ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵕⵥⵥⵓⵎ ⵏ ⵜⵙⵓⵜⵍⵜ ⵜⴰⵣⵣⵔⴰⴼⵜ ⵜⵉⵙ ⵙⵏⴰⵜ ⴳ ⵓⵙⴳⴳⵯⴰⵙ ⴰⵣⵣⵔⴰⴼ 2021-2022

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⴰⵡⵙⴰⵙⵏ

ⵜⵉⵏⴳⴳⵯⴰ ⴷ ⵉⵏⴳⴳⵯⴰ ⵉⵎⵓⵔⴰ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵙ ⵓⵎⵙⴰⵙⴰ ⴷ ⵉⴱⴹⵉⵢⵏ ⵏ ⵓⵎⵏⵏⵉ 65 ⴳ ⵓⴷⵓⵙⵜⵓⵔ, ⴷⴰ ⵏⵕⵥⵥⵓⵎ ⵜⴰⵙⵓⵜⵍⵜ ⵜⵉⵙ ⵙⵏⴰⵜ ⴳ ⵓⵙⴳⴳⵯⴰⵙ ⴰⵣⵣⵔⴰⴼ ⴰⵎⵣⵡⴰⵔⵓ ⴳ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵢⴰⵜ ⴷ ⵎⵔⴰⵡⵜ ⵖ ⵎⴰⴷ ⵉⵥⵍⵉⵏ ⵙ ⵜⵖⵉⵎⵉⵜⵉⵏ ⵜⵉⵎⴰⵜⴰⵢⵉⵏ, ⵉⵣⵣⵉⴳⵣ ⵓⵙⵇⵇⵓⵎ ⵏ ⵉⵎⵓⵔⴰ ⴳ ⵜⵉⵣⵉ ⵉⵍⵍⴰⵏ ⵊⴰⵔ ⵙⵏⴰⵜ ⵜⵙⵓⵜⴰⵍ ⵜⵉⵡⵡⵓⵔⵉⵡⵉⵏ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⴷ ⵜⵔⵓⴱⴱⴰ ⵜⵉⵙⴳⵓⵎⴰⵏⵉⵏ ⴷ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ.

ⴳ ⵜⵣⵡⵉⵔⵉ, ⵙ ⵜⵎⵍⴷⴰ ⵏ ⵡⴰⵢⵢⵓⵔ ⵏ ⵕⴰⵎⴰⴹⵏ, ⴰⴷ ⵙⵎⵏⵉⴷⵖ ⵉⵙⵔⵖⵓⴷⵏ ⵥⵉⵍⵏⵉⵏ ⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵄⵣⵣⵓ ⵕⴱⴱⵉ, ⴰⴷ ⴼⵍⵍⴰⵙ ⵉⵙⴷⵓⵙ ⵕⴱⴱⵉ ⵜⴰⴷⵓⵙⵉ ⵢⴰⵊⵊ ⴰⵙ ⴱⴰⴱ ⵏ ⵜⴰⵜⵜⵓⵢⵜ ⵜⴰⴳⵍⴷⴰⵏⵜ ⴰⴳⵍⴷⵓⵏ ⵎⵓⵍⴰⵢ ⵍⵃⴰⵙⴰⵏ ⴷ ⴳⵯⵎⴰⵙ ⴱⴰⴱ ⵏ ⵜⴰⵜⵜⵓⵢⵜ ⵜⴰⴳⵍⴷⴰⵏⵜ ⴰⴳⵍⴷⵓⵏ ⵎⵓⵍⴰⵢ ⵕⴰⵛⵉⴷ ⴷ ⴽⵓ ⵜⴰⵡⵊⴰ ⵏⵏⵙ ⵜⴰⴳⵍⴷⴰⵏⵜ ⵜⴰⵛⴰⵔⵉⴼⵜ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⴷⴰ ⵏⵕⵥⵥⵓⵎ ⵜⴰⵙⵓⵜⵍⵜ ⴰⴷ ⴳ ⵢⴰⵏ ⵓⵎⵏⴰⴹ ⴰⵏⴰⵎⵓⵔ ⴳ ⵜⵙⴳⵓⴷⵉ ⵜⵎⴰⵣⵉⵔⵜ ⵏⵏⵖ ⵏ ⴽⵉⴳⴰⵏ ⵏ ⵓⵙⵓⵜⴳ ⴷ ⵓⵙⴷⵓⵙ ⵏ ⵓⴷⵖⴰⵔ ⵏⵏⵙ ⴷ ⵜⴰⵔⵙⵍⵜ ⵏ ⵓⵔⴳⴳⵉⴳ ⴰⵏⵎⵏⴰⴹ ⴷ ⵓⵎⵏⵥⴰⵡ ⴷ ⵓⵎⵔⴰⵡ ⵉⵖⵣⴰⵏⵏ ⴰⵎⵢⵉⵎⴰⵏ ⵉⵎⵎⴰⵖⵏ ⴼ ⵓⵡⵇⵇⵔ ⵏ ⵉⵙⵖⵡⴰⵏ ⵏⵏⵙ ⵎⵏⵉⴷ ⵏ ⵜⵔⴰⴱⴱⵓⵜ ⵜⴰⵎⴰⴹⵍⴰⵏⵜ ⴷ ⵎⵏⵉⴷ ⵏ ⵉⵎⴷⵔⴰⵡⵏ ⵏⵏⵙ ⴷ ⵉⵎⴷⴷⵓⴽⴽⵯⴰⵍ ⵏⵏⵙ ⴷ ⵓⵎⵙⵓⵜⵍ ⵏⵏⵙ. ⵙ ⵓⵙⴷⴷⴻⴷ, ⵉⴳⴰ ⵎⴰ ⴰⵏⵏ ⴰⵢⵍⵍⵉ ⵉⵜⵜⵓⵙⴽⴰⵔⵏ ⵙ ⵜⵏⴰⵔⴰ ⵜⵓⵏⵥⵉⵣⵜⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵄⵣⵣⵓ ⵕⴱⴱⵉ ⴷ ⵜⴰⵏⵏⴰⵢⵜ ⵏⵏⵙ ⵜⴰⵎⵣⵡⴰⵔⵓⵜ ⴷ ⵓⵎⵏⵉⴷ ⵏⵏⵙ ⵉⴷⵔⴰⵏ ⴳ ⵜⵏⴰⵔⴰ ⵏ ⵜⵙⵔⵜⵉⵜ ⵏ ⴱⵕⵕⴰ ⵏ ⵜⴳⵍⴷⵉⵜ ⴷ ⵓⵙⵡⵓⵔⵉ ⵏⵏⵙ ⵉ ⵓⵙⴷⵓⵙ ⵏ ⵉⵎⵓⴽⵏⵏ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⴷ ⵓⵃⵟⵟⵓ ⵏ ⵜⴷⵔⴼⵉⵢⵉⵏ ⴳ ⵓⴳⵯⵏⵙ.

ⵜⵉⵡⵉ ⴷ ⵜⵎⴰⴼⴰⵡⵜ ⴳ ⵡⴰⴷⴷⴰⴷⵏ ⵏ ⵜⴳⵍⴷⵉⵜ ⴷ ⵓⵙⵡⵓⴷⴷⵓ ⵏ ⴱⴰⴱ  ⵏ ⵡⴰⴷⴷⵓⵔ ⵜⴰⵎⵙⴰⵔⵜ ⵏ ⵜⵢⴰⵏⵜ ⵏⵏⵖ ⵜⴰⵏⴰⴽⴰⵍⵜ ⵉⴱⴷⴷⵏ ⴼ ⵜⵍⵍⵓⴳⵏⴰ ⵜⴰⴳⵔⴰⵖⵍⴰⵏⵜ ⴷ ⵜⵎⵣⵔⴰⵢⵜ ⴷ ⵜⵎⵔⵙⵍⴰⵏⵜ ⴷ ⵜⴷⵉⵎⵓⵇⵔⴰⵟⵉⵜ ⴷ ⵓⵍⵜⴰⵖ ⵏ ⵉⵎⵣⴷⴰⵖⵏ ⵏ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴳ ⵓⵚⴽⵓ ⵏ ⵜⵎⵔⵙⴰⵍ ⴷ ⵉⵙⵏⴼⴰⵔⵏ ⵏ ⵜⴳⵎⵉ ⴳⴰⵏⵉⵏ ⵉⵙⵜⵔⴰⵜⵉⵊⵉⵢⵏ, ⵢⵉⵡⵉ ⴽⵓⵍⵍⵓ ⵎⴰ ⴰⴷ ⵢⴰⵏ ⵓⵙⵡⴰⵍⴰ ⴰⴳⵔⴰⵖⵍⴰⵏ ⵉⴼⴰⵡⵏ ⴰⵔ ⵉⵜⵜⴷⵓⵙ ⵙ ⵜⵖⴰⵔⴰⵙⵜ ⵉⵙⵓⵍⵏ ⴳⵉⵙ ⴰⵙⵉⵙⵙⵏ ⵉⵣⵣⵉⴳⵣⵏ ⵙ ⵉⵣⵔⴼⴰⵏ ⴱⴷⴷⵏⵉⵏ ⵏ ⵜⵎⴰⵣⵉⵔⵜ ⵏⵏⵖ ⵉⵟⵟⴰⴼⵏ ⵜⵉⵅⵅⵓⵜⵔⴰ ⴼ ⵜⵙⴳⴳⵉⵡⵉⵏ ⵏⵏⵙ ⵏ ⵉⴼⴼⵓⵙ, ⴷ ⵎⴰⵙ ⵜⴳⴰ ⵜⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ ⴳ ⵜⵙⴳⴳⵉⵡⵉⵏ ⴰⴷ ⴷⴷⵓ ⵏ ⵜⵅⵅⵓⵜⵔⴰ ⵜⴰⵎⵖⵔⵉⴱⵉⵜ ⵍⵍⵉ ⵜⵙⵎⵏⵉⴷ ⵜⴳⵍⴷⵉⵜ ⵙⴳ 2007, ⵉⴳⴰ ⴰⵙⵙ ⴰⴷ ⴷ ⵔⴰⴷ ⵉⵖⴰⵎⴰ ⵜⴰⵙⵓⵎⵔⵜ ⵉⵖⵣⴰⵏⵏ ⵍⵍⵉ ⵔⴰⴷ ⵉⵜⵜⵓⵙⴽⵉⵔ ⴷ ⵜⴰⵔⵙⵍⵜ ⵏ ⵓⴼⵓⴽⴽⵓ ⵏ ⵜⵎⴰⵖⵜ ⵉⵜⵜⵓⵙⴽⴰⵔⵏ ⴼ ⵜⵙⴳⴳⵉⵡⵉⵏ ⵏⵏⵖ ⵏ ⵉⴼⴼⵓⵙ ⵍⵍⵉ ⵙ ⵜⴼⴼⵖ ⵜⵎⴰⵣⵉⵔⵜ ⵏⵏⵖ ⵙ ⵓⵎⵙⴰⵙⴰ ⴷ ⵜⵍⵍⵓⴳⵏⴰ ⵜⴰⴳⵔⴰⵖⵍⴰⵏⵜ ⵙⴳ ⵜⵉⵎⵔⴰⵡⵉⵏ ⵏ ⵉⵙⴳⴳⵯⴰⵙⵏ.

ⵜⵉⵡⵉ ⴷ ⵜⵡⵡⵓⵔⵉ ⴰⴷ  ⵜⵉⴳⵎⵉ ⵜⴰⵎⵣⵡⴰⵔⵓⵜ ⵖ ⵉⴽⴰⵍⵉⵏ ⵏⵏⵖ ⵍⵍⵉ ⴷ ⵏⵙⵡⵓⵔⵔⵉ, ⵖⵎⴽ ⴰⵏⵏ ⴷ ⵜⵎⴷⵔⴰⵡⵜ ⵉⴳⴳⵓⵜⵏ ⵏ ⴰⵢⵜⵎⴰⵜⵏⵖ ⴷ ⵉⵙⵜⵎⴰⵜⵏⵖ ⴳ ⵜⵙⴳⴳⵉⵡⵉⵏ ⴰⴷ ⴳ ⵓⵙⵡⵓⴷⴷⵓ ⵏ ⵜⵖⴰⵡⵙⴰ ⵜⴰⵏⴰⵎⵓⵔⵜ ⵙ ⵜⴷⵔⴰⵡⵜ ⵏⵏⵙ ⴳ ⵓⵙⵜⴰⵢ ⵏ ⵉⴳⵏⵙⴰⵙⵏ ⵏⵏⵙⵏ ⴳ ⵉⵙⵡⵉⵔⵏ ⴰⵏⴰⵎⵓⵔ ⴷ ⵓⴽⴰⵍⴰⵏ, ⴰⴷⴷⴰⴷ ⵉⴳⴳⵓⵔⴰⵏ ⵉⴳⴰ ⵜ ⴰⵢⵍⵍⵉ ⵜⵎⵍⴰ ⵙ ⵜⵎⴰⴼⴰⵡⵜ ⵜⴰⴷⵊⴰⵔⵜ ⵏⵏⵖ ⵚⴱⴰⵏⵢⴰ ⵍⵍⵉ ⵉⵙⵏⴰⵍⵏ ⵜⴰⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ, ⴰⴷⴷⴰⴷ ⵍⵍⵉ ⵏⵙⵓⵜⴳ, ⵉⵍⵍⴰⵏ ⵜⴰⵎⴰ ⵏ ⵡⴰⴷⴷⴰⴷⵏ ⵏ ⵉⵡⴰⵏⴽⵏ ⵉⵎⴷⴷⵓⴽⴽⵯⴰⵍ ⵙⵓⴳⵔⵏⵉⵏ ⴳ ⵜⵖⵜⴰⵙⵜ ⵜⴰⴳⵔⴰⵖⵍⴰⵏⵜ.

ⴳ ⵜⴷⵉⵏⴰⵎⵉⵜ ⴰⴷ, ⴷⴰ ⵏⵙⵏⵉⵎⵎⵉⵔ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ ⴳⴰⵏⵉⵏ ⵍⵍⴰⵏⵉⵏ ⴰⴽⴷ ⵜⵓⵏⵥⵉⵣⵜ ⴷ ⵜⵍⵍⵓⴳⵏⴰ , ⵏⵖⵔ ⵉ ⵎⴰⴷ ⵙⵓⵍ ⵉⵖⴰⵎⴰⵏ ⴳ ⵉⵎⴷⴷⵓⴽⴽⵯⴰⵍ ⵉ ⵜⵉⵍⵉⵜ ⵏ ⵜⵓⵜⵍⴰⵢⵜ ⵏ ⵓⵏⵍⵉ ⴷ ⵜⵉⴷⵜ ⵏ ⵓⵎⵣⵔⵓⵢ ⴷ ⵜⵍⵍⵓⴳⵏⴰ ⴷ ⵓⵙⵡⵓⵔⵉ ⵉ ⵉⵎⴰⵍ ⵖ ⵎⴰⴷ ⵉⵥⵍⵉⵏ ⵙ ⵉⵣⵔⴼⴰⵏ ⵏⵏⵖ ⵉⵎⵣⵔⴰⵢⵏ, ⵎⴽ ⵍⵍⵉ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⵎⴰⵙ ⵓⵔ ⴰ ⵉⵜⵜⵎⴷⴰⵡⴰⵍ ⵍⵎⵖⵔⵉⴱ ⴼ ⵚⵚⵃⵕⴰ ⵏⵏⵙ, ⴷ ⵓⵔ ⵊⵊⵓ ⵜⴳⵉ ⵜⵎⵖⵔⵉⴱⵉⵜ ⵏ ⵚⵚⵃⵕⴰ ⴽⵔⴰ ⵏ ⵡⴰⵙⵙ, ⴷ ⵓⵔ ⵔⴰⴷ ⵜⴳ, ⴰⵙⵏⵜⵍ ⵏ ⵉⵎⴷⴰⵡⴰⵍⵏ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⴽⵉⴳⴰⵏ ⵏ ⵓⵎⵎⵉⵣⵏ ⵙ ⵜⵏⴰⵔⴰ ⵜⴰⴳⵍⴷⴰⵏⵜ ⵜⵓⵏⵥⵉⵣⵟ, ⵜⵙⴽⵔ ⵓⵍⴰ ⴽⵉⴳⴰⵏ  ⵉⵎⵓⴽⵏⵏ ⴷ ⵓⵎⵓⵔⵙ ⴳ ⵓⵙⵡⵉⵔ ⴰⴳⵯⵏⵙⴰⵏ, ⴰⵢⵍⵍⵉ ⵢⵉⵡⵏⵙ ⴳ ⵓⵖⵣⴰⵏ ⵏ ⵜⵙⵔⵜⵉⵜ ⵏ ⴱⵕⵕⴰ ⵏ ⵜⵎⴰⵣⵉⵔⵜ ⵏⵏⵖ ⵜⴰⵡⵉ ⴰⵙⵓⵜⴳ ⴰⵏⵎⵏⴰⴹ ⴷ ⵓⵎⵏⵥⴰⵡ ⴷ ⵓⴳⵔⴰⵖⵍⴰⵏ.

ⵜⵎⵔⵙ ⵜⵎⴰⵣⵉⵔⵜ ⵏⵏⵖ ⴳ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19 ⴷ ⵉⴷⵔⵉⵣⵏ ⵏⵏⵙ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ, ⴳ ⵎⴰⴷ ⵉⵥⵍⵉⵏ ⵙ ⵓⵙⵡⵓⴷⴷⵓ ⵏ ⵜⵉⵣⵉ ⵏ ⵓⵥⵍⴰⵢ ⴰⴷⵓⵙⴰⵏ ⴷ ⵉⵙⵡⵓⴷⴷⵓⵜⵏ ⵏⵏⵙ ⵉⵥⵕⴼⴰⵏⵏ ⴷ ⵉⴷⵎⵙⴰⵏⵏ, ⴷ ⵜⵉⴽⴽⵉ ⵏ ⵉⴳⵣⵣⴰⵢⵏ ⴷ ⵜⵙⵔⵜⴰⵢ ⴷ ⵉⵖⴰⵡⴰⵙⵏ ⴷ ⵉⵙⵡⵓⴷⴷⵓⵜⵏ ⵉⴳⴷⵓⴷⴰⵏⵏ ⵉ ⵓⵙⵎⵖⵔ ⵏ ⵜⴷⵎⵙⴰ ⴷⴼⴼⵉⵔ ⵏ ⵓⴱⴰⵢⵢⵓⵕ, ⴰⵢⵍⵍⵉ ⵢⵉⵡⵉⵏ ⵢⴰⵏ ⵓⵙⵓⵜⴳ ⴰⴳⵔⴰⵖⵍⴰⵏ.

ⵜⵉⴽⴽⵍⵉⵜ ⵢⴰⴹⵏⵉⵏ ⴷⴰ ⵏⵜⵜⴱⴷⴰⴷ ⵙ ⵓⵡⵇⵇⵔ  ⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵉⵄⵣⵣⵓ ⵕⴱⴱⵉ ⵍⵍⵉ ⵉⵣⵣⵉⴳⵣⵏ ⵙ ⵜⵎⴰⵣⵉⵔⵜ ⴳ ⵢⴰⵜ ⵜⴼⵔⴽⴰ ⵙⵇⵇⵉⵇⵏ ⵙ ⵜⴰⵏⵏⴰⵢⵜ ⵉⴷⵔⴰⵡⵏ ⴷ ⵜⵎⵣⵡⴰⵔⵜ ⴷ ⵜⵉⵍⵉⵜ ⵏ ⵉⵙⵡⵓⴷⴷⵓⵜⵏ.

ⴳ ⵓⵎⵏⴰⴷ ⴰⴷ, ⴰⵎⵏⴰⴹ ⵏ ⵜⵡⵉⵣⵉ, ⵜⵣⵣⵉⴳⵣ ⵜⵎⴰⵣⵉⵔⵜ ⵏⵏⵖ ⴳ ⵓⵙⴽⵔ ⵏ ⵜⵙⵔⵜⴰⵢ ⵍⵉ ⵔⴰⴷ ⵉⵙⵙⵕⵚⵓ ⵜⵉⵔⵙⴰⵍ ⵏ ⵓⵡⴰⵏⴽ ⴰⵏⴰⵎⵓⵏ ⵉⵍⵍⴰⵏ ⴷ ⵡⴰⴷⴷⵓⵔ ⵏ ⴽⵓ ⵉⵏⵎⵓⵔⴰⵏ ⴰⴷ ⴷⴰⵔⵙⵏ ⵉⵍⵉⵏⵏ ⵜⵏⵓⴼⴰ ⵜⵉⵏⴰⵎⵓⵏⵉⵏ ⵜⵉⴷⵙⵍⴰⵏⵉⵏ ⴳ ⵓⵙⴰⵜⵉ ⴰⵎⵔⵙⵍⴰⵏ ⵉⵙⵓⵍⵏ ⵏ ⵜⵏⵓⴼⴰ ⵜⴰⵎⴰⵜⴰⵢⵜ ⵜⴰⵏⴰⵎⵓⵏⵜ.

ⵖⵎⴽ ⵍⵍⵉ ⵉⵟⵟⴰⴼ ⵓⵎⵙⴰⵡⴰⵍ ⴰⵏⴰⵎⵓⵔ ⵊⴰⵔ ⵉⴷ ⴱⴰⴱ ⵏ ⵓⴼⴰⵔⵙ ⵙ ⵉⵡⵉⵣ ⵏ ⵓⵡⴰⵏⴽ ⵢⴰⵏ ⵓⵏⴼⵓⵙ ⴰⵎⴰⵢⵏⵓ ⵍⵍⵉ ⵖ ⵔⴰⴷ ⵜⵖⵓⴷⵓ ⵜⵎⵢⵉⵎⴰⵏⵜ ⴳ ⵜⵎⵙⴽⴰⵔⵜ ⵜⴰⴳⴷⵓⴷⴰⵏⵜ  ⵖⵎⴽ ⴰⵏⵏ ⵓⵍⴰ ⴳ ⵜⵎⵔⵙⴰⵍ ⴷ ⵜⵎⵏⵜⵉⵍⵜ ⵜⴰⵎⴰⵢⵏⵓⵜ ⵉⵛⴷⴷⴰⵏ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵎⴽ ⵍⵍⵉ ⵏⴻⵏⵏⴰ, ⵜⵣⵣⵉⴳⵣ ⵜⵡⵡⵓⵔⵉ ⵏ ⵓⵙⵇⵇⵉⵎ ⴳ ⵜⵉⵣⵉ ⵉⵍⵍⴰⵏ ⵊⴰⵔ ⵙⵏⵜ ⵜⵙⵓⵜⵍⵉⵏ. ⴳ ⵓⵙⵉⵔⴰ ⵏ ⵓⵙⵇⵇⵉⵎ, ⵏⵙⵎⵀⵍ ⴰⴷⵓⵙⵜⵓⵔ ⴷ ⵓⵙⵍⴳⵏ ⴰⵎⴰⴷⴷⴰⵙ ⵉⵣⵍⵉⵏ ⵙ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ ⴷ ⵜⵎⴰⵎⴽⵉⵏ ⵏ ⵓⵙⵉⴷⴼ ⵏⵏⵙ ⴳ ⵢⵉⴳⵔ ⵏ ⵓⵙⵙⵍⵎⴷ  ⴷ ⵉⴳⵔⴰⵏ ⵏ ⵜⵓⴷⵔⵜ ⵜⴰⵎⴰⵜⴰⵢⵓⵜ ⵉⵎⵣⵡⵓⵔⴰ ⴳ ⵜⵡⵡⵓⵔⵉⵡⵉⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ.

ⵉⵙⵙⵓⵙⵎ ⵉⵢⵉ ⴰⴷ ⵉⵏⵉⵖ ⴰⵢⵍⵍⵉ ⵙ ⵏⴼⴼⵖ ⴳ ⵜⵙⵓⵜⵍⵜ ⵉⵣⵔⵉⵏ, ⵎⴰⵙ ⵔⴰⴷ ⵢⵉⵍⵉ ⵓⵙⵓⵖⵍ ⴷ ⵓⵍⴳⴳⵓⴷ  ⵙ ⵜⵓⵜⵍⴰⵢⵉⵏ ⵜⴰⵄⵕⴰⴱⵜ ⴷ ⵜⵎⴰⵣⵉⵖⵜ ⴳ ⵜⵖⵉⵎⵉⵜⵉⵏ ⵜⵉⵎⴰⵜⴰⵢⵉⵏ ⵜⵉⵏⵎⵍⴰⵙⵙⵉⵏ ⵏ ⵉⵙⵇⵙⵉⵜⵏ ⵉⵎⵉⵡⴰⵏⵏ ⴷ ⵜⵖⵉⵎⵉⵜ ⵜⴰⵢⵢⵓⵔⴰⵏⵜ ⵖ ⵔⴰⴷ ⵉⵔⴰⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⴼ ⵉⵙⵇⵙⵉⵜⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵙⴳ ⴰⵙⵙ ⵏ ⵡⴰⵢⵏⴰⵙ 11 ⵉⴱⵔⵉⵔ 2022.

ⵔⴰⴷ ⵏⵉⵍⵉ ⴷⴰⵜ ⵏ ⵢⴰⵜ ⵜⵉⵣⵉ ⵜⴰⵏⴰⵎⵓⵔⵜ ⵉⵙⵜⴰⵡⵀⵎⵎⴰⵏ ⴷ ⵉⵇⵇⴰⵏ ⵓⵙⵓⵜⴳ, ⵔⴰⴷ ⵏⵣⵣⵉⴳⵣ ⵙⴳ ⴰⵎⴰⵥⵥⵍ ⴰⴷ ⴳ ⵓⵙⵎⵀⵍ ⵏ ⵓⴷⵓⵙⵜⵓⵔ ⴷ ⵓⵙⵍⴳⵏ ⴰⴷ ⴰⵎⴰⴷⴷⴰⵙ ⵙ ⵎⴰⴷ ⵉⵟⵟⴰⴼ ⴳ ⵜⵓⴷⵔⵜ ⵏⵏⵖ ⵜⴰⵏⴰⵎⵓⵔⵜ.

ⵜⵉⴳⴳⵯⴰ ⴷ ⵉⵏⴳⴳⵯⴰ

ⵎⴽ ⵍⵍⵉ ⵏⵉⵖ, ⵜⵣⵉⴳⵣ ⵜⵡⵡⵓⵔⵉ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵙⵡⵉⵔ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⴷ ⵜⵔⵓⴱⴱⴰ ⵜⵉⵙⴳⵓⵎⴰⵏⵉⵏ ⵏ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ.

ⴳⴰⵏⵜ ⵜⵎⵙⴰⵔⵉⵏ ⵏ ⵜⴼⵍⵍⴰⵃⵜ ⴷ ⵓⵙⵓⵔⵙ ⵏ ⵡⴰⵎⴰⵏ ⴳ ⵜⵎⴰⵣⵉⵔⵜ ⵏⵏ ⵍⵍⵉⵖ ⵉⴷⵔⵓⵙ ⵓⵏⵥⴰⵕ, ⴷ ⵓⵙⵏⴰⵍ ⵏ ⵜⵎⵙⵙⵏⵜⴰⵢ ⵜⵉⵏⴰⵎⵓⵔⵉⵏ ⵎⵥⵥⵉⵏⵉⵏ ⴷ ⵜⵎⵊⵀⴷⴰⵢ, ⴷ ⵓⵙⵏⴰⵍ ⵏ ⵜⵎⴰⵍⵍⴰⵢⵜ ⴷⴼⴼⵉⵔ ⵏ ⴽⵓⴼⵉⴷ 19, ⴷ ⵓⵙⵎⵖⵔ ⵏ ⵜⴷⵍⵙⴰ ⴷ ⵜⵙⵔⵜⴰⵢ ⵏ ⵉⵄⵔⵔⵉⵎⵏ ⴷ ⵓⵙⵡⵓⵔⵉ ⴷ ⵜⵎⵔⵙⴰⵍ ⵏ ⵓⴼⵔⴰⴳ ⴰⵏⴰⵎⵓⵏ, ⵉⵎⵔⵙⵉⵡⵏ ⵍⵍⵉ ⵉⵣⵣⵔⵉ ⵓⵙⵇⵇⵉⵎ ⵙ ⵜⵎⵥⵍⵉⵜ ⵏ ⵜⵉⴹⴰⴼ ⵍⵍⵉ ⵖⵓⵔⵙ, ⵙ ⵓⵎⵏⴰⵇⵇⴰⵔ ⵏ ⵜⵓⵜⵔⴰⵡⵉⵏ ⵏ ⵜⵓⵣⵍⵜ ⵜⴰⴱⵕⵍⴰⵎⴰⵏⵉⵜⴷ ⵜⵓⴳⵜ. ⴰⵢⵍⵍⵉ ⵉⵎⵎⴰⵍⴰⵏ ⵎⴰⵙ ⴰⵖ ⵙⵎⵓⵙⵙⵓⵏ  ⵉⵎⵏⵜⵉⵍⵏ ⴳⴰⵏⵉⵏ ⵢⴰⵏ, ⵎⵇⵇⴰⵔ ⵜⵥⵍⵉ ⵜⵎⵢⴰⴷⴰⵙⵜ ⴷ ⵜⵖⴰⵔⴰⵙⵜ ⵏ ⵓⵙⵎⴽⵍ, ⴰⵢⵍⵍⵉ ⵉⵙⵙⴷⵓⵙⵏ ⵜⴰⴷⵍⵙⴰ ⵏ ⵓⵎⵙⴰⵙⴰ ⴼ ⵜⵎⵙⴰⵔⵉⵏ ⵅⴰⵜⵔⵏⵉⵏ ⵏ ⵜⵎⴰⵣⵉⵔⵜ ⵏⵏⵖ ⴳ ⵉⵎⵏⴰⴷⵏ ⵥⵍⵉⵏⵉⵏ.

ⵙ ⵜⵓⵜⵔⴰⵡⵉⵏ ⴳⴳⵓⵜⵉⵏⵉⵏ ⴷ ⵓⵎⴹⴰⴽⴰⵕ ⵏⵏⵙⵏⵜ ⵙⴳ ⵜⴰⵏⴱⴰⴹⵟ ⴷ ⵓⵏⵢⴰⵍⴽⴰⵎ ⵊⴰⵔ ⵜⴰⵏⴱⴰⴹⵜ ⵜⴰⵣⵣⵔⴰⴼⵜ ⴷ ⵜⵎⵣⵣⴳⴰⵔⵜ, ⵉⵥⵍⵉ ⵓⵙⵇⵉⵎ ⵏ ⵉⵎⵓⵔⴰ ⴳ ⵜⵡⵡⵓⵔⵉ ⵏ ⵜⵉⴹⴰⴼ ⴷ ⵓⵙⵓⵜⴳ  ⵏ ⵜⵙⵔⵜⴰⵢ ⵍⵍⵉ ⵉⵣⵣⵉⴳⵣⵏ ⴳ ⵜⵉⵣⵉ ⵉⵍⵍⴰⵏ ⵊⴰⵔ ⵜⵉⵙⵓⵜⵍⵉⵏ.

ⴳ ⵓⵎⵏⵉⴷ ⴰⴷ, ⵍⴽⵎⵏ ⵉⵙⵇⵙⵉⵜⵏ ⵜⵜⵓⴼⴽⴰⵏⵉⵏ ⵉ ⵜⵏⴱⴰⴹⵟ ⴳ ⵜⵉⵣⵉ ⵉⵍⵍⴰⵏ ⵊⴰⵔ ⵙⵏⴰⵜ ⵜⵙⵓⵜⵍⵉⵏ ⵎⴰⴷ ⵉⴳⴰⵏ 1500 ⵏ ⵓⵙⵇⵙⵉ ⴳⵉⵙⵏ 500 ⵏ ⵓⵙⵇⵇⵙⵉ ⴰⵎⵉⵡⴰⵏ ⴷ ⵓⴳⴳⴰⵔ ⵏ 1000 (ⵉⴼⴹ) ⵏ ⵓⵙⵇⵙⵉ ⴰⵎⵉⵔⴰⵢ. ⵜⵍⴽⵎ ⴰⵖ ⴷ ⵜⵎⵔⴰⵔⵓⵜ ⴼ ⵎⴰⴷ ⵉⴳⴰⵏ ⵉⴼⴹ ⵏ ⵓⵙⵇⵙⵉ ⴰⵎⵉⵔⴰⵢ. ⵖⵎⴽ ⵍⵍⵉ ⵏⵙⵎⵀⵍ ⴰⵏⴳⵔⴰⵡ ⴰⴳⵯⵏⵙⴰⵏ ⵉⵣⴷⵉⵏ ⴷ ⵉⵙⵖⵡⴰⵏ ⵓⵏⴱⵉⴷⵏ ⴷⴰⵜ ⵏ ⵓⵙⵇⵇⵉⵎ ⴷⴰⵔ ⵜⵙⵎⵓⵏⴰⵢ ⵏ ⵜⵙⵇⵇⵉⵎⵉⵏ ⵜⵉⵙⵓⵍⴰⵏⵉⵏ ⵓⵍⴰ ⵖ ⵜⵖⵉⵎⵉⵜⵉⵏ ⵜⵉⵎⴰⵜⴰⵢⵉⵏ.

ⵉⵖ ⵏⵓⵔⵔⵉ ⵙ ⵜⵎⵥⵍⵉⵜ ⵏ ⵓⵙⵓⵜⴳ, ⵏⵎⵎⴰⵖ ⴼ ⵓⵙⵏⴳⵉⴷⴷⵉ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ  ⴼ ⵓⵖⴰⵡⴰⵙ ⵏ ⵍⵎⵖⵔⵉⴱ ⴰⵣⴳⵣⴰⵡ, ⴷ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⴼ ⵜⵙⵔⵜⵉⵜ ⵏ ⵡⴰⵎⴰⵏ ⴳ ⵜⴳⵍⴷⵉⵜ.

ⵜⵙⴽⵔⵜ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⴼ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ 2018-2021 ⵜⵉⵙⵎⵓⵏⴰⵢ ⴷ ⵜⵖⵉⵎⵉⵜⵉⵏ ⵏ ⵓⵙⵙⴼⵍⴷ ⵉ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ ⴷ ⵜⴳⵔⴰⵡⵉⵏ ⵏ ⵜⵏⵏⵓⴱⴹⴰ ⴷ ⵜⵏⴱⴰⴹⵜ ⵜⴰⵎⵣⵣⴳⴰⵔⵜ ⴷ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⴷ ⵉⵎⵙⵡⵓⵔⵉⵢⵏ ⵉⵏⴰⵎⵓⵏⵏ ⴳ ⵓⵙⵡⵉⵔ ⴰⵏⴰⵎⵎⴰⵙ ⴷ ⵓⴽⴰⵍⴰⵏ.

ⵙⵙⵓⵔⴼⴰⵜ ⵉⵢⵉ, ⵜⵉⵏⴳⴳⵯⴰ ⴷ ⵉⵏⴳⴳⵯⴰ ⴰⴷ ⵙⴷⴷⵉⴷⵖ ⴼ ⵡⴰⵜⵉⴳ ⵏ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴳ ⵓⵖⴰⵡⴰⵙ ⵏ ⵜⵡⵡⵓⵔⵉ ⵏ ⵓⵙⵇⵇⵉⵎ ⵙ ⵡⴰⵜⵉⴳ ⵏⵏⵙ ⴳ ⵔⵡⵡⵓⵔⵉ ⵜⴰⴳⴷⵓⴷⴰⵏⵜ, ⴷ ⵜⵎⴽⵕⴰⴹ ⵜⵉⴳⴷⵓⴷⴰⵏⵉⵏ ⴷ ⵓⵙⵖⵓⴷⵓ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵓⴷⵔⵉⵣ ⵏⵏⵙ ⴼ ⵡⴰⵎⵓⵏ. ⵎⴽ ⵍⵍⵉ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⵎⴰⵙ ⵉⵇⵇⴰⵏ ⴰⴷ ⵢⵉⵍⵉ ⵓⵣⴷⴷⵓⵢ ⴷ ⵓⵙⵎⴰⴷ ⴷ ⵓⵎⵙⴰⵙ ⴳ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵉⵙⵏⴼⴰⵔⵏ ⵏ ⵓⵣⵣⴳⵉⵔ ⵏⵏⵙⵏⵜ. ⵉⴳ ⵓⵙⴽⵔ ⵏ ⵜⵎⵥⵍⵉⵜ ⵏ ⵓⵙⵓⵜⴳ ⴰⵙⴽⵔ ⵏ ⵓⵙⵡⴰⵍⴰ ⴰⴷ ⴰⴳⵍⴷⴰⵏ.

ⵏⴱⴷⴷ ⴳ ⵓⵙⵉⵔⴰ ⵏ ⵓⵙⵇⵇⵉⵎ ⴷ ⵉⴷ ⵎⴰⵙⵙ ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴱⵔⵓⵎⵎⴰ ⵜⴰⴱⵕⵍⴰⵎⴰⵏⵉⵜ  ⴷ ⵉⴳⵎⴰⵎⴰⵏ ⵏ ⵜⵔⵓⴱⴱⴰ ⵜⵉⵙⴳⵓⵎⴰⵏⵉⵏ ⴼ ⵓⵙⴽⵔ ⵏ ⵜⵎⵥⵍⵉⵜ ⴰⴷ ⵙ ⵓⵎⵢⴰⵙ ⵊⴰⵔ ⵜⵓⴳⵜ ⴷ ⵜⵓⵣⵍⵜ, ⴷ ⵓⵏⵏⵓⵕⵥⵎ ⴼ ⵉⵎⵙⴽⴰⵔⵏ ⵉⵏⴰⵎⵓⵏⵏ, ⴷ ⵜⵎⵔⵙⴰⵍ ⵜⵉⴽⴰⴷⵉⵎⵉⵢⵉⵏ ⴷ ⵜⵎⵙⴽⴰⵔ ⵏ ⵓⵎⵣⴰⵣⵍ ⵙ ⵉⵏⵎⵓⵇⵇⴰⵔⵏ ⵏ ⵜⵖⵔⵉ ⴳ ⵓⵙⴰⵜⵉ ⵏ ⵉⵖⴰⵡⴰⵙⵏ ⵏ ⵜⵎⴷⵔⴰⵡⵜ ⴷ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ, ⵙⵍⴰⵡⴰⵏ ⴰⴽⴽⵯ ⴷ ⵜⴰⵎⵓⵏⵜ ⵏ ⵓⵕⵓⴱⴱⴰ ⴷ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⵍⵍⵉ ⵉⵙⵏⵎⴰⵍⴰⵏ ⵢⴰⵜ ⵜⵉⵏⴰⵡⵜ ⴰⴽⴷ ⵓⵙⵇⵇⵉⵎ ⵙ ⵜⵎⴷⵔⴰⵡⵜ ⵏ ⵉⴱⵕⵍⴰⵎⴰⵏⵉⵢⵏ ⴷ ⵉⵎⵓⵣⴰⵢⵏ ⵙⴳ ⵍⵎⵖⵔⵉⴱ ⴷ ⵜⵎⵉⵣⴰⵔ ⵏ ⵓⵕⵓⴱⴱⴰ.

ⵉⴳⴰ ⵡⴰⵡⵜⵜⴰⵙ ⴰⴷ ⵉⵍⵉⵏⵜ ⵜⵡⵡⵓⵔⵉⵡⵉⵏ ⵏ ⵓⵙⵓⵜⴳ ⵙ ⵉⵙⵖⵍⵏ ⵉⴳⵔⴰⵖⵍⴰⵏⵏ ⴳ ⵓⵙⵡⵉⵔ ⵢⴰⵜⵜⵓⵢⵏ, ⵙ ⵓⵎⵏⴰⴹ ⵏⵏⵖ ⴰⵎⵔⵙⵍⴰⵏ.

ⴳ ⵓⵎⵏⵉⴷ ⵢⴰⴹⵏⵉⵏ, ⵃⵎⴰ ⴰⴷ ⵟⵟⵉⴼⵏⵏ ⵜⵡⵡⵓⵔⵉⵡⵉⵏ ⵏ ⵓⵙⵓⵜⴳ ⵜⵜⴰⵡⵙⴽⴰⵔⵏⵉⵏ ⵜⴰⵢⵢⴰⴼⵓⵜ ⵏⵏⵙⵏⵜ, ⵉⵇⵇⴰⵏ ⴷ ⴰⴷ ⵏⴱⴷⴷ ⴷ ⵜⵏⴱⴰⴹⵜ ⴷ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴳ ⵎⴰⴷ ⵏⵙⴽ ⴳ ⵉⵙⵖⵡⴰⵏ ⵙⴳ 2015 ⵍⵍⵉⵖ ⵉⵙⵙⵏⵜⵉ ⵓⵙⵇⵇⵉⵎ ⵜⵉⵎⵣⵍⵉⵜ ⴰⴷ.

ⵉⵙⵜ ⵎⴰⵙⴰ ⴷ ⵉⴷ ⵎⴰⵙⵙ

ⴳ ⵢⵉⴳⵔ ⵏ ⵓⵣⵣⵔⴰⴼ, ⵎⵙⴰⵙⵏⵜ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⴼ ⴽⵕⴰⴹ ⵉⵙⵏⴼⴰⵔⵏ ⵏ ⵉⵙⵍⴳⵏⵏ, ⵙⵙⵏⵜⵉⵏⵜ ⵜⵉⵖⵔⵉ ⵏ ⴽⵕⴰⴹ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴳⵉⵙⵏ ⴰⵙⵍⴳⵏ ⴰⵎⴰⴷⴷⴰⵙⵏ ⵉⵥⵍⵉⵏ ⴷ ⵜⴰⵔⴷⵙⵜⴰⵔⵜ ⵏ ⵓⵙⵍⴳⵏ, ⴷ ⵓⵙⴳⵉⴷⴷⵉ ⵏ ⵉⴷⵔⵉⵣⵏ ⵉⵣⵔⴼⴰⵏⵏ ⵙⴳ ⵜⵖⵜⴰⵙⵜ ⵏ ⵜⵙⵏⴱⴹⴰⵢⵜ ⵜⴰⴷⵙⵜⴰⵔⵜ. ⴳ ⵓⵎⴰⵜⴰ, ⵜⵓⵣⵏ ⵜⵏⴱⴰⴹⵜ ⵉ ⵓⵙⵇⵇⵉⵎ ⵙⵎⵎⵓⵙ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⵍⵍⵉ ⵔⴰⴷ ⵉⵙⵜⵉ ⵓⵙⵇⵇⵉⵎ ⴳ ⵜⵣⵡⵉⵔⵉ ⵏ ⵜⵙⵓⵜⵍⵜ ⵜⴰⴷ.

ⵓⵣⵏ ⴷ ⵓⵍⴰ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴽⴽⵓⵥⵜ ⵜⵙⵓⵎⵔⵉⵏ ⵏ ⵉⵙⵍⴳⵏⵏ, ⵉⵍⴽⵎ ⵖⵉⵍⴰ ⴷ ⵓⵏⵛⴽ ⵏⵏⵙⵏⵜ 72 ⵏ ⵜⵙⵓⵎⵔⵜ, ⴳⵉⵙⵏⵜ 60  ⴷⴰⵔ ⵜⵙⵇⵇⵉⵎⵉⵏ. ⴷⴰ ⵙⴷⴷⵉⴷⵖ ⴼ ⵡⴰⵜⵉⴳ ⵏ ⵜⵙⵏⵜⴰⵢⵜ ⵜⴰⵣⵣⵔⴰⴼⵜ  ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵉ ⵓⵙⴱⵓⵖⵍⵓ ⵏ ⵓⵣⵣⵔⴰⴼ ⴰⵏⴰⵎⵓⵔ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵉⵎⵉⵔⴰ ⵙⴳ ⵜⵓⴳⵜ ⴷ ⵜⵓⵣⵍⵜ, ⵉⵇⵇⴰⵏ ⴷ ⴰⴷ ⵜⵉⵍⵉ ⵜⵉⵕⵡⵉ  ⵏ ⵉⵣⵣⵔⴰⴼⵏ ⵏⵙⴽⵔ ⴱⴷⴷⴰ ⵙ ⵉⵙⵡⴰⵍⴰⵢⵏ  ⵏ ⴱⴰⴱ ⵏ ⵡⴰⴷⴷⵓⵔ ⵉ ⵓⴱⵕⵍⴰⵎⴰⵏ ⵍⵍⵉⵖ ⵉⵙⴷⴷⵉⴷ ⴰⴷ ⵜ ⵉⵄⵣⵣⵓ ⵕⴱⴱⵉ ⵎⴰⵙ ⴳⴰⵏ ⵉⴱⵕⵍⴰⵎⴰⵏⵉⵢⵉⵏ ⵉⵎⵙⵜⴳⴳⴰⵔⵏ ⴼ ⵜⵉⵕⵡⵉ ⵏ ⵉⵙⵍⴳⵏⵏ ⵍⵍⵉ ⵉⵙⴳⴰⴷⴷⴰⵏ ⴰⵣⵣⴳⵉⵔ ⵏ ⵉⵙⵏⴼⴰⵔⵏ ⴷ ⵜⵖⵜⴰⵙⵉⵏ ⴳ ⵜⵉⵍⴰⵡⵜ, ⵜⵎⵍ ⵎⴰⴷ ⵉⵔⴰ ⵡⴰⵎⵓⵏ ⵜⵔⴰⵔ ⵉ ⵉⵏⴰⵔⵓⵣⵏ ⴷ ⵉⵅⵎⵎⵉⵎⵏ ⵏ ⵉⵏⵎⵓⵔⴰⵏ ⵙ ⵎⴰⴷ ⵉⵍⵍⴰⵏ ⴳ ⵡⴰⵡⴰⵍ ⴰⴳⵍⴷⴰⵏ.

ⵃⵎⴰ ⴰⴷ ⵜⵉⵍⵉ ⵜⵉⵕⵡⵉ ⵏ ⵓⵣⵣⵔⴰⴼ, ⵉⵇⵇⴰⵏ ⴷ ⴰⴷ ⵏⵎⵎⴰⵖ ⴱⴰⵀⵔⴰ ⴼ ⵓⵙⴽⵔ ⵏ ⵜⵉⴹⴰⴼ ⴳ ⵓⵙⴽⵔ ⵏ ⵉⵙⵍⴳⵏⵏ ⴷ ⵜⵥⵕⵉⴳⵜ ⵏ ⵉⵎⵕⵚⵓⵎⵏ ⵉⵎⴰⴷⴷⴰⵙⵏ ⵉⵖ ⵍⵍⴰⵏ ⴳ ⵉⵣⵣⵔⴰⴼⵏ ⵍⵍⵉ ⵏⵙⵖⵣⵏ.

ⵃⵎⴰ ⴰⴷ ⵢⴰⵡⵙ ⵓⵙⵇⵇⵉⵎ ⴳ ⵜⵓⴳⴳⴰⵙ ⵜⴰⵏⴰⵎⵓⵔⵜ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴷⵓⵙ ⵏ ⵉⵎⴰⵙⵙⵏ ⵏ ⵓⵡⵇⵇⵔ  ⵏⵏⵙⵏⵜ, ⴳ ⵓⵙⴰⵜⵉ ⵏ ⵓⵙⵓⵜⴳ ⵏ ⵜⵓⴳⴳⴰⵙ ⵥⵉⵍⵏⵉⵏ ⵏ ⵜⵎⴰⵣⵉⵔⵜ ⵏⵏⵖ ⴳ ⵓⵎⵏⵉⴷ ⴰⴷ, ⵉⵙⵎⵏⵉⴷ ⵓⵙⵇⵇⵉⵎ ⵏ ⵉⵎⵓⵔⴰ ⵢⴰⵜ ⵜⵡⵉⵙⵉ ⵉⴳⴰⵏ ⴰⴱⵓⵖⵍⵓ ⵏ ⵓⵏⵇⵇⵉⵙ ⴰⵏⴰⵎⵓⵔ ⴳ ⵜⵙⵓⵜⵍⵜ ⵜⵉⵙ ⴽⴽⵓⵥⵜ ⵏ ⵓⵣⵣⵔⴰⵢ ⵏ ⵓⵙⵓⵔⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏⵊⴰⵔ 2017 ⴷ 2021, ⴷ ⵓⵏⵇⵇⵉⵙ ⴰⵏⴰⵎⵓⵔ ⵡⵉⵙ ⵙⵉⵏ ⴼ ⵓⵙⴽⵔ ⵏ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ ⵏ ⵓⴼⵔⴰⴳ ⵏ ⵉⵎⵙⵡⵓⵔⵉⵢⵏ ⵉⵎⵣⵡⴰⴳ ⴷ ⵜⴰⵡⵊⵉⵡⵉⵏ ⵏⵏⵙⵏ ⵊⴰⵔ 2013 ⴷ 2021.

ⵉ ⵓⵙⴷⵓⵙ ⵏ ⵜⴷⵍⵙⴰ ⴷ ⵡⴰⵜⵉⴳ ⵏ ⵓⵙⵍⴳⵏ ⴰⴳⵔⴰⵖⵍⴰⵏ ⴰⵏⴼⴳⴰⵏ, ⵉⵙⵏⵎⴰⵍⴰ ⵓⵙⵇⵇⵉⵎ ⵙ ⵜⴷⵔⴰⵡⵜ ⴰⴽⴷ ⵜⴰⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵓⵙⵍⴳⵏ ⴰⴳⵔⴰⵖⵍⴰⵏ ⴰⵏⴼⴳⴰⵏ ⵢⴰⵜ ⵜⵙⵎⵓⵏⵉ ⴼ ⵜⵉⵍⴰⵍⵜ ⵏ ⵓⴱⵕⵍⴰⵎⴰⵏ ⴳ ⵓⵎⵏⵉⴷ ⵏ ⵓⵎⵙⴰⵙⴰ ⴰⵣⵣⵔⴰⴼ ⵉⵣⴷⵉⵏ ⴷ ⵓⵙⵍⴳⵏ ⴰⴳⵔⴰⵖⵍⴰⵏ ⴰⵏⴼⴳⴰⵏ, ⵙ ⵓⵙⴽⵔ ⵏ ⵜⵓⵎⴰⵢⵉⵏ ⵏ ⵓⴷⵓⵙⵜⵓⵔ ⴷ ⵉⵙⵖⵡⴰⵏⵏ ⵏⵏⵖ ⵉⴳⵔⴰⵖⵍⴰⵏⵏ, ⵖⵎⴽ ⵍⵍⵉ ⵉⴷⵔⵓ ⴳ ⵜⵉⵏⵏⴰⵡⵜ ⵜⴰⴳⵜⵉⵔⴰⵏⵜ ⴼ ⵉⵎⵔⵙⵉ ⴰⴷ, ⵙ ⵓⵙⵏⵎⴰⵍⴰ ⵏ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ.

ⴳ ⵓⵎⵏⵉⴷ ⵏ ⵜⵣⴷⴰⵢⵉⵏ ⵏ ⴱⵕⵕⴰ ⴷ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ, ⵉⵣⵣⵉⴳⵣ ⵓⵙⵇⵇⵉⵎ ⴳ ⵜⵡⵡⵓⵔⵉ ⵏⵏⵙ ⴷ ⵜⵉⵍⵉⵜ ⵏⵏⵙ ⴳ ⵉⵏⵎⵓⵇⵇⴰⵔⵏ ⵍⵍⵉ ⵙⵏⵎⴰⵍⴰⵏⵜ ⵜⵎⴰⴷⴷⴰⵙⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴳ ⵉⵙⵡⵉⵔⵏ ⵉⵏⵎⵏⴰⴹⵏ ⴷ ⵉⵎⵏⵥⴰⵡⵏ ⴷ ⵉⴳⵔⴰⵖⵍⴰⵏⵏ.

ⵉⴷⵔⵓ ⵓⵙⵇⵇⵉⵎ ⴳ ⵉⵏⵎⵓⵇⵇⴰⵔⵏ ⴼ ⵜⵏⴼⵔⵓⵜ ⴷ ⵓⴼⵔⴰ ⵉⴳⵔⴰⵖⵍⴰⵏⵏ, ⴷ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ ⴷ ⵓⵙⵡⵓⴷⴷⵓ ⵏ ⵜⴼⵔⴽⴰ ⴷⴼⴼⵉⵔ ⵏ ⴽⵓⴼⵉⴷ ⴷ ⵉⴷⵔⵉⵣⵏ ⵏⵏⵙ ⴼ ⵜⴷⵎⵙⴰ ⵜⴰⵎⴰⴹⵍⴰⵏⵜ, ⴷ ⵓⵙⴱⴷⴷⵉ ⵏ ⵜⵎⵓⴽⵔⵉⵙⵉⵏ ⵏ ⵓⵏⵣⵡⵉ, ⴷ ⵓⵙⵡⵓⴷⴷⵓ ⵏ ⵡⴰⵎⴰⵏ, ⴷ ⵓⵣⵡⴰⴳ ⴷ ⵜⵎⴰⵙⵙⴰⵏⵉⵏ ⴷ ⵜⴻⵜⵉⴽⵏⵓⵍⵓⵊⵉⵢⵉⵏ ⴷ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⴷ ⵓⴼⵔⴰⴳ ⵏ ⵜⴰⵣⵣⴰⵏⵉⵏ.

ⵎⵎⴰⵖⵏ ⵉⴽⴰⴱⴰⵕⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵓⵎⵣⴰⵖ ⵏ ⵜⵎⵙⴰⵔⵉⵏ ⵏⵏⵖ ⵜⵓⴷⴷⵉⵔⵉⵏ, ⵜⴰⵎⵣⵡⴰⵔⵓⵜ ⴳⵉⵙⵏⵜ ⵜⴰⵎⵙⴰⵔⵜ ⵏ ⵜⵢⴰⵏⵜ ⵏⵏⵖ ⵜⴰⵏⴰⴽⴰⵍⵜ, ⵏⵎⵎⴰⵖ ⵓⵍⴰ ⴼ ⵜⵉⵕⵡⵓ ⵏ ⵜⵡⵉⵙⵉ ⴷ ⵜⵎⴷⵔⴰⵡⵜ ⵏⵏⵖ, ⵉ ⵓⵎⵣⴰⵖ ⵏ ⵜⵣⵔⴼⵜ ⴷ ⵓⴼⵔⴰ ⴷ ⵜⵏⴼⵔⵓⵜ ⵜⴰⴳⵔⴰⵖⵍⴰⵏⵜ ⴳ ⵜⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵓⵣⵔⴼ ⴷ ⵓⵎⵢⴰⵙ ⴱⴷⴷⵏⵉⵏ ⴼ ⵜⵎⴷⵔⴰⵡⵜ ⴷ ⵓⵙⴽⵔ ⵏ ⵓⴱⵓⵖⵍⵓ ⵉⵛⵛⴰⵔⵏ, ⴷ ⵓⴷⵔⴰⵡ ⵏ ⵜⵣⵣⵉⴳⵣⵜ ⵜⴰⵎⴰⴹⵍⴰⵏⵜ ⴷ ⵜⵢⵢⴰⴼⵓⵜⵉⵏ ⵏⵏⵙ, ⴷ ⵓⵙⴽⵔ ⵏ ⵜⴷⵉⵎⵓⵇⵔⴰⵟⵉⵜ ⴷ ⵜⵣⵡⵉⵔⵉ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵉⵡⴰⵏⴽⵏ ⴷ ⵜⵏⵏⵓⴱⴹⴰ ⵏ ⵓⵡⴰⵏⴽ ⵍⵍⵉ ⴳⴰⵏⵉⵏ ⵜⵉⵔⵙⴰⵍ ⵜⵓⵛⵛⵉⵍⵉⵏ ⵏ ⵓⴼⵔⴰ ⴷ ⵓⵔⴳⴳⵉⴳ.

ⵉ ⵓⵙⵓⵜⴳ ⵏ ⵓⴷⵖⴰⵔ ⵏ ⵜⵎⴰⵣⵉⵔ ⵏⵏⵖ ⴷ ⵜⵙⵔⵜⵉⵜ ⵏⵏⵙ ⵏ ⴱⵕⵕⴰ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵄⵣⵣⵓ ⵕⴱⴱⵉ, ⵉⵟⵟⴰⴼ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴰⵙⵓⵜⴳ ⵉⵥⵍⵉⵏ ⴷⴰⵔ ⵜⵎⴰⴷⴷⴰⵙⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⴳⵜⵉⵔⴰⵏⵉⵏ ⴳ ⵓⵙⵡⵉⵔⵉ ⴰⴳⵔⴰⵖⵍⴰⵏ ⴷ ⵉⴼⵔⵉⵇⵢⴰ ⴷ ⵎⴰⵔⵉⴽⴰⵏ ⵜⴰⴰⵜⵉⵏⵉⵜ ⴷ ⵍⴽⴰⵔⴰⵢⵉⴱ ⴷ ⵉⵎⴰⴹⴰⵍⵏ ⴰⵄⵕⴰⴱ ⴷ ⵓⵙⵍⵉⵎ ⴷ ⵓⵙⴰⵢⵔⴰⵔ ⵓⵔⵓ-ⴰⵏⴰⵎⵎⴰⵙ ⴷ ⴰⵙⵢⴰ.

ⴳ ⵓⵎⵏⴰⴹ ⴰⴷ ⵏ ⵜⵉⵍⵉⵜ ⵉⵣⵉⵍⵏ, ⵏⵓⵎⵣ ⴳ ⵙⵉⵏ ⵡⵓⵙⵙⴰⵏ ⵍⵍⵉ ⵣⵔⵉⵏⵉⵏ, ⵜⴰⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵜⴰⵎⵓⵏⵜ ⵉ ⵓⵏⴰⵎⵎⴰⵙ, ⵜⴳⴰ ⵜⴰⵎⵍⴷⴰ ⵖ ⵏⵙⴽⵔ ⵉⵎⴹⴰⴽⴰⵕⵏ ⴰⴽⴷ ⵉⵎⵙⵜⴳⴳⴰⵔⵏ ⵏ ⵓⵕⵓⴱⴱⴰ, ⵙⵍⴰⵡⴰⵏ ⴰⴽⴽⵯ ⵜⴰⵏⵙⵙⵉⵅⴼⵜ ⵏ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⵜⵉⵙⵔⵜⴰⵏⵉⵏ ⴳ ⵓⴱⵕⵍⴰⵎⴰⵏ ⴰⴷ ⵍⵍⵉ ⴷ ⵏⴷⵔⵓ  ⵜⵉⵣⴷⴰⵢⵉⵏ ⵜⵉⵎⵣⵔⴰⵢ ⵜⵉⵎⵔⵙⵍⴰⵏⵉⵏ ⴷ ⵓⵎⵙⴰⵡⴰⵍ ⵉⵙⵓⵍⵏ ⴼ ⵜⴱⴷⴷ ⵜⵙⵇⵇⵉⵎⵜ ⵉⵛⵛⴰⵔⵏ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴷ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ, ⵍⵍⵉ ⵉⵙⴽⴰⵔⵏ ⵜⴰⵡⵡⵓⵔⵉ ⵜⴰⵅⴰⵜⴰⵔⵜ ⴼ ⵜⵏⵓⴼⴰ ⵏ ⵜⵎⴰⵣⵉⵔⵜ ⵏⵏⵖ ⴳ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ.

ⵖⵎⴽ ⵍⵍⵉ ⵏⵎⵎⴰⵖ ⴼ ⵓⵎⵢⵉⵏⵡ ⵏ ⵜⵎⴷⵔⴰⵡⵉⵏ ⵏⵏⵖ ⴳ ⵓⵙⴰⵜⵉ ⵏ ⵉⵖⴰⵡⴰⵙⵏ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ, ⵉⵙⵏⵎⴰⵍⴰ ⵓⵙⵇⵇⵉⵎ ⴽⵉⴳⴰⵏ ⵏ ⵉⵏⵎⵓⵇⵇⴰⵔⵏ ⴳ ⵉⵍⵍⴰ ⵓⵙⵏⴼⵍ ⵏ ⵜⵎⵓⵣⴰⵢⵉⵏ ⵊⴰⵔ ⵓⵙⵇⵇⵉⵎ ⴷ ⵜⵎⵔⵙⴰⵍ ⵏ ⴱⵕⵕⴰ. ⵔⴰⴷ ⵢⵉⵍ ⵖ ⵎⴰⵏⵏ ⵓⵔ ⵢⴰⴳⴳⵓⴳⵏ ⵓⵙⵏⵎⴰⵍⴰ ⵏ ⵉⵖⴰⵡⴰⵙⵏ ⵉⵎⴰⵢⵏⵓⵜⵏ ⵏ ⵓⵎⵢⴰⵡⴰⵙ ⵉ ⴽⵉⴳⴰⵏ ⵏ ⵉⵙⴳⴳⵯⴰⵙⵏ ⴰⴽⴷ ⵉⵎⴷⵔⴰⵡⵏ ⵙⴳ ⵓⵕⵓⴱⴱⴰ ⴷ ⵎⴰⵔⵉⴽⴰⵏ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⴷⴰⵜ ⵏⵏⵖ ⵉⵖⴰⵡⴰⵙⵏ ⵏ ⵜⵡⵡⵓⵔⵉ ⴳⴳⵓⵜⵏⵉⵏ ⴳ ⴽⵓ ⵜⵉⵎⵣⵍⴰⵢ ⵏ ⵓⵙⵇⵇⵉⵎ ⴷ ⵜⵡⵡⵓⵔⵉⵡⵉⵏ ⵏⵏⵙ, ⵉⵇⵇⴰⵏ ⴰⵖ ⴷ ⵓⵙⵎⵓⵙⵙⵓ ⴰⵎⴳⵔⵓ ⵃⵎⴰ ⴰⴷ ⵏⵙⴽⵔ ⵜⵉⵙⵎⵉⴳⴰⵍ ⵏⵏⵖ ⵜⵉⴷⵙⵜⴰⵔⵉⵏ ⴷ ⵜⵎⵔⵙⵍⴰⵏⵉⵏ ⵙ ⵜⵉⵕⵡⵉ ⴷ ⵉⵇⵇⴰⵏⵏ, ⵙ ⵜⵉⵕⵡⵉ ⴳ ⵜⵍⵍⴰ ⵜⵉⵢⵢⴰⴼⵓⵜ ⵉⴳⴳⵓⵜⵏ , ⴰⵢⵍⵍⵉ ⵔⴰⴷ ⵉⵙⵎⵖⵔ ⵜⵉⵎⵙⴽⵔⵜ ⵏⵏⵖ ⵉⵙⵖⵓⴷⵓ ⵜⴰⵡⵍⴰⴼⵜ ⵏ ⵜⵎⵔⵙⵍⵜ ⵏⵏⵖ ⵍⵍⵉ ⴷ ⵉⵇⵇⴰⵏⵏ ⴰⴷ ⵜⵙⵙⴼⵍⴷ ⵜⵔⴰⵔ ⵉ ⵉⵏⴰⵔⵓⵣⵏ ⵏ ⵓⵎⵏⴰⴷ ⴰⵎⴰⵜⴰⵢ ⴳ ⵓⵎⵏⴰⴹ ⴰⴳⵔⴰⵖⵍⴰⵏ ⵉⴳⴰⵏ ⵉⵎⵥⵍⵉ, ⵉⵇⵇⴰⵏ ⴷ ⵓⵍⴰ ⴰⴷ ⵏⵙⵓⵜⴳ ⵜⵉⵏⴰⵥⴰⵕⵉⵏ ⵍⵍⵉ ⵔⴰⴷ ⵏⴰⵍⵍ ⴳ ⵓⴷⵖⴰⵔ ⵏⵏⵖ ⵙ ⵓⵙⵎⵓⵙⵙⵓ ⴰⴽⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵏⵚⵕ ⵕⴱⴱⵉ ⵃⵎⴰ ⴰⴷ ⵜⵣⵣⵉⴳⵣ ⵜⵎⴰⵣⵉⵔⵜ ⵏⵏⵖ ⴳ ⵓⴱⵔⵉⴷ ⵏ ⵜⴳⵎⵉ ⴷ ⵉⵎⵓⴽⵏⵏ ⴷ ⵓⵙⴷⵓⵙ ⵏ ⵓⴷⵖⴰⵔ ⵏⵏⵙ ⴷ ⵜⴰⴷⵓⵙⵉ ⵉⵜⵜⵉⵎⵖⵓⵔⵏ, ⴷ ⵓⵎⴷⵔⴰⵡ ⵉⵖⵣⴰⵏⵏ ⵉⴳⴰⵏ ⴰⵎⵢⵉⵎⴰⵏ.

ⴳ ⵓⵎⵏⵉⴷ ⵏ ⴱⵕⵕⴰ, ⵉⵇⵇⴰⵏ ⴷ ⴰⴷ ⵏⵙⵙⵏ ⵜⴰⵎⴰⵙⴰⵢⵜ ⵏⵏⵖ ⵏⵙⵡⵓⵔⵉ ⵙ ⵜⵣⵡⵉⵔⵉ ⴷ ⵓⵙⵎⵓⵙⵙⵓ ⴷ ⵜⵓⵙⵙⵏⴰ ⴷ ⵜⵎⵓⵛⴰ ⴷ ⵓⵖⵣⴰⵏ ⴷ ⵜⵎⵢⵉⵎⴰⵜ ⵉⵍⵍⴰⵏ ⴳ ⵜⵎⵙⴽⵔⵜ ⵏ ⵜⴷⵉⴱⵍⵓⵎⴰⵙⵉⵜ ⵏⵏⵖ ⵃⵎⴰ ⴰⴷ ⵏⵙⴱⴷⴷ ⵜⵉⵏⵏⵓⵄⴰⵕ ⵏ ⵡⴰⵃⴷⵉⵡⵉⵏ ⵏ ⵜⵢⴰⵏⵜ ⵏⵏⵖ ⵜⴰⵏⴰⴽⴰⵍⵜ ⵍⵍⵉ ⵜⵜⵉⵏⵉⵏ ⵉⵙ ⵙⵙⵅⵙⵔⵏ ⵉⵎⴷⵔⴰⵡⵏ ⵏⵏⵖ ⵖ ⴽⵔⴰ ⵏ ⵓⵙⴰⵜⵉ ⵏⵏⴰ ⵉⵍⵍⴰⵏ, ⴳⵎⵔⵏ ⵜⵉⵎⵍⴷⴰ ⴱⴰⵀⵔⴰ ⴷⵔⵓⵙⵏⵉⵏ ⵃⵎⴰ ⴰⴷ ⴼⴽⵉⵏ ⵜⵉⴽⵔⴽⴰⵙ ⵉ ⵉⵎⴷⵔⴰⵡⵏ ⵏⵏⵖ.

ⵜⴰⵏⵏ ⵙ ⵓⵣⴳⵣⵍ ⵜⴰⵢⵢⴰⴼⵓⵜ ⵏ ⵜⵡⵡⵓⵔⵉ ⵏ ⵓⵙⵇⵇⵉⵎ ⴳ ⵜⵉⵣⵉ ⵊⴰⵔ ⵙⵏⵜ ⵜⵙⵓⵜⵍⵉⵏ, ⵔⴰⴷ ⴼⵍⵍⴰⵙ ⵏⵚⴽⵓ ⵉ ⵜⵣⵣⵉⴳⵣⵜ ⵏ ⵜⵙⵎⵉⴳⴰⵍ ⵏⵏⵖ ⴳ ⵓⵙⴰⵜⵉ ⵏ ⵓⵎⵢⴰⵡⴰⵙ ⴷ ⵓⵙⵎⴰⴷ ⴷ ⵓⵡⵇⵇⵔⴰⵢ ⵏ ⵓⵎⵣⵔⴰⵢ ⴷ ⵓⵙⴽⵔ ⵙ ⵓⴷⵓⵙⵜⵓⵔ.

ⵜⴰⵏⵎⵎⵉⵔⵜ ⴼ ⵓⵙⵙⴼⵍⴷ ⵏⵏⵓⵏ