ⴰⵙⵉⵡⴹ ⴼ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 21 ⵢⵓⵏⵢⵓ 2021

ⵉⵙⵏⵎⴰⵍⴰ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⵏⵏⵙ ⵜⴰⵏⵍⴰⵙⵙⴰⵜ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ, ⴰⵢⵏⴰⵙ 21 ⵢⵓⵏⵢⵓ 2021, ⵜⵥⵍⵉ ⵉ ⵜⵉⴹⴰⴼ ⴷ ⵓⵣⵣⵔⴰⴼ ⴷ ⵓⵖⴰⵡⴰⵙ ⵏ ⵓⵙⵇⵇⵉⵎ.

ⴳ ⵜⵣⵡⵉⵔⵉ, ⵉⵙⴰⵡⵍ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴼ ⵜⵎⵙⴰⵔⵜ ⵉⵙⵜⴰⵡⵀⵎⵎⴰⵏ ⵉⵍⵍⴰⵏ ⴳ ⵓⵙⴰⵔⴰⴳ ⴰⵏⴰⵎⵓⵔ ⵉⵥⵍⵉⵏ ⵙ ⵉⵎⵖⵔⵉⴱⵉⵢⵏ ⵏ ⵓⵎⴰⴹⴰⵍ  ⴷ ⵜⵖⵜⴰⵙⵜ ⵜⴰⵏⴼⴳⴰⵏⵜ ⵉⴷⵔⴰⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ, ⵉ ⵓⵕⵥⵥⵓⵎ ⵏ ⵉⵡⵜⵜⴰ ⴷⴰⵜ ⵏ ⵉⵎⵖⵔⵉⴱⵉⵢⵏ ⵏ ⴱⵕⵕⴰ ⴷ ⵉⵙⵡⴰⵍⴰⵢⵏ ⵏⵏⵙ ⵉ ⵜⵏⴱⴰⴹⵉⵏ ⵜⵉⵎⵏⵜⴰⵢⵉⵏ ⴳ ⵡⴰⵙⵙⴰⵢ ⵉ ⵓⵙⵔⵅⵓ ⵏ ⵓⵖⵓⵍ ⵏⵏⵙⵏ ⵙ ⵜⵎⵓⵔⵜ ⵙ ⵡⴰⵜⵉⴳⵏ ⴷ ⵓⵙⴰⵏⵉⵏ ⴷ ⵓⵙⵏⵓⴱⴳ ⵏⵏⵙⵏ ⴳ ⵜⵎⵙⵓⵜⵍⵉⵏ ⵏ ⵓⵙⵓⵏⴼⵓ, ⵢⵉⵏⵉ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵎⴰⵙ ⵙⵓⵜⴳⵏ ⴱⴰⵀⵔⴰ ⵉⵎⵖⵔⵉⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ ⵜⴰⵖⵜⴰⵙⵜ ⴰⴷ.

ⵉⵙⴰⵡⵍ ⵓⵍⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⴼ ⵓⵙⵓⵜⴳ ⵏⵏⵙⵏ ⵉ ⵜⵓⴼⵔⴰⵢⵉⵏ ⵜⵉⵏⴰⵎⵓⵔⵉⵏ ⴰⵜⵜⵓⵢⵏⵉⵏ ⵏ ⵉⵎⵖⵔⵉⴱⵉⵢⵏ ⵏ ⵓⵎⴰⴹⴰⵍ ⴷ ⵜⴰⵢⵔⵉ ⵏⵏⵙⵏ ⵉ ⵜⵎⵓⵔⵜ ⵏⵏⵙⵏ ⴷ ⵜⵢⴰⵏⵜ ⵏⵏⵙ ⵜⴰⵏⴰⴽⴰⵍⵜ ⴷ ⵜⵎⵙⴼⵓⵥⵥⵕⵉⵏ ⵏⵏⵙ, ⵜⵓⴼⵔⴰⵢⵉⵏ ⴰⴷ ⵎⵍⴰⵏ ⵜⵏⵜ ⵉⵎⵖⵔⵉⴱⵉⵢⵏ ⵏ ⵓⵎⴰⴹⴰⵍ ⴳ ⴽⵉⴳⴰⵏ ⵏ ⵉⵣⵎⵓⵣⵣⵓⵜⵏ ⵖ ⵎⵍⴰⵏ ⵜⴰⵣⴷⴰⵢⵜ ⴷ ⵜⵎⵓⵔⵜ ⵏⵏⵙⵏ ⴷ ⵓⵎⵣⴰⵖ ⴼ ⵜⵎⵙⴰⵔⵉⵏ ⵏⵏⵙ ⵜⵓⵍⴳⵉⵏⵉⵏ.

ⴳ ⵜⵡⵓⵔⵉ ⵏ ⵜⵉⴹⴰⴼ: ⵉⵙⵔⵙ ⵓⵙⵉⵔⴰ ⴰⵖⴰⵡⴰⵙ ⵏ ⵜⵖⵉⵎⵉⵜ ⵜⴰⵎⵉⵡⴰⵏⵜ ⵏ ⵡⴰⵢⵏⴰⵙ 28 ⵢⵓⵏⵢⵓ 2021 ⴳ ⵓⵛⴰⵎⵓⵛ ⵉⵥⵍⵉⵏ ⵙ ⵜⵎⵙⴰⵔⵉⵏ ⵜⵉⵏⴰⵎⵓⵏⵉⵏ ⴷ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ.

ⴳ ⵓⵙⵎⵏⵉⴷ ⵏ ⵜⵢⴰⴼⵓⵜ ⵜⴰⴼⵔⴽⴰⵏⵜ ⵏ ⵜⵏⴱⴰⴹⵜ, ⵙ ⵓⵎⵙⴰⵙⴰ ⴷ ⵓⵎⴰⴳⵔⴰⴷ 101 ⵏ ⵓⴷⵓⵙⵜⵓⵔ, ⵔⴰⴷ ⵉⵍⵉⵏⵜ ⵙⵏⴰⵜ ⵜⵖⵉⵎⵉⵜⵉⵏ ⵜⵉⴳⴷⵓⴷⴰⵏⵉⵏ:

- ⵜⴰⵎⵣⵡⴰⵔⵓⵜ, ⴰⵙⵉⵏⴰⵙ 6 ⵢⵓⵍⵢⵓⵣ ⴳ 10, ⵔⴰⴷ ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵜⴰⵢⴰⴼⵓⵜ ⵜⴰⴼⵔⴽⴰⵏⵜ;

- ⵜⵉⵙ ⵙⵏⴰⵜ, ⴰⵙⵉⵏⴰⵙ 13 ⵢⵓⵍⵢⵓⵣ ⵉ ⵓⵎⴹⴰⴽⴰⵕ.

ⴳ ⵓⵣⵣⵔⴰⴼ, ⵔⴰⴷ ⵜⵉⵍⵉ ⵜⵖⵉⵎⵉⵜ ⵜⴰⵎⴰⵜⴰⵢⵜ, ⴰⵙⵉⵏⴰⵙ 22 ⵢⵓⵏⵢⵓ ⴳ 15.30 ⵉ ⵜⵖⵔⵉ ⴷ ⵓⵙⵜⴰⵢ ⵏ ⵉⴹⵕⵉⵚⵏ ⵉⵣⵣⵔⴰⴼⵏ:

1- ⴰⵙⵏⴼⴰⵔ ⵏ ⵓⵙⵍⴳⵏ ⴼ ⵉⵙⵙⵥⵕⴼⵏ ⵎⵥⵥⵉⵏⵉⵏ;

2- ⴰⵙⵏⴼⴰⵔ ⵏ ⵓⵙⵍⴳⵏ ⵉ ⵓⵙⵔⵙ ⵏ ⵉⵙⵡⵓⴷⴷⵓⵜⵏ ⵥⵍⵉⵏⵉⵏ ⵙ ⵓⵙⵖⵏⵣⵉ ⵓⵙⵔⵉⴷ ⵏ ⵉⵛⴰⴽⴰⵏ ⵜⵜⵓⴼⵔⴰⵙⵏⵉⵏ  ⴳ ⵓⵙⴰⵜⵉ ⵏ ⵓⵙⵎⵓⵏ ⴰⵏⴼⵍⴰⵃ;

3- ⴰⵙⵏⴼⴰⵔ ⵏ ⵓⵙⵍⴳⵏ ⴷ ⵜⵔⵇⵇⴰⵙⵜ ⵏ ⵓⵎⵙⴰⵙⴰ;

4- ⵜⴰⵙⵓⵎⵔⵜ ⵏ ⵓⵙⵍⴳⵏ ⴼ ⵜⵙⴷⴰⵍⵉⵏ. ⴷ ⵉⴹⵕⵉⵚⵏ ⵓⵊⴰⴷⵏⵉⵏ.

ⵉⵥⵕⵉ ⵓⵙⵉⵔⴰ ⴰⵙⵏⴼⴰⵔ ⵏ ⵓⵙⵍⴳⵏ 75.19 ⴼ ⵓⵏⴳⵔⴰⵡ ⵏ ⵡⴰⵢⴷⴰ ⵏ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ, ⵢⴰⵣⵏ ⵜ ⵉ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ.

ⴼ ⵜⵡⵓⵔⵉ ⵏ ⵜⵙⵇⵇⵉⵎⵜ ⵉⵜⵜⵓⵙⵎⴰⴳⴰⵍⵏ ⵙ ⵜⵓⵍⴽⵉⵎⵉⵏ ⴷ ⵜⵓⵜⵔⴰⵡⵉⵏ ⴳ ⵓⵣⵣⵔⴰⴼ, ⵉⵥⵕⴰ ⵓⵙⵉⵔⴰ ⵜⴰⵢⴰⴼⵓⵜ ⵏ ⵜⵡⵓⵔⵉ ⵏⵏⵙ ⴷ ⵓⵙⵏⴼⵍ ⵏ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⵉⵎⴰⴷⴷⴰⵙⵏ ⴼ ⵜⵓⵍⴽⵉⵎⵉⵏ ⴷ ⵜⵓⵜⵔⴰⵡⵉⵏ, ⵉ ⵓⵙⵔⵅⵓ ⵏ ⵜⴼⴰⴷⵉⵡⵉⵏ ⵏ ⵓⵙⵔⵓⵙ ⵏ ⵜⵓⵍⴽⵉⵎⵉⵏ ⴷ ⵜⵓⵜⵔⴰⵡⵉⵏ ⴷ ⵜⵉⵍⵉⵜ ⵏ ⵜⵓⵎⴰⵢⵉⵏ ⵜⵉⵎⴰⵢⵏⵓⵜⵉⵏ ⵙⴳ ⵜⵉⵔⵎⵉⵜ ⵏ ⵓⵙⵇⵇⵉⵎ ⴷ ⵜⵉⵔⵎⵉⵜⵉⵏ ⵏ ⵓⵙⵎⵣⴰⵣⴰⵍ.

ⵉⵥⵕⴰ ⵓⵙⵉⵔⴰ ⵏ ⵓⵙⵇⵇⵉⵎ ⵓⵍⴰ ⵜⴰⵣⵣⵉⴳⵣⵜ ⵏ ⵜⵡⵓⵔⵉ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ, ⵔⴰⴷ ⵜⵉⵍⵉ ⵜⵖⵉⵎⵉⵜ ⵜⴰⵣⵣⵔⴰⴼⵜ ⵜⵉⵙ ⵙⵏⴰⵜ ⴳ ⵡⴰⵢⵏⴰⵙ 28 ⵢⵓⵏⵢⵓ ⵉ ⵜⵖⵔⵉ ⴷ ⵓⵣⵣⵔⴰⵢ ⵏ ⵉⵙⵏⴼⴰⵔⵏ ⴷ ⵜⵙⵓⵎⵔⵉⵏ ⵓⵊⴰⴷⵏⵉⵏ.