ⵜⴰⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ ⵜⵎⵛⴰⵛⴽⴰ ⴷ ⵙ ⵓⵎⴽⵕⴰⴹ ⴼ ⵓⵙⵏⴼⴰⵔ ⵏ ⵓⵎⵕⵚⵓⵎ ⵉⴳⴰⵏ ⴰⵙⵍⴳⵏ 2.02.292 ⵉⵣⴷⵉⵏ ⵙ ⵓⵙⵔⵓⵙ ⵏ ⵉⴱⴹⵉⵢⵏ ⵥⵍⵉⵏⵉ ⵙ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ
ⵜⵙⴽⵔ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ ⵜⴰⵙⵎⵓⵏⵉ ⵍⵍⵉ ⵉⵙⵙⵉⵅⴼ ⵓⵏⵙⵙⵉⵅⴼ ⵏⵏⵙ ⵎⴰⵙⵙ ⵎⵓⵍⴰⵢ ⵀⵓⵛⴰⵎ ⵍⵎⵀⴰⵊⵔⵉ, ⵙ ⵜⵉⵍⵉⵜ ⵏ ⵓⵎⴰⵡⵙⴰⵙ ⵏ ⵜⴳⵯⵏⵙⴰⵏⵜ ⵎⴰⵙⵙ ⵄⴰⴱⴷ ⵍⵡⴰⴼⵉ ⵍⴼⵜⵉⵜ, ⵜⵥⵍⵉ ⵉ ⵜⵖⵓⵔⵉ ⴷ ⵓⵣⵣⵔⴰⵢ ⵏ ⵓⵎⵕⵚⵓⵎ ⵉⴳⴰⵏ ⴰⵙⵍⴳⵏ 2.02.292 ⵉⵣⴷⵉⵏ ⴷ ⵓⵙⵔⵓⵙ ⵏ ⵉⴱⴹⵉⵏ ⵥⵍⵉⵏⵉⵏ ⵙ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ.
ⵎⵛⴰⵛⴽⴰⵏ ⴷ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ ⵙ ⵓⵎⴽⵕⴰⴹ ⴼ ⵓⵙⵏⴼⴰⵔ ⵏ ⵓⵎⵕⵚⵓⵎ ⵉⴳⴰⵏ ⴰⵙⵍⴳⵏ ⴷⴼⴼⵉⵔ ⵏ ⵜⵏⴽⴷⴰ ⵏ ⵎⴰⵙⵙ ⴰⵎⴰⵡⵙⴰⵙ ⵏ ⵜⴳⵯⵏⵙⴰⵏⵜ, ⴷ ⵜⴽⵛⵛⵓⵎⵉⵏ ⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⴼ ⵓⵎⴷⴰⵡⴰⵍ ⵏ ⵜⵎⵏⵜⴰⵍ ⴷ ⵜⵙⵓⵎⴰⵔ ⵏ ⵓⵙⵔⵓⵙ ⵏ ⵓⴹⵕⵉⵚ ⴰⴷ ⵓⵍⴳⵉⵏ.
ⵉⵎⵍⵉ ⴷ ⵎⴰⵙⵙ ⵄⴰⴱⴷ ⵍⵡⴰⴼⵉ ⵍⴼⵜⵉⵜ ⵎⴰⵙ ⵉⴽⵛⵎ ⵓⵙⵏⴼⴰⵔ ⵏ ⵓⵎⵕⵚⵓⵎ ⵉⴳⴰⵏ ⴰⵙⵍⴳⵏ ⵖ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢⵏ ⵉⵖⴰⵡⴰⵍⵏ ⵍⵍⵉ ⵙ ⴷ ⵉⵇⵇⴰⵏ ⴰⴷ ⵜⵏ ⵙⴽⵔⵏⵜ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵙ ⴰⵢⵍⵍⵉ ⵉⵍⵍⴰⵏ ⵖ ⵓⵎⴰⴳⵔⴰⴷ 21 ⵏ ⵓⴷⵓⵙⵜⵓⵔ, ⵃⵎⴰ ⴰⴷ ⵜⵉⵍⵉ ⵜⴼⴰⵜⵉⵜ ⵏ ⵉⵎⵣⴷⴰⵖⵏ ⴷ ⵜⴼⴰⵜⵉⵜ ⵏ ⵡⴰⴽⴰⵍ ⴰⵏⴰⵎⵓⵔ ⵖ ⵓⵡⵇⵇⵔ ⵏ ⵉⵣⵔⴼⴰⵏ ⴷ ⵜⴷⵔⴼⵉⵢⵉⵏ ⵏ ⵉⵏⵎⵓⵔⴰ.
ⵖⵎⴽ ⵍⵍⵉ ⵉⵡⴰⵜⵜⵙ ⵓⵙⵏⴼⴰⵔ ⴰⴷ ⴰⵙⵔⵓⵙ ⵏ ⵓⵙⴰⵜⵉ ⵓⵍⴳⵉⵏ ⴷ ⵢⵓⵙⴰⵏ ⴷ ⵉⵙⵡⵓⴷⴷⵓⵜⵏ ⵣⴷⵉⵏⵉⵏ ⴷ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⵖ ⴽⵓ ⴰⴽⴰⵍ ⴰⵏⴰⵎⵓⵔ, ⵜⵉⵣⵉ ⵏⵏⴰ ⵖ ⵜⵍⵍⴰ ⵜⵓⴷⵔⵜ ⵏ ⵉⴼⴳⴰⵏⵏ ⴷ ⵜⴼⴰⵜⵉⵜ ⵏⵏⵙⵏ ⵖ ⵉⵎⵉⵣⵉ ⵉⵖ ⵣⵣⵉⴳⵣⵏⵜ ⵜⵎⵓⴹⴰⵏ ⵀⵔⵛⵏⵉⵏ, ⵢⵉⵍⵉ ⵓⵛⵛⵉⵍ ⴰⴷ ⵉⵍⵉⵏ ⵉⵙⵡⵓⴷⴷⵓⵜⵏ ⵏ ⵓⵍⴳⴳⵓⴷ ⵉ ⵓⵃⵟⵟⵓ ⵏⵏⵙⵏ ⵖ ⵜⵎⵓⴹⴰⵏ ⴰⴷ.
ⵖ ⵓⵎⵏⵉⴷ ⴰⴷ, ⵢⵉⵡⵉ ⴷ ⵓⵙⵏⴼⴰⵔ ⵏ ⵓⵎⵕⵚⵓⵎ ⵉⴳⴰⵏ ⴰⵙⵍⴳⵏ ⴰⴷ ⵉⵍⵉⵏ ⵉⵙⵡⵓⴷⴷⵓⵜⵏ ⵍⵍⵉ ⴷ ⵇⵇⴰⵏⵏⵉⵏ , ⵖ ⵜⵉⵣⵉ ⴷ ⵢⵓⵙⴰⵏ ⵉ ⵎⴰⵢⴰ ⵏⵏ, ⵙ ⵉⵎⵕⵚⵓⵎⵏ ⴷ ⵜⵖⵜⴰⵙⵉⵏ ⵜⵉⵎⴰⴷⴷⴰⵙⵉⵏ ⴷ ⵜⵎⵙⵙⵓⴳⵓⵔⵉⵏ, ⴷ ⵜⵣⵔⵉⴳⵉⵏ ⴷ ⵉⵙⵉⵡⴹⵏ ⵃⵎⴰ ⴰⴷ ⵢⵉⵍⵉ ⵓⵎⵓⵙⵙⵓ ⵏ ⵓⵖⵉⵡⵍ ⴷ ⵓⵍⴳⴳⵓⴷ ⴰⴼⴰⴷ ⴰⴷ ⵓⵔ ⵉⵅⵛⵉⵏ ⵡⴰⴷⴷⴰⴷ ⵏ ⵜⵎⴰⴹⵓⵏⵜ, ⵢⵉⵍⵉ ⵓⵍⴰ ⵓⵙⵎⵓⵙⵙⵓ ⵏ ⴽⵓ ⵉⵙⴳⴳⵓⵔⵏ ⵉⵍⵍⴰⵏ ⵉ ⵓⵃⵟⵟⵓ ⵏ ⵜⵓⴷⵔⵜ ⵏ ⵎⵉⴷⴷⵏ ⴷ ⵜⴼⴰⵜⵉⵜ ⵏⵏⵙⵏ.
ⵙ ⵜⵓⵎⴰⵢⵜ ⵏ ⵓⵙⵏⴼⴰⵔ ⴰⴷ, ⴽⵓ ⴰⴼⴳⴰⵏ ⵢⵓⴳⵉⵏ ⵉⵙⵡⴰⵍⴰⵜⵏ ⴷ ⵜⵖⵜⴰⵙⵉⵏ ⵏ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⴰⵔ ⴰⵙ ⵉⵜⵜⵚⵉⵃⵉ ⵓⵖⵣⵓ ⵏ ⵡⴰⵢⵢⵓⵔ ⴰⵔ ⴽⵕⴰⴹ ⵢⵢⵉⵔⵏ ⴷ ⵜⴼⴳⵓⵔⵜ ⵏ 300 ⴰⵔ 1300 ⵏ ⴷⵔⵀⵎ ⵏⵖ ⵢⴰⵜ ⵖ ⵜⵎⵔⵔⵓⵜⵉⵏ ⴰⴷ, ⴷ ⴰⵡⵔ ⵢⵉⵍⵉ ⵓⵙⵉⵜⵜⵉ ⵏ ⵜⵎⵔⵔⵓⵜ ⵜⴰⵏⴱⴽⴰⴹⵜ ⵢⴰⵜⵜⵓⵢⵏ. ⵖⵎⴽ ⵍⵍⵉ ⵜⵜⵚⵉⵃⵉ ⵜⴼⴳⵓⵔⵜ ⴰⴷ ⵉ ⵡⴰⵏⵏⴰ ⵉⴱⴷⴷⵏ ⴷⴰⵜ ⵏ ⵓⵣⵣⴳⵉⵔ ⵏ ⵜⵖⵜⴰⵙⵉⵏ ⵏ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵍⵍⵉ ⴷ ⵢⵉⵡⵉ ⵓⵎⵕⵚⵓⵎ ⴰⴷ ⵉⴳⴰⵏ ⴰⵙⵍⴳⵏ, ⵙ ⵜⴽⵕⴹⵉ ⵏⵖ ⴰⵙⴷⵉⴷⴷⵉⵢ ⵏⵖ ⵜⵉⴽⵏⵏⴰⴹ ⵏⵖ ⴰⵣⵓⵛⵛⵍ ; ⴷ ⵡⴰⵏⵏⴰ ⵉⵜⵜⵉⵏⵉⵏ ⵉ ⵡⵉⵢⵢⴰⴹ ⴰⴷ ⴰⴳⵉⵏ ⵜⵉⵖⵜⴰⵙⵉⵏ ⵉⵜⵜⵓⴱⴷⴰⵔⵏ ⵖ ⵜⵙⴷⴷⴰⵔⵜ ⴰⴷ, ⵙ ⵉⵡⵏⵏⴰⵏ ⵏⵖ ⵜⴰⵖⵉⵢⵢⵉⵜ ⵏⵖ ⵉⵙⴷⵉⴷⴷⵉⵢⵏ ⵉⵎⵉⵡⴰⵏⵏ ⵖ ⵉⴷⵖⴰⵔⵏ ⴷ ⵜⵙⵎⵓⵏⴰⵢ ⵜⵉⴳⴷⵓⴷⴰⵏⵉⵏ, ⴷ ⵜⵙⵎⵎⴰⵍⵉⵏ ⵉⵜⵜⵓⴱⵙⴰⵔⵏ ⴷⴰⵜ ⵏ ⵉⴳⴷⵓⴷⵏ, ⵓⵍⴰ ⵙ ⵉⵙⴳⴳⵓⵔⵏ ⵉⵙⵍⵉⵥⵉⵕⵏ ⵏⵖ ⵉⵍⵉⴽⵟⵕⵓⵏⵉⵢⵏ, ⵏⵖ ⴽⵓ ⴰⵙⴳⴳⵓⵔ ⵢⴰⴹⵏ.
ⴷⴼⴼⵉⵔ ⵎⴰ ⴰⴷ, ⵙⴰⵡⵍⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ, ⵉⵍⵍⴰⵏ ⵖ ⵓⴷⵖⴰⵔ ⵏ ⴽⵓ ⵉⴼⵔⴷⵉⵙⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙⵓⵜⴳⵏ ⵜⵉⵙⵏⵜⴰⵢⵉⵏ ⵎⵛⵓⴽⴽⴰⵏⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵃⴼⴹ ⵕⴱⴱⵉ, ⵉⵡⴰⵜⵜⵙⵏ ⴰⵃⵟⵟⵓ ⵏ ⵜⴷⵓⵙⵉ ⵏ ⵉⵏⵎⵓⵔⴰⵏ ⴷ ⵓⴼⵔⴰⴳ ⵏ ⵜⵣⵣⵉⴳⵣⵜ ⵏ ⵜⵎⴰⴹⵓⵏⵜ ⴰⴷ, ⵎⵍⵉⵏ ⴷ ⴰⵙⵓⵜⴳ ⵏⵏⵙⵏ ⵉ ⵜⴹⴼⵕⵉ ⵜⴰⵙⵓⵍⴰⵏⵜ ⵏ ⴱⴰⴱ ⵏ ⵡⴰⴷⴷⵓⵔ ⵉ ⵜⵣⵣⵉⴳⵣⵉⵏ ⵏ ⵉⵙⵓⵔⵙⵏ ⴷ ⵓⵙⵎⴽⵍ ⵏ ⵉⴷⵔⵉⵣⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵡⵉⵏ ⵜⵏⴼⵔⵓⵜ ⵉⵣⴷⵉⵏ ⴷ ⵜⵎⴰⴹⵓⵏⵜ ⴰⴷ.
ⵖⵎⴽ ⵍⵍⵉ ⵙⵓⵜⴳⵏ ⵜⴰⵙⵏⵜⴰⵢⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⵍⵍⵉⵖ ⵉⵙⴽⵔ ⵢⴰⵏ ⵓⴼⵏⵉⵇ ⵉⵥⵍⵉⵏ ⵙ ⵓⵙⵡⵓⴷⴷⵓ ⵏ ⵜⵎⴰⴹⵓⵏⵜ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ ⵍⵍⵉ ⴷ ⵉⴳⴳⵯⵔⴰⵏ, ⵃⵎⴰ ⴰⴷ ⵉⴼⵙⵉⵙⵏ ⵉⴷⵔⵉⵣⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⵉⵣⴷⵉⵏ ⴷ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ, ⵖⵎⴽ ⴰⵏⵏ ⵓⵍⴰ ⴷ ⵓⵙⵖⵔⵜ ⴷ ⵓⵙⵎⵓⵙⵙⵓ ⵏ ⵓⵏⴳⵔⴰⵡ ⴰⴷⴰⵡⵙⴰⵏ ⵉ ⵓⵙⴱⴷⴷⵉ ⵏ ⵜⵣⵣⵉⴳⵣⵜ ⵏ ⵜⵎⴰⴹⵓⵏⵜ ⴰⴷ, ⵙⵓⵜⴳⵏ ⵓⵍⴰ ⵜⴰⵖⵓⵔⵉ ⵏ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵏⵚⵕ ⵕⴱⴱⵉ ⵉ ⵢⵉⴳⵔ ⴰⴷⴰⵡⵙⴰⵏ ⴰⵄⴰⵙⴽⴰⵔⵉ ⵃⵎⴰ ⴰⴷ ⵢⵉⵍⵉ ⵓⵍⵜⴰⵖ ⴷ ⵉⵎⵙⵜⴳⴳⴰⵔⵏ ⵉⴷⴰⵡⵙⴰⵏⵏ ⵓⵖⵔⵉⵎⵏ ⵖ ⵓⵙⴱⴷⴷⵉ ⵏ ⵜⵎⴰⴹⵓⵏⵜ ⵏ ⴽⵓⵕⵓⵏⴰ.
ⵙⵓⵜⴳⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵓⵍⴰ ⵙ ⵜⴰⵎⵓⵏⵜ ⵉⴷⵓⵙⵏ ⵏ ⵓⵎⴰⴷⴰⵏ ⴰⵎⵖⵔⵉⴱⵉ ⴷ ⵓⵙⵎⵓⵙⵙⵓ ⴰⵅⴰⵜⴰⵔ ⵏ ⴽⵓ ⵜⵉⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴷ ⵜⵎⵔⵙⴰⵍ ⵏ ⵜⵏⴼⵔⵓⵜ ⴷ ⵓⵍⵜⴰⵖ ⵏ ⵡⴰⴳⴳⴰⴹⵏ ⵓⴷⴷⵉⵔⵏ ⵖ ⵜⴳⵍⴷⵉⵜ ⵖ ⵜⵓⴳⴳⴰⵙ ⵏ ⵓⵙⵏⴰⵍ ⵏ ⵓⴼⵏⵉⵇ ⴰⵏⴰⵎⵓⵔ ⵏ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏ ⴽⵓⵕⵓⵏⴰ.
ⵙ ⵓⵣⵎⵣⵣⵓ ⴰⴷ, ⵖⵔⴰⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵉ ⵜⵏⴱⴰⴹⵜ ⵃⵎⴰ ⴰⴷ ⵢⵉⵍⵉ ⵓⵙⵏⴰⵍ ⵏ ⵎⵉⴷⴷⵏ ⵛⵃⴰⵏⵉⵏ ⵉⵜⵜⵓⴹⵕⴰⵏⵏ ⵖ ⵓⵙⵔⵓⵙ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵖ ⵜⴳⵍⴷⵉⵜ ⴽⵓⵍⵍⵓ ⵜⵜ, ⵖⵎⴽ ⴰⵏⵏ ⴷ ⵓⵥⵟⵟⴰ ⴰⴷⵎⵙⴰⵏ ⵉⵍⵍⴰⵏ ⵖ ⵓⵣⴷⵓⵔ ⴷⴼⴼⵉⵔ ⵏ ⵜⵣⵣⵉⴳⵣⵜ ⵏ ⵜⵎⴰⴹⵓⵏⵜ ⴰⴷ.
ⵖⵎⴽ ⵍⵍⵉ ⵖⵔⴰⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ ⵉ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⴷ ⵜⴳⴳⴰⵍⵉⵏ ⵏ ⵜⵏⴼⵔⵓⵜ ⵃⵎⴰ ⴰⴷ ⵢⵉⵍⵉ ⵓⵣⵣⴳⵉⵔ ⵏ ⵓⵙⵍⴳⵏ ⵜⴰⵎⴰ ⵏ ⵓⵡⵇⵇⵔ ⵏ ⵉⵣⵔⴼⴰⵏ ⵏ ⵓⵏⵎⵓⵔⵉ ⴷ ⵜⴼⴰⵜⵉⵜ ⵏ ⵜⴼⴽⴽⴰ ⵏⵏⵙ.