ⵏ ⵜⵡⵓⵔⵉ ⵉⵎⵍⵜⴰⵖⵏ ⵖ ⵓⴼⵏⵉⵇ ⴰⵏⴰⵎⵓⵔ ⵏ ⵜⵏⴼⵔⵓⵜ ⵜⴰⵏⴰⵎⵓⵏⵜ ⴷ ⵉⵅⴷⴷⴰⵎⵏ ⵏⵏⵙⵏ ⵉⵜⵜⵓⵣⵎⵎⴰⵎⵏ, ⵍⵍⵉ ⵉⵜⵜⵓⴹⵕⵕⴰⵏ ⵖ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⴽⵓⴼⵉⴷ 19
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵓⵙⵉⵏⴰⵙ 21 ⵉⴱⵔⵉⵔ 2020 ⵙ ⵓⵎⴽⵕⴰⴹ ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 25.20 ⵉⵣⴷⵉⵏ ⵙ ⵓⵙⵔⵙ ⵏ ⵉⵙⵡⵓⴷⴷⵓⵜⵏ ⵥⵍⵉⵏⵉⵏ ⵉ ⵉⴷ ⴱⴰⴱ ⵏ ⵜⵡⵓⵔⵉ ⵉⵎⵍⵜⴰⵖⵏ ⵖ ⵓⴼⵏⵉⵇ ⴰⵏⴰⵎⵓⵔ ⵏ ⵜⵏⴼⵔⵓⵜ ⵜⴰⵏⴰⵎⵓⵏⵜ ⴷ ⵉⵅⴷⴷⴰⵎⵏ ⵏⵏⵙⵏ ⵍⵍⵉ ⵉⵜⵜⵓⴹⵕⵕⴰⵏ ⵖ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ ⴽⵓⴼⵉⴷ 19, ⵖ ⵜⵖⵉⵎⵉⵜ ⵜⵓⵙⵎⵉⴷⵜ ⴷ ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⵜⵉⵍⵉⵜ ⵏ ⵎⴰⵙⵙ ⵎⵓⵃⴰⵎⵎⴰⴷ ⴰⵎⴽⵔⴰⵣ ⴰⵎⴰⵡⵙⴰⵙ ⵏ ⵓⵙⵡⵓⵔⵉ ⴷ ⵓⵙⵉⴷⴼ ⴰⵣⵣⵓⵍⴰⵏ.
ⵖ ⵜⵏⴽⴷⴰ ⵏⵏⵙ ⵉ ⵓⵙⵏⴼⴰⵔ ⵏ ⵓⵙⵍⴳⵏ ⵍⵍⵉ ⴷ ⵢⵓⵔⵔⵉⵏ ⴷⴰⵔ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵉⵙⵓⵜⴳ ⵎⴰⵙⵙ ⴰⵎⴰⵡⵙⴰⵙ ⵏ ⵓⵙⵡⵓⵔⵉ ⴷ ⵓⵙⵉⴷⴼ ⴰⵣⵣⵓⵍⴰⵏ "ⵙ ⵜⵡⵉⵙⵉ ⵏ ⵉⵎⵓⵔⴰ ⵖ ⵜⵓⴳⵜ ⵓⵍⴰ ⵜⵓⵣⵍⵜ ⵃⵎⴰ ⴰⴷ ⵢⵉⵍⵉ ⵓⴹⵕⵉⵚ ⴰⴷ ⵢⵉⵍⵉ ⵡⴰⵣⵣⴰⵣ ⵏ ⵓⵎⴹⴰⴽⴰⵕ ⵏⵏⵙ ⵙ ⴰⵢⵍⵍⵉ ⵜⵙⵉⴳⴳⵉⵍ ⵜⵉⵣⵉ ⴰⴷ ⵉⵥⵍⵉⵏ ⴷ ⵜⵏⵓⴼⵓⵜ ⵏ ⵜⵎⵓⵔⵜ" .
ⵖⴷ ⵏⵜⵜⵏⵉ, ⵙⴰⵡⵍⵏ ⵉⴷ ⵎⴰⵙⵙ ⵉⵎⵓⵔⴰ ⴷ ⵉⵙⵜ ⵎⴰⵙⵙⴰ ⵜⵉⵎⵓⵔⴰ ⵉⴳⵏⵙⴰⵙⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴼ ⵓⵙⵏⵉⵎⵎⵔ ⴷ ⵓⵙⵓⵜⴳ ⵏ ⵜⵏⴰⵔⴰ ⵉⵥⵉⵍⵏ ⴷ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵍⵍⵉⵖ ⵉⴱⴷⴷ ⴱⴰⴱ ⵏ ⵡⴰⴷⴷⵓⵔ ⴼ ⴰⴷ ⵉⵍⵉⵏⵜ ⵜⵎⵙⴽⴰⵔ ⵜⵉⵎⵣⵡⵓⵔⴰ ⵏ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ "ⴽⵓⴼⵉⴷ 19", ⵢⵉⵍⵉ ⵡⴰⵔⴰⵢ ⴳⵉⵙ.
ⵙⴷⴷⵉⴷⵏ ⵉⴷ ⵎⴰⵙⵙ ⵉⵎⵓⵔⴰ ⴷ ⵉⵙⵜ ⵎⴰⵙⵙⴰ ⵜⵉⵎⵓⵔⴰ ⴼ ⵜⵙⵏⵙⵉ ⵉⵛⴷⴷⴰⵏ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵖ ⵉⵍⵍⴰ ⵓⵙⵓⵎⵓ ⵏ ⵉⴷ ⴱⴰⴱ ⵏ ⵜⵡⵓⵔⵉ ⴷ ⵉⵅⴷⴷⴰⵎⵏ ⵖⴷ ⵏⵜⵜⵏⵉ, ⵢⵉⵍⵉ ⵢⵉⵎⴰⵏ ⵏ ⵜⵡⵉⵣⵉ ⴷ ⵓⵙⵕⵚⵓ ⵏ ⵓⵎⴽⵕⴰⴹ ⴰⵏⴰⵎⵓⵔ ⵙ ⵜⵜⵓⵙⵙⴰⵏ ⵜⴼⵔⴽⴰ ⴰⴷ, ⵖⵔⵉⵏ ⵉ ⵓⵙⵏⴰⵍ ⵏ ⵜⵎⵙⵙⵏⵜⴰⵢ ⵜⵉⵎⵖⵔⵉⴱⵉⵢⵉⵏ, ⴷ ⵓⵃⵟⵟⵓ ⵏ ⵜⴰⵣⵣⵓⵍⵉⵏ ⴷ ⵓⵙⴽⵔ ⵏ ⴽⵓ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ ⵃⵎⴰ ⴰⴷ ⵜⵉⵍⵉ ⵜⴼⴰⵜⵉⵜ ⵏ ⵉⵎⵙⵡⵓⵔⵉⵢⵏ.
ⵉⵡⴰⵜⵜⵙ ⵓⵙⵏⴼⴰⵔ ⵏ ⵓⵙⵍⴳⵏ ⴰⴷ ⵉⵍⵉⵏ ⵉⵙⵡⵓⴷⴷⵓⵜⵏ ⵥⵍⵉⵏⵉⵏ ⵍⵍⵉ ⵔⴰⴷ ⵉⴹⴼⵕ ⵉⴷ ⴱⴰⴱ ⵏ ⵜⵡⵓⵔⵉ ⵉⵍⵍⴰⵏ ⵖ ⵓⵙⵓⵔⵙ ⵉⵛⴷⴷⴰⵏ ⵏⵜⵜⵏⵉ ⴷ ⵉⵎⵙⵡⵓⵔⵉⵢⵏ ⵏⵏⵙⵏ ⵍⵍⵉ ⵉⵜⵜⵓⴹⵕⵕⴰⵏ ⵖ ⵓⴼⵉⵔⵓⵙ ⴰⴷ. ⵙ ⵓⵙⵏⴼⴰⵔ ⴰⴷ, ⵔⴰⴷ ⵉⵜⵜⵓⴼⴽⵉ ⵡⴰⵔⵔⴰⵣ ⵉ ⵉⵎⵙⵡⵓⵔⵉⵢⵏ ⴷ ⵉⵎⴰⵏⵓⵏⵏ ⵉⵍⵍⴰⵏ ⵖ ⵓⵙⵉⵍⵖ ⵉ ⵓⵙⵉⴷⴼ ⵍⵍⵉ ⵉⵜⵜⵓⵣⵎⵎⴰⵎⵏ ⵖ ⵡⴰⵢⵢⵓⵔ ⵏ ⴱⵕⴰⵢⵕ 2020 ⴷⴰⵔ ⵓⴼⵏⵉⵇ ⴰⵏⴰⵎⵓⵔ ⵏ ⵜⵏⴼⵔⵓⵜ ⵜⴰⵏⴰⵎⵓⵏⵜ. ⵢⵉⵡⵉ ⴷ ⵓⵙⵏⴼⴰⵔ ⴰⴷ ⵓⵍⴰ ⵎⴰⵙ ⵜⴳⴰ ⵜⵉⵣⵉ ⵉⵍⵍⴰⵏ ⵏⴳⵔ 15 ⵎⴰⵕⵚ 2020 ⴰⵔ 30 ⵢⵓⵏⵢⵓ 2020 ⵜⵉⵣⵉ ⵜⴰⵎⵣⵣⴰⵎⴰⵣⵜ ⵏ ⵓⵙⴱⴷⴷⵉ ⵜⵡⵓⵔⵉ ⵉ ⵉⵎⵙⵡⵓⵔⵉⵢⵏ, ⵜⴰⵎⵖⵓⵏⵜ ⵏ ⵜⵡⵓⵔⵉ ⵏⵜⵜⴰⵜ ⵜⵍⵍⴰ ⵓⴽⴰⵏ ⵙⵓⵍ ⴷ ⵉⴷ ⴱⴰⴱ ⵏ ⵜⵡⵓⵔⵉ.
ⵢⵓⵛⴽⴰ ⴷ ⵖ ⵓⵙⵏⴼⴰⵔ ⵏ ⵓⵙⵍⴳⵏ ⵎⴰⵙ ⵜⴱⴷⴷ ⵜⵙⵓⵔⵉ ⵖ ⵓⴼⵏⵉⵇ ⴰⵏⴰⵎⵓⵔ ⵏ ⵜⵏⴼⵔⵓⵜ ⵜⴰⵏⴰⵎⵓⵏⵜ ⵙⴳ 01 ⵎⴰⵕⵚ 2020 ⴰⵔ 30 ⵢⵓⵏⵢⵓ 2020 ⵍⵍⵉ ⵉⴳⴰⵏ ⵜⴰⴼⴰⴷⴰ ⵏ ⵓⵕⵥⵥⵓⵎ ⵏ ⵓⵣⵔⴼ ⵖ ⵡⴰⵔⵔⴰⵣ ⵍⵍⵉ ⵢⴰⴽⴽⴰ ⵓⴼⵏⵉⵇ ⴰⴷ ⵙ ⵓⵏⴳⵔⴰⵡ ⵏ ⵜⵏⴼⵔⵓⵜ ⵜⴰⵏⴰⵎⵓⵏⵜ, ⵖⵎⴽ ⴰⵏⵏ ⵓⵍⴰ ⵜⵉⵏⵓⴼⴰ ⵉⵍⵍⴰⵏ ⵖ ⵓⵏⴳⵔⴰⵡ ⵏ ⵓⵙⴼⵍⵙ ⵓⵛⵛⵉⵍ ⴰⵙⵉⵍⴰⵏ ⵖ ⵜⵎⴰⴹⵓⵏⵜ ⵉ ⵉⵎⵙⵡⵓⵔⵉⵢⵏ ⴷ ⵉⵎⴰⵏⵓⵏⵏ ⵖ ⵓⵙⵉⵍⵖ ⵉ ⵓⵙⵉⴷⴼ.
ⵙ ⵓⵙⵍⴳⵏ ⴰⴷ, ⵉⵍⵍⴰ ⴼ ⴱⴰⴱ ⵏ ⵜⵡⵓⵔⵉ ⴰⴷ ⵉⵙⵓⵔⵔⵉ ⵉ ⵓⴼⵏⵉⵇ ⴰⵏⴰⵎⵓⵔ ⵏ ⵜⵏⴼⵔⵓⵜ ⵜⴰⵏⴰⵎⵓⵏⵜ ⴰⵔⵔⴰⵣ ⵏⵏⴰ ⵢⵉⵡⵉ ⵙ ⵜⵖⴰⵔⴰⵙⵜ ⵏ ⵜⴽⵔⴽⴰⵙ, ⵙ ⵜⵙⵏⵙⵉ ⵏ ⵜⵎⵔⵔⵓⵜⵉⵏ ⵉⵍⵍⴰⵏ ⵖ ⵓⵣⵣⵔⴰⴼ, ⴰⴼⵏⵉⵇ ⵏⵜⵜⴰⵏ ⵔⴰⴷ ⵉⵙⵓⵔⵔⵉ ⴰⵏⵛⴽⵏ ⵍⵍⵉ ⴷ ⵉⵜⵜⵓⵔⵔⴰⵢⵏ ⵉ ⵜⵎⵙⴰⵙⵜⵍⵜ ⵏ ⵓⵡⴰⵏⴽ. ⵔⴰⴷ ⵜⵉⵍⵉ ⵜⵡⵓⵔⵉ ⵙ ⵓⵙⵍⴳⵏ ⴰⴷ ⵙⴳ 01 ⵉⴱⵔⵉⵔ 2020.