ⴰⵙⵎⵏⵉⴷ ⵏ ⵜⵎⴰⵡⵙⴰⵙⵜ ⵏ ⵜⴷⵎⵙⴰ ⴷ ⵓⵥⵕⴼ ⴼ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵏ 2022 ⵖ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵏⵜ ⴳ ⵓⵙⵇⵇⵉⵎ ⵏ ⵉⵎⵓⵔⴰ

ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵏⵜ ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵢⵏⴰⵙ 25 ⴽⵟⵓⴱⵕ 2021, ⵜⴰⵙⵎⵓⵏⵉ ⵙ ⵜⵏⵙⵙⵉⵅⴼⵜ  ⵏ ⵎⴰⵙⵙ ⵎⵓⵃⴰⵎⵎⴰⵙ ⵛⵓⴽⵉ, ⵜⵙⵎⵏⵉⴷ ⴳⵉⵙ ⵎⴰⵙⵙⴰ ⵏⴰⴷⵢⴰ ⴼⵜⵜⴰⵃ ⵍⵄⴰⵍⴰⵡⵉ ⵜⴰⵎⴰⵡⵙⴰⵙⵜ ⵏ ⵜⴷⵎⵙⴰ ⴷ ⵓⵥⵕⴼ ⴰⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵏ 2022, ⵙ ⵜⵉⵍⵉⵜ ⵏ ⵓⵎⴰⵡⵙⴰⵙ ⴰⵎⴰⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵜⵎⵙⴰⵙⵜⵍⵜ ⵎⴰⵙⵙ ⴼⴰⵡⵣⵉ ⵍⵇⵊⵄ.

ⵜⵙⴰⵡⵍ ⵜⵎⴰⵡⵙⴰⵙⵜ ⴼ ⵓⵎⵏⴰⴹ ⵏ ⵓⵙⵓⵊⴷ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ, ⵜⵙⵉⵙⴼⵉⵡ ⵎⴰⵙ ⵉⵍⵍⴰ ⵓⵙⵎⵖⵔ ⴰⴷⵎⵙⴰⵏ ⴳ ⵜⵎⴰⵣⵉⵔⵜ ⵙ ⵢⴰⵏ ⵓⵏⵛⴽ ⵏ ⵜⵣⵣⵉⴳⵣⵜ ⵍⵍⵉ ⵔⴰⴷ ⵉⵍⴽⵎ 5.4 %, ⵙ ⵉⵙⵡⵓⴷⴷⵓⵜⵏ ⵍⵍⵉ ⵉⵙⴽⵔ ⵍⵎⵖⵔⵉⴱ ⵙ ⵉⵙⵡⴰⵍⴰⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.

ⴳ ⵎⴰⴷ ⵉⵥⵍⵉⵏ ⵙ ⵜⵓⵔⴷⴰⵡⵉⵏ ⴼ ⵉⵍⵍⴰ ⵓⴱⴷⴷⴰⴷ, ⵜⵏⵏⴰ ⵜⵎⴰⵡⵙⴰⵙⵜ ⵎⴰⵙ ⵉⵡⴰⵜⵜⵙ ⵓⵙⵏⴼⴰⵔ ⵏ ⵓⵙⵍⴳⵏ ⵏ 2022 ⵜⵉⵍⵉⵜ ⵏ ⵓⵏⵛⴽ ⵏ ⵜⵣⵣⵉⴳⵣⵜ ⵏ ⵓⵢⴰⴼⵓ ⴰⴳⵯⵏⵙⴰⵏ  ⵉⴳⴰⵏ 3.2 % , ⴷ ⵓⵏⵛⴽ ⵏ ⵜⵣⵣⵓⴳⵜ  ⴳ 1.2%, ⴷ ⵓⵢⴰⴼⵓ ⵏ ⵉⴳⵔⴰⵏ ⴳ 80 ⵎⵍⵢⵓⵏ ⵇⵏⵟⴰⵕ, ⴷ ⴰⵏⵛⴽ ⵏ ⵓⵚⵕⵓⴼ ⵏ ⴷⴷⵓⵍⴰⵕ ⴳ 9.26 ⴷⵔⵀⴰⵎ.

ⵜⵏⵏⴰ ⵜⵎⴰⵡⵙⴰⵙⵜ ⵎⴰⵙ ⵉⴱⴷⴷ ⵓⵙⴰⵜⵉ ⵏ ⵓⵙⵓⵊⴷ ⵏ ⵓⵙⵍⴳⵏ ⵏ ⵓⵥⵕⴼ ⴼ ⵜⵓⵎⴰⵢⵉⵏ ⵏ ⵜⵉⵏⵏⴰⵡⵉⵏ ⵜⵉⴳⵍⴷⴰⵏⵉⵏ ⴷ ⵡⴰⵏⴰⵡ ⵓⵏⴳⵉⵎ ⴰⵎⴰⵢⵏⵓ ⴷ ⵓⵖⴰⵡⴰⵙ ⴰⴳⴷⵓⴷⴰⵏ, ⵉⵡⴰⵜⵜⵙ ⴰⵙⴷⵓⵙ ⵏ ⵜⵔⵙⴰⵍ ⵏ ⵓⵙⵙⵉⴷⵔ ⵏ ⵜⴷⵎⵙⴰ ⵜⴰⵏⴰⵎⵓⵔⵜ, ⴰⵙⴷⵓⵙ ⵏ ⵉⵎⴰⵙⵙⵏ ⵏ ⵓⵙⵉⴷⴼ ⴷ ⵜⵣⵣⵉⴳⵣⵜ ⴳ ⵓⵙⵎⴰⵜⴰ ⵏ ⵓⴼⵔⴰⴳ ⴰⵏⴰⵎⵓⵏ, ⴰⵙⴷⵓⵙ ⵏ ⵓⴷⴳⴰⵔ ⴰⵏⴼⴳⴰⵏ, ⴰⵎⵓⴽⵏ ⵏ ⵢⵉⴳⵔ ⴰⵎⴰⵜⴰⵢ ⴷ ⵓⵙⴷⵓⵙ ⵏ ⵜⵏⵏⵓⴱⴹⴰ.

ⴳ ⵜⴳⵉⵔⴰ ⵏ ⵜⵙⵎⵓⵏⵉ, ⵎⵙⴰⵙⴰⵏ ⴷ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⴼ ⵡⴰⴽⵓⴷ ⴰⵣⵔⴼⴰⵏ ⵏ ⵓⵎⴹⴰⴽⴰⵕ ⵏ ⵓⵙⵍⴳⵏ ⵏ ⵓⵥⵕⴼ, ⵔⴰⴷ ⵢⵉⵍⵉ ⵓⵎⴹⴰⴽⴰⵕ ⴰⵎⴰⵜⴰⵢ ⴳ ⴰⴽⵕⴰⵙ 27 ⴽⵟⵓⴱⵕ 2021.