ⴰⵙⵇⵇⵉⵎ ⵏ ⵉⵎⵓⵔⴰ ⵉⵙⵖⵣⵏ ⴰⵙⵏⴼⴰⵔ ⵏ ⵓⵙⵍⴳⵏ ⵉⵥⵍⵉⵏ ⵙ ⵓⵙⵏⴼⵍ ⵏ ⵓⵎⵕⵚⵓⵎ ⵙ ⵓⵙⵍⴳⵏ ⵓⵟⵟⵓⵏ 2.20.292 ⴼ ⵓⵙⵔⵙ ⵏ ⵉⴱⴹⵉⵢⵏ ⵥⵍⵉⵏⵉⵏ ⵙ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⵓⵙⴰⵏⵏ ⴷ ⵜⵎⵙⴽⴰⵔ ⵏ ⵓⵙⵉⵡⴹ ⵏⵏⵙⵏ.

ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵓⵙⵉⵏⴰⵙ 07  ⵢⵓⵍⵢⵓⵣ 2020 ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 42.20 ⵉ ⵓⵙⵏⴼⵍ ⵏ ⵓⵎⵕⵚⵓⵎ ⵙ ⵓⵙⵍⴳⵏ ⵓⵟⵟⵓⵏ 2.20.292  ⵏ 28 ⵕⴰⵊⴰⴱ 1441 (23  ⵎⴰⵕⵚ 2020)   ⴼ ⵓⵙⵔⵙ ⵏ ⵉⴱⴹⵉⵢⵏ ⵥⵍⵉⵏⵉⵏ ⵙ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⵓⵙⴰⵏⵏ ⴷ ⵜⵎⵙⴽⴰⵔ ⵏ ⵓⵙⵉⵡⴹ ⵏⵏⵙⵏ, ⵖ ⵜⵖⵉⵎⵉⵜ ⵜⵓⵙⵎⵉⴷⵜ ⵍⵍⵉ ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵉⵍⵉⵜ ⵏ ⵎⴰⵙⵙ ⵏⵓⵕ ⴷⴷⵉⵏ ⴱⵓⵟⵢⵢⴱ ⴰⵎⴰⵡⵙⴰⵙ ⴰⵎⴰⵔⵉ ⴷⴰⵔ ⵓⵎⴰⵡⵙⴰⵙ ⵏ ⵜⴳⵯⵏⵙⴰⵏⵜ.

ⵉⵡⴰⵜⵜⵙ ⵓⵙⵏⴼⴰⵔ ⴰⴷ ⴰⵙⵏⴼⵍ ⵏ ⵉⴱⴹⵉⵢⵏ ⵏ ⵓⵎⵏⵏⵉ ⵡⵉⵙ ⵚⴹⵉⵚ ⵏ ⵓⵎⵕⵚⵓⵎ ⵙ ⵓⵙⵍⴳⵏ ⵓⵟⵟⵓⵏ 2.20.292 , ⵉⵣⴷⵉⵏ ⵙ ⵓⵙⴱⴷⴷⵉ ⵏ ⴽⵓ ⵉⵙⴰⴽⵓⴷⵏ ⵉⵣⵣⵔⴰⴼⵏ ⴷ ⵉⵎⴰⴷⴷⴰⵙⵏ ⵍⵍⵉ ⴷ ⵓⵛⴽⴰⵏⵉⵏ ⵖ ⵉⵙⵍⴳⵏⵏ ⵜⵜⴰⵡⵙⵎⵔⴰⵙⵏⵉⵏ ⵍⵍⵉⵖ ⵉⵍⵍⴰ ⵓⵙⵉⵡⴹ ⴼ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⵓⵙⴰⵏⵏ (ⴰⵎⵔ ⵡⵉⵍⵍⵉ ⵣⴷⵉⵏⵉ ⵙ ⵜⵉⵕⵥⵉ ⵙ ⵡⴰⵍⴰⵙ ⴳⴰⵏⵉⵏ ⵡⵉⵏ ⵉⵡⴷⴰⵏ ⵍⵍⵉ ⵜⴹⴼⵕ ⵜⵣⵔⴼⵜ ⵖ ⵡⴰⴷⴷⴰⴷ ⵏ ⵉⵎⵉⵥ ⴷ ⵜⵉⵣⵉ ⵏ ⵓⵙⵔⵙ ⵖ ⵓⴹⵓⴼ ⵙ ⵜⴰⵏⵏⴰⵢⵜ ⴷ ⵉⵎⵉⵥ ⴰⵎⴽⵓⴷⴰⵏ), ⵔⴰⴷ ⵢⵉⵍⵉ ⵓⵙⴽⵔ ⵙ ⵉⵙⴰⴽⵓⴷⵏ ⴰⴷ ⵙⴳ ⴰⵙⵙ ⴷ ⵉⴹⴼⵕⵏ ⴰⵙⴰⵍⵉ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ.

ⵖ ⵜⵏⴽⴷⴰ ⵏ ⵓⵙⵏⴼⴰⵔ, ⵉⵙⵙⵉⵙⴼⵉⵡ ⵎⴰⵙⵙ  ⵏⵓⵕ ⴷⴷⵉⵏ ⴱⵓⵟⵢⵢⴱ ⴰⵎⴰⵡⵙⴰⵙ ⴰⵎⴰⵔⵉ ⴷⴰⵔ ⵓⵎⴰⵡⵙⴰⵙ ⵏ ⵜⴳⵯⵏⵙⴰⵏⵜ ⵎⴰⵙ ⵔⴰⴷ ⵢⵉⵍⵉ ⵓⵙⵏⴼⵍ ⵏ ⵉⴱⴹⵉⵢⵏ ⵏ ⵓⵎⵏⵏⵉ ⵡⵉⵙ ⵚⴹⵉⵚ ⵙ ⵡⵉⵢⵢⴰⴹ  ⵍⵍⵉ ⵔⴰⴷ ⵢⴰⵊⵊ  ⵜⴰⵏⴱⴰⴹⵜ, ⵖ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⵓⵙⴰⵏⵏ ⴼ ⵉⵍⵍⴰ ⵓⵙⵉⵡⴹ, ⴰⴷ ⵜⵙⴱⵉⴷⴷ ⵜⴰⵣⵣⵉⴳⵣⵜ ⵏ ⵉⵙⴰⴽⵓⴷⵏ ⵍⵍⴰⵏⵉⵏ ⵖ ⵉⴹⵕⵉⵚⵏ ⵉⵣⵣⵔⴰⴼⵏ ⴷ  ⵉⵎⴰⴷⴷⴰⵙⵏ ⵜⵜⴰⵡⵙⵎⵔⴰⵙⵏⵉⵏ, ⵉⵖ ⴰⵙ ⵉⴱⴰⵢⵏ ⵎⴰⵙ ⴽⴽⴰⵏ ⵉⵙⴰⴽⵓⴷⵏ ⴰⴷ ⴼ ⵓⵙⴽⵔ ⵏ ⵉⵡⴷⴰⵏ ⵉⵎⵏⵜⴰⵢⵏ ⵏ ⵉⵣⵔⴼⴰⵏ  ⴷ ⵉⵙⵖⵡⴰⵏ ⵏⵏⵙⵏ, ⵙ ⵜⵎⵙⴽⴰⵔ ⵍⵍⵉ ⵙ ⴼⴼⵖⵏⵜ ⵜⵏⴱⴰⴹⵉⵏ ⵜⵉⵎⵥⵍⴰⵢ ⵉ ⵓⵙⴱⴷⴷⵉ ⵏ ⵓⵙⴼⵔⵓⵔⵜ ⵏ ⵓⴱⴰⵢⵢⵓⵕ. ⵔⴰⴷ ⴱⴷⴷⵏⵜ ⵜⵓⵎⴰⵢⵉⵏ ⵜⵉⵎⴰⵢⵏⵓⵜⵉⵏ ⴼ ⵢⴰⵏ ⵓⴹⵕⵉⵚ ⴰⵎⴰⴷⴷⴰⵙ ⵖ ⵔⴰⴷ  ⵉⵍⵉⵏ ⵡⴰⴷⴷⴰⴷⵏ ⵏ ⵓⵙⴱⴷⴷⵉ ⵏ ⵜⵣⵣⵉⴳⵣⵜ ⵏ ⵉⵙⴰⴽⵓⴷⵏ ⵜⵜⴰⵡⴱⴷⴰⵔⵏⵉⵏ.

ⵉⵙⵙⴽⵜⵉ ⴷ ⵎⴰⵙⵙ ⴰⵎⴰⵡⵙⴰⵙ ⴰⵎⵏⴰⴹ ⵏ ⵓⵙⵔⵙ ⵏ ⵓⵎⵏⵏⵉ ⵡⵉⵙ  ⵚⴹⵉⵚ ⵖ ⵜⵣⵡⵉⵔⵉ ⵏ ⵓⵙⵉⵡⴹ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⵓⵙⴰⵏⵏ  ⵖ ⵎⴰⵕⵚ ⵉⵣⵔⵉⵏ, ⵢⵉⵏⵉ ⵎⴰⵙ  ⵍⵍⴰⵏⵜ ⵜⵓⴳⵜ ⵏ ⵜⵎⵓⴽⵔⵉⵙⵉⵏ  ⴷⴼⴼⵉⵔ ⵏ ⵓⵙⵉⴱⵙⵓⵙ ⵏ ⵓⵥⵍⴰⵢ ⴰⴷⵓⵙⴰⵏ  ⵍⵍⵉⵖ ⵉⵖⴰⵎⴰ ⵓⵎⵏⵏⵉ ⴰⴷ ⵙ ⵜⵓⵏⵖⵉⵍⵜ ⵏⵏⵙ ⵏ ⵖⵉⵍⴰⴷ ⵉⴳ ⵢⴰⵜ  ⵜⵔⵙⵍⵜ ⵜⴰⵎⴰⵜⴰⵢⵜ, ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⴷ ⵉⵇⵇⴰⵏ ⴰⴷ ⵢⵓⵍⵙ ⵓⵖⵔⵔⴷ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⵓⵙⴰⵏⵏ.

ⴷⴼⴼⵉⵔ ⵏ ⵓⵙⵎⵏⵉⴷ ⴰⴷ, ⵖ ⵓⵎⴹⴰⴽⴰⵕ ⴰⵎⴰⵜⴰⵢ, ⴼⴽⴰⵏ ⵉⴳⵏⵙⴰⵙⵏ ⵏ ⵜⵔⵓⴱⴱⴰ  ⴷ ⵜⴳⵔⵓⵎⵎⴰ  ⵜⵉⴱⵕⵍⴰⵎⴰⵏⵉⵢⵉⵏ ⵏ ⵜⵓⴳⵜ ⴷ ⵜⵓⵣⵍⵜ  ⵜⵉⴽⵛⵛⵓⵎⵉⵏ ⵖ ⵙⵙⵉⵙⴼⵉⵡⵏ ⴰⴷⴷⴰⴷ ⵏⵏⵙⵏ ⴼ ⵓⵙⵏⴼⴰⵔ ⵏ ⵓⵙⵍⴳⵏ, ⴼⴽⵉⵏ ⵜⵉⵙⵓⵎⵔⵉⵏ ⵉ ⵓⵙⵡⵓⴷⴷⵓ ⵉⵥⵉⵍⵏ ⵏ ⵓⵙⵓⵔⵙ ⴰⴷ ⵖ ⵜⵎⴰⵣⵉⵔⵜ ⵏⵏⵖ.

ⵙⵏⵉⵎⵎⵔⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵜⵓⴳⴳⴰⵙ ⵅⴰⵜⵔⵏⵉⵏ ⴷ ⵜⵙⵏⵜⴰⵢⵉⵏ ⵥⵉⵍⵏⵉⵏ ⵍⵍⵉ ⵙⴽⵔⵏⵜ ⵜⵏⴱⴰⴹⵉⵏ ⵏ ⵜⵎⴰⵣⵉⵔⵜ ⵏⵏⵖ  ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ . ⵉⵍⵍⴰ ⵓⵙⵓⵜⴳ ⵏ ⵓⵙⵎⴰⵇⵇⵍ ⵉⴷⵔⴰⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⴷ ⵓⴹⴼⵕ ⵉⵙⵓⵍⵏ ⵏ ⵜⵏⴱⴰⴹⵜ ⴷ ⴽⵓ ⵉⵎⵙⵡⵓⵔⵉⵢⵏ ⵃⵎⴰ ⴰⴷ ⵜⵏⵊⵎ ⵜⵎⴰⵣⵉⵔⵜ ⵏⵏⵖ ⵖ ⵓⵙⴼⵔⵓⵔⵜ ⵉⴳⴳⵓⵜⵏ ⵏ ⵓⴱⴰⵢⵢⵓⵕ ⵉⵀⵔⵛⵏ, ⵙ ⵎⴰⴷ ⵉⴷⵔⵓⵙⵏ ⵖ ⵉⵎⵖⵣⴰⴷⵏ ⵉⵏⴼⴳⴰⵏⵏ ⴷ ⵉⴷⵎⵙⴰⵏⵏ, ⴰⵢⵍⵍⵉ ⵢⵓⵊⵊⴰⵏ ⵜⴰⴳⵍⴷⵉⵜ ⴰⴷ ⵜⴼⴽ ⵜⴰⵎⵙⵉⵔⵜ ⵉⴷⵔⴰⵏ ⵖ ⵜⵡⵉⵣⵉ ⴷ ⵓⵎⵢⴰⵡⴰⵙ ⴷ ⵓⵎⵛⴰⴱⴱⴰⴽ ⴷ ⵓⵙⵎⴰⵇⵇⵍ ⵙ ⵉⵎⴰⵍ ⵙ ⴽⵉⴳⴰⵏ ⵏ ⵜⵎⵢⵉⵎⴰⵏⵜ.

ⵏⵏⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵎⴰⵙ ⵉⵎⵙⴰⵙ ⵓⵙⵏⴼⴰⵔ ⴰⴷ ⴷ ⵓⵙⵡⴰⵍⴰ ⵉⵜⵜⴰⵊⴰⵏ ⵜⴰⵏⴱⴰⴹⵜ ⴰⴷ ⵜⵙⴱⵉⴷⴷ, ⵖ ⵜⵉⵣⵉ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⵓⵙⴰⵏⵏ ⴼ ⵉⵍⵍⴰ ⵓⵙⵉⵡⴹ, ⵜⴰⵣⵣⵉⴳⵣⵜ ⵏ ⴽⵓ ⵉⵙⴰⴽⵓⴷⵏ ⵍⵍⴰⵏⵉⵏ ⵖ ⵉⴹⵕⵉⵚⵏ ⵉⵣⵣⵔⴰⴼⵏ ⴷ ⵉⵎⴰⴷⴷⴰⵙⵏ ⵜⵜⴰⵡⵙⵎⵔⴰⵙⵏⵉⵏ, ⵉⵖ ⵜⵥⵕⴰ ⵎⴰⵙ ⵔⴰⴷ ⴳⵉⵏ ⵎⴳⴰⵍ ⵏ ⵓⵙⴽⵔ ⵏ ⵉⵡⴷⴰⵏ ⵉⵎⵏⵜⴰⵢⵏ ⵙ ⵉⵣⵔⴼⴰⵏ ⵏⵖ  ⵉⵙⵖⵡⴰⵏ ⵏⵏⵙⵏ  ⵖ ⵉⵙⴰⴽⵓⴷⵏ ⴰⴷ ⵙ ⵜⵎⵙⴽⴰⵔ ⵏ ⵜⵏⴱⴰⴹⵉⵏ ⵜⵉⵎⵥⵍⴰⵢ, ⴰⵢⵍⵍⵉ ⵉⵎⵎⴰⵍⴰⵏ ⵜⴰⵍⴷⵢⴰ ⵏ ⵜⵔⵙⵍⵜ ⵜⴰⵣⵣⵔⴰⴼⵜ ⵖ ⵜⵎⵙⵓⵜⵍⵜ ⴰⴷ ⵉⵛⴷⴷⴰⵏ.

ⵖⵔⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⴰⴷ ⵙⵓⵍ ⵢⵉⵍⵉ ⵓⴽⵕⴰⵥ ⵡⴰⵅⵅⴰ ⵉⵍⵍⴰ ⵓⵙⴰⵍⵉ ⴰⵎⴹⴼⵓⵕⴰⵢ ⵏ ⵉⵖⴰⵡⴰⵍⵏ ⵉⴷⵓⵙⴰⵏⵏ, ⵜⵉⵍⵉ ⵜⵙⵏⵙⵉ ⵏ ⵉⵙⵡⵓⴷⴷⵓⵜⵏ ⵉⴷⵓⵙⴰⵏⵏ ⵃⵎⴰ ⴰⴷ ⵓⵔ ⵉⵙⴼⵔⵓⵔⵜ ⵓⴱⴰⵢⵢⵓⵕ ⵖ ⵉⴱⴰⵔⴰⵣⵏ ⵉⵣⵣⵓⵍⴰⵏⵏ ⴷ ⵡⵉⵏ ⵜⵎⴳⵓⵔⵉ ⴷ ⵜⵎⵙⵙⵏⵜⴰⵢ, ⵉⵏⵉⵏ ⵎⴰⵙ ⵉⴳⴰ ⵓⵙⴼⵔⴽ ⵏ ⵉⵏⵎⵓⵔⴰⵏ ⵜⴰⵎⴰⵙⴰⵢⵜ ⵜⴰⵎⴳⵔⵓⵜ.

ⵖⵔⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⴰⴷ ⵢⵉⵍⵉ ⵓⵎⵢⴰⵙ ⵏⴳⵔ ⵉⵙⵖⵡⴰⵏ ⴷ ⵉⵣⵔⴼⴰⵏ, ⴷ ⵜⵡⵉⵙⵉ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ ⵖ ⵓⵙⵡⵓⴷⴷⵓ ⵏ ⵜⴼⵔⴽⴰ, ⴱⴷⵔⵏ ⴽⵔⴰ ⵏ ⵜⵎⵙⴰⵔⵉⵏ ⴷ ⵜⵎⵓⴽⵔⵉⵙⵉⵏ ⵍⵍⵉ ⴷ ⵇⵇⴰⵏⵏ ⵉⴼⵙⵙⴰⵢⵏ ⵖ ⵎⴰⵏⵏ ⵓⵔ ⵢⴰⴳⴳⵓⴳⵏ.