ⴰⵙⵖⵣⵏ ⵏ ⵓⵙⵏⴼⴰⵔ ⵏ ⵓⵎⵕⵚⵓⵎ ⵉⴳⴰⵏ ⴰⵙⵍⴳⵏ ⵓⵟⵟⵓⵏ 2.20.320 ⵉⵣⴷⵉⵏ ⴷ ⵓⵣⵔⴰⵢ ⵏ ⵓⵙⴽⵯⴼⵍ ⵏ ⵉⵙⵙⵥⵕⴼⵏ ⵏ ⴱⵕⵕⴰ, ⵖ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵏⵜ
ⵜⵙⴽⵔ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵏⵜ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵓⵙⵉⵏⴰⵙ 13 ⵛⵄⴱⴰⵏ 1441 ⵉⴳⴰⴷⴷⴰⵏ ⴷ 7 ⵉⴱⵔⵉⵔ 2020 ⵢⴰⵜ ⵜⵙⵎⵓⵏⵉ ⵍⵍⵉ ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵎⴰⵙⵙ ⵄⴰⴱⴷⵓⵍⵍⴰⵀ ⴱⵓⵡⴰⵏⵓ ⵙ ⵜⵉⵍⵉⵜ ⵏ ⵎⴰⵙⵙ ⵎⵓⵃⴰⵎⵎⴰⴷ ⴱⵏ ⵛⵄⴱⵓⵏ ⴰⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ, ⵜⵥⵍⵉ ⵉ ⵓⵎⴷⴰⵡⴰⵍ ⴷ ⵓⵣⵣⵔⴰⵢ ⵏ ⵓⵙⵏⴼⴰⵔ ⵏ ⵓⵎⵕⵚⵓⵎ ⵉⴳⴰⵏ ⴰⵙⵍⴳⵏ ⵓⵟⵟⵓⵏ 2.20.320 ⵉⵣⴷⵉⵏ ⴷ ⵓⵣⵔⴰⵢ ⵏ ⵓⵙⴽⵯⴼⵍ ⵏ ⵉⵙⵙⵥⵕⴼⵏ ⵏ ⴱⵕⵕⴰ, ⵙ ⵓⵣⵣⴳⵉⵔ ⵏ ⵓⵎⴰⴳⵔⴰⴷ 81 ⵏ ⵓⴷⵓⵙⵜⵓⵔ ⴷ ⵓⵎⵏⵏⵉ 230 ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⵜⵉⵍⵉⵜ ⵏ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴷ ⴽⵔⴰ ⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ.
ⵖ ⵜⵣⵡⵉⵔⵉ ⵏ ⵜⵙⵎⵓⵏⵉ ⴰⴷ, ⵉⵙⵙⵉⵙⴼⵉⵡ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⴷ ⵉⵡⵉⵏ ⵉⴷⵔⵉⵣⵏ ⵓⵣⴷⵉⵔⵏ ⵏ ⵓⴱⴰⵢⵢⵓⵕ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ “ⴽⵓⴼⵉⴷ19” ⴼ ⵜⴷⵎⵙⴰ ⵜⴰⵎⴰⴹⵍⴰⵏⵜ, ⴷ ⴽⵓ ⵉⴳⵔⴰⵏ ⵓⴷⴷⵉⵔⵏ ⵏ ⵜⴷⵎⵙⴰ ⵜⴰⵏⴰⵎⵓⵔⵜ, ⴰⴷ ⵢⵓⵔⵔⵉ ⴰⵢⵍⵍⵉ ⵉⵍⵍⴰⵏ ⵖ ⵓⴷⵔⵉⵎ ⴰⵏⵣⵎⴰⵔ, ⵍⵍⵉⵖ ⵜⵜⵓⴹⵕⵕⴰⵏ ⴽⵉⴳⴰⵏ ⵏ ⵉⴳⵔⴰⵏ ⵍⵍⵉ ⴷ ⵉⵜⵜⴰⵡⵉⵏ ⴰⴷⵔⵉⵎ ⴰⵏⵣⵎⴰⵔ, ⵙⵍⴰⵡⴰⵏ ⴰⴽⴽⵯ ⵉⴳⵔⴰⵏ ⵏ ⵜⵎⴰⵍⵍⴰⵢⵜ ⴷ ⵉⵙⵙⴰⵔⵓⵜⵏ ⵓⵙⵔⵉⴷⵏ ⵏ ⴱⵕⵕⴰ ⴷ ⵉⴳⵔⴰⵏ ⵉⵎⵙⵙⴼⵓⵖⵏ; ⵖⵎⴽ ⴰⵏⵏ ⴷ ⴰⵢⵍⵍⵉ ⴷ ⵜⵜⴰⵣⵏⵏ ⵉⵎⵖⵔⴰⴱⵉⵢⵏ ⵉⵍⵍⴰⵏ ⵖ ⴱⵕⵕⴰ.
ⵉⵎⵍ ⵎⴰⵙⵙ ⴰⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ ⵎⴰⵙ ⵔⴰⴷ ⵉⴷⴷⵔⵣ ⵡⴰⴷⴷⴰⴷ ⴰⴷⵎⵙⴰⵏ ⵏ ⵓⵣⵎⵣ ⴰⴷ ⴼ ⵓⴽⵛⵉⵎⵏ ⵏ ⵓⴷⵔⵉⵎ ⴰⵏⵣⵎⴰⵔ, ⴰⵢⵍⵍⵉ ⵢⵓⵊⵊⴰⵏ ⵜⴰⵏⴱⴰⴹⵜ ⴰⴷ ⵜⵣⵔⵉ ⴰⵙⴽⵯⴼⵍ ⵏ ⵉⵙⵙⵥⵕⴼⵏ ⵏ ⴱⵕⵕⴰ, ⵢⵉⵏⵉ ⵎⴰⵙ ⵓⴽⴰⵏ ⴳⴰⵏⵜ ⵜⵎⵔⵙⴰⵍ ⵜⵉⴳⵔⴰⵖⵍⴰⵏⵉⵏ ⵏ ⵓⵥⵕⴼ ⵜⴰⵎⵢⵉⵎⴰⵏⵜ ⵏⵏⵙⵏⵜ ⵖ ⵍⵎⴰⵖⵔⵉⴱ ⵡⴰⵅⵅⴰ ⴰⵣⵎⵣ ⴰⴷ ⵉⵍⵍⴰⵏ, ⴰⵢⵍⵍⵉ ⵜ ⵉⵜⵜⴰⵊⵊⴰⵏ ⴰⴷ ⵢⴰⵎⵥ ⴰⵙⵙⵥⵕⴼ ⵏ ⴱⵕⵕⴰ ⵙ ⵜⴼⴰⴷⵉⵡⵉⵏ ⵍⵍⵉ ⴷ ⵢⵓⵙⴰⵏ.
ⵖ ⵜⵙⵎⵓⵏⵉ ⴰⴷ, ⵙⵓⵜⴳⵏ ⴱⴰⵀⵔⴰ ⵉⴷ ⵎⴰⵙⵙ ⴷ ⵎⴰⵙⵙⴰ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵜⴰⵎⵢⴰⴷⴰⵙⵜ ⵏ ⵓⵙⵉⵣⵡⴰⵔ ⵍⵍⵉ ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵃⴼⴹ ⵕⴱⴱⵉ, ⵙ ⴽⵉⴳⴰⵏ ⵏ ⵜⵎⵙⴽⴰⵔ ⴷ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ ⵍⵍⵉ ⵔⴰⴷ ⵓⵙⵉⵜⵜⵉ ⵙⴱⴷⴷⵏ ⵓⵍⴰ ⵜⴰⵣⵣⵉⴳⵣⵜ ⵏ ⵓⴼⵉⵔⵓⵙ ⴰⴷ, ⵖⵎⴽ ⴰⵏⵏ ⴷ ⵓⵙⵎⴽⵍ ⵏ ⵉⴷⵔⵉⵣⵏ ⵏⵏⵙ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ.
ⵙ ⵓⵣⵎⵣⵣⵓ ⴰⴷ, ⵙⵓⵜⴳⵏ ⵙ ⴽⵉⴳⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵜⴰⵙⵏⵜⴰⵢⵜ ⵜⴰⴳⵍⴷⴰⵏⵜ ⵢⴰⵜⵜⵓⵢⵏ ⴷ ⵜⵡⵓⵔⵉ ⵜⴰⵏⴼⴳⴰⵏⵜ ⵉⵥⵉⵍⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴷ ⵓⴳⵍⴷⵓⵏ ⵏ ⵉⵎⵓⵎⵏⵏ ⴰⴷ ⵜ ⵉⵃⴼⴹ ⵕⴱⴱⵉ, ⵍⵍⵉⵖ ⵉⴼⴽⴰ ⴰⵙⵓⵔⴼ ⵏⵏⵙ ⵉⵥⵉⵍⵏ ⵉ ⴽⵉⴳⴰⵏ ⵏ ⵉⵏⴽⵔⴰⴼ, ⵜⵜⵔⵏ ⵙ ⴽⵉⴳⴰⵏ ⵏ ⵓⵙⵓⵜⴳ ⴷ ⵓⵡⵇⵇⵔ ⵖ ⴱⴰⴱ ⵏ ⵡⴰⴷⴷⵓⵔ, ⵍⵍⵉⵖ ⵉⴳⴰ ⴱⴰⴱⴰⵙ ⵏ ⵜⵎⵜⵜⵉ, ⴰⴷ ⵜⵉⵍⵉ ⵜⵙⵏⵜⴰⵢⵜ ⴰⴷ ⵉⵥⵉⵍⵏ ⵓⵍⴰ ⴼ ⵉⵏⴽⵔⴰⴼ ⵢⴰⴹⵏⵉⵏ ⵍⵍⵉ ⵣⴷⵉⵏⵉⵏ ⴷ ⴽⵔⴰ ⵏ ⵉⵙⴷⴰⵡⵏ ⵏⵖ ⵉⵖⵉⵢⵢⴰⵏ ⵉⵏⴰⵎⵓⵏⵏ ⴷ ⵡⵉⵢⵢⴰⴹ ⵢⴰⴹⵏⵉⵏ.
ⵖⵎⴽ ⵍⵍⵉ ⵏⵏⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ, ⵙ ⴽⵓ ⵓⴽⵍⴰⵏ ⵏⵏⵙⵏ ⵉⵙⵔⵜⴰⵏⵏ, ⵎⴰⵙ ⴷ ⵜⵉⵡⵉ ⵜⵏⵓⴼⴰ ⵢⴰⵜⵜⵓⵢⵏ ⴷ ⵜⵡⵉⵣⵉ ⵜⴰⵏⴰⵎⵓⵔⵜ ⴷ ⵓⵎⴽⵕⴰⴹ ⵜⴰⵎⴰ ⵏ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ, ⴰⴷ ⵙⵓⵜⴳⵏ ⵔⵎⵙⵏ ⵉⵙⵡⵓⴷⴷⵓⵜⵏ ⵏ ⵜⵏⴱⴰⴹⵜ ⵖ ⵎⴰⴷ ⵉⵥⵍⵉⵏ ⴷ ⵓⵙⵏⴰⵍ ⵏ ⵢⵉⴳⵔ ⵏ ⵜⴷⴰⵡⵙⴰ, ⴷ ⵓⵙⵎⴽⵍ ⵏ ⵉⴷⵔⵉⵣⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⵏ ⵓⴱⴰⵢⵢⵓⵕ ⴰⴷ. ⵖⵎⴽ ⵍⵍⵉ ⵖⵔⴰⵏ ⵓⵍⴰ ⴰⴷ ⵣⵣⵉⴳⵣⵏⵜ ⵜⵓⴳⴳⴰⵙ ⵏ ⵓⵃⵟⵟⵓ ⵏ ⵉⵏⵎⵓⵔⴰⵏ ⴷ ⵓⵃⵟⵟⵓ ⵏ ⵓⵥⵟⵟⴰ ⴰⴷⵎⵙⴰⵏ ⴰⵏⴰⵎⵓⵔ ⴷ ⵓⵙⵏⴰⵍ ⵏ ⵎⵉⴷⴷⵏ ⴳⴰⵏⵉⵏ ⵉⴷⵔⵡⵉⵛⵏ ⵎⵓ ⴱⴱⵉⵏⵜ ⵜⵖⵔⴰⴷ ⵖ ⵓⵣⵎⵣ ⵏ ⵓⴱⴰⵢⵢⵓⵕ ⴰⴷ.
ⵖⵎⴽ ⵍⵍⵉ ⵓⵣⵏⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⴰⵣⵓⵍ ⵏ ⵓⵙⵎⵖⵔ ⴷ ⵓⵙⵓⵜⴳ ⵉ ⴽⵓ ⵡⵉⵍⵍⵉ ⵍⵍⴰⵏⵉⵏ ⵖ ⵉⵣⵔⵉⵔⵉⴳⵏ ⵉⵎⵣⵡⵓⵔⴰ ⵃⵎⴰ ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⴰⴷ, ⵙⵍⴰⵡⴰⵏ ⴰⴽⴽⵯ ⵉⵎⵙⵡⵓⵔⵉⵢⵏ ⵖ ⵉⴳⵔⴰⵏ ⵏ ⵜⴷⴰⵡⵙⴰ ⴷ ⵓⵙⵍⵎⴷ ⴷ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⴷ ⵜⵊⴹⵕⵎⵜ ⵜⴰⴳⵍⴷⴰⵏⵜ ⴷ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵜⴳⴳⴰⵍⵉⵏ ⵏ ⵜⵡⵉⵙⵉ ⴷ ⵡⴰⵔⴰⵢ ⴰⵖⵔⵎⴰⵏ ⴷ ⵉⵎⵙⵡⵓⵔⵉⵢⵏ ⵏ ⵜⵖⵓⵙⵉ, ⴷ ⵓⵃⵟⵟⵓ ⵏ ⵜⴷⴰⵡⵙⴰ ⴷ ⴽⵓ ⵉⵎⵙⵡⵓⵔⵉⵢⵏ ⵖ ⵉⴳⵔⴰⵏ ⵓⴷⴷⵉⵔⵏ ⵃⵎⴰ ⴰⴷ ⵜⵉⵍⵉ ⵜⵊⴰⵡⵜ, ⵣⵣⵉⴳⵣⵏⵜ ⵓⵍⴰ ⵜⵏⵓⴼⴰ ⵜⵉⴷⵙⵍⴰⵏⵉⵏ.
ⵙⵓⵜⴳⵏ ⵉⵎⵓⵔⴰ ⵜⴰⵎⵔⵉⵙⵜ ⵏ ⵓⵎⴰⵜⴰ ⵏ ⵉⵏⵎⵓⵔⴰⵏ ⵙ ⵜⵎⵙⴽⴰⵔ ⵏ ⵓⵥⵍⴰⵢ ⴰⴷⵓⵙⴰⵏ, ⵖⵔⵉⵏ ⵉ ⴽⵓ ⵢⴰⵏ ⴰⴷ ⵙⵓⵍ ⵜⵉⵍⵉ ⵜⵎⵔⵉⵙⵜ ⴰⴷ ⵍⵍⵉⵖ ⵜⴳⴰ ⵜⴰⵖⴰⵔⴰⵙⵜ ⵏ ⵓⵙⵙⵏⵊⵎ ⵃⵎⴰ ⴰⴷ ⵜⵣⵔⵉ ⵜⴼⵔⴽⴰ ⴰⴷ ⵉⵛⴷⴷⴰⵏ.
ⵖⵎⴽ ⵍⵍⵉ ⵙⴷⴷⵉⴷⵏ ⴼ ⵡⴰⵜⵉⴳ ⵏ ⵓⵏⵢⴰⵍⴽⴰⵎ ⵏ ⵜⵏⴱⴰⴹⵜ ⴷ ⵡⴰⵎⵓⵏ ⵙⵍⴰⵡⴰⵏ ⴰⴽⴽⵯ ⴰⵏⵢⴰⵍⴽⴰⵎ ⵏ ⵜⵎⴰⵡⵙⴰⵙⵜ ⵏ ⵜⴷⵎⵙⴰ ⴷ ⵓⵥⵕⴼ ⵃⵎⴰ ⴰⴷ ⵢⵉⵍⵉ ⵓⵙⵉⵙⴼⵉⵡ ⵏ ⵓⵙⵓⵔⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⴰⵢⵍⵍⵉ ⵉⵙⵉⴳⴳⵉⵍ ⵖ ⵉⵏⵖⵎⵉⵙⵏ ⵙ ⴰⵢⵍⵍⵉ ⵔⴰⴷ ⵢⴰⵡⵙ ⵖ ⵓⵙⵎⵓⵙⵙⵓ ⵏ ⴽⵓ ⵉⵎⵙⴽⴰⵔⵏ ⵖ ⵉⴳⵔⴰⵏ ⵏ ⵜⴷⵎⵙⴰ ⴷ ⵡⴰⵎⵓⵏ ⴷ ⵓⵥⵕⴼ.
ⵖ ⵜⴳⵉⵔⴰ, ⵣⵣⵔⵉⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵖ ⵜⵓⵣⵍⵜ ⵓⵍⴰ ⵜⵓⴳⵜ ⵙ ⵉⵙⵎ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴰⵎⵕⵚⵓⵎ ⵉⴳⴰⵏ ⴰⵙⵍⴳⵏ, ⴰⵛⴽⵓ ⵔⴰⴷ ⵢⴰⵡⵙ ⵉ ⵜⵎⴰⵣⵉⵔⵜ ⵏⵏⵖ ⵖ ⵓⵣⵎⵣ ⴰⴷ ⵉⵥⵍⵉⵏ ⴰⴷ ⵜⵙⵓⵊⵉⴷ ⵉⵙⵙⵥⵕⴼⵏ ⵏ ⴱⵕⵕⴰ ⵃⵎⴰ ⴰⴷ ⵜⵙⵙⴽⵛⵉⵎ ⴰⵢⵍⵍⵉ ⵙ ⵙⵖⴰⵡⵙⴰⵏ ⵉⴳⴰⴷⴰⵣⵏ ⵉⵏⴰⵎⵓⵔⵏ ⵖ ⵜⵖⴰⵡⵙⵉⵡⵉⵏ ⵏ ⵜⵙⵏⵉⵊⵊⵉⵜ ⴷ ⵉⵙⴰⴼⴰⵔⵏ ⴷ ⵜⵉⵔⴰⵎ ⴷ ⵓⵎⵜⵜⵛⵓ ⴷ ⵜⵥⴹⴰⵕⵜ.