ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴽⴽⵓⵥ ⵉⵙⵏⴼⴰⵔⵏ ⵏ ⵉⵙⵍⴳⵏⵏ, ⵉⵙⵎⴷ ⵜⴰⵙⵓⵜⵍⵜ ⵜⵉⵙ ⵙⵏⴰⵜ ⵏ ⵓⵙⴳⴳⵯⴰⵙ ⴰⵣⵣⵔⴰⴼ 2021-2022
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 26 ⵢⵓⵍⵢⵓⵣ 2022, ⴽⴽⵓⵥ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴳ ⵜⵖⵉⵎⵉⵜ ⵜⴰⵣⵣⴰⵔⴰⴼⵜ ⵉⵙⵙⵉⵅⴼ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ, ⵙ ⵜⵉⵍⵉⵜ ⵏ ⵎⴰⵙⵙⴰ ⵏⴰⴷⵢⴰ ⴼⵜⵜⴰⵃ ⵄⴰⵍⴰⵡⵉ ⵜⴰⵎⴰⵡⵙⴰⵙⵜ ⵏ ⵜⴷⵎⵙⴰ ⴷ ⵜⴷⵔⵉⵎⵜ ⴷ ⵎⴰⵙⵙ ⵎⵓⵃⴰⵎⵎⴰⴷ ⵚⴰⴷⵉⵇⵉ ⴰⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴷ ⵜⴳⵯⵎⵔⵜ ⵜⴰⵢⵍⴰⵏⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ.
ⵉⵙⵖⵣⵏ ⵓⵙⵇⵇⵉⵎ ⵙ ⵓⵎⴽⵕⴰⴹ ⴰⵙⵏⴼⴰⵔ ⵏ ⵓⵙⵍⴳⵏ 40.21 ⵉ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ 104.12 ⵉⵣⴷⵉⵏ ⴷ ⵜⵍⴻⵍⵍⵉ ⵏ ⵡⴰⵜⵉⴳⵏ ⴷ ⵓⵎⵃⵉⵣⵡⴰⵔ, ⵉⵡⴰⵜⵜⴰⵙ ⴰⵙⵉⵙⴼⵉⵡ ⵏ ⵜⵎⵙⴽⴰⵔ ⴷ ⵜⴱⵔⵉⴷⵉⵏ ⵅⴼ ⵜⵉⵎⵙⴰⵔⵉⵏ ⴳⴰⵏⵉⵏ ⵎⴳⴰⵍ ⵏ ⵓⵎⵃⵉⵣⵡⴰⵔ ⴷ ⵓⴼⵔⴰⴳ ⵏ ⵉⵣⵔⴰⴼⵏ ⵏ ⵉⴷ ⴱⴰⴱ ⵏⵏⵙⵏ, ⵖⵎⴽⴰⵏ ⴷ ⵓⵙⵖⵓⴷⵓ ⵏ ⵓⵏⴳⵔⴰⵡ ⵏ ⵜⵉⴹⴰⴼ ⴳ ⵓⵎⵏⵉⴷ ⴰⴷ.
ⵉⵙⵖⵣⵏ ⵓⵙⵇⵇⵉⵎ ⵓⵍⴰ ⵙ ⵓⵎⴰⴽⵕⴰⴹ ⴰⵙⵏⴼⴰⵔ ⵏ ⵓⵙⵍⴳⵏ 41.21 ⵉ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ 20.13 ⵉⵣⴷⵉⵏ ⴷ ⵓⵙⵇⵇⵉⵎ ⵏ ⵓⵎⵃⵉⵣⵡⴰⵔ, ⵉⵡⴰⵜⵜⴰⵙ ⴰⵙⴷⵓⵙ ⵏ ⵜⵙⵓⴳⵔⵜ ⵏ ⵓⵙⵇⵇⵉⵎ ⴰⴷ ⵉⴳⴰⵏ ⵜⵉⵎⵔⵙⵍⵜ ⵜⴰⴷⵙⵜⴰⵔⵜ.
ⵔⴰⴷ ⴰⵡⵙⵏ ⵙⵉⵏ ⵉⴹⵕⵉⵚⵏ ⴰⴷ ⵉⵣⵣⵔⴰⴼⵏ ⴳ ⵓⵙⵖⵓⴷⵓ ⵏ ⵜⵡⵡⵓⵔⵉⵡⵉⵏ ⵏ ⵓⵙⵙⴰⵔⵓ, ⴷ ⵓⴼⵔⴰⴳ ⴷ ⵓⵙⵖⵓⴷⵓ ⵏ ⵜⵙⵓⴳⵔⵜ ⵏ ⵎⵙⵓⵖⵜ ⵏ ⵉⵏⵎⵓⵔⴰⵏ ⴳ ⵓⵎⵏⵉⴷ ⵏ ⵜⵓⵎⵔⵜ ⵜⴰⵏⴰⵎⵓⵏⵜ, ⵖⵎⴽ ⴰⵏⵏ ⴷ ⵓⵙⴷⵓⵙ ⵏ ⵜⵏⵏⵓⴱⴹⴰ ⵉⵥⵉⵍⵏ ⴷ ⵓⵡⴰⵏⴽ ⵏ ⵓⵣⵔⴼ ⴷ ⵓⵙⵍⴳⵏ ⴳ ⵢⵉⴳⵔ ⴰⴷⵎⵙⴰⵏ.
ⵖ ⵜⵖⵉⵎⵉⵜ ⵏⵉⵜ, ⵉⵍⵍⴰ ⵓⵙⵖⵣⵏ ⵙ ⵓⵎⴽⵕⴰⴹ ⵏ ⵓⵙⵏⴼⴰⵔ ⵏ ⵓⵙⵍⴳⵏ 84.21 ⴼ ⵓⵙⴳⵎⵉ ⵏ ⵉⵎⵓⴷⴰⵔ ⵏ ⵢⵉⵍ, ⴷ ⵓⵙⵏⴼⴰⵔ ⵏ ⵓⵙⵍⴳⵏ 85.21 ⵉ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ 52.09 ⴼ ⵓⵙⴽⵔ ⵏ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵜⴳⵎⵉ ⵏ ⵓⵙⴳⵎⵉ ⵏ ⵉⵎⵓⴷⴰⵔ ⵏ ⵢⵉⵍ, ⴳⴰⵏⵉⵏ ⵙⴳ ⵜⵙⵔⵜⴰⵜⵉⵊⵉⵜ ⵏ ⵜⵎⴰⴷⴷⴰⵙⵜ ⵏ ⵜⵎⵜⵜⴰ ⵎⵓⵏⵏⵉⵏ ⵉ ⵓⵜⵛⵓ ⴷ ⵜⵏⴼⵍⴰⵃⵜ ⵉ ⵓⵙⵎⵖⵔ ⵏ ⵜⵙⵓⴳⴰⵔ ⵏ ⵉⵏⴳⵔⴰⵡⵉⵏ ⵉⵏⵃⵍⴰⵃⵏ.
ⵡⴰⵜⵜⵙⵏ ⵙⵉⵏ ⵉⴹⵕⵉⵚⵏ ⴰⴷ ⵜⵉⵍⵉⵜ ⵏ ⵢⴰⵏ ⵓⵙⵍⴳⵏ ⵉⵣⴷⵉⵏ ⴷ ⵉⵎⵓⴷⴰⵔ ⵏ ⵢⵉⵍ ⵙ ⵎⴰⴷ ⵉⵎⵙⴰⵙⴰⵏ ⴷ ⵜⵎⴰⴳⴰⵉⵜ ⵏⵏⵙⵏ ⵉⴼⴰⵡⵏ ⴷ ⵓⵙⵔⵙ ⵏⵏⵙⵏ ⴰⵣⵔⴼⴰⵏ ⴷ ⵓⴹⵎⵏ ⵏ ⵓⵔⴳⴳⵉⴳ ⴰⵣⵔⴼⴰⵏ ⴷ ⵜⵉⵍⵉⵜ ⵏ ⵜⵎⴰⴼⴰⵡⵜ ⴷ ⵜⵉⴽⴽⵉ ⵏ ⵜⵉⴼⴰⵡⵜ ⵉ ⵉⴷ ⴱⴰⴱ ⵏ ⵓⵙⵙⴰⵔⵓ.
ⵙⴰⵡⵍ ⵉⴹⵕⵉⵚⵏ ⴰⴷ ⵓⵍⴰ ⴼ ⵎⴰⴷ ⵉⴳⴰⵏ ⴰⵙⴳⵎⵉ ⵏ ⵉⵎⵓⴷⴰⵔ ⵏ ⵡⴰⵎⴰⵏ ⴷ ⵡⵉⵏ ⵢⵉⵍ ⵉⴱⴷⴷⵏ ⴼ ⵜⵔⵙⵍⵜ ⵜⴰⵣⵔⴼⴰⵏⵜ, ⵖⵎⴽ ⴰⵏⵏ ⴷ ⵓⵙⵏⴰⵍ ⵏ ⵓⵡⴰⵏⴽ, ⴷ ⵓⵙⵉⴷⴼ ⵏ ⵜⵎⵢⴰⴷⴰⵙⵜ ⵏ ⵓⵙⵖⵉⵡⵙ ⵉⵣⴷⵉⵏ ⴷ ⵢⵉⴳⵔ ⵏ ⵓⵙⴳⵎⵉ ⵏ ⵉⵎⵓⴷⴰⵔ ⵏ ⵢⵉⵍ, ⵖⵎⴽ ⴰⵏⵏ ⴷ ⵓⵙⴷⵓⵙ ⵏ ⵓⵣⵣⵔⴰⵢ ⴷ ⵉⵙⵡⵓⴷⴷⵓⵜⵏ ⵏ ⵓⴼⵔⴰⴳ ⵏ ⵡⴰⵡⵏⴰⴹ ⴷ ⵓⵙⴽⵔ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵓⵙⴳⵎⵉ ⵏ ⵉⵎⴰⴷⵓⴰⵔ ⵏ ⵡⴰⵎⴰⵏ ⴷ ⵢⵉⵍ.
ⵉⵙⵏⵎⴰⵍⴰ ⴳ ⵜⴳⵉⵔⴰ ⵓⵙⵇⵇⵉⵎ ⵏ ⵉⵎⵓⵔⴰ ⵜⵉⵖⵉⵎⵉⵜ ⵜⴰⵎⴰⵜⴰⵢⵜ ⵉ ⵓⵙⵎⴰⴷ ⵏ ⵜⵙⵓⵜⵍⵜ ⵜⵉⵙ ⵙⵏⴰⵜ ⴳ ⵓⵙⴳⴳⵯⴰⵙ ⴰⵣⵣⴰⵔⴼ ⴰⵎⵣⵡⴰⵔⵓ ⴳ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵢⴰⵜ ⴷ ⵎⵔⴰⵡⵜ, ⵙ ⵓⵎⵙⴰⵙⴰ ⴷ ⵓⵎⵏⵏⵉ 65 ⵏ ⵓⴷⵓⵙⵜⵓⵔ ⴷ ⵓⵎⵏⵏⵉ 19 ⵏ ⵓⵏⴳⵔⴰⵡ ⴰⴳⵯⵏⵙⴰⵏ, ⵉⵙⵎⵏⵉⴷ ⴳⵉⵙ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵜⴰⵢⵢⴰⴼⵓⵜ ⵏ ⵓⵙⵇⵇⵉⵎ .