ⴰⵙⵉⵡⴹ ⵏ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 23 ⵢⵓⵏⵢⵓ 2020

ⵉⵙⵏⵎⴰⵍⴰ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⵏⵏⵙ ⵜⴰⵏⵎⵍⴰⵙⵙⵜ ⵙ ⵜⵏⵙⵙⵉⵅⴼⵜ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵙⵙ ⵏ ⵓⵙⵉⵏⴰⵙ 23 ⵢⵓⵏⵢⵓ 2020, ⵉⵥⵍⵉ ⵓⵖⴰⵡⴰⵙ ⵏ ⵜⵡⵓⵔⵉ ⵏⵏⵙ ⵉ ⵜⵉⴹⴰⴼ ⴷ ⵓⵣⵣⵔⴰⴼ.

ⵖ ⵜⵡⵓⵔⵉ ⵏ ⵜⵉⴹⴰⴼ, ⵉⵙⵓⵜⴳ ⴷⴰⵖ ⵓⵙⵉⵔⴰ ⵏ ⵓⵙⵇⵇⵉⵎ ⵜⵓⴳⴳⴰⵙ ⵍⵍⵉ ⵙⴽⴰⵔⵏ ⵉⴳⵎⴰⵎⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵖ ⵓⵎⵏⵉⴷ ⵏ ⵜⵉⴹⴰⴼ ⵏ ⵜⵡⵓⵔⵉ ⵜⵓⵏⴱⵉⴹⵜ ⵙ ⵓⵏⴳⵔⴰⵡ ⵍⵍⵉ ⵉⵙⵔⵙ ⵓⵙⵉⵔⴰ ⵙ ⵓⵎⵛⴰⵡⴰⵕ ⴷ ⵓⵣⴷⴷⵓⵢ ⴷ ⴽⵓ ⵉⴳⵎⴰⵎⴰⵏ ⵏ ⵓⵙⵇⵇⵉⵎ ⴷ ⵜⵏⴱⴰⴹⵜ, ⴰⵏⴳⵔⴰⵡ ⴰⴷ ⵍⵍⵉ ⴱⴰⵀⵔⴰ ⵉⴱⴷⴷⵏ ⴼ ⵜⵣⴷⴰⵢⵜ ⵏⵏⵙ ⴷ ⵉⵎⵔⵙⵉ ⵏ ⵓⴱⴰⵢⵢⵓⵕ ⴷ ⵜⵣⵣⵉⴳⵣⵉⵏ ⵏⵏⵙ ⴷ ⵉⴷⵔⵉⵣⵏ ⵏⵏⵙ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⵏⴼⴳⴰⵏⵏ ⴷ ⵉⴷⵓⵙⴰⵏⵏ ⴷ ⵡⵉⵏ ⵜⵏⴼⵔⵓⵜ, ⵣⴷⵉⵏ ⴰⴽⴽⵯ ⵉⵖⴰⵡⴰⵙⵏ ⵉⵏⵎⵍⴰⵙⵙⵏ ⴷ ⵢⴰⵏ ⵉⴳⵔ ⵓⵏⴱⵉⴹ ⵙ ⵉⵙⵇⵙⵉⵜⵏ ⵍⵍⵉ ⵉⴹⴼⵕ ⵓⵎⴹⴰⴽⴰⵕ, ⵉⴳⴰ ⵍⵃⴰⵍ ⵜⵉⵎⵙⴽⵔⵜ ⵉⵕⵡⴰⵏ ⵉⵍⵍⴰⵏ ⴷ ⵓⵣⵎⵣ ⵖ ⵓⴹⴼⵕ ⵏ ⵉⵅⵎⵎⵉⵎⵏ ⵏ ⵉⵏⵎⵓⵔⴰ.

ⵖ ⵓⵣⵣⵔⴰⵢ ⵏ ⵜⴼⵔⴽⴰ ⵜⴰⵎⵣⵡⴰⵔⵓⵜ ⴷ ⵉⵎⵉⵥ ⵏ ⵜⵎⵙⵉⵔⵉⵏ ⵙⴳ ⵜⵉⵎⵙⴽⵔⵜ, ⵙ ⵓⵙⴽⵔ ⵏ ⵜⵎⵙⴽⴰⵔ ⵏ ⵡⴰⵔⴰⵢ ⵍⵍⵉ ⵍⵍⴰⵏⵉⵏ, ⵉⴼⴼⵖ ⵓⵙⵉⵔⴰ ⴰⴷ ⵢⵉⵍⵉ ⵓⵙⵖⵉⵡⵙ ⵏ ⵎⵏⵏⴰⵡ ⵉⴳⵔⴰⵏ ⵓⵏⴱⵉⴹⵏ ⴳⴰⵏⵉⵏ ⴽⵕⴰⴹ ⵖ ⴽⵔⴰⵢⴳⴰⵜⵜ ⵉⵎⴰⵍⴰⵙⵙ, ⵃⵎⴰ ⴰⴷ ⵢⵉⵍⵉ ⵓⵙⵎⵖⵔ ⵏ ⵜⴷⵔⴰⵡⵜ ⵜⵓⵏⴱⵉⴹⵜ ⵖ ⴽⵔⴰⵢⴳⴰⵜⵜ ⵜⵉⵖⵉⵎⵉⵜ, ⵢⵉⵍⵉ ⵓⵍⴰ ⵓⵙⵡⵓⵔⵉ ⴼ ⵎⵏⵏⴰⵡ ⵉⵙⴷⴰⵡⵏ ⵏ ⵖⵉⵍⴰⴷ ⵖ ⵉⵎⴰⵍⴰⵙⵙ ⵉⴳⴰⵏ ⵢⴰⵏ.

ⵖ ⵓⵎⵏⵉⴷ ⴰⴷ, ⵉⵙⵔⵙ ⵓⵙⵉⵔⴰ ⵏ ⵓⵙⵇⵇⵉⵎ ⴰⵖⴰⵡⴰⵙ ⵏ ⵜⵡⵓⵔⵉⵡⵉⵏ ⵏ ⵜⵖⵉⵎⵉⵜ ⵜⴰⵏⵎⵍⴰⵙⵙⵜ ⵍⵍⵉ ⴷ ⵢⵓⵛⴽⴰⵏ ⴼ ⴽⵕⴰⴹ ⵉⴳⵔⴰⵏ: ⴰⵎⵙⴰⵙⴰ ⵏ ⵡⴰⴽⴰⵍ ⴰⵏⴰⵎⵓⵔ ⴷ ⵓⵚⴽⴰⵡ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ, ⵜⴰⴷⵍⵙⴰ ⴷ ⵉⵄⵔⵔⵉⵎⵏ ⴷ ⵜⵓⵏⵏⵓⵏⵜ, ⵜⵉⵡⵉⵣⵉ ⴷ ⵜⴳⵎⵉ ⵜⴰⵏⴰⵎⵓⵏⵜ ⴷ ⵢⵉⵙⴽⵉⵍ ⴷ ⵜⵓⵡⵊⴰ.

ⵉⵎⴷⴰⵡⴰⵍ ⵓⵙⵉⵔⴰ ⵓⵍⴰ ⴼ ⵓⵙⵏⵜⵉ ⵏ ⵓⵙⵏⵙⵉ ⵏ ⵓⵎⵏⵏⵉ 152 ⵖ ⵓⵏⴳⵔⴰⵡ ⴰⴳⵯⵏⵙⴰⵏ, ⵔⴰⴷ ⵜⵉⵍⵉ ⵜⵡⵓⵔⵉ ⴰⴷ ⴰⵙⵙ ⵏ 6 ⵢⵓⵍⵢⵓⵣ. ⵉⵙⴷⴷⵉⴷ ⴷⴰⵖ ⵓⵙⵉⵔⴰ ⴼ ⵡⴰⵜⵉⴳ ⵏ ⵜⵡⵓⵔⵉ ⴰⴷ ⵖ ⵓⴹⴼⵕ ⵏ ⵜⵎⵙⴰⵔⵉⵏ ⵏ ⵖⵉⵍⴰⴷ ⴳⴰⵏⵉⵏ ⵜⵉⵖⴰⵡⴰⵍⵉⵏ, ⵉⵇⵇⴰⵏ ⴷ ⴰⴷ ⵜⵏⵜ ⵜⵙⵙⵉⵙⴼⵉⵡ ⵜⵏⴱⴰⴹⵜ.

ⵖ ⵓⵎⵏⵉⴷ ⵏ ⵜⵉⴹⴰⴼ, ⵉⵎⴷⴰⵡⴰⵍ ⵓⵙⵉⵔⴰ ⴼ ⵉⵎⵔⵙⵉ ⵏ ⵉⵏⴰⴹⴰⵏ ⵏ ⵓⵙⴰⴳⴳⵯ ⵍⵍⵉ ⴼ ⵉⵍⵍⴰ ⵓⵎⵛⴰⵛⴽⴰ ⴰⴷ ⵜⵜⵓⵙⴽⵉⵔⵏ ⵙ ⵜⴼⴰⴷⵉⵡⵉⵏ ⵍⵍⴰⵏⵉⵏ ⵖ ⵓⵏⴳⵔⴰⵡ ⴰⴳⵯⵏⵙⴰⵏ, ⵖⵎⴽ ⵍⵍⵉ ⵉⵎⴷⴰⵡⴰⵍ ⴼ ⵉⵣⵎⴰⵣ ⵏ ⵓⵙⵔⵙ ⵏ ⵉⵏⵇⵇⵉⵙⵏ ⵏⵏⵙⵏ, ⵙ ⵓⵎⵙⴰⵙⴰ ⴷ ⵜⵖⵜⴰⵙⵉⵏ ⵏⵏⵙ ⵣⵔⵉⵏⵉⵏ ⴷ ⵓⵣⵎⵣ ⵏ ⵓⵥⵍⴰⵢ ⴰⴷⵓⵙⴰⵏ ⴷ ⵜⵎⵙⴽⴰⵔ ⵏ ⵡⴰⵔⴰⵢ ⵍⵍⴰⵏⵉⵏ, ⴷ ⴰⵢⵍⵍⵉ ⴷ ⵉⴳⴳⵯⵔⴰⵏ ⵖ ⵓⵎⵏⵉⴷ ⵏ ⵓⵙⵖⵉⵡⵙ ⵏ ⵡⴰⴽⵓⴷ ⵉⵍⵍⴰⵏ, ⴷ ⵓⵙⵔⵙ ⵏ ⵢⴰⵜ ⵜⵉⵣⵉ ⵢⴰⴹⵏⵉⵏ ⵉ ⵓⵙⵎⴰⴷ ⵏ ⵜⴱⵔⵉⴷⵜ ⵜⴰⵣⵣⵔⴰⴼⵜ ⵉⵙⵏⵎⴰⵍⴰⵏ ⵜⴰⵡⵓⵔⵉ ⴰⴷ ⵏ ⵜⵉⴹⴰⴼ, ⵉⴳⴰ ⵡⴰⵙⵙ ⵏ ⵓⵙⵉⵏⴰⵙ 7 ⵢⵓⵍⵢⵓⵣ ⴰⴽⵓⴷ ⵖ ⵔⴰⴷ ⴼⴼⵖⵏⵜ ⵜⵖⵜⴰⵙⵉⵏ ⵖ ⵓⵎⵏⵉⴷ ⴰⴷ.

ⵖ ⵓⵎⵏⵉⴷ ⵏ ⵓⵣⵣⵔⴰⴼ, ⵉⵥⵕⴰ ⵓⵙⵉⵔⴰ ⴰⵖⴰⵡⴰⵙ ⴰⵣⵣⵔⴰⴼ ⵏ ⵜⵙⵇⵇⵉⵎⵉⵏ, ⵉⵙⴷⴷⵉⴷ ⴰⴷ ⵉⵍⵉⵏⵜ ⴽⵉⴳⴰⵏ ⵏ ⵜⵓⴳⴳⴰⵙ ⵖ ⵓⵙⵖⵉⵡⵙ ⵏ ⵉⵙⵏⴼⴰⵔⵏ ⴷ ⵜⵙⵓⵎⵔⵉⵏ ⵍⵍⴰⵏⵉⵏ ⴷⴰⵔ ⵜⵙⵇⵇⵉⵎⵉⵏ, ⵍⵍⵉⵖ ⴱⴰⵀⵔⴰ ⵙⵜⴰⵡⵀⵎⵎⴰⵏ ⵃⵎⴰ ⴰⴷ ⴼⴽⵉⵏ ⵜⵉⵎⵔⴰⵔⵓⵜⵉⵏ ⵕⵡⴰⵏⵉⵏ ⵉ ⴽⵉⴳⴰⵏ ⵏ ⵉⵙⵖⴰⵡⵙⴰⵜⵏ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ ⴷ ⵉⵏⴼⴳⴰⵏⵏ.

ⵉⵥⵕ ⵓⵙⵉⵔⴰ ⵜⴰⵙⵓⵎⵔⵜ ⵏ ⵓⵙⵍⴳⵏ ⵉⵣⴷⵉⵏ ⴷ ⵡⴰⴷⴷⴰⴷ ⵓⵖⵔⵉⵎ ⵢⴰⵣⵏ ⵜⵜ ⵉ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ, ⵖⵎⴽ ⴰⵏⵏ ⴷ ⵜⵙⵓⵎⵔⵜ ⵏ ⵓⵙⵍⴳⵏ ⵉⵣⴷⵉⵏ ⵙ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ ⵉⵣⴷⵉⵏ ⴷ ⵜⵏⵓⴼⴰ ⵜⵓⵖⵔⵉⵎⵉⵏ ⵉ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵏⵜ.

ⵜⵍⴽⵎ ⴷ ⴰⵙⵉⵔⴰ ⵜⵙⴰⵖⵓⵍⵜ ⵜⴰⵏⵉⵎⴰⵏⵜ ⵏ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵡⵏⴹⴰⵏ, ⵜⴳⴰ ⵜⴰⵏⵏⴰⵢⵜ ⵏ ⵓⵙⵇⵇⵉⵎ ⴰⴷ ⵉⵜⵜⵓⴱⴷⴰⵔⵏ ⴼ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 72.18 ⵉⵣⴷⵉⵏ ⵙ ⵓⵏⴳⵔⴰⵡ ⵏ ⵓⵙⵡⵓⵜⵜⵓ ⵏ ⵉⵡⴷⴰⵏ ⵎⵓ ⵚⴰⵃⴰⵏ ⵉⵖⴰⵡⴰⵙⵏ ⵏ ⵓⵙⵏⴰⵍ ⴰⵏⴰⵎⵓⵏ ⴷ ⵓⵙⴽⵔ ⵏ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵉⵣⵎⵎⵉⵎⵏ.

ⵉⵥⵕⴰ ⵓⵙⵉⵔⴰ ⵜⴰⵢⴰⴼⵓⵜ ⵏ ⵜⵡⵓⵔⵉ ⵏ ⵓⵙⵇⵇⵉⵎ ⵖ ⵉⵎⴰⵍⴰⵙⵙ ⵉⵣⵔⵉⵏ ⴷ ⵉⵎⴰⵍⴰⵙⵙ ⴰⴷ, ⵖ ⴳⴰⵏ ⵉⵎⵔⵙⵉⵡⵏ ⵏ ⵓⵣⵣⵔⴰⴼ ⴷ ⵜⵉⴹⴰⴼ ⵍⵍⵉ ⴼ ⵎⴹⴰⴽⴰⵕⵏⵜ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ, ⴰⵎ: ⵜⴰⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ, ⴷ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵙⵢⴰⴼⵓⵜⵏ, ⴷ ⵜⵙⵇⵇⵉⵎⵜ ⵏ ⵜⵉⴹⴰⴼ ⵏ ⵜⴷⵔⵉⵎⵜ ⵜⴰⵎⴰⵜⴰⵢⵜ, ⴷ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ, ⴷ ⵜⵙⵇⵇⵉⵎⵜ ⵏ ⵓⵙⵙⵍⵎⴷ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ, ⵉⴳⴰ ⵍⵃⴰⵍ ⴰⵎⴹⴰⴽⴰⵕ ⵏ ⵉⴹⵕⵉⵚⵏ ⵉⵣⵣⵔⴰⴼⵏ ⴷ ⵉⵎⵔⵙⵉⵡⵏ ⵏ ⵜⵉⴹⴰⴼ ⴳⴰⵏⵉⵏ ⵎⵏⵏⴰⵡ.

ⵖ ⵓⵃⵢⵢⵍ ⵏ ⵜⵖⵔⵉ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵜⵥⵕⴼⵜ ⵉⵜⵜⵓⵙⵏⴼⴰⵍⵏ, ⵍⵍⵉ ⵔⴰⴷ ⴷ ⵢⵉⵍⵉ ⴷⴰⵔ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵎⴰⵙ ⵉⵣⵣⵉⴳⵣ ⵖ ⵉⵎⵛⴰⵡⴰⵕⵏ ⵏⵏⵙ ⴷ ⵉⴳⵎⴰⵎⵏ ⵏ ⵓⵙⵇⵇⵉⵎ, ⵙ ⵢⴰⵜ ⵜⵡⵓⵔⵉ ⵜⴰⵎⴰⴷⵔⴰⵡⵜ, ⵃⵎⴰ ⴰⴷ ⵢⵉⵍⵉ ⵓⵙⵔⵓⵙ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ ⴷ ⵓⵙⵏⵎⴰⵍⴰ ⵏ ⵜⵡⵓⵔⵉⵡⵉⵏ ⵏⵏⵙ.