ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵙⵎⴰⴷ ⵏ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ ⵏ ⵓⵙⴳⴳⵯⴰⵙ ⴰⵣⵣⵔⴰⴼ 2023-2024, ⴰⵙⵉⵏⴰⵙ 6 ⴱⵕⴰⵢⵕ 2024

ⵙ ⵉⵙⵎ ⵏ ⵕⴱⴱⵉ

ⵉⵙⵜ ⵎⴰⵙⵙⴰ, ⵉⴷ ⵎⴰⵙⵙ ⵉⵎⴰⵡⵙⴰⵙⵏ,

ⵜⵉⵏⴳⴳⵯⴰ ⴷ ⵉⵏⴳⴳⵯⴰ,

ⵉⵙⵜ ⵎⴰⵙⵙⴰⴷⵉⴷⵎⴰⵙⵙ,

ⵙ ⵓⵎⵙⴰⵙⴰ ⴷ ⵓⴷⵙⵜⵓⵔ ⴷ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ, ⵏⵍⴽⵎ ⵜⵉⴳⵉⵔⴰ ⵏ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ ⵏ ⵓⵙⴳⴳⵯⴰⵙ ⴰⵣⵣⵔⴰⴼ 2023-2024, ⵏⵙⵎⴷ ⴰⵣⴳⵏ ⴰⵎⵣⵡⴰⵔⵓ ⵏ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵢⴰⵜ ⴷ ⵎⵔⴰⵡⵜ 2021-2026, ⵜⴳⴰ ⴰⵣⵎⵣ ⵉⴱⵓⵖⵍⴰⵏ ⵙ ⵓⴼⴰⵔⵙ ⴳ ⵜⵎⵔⵙⵍⵜ ⵜⴰⵣⵣⵔⴰⴼⵜ ⴳ ⵓⵏⵢⴰⵍⴽⴰⵎ ⵏⵏⵙ ⴷ ⵎⴰⴷ ⵉⵍⵍⴰⵏ ⴳ ⵓⴱⵔⵉⴷ ⵓⵏⴳⵉⵎ ⴷ ⵓⵙⵔⵜⴰⵏ ⴷ ⵓⴷⵎⵙⴰⵏ ⴷ ⵓⵣⵔⴼⴰⵏ ⴷ ⵓⴷⵍⵙⴰⵏ ⴷ ⵓⵡⵏⴹⴰⵏ ⵍⵍⵉ ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵄⵣⵣⵓ ⵕⴱⴱⵉ, ⴷ ⵓⵙⴽⵔ ⵏ ⵓⵙⵎⴰⵇⵇⵍ ⵏⵏⵙ ⵉⵥⵉⵍⵏ, ⵍⵍⵉ ⵉⵣⵣⵉⴳⵣ ⵙ ⵍⵎⵖⵔⵉⴱ ⵙ ⴽⵉⴳⴰⵏ ⵏ ⵓⵙⵎⵖⵔ, ⵉⴼⴽ ⵉ ⵜⴷⵉⵎⵓⵇⵔⴰⵟⵉⵜ ⵜⵓⵎⴰⵢⵜ ⵏⵏⵙ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ ⴷ ⵜⵏⴼⴳⴰⵏⵜ.

ⵟⵟⴰⴼⵏ ⵉⵎⵏⴰⴹⵏ ⵉⴳⵔⴰⵖⵍⴰⵏⵏ ⴷ ⵉⴷⵔⵉⵣⵏ ⵏ ⵜⴰⵙⵙⴰⵙⵉⵏ ⵜⵉⵊⵢⵓⵙⵢⵙⵉⵢⵉⵏ ⴷ ⵜⵎⵏⵜⵍⵉⵏ ⵏ ⵓⵏⵣⵡⵉ, ⵉⴷⵔⵉⵣⵏ ⴼ ⵜⴷⵎⵙⴰ ⵏ ⵜⵎⵉⵣⴰⵔ, ⴳⵉⵙⵏ ⵜⴰⵎⴰⵣⵉⵔⵜ ⵏⵏⵖ ⵉⴱⴷⴷⵏ ⴷⴰⵜ ⵏ ⵉⴷⵔⵉⵣⵏ ⴰⴷ, ⵎⴽ ⵜⵎⵎⴰⵍ ⵜⵣⵣⵉⴳⵣⵜ ⵜⴰⴷⵎⵙⴰⵏⵜ, ⴷ ⴰⴷ ⵜⵙⴽⴰⵔ ⴳ ⵓⵎⴰⵡⴰ ⴰⵙⵉⵍⴰⵏ ⴷ ⵉⵙⵏⴼⴰⵔⵏ ⵉⵅⴰⵜⴰⵔⵏ, ⵙⵍⴰⵡⴰⵏ ⴰⴽⴽⵯ ⵙ ⵓⵙⴽⵔ ⵉⵕⵡⴰⵏ ⴷ ⵓⵛⵛⵉⵍ ⵏ ⵓⵡⴰⵏⴽ ⴰⵏⴰⵎⵓⵏ ⵙ ⵓⴷⵎⴰⵡⵏ ⵏⵏⵙ ⴰⴽⴽⵯ ⵙ ⵓⵣⵣⴳⵉⵔ ⵏ ⵓⵙⵎⴰⵇⵇⵍ ⴷ ⵉⵙⵡⴰⵍⴰⵢⵏ ⵉⴳⵍⴷⴰⵏⵏ ⵉⵎⴰⵜⵜⵓⵢⵏ ⵍⵍⵉ ⵙⵔⵙⵏⵉⵏ ⴰⴼⴳⴰⵏ ⴳ ⵓⴳⵏⵙ ⵏ ⵜⴳⵎⵉ.

ⵜⴰⵖⵍⴰⵖⴰⵍⵜ ⵏ ⵜⵣⵣⵉⴳⵣⵜ ⴰⴷ ⵓⵔ ⵜⵍⵍⵉ ⵖⴰⵙ ⴳ ⵓⵙⵡⵉⵔ ⴰⴳⵯⵏⵙⴰⵏ, ⵜⵟⵟⴰⴼ ⵓⵍⴰ ⵉⵎⵏⴰⴷⵏ ⵉⵊⵢⵓⵙⵢⴰⵙⵉⵢⵏ ⵍⵍⴰⵏⵉⵏ ⴳ ⵓⵙⴷⵓⵙ ⵏ ⵓⵙⴷⵖⵔ ⵏ ⵜⵎⴰⵣⵉⵔⵜ ⵏⵏⵖ ⵉⴳⴰⵏ ⵜⴰⴷⵓⵙⵉ ⵉⵜⵜⵉⵎⵖⵓⵔⵏ, ⵉⵟⵟⴰⴼⵏ ⵉⴷⵔⵉⵣⵏ ⴳ ⵜⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ ⵜⵟⵟⴼ ⴰⵙⵓⵜⴳ ⴷ ⵓⵡⵇⵇⵔ.

ⵉⴳⴰ ⵜⴰⵖⴰⵡⵙⴰ ⵉⴼⴰⵡⵏ ⴰⴷ ⵢⵉⵉⵍ ⵓⵙⵇⵇⵉⵎ ⴳ ⵓⴳⵯⵏⵙ ⵏ ⵜⴷⵉⵏⴰⵎⵉⵜⵉⵏ ⴰⴷ ⵜⵉⵏⴰⵎⵓⵜⵉⵏ ⵜⵉⵏⴰⵎⵓⵔⵉⵏ, ⵉⵙⴽⵔ ⵜⵉⵎⴰⵙⴰⵢⵉⵏ ⵏⵏⵙ ⴷ ⵜⵥⵍⴰⵢⵉⵏ ⵏⵏⵙ ⵜⵉⴷⵙⵜⴰⵔⵉⵏ, ⴳ ⵓⵎⴰⵍⵓ ⵏ ⵜⴼⵍⵙⴰⴼⵜ ⵏ ⵓⵏⴱⴰⴹ ⵏ ⵡⴰⴷⴷⵓⵔ ⴰⴷ ⵜ ⵉⵏⵚⵕ ⵕⴱⴱⵉ ⴷ ⵉⵙⵡⴰⵍⴰⵢⵏ ⵏⵏⵙ ⵉⵎⴰⵜⵜⵓⵢⵏ ⵜⵜⴰⵡⴱⴷⴰⵔⵏⵉⵏ ⴳ ⵉⵏⴰⵡⵏ ⴷ ⵜⴱⵔⴰⵜⵉⵏ ⵜⵉⴳⵍⴷⴰⵏⵉⵏ ⵜⵉⵎⴰⵜⵜⵓⵢⵉⵏ.

ⴳ ⵓⵎⵏⴰⴹ ⴰⴷ, ⴰⵔ ⴷ ⵏⴽⵯⵜⵜⵉ ⵙ ⴽⵉⴳⴰⵏ ⵏ ⵓⵙⵓⵜⴳ ⴷ ⵓⵡⵇⵇⵔ, ⵜⴰⴱⵔⴰⵜ ⵜⴰⴳⵍⴷⴰⵏⵜ ⵜⴰⵎⴰⵜⵜⵓⵢⵜ ⵍⵍⵉ ⵢⵓⵣⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵄⵣⵣⵓ ⵕⴱⴱⵉ ⵉ ⵉⵎⴷⵔⴰⵡⵏ ⴳ ⵜⵉⵏⴰⵡⵜ ⵜⴰⵏⴰⵎⵓⵔⵜ ⵏ ⵓⴱⵕⵍⴰⵎⴰⵏ ⴳ 17 ⵉⵏⵏⴰⵢⵔ 2024 ⴷⴷⴰⵡ ⵉⵡⵉⵣ ⴰⵎⴰⵜⵜⵓⵢ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵙ ⵜⵎⵍⴷⴰ ⵏ ⵓⴽⵜⵜⵓⵢ ⵡⵉⵙ 60 ⵏ ⵜⵉⵍⵉⵜ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴰⵎⵣⵡⴰⵔⵓ ⴳ 1963.

ⵜⴳⴰ ⵜⴱⵔⴰⵜ ⴰⴷ ⵜⴰⴳⵍⴷⴰⵏⵜ ⵜⴰⵎⴰⵜⵜⵓⵢⵜ ⵜⴰⴽⵕⴹⴰ ⵏ ⵓⴱⵔⵉⴷ ⴷ ⵓⵙⴰⴳⵎ ⵍⵍⵉⵖ ⴰⴷ ⵏⵜⵜⴰⵙⵉ ⵉ ⵓⵙⴱⵓⵖⵍⵓ ⵏ ⵜⵡⵓⵔⵉⵡⵉⵏ ⵏⵏⵖ, ⴷ ⵜⵎⴰⵙⴰⵢⵉⵏ ⵏⵏⵖ ⵎⵏⵉⴷ ⵏ ⵓⵚⴽⵓ ⵏⵏⵖ ⴰⴷⵉⵎⵓⵇⵔⴰⵟⵉ ⴰⵎⵔⵙⵍⴰⵏ, ⴷ ⵓⵙⵎⵖⵔ ⵏ ⵜⵉⵕⵡⵉ ⵏ ⵜⵓⴼⵔⴰⵢⵉⵏ ⴷ ⵓⵙⵎⵖⵔ ⵏ ⵜⵏⵓⴼⴰ ⵜⵉⵎⴰⵜⵜⵓⵢⵢⵉⵏ ⵏ ⵜⵎⵓⵔⵜ ⴷ ⵉⵏⵎⵓⵔⴰⵏ. ⴳ ⵓⵣⵣⴳⵉⵔ ⵏ ⵉⵙⵡⴰⵍⴰⵢⵏ ⴰⴷ ⵉⵎⴰⵜⵜⵓⵢⵏ, ⵏⵎⵎⴰⵖ, ⴳ ⵓⵙⵡⵉⵔ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴳ ⵓⵕⵕⵥⵓⵎ ⵏ ⵓⵙⴰⵡⵓⵔ ⵏ ⵓⵍⴳⵏ ⵏ ⵜⵖⴰⵔⵉⵡⵉⵏ ⵜⵉⴱⵔⵍⴰⵎⴰⵏⵉⵢⵉⵏ ⵃⵎⴰ ⴰⴷ ⵉⴳ ⴳ ⵓⵙⵡⵉⵔ ⵏ ⵉⵏⴰⵔⵓⵣⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵄⵣⵣⵓ ⵕⴱⴱⵉ ⴳ ⵎⴰⴷ ⵉⵥⵍⵉⵏ ⵙ ⵜⵣⵣⵉⴳⵣⵜ ⵏ ⵜⵎⴰⴼⴰⵡⵜ ⵏ ⵜⵎⵙⴽⵔⵜ ⵜⴰⴱⵕⵍⴰⵎⴰⵏⵉⵜ, ⴷ ⵓⵙⵎⵖⵔ ⵏ ⵜⵏⴰⴼⵜ ⵜⴰⵎⴰⵜⴰⵢⵜ, ⵃⵎⴰ ⴰⴷ ⵜⴳ ⴰⵍⵓⴳⵏ ⴰⵅⴰⵜⴰⵔ ⵏ ⵜⵖⴰⵔⵉⵡⵉⵏ ⴷ ⵜⵎⵙⴽⵔⵜ ⵉⵜⵜⵓⵙⵖⵣⴰⵏⵏ ⴳ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ, ⵜⵟⵟⴼ ⵜⴰⵖⵍⴰⵍⵖⴰⵍⵜ ⵉⵥⵉⵍⵏ ⴷⴰⵔ ⵓⵎⵏⴰⴷ ⴰⵎⴰⵜⴰⵢ.

ⵡⴰⵜⵜⵙⵏⵜ ⵜⴰⵎⴰⵢⵉⵏ ⵜⵉⵎⴰⵢⵏⵓⵜⵉⵏ ⴰⴳⵉⴷⴷⵉ ⵏ ⵜⵓⴳⵜ ⵏ ⵜⵎⵙⴽⴰⵔ ⴷ ⵡⴰⴷⴷⴰⴷⵏ, ⵙ ⵓⵙⵎⵖⵔ ⵏ ⵓⵙⵖⵡⵏ ⵏ ⵜⵡⵓⵔⵉ ⵉ ⵚⴰⵃⴰ ⴰⵎⴰⵜⴰⵢ, ⴷ ⵜⵉⴽⴽⵉ ⵏ ⵓⵎⴷⵢⴰ ⴳ ⵜⵎⵙⴽⵔⵜ ⵜⴰⵙⵔⵜⴰⵏⵜ, ⴷ ⵓⵙⴽⵔ ⵏ ⵓⵛⵛⵉⵍ ⵙ ⵜⵉⵍⵉⵜ ⵉⵍⴰⵏ ⴰⴼⴰⵔⵙ ⴷ ⵉⵥⵉⵍⵏ.

ⵓⵔ ⴳⵉⵙ ⵜⵓⵔⴷⴰ ⵎⴰⵙ ⵔⴰⴷ ⵢⴰⵡⵙ ⵎⴰ ⴰⵏⵏ ⴳ ⵓⵣⵓⵣⵣⵔ ⵏ ⵡⴰⵜⵉⴳⵏ ⵏ ⵜⴷⵉⵎⵓⵇⵔⴰⵟⵉⵜ ⴷ ⵓⵙⵕⵚⵓ ⵏ ⵓⵡⴰⵏⴽ ⵏ ⵓⵙⵍⴳⵏ ⴷ ⵓⵙⵕⵚⵓ ⵏ ⵜⴷⵍⵙⴰ ⵏ ⵓⵎⵙⴰⵡⴰⵍ ⴷ ⵓⵙⴷⵓⵙ ⵏ ⵜⵎⵢⵉⵎⴰⵏⵜ ⴳ ⵜⵎⵔⵙⴰⵍ, ⵎⴽ ⵍⵍⵉ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ.

ⴳ ⵓⵎⵏⵉⴷ ⵢⴰⴹⵏⵉⵏ, ⵉ ⵓⵙⴽⵔ ⵙ ⵉⵙⵡⴰⵍⴰⵢⵏ ⵉⴳⵍⴷⴰⵏⵏ ⵉⵎⴰⵜⵜⵓⵢⵏ, ⵏⵙⴽⵔ ⵜⴰⵔⴰⴱⴱⵓⵜ ⵏ ⵜⵡⵓⵔⵉ ⴼ ⵜⵖⴰⵡⵙⵉⵡⵉⵏ ⵜⵉⴼⵔⵉⵇⵉⵢⵉⵏ, ⵉ ⵓⵙⵓⵜⴳ ⵏ ⵓⴷⵖⴰⵔ ⵏ ⵜⵣⵡⵉⵔⵉ ⵍⵍⵉ ⵉⵟⵟⴰⴼ ⵓⵎⵏⵥⴰⵡ ⵏⵏⵖ, ⴳ ⵜⵉⵎⵣⵡⵓⵔⴰ ⵏ ⵜⵙⵔⵜⵉⵜ ⵏ ⴱⵕⵕⴰ ⵏ ⵜⴳⵍⴷⵉⵜ ⵎⴽ ⵍⵍⵉ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴳ ⵜⴱⵔⴰⵜ ⵏⵏⵙ ⵜⴰⵎⴰⵜⵜⵓⵢⵜ.

ⵉⵙⵜ ⵎⴰⵙⵙ ⴷ ⵉⴷ ⵎⴰⵙⵙ,

ⵙ ⵜⵎⵍⴷⴰ ⵏ ⵓⵙⵎⴰⴷ ⵏ ⵜⵙⵓⵜⵍⵜ ⴰⴷ, ⵔⴰⴷ ⵙⵎⵏⵉⴷⵖ ⵜⵉⵎⵉⵜⴰⵔ ⵏ ⵜⵢⴰⴼⵓⵜ ⵏ ⵓⵙⵇⵇⵉⵎ ⴳ ⵓⴳⵣⵣⵓⵎ ⴰⵎⵣⵡⴰⵔⵓ ⵏ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵢⴰⵜ ⴷ ⵎⵔⴰⵡⵜ ⵎⴽ ⵜⴳⴰ ⵜⵎⵢⵓⵔⵜ. ⴳ ⵓⵙⴽⵔ ⵏ ⵜⵥⵍⴰⵢⵜ ⵏ ⵜⵉⴹⴰⴼ, ⵙ ⵉⵙⵇⵙⵉⵜⵏ ⵉ ⵜⵏⴱⴰⴹⵟ, ⵔⵉⵖ ⴰⴷ ⵙⵓⵜⴳⵖ ⴰⵙⵎⵔⵙ ⵉⵥⵉⵍⵏ ⵏ ⵉⵎⵉⵙⵙ ⴰⴷ ⵙⴳ ⵎⴰⵕⵕⴰ ⵉⴼⵔⴷⵉⵙⵏ ⵏ ⵓⵙⵇⵇⵉⵎ, ⴰⵢⵍⵍⵉ ⵉⵍⵍⴰⵏ ⴳ ⵡⴰⵏⴰⵡ ⵏ ⵉⵙⵇⵙⵉⵜⵏ ⴷ ⵓⵙⵡⴰⵍⴰⵢ ⵏⵏⵙⵏ ⴷ ⵓⴱⴷⴷⴰⴷ ⵏⵏⵙⵏ ⴼ ⵜⵎⵙⴰⵔⵉⵏ ⵏ ⵉⵖⵍⴰⴷ, ⴷ ⵉⴳⵔⴰⵏ ⵉⵡⵉⵏⵉⵏ ⵜⴰⵢⵏⵉⵜ ⵏ ⵓⵎⵏⴰⴷ ⴰⵎⴰⵜⴰⵢ ⴰⵏⴰⵎⵓⵔ. ⵉⵇⵇⴰⵏ ⴷ ⵓⵙⵓⵜⴳ ⵏ ⵓⵏⵢⴰⵍⴰⴽⵎ ⵏ ⵜⵏⴱⴰⴹⵜ ⴰⴽⴷ ⵉⵙⵇⵙⵉⵜⵏ ⴰⴷ.

ⵙ ⵉⵣⵡⵉⵍⵏ, ⵉⵍⴽⵎ ⵓⵟⵟⵓⵏ ⵏ ⵜⵖⵉⵎⵉⵜⵉⵏ ⵜⵉⵎⴰⵜⴰⵢⵉⵏ ⵍⵍⵉ ⴼ ⵉⵔⴰⵔ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴼ ⵉⵙⵇⵙⵉⵜⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⴳ ⵓⴳⵣⵣⵓⵎ ⴰⵎⵣⵡⴰⵔⵓ ⵏ ⵜⵡⴰⵍⴰ, 12 ⵏ ⵜⵖⵉⵎⵉⵜ ⴼ ⵉⵔⵓⵔ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴼ ⴽⵕⴰⴹ ⵡⴰⴳⵏⴰⵔⵏ ⵏ ⵓⵙⵇⵙⵉ (60) ⵣⴷⵉⵏⵉⵏ ⴷ ⵜⵙⵔⵜⴰⵢ ⵜⵉⵎⴰⵜⴰⵢⵉⵏ ⴳ ⵉⴳⵔⴰⵏ ⵏ ⵓⴼⵔⴰⴳ ⴰⵏⴰⵎⵓⵏ, ⴰⵙⵙⴰⵔⵓ, ⴰⴷⵡⴰⵙ, ⴰⵙⵙⵍⵎⴷ, ⵜⴰⴷⵍⵙⴰ ⴷ ⵓⵙⵉⵥⴹⵕ ⴰⴷⵎⵙⴰⵏ ⴷ ⵓⵙⵔⵜⴰⵏ ⵏ ⵜⵎⵖⴰⵔⵉⵏ, ⴰⴷⴷⴰⴷ ⵏ ⵜⴷⵎⵙⴰ ⵜⴰⵏⴰⵎⵓⵔⵜ ⴳ ⵓⵎⵏⴰⴷ ⴰⴳⵔⴰⵖⵍⴰⵏ, ⴷ ⵜⵎⵙⴰⵔⵉⵏ ⵉⵡⵉⵏⵉⵏ ⴰⵅⵎⵎⴻⵎⴰ ⵅⴰⵜⴰⵔ ⵙⴳ ⵓⵎⵏⴰⴷ ⴰⵎⴰⵜⴰⵢ ⵙⴳ ⵜⵏⴱⴰⴹⵜ ⴷ ⵜⵎⵔⵙⴰⵍ ⵢⴰⴹⵏⵉⵏ.

ⵉⵍⴽⵎ ⵓⵏⵛⴽ ⵏ ⵜⵖⵉⵉⵜⵉⵏ ⵜⵉⵎⴰⵜⴰⵢⵉⵏ ⵏ ⵉⵎⴰⵍⴰⵙⵙ ⵏ ⵉⵙⵇⵙⵉⵜⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⴷ ⵜⵎⵔⴰⵔⵓⵜⵉⵏ ⵏ ⵉⴳⵎⴰⵎⵏ ⵏ ⵜⵏⴱⴰⴹⵜ, 62 ⵏ ⵜⵖⵉⵎⵉⵜ ⴳ ⵉⵍⵍⴰ ⴰⵙⵖⵉⵡⵙ ⵏ 1849 ⵏ ⵓⵙⵇⵙⵉ, ⴼ ⵜⵔⵓⵔ ⵜⵏⴱⴰⴹⵜ. ⵉⵇⵇⴰⵏ ⴷ ⵓⵙⵉⵙⴼⵉⵡ ⵎⴰⵙ ⴷ ⴰⵙⵖⵉⵡⵙ ⵏ ⵉⵙⵇⵙⵉⵜⵏ ⵉⵎⵉⵡⴰⵏⵏ ⴳ ⵜⵖⵉⵎⵉⵜ ⵜⴰⴷⵙⵜⴰⵔⵜ ⵜⴰⵏⵎⵍⴰⵙⵙⵜ ⵉⵣⴷⵉ ⴷ ⵉⵙⵖⵍⵏ ⵏ ⵓⵣⵎⵣ ⴷ ⵓⴱⵟⵟⵓ, ⴰⵢⵍⵍⵉ ⵉⵎⵎⴰⵍⴰⵏ ⵎⴰⵙ ⴷ ⴰⵙⵖⵣⵏ ⵏ ⵜⵎⵔⴰⵔⵓⵜⵉⵏ ⴷ ⴰⵙⵖⵍ ⵏ ⵓⵙⵓⵜⴳ ⵏ ⵜⵡⵓⵔⵉ ⵓⵔ ⵉⵣⴷⵉ ⴷ ⵓⵙⵖⵍ ⵏ ⵜⵙⴳⵓⵎⴰⵏⵜ ⵍⵍⵉⵖ ⵙⵎⵏⵉⴷⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵓⴳⴳⴰⵔ ⵏ 9 ⵉⴼⴹⴰⵡⵏ ⵏ ⵓⵙⵇⵙⵉ ⵉ ⵜⵏⴱⴰⴹⵜ. ⵏⵣⵎⵎⵉⵎ ⵎⴰⵙ ⵜⵔⵓⵔ ⵜⵏⴱⴰⴹⵜ ⴼ 10292 ⵏ ⵓⵙⵇⵙⵉ ⴰⵎⵉⵔⴰⵢ ⵙⴳ 14640 ⵏ ⵓⵙⵇⵙⵉ, ⵙ ⵎⴰⴷ ⵉⵍⴽⵎⵏ 70 % ⵏ ⵜⵎⵔⴰⵔⵓⵜⵉⵏ.

ⵍⵍⵉⵖ ⵏⵣⵎⵎⵉⵎ ⴰⵏⵢⴰⵍⴰⴽⵎ ⴰⴷ ⵉⵥⵉⵍⵏ ⵊⴰⵔ ⵜⵉⵏⴱⴰⴹⵉⵏ ⵜⴰⵣⵣⵔⴰⴼⵜ ⴷ ⵜⵎⵣⵣⴳⴰⵔⵜ, ⴰⵏⴰⵔⵓⵣ ⵏⵏⵖ ⴰⵎⴳⵔⵓ, ⴰⴷ ⵏⵚⴽⵓ ⴼ ⵜⵣⵣⵉⴳⵣⵜ ⴰⴷ ⵉ ⵓⵙⴽⵔ ⵏ ⵓⵙⵖⵍ ⵉⴳⴳⵓⵜⵏ ⵏ ⵓⵏⵢⴰⵍⴰⴽⵎⴰ ⴽⴷ, ⵉⵙⵇⵙⵉⵜⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ.

ⴳ ⵓⵎⵏⵉⴷ ⵢⴰⴹⵏⵉⵏ, ⵜⵇⵇⴰⵏ ⴷ ⵜⵎⵢⴰⴷⴰⵙⵜ ⵏ ⵜⵉⴹⴰⴼ ⵏⵜ ⵡⵓⵔⵉ ⵜⴰⴱⵕⵍⴰⴰⵎⵏⵉⵜ, ⵙ ⵉⵙⵇⵙⵉⵜⵏ ⵙ ⵜⵎⵥⵍⴰ ⵏ ⵜⵢⴰⴼⵓⵜ, ⴷ ⵓⵙⵡⵓⵔⵉ ⴼ ⵜⵎⵙⴰⵔⵉⵏ ⵏ ⵖⵉⵍⴰⴷ, ⴷ ⵜⵡⵉⵣⵉ ⴳ ⵓⵎⴹⴰⴽⴰⵕ ⴳ ⵓⴳⵯⵏⵙ ⵏ ⵓⵙⵇⵇⵉⵎ ⴳ ⵓⵙⴱⵓⵖⵍⵓ ⵏ ⵓⵎⴹⴰⴽⴰⵔ ⴰⴳⴷⵓⴷⴰⵏ, ⵉⴳ ⵡⴰⴷ ⵉⴳⴰⵏ ⴰⴱⵉⴷⴰⵖⵓⵊⵉ ⴷ ⵡⵉⵏ ⵓⴼⴰⵔⵙ. ⴳ ⵓⵎⵏⴰⴹ ⴰⴷ, ⵉⵇⵇⴰⵏ ⴷ ⴰⴷ ⵏⴽⵜⵉ ⵎⴰⵙ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵏⵚⵕ ⵕⴱⴱⵉ ⴳ ⵜⴱⵔⴰⵜ ⵏⵏⵙ ⵜⴰⵎⴰⵜⵜⵓⵢⵜ ⵙ ⵜⵎⵍⴷⴰ ⵏ ⵓⴽⵜⵜⵓⵢ ⵡⵉⵙ 60 ⵏ ⵓⵙⴽⵔ ⵏ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ. ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ: “ⵉⵇⵇⴰⵏ ⴷ ⵓⵙⴷⴷⵉⴷ ⴼ ⵜⵉⵍⴰⵍⵜ ⵜⴰⵅⴰⵜⴰⵔⵜ ⵍⵍⵉ ⴷ ⵉⵇⵇⴰⵏ ⴰⴷ ⵉⵙⴽⴰⵔ ⵓⴱⵔⵍⴰⵎⴰⵏ ⴳ ⵓⵣⵓⵣⵣⵔ ⵏ ⵡⴰⵜⵉⴳⵏ ⵏ ⵜⴷⵉⵎⵓⵇⵔⴰⵟⵉⵜ ⴷ ⵓⵙⵕⵚⵓ ⵏ ⵓⵡⴰⵏⴽ ⵏ ⵓⵙⵍⴳⵏ ⴷ ⵓⵙⵕⵚⵓ ⵏ ⵜⴷⵍⵙⴰ ⵏ ⵜⵎⴷⵔⴰⵡⵜ ⴷ ⵓⵎⵙⴰⵡⴰⵍ ⴷ ⵓⵙⴷⵓⵙ ⵏ ⵜⵎⵢⵉⵎⴰⵏⵜ ⴳ ⵜⵎⵔⵙⴰⵍ ⵜⵜⴰⵡⵙⵜⴰⵢⵉⵏⵉ”. ⵉⵙⵎⴷ ⵡⴰⵡⴰⵍ ⴰⴳⵍⴷⴰⵏ.

ⵙ ⵖⵎⴽ ⴰⵏⵏ, ⵉⵇⵇⴰⵏ ⴰⵖ ⴷ, ⵓⵔⵣⵣⵓ ⵏ ⵡⴰⵏⴰⵡ ⴷ ⵜⵉⵕⵡⵉ ⴷ ⵓⵙⵡⵉⵔ ⵏ ⵓⵎⴹⴰⴽⴰⵕ ⴷ ⵜⵓⵎⴰⵢⵜ ⵏⵏⵙ ⴷ ⵜⵢⴰⴼⵓⵜ ⵏⵏⵙ ⴷ ⵓⴷⵔⵉⵣ ⵏⵏⵙ ⴼ ⵡⴰⵎⵓⵏ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⵓⵔ ⵔⴰⴷ ⵏⴳ ⵉⵙⴳⵓⵎⴰⵏⵏ ⵉⵖ ⵏⵣⴳⵣⵍ ⵜⴰⵡⵓⵔⵉ ⵏ ⵜⵉⴹⴰⴼ ⵖⴰⵙ ⴳ ⵉⵙⵇⵙⵉⵜⵏ ⵉ ⵜⵏⴱⴰⴹⵟ. ⴳⴰⵏⵜ ⵜⵙⵇⵇⵉⵎⵉⵏⵜ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⵓⵍⴰⵏⵉⵏ ⴰⵙⴰⵜⵉ ⵏ ⵓⵏⵢⴰⵍⴽⴰⵎ ⵊⴰⵔ ⵉⴳⵎⴰⵎⵏ ⵏ ⵓⵙⵇⵇⵉⵎ ⴷ ⵜⵏⴱⴰⴹⵜ ⴼ ⵜⵎⵙⴰⵔⵉⵏ ⴳⴰⵏⵉⵏ ⵜⵉⵏ ⵖⵉⵍⴰⴷ, ⵙⵖⴰⵡⵙⴰⵏⵜ ⵙ ⵓⵙⵎⴽⵍ ⵙ ⵓⵎⵙⴰⵡⴰⵍ.

ⵙ ⵖⵎⴽ ⴰⵏⵏ, ⵙⵡⵓⵔⵉⵏⵜ ⵜⵙⵇⵇⵉⵎⵉⵏ ⴰⴷ ⴳ ⵓⴳⵣⵣⵓⵎ ⵏ ⵜⵡⴰⵍⴰ ⴼ ⵓⵎⴹⴰⴽⴰⵕ ⵏ 366 ⵏ ⵓⵙⵏⵜⵍ ⵉⴳⴰⵏ ⵙⴳ 781 ⵏ ⵜⵓⵜⵔⴰⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴳⵉⵙⵏ 53 ⵏ ⵓⵙⵏⵜⵍ ⴼ ⵙⴽⵔⵏⵜ ⵜⵙⵇⵇⵉⵎⵉⵏ 32 ⵏ ⵜⵙⵎⵓⵏⵉ ⴳ ⵜⵙⵓⵜⵍⵜ ⵏ ⴽⵟⵓⴱⵕ 2023-2024.

ⴳⴰⵏⵜ ⵜⵎⵙⴰⵔⵉⵏ ⵏ ⵡⴰⵎⴰⵏ ⴷ ⵓⵙⵡⵓⴷⴷⵓ ⴳ ⵓⵎⵏⴰⴹ ⵏ ⵜⵖⴰⵔⵜ, ⵉⴱⵔⴷⴰⵏ, ⵉⴷⵔⵉⵣⵏ ⵏ ⵓⵎⴷⵓⴷⵉ ⵍⵍⵉ ⵢⵓⵜⵏ ⴽⵔⴰ ⵏ ⵜⵙⴳⴳⵉⵡⵉⵏ ⵏ ⵍⵎⵖⵔⵉⴱ ⴳ ⵡⵉⵙ 8 ⵛⵓⵜⴰⵏⴱⵉⵔ 2023, ⴰⵙⴳⵎⵉ ⴷ ⵓⵙⵍⵎⴷ ⴷ ⵓⵙⵎⵓⵜⵜⴳ ⴷ ⵜⵎⵙⴰⵔⵉⵏ ⵏ ⴱⵕⵕⴰ, ⵜⴰⵏⴼⵔⵓⵜ ⵏ ⵓⵜⵛⵓ, ⵜⴰⴼⵍⵍⴰⵃⵜ, ⵜⴰⵎⴰⴼⴰⵡⵜ ⵏ ⵜⵓⴷⵔⵜ ⵜⴰⵎⴰⵜⴰⵢⵜ ⵙⴳ ⵉⵙⵏⵜⵍⵏ ⵉⵡⵉⵏⵉⵏ ⴰⵅⵎⵎⴻⵎ ⵏ ⵜⵙⵇⵇⵉⵎⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⵓⵍⴰⵏⵉⵏ, ⴳ ⵓⵙⴽⵔ ⵏ ⵜⵥⵍⴰⵢⵉⵏ ⵏⵏⵙⵏⵜ ⴳ ⵜⵉⴹⴰⴼ ⵖⵎⴽ ⴰⵏⵏ ⴷ ⵜⵙⵎⵓⵏⴰⵢ ⵍⵍⵉ ⵙⴽⵔⵏⵜ ⴳ ⵓⵙⴰⵜⵉ ⵏ ⵜⵙⵎⵉⴳⴰⵍ ⵏⵏⵙ ⵜⵉⵣⵣⵔⴰⴼⵉⵏ, ⵍⴽⵎⵏⵜ ⴳ ⵓⴳⵣⵣⵓⵎ ⵏ ⵜⵡⴰⵍⴰ 385 ⵏ ⵜⵙⵎⵓⵏⵉ.

ⴰⵔ ⵉⵎⵎⴰⵍ ⵓⵙⵖⵍ ⴰⴷ ⴰⵅⴰⵜⴰⵔ ⴳ ⵜⵡⵓⵔⵉ ⵏ ⵜⵙⵇⵇⵉⵎⵉⵏ ⵉⵡⵉⵣ ⵏ ⵜⵏⴱⴰⴹⵉⵏ ⵜⴰⵣⵣⵔⴰⴼⵜ ⴷ ⵜⵎⵣⵣⴳⴰⵔⵜ ⴼ ⵓⵔⵣⵣⵓ ⵏ ⵉⴼⵙⵙⴰⵢⵏ ⵉ ⵜⵎⵙⴰⵔⵉⵏ ⴳⴰⵏⵉⵏ ⴰⵙⵏⵜⵍ ⵏ ⵉⵙⵇⵙⵉⵜⵏ ⴷ ⴼⴼⵉⵕ ⵏ ⵓⵙⵙⵏ ⵏ ⵓⵎⵏⴰⴹ ⴷ ⵜⵎⵏⵜⵍⵉⵏ ⵏⵏⵙⵏⵜ. ⵉⴳⴰ ⵓⵏⴰⵔⵓⵣ ⴰⴳⵔⵓ, ⴳ ⵓⵙⵇⵇⵉⵎ, ⵜⵓⵣⵍⵜ ⵓⵍⴰ ⵜⵓⴳⵜ, ⴳ ⵜⵏⴱⴰⴹⵜ, ⴷ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ, ⵜⴰⵡⴰⴼⵉⵜ ⵏ ⵉⴼⵙⵙⴰⵢⵏ ⵉ ⵜⵎⵓⴽⵔⵉⵙⵉⵏ, ⴷ ⴰⴷ ⵜⴼⵔⴽ ⴽⵓ ⵜⴰⵙⴳⴰ ⵜⵉⵎⴰⵙⴰⵢⵉⵏ ⴷ ⵓⵛⵛⵉⵍⵏ ⵏⵏⵙ ⵃⵎⴰ ⴰⴷ ⴳⵉⵏⵜ ⵜⵏⵓⴼⴰ ⵜⵉⴳⴷⵓⴷⴰⵏⵉⵏ ⵜⵉⵏ ⴽⵓⵢⴰⵏ, ⵢⵉⵍⵉ ⵓⵙⵉⴷⴼ ⴰⵎⴰⴼⴰⵡ ⵙ ⵜⵏⵓⴼⴰ ⵜⵉⴳⴷⵓⴷⴰⵏⵉⵏ ⵙ ⵜⵉⵕⵡⵉ ⴷ ⵢⵓⵙⴰⵏ, ⴳⵉⵏⵜ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵜⵉⴷ ⴼⴰⵔⵙⵏⵉⵏ ⴰⴷⵔⵉⵙ ⵉⵥⵉⵍⵏ ⴼ ⵜⵓⴷⵔⵜ ⵏ ⵉⵏⵎⵓⵔⴰⵏ, ⴷ ⵜⵎⴽⵕⴹⵉ ⵜⴰⴳⴷⵓⴷⴰⵏⵜ ⵜⴰⴷ ⵉⵙⴽⴰⵔⵏ ⵜⴰⵢⴰⴼⵓⵜ ⴷ ⵓⵙⵏⴼⵍ ⴷ ⵜⵣⵣⵉⴳⵣⵜ.

ⴰⵔ ⵜⵜⵉⵏⵉⵖ ⵖⵎⴽ ⴰⴷ ⴰⵛⴽⵓ ⴼⵔⴽⵛ, ⵎⵇⵇⴰⵔ ⵎⵎⵣⵔⵉⵏⵜ ⵜⵎⵢⴰⴷⴰⵙⵉⵏ ⴷ ⵉⵙⴰⵇⵇⵎⵏ ⴷ ⵉⵙⵏⵜⵉⵢⵏ ⵏⵏⵖ ⵉⵙⵔⵜⴰⵏⵏ, ⵀⴰⵜⵉ ⴰⵔ ⵏⵜⵎⵉⵇⵇⵉⵔ ⴳ ⵡⴰⵡⵜⵜⴰⵙ ⴰⵎⴰⵜⵜⵓⵢ ⵉⵥⵉⵍⵏ, ⵡⵉⵏ ⵜⵏⵓⴼⴰ ⵏ ⵜⵎⵓⵔⵜ ⴷ ⵉⵏⵎⵓⵔⴰⵏ ⴷ ⵜⵏⵎⵓⵔⴰⵢⵉⵏ. ⵜⵉⵏ ⴰⴷ ⴳⴰⵏⵜ ⵜⵏⴰⵥⴰⵕⵉⵏ ⵙ ⵉⵖⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵄⵣⵣⵓ ⵕⴱⴱⵉ ⵉ ⵡⴰⵍⴰⵢ ⵏⵏⵙⵏⵜ: “ⴰⵙⵎⵖⵔ ⵏ ⵜⵏⵓⴼⴰ ⵜⵉⵎⴰⵜⵜⵓⵢⵢⵉⵏ ⵏ ⵜⵎⵓⵔⵜ ⴷ ⵉⵏⵎⵓⵔⴰⵏ ⴼ ⵜⵉⴷ ⵉⵙⵉⵟⵏⵏ ⵏ ⵉⴽⴰⴱⴰⵕⵏ ⵉⵙⵔⵜⴰⵏⵏ”.

ⴳ ⵓⵎⵏⴰⴷ ⵏ ⵜⵉⴹⴰⴼ ⵉⵥⵍⵉⵏ ⵙ ⵓⵙⴼⵙⵉ ⵏ ⵜⵎⵓⴽⵔⵉⵙⵉⵏ ⵏ ⵓⵙⴽⵔ ⴰⴳⴷⵓⴷⴰⵏ, ⴳⴰⵏⵜ ⵜⵙⵎⵉⴳⴰⵍ ⵏ ⵓⵙⴰⴳⴳⵯ ⵏ ⵜⵙⵇⵇⵉⵎⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⵓⵍⴰⵏⵉⵏ, ⵉⵎⵉⵙⵙ ⵉⵕⵡⴰⵏ, ⵉⴼⵙⵓⵙⵏ ⵉⴳⴰⵏ ⵓⵛⵛⵉⵍ ⵉ ⵓⴱⴷⴷⴰⴷ ⴼ ⵓⵙⵡⵓⴷⴷⵓ ⵏ ⵜⵎⵔⵙⴰⵍ, ⵏⵖ ⵜⵉⵏⵓⴼⴰ ⵜⵉⴳⴷⵓⴷⴰⵏⵉⵏ ⴷ ⵓⵙⵓⵊⴷ ⵏ ⵏ ⵉⵏⵇⵇⵉⵙⵏ ⴷ ⵉⵙⵖⵍⴰⴼ ⵉ ⵓⵙⵖⵓⴷⵓ.

ⴳ ⵓⵎⵏⵉⴷ ⴰⴷ, ⵉⴼⴽⴰ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵣⴳⵏ ⴰⵎⵣⵡⴰⵔⵓ ⵏ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵓⵔⴰⴳⵜ ⵉ ⵓⵙⴽⵔ ⵏ ⵎⵔⴰⵡⵜ ⵜⵙⵎⵉⴳⴰⵍ ⵏ ⵓⵙⴰⴳⴳⵯ ⴼ ⵜⵎⵙⴰⵔⵉⵏ ⵏ ⵖⵉⵍⴰⴷ ⴰⵎ ⵜⵉⵍⴰⵡⵜ ⵏ ⵓⵥⵟⵟⴰ ⵏ ⵓⴱⵟⵟⵓ ⴷ ⵓⵙⵖⵏⵣⵉ ⵏ ⵉⵢⴰⴼⵓⵜⵏ ⵉⵏⴼⵍⴰⵃⵏ, ⴷ ⵡⴰⴷⴷⴰⴷ ⵏ ⵓⵖⴱⴰⵍⵓ ⵏ ⵓⵎⵎ ⵕⵕⴱⵉⵄ ⴷ ⵓⵔⵔⵓⵢ ⵏ ⵡⴰⵎⴰⵏ ⴳ ⵡⴰⵙⵉⴼ ⴰⴷ ⵉⵙⵜⴰⵡⵀⵎⵎⴰⵏ, ⵙⵏⴰⵜ ⵜⵙⵎⵉⴳⴰⵍ ⵍⵍⵉ ⵎⵓ ⵉⵍⵍⴰ ⵓⵎⴹⴰⴽⴰⵕ ⵏ ⵉⵏⵇⵇⵉⵙⵏ ⵏⵏⵙⵏⵜ ⴳ ⵜⵖⵉⵎⵉⵜⵉⵏ ⵜⵉⴳⴷⵓⴷⴰⵏⵉⵏ.

ⴳ ⵓⵙⵎⵀⵍ ⵏ ⵜⵙⵎⵉⴳⴰⵍ ⵏ ⵓⵙⴰⴳⴳⵯ, ⵙⵡⵓⵔⵉⵏⵜ ⵜⵙⵇⵇⵉⵎⵉⵏ ⵙ ⵜⵎⵙⴰⵔⵉⵏ ⵏ ⵉⵣⵓⵖⴰⵣ ⴷ ⵜⵎⵕⵚⵉⵟⵉⵏ ⵏ ⵓⵏⴱⴷⵓ, ⴰⵙⵉⵊⵊⵉ ⵓⵍⴳⵉⵏⵏ, ⵉⴱⵔⴱⵔⵉⴷⵏ, ⴰⴷⴷⴰⴷ ⵏ ⵜⵣⴷⵓⵖⵉⵏ ⵜⵉⵙⴷⴰⵡⴰⵏⵉⵏ ⵜⵉⵎⴰⵜⴰⵢⵉⵏ, ⵜⵉⵎⵏⵜⵍⵉⵏ ⵏ ⵓⵙⵏⵓⴱⴳ ⵏ ⵉⵎⵖⵔⵉⴱⵉⵢⵏ ⵏ ⴱⵕⵕⴰ.ⴳⴰⵏ ⴰⴽ ⵉⵙⵏⵜⵍⵏ ⴰⴷ ⴼ ⵡⵓⵔⵉⵏⵜ ⵜⵙⵎⵉⴳⴰⵍ ⵏ ⵓⵙⴰⴳⴳⵯ, ⵡⵉⴷ ⵏ ⵖⵉⵍⴰⴷ ⵙⵜⴰⵡⵀⵎⵎⴰⵏⵉⵏ, ⴷⴰ ⵙⴷⴷⵉⴷⵖ ⵜⵉⴽⴽⵍⵉⵜ ⵢⴰⴹⵏⵉⵏ, ⴼ ⵓⵛⵛⵉⵍ ⵏ ⵓⵙⵎⵓⵏ ⵊⴰⵔ ⵓⵙⵇⵇⵉⵇ ⵏ ⵜⵎⵓⵛⴰ ⴷ ⵉⵏⵖⵎⵉⵙⵏ ⴷ ⵓⵣⵓⵛⵛⵍ ⵏ ⵓⵙⵓⵊⴷ ⵏ ⵉⵏⵇⵇⵉⵙⵏ ⴷ ⵓⵙⵖⵣⵏ ⵏ ⵉⵙⵖⵍⵏ ⵏ ⵜⵏⵖⵔⵓⴼⵜ ⴳ ⵓⵚⴽⵓ ⵏⵏⵙⵏ, ⴷ ⵜⵉⵕⵡⵉ ⴳ ⵓⵙⵡⵓⴷⴷⵓ ⵏ ⵓⵣⵎⵣ ⴰⴱⵕⵍⴰⵎⴰⵏⵉ ⴷ ⵓⵡⵇⵇⵔ ⵏ ⵉⵣⵎⴰⵣ ⵏ ⴽⴰ ⵜⴰⵙⵎⵉⴳⵍⵜ, ⴷ ⵓⵙⵔⵙ ⵏ ⵉⵙⵖⵍⴰⴼ ⵍⴰⵏⵉⵏ ⵉⵡⵜⵜⴰⵙ.

ⵉⴳⴰ ⵡⴰⵡⵜⵜⴰⵙ ⴰⴷ ⵏⵙⴽⵔ ⴰⵏⵛⴽ ⵉⴳⴳⵓⵜⵏ ⵏ ⵜⵙⵎⵉⴳⴰⵍ ⵏ ⵓⵙⴰⴳⴳⵯ ⵏⴽⵙⵔ ⴰⵎⴹⴰⴽⴰⵕ ⵏⵏⵙⵏⵜ ⵙ ⵜⴷⵔⴰⵡⵏ ⵏ ⵜⵏⴱⴰⴹⵜ ⵜⴰⵣⵣⵔⴰⴼⵜ ⵉ ⵓⵎⵓⴽⵏ ⵉ ⵎⴰⴷ ⵉⵇⵇⴰⵏ, ⵓⵔ ⵉⴳⵉ ⵍⵃⴰⵍ ⵖⴰⵙ ⴰⵙⵓⵜⴳ ⵓⵍ ⵜⵉⵙⵇⵇⵉⵎⵉⵏ ⵏ ⵓⵣⵣⵔⴰⵢ ⵟⵟⴰⴼⵏⵉⵏ ⵜⵉⵔⵙⴰⵍ ⵏⵏⵙⵏⵜ ⵜⵉⴷⵙⵜⴰⵔⵉⵏ ⴷ ⵜⵎⴰⴷⴷⴰⵙⵉⵏ ⴷ ⵜⵎⵙⴽⴰⵔⵉⵏ, ⵎⴰⵛ ⵙ ⵉⵎⵉⵙⵙ ⴳ ⵉⵍⵍⴰ ⵓⵍⴳⴳⵓⴷ ⴷ ⵜⴱⵔⵉⴷⵉⵏ ⴱⵙⵓⵙⵏⵉⵏ, ⵙ ⵜⵢⴰⴼⵓⵜ ⵉⴳⴳⵓⵜⵏ ⵉⵖ ⵏⵥⴹⴰⵕ ⴰⴷ ⵜⵏⵜ ⵏⵙⴽⵔ ⵙ ⵉⵙⵍⴳⵏⵏ ⴼ ⵜⵉⵕⵡⵉ ⴷ ⵉⵇⵇⴰⵏⵏ, ⴳ ⵉⵖ ⵏⵎⵎⴰⵖ ⴼ ⵓⴹⴼⵕ ⵏ ⵓⵙⴽⵔ ⵏ ⵉⵙⵖⵍⴰⴼ ⴳⴰⵏⵉⵏ ⵜⴰⵢⴰⴼⵓⵜ ⵏ ⵜⵡⵓⵔⵉⵡⵉⵏ ⵏⵏⵙⵏⵜ.

ⵜⵉⵏⴳⴳⵯⴰ ⴷ ⵉⵏⴳⴳⵯⴰ

ⵉ ⵓⵙⴽⵔ ⵏ ⵉⴱⴹⵉⵢⵏ ⵏ ⵓⴷⵓⵙⵜⵓⵔ, ⴷ ⵓⵎⵢⴰⵡⴰⵙ ⴷ ⵓⵙⵎⴰⴷ ⵊⴰⵔ ⵜⵉⵏⴱⴰⴹⵉⵏ, ⵏⵎⵎⴰⵖ ⴼ ⵓⵙⵎⵀⵍ ⵏ ⵜⵣⴷⴰⵢⵉⵏ ⴰⴽⴷ ⵜⵉⵎⵔⵙⴰⵍ ⵢⴰⴹⵏⵉⵏ ⵜⵉⴷⵙⵜⴰⵔⵉⵏ ⴷ ⵜⴳⵔⴰⵡⵉⵏ ⵏ ⵜⵏⵏⵓⴱⴹⴰ, ⵍⵍⵉⵖ ⵏⴼⵔⴽ ⵙ ⵡⴰⵜⵉⴳ ⵏ ⵉⵏⵇⵇⵉⵙⵏ ⴷ ⵜⴰⵏⵏⴰⵢⵢⵉⵏ ⵏⵏⵙⵏⵜ.

ⵏⵎⵎⴰⵖ ⴼ ⵓⵏⵢⴰⵍⴰⴽⴰⵎ ⵊⴰⵔ ⵜⵉⵎⵔⵙⴰⵍ, ⵉⴼⴰⵔⵙⵏ ⵜⵉⵢⵢⴰⴼⵓⵜⵉⵏ ⴷ ⵉⵙⵖⵍⴰⵏ ⵍⵍⵉ ⵔⴰⴷ ⵢⴰⵡⵙ ⴳ ⵓⵙⵖⵓⴷⵓ ⵏ ⵜⵎⵙⴽⵔⵜ ⵜⴰⴳⴷⵓⴷⴰⵏⵜ, ⵏⵓⵣⵏ ⵙ ⵜⵖⴰⵔⴰⵙⵜ ⵜⵓⵍⴳⵉⵏⵜ ⴰⵢⵍⵍⵉ ⴰⵖ ⴷ ⵉⵍⴽⵎⵏ ⵙⴳ ⵜⵎⵔⵙⴰⵍ ⴰⴷ ⵏⵙⴽⵔ ⵓⵍⴰ ⵜⵉⴱⵔⵉⴷⵉⵏ ⵍⵍⵉ ⴷ ⵇⵇⴰⵏⵉⵏ.

ⵙⵙⵓⵔⴼⴰⵜ ⵉⵢⵉ ⴰⴷ ⵉⵏⵉⵖ ⴽⴽⵓⵥⵜ ⵜⴰⵏⵏⴰⵢⵉⵏ ⵅⴼ ⵉⵏⵇⵇⵉⵙⵏ ⴰⴷ ⴷ ⵜⴰⵏⵏⴰⵢⵢⵉⵏ ⴰⴷ ⵏ ⵓⵎⵛⴰⵡⴰⵕ:

-         ⴰⵔ ⴰⵖ ⵜⵜⴰⵡⵙⵏⵜ ⴰⴷ ⵏⵙⵙⵏ ⵜⴰⵡⵓⵔⵉ ⵏ ⴽⵔⴰⵢⴳⴰⵜ ⵜⵉⵎⵔⵙⵍⵜ ⵍⴰⵍ ⵏ ⵓⵏⵇⵇⵉⵙ,

-         ⴰⵔ ⴰⵖ ⵜⵜⴰⵡⵙⵏⵜ, ⵜⵉⵙ ⵙⵏⴰⵜ ⵜⵉⴽⴽⴰⵍ, ⴰⴷ ⵏⵏⵙⵏ ⵜⴰⵎⵏⴰⴳⴰⵔⵜ ⵏ ⵜⴰⵏⵏⴰⵢⵢⵉⵏ ⴷ ⵓⵎⵣⴰⵔⴰⵢ ⵏⵏⵖ ⵉⵖ ⵉⵥⵍⵉ ⵓⵏⵇⵇⵉⵙ ⵏⵖ ⵜⴰⵏⵏⴰⵢⵜ ⵜⴰⵎⵛⴰⵡⴰⵕⵜ ⵙ ⵜⵉⵍⴰⵍⵜ ⵏⵖ ⵜⴰⵏⴰⴼⵜ ⵏⵖ ⴰⵙⵡⵓⴷⴷⵓ ⵏ ⵜⵏⴰⴼⵜ ⵜⴰⴳⴷⵓⴷⴰⵏⵜ,

-         ⴰⵎⴹⴰⴽⴰⵕ, ⴳ ⵜⵉⵙ ⴽⵕⴰⴹⵜ ⵜⵉⴽⴽⴰⵍ, ⵉⴳⴰⵏ ⵜⴰⵎⵍⴷⴰ ⵏ ⵜⵡⴰⴼⵉⵜ ⵏ ⵜⵢⵢⴰⴼⵓⵜⵉⵏ ⴷ ⵉⵙⵖⵍⴰⵏ ⵖ ⵜⵎⴰⵇⵇⴰⵔⵏ ⵉⴼⵔⴰⴽⵏ ⵏ ⵎⴰⵕⵕⴰ ⵜⵉⵎⵔⵙⴰⵍ ⴷ ⵜⵡⵓⵔⵉ ⵏⵏⵙ ⵙ ⵎⴰⴷ ⵉⵔⵏⴰⵏ ⴽⵉⴳⴰⵏ ⵏ ⵜⵏⵏⵓⴱⴹⴰ ⴳ ⵜⵏⴰⴼⵜ ⵜⴰⴳⴷⵓⴷⴰⵏⵜ.

-         ⴳ ⵓⵙⵡⵉⵔ ⵡⵉⵙ ⴽⴽⵓⵥ, ⴳⴰⵏⵜ ⵜⴰⵎⵍⴷⴰ ⴰⵖ ⵉⵕⵡⴰⵏ, ⵏⴽⴽⵏⵉ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵍⵍⵉⵖ ⴳⴰⵏⵜ ⴰⵖⴱⴰⵍⵓ ⵏ ⵜⵎⵓⵛⴰ ⴷ ⵉⵏⵖⵎⵉⵙⵏ ⵉⵎⴰⴷⴷⵓⴷⵏ ⴳ ⵓⵙⴽⵔ ⵏ ⵜⵥⵍⴰⵢⵉⵏ ⵏⵏⵖ ⵏ ⵜⵉⴹⴰⴼ ⴷ ⵓⵣⵣⵔⴰⴼ. ⵙ ⵓⵙⴷⴷⴻⴷ, ⵉⴳⴰ ⵓⵎⴷⴰⵡⴰⵍ ⴷ ⵓⵏⵢⴰⵍⴽⴰⵎ ⵊⴰⵔ ⵜⵉⵎⵔⵙⴰⵍ, ⵜⵉⵡⵉⵣⵉ ⵉⵙⵜⴰⵡⵀⵎⵎⴰⵏ ⴳ ⵓⵙⵕⵚⵓ ⵏ ⵜⵎⵢⵓⵔⵉⵏ ⵜⵉⵎⵔⵙⵍⴰⵏⵉⵏ ⵜⵉⵎⵣⵡⵓⵔⴰ ⵎⵎⴰⵍⴰⵏⵉⵏ ⵜⵉⵕⵡ ⵏ ⵡⴰⵏⴰⵡ ⵏⵏⵖ ⴰⵎⵔⵙⵍⴰⵏ.

ⵉⵇⵇⴰⵏ ⴰⵖ ⴷ ⵉⵍⵎⵎⴰ ⵓⵙⵎⵔⵙ ⵉⵕⵡⴰⵏ ⵏ ⵉⵏⵇⵇⵉⵙⵏ ⴰⴷ ⴷ ⵓⵙⵓⵜⴳ ⵏⵏⵙ, ⵏⵎⵙⴰⵙⴰ ⴷ ⵜⵓⵎⴰⵢⵉⵏ ⵏⵏⵙⵏ ⵏⵖ ⵏⵎⵎⵣⵔⵉ ⴷⵉⴷⵙⵏⵜ.

ⴳ ⵎⴰⴷ ⵉⵥⵍⵉⵏ ⵙ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⵏⵎⵙⴰⵙⴰ ⴷ ⵉⴼⵔⴷⴰⵙ ⵏ ⵓⵙⵇⵇⵉⵎ, ⴼ ⴽⴽⵓⵥⵜ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⵃⵎⴰ ⴰⴷ ⴳⵉⵏⵜ ⴰⵙⵏⵜⵍ ⵏ ⵓⵙⵓⵜⴳ ⴳ ⵜⵡⴰⵍⴰ ⵢⴰⵜ ⴷ ⵎⵔⴰⵡⵜ, ⴷ ⵓⵙⵓⵜⴳ ⵏ ⵜⴼⴰⴷⵉⵡⵉⵏ ⴷ ⵜⵎⵏⵜⵍⵉⵏ ⵏ ⵜⵙⵏⵙⵉ ⵏ ⵓⵙⵍⴳⵏ 103.13 ⴼ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵉⵏ.

ⵙ ⵓⵡⵇⵇⵔ ⵏ ⵓⴷⵓⵙⵜⵓⵔ, ⵏⵎⴹⴰⴽⴰⵕ ⴳ ⵙⵏⴰⵜ ⵜⵖⵉⵎⵉⵜⵉⵏ ⵜⵉⴳⴷⵓⴷⴰⵏⵉⵏ ⵙⵉⵏ ⵉⵏⵇⵇⵉⵙⵏ ⵅⴼ ⵓⵙⵓⵜⴳ ⵏ ⵓⵖⴰⵡⴰⵙ ⴰⵏⴰⵎⵓⵔ ⵏ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ (2018-2021) ⴷ ⵜⵙⵔⵜⵉⵜ ⵏ ⵡⴰⵎⴰⵏ, ⵜⵙⵎⴷ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵉⵜⵜⵓⵙⵎⴰⴳⴰⵍⵏ ⵙ ⵓⵙⵓⵜⴳ ⵏ ⵜⵙⵏⵙⵉ ⵏ ⵓⵙⵍⴳⵏ 13.03 ⵜⵉⵡⵉⵔⵉⵡⵉⵏ ⵏ ⵓⵙⵙⴼⵍⴷ ⴷ ⵓⵙⵎⵓⵏ ⵏ ⵜⵎⵓⵛⴰ, ⵖⵉⵍⴰⴷ ⴰⵔ ⵜⵙⵡⵓⵔⵉ ⴼ ⵜⵉⵔⵔⴰ ⵏ ⵓⵏⵇⵇⵉⵙ ⵍⵍⵉ ⵔⴰⴷ ⵜⵎⴹⴰⴽⴰⵕ ⴳ ⵜⵙⵓⵜⵍⵜ ⵜⴰⵣⵣⵔⴰⴼⵜ ⴷ ⵢⵓⵛⴽⴰⵏ, ⵉⴳⴰ ⵓⵙⵓⵜⴳ ⴰⴷ ⴰⵍⴰⵖⵎⵓ ⴰⵎⵣⵡⴰⵔⵓ ⵍⵍⵉ ⵔⴰⴷ ⵉⵙⴽⵔ ⵓⵏⵇⵇⵉⵙ, ⵉⵎⵎⴰⵇⵇⴰⵔ ⴷ ⵜⵉⴽⴽⵉ ⵏ ⵓⴳⵍⴷⵓⵏ ⵏ ⵉⵎⵓⵎⵏⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵜⴰⵏⴰⴹⵉⵏ ⵏⵏⵙ ⵉ ⵓⵣⵣⵔⴰⵢ ⵏ ⵓⵙⵍⴳⵏ ⵏ ⵜⵓⵡⵊⴰ ⴷ ⵓⵙⴽⵔ ⵏ ⵜⴳⵔⴰⵡⵜ ⵉⵜⵜⵓⵙⵎⴰⴳⴰⵍⵏ ⵙ ⵓⵣⵣⵔⴰⵢ ⵏ ⵓⵙⵍⴳⵏ ⵍⵍⵉ ⵉⵙⵎⴷⵏ ⵜⵉⵖⵉⵎⵉⵜⵉⵏ ⵏ ⵓⵙⵙⴼⵍⴷ ⵉ ⵎⴰⵕⵕⴰ ⵉⴼⵔⴷⴰⵙ ⵏ ⵡⴰⵎⵓⵏ, ⵖ ⵍⵍⴰⵏ ⵉⴽⴰⴱⴰⵕⵏ ⵉⵙⵔⵜⴰⵏⵏ, ⴳⵉⵍ ⴰⴷ ⴰⵔ ⵜⵜⵎⴹⵉⴽⵉⵕ ⴼ ⵓⵏⵇⵇⵉⵙ ⴷ ⵜⵙⵓⵎⴰⵔ ⵍⵍⵉ ⵔⴰⴷ ⵜⴰⵡⵉ ⵉ ⴱⴰⴱ ⵏ ⵡⴰⴷⴷⵓⵔ ⴷⴰⵜ ⵏ ⵓⵚⵕⵓⴼ ⵏ ⵓⵙⵍⴳⵏ ⵉ ⵓⴱⵕⵍⴰⵎⴰⵏ.

ⵙ ⵓⵙⴷⴷⴻⴷ, ⵔⴰⴷ ⵏⵓⵊⵉⴷ ⵉ ⵓⵣⵓⵛⵛⵍ ⵏ ⵓⵎⴹⴰⴽⴰⵕ ⵏ ⵓⵙⵏⴼⴰⵔ ⴰⴷ ⴷ ⵜⵖⵔⵉ ⵏⵏⵙ, ⵙⵍⵡⴰⵏ ⴰⴽⴽⵯ ⵍⵍⵉⵖ ⵉⴳⴰ ⵡⵉⵏ ⵜⵓⵡⵊⴰ ⵜⴰⵎⵖⵔⵉⴱⵉⵜ ⵍⵍⵉ ⵎⵓ ⵢⴰⴽⴽⴰ ⴱⴰⴱ ⵏ ⵡⴰⴷⴷⵓⵔ ⴰⵅⵎⵎⴻⵎ ⵉⵥⵍⵉⵏ, ⵉⵎⵎⴰⵖ ⴼ ⵜⵓⵎⵔⵜ ⴷ ⵓⵎⵢⴰⵙⴰ ⴷ ⵓⵔⴳⴳⵉⴳ ⴷ ⵓⵙⴷⵓⵙ ⵏⵏⵙ.

ⴳ ⵓⵎⵏⵉⴷ ⵢⴰⴹⵏⵉⵏ, ⵉⵖ ⵉⴳⴰ ⵍⵃⴰⵍ ⴰⵎⵓⴽⵏ ⵏ ⵜⵎⵙⵙⵓⴳⵓⵔⵜ, ⵏⵖ ⵜⴰⵙⵔⵜⵉⵜ ⵏ ⵡⴰⵎⴰⵏ, ⵏⵖ ⴰⵙⵉⵜⵜⵉ ⵏ ⵜⵄⴰⵎⵉⵜ, ⵏⵖ ⵜⵓⵏⵏⵓⵏⵜ, ⵏⵍⵍⴰ ⴷⴰⵜ ⵏ ⵜⵎⵙⴰⵔⵉⵏ ⵙⵜⴰⵡⵀⵎⵎⴰⵏⵉⵏ ⴳⴰⵏⵉⵏ ⵜⵉⵏ ⵖⵉⵍⴰⴷ, ⴰⵢⵍⵍⵉ ⵉⵙⴽⴰⵔⵏ ⴳ ⵓⵙⵓⵜⴳ ⵏⵏⵙⵏⵜ ⵡⴰⴷ ⵉⵍⴰⵏ ⵜⵉⵏⴰⵥⴰⵕⵉⵏ ⵙ ⵉⵎⵏⴰⴷⵏ ⵉⴳⵯⵏⵙⴰⵏⵏ ⴷ ⵉⴱⵕⵕⴰⵏⵏ. ⵉⵖ ⵉⴳⴰ ⵍⵃⴰⵍ ⵜⴰⵏⴼⵔⵓⵜ ⵏⵏⵖ ⴳ ⵡⴰⵎⴰⵏ ⵏⵖ ⵓⵜⵛⵓ, ⵏⵖ ⵜⵉⵏⵏⵓⴱⴹⴰ ⵏ ⵜⵎⵙⵙⵓⴳⵓⵔⵜ ⵏⵏⵖ, ⵏⵖ ⴰⵥⵏⵥⵕ ⵏ ⵜⵓⵏⵏⵓⵏⵜ ⵏⵏⵖ ⵜⴰⵏⴰⵎⵓⵔⵜ, ⵉⴳⴰ ⵍⵃⴰⵍ, ⴳ ⵜⴳⵉⵔⴰ, ⵜⴰⵣⵣⵉⴳⵣⵜ ⵏ ⵜⵎⴰⵣⵉⵔⵜ ⵏⵏⵖ ⴷ ⵓⵙⵙⵓⵜⴳ ⵏⵏⵙ ⴷ ⵓⵙⴷⵖⵔ ⵏⵏⵙ ⴰⵏⵎⵏⴰⴹ ⴷ ⵓⴳⵔⴰⵖⵍⴰⵏ.

ⵙ ⵓⵎⵙⴰⵙⴰ ⴷ ⵎⴰ ⴰⵏⵏ, ⴳ ⵓⵙⴰⵜⵉ ⵏ ⵓⴹⴼⵔ ⵏ ⵓⵎⴹⴰⴽⴰⵕ ⴼ ⵜⵎⵙⴰⵔⵉⵏ ⵏ ⵖⵉⵍⴰⴷ ⴷ ⵉⵎⵏⴰⴷⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ ⵏ ⵖⵉⵍⴰⴷ ⴳⴰⵏⵉⵏ ⵉⵙⵜⵔⴰⵜⵉⵊⵉⵢⵏ, ⵔⴰⴷ ⵜⵙⵡⵓⵔⵉ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵜⴰⵎⵙⵉⴽⵓⴷⵜ ⴼ ⵜⵖⵉⵙⵜ ⵜⴰⵎⴳⵓⵔⴰⵏⵜ ⴷ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵜⴰⵎⵙⵉⴽⵓⴷⵜ ⴼ ⵓⵙⵎⵓⵜⵜⵉ ⴰⵥⴹⴰⵕⴰⵏ ⴳ ⵜⵡⵓⵔⵉⵡⵉⵏ ⵏⵏⵙⵏⵜ, ⵃⵎⴰ ⴰⴷ ⵢⵉⵍⵉ ⵓⵙⵓⵊⴷ ⵏ ⵜⵎⵢⴰⴷⴰⵙⵜ ⵜⴰⴱⵕⵍⴰⵎⴰⵏⵉⵜ ⵏ ⵉⵎⴰⵍ ⵉ ⵙⵉⵏ ⵉⵙⵏⵜⵍⵏ ⴰⴷ. ⵖⵎⴽ ⵍⵍⵉ ⵔⴰⴷ ⵜⵙⵡⵓⵔⵉ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ ⴼ ⵢⵉⵙⴽⵉⵍ ⴳ ⵜⵡⵓⵔⵉ ⵏⵏⵙ ⵉ ⵓⵙⵓⵊⴷ ⵏ ⵜⵙⵓⵎⴰⵔ ⴷ ⵉⵙⵖⵍⴰⴼ ⴼ ⵉⵙⵓⵔⵙⵏ ⵏ ⵜⵎⵖⴰⵔⵜ ⴳ ⵓⵏⵢⴰⵍⴽⴰ ⴷ ⵜⵎⵣⵡⴰⵔ ⵏ ⵓⵎⵏⴰⴷ ⴰⵏⴰⵎⵓⵏ.

ⵉⴳ ⵍⵃⴰⵍ ⴰⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵎⵓ ⵏⴼⴽⴰ ⵓⵏⴼⵓⵙ ⵉⴷⵓⵙⵏ ⴳ ⵜⵡⴰⵍⴰ ⴰⴷ, ⵏⵖ ⵜⵉⵙⵎⵉⴳⴰⵍ ⵏ ⵓⵙⴰⴳⴳⵯ ⴷ ⵓⵎⴹⴰⴽⴰⵕ ⵏ ⵉⵏⵇⵇⵉⵙⵏ ⵏ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ ⴷ ⵜⴳⵔⴰⵡⵉⵏ ⵏ ⵜⵏⵏⵓⴱⴹⴰ, ⵉⵇⵇⴰⵏ ⴷ ⴰⴷ ⵟⵟⵉⴼⵏ ⵉⵙⵖⵍⴰⴼ ⵍⵍⵉ ⴼ ⵏⵎⵙⴰⵙⴰ ⴰⴽⴷ ⵜⴰⵏⴱⴰⴹⵜ ⵜⴰⵣⵣⵔⴰⴼⵜ, ⴰⴷⵔⵉⵣ ⵍⵍⵉ ⵏⵔⴰ ⴳ ⵡⴰⵎⵓⵏ, ⴰⴷⵔⵉⵣ ⵉⵥⵉⵍⵏ ⴳ ⵓⵙⵖⵓⴷⵓ ⵏ ⵜⵙⵔⵜⴰⵢ ⴷ ⵉⴽⵛⵛⵓⵎⵏ ⵉⴳⴷⵓⴷⴰⵏⵏ ⴷ ⵓⵙⵎⵖⵔ ⵏ ⵜⵢⴰⴼⵓⵜ ⵏⵏⵙⵏⵜ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⴳ ⵎⴰⴷ ⵉⵥⵍⵉⵏ ⵙⵓⵣⵣⵔⴰⴼ, ⵉⵇⵇⴰⵏⴷ ⴰⴷ ⴷⴰⵖ ⵙⴷⴷⵉⴷⵖ ⴼ ⵡⴰⵜⵉⴳ ⵏ ⵜⵙⵏⵜⴰⵢⵉⵏ ⵜⵉⵣⵣⵔⴰⴼⵉⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵍⵍⴰⵏⵉⵏ ⴳ ⵜⵙⵓⵎⴰⵔ ⵏ ⵉⵙⵍⴳⵏⵏ ⵍⵍⵉ ⵥⵍⵉⵏⵉⵏ, ⵎⴽ ⵍⵍⵉ ⵏⵏⵉⵖ, ⵎⴰⵙ ⵣⴷⵉⵏⵜ ⴷ ⵓⵙⵡⵓⵔⵉ ⴰⵡⵓⵙⵙⴰⵏ ⵏ ⵉⵎⵓⵔⴰ ⴷ ⵜⵎⵓⵔⴰ ⴰⴽⴷ ⴰⵎⵓⵏ ⴷ ⵉⴼⵔⴷⴰⵙ ⵏⵏⵙ ⴷ ⵓⵎⵢⴰⵡⴰⴹ ⵏⵏⵙⵏ ⴰⴽⴷ ⵉⵏⵎⵓⵔⴰⵏ ⴷ ⵜⴳⵔⴰⵡⵉⵏ ⵜⵉⵣⵣⵓⵍⴰⵏⵉⵏ, ⵉⵙⵖⵣⵏ ⵓⵙⵇⵇⵉⵎ ⵚⴹⵉⵚⵜ ⵜⵙⵓⵎⴰⵔ ⴳ ⵓⵣⴳⵏ ⴰⵎⵣⵡⴰⵔⵓ ⵏ ⵜⵡⴰⵍⴰ.ⵏⴻⵏⵏⵓⵔⵣ ⴰⵙⴽⵔ ⵏ ⵜⴷⵉⵏⴰⵎⵉⵜ ⵜⴰⵎⴰⵢⵏⵓⵜ ⵅⴼ ⵜⵉⵖⵔⵉ ⵏ ⵜⵙⵓⵎⴰⵔ ⵏ ⵉⵙⵍⴳⵏⵏ ⵙ ⵜⵓⵎⴰⵢⵉⵏ ⵍⵍⵉ ⴷⵉⴷⵙⵏⵜ ⵥⵍⵉⵏⵉ ⵍⵍⵉ ⵔⴰⴷ ⵢⵉⵍⵉ ⴳ ⵓⵏⴳⵔⴰⵡ ⴰⴳⵯⵏⵙⴰⵏ ⴰⵎⴰⵢⵏⵓ ⵏ ⵓⵙⵇⵇⵉⵎ ⴷⴼⴼⵉⵔ ⵏ ⵓⵙⵎⴰⴷ ⵏ ⵜⴱⵔⵉⴷⵜ ⵏ ⵓⵙⵖⵣⵏ ⵏⵏⵙ.

ⴳ ⵓⵎⵏⵉⴷ ⵢⴰⴷⵏⵉⵏ, ⵉⵇⵇⴰⵏ ⴷ ⴰⴷ ⵓⵔ ⵏⵜⵜⵓ ⵜⵉⵡⵉⵣⵉ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⴳ ⵓⵙⵖⵏⵓ ⵏ ⵉⵙⵏⴼⴰⴰⵔⵏ ⵏ ⵉⵙⵍⴳⵏⵏ ⵍⵍⵉ ⵙⵖⵣⴰⵏⵏ, ⵙⵍⴰⵡⵏ ⴰⴽⴽⵯ ⵉⵙⵍⴳⵏⵏ ⵏ ⵓⵥⵕⴼ ⵖ ⵍⴽⵎⵏ ⵉⵙⵏⴼⵍⵏ ⵏ ⵓⵙⵇⵇⵉⵎ 764 ⵏ ⵓⵙⵏⴼⵍ, ⵜⵇⴱⵍ ⴳⵉⵙⵏ ⵜⵏⴱⴰⴷⵜ 105, ⴰⵢⵍⵍⵉ ⵉⵎⵎⴰⵍⵏ ⴰⵎⵢⴰⵡⴰⵙ ⵊⴰⵔ ⵓⵙⵇⵇⵉⵎ ⴷ ⵜⵏⴱⴰⴹⵜ, ⴷ ⵡⴰⵜⵉⴳ ⵏ ⵉⵙⵏⴼⵍⵏ ⵜⵜⴰⵡⵙⵍⵏⴰⴷⵏⵉⵏ ⴷ ⵓⴷⵔⵉⵣ ⴰⴱⵕⵍⴰⵎⴰⵏⵉ ⴳ ⵓⵣⵣⵔⴰⴼ, ⵖⵎⴽ ⴰⵏⵏ ⵓⵍⴰ ⵉⵙⵏⴼⵍⵏ ⵏ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⵉⵏⵎⵢⵓⵔⵏ.

ⵉⵖ ⴷ ⵓⵔ ⵉⵇⵇⴰⵏ ⴰⴷ ⵏⵙⴳⵣⵍ ⴰⴼⴰⵔⵙ ⴰⵣⵣⵔⴰⴼ ⴳ ⵓⵏⵛⴽ, ⵉⵇⵇⴰⵏ ⴷ ⴰⴷ ⵏⵙⵙⴽⵯⵜⵉ ⵎⴰⵙ ⵏⵙⵖⵣⵏ ⵎⴰⴷ ⵉⴳⴰⵏ 111 ⵏ ⵓⵙⵏⴼⴰⵔ ⵏ ⵓⵙⵍⴳⵏ , ⴷ ⵚⴹⵉⵚⵜ ⵜⵙⵓⵎⴰⵔ ⵏ ⵉⵙⵍⴳⵏⵏ ⴳ ⵓⵣⴳⵏ ⴰⵎⵣⵡⴰⵔⵓ ⵏ ⵜⵡⴰⵍⴰ ⵜⴰⵣⵣⵔⴰⴼⵜ, ⴳⵉⵙⵏ 18 ⴳ ⵜⵙⵓⵜⵍⵜ ⵏ ⴽⵟⵓⴱⵕ 2023-2024. ⴰⵢⵍⵍⵉ ⵉⴳⴰⵏ ⴰⵙⵉⵍⴰⵏ ⵉⴳⴰ ⵜ ⴰⵏⴰⵡ ⴷ ⵉⵎⵏⴰⴷⵏ ⵏ ⵉⵙⵍⴳⵏⵏ ⵜⵜⴰⵡⵖⵣⴰⵏⵏⵉⵏ. 30 ⵏ ⵓⴹⵕⵉⵚ ⴳⴰⵏ ⵉⵙⵍⴳⵏⵏ ⵉⵎⵙⴽⴰⵔⵏ ⵣⴷⵉⵏⵉⵏ ⴷ ⵉⴳⵔⴰⵏ ⵉⵏⴰⵎⵓⵏⵏ ⵙⵍⴰⵡⵏ ⴰⴽⴽⵯ ⴰⴷⵡⴰⵙ, ⴷ ⵓⵙⵏⴰⵍ ⴰⵏⴰⵎⵓⵏ, ⵜⴰⵙⵏⴱⴹⴰⵢⵜ ⴷ ⵓⵙⵙⴰⵔⵓ ⴷ ⵜⴼⵍⵍⴰⵃⵜ ⴷ ⵓⵥⵕⴼ, ⵙ ⵎⴰⴷ ⵉⵔⴰ ⵎⴰ ⴰⵏⵏ ⴳ ⵓⵙⴰⵜⵉ ⴰⵣⵣⵔⴰⴼ ⴷ ⵓⵙⵏⵎⴰⵍⴰ ⵏ ⵉⴽⵛⵓⵎⵏ ⵉⵏⴰⵎⵎⴰⵙⵏ ⴷ ⵉⴷⵖⴰⵔⴰⵏⵏ ⵏ ⵓⵡⴰⵏⴽ ⴷ ⵓⵙⴷⵖⵔ ⵏ ⵜⵏⵓⴼⴰ ⴷ ⵉⵙⵙⴰⵔⵓⵜⵏ. ⵓⵔ ⴼⵍⵍⴰⵏ ⵜⵃⴹⵉ ⵜⵡⵉⵣⵉ ⵜⴰⵅⴰⵜⴰⵔⵜ ⵏ ⵎⴰ ⴰⵏⵏ ⴳ ⵓⵙⵎⴰⵢⵏⵓ ⵏ ⵉⴽⵛⵓⵎⵏ ⵉⴳⴷⵓⴷⴰⵏⵏ ⴷ ⵜⵉⵍⵉⵜ ⵏ ⵓⵙⵙⴰⵔⵓⵜⵏ ⴷ ⵓⵙⵔⵅⵓ ⵏⵏⵙⵏ, ⴷ ⵓⵙⴷⵓⵙ ⵏ ⵜⵏⵏⵓⴱⴹⴰ ⵏ ⵜⵏⴰⴼⵜ ⵜⴰⵎⴰⵜⴰⵢⵜ, ⴷ ⵓⴹⵎⵏ ⵏ ⵉⵣⵔⴼⴰⵏ ⵏ ⴽⵓⵢⴰⵏ.

ⵜⵉⵏⴳⴳⵯⴰ ⴷ ⵉⵏⴳⴳⵯⴰ,

ⵓⵔ ⴰⵖ ⵉⴽⴽⵉⵙ ⵓⵙⵡⵓⵔⵉ ⵏⵏⵖ ⴳ ⵜⵎⴰⵙⴰⵢⵉⵏ ⵏⵏⵖ ⵜⵉⴳⵯⵏⵙⴰⵏⵉⵏ ⴼ ⵜⵣⵣⵉⴳⵣⵜ ⵏ ⵜⵉⵍⵉⵜ ⵏⵏⵖ ⵉⵍⴰⵏ ⴰⴷⵔⵉⵣ, ⵏ ⵜⵉⴹⴰⴼ ⴷ ⵜⵎⴰⵙⴰⵢⵜ, ⴳ ⵓⴷⵎ ⵏ ⵜⵣⴷⴰⵢⵉⵏ ⵜⵉⴱⵕⵕⴰⵏⵉⵏ ⴷ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ. ⴳ ⵓⵙⴰⵜⵉ ⴰⵙⵉⵏⵔⴰⵏ ⴷ ⵓⴳⵜⵉⵔⴰⵏ, ⵜⵣⵣⵉⴳⵣ ⵜⵉⵍⵉⵜ ⵉⵕⵡⴰⵏ ⴳ ⵎⴰⵕⵕⴰ ⵜⵉⵙⴳⴳⵉⵡⵉⵏ ⵜⵉⵊⵢⵓⵙⵢⴰⵙⵉⵢⵉⵏ ⴳ ⵓⵎⴰⴹⴰⵍ, ⵏⵙⵡⵓⵔⵉ, ⵎⴽ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵏⵚⵕ ⵕⴱⴱⵉ, ⴰⴼⵔⴰⴽ ⵏ ⵜⴷⵉⴱⵍⵓⵎⴰⵙⵉⵜ ⵜⴰⵎⵖⵔⵉⴱⵉⵜ ⵎⴽ ⵍⵍⵉ ⵉⵙⵙⵕⵚⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵜⵉⵔⵙⴰⵍ ⵏⵏⵙ, ⵙ ⵓⵙⵖⵡⵏ ⵙ ⵉⵍⵓⴳⵏⵏ ⴷ ⵜⵔⵙⴰⵍ ⵏⵏⵙ.

ⴳ ⵢⴰⵏ ⵓⵎⴰⴹⴰⵍ ⴳ ⵜⵜⵓⵙⵏⴼⴰⵍⵏ ⵉⵙⵡⴰⵍⴰⵢⵏ, ⵉⴼⵜⴰⵏ ⴱⴰⵀⵔⴰ ⵙ ⵓⴱⵟⵟⵓ ⵙ ⵜⵎⵏⵜⵍⵉⵏ ⵜⵉⵎⴰⵢⵏⵓⵜⵉⵏ, ⵎⵖⵔⵏⵜ ⵜⵉⵏⵉⵎⴰⵏⵉⵏ ⵜⵉⵏⴰⵎⵓⵔⵉⵏ, ⵏⵎⵎⴰⵖ ⵓⴽⴰⵏ, ⴷⴼⴼⵉⵔ ⵏ ⵓⵙⵎⵔⵙⵍ ⵏ ⵜⴰⵢⵢⴰⵡⵉⵏ ⵜⵉⵏⴰⵎⵓⵔⵉⵏ ⴳ ⵜⵎⴰⴷⴷⴰⵙⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⴳⵜⵉⵔⴰⵏⵉⵏ, ⴷ ⵜⵔⵓⴱⴱⴰ ⵏ ⵜⴷⴷⵓⴽⴽⵯⵍⴰ, ⴼ ⵓⴷⵔⴰⵡ ⴳ ⵉⴳⵔⴰⵡⵏ ⴷ ⵉⵏⵎⵓⵇⵇⴰⵔⵏ ⵉⴳⵔⴰⵖⵍⴰⵏⵏ ⴷ ⵡⵉⵏ ⵓⵎⵏⵥⴰⵡ ⴷ ⵉⵏⵎⵏⴰⴹⵏ.

ⵙ ⵓⵎⵢⴰⵙ, ⵜⵙⵏⵓⴱⴳ ⵜⵎⴰⵣⵉⵔⵜ ⵏⵏⵖ ⴽⵉⴳⴰⵏ ⵏ ⵉⵏⵎⵓⵇⵇⴰⵔⵏ ⵉⴱⵕⵍⴰⵎⴰⵏⵉⵢⵏ ⵉⵅⴰⵜⴰⵔⵏ ⵙ ⵜⴷⵔⴰⵡⵜ ⵉⵕⵡⴰⵏ ⴷ ⵓⵏⵛⴽ ⵏ ⵡⵉⵍⵍⵉ ⴳⵉⵙ ⴷⵔⵓⵏⵉⵏ, ⴷ ⵜⴻⵜⴳⴰⵔⵉⵏ ⵉⵖⴱⵓⵍ ⴳⴰⵏⵉⵏ ⵜⵉⵢⵢⴰⴼⵓⵜⵉⵏ ⵏ ⵜⵡⵓⵔⵉⵡⵉⵏ ⵏⵏⵙ. ⵔⴰⴷ ⵏⴱⴷⵔ ⵙ ⵓⵎⴷⵢⴰ ⴰⴳⵔⴰⵡ ⴰⴱⵕⵍⴰⵎⴰⵏⵉ ⴼ ⵓⵎⵙⴰⵡⴰⵍ ⵊⴰⵔ ⵉⵙⴳⴷⵏ ⵉⵍⵍⴰⵏ ⴷⴷⴰⵡ ⵉⵡⵉⵣ ⴰⴳⵍⴷⴰⵏ ⴰⵎⴰⵜⵜⵓⵢ ⴳ ⵡⴰⵎⵓⵔ ⵏ ⵡⴰⴽⵓⵛ ⴳ ⵢⵓⵏⵢⵓ 2023, ⵍⵍⵉⵖ ⴷ ⵉⴼⴼⵓⵖ ⵓⵙⵉⵡⴹ ⵉⵙⵜⴰⵡⵀⵎⵎⴰⵏ ⵉⴳⴰⵏ ⵜⴰⵢⴰⵢⴼⵓⵜ ⵏ ⵓⵎⵙⴰⵡⴰⵍ ⴷ ⵉⵎⴹⴰⴽⴰⵕⵏ ⴷⵔⴰⵏⵉⵏ ⵊⴰⵔ ⵉⴱⵕⵍⴰⵎⴰⵏⵉⵢⵉⵏ ⴷ ⵉⴳⵯⵏⵙⴰⵙⵏ ⵏ ⵉⵙⴳⴷⵏ ⴷ ⵉⴽⴰⴷⵉⵎⵉⵢⵏ, ⵅⴼ ⵡⴰⵜⵉⴳ ⵏ ⵜⵎⵢⵉⴷⵉⵔⵜ ⵉⵛⵛⴰⵔⵏ, ⴳ ⵓⵎⵏⴰⴹ ⵉⵔⴰ ⴽⵔⴰ ⴰⴷ ⵉⴼⴽ ⵉ ⵜⵎⵙⴰⵔⵉⵏ ⴷ ⵉⵎⴰⵖⵏ ⵉⵙⵔⵜⴰⵏⵏ ⴷⵉⵊⵢⵓⵙⵔⵜⴰⵏⵏ ⴰⴼⵔⵉⵙ ⵏ ⵓⵙⴳⴷ, ⴱⵓⵖⵍⵓⵏ ⵓⵍⴰ ⵉⵙⵡⵉⵏⴳⵉⵎⵏ ⵏ ⵜⵣⵣⵓⴽⵔⴰ.

ⵜⵙⵏⵓⴱⴳ ⵜⵖⵔⵎⵜ ⴰⴷ ⴳ ⵏⵓⵡⴰⵏⴱⵉⵔ 2022 ⴰⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ ⴰⴼⵔⵉⵇⵉ ⴼ ⵜⵙⵏⵜⴰⵢⵜ ⵏ ⵜⵎⴷⵔⴰⵡⵜ ⵉ ⵜⵏⴱⴰⴹⵜ ⵉⵏⵏⵓⵕⵣⵎⵏ ⴷ ⵓⵏⵏⵓⵕⵥⵎ ⵏ ⵉⴱⵕⵍⴰⵎⴰⵏⵏ, ⵍⵍⵉ ⴷ ⵢⵉⵡⵉⵏ ⵓⵍⴰ ⵏⵜⵜⴰⵏ ⴰⵙⵉⵡⴹ ⴰⴱⵕⵍⴰⵎⴰⵏⵉ ⴰⴼⵔⵉⵇⵉ ⵉⵙⵜⴰⵡⵀⵎⵎⴰⵏ.

ⴰⵔ ⵏⵙⵎⴰⵢⵏⵓ ⴰⵙⵓⵜⴳ ⵏⵏⵖ ⵙ ⵜⵖⵔⴰⵜ ⵜⴰⴳⵍⴷⴰⵏⵜ ⵜⴰⵎⴰⵜⵜⵓⵢⵜ ⵙ ⵜⵎⵍⴷⴰ ⵏ ⵓⴽⵜⵜⴰⵢ ⵡⵉⵙ 60 ⵏ ⵓⵙⴽⵔ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴰⵎⵣⵡⴰⵔⵓ ⵉⵜⵜⵓⵙⵜⴰⵢⵏ, ⵅⴼ ⵜⴷⵉⵏⴰⵎⵉⵜ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ, ⵏⵙⴷⴷⵉⴷ ⵎⴰⵙ ⴰⵖ ⵜⵜⴰⵡⵙ ⵉ ⵜⵣⵣⵉⴳⵣⵜ ⵏ ⵓⵙⵎⵓⵙⵙⵓ ⴷ ⵜⴷⵔⴰⵡⵜ ⵉⵕⵡⴰⵏ ⵉⵍⴰⵏ ⴰⴷⵔⵉⵣ ⴳ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⵏⵎⵎⴰⵖ ⴼ ⵜⵏⵓⴼⴰ ⴷ ⵜⵎⵙⴰⵔⵉⵏ ⵏ ⵜⵎⴰⵣⵉⵔⵜ ⵏⵏⵖ, ⴳ ⵜⵣⵡⵉⵔⵉ ⵜⴰⵎⵙⴰⵔⵜ ⵏ ⵜⵢⴰⵏⵜ ⵏⵏⵖ ⵜⴰⵏⴰⴽⴰⵍⵜ, ⴷ ⵓⵙⵉⵙⵙⵏ ⵙ ⵉⵎⵓⴽⵏⵏ ⵏ ⵜⵎⴰⵣⵉⵔⵜ ⵏⵏⵖ, ⵏⴱⴷⴷ ⵙ ⵎⴰⴷ ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⴳ ⵓⵙⴷⵖⵔ ⴰⴳⵔⴰⵖⵍⴰⵏ ⴷ ⵓⵙⵓⵜⵜⴳ ⵍⵍⵉ ⵜⵓⴽⵍⴰⵍ, ⴷ ⵜⵣⴷⴰⵢⵉⵏ ⴱⴷⴷⵏⵉⵏ ⴼ ⵜⵎⴷⵔⴰⵡⵜ ⴷ ⵓⵙⵖⵣⵏ ⴷ ⵓⵙⵓⴼⵓ ⴷ ⵡⴰⵜⵉⴳⵏ, ⵙ ⵜⵙⵔⵜⵉⵜ ⴷ ⵓⵙⵎⴰⵇⵇⵍ ⴷ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ.

ⵔⴰⴷ ⵜⴳ ⵜⴷⵔⵓⵜ ⵏⵏⵖ ⵜⴰⴼⵔⵉⵇⵉⵜ ⴷ ⵜⵄⵕⴰⴱⵜ ⴷ ⵜⵓⵙⵍⵉⵎⵜ, ⴷ ⵓⵙⴰⵢⵔⵓⵔ ⵏⵏⵖ ⵓⵕⵓⵏⴰⵎⵎⴰ, ⴷ ⵓⵎⵏⴰⴷ ⵏⵏⵖ ⴰⵎⵉⵔⵉⴽⴰⵏⵉ ⴰⵍⴰⵜⵉⵏⵉ ⴷ ⵜⵎⴷⵔⴰⵡⵉⵏ ⵏⵏⵖ ⴰⴽⴷ ⵙⵏⴰⵜ ⵎⴰⵔⵉⴽⴰⵏⴰⵜ, ⴳ ⴰⵙⵢⴰ, ⵔⴰⴷ ⵢⵉⵍⵉ ⴳ ⵓⵙⵡⵓⵔⵉ ⵏⵏⵖ ⴳ ⵜⵣⴷⴰⵢⵉⵏ ⵏ ⴱⵕⵕⴰ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⴳ ⵜⴳⵉⵔⴰ, ⵉⵇⵇⴰⵏⴷ ⵓⵙⴷⴷⵉⴷ ⵎⴰⵙ ⴷ ⵜⴰⵢⵢⴰⴼⵓⵜ ⵍⵍⵉ ⵎⵓ ⴱⴷⵔⵖ ⴽⵔⴰ ⵏ ⵜⵎⵉⵜⴰⵔ ⵏⵏⵙ, ⵓⵔ ⵔⴰⴷ ⵜⵜⵓⵙⴽⵉⵔ ⵜⴰⵔ ⴰⵍⵜⴰⵖ ⵏ ⴽⵓ ⵢⴰⵏ, ⴷ ⵓⵙⵎⵓⵙⵙⵓ ⵏ ⵎⴰⵕⵕⴰ ⵉⴼⵔⴷⴰⵙ ⴷ ⵉⴳⵎⴰⵎⵏ ⵏ ⵓⵙⵇⵇⵉⵎ, ⵉⵖ ⵏⵙⵙⵏ ⵎⴰⵙ ⴷ ⴰⵏⴰⵔⵓⵣ ⵏⵏⵖ ⴰⵎⴳⵔⵓ ⵉⵎⵇⵇⵓⵔ ⴷ ⵢⴰⵜⵜⵓⵢ, ⵉ ⵓⵙⵎⵖⵔ ⵏ ⵜⴷⵉⵎⵓⵇⵔⴰⵟⵉⵜ ⵜⴰⴳⵯⵏⵙⴰⵙⵜ ⵜⴰⵎⵔⵙⵍⴰⵏⵜ ⵉ ⵓⵙⵡⵉⵔ ⵍⵍⵉ ⵉⵔⴰ ⴱⴰⴱ ⵏⵡⴰⴷⴷⵓ, ⴷ ⵓⵙⴷⵓⵙ ⵏ ⵜⵉⵏⵡⵉⵜ ⵜⴰⵅⴰⵜⴰⵔⵜ ⵍⵍⵉ ⵜⵙⴽⵔ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⵎⴽ ⵉⵍⵍⴰⵏ ⴳ ⵜⴱⵔⴰⵜ ⵜⴰⴳⵍⴷⴰⵏⵜ ⵜⴰⵎⴰⵜⵜⵓⵢⵜ, ⴷ ⵓⵚⴽⵓ ⵉ ⵜⵣⵣⵉⴳⵣⵜ ⵏ ⵓⵙⵕⵚⵓ ⵏ ⵡⴰⵏⴰⵡ ⵏⵏⵖ ⴰⴷⵉⵎⵓⵇⵔⴰⵟⵉ ⴷ ⵓⵎⵔⵙⵍⴰⵏ ⵉⵥⵍⵉⵏ.

ⵉⵜⵜⵓⵙⴽⴰⵔ ⵎⴰ ⴰⵏⵏ ⵙ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵄⵣⵣⵓ ⵕⴱⴱⵉ ⴷ ⵡⴰⵜⵉⴳ ⵏ ⵜⵏⴰⵔⴰ ⵏⵏⵙ, ⴷ ⵜⵉⴹⴰⴼ ⴷ ⵜⵣⵣⵓⵍⴰⵏⵜ ⵏ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⵎⵎⴰⵖⵏⵉⵏ ⴼ ⵉⵡⵜⵜⴰ ⵏ ⵜⵎⵓⵔⵜ ⴷ ⵡⴰⴽⴰⵍ ⴰⵏⴰⵎⵓⵔ ⴳ ⵡⴰⴽⴰⵍ ⴷ ⵓⵊⵏⵏⴰ ⴷ ⵢⵉⵍ. ⵉ ⵜⴳⴳⴰⵍⵉⵏ ⴰⴷ ⴷ ⵓⵅⴰⵜⴰⵔ ⵏⵏⵙⵏⵜ ⴰⵏⴰⴼⵍⵍⴰ ⴰⵏⵙⵙⵉⵅⴼ ⵏ ⵜⵔⵙⴰⵍ ⵏ ⵜⵎⴰⵖⵜ ⵏⵏⵙⵏⵜ ⵜⴰⵎⴰⵜⴰⵢⵜ, ⴱⴰⴱ ⵏ ⵡⴰⴷⴷⵓⵔ, ⴰⵣⵓⵍ ⴷ ⵓⵙⵓⵜⴳ ⴷ ⵓⵡⵇⵇⵔ.

ⵉ ⵜⴳⴳⴰⵍⵉⵏ ⵏ ⵜⵉⵊⴷⵔⵎⵜ ⵜⴰⴳⵍⴷⴰⵏⵜ ⴷ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵜⴳⴳⴰⵍⵉⵏ ⵏ ⵜⵡⵉⵙⵉ, ⴰⵙⵓⵜⴳ ⴰⴽⴽⵯ ⴼ ⵜⵡⵓⵣⵉ ⵏⵏⵙⵏⵜ ⴳ ⵓⴼⵔⴰⴳ ⵏ ⵓⵎⵎⵉⵥⵏ ⴷ ⵓⴼⵔⴰⴳ ⵏ ⵜⵏⴼⵔⵓⵜ ⵏ ⵜⵎⵓⵔⵜ ⴷ ⵉⵏⵎⵓⵔⴰⵏ.

ⵙⵙⵓⵔⴼⴰⵜ ⵉⵢⵉ, ⴰⴷ ⴼⴼⴰⵖ ⵙ ⵓⵙⴳⵣⵍ ⴰⴷ ⴷⵉⴷⵓⵏ, ⵎⴰⵙ ⴷ ⵜⵉⵏⴰⵥⴰⵕⵉⵏ ⵍⵍⵉ ⴷ ⵉⵇⵇⴰⵏ ⴰⴷ ⵜⵏⵜ ⵏⴰⵍⵍ, ⴷ ⵜⵏⴰⵥⵕⵉⵏ ⵍⵍⵉ ⴷ ⵉⵇⵇⴰⵏ ⵓⵙⴽⵔ, ⴷ ⵉⵙⴰⵡⵓⵔⵏ ⵍⵍⵉⴷ ⵉⵇⵇⴰⵏ ⵓⵣⵣⴳⵉⵔ ⵉ ⵉⵎⴰⵍ, ⵔⴰⵏⵜ ⴽⵉⴳⴰⵏ ⵏ ⵓⵎⵛⴰⴱⴱⴰⴽ ⴰⵏⴰⵎⵓⵏ ⴷ ⵓⵏⴰⵎⵓⵔ ⴳ ⵓⵙⴰⵜⵉ ⵏ ⵓⵎⵣⵔⴰⵢ ⵉⵥⵉⵍⵏ ⴰⵛⴽⵓ ⵉⵎⵓⴽⵏⵏ ⵉⵅⴰⵜⴰⵔⵏ ⴳ ⵍⵎⵖⵔⵉⴱ, ⵎⴽ ⵍⵍⵉ ⵉⵙⴷⴷⵉⴷ ⵓⵎⵣⵔⵓⵢ, ⵜⵜⵓⵙⴽⴰⵔⵏ ⴱⴷⴷⴰ ⵙ ⵓⵎⵙⴰⵙⴰ ⴷ ⵓⵙⴷⵔⴰⵡ ⴷ ⵓⵎⵃⵉⵣⵡⴰⵔ ⵉⵥⵉⵍ, ⵓⵔ ⴷ ⵙⵉⵎⴰⵖⵏ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⵔⵉⵖ ⴳ ⵜⴳⵉⵔⴰ, ⴰⴷ ⵙⵏⵉⵎⵎⵔⵖ ⴽⵓ ⵡⴰⴷ ⵢⵉⵡⵙⵏ ⴳ ⵓⵙⴽⵔ ⵏ ⵜⵢⵢⴰⴼⵓⵜ ⴰⴷ ⴳ ⵉⴼⵔⴷⴰⵙ ⵏ ⵓⵙⵇⵇⵉⵎ, ⴷ ⵜⵏⴱⴰⴹⵜ, ⴷ ⵓⵏⵙⵙⵉⵅⴼ ⵏⵏⵙ, ⴷ ⵓⵎⴰⵡⵙⴰⵙ ⴰⵎⴰⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵜⵣⴷⴰⵢⵉⵏ ⴷ ⵓⴱⵕⵍⴰⵎⴰⵏ ⴰⵎⵙⵙⵉⵡⵍ ⴰⵎⴰⴷⴷⵓⴷ ⵙ ⵉⵙⵎ ⵏ ⵜⵏⴱⴰⴹⵜ, ⴷ ⵉⵎⴰⵙⵙⵏ ⵏ ⵓⵙⵎⴰⵍ ⴹⴼⵕⵏⵉⵏ ⵜⴰⵡⵓⵔⵉ ⵏⵏⵖ ⴷ ⵉⵙⴰⵜⵉⵢⵏ ⴷ ⵜⵎⵙⵖⴰⵏⵉⵏ ⴷ ⵉⵎⵙⵖⴰⵏⵏ ⵏ ⵓⵙⵇⵇⵉⵎ ⴷ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⴹⵓⴼⵏⵉⵏ ⵜⵉⵎⵔⵙⵍⵜ ⴷ ⵉⵎⵙⵖⴰⵏⵏ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵡⴰⵔⴰⵢ ⴰⵖⵔⵎⴰⵏ ⴷ ⵉⵎⵙⵡⵓⵔⵉⵢⵏ ⵜⵜⵓⵙⵎⴰⴳⴰⵍⵏⵉⵏ ⵙ ⵜⵖⵓⵙⵉ ⴷ ⵓⴼⵔⴰⴳ, ⵍⵍⵉ ⴰⵖ ⵜⵜⴰⵡⵙⵏⵉⵏ ⴳ ⵓⵙⵙⵔⵅⵓ ⵏ ⵜⵡⵓⵔⵉⵡⵉⵏ ⵏⵏⵖ.

ⵜⴰⵏⵎⵎⵉⵔⵜ ⴼ ⵓⵙⴼⵍⴷⵏⵏⵓⵏ.