ⵜⴰⴳⵓⵔⵉ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ ⵡⵉⵙ ⵙⵎⵎⵓⵙ ⵏ ⵜⵎⵏⴰⴹⵉⵏ, ⵜⵙⵎⵏⵉⴷ ⵜⵜ ⵎⴰⵙⵙⴰ ⵅⴰⴷⵉⵊⴰ ⵣⵣⵓⵎⵉ ⵜⴰⵎⴰⵔⵉⵜ ⵏ ⵓⵏⵙⵙⵉⵅⴼ, ⴰⴽⵕⴰⵙ 20 ⴷⵓⵊⴰⵏⴱⵉⵔ 2023

• ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵉⵜⵜⴰⵡⵇⵇⴰⵔⵏ;
• ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵜⵜⴰⵡⵇⵇⴰⵔⵏ;
• ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵡⵏⴹⴰⵏ;
• ⵎⴰⵙⵙⴰ ⵜⴰⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵏ ⵜⵎⵏⴰⴹⵉⵏ ⵏ ⵍⵎⵖⵔⵉⴱ ⵉⵜⵜⴰⵡⵇⵇⴰⵔⵏ,
• ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⴱⵕⵍⴰⵎⴰⵏⵉⵢⵏ ⵜⵜⴰⵡⵇⵇⴰⵔⵏⵉⵏ,
• ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ.

ⵙⵙⵓⵔⴼⴰⵜ ⵉⵢⵉ ⴳ ⵜⵣⵡⵉⵔⵉ ⴰⴷ ⵉⵏⵉⵖ ⵎⴰⵙ ⵎⵎⵔⵖ ⵙ ⵜⴷⵔⴰⵡⵜ ⴳ ⵓⴳⵔⴰⵡ ⴰⴱⵕⵍⴰⵎⴰⵏⵉ ⵡⵉⵙ ⵙⵎⵎⵓⵙ ⵏ ⵜⵎⵏⴰⴹⵉⵏ ⵍⵍⵉ ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴷ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵡⵏⴹⴰⵏ, ⴷ ⵜⵎⵙⵎⵓⵏⵜ ⵏⵜ ⵎⵏⴰⴹⵉⵏ ⵏ ⵍⵎⵖⵔⵉⴱ, ⴷ ⵜⵎⵙⵎⵓⵏⵜ ⵜⴰⵎⵖⵔⵉⴱⵉⵜ ⵏ ⵉⵏⵙⵙⵉⵅⴼⵏ ⵏ ⵉⵙⵇⵇⵉⵎⵏ ⵏ ⵜⵙⴳⴳⵉⵡⵉⵏ, ⴷ ⵜⵎⵙⵎⵓⵏⵜ ⵜⴰⴰⵖⵔⵉⴱⵉⵜ ⵏ ⵉⵏⵙⵙⵉⵅⴼⵏ ⵏ ⵉⵙⵇⵇⵉⵎⵏ ⵏ ⵜⴳⵔⴰⵡⵉⵏ, ⴷⴷⵓ ⵜⵎⴰⵜⴰⵔⵜ: “ⵜⴰⵎⵏⴰⴹⵜ: ⴰⵎⵙⴽⴰⵔ ⴰⵙⵉⵍⴰⵏ ⴳ ⵓⵙⵎⵖⵔ ⵏ ⵜⴳⵎⵉ ⵉⵙⵉⴷⴼⵏ ⴷ ⵉⵙⵓⵍⵏ”.

ⵙ ⵜⵎⵍⴷⴰ, ⴷⴰ ⵙⵓⵜⴳⵖ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵉⵜⵜⴰⵡⵇⵇⴰⵔⵏ, ⵙ ⵓⵙⵏⵎⴰⵍⴰ ⵏ ⵓⵏⵎⵓⵇⵇⴰⵔ ⴰⴷ ⵙ ⵜⵖⴰⵔⴰⵙⵜ ⵉⵙⵓⵍⵏ, ⵖⵎⴽ ⵍⵍⵉ ⵜ ⵏⵙⵏⵉⵎⵎⵉⵔ ⴼ ⵜⵖⵔⵉ ⵏⵏⵙ ⵃⵎⴰ ⴰⴷ ⵏⴷⵔⵓ ⴳ ⵓⵏⵎⵓⵇⵇⴰⵔ ⴰⴷ ⵉⴳⴰⵏ ⴰⵙⴳⴳⵯⵙⴰⵏ ⵉⵥⵍⵉⵏ ⴷ ⵓⵎⴹⴰⴽⴰⵕ ⴷ ⵓⵙⴼⵙⵉ ⵏ ⵜⵎⵙⴰⵔⵉⵏ ⵏ ⵜⴳⵎⵉ ⵜⴰⴽⴰⵍⴰⵏⵜ ⴷ ⵜⵣⵔⴼⵜ ⵜⴰⴷⵖⴰⵔⴰⵏⵜ, ⵙ ⵜⴷⵔⴰⵡⵜ ⵏ ⵉⵎⵙⴽⴰⵔⵏ ⵥⵍⵉⵏⵉⵏ ⵙ ⵜⵖⴰⵡⵙⴰ ⵜⴰⴽⴰⵍⴰⵏⵜ ⴷ ⵜⵓⵏⴳⵉⵎⵜ ⴳ ⵜⵎⴰⵣⵉⵔⵜ ⵏⵏⵖ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⴳ ⵜⵣⵡⵉⵔⵉ, ⴷⴰ ⵙⵓⵜⴳⵖ ⴰⵜⵉⴳ ⵏ ⵓⵙⵏⵜⵍ ⵏ ⵓⵏⵎⵓⵇⵇⴰⵔ, ⵍⵍⵉⵖ ⵜⵟⵟⴰⴼ ⵜⴳⵎⵉ ⵜⴰⵙⴳⴰⵡⴰⵏⵜ ⴷ ⵜⵣⵔⴼⵜ ⵜⴰⴷⵖⴰⵔⴰⵏⵜ ⴰⵅⵎⵎⴻⵎ ⴰⵅⴰⵜⴰⵔ ⴷⴰⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵉⵏⵏⴰ ⴱⴰⴱ ⴳ ⵉⵏⴰⵡ ⵏⵏⵙ ⴰⵎⴰⵜⵜⵓⵢ ⵉ ⵉⴳⵯⵏⵙⴰⵙⵏ ⵏ ⵜⵎⵜⵜⵉ ⴳ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ ⵏ ⵓⵙⴳⴳⵯⴰⵙ ⴰⵣⵣⵔⴰⴼ ⵡⵉⵙ ⵙⵉⵏ ⵏ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵎⵔⴰⵡⵜ ⴳ 13 ⴽⵟⵓⴱⵕ 2017: “ⵜⴻⵜⵜⵓⵡⵜⵜⴰ ⵜⵢⴰⴼⵓⵜ ⵏ ⵡⴰⵏⴰⵡ ⵓⵏⴳⵉⵎ ⴰⵎⴰⵢⵏⵓ ⵎⴽ ⵜⴳⴰ ⵓⵙⴰⴷ ⵏⵏⵙ, ⵉⵖ ⵓⵔ ⵉⴱⴷⴷ ⴼ ⵉⵎⴰⵙⵙⵏ ⵕⵡⴰⵏⵉⵏ ⵏ ⵜⵣⵣⵉⴳⵣⵜ, ⴳ ⵉⵙⵡⵉⵔⵏ ⴰⴳⵔⴰⵖⴰⵍⴰⵏ ⴷ ⵓⴷⵖⴰⵔⴰⵏ. ⵙ ⵖⵎⴽ ⴰⵏⵏ ⴰⴼ ⵏⴰⵇⵔⴰ ⵉ ⵓⵣⵓⵛⵛⵍ ⵏ ⵜⵙⵏⵙⵉ ⵉⵙⵎⴷⵏ ⵏ ⵜⵙⵔⵜⵉⵜ ⵏ ⵜⵎⵏⴰⴹⵜ ⵉⵣⵣⵉⴳⵣⵏ, ⵍⵍⵉⵖ ⵟⵟⴰⴼ ⵉⴼⵙⵙⴰⵢⵏ ⴷ ⵜⵎⵔⴰⵔⵓⵜⵉⵏ ⵉ ⵜⵓⵜⵔⴰⵡⵉⵏ ⵜⵉⵏⴰⵎⵓⵏⵉⵏ ⴷ ⵜⵓⵏⴳⵉⵎⵉⵏ ⴳ ⵎⴰⵕⵕⴰ ⵜⵉⵙⴳⴳⵉⵡⵉⵏ ⵏ ⵜⴳⵍⴷⵉⵜ”

ⵙⴳ ⵓⵙⵡⴰⵍⴰ ⴰⴷ, ⵉⴼⴰⵡ ⵎⴰⵙ ⴷ ⴰⵙⵖⵓⴷⵓ ⵏ ⵓⵍⴷⴰⵢ ⴰⴽⴰⵍⴰⵏ ⵉⵣⴷⵉ ⴷ ⵓⵙⵓⵊⴷ ⵏ ⵓⵙⵎⴰⵇⵇⵍ ⴰⵙⵜⵔⴰⵜⵉⵊⵉ, ⵉⵙⴽⵔ ⴳ ⵜⵎⵏⴰⴹⵜ ⵢⴰⵜ ⵜⵢⴰⵏⵜ ⵜⴰⴽⴰⵍⴰⵏⵜ ⵉⴷⵔⵓⵏ ⴳ ⵓⴱⵔⵉⴷ ⵓⵏⴳⵉⵎ, ⵍⵍⵉ ⴷ ⵉⵜⵜⴰⵡⵉⵏ ⴰⵙⵙⴰⵔⵓ ⵉⵙⵎⵔⵙⵏ ⵎⴰ ⴷ ⵉⵍⵍⴰⵏ ⴳ ⵡⴰⴽⴰⵍ ⴰⵙⴳⴰⵡⴰⵏ ⵙⴳ ⵜⵎⵍⴷⴰ ⵏ ⵜⴳⵎⵉ ⵜⴰⴷⵎⵙⴰⵏⵜ, ⴷ ⵓⵙⵖⵓⴷⵓ ⵏ ⵓⵎⵃⵉⵣⵡⴰⵔ ⵏⵏⵙ ⴳ ⵓⵎⵏⵉⴷ ⵏ ⵓⵙⵙⴰⵔⵓ, ⴳ ⵓⵙⴰⵜⵉ ⵏ ⵜⵣⵔⴼⵜ ⵜⴰⴷⵖⴰⵔⴰⵏⵜ ⵍⵍⵉ ⵉⵙⴽⵔⵏ ⴳ ⵜⴳⵎⵉ ⵏ ⵓⵙⵉⴷⴼ ⵉⵙⵓⵍⵏ ⴰⵡⵜⵜⴰⵙ ⵍⵍⵉ ⵔⴰⴷ ⵉⵜⵜⵓⵙⴽⵉⵔ ⴳ ⵎⴰⵕⵕⴰ ⵜⵉⵙⴳⴳⵉⵡⵉⵏ ⵏ ⵜⴳⵍⴷⵉⵜ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵉⴳⴰ ⵓⵙⵏⵜⵍ: “ⵜⴰⵎⵏⴰⴹⵜ: ⴰⵎⵙⴽⴰⵔ ⴰⵙⵉⵍⴰⵏ ⴳ ⵓⵙⵎⵖⵔ ⵏ ⵜⴳⵎⵉ ⵉⵙⵉⴷⴼⵏ ⴷ ⵉⵙⵓⵍⵏ”, ⵢⴰⵏ ⵙⴳ ⵉⵙⵏⵜⵍⵏ ⵏ ⵖⵉⵍⴰⴷ ⴳⴰⵏⵉⵏ ⵉⵎⵣⵡⵓⵔⴰ, ⴰⵛⴽⵓ ⵔⴰⴷ ⵉⵙⵉⵙⴼⵉⵡ ⵓⵏⵎⵓⵇⵇⴰⵔ ⴰⴷⵖⴰⵔ ⴷ ⵜⵉⵍⴰⵍⵜ ⵏ ⵜⵎⵏⴰⴹⵜ ⴳ ⵓⵙⴽⵔ ⵏ ⵜⴳⵎⵉ ⵜⴰⵙⴳⴰⵡⴰⵏⵜ ⴳ ⵢⴰⵏ ⵓⵙⵎⴰⵇⵇⵍ ⴰⵙⵜⵔⴰⵜⵉⵊⵉ ⵉ ⵜⴳⵎⵉ ⵢⵓⵎⴰⵏ, ⵍⵍⵉ ⵔⴰⴷ ⵢⴰⵊⵊ ⵜⴰⵎⵏⴰⴹⵜ ⴰⴷ ⵜⴷⵔⵓ ⴳ ⵜⵓⴳⴳⴰⵙ ⵜⵓⵏⴳⵉⵎⵜ ⵏ ⵜⵎⴰⵣⵉⵔⵜ ⵏⵏⵖ.  ⴳ ⵓⵎⵏⴰⴹ ⴰⴷ, ⵉⵇⵇⴰⵏ ⴷ ⴰⴷ ⵏⴽⵯⵜⵉ ⴰⴷⵓⵙⵜⵓⵔ ⵏ ⵜⴳⵍⴷⵉⵜ ⵏ ⵓⵙⴳⴳⵯⴰⵙ ⵏ 2011 ⵍⵍⵉ ⵉⴼⴽⴰⵏ ⵉ ⵜⵎⵏⴰⴹⵜ ⴷ ⵜⴰⴳⵔⴰⵡⵜ ⵜⴰⵏⴰⴽⴰⵍⵜ ⵢⴰⵏ ⵓⴷⵖⴰⵔ ⴰⵎⵣⵡⴰⵔⵓ ⵙⴳ ⵎⴰⵕⵕⴰ ⵜⵉⴳⵔⴰⵡⵉⵏ ⵢⴰⴹⵏⵉⵏ ⵜⵉⵏⴰⴽⴰⵍⵉⵏ (ⴰⵎⵏⵏⵉ 143/ⵜⴰⵙⴷⴷⴰⵔⵜ 2), ⵉⵙⴽⵔ ⴳⵉⵙ ⵓⵍⴰ ⴰⵎⴷⵔⴰⵡ ⵉⵕⵡⴰⵏ ⴳ ⵜⵡⵓⵔⵉ ⵏ ⵜⴳⵎⵉ ⵉⵙⵉⴷⴼⵏ ⴷ ⵉⵙⵓⵍⵏ, ⴰⵢⵍⵍⵉ ⵉⵙⴷⴷⵉⴷ ⵓⵎⵏⵏⵉ 80 ⵏ ⵓⵙⵍⴳⵏ ⴰⵎⴰⴷⴷⴰⵙ 111.14 ⵉⵥⵍⵉⵏ ⵙ ⵜⵎⵏⴰⴹⵉⵏ, ⵍⵍⵉⵖ ⵉⵜⵜⵓⵏⵏⴰ: “ⴷⴰ ⵜⵙⴽⴰⵔ ⵜⵎⵏⴰⴹⵜ ⴳ ⵓⵙⴰⵜⵉ ⵏⵏ ⴰⴽⴰⵍⴰⵏ ⵜⵉⵙⵎⵉⴳⴰⵍ ⵏ ⵓⵙⵎⵖⵔ ⵏ ⵜⴳⵎⵉ ⵉⵙⵉⴷⴼⵏ ⴷ ⵉⵙⵓⵍⵏ ⵙ ⵓⵙⵏⵎⴰⵍⴰ ⴷ ⵓⵣⴷⴰⵢ ⴷ ⵓⴹⴼⵓⵕ ⵏⵏⵙ”.

ⵉⴳⴰ ⵓⵙⵕⵚⵓ ⵏ ⵓⵎⵏⴰⴷ ⴰⵙⴳⴰⵡⴰⵏ ⴳ ⵉⵖⴰⵡⴰⵙⵏ ⵓⵏⴳⵉⵎⵏⵙ ⵢⴰⵜ ⵜⵏⴰⵥⴰⵕⵜ ⵜⴰⵙⵉⵍⴰⵏⵜ ⵏ ⵜⵙⵔⵜⵉⵜ ⵜⴰⵙⴳⴰⵡⴰⵏⵜ ⵏ ⵓⵡⴰⵏⴽ, ⵍⵍⵉ ⵢⵓⵎⴰⵏ ⴰⵙⵎⵖⵔ ⵏ ⵓⵙⵙⴰⵔⵓ ⴰⴳⴷⵓⴷⴰⵏ ⵉⴳⴰⵏ ⴰⵍⴰⵢ ⴰⴷⵙⵍⴰⵏ ⵏ ⵜⴳⵎⵉ, ⴷ ⵉⵎⵉⵙⵙ ⵉⵕⵡⴰⵏ ⵉ ⵓⵙⴽⵔ ⵏ ⵓⵙⵎⵖⵔ ⴰⴷⵎⵙⴰⵏ ⴷ ⵓⵙⵉⵣⴷⵔ ⵏ ⵉⵎⵣⵔⴰⵢⵏ ⵊⴰⵔ ⵜⵙⴳⴳⵉⵡⵉⵏ ⴷ ⵜⵎⵏⴰⴹⵉⵏ ⵏ ⵜⴳⵍⴷⵉⵜ, ⵉ ⵓⵙⴽⵔ ⵏ ⵓⵙⵙⴰⵔⵓ ⴷ ⵜⴳⵎⵉ ⵜⴰⵙⵓⵍⴰⵏⵜ, ⵖⵎⴽ ⴰⴷ ⴰⴼ ⴷⵢⵓⵛⴽⴰ ⵓⵙⵍⴳⵏ ⴰⵙⴰⵜⵉ 03.33 ⵍⵍⵉ ⵉⴳⴰⵏ ⴰⵎⵇⵇⵏ ⵏ ⵓⵙⵙⴰⵔⵓ, ⵉ ⵓⵙⴽⵔ ⵏ ⴽⵉⴳⴰⵏ ⵏ ⵉⵡⵜⵜⴰⵙⵏ ⵉⵙⵉⵍⴰⵏⵏ ⵏ ⵜⵡⵓⵔⵉ ⵏ ⵓⵡⴰⵏⴽ ⴳ ⵢⵉⴳⵔ ⵏ ⵜⴳⵎⵉ ⵏ ⵓⵙⵙⴰⵔⵓ ⴷ ⵓⵙⵙⵔⵇⴱ ⵏⵏⵙ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵃⵎⴰ ⴰⴷ ⵢⵉⵍⵉ ⵓⵙⵎⵀⵍ ⵏ ⵓⵙⴰⵡⵓⵔ ⵏ ⵜⵙⵔⵜⵉⵜ ⵏ ⵜⵙⴳⴰ ⵉⵣⵣⵉⴳⵣⵏ ⵍⵍⵉ ⵉⴳⴰⵏ ⵙⴳ ⵜⵉⵔⵙⴰⵍ ⵜⵉⵙⴷⴰⵔⵉⵏ ⵍⵍⵉ ⴼ ⵉⴱⴷⴷ ⵓⵙⵏⵎⴰⵍⴰ ⴰⴽⴰⵍⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱⵏ ⵙ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⴳ 2011, ⵍⵍⴰⵏ ⴽⵉⴳⴰⵏ ⵉⴹⵕⵉⵚⵏ ⵉⵣⵔⴼⴰⵏⵏ, ⵣⴷⵉⵏⵉⵏ ⴷ ⵜⵎⵏⴰⴹⵜ ⴷ ⵓⵙⵖⵓⴷⵓ ⵏ ⵡⵍⴰⴷⴰⵢ ⵏⵏⵙ ⴷ ⵓⵎⵃⵉⵣⵡⴰⵔ ⵏⵏⵙ ⴳ ⵓⵎⵏⵉⴷ ⵏ ⵓⵙⵙⴰⵔⵓ. ⵉⴼⴼⵖ ⴷ ⵓⵙⵍⴳⵏ ⴰⵎⴰⴷⴷⴰⵙ 111.14 ⵉⵥⵍⵉⵏ ⵙ ⵜⵙⴳⴳⵉⵡⵉⵏ, ⴷ ⵓⵙⵍⴳⵏ 47.18 ⴼ ⵓⵎⵓⴽⵏ ⵏ ⵡⴰⵎⵎⴰⵙⵏ ⵉⵙⴳⴰⵡⴰⵏⵏ ⵏ ⵓⵙⵙⴰⵔⵓ ⴷ ⵓⵙⴽⵔ ⵏ ⵜⵙⵇⵇⵉⵎⵉⵏ ⵜⵉⵙⴳⴰⵡⴰⵏⵉⵏ ⵎⵓⵏⵏⵉⵏ ⵉ ⵓⵙⵙⴰⵔⵓ, ⴷ ⵓⵙⵍⴳⵏ 46.18 ⵉⵥⵍⵉⵏ ⵙ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ 86.12 ⴼ ⵜⵎⵖⵓⵏⵉⵏ ⵏ ⵜⴷⵔⴰⵡⵜ ⴳⵔ ⵢⵉⴳⵔ ⴰⵎⴰⵜⴰⵢ ⴷ ⵓⵙⵍⵉⴳ, ⴷ ⵓⵙⵍⴳⵏ ⴰⵙⴰⵜⵉ 69.19 ⴼ ⵓⵎⵓⴽⵏ ⵏ ⵉⵔⴳⴰⵢⵏ,  ⴷ ⵓⵙⵍⴳⵏ 55.19 ⴼ ⵓⵙⵔⵅⵓ ⵏ ⵜⴱⵔⵉⴷⵉⵏ ⴷ ⵜⵎⵙⴽⴰⵔ ⵜⵉⵎⵙⵙⵓⴳⵓⵔⵉⵏ, ⴷ ⵓⵙⵍⴳⵏ 76.20 ⴼ ⵓⵙⴽⵔ ⵏ ⵓⴼⵏⵉⵇ ⵏ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵓⵙⵙⴰⵔⵓ, ⴷ ⵓⵙⵍⴳⵏ ⴰⵙⴰⵜⵉ 50.21 ⴼ ⵓⵎⵓⴽⵏ ⵏ ⵜⵎⵔⵙⴰⵍ ⴷ ⵜⵎⵙⵙⵏⵜⴰⵢ ⵜⵉⴳⴷⵓⴷⴰⵏⵉⵏ , ⴷ ⵓⵙⵍⴳⵏ ⴰⵙⴰⵜⵉ 03.22 ⵉⴳⴰⵏ ⴰⵎⵇⵇⵏ ⵏ ⵓⵙⵙⴰⵔⵓ, ⴷ ⵓⵙⴽⵔ ⵏ ⵓⵎⵇⵇⵏ ⴰⵏⴰⵎⵓⵔ ⵉ ⵡⴰⵔⴰⵏⴰⵎⵎⴰⵙ ⴰⵎⵙⵙⵓⴳⵓⵔ ⵙ ⵓⵎⵕⵚⵓⵎ 2.17.618 ⴳ 26 ⴷⵓⵊⴰⵏⴱⵉⵔ 2018.

ⴳⴰⵏ ⵉⴹⵕⵉⵚⵏ ⴰⴷ ⵉⵣⵔⴼⴰⵏⵏ ⵉⵙⴰⵡⵓⵔⵏ ⵉⵣⵣⵔⴰⴼⵏ ⴹⴼⵕⵏⵉⵏ ⴰⵎⵏⴰⴷ ⵓⵏⴳⵉⵎ ⵏ ⵜⵙⴳⴰ, ⴳⵉⵏ ⵉⵎⵓⴽⵏⵏ ⵉⵅⴰⵜⴰⵔⵏ ⵟⵟⴰⴼⵏⵉⵏ ⴰⴷⵔⵉⵣ ⵉⵥⵉⵍⵏ ⴼ ⵜⴳⵎⵉ ⵉⵙⵉⴷⴼⵏ ⴷ ⵉⵙⵓⵍⵏ ⵏ ⵜⵎⵏⴰⴹⵉⵏ, ⵉ ⵓⵙⵙⵔⵇⴱ ⵏ ⵉⵙⵏⴼⴰⵔⵏ ⵉⵙⴳⴰⵡⴰⵏⵏ ⵏ  ⵓⵙⵙⴰⵔⵓ ⵃⵎⴰ ⴰⴷ ⵢⵉⵍⵉ ⵡⴰⵍⴰⵢ ⵏ ⵓⵙⵙⴰⵔⵓ ⴳ ⵓⵙⵡⵉⵔ ⴰⵏⵎⵏⴰⴹ. ⵎⵇⵇⴰⵔ ⵜⴰⵣⵣⵉⴳⵣⵜ ⴰⴷ, ⵜⵉⵎⵙⴽⵔⵜ ⵏ ⵡⴰⵙⵙ ⴰⴷ ⴰⵔ ⵜⵜⵉⵏⵉ ⵎⴰⵙ ⵙⵓⵍ ⵏⵙⵖⴰⵡⵙⴰ ⵙ ⴽⵉⴳⴰⵏ ⵏ ⵜⵓⴳⴳⴰⵙ ⴳ ⵎⴰⴷ ⵉⵥⵍⵉⵏ ⵙ ⵓⵙⵡⵓⵜⵜⵓ ⵏ ⵜⵣⴷⴰⵢⵜ ⵉⵙⵎⵓⵏⵏ ⴰⵡⴰⵏⴽ ⵉⴳⴰⵏ ⴰⵎⵙⴽⴰⵔ ⴰⴷⵙⴰⵍⵏ ⴳ ⵢⵉⴳⵔ ⵏ ⵜⴳⵎⵉ ⴰⴽⴷ ⵜⵉⵎⵏⴰⴹⵉⵏ ⴷ ⵜⵢⴰⵏⵉⵏ ⵜⵉⵏⴰⴽⴰⵍⵉⵏ ⵍⵍⵉ ⴷ ⵜⵇⵇⴰⵏ ⵜⵏⴰⵔⴰ ⵏ ⵜⴳⵎⵉ ⵜⴰⵙⴳⴰⵡⴰⵏⵜ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵉⴱⴷⴷ ⵓⵙⵙⴰⵔ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⴼ ⵓⵙⵎⴰⵇⵇⵍ ⴰⵙⵜⵔⴰⵜⵉⵊⵉ ⵍⵍⵉ ⵉⵙⴽⵔⵏ ⴳ ⵓⵡⴰⵏⴽⵏ ⴰⵎⵙⴽⴰⵔ ⴰⴷⵙⵍⴰⵏ ⴳ ⵜⴳⵎⵉ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ ⵉⵖ ⵉⴳⴰ ⵍⵃⴰⵍ ⴰⵙⵙⴰⵔⵓ ⴰⴳⴷⵓⴷⴰⵏ, ⵖⵎⴽ ⵍⵍⵉ ⵉⵙⴽⵔ ⴳ ⵜⵙⴳⴰ ⵢⴰⵏ ⵓⵎⵙⴽⴰⵔ ⵉⵙⵜⴰⵡⵀⵎⵎⴰⵏ ⴳ ⵜⴳⵎⵉ ⵜⴰⵙⴳⴰⵡⴰⵏⵜ ⵙ ⵓⵙⵙⴰⵔⵓ ⵓⵙⵍⵉⴳ, ⴰⵔ ⵜⴷⵔⵔⵓ ⵜⵎⵏⴰⴹⵜ ⴳ ⵜⴷⵉⵏⴰⵎⵉⵜ ⵜⴰⴷⵎⵙⴰⵏⵜ ⵏ ⵜⴳⵍⴷⵉⵜ, ⵉ ⵓⵙⴽⵔ ⵏ ⵜⴳⵎⵉ ⵜⴰⵙⴳⴰⵡⴰⵏⵜ ⵉⴱⴷⴷⵏ ⴼ ⵜⵣⵔⴼⵜ ⵜⴰⵙⵖⴰⵔⴰⵏⵜ, ⵉⵡⵇⵇⵔⵏ ⵜⵉⵎⵥⵍⴰⵢ ⵏⵏⵙ, ⵙ ⵜⵙⵜⵔⴰⵜⵉⵊⵉⵜ ⵜⴰⵏⴰⵎⵓⵔⵜ ⵍⵍⵉ ⵉⵙⴽⵔⵏ ⴳ ⵓⵙⵙⴰⵔⵓ ⴰⴳⴷⵓⴷⴰⵏ ⴷ ⵓⵙⵍⵉⴳ ⵉⵎⵉⵙⵙ ⵏ ⵡⴰⵍⴰⵢ ⵏ ⵜⴳⵎⵉ ⵜⴰⵎⴰⵜⴰⵢⵜ ⴷ ⵓⴽⵛⵓⵎ ⵉⵙⵜⴰⵡⵀⵎⵎⴰⵏ ⵉ ⵓⵙⵖⵓⴷⵓ ⵏ ⵜⵢⴰⴼⵓⵜ ⵜⴰⴳⵯⵏⵙⴰⵏⵜ ⵉⵙⵇⵇⵉⵇⵏ.

ⵉ ⵓⵙⴽⵔ ⵏ ⵡⴰⵡⵜⵜⴰⵙ ⴰⴷ, ⵉⵇⵇⴰⵏ ⴷ ⴰⴷ ⵜⵙⴽⵔ ⵜⵎⵏⴰⴹⵜ ⴰⵙⵙ ⴰⴷ ⵜⵉⵎⵥⵍⴰⵢ ⵏⵏⵙ ⴳ ⵓⵎⵏⵉⴷ ⵏ ⵓⵙⵙⵔⵇⴱ ⵏ ⵓⵙⵙⴰⵔⵓ ⴷ ⵓⵙⵎⵔⵙ ⵏ ⵜⵥⴹⴰⵕⵉⵏ ⴷ ⵜⵎⵍⴷⴰ ⴷ ⵓⵙⵓⵊⴷ ⵏ ⵓⵙⵎⵏⵉⴷ ⵓⵏⴳⵉⵎ ⴰⵏⵎⵏⴰⴹ ⵉⴱⴷⴷⵏ ⴼ ⵓⵙⵙⴰⵔⵓ ⴰⵏⴰⵎⵓⵔ ⵉⵕⵡⴰⵏ, ⵉⵙⴽⴰⵔⵏ ⴰⵙⵎⴰⴷ ⴰⴽⴰⵍⴰⵏ ⵊⴰⵔ ⵜⵉⵎⵏⴰⴷⵉⵏ ⵢⴰⵡⵙ ⴳ ⵓⵙⵉⵣⴷⵔ ⵏ ⵉⵎⵣⵔⴰⵢⵏ ⵉⴷⵖⴰⵔⴰⵏⵏ.

ⵓⵔ ⴳⵉⵙ ⵜⵓⵔⴷⴰ, ⵎⴰⵙ ⵉⵟⵟⴰⴼ ⵓⵙⵙⴰⵔⵓ ⴽⵉⴳⴰⵏ ⵏ ⵉⵎⵉⵣⵉⵜⵏ ⴷ ⵜⵏⴰⵥⴰⵕⵉⵏ, ⵉⵇⵇⴰⵏⴷ ⴼ ⵜⵏⴰⴹⵉⵏ ⴰⴷ ⵙⵔⵙⵏⵜ ⴳ ⵓⵙⵓⵊⴷ ⵏ ⵉⵙⵏⴼⴰⵔⵏ ⵏⵏⵙⵏⵜ ⴳ ⵓⵎⵏⵉⴷ ⵏ ⵓⵙⵙⴰⵔⵓ ⵜⴰⴷⵔⵓⵙⵜ ⵏ ⵉⵙⵓⴳⴰⵎ ⵉⴳⴰⵎⴰⵏⵏ ⵙⵍⴰⵡⴰⵏ ⴰⴽⴽⵯ ⴰⵎⴰⵏ ⴷ ⵜⵥⴹⴰⵕⵜ, ⴷ ⵓⵙⵓⵊⴷ ⵏ ⵜⵥⴹⴰⵕⵉⵏ ⵜⵉⵥⵕⴼⴰⵏⵉⵏ ⴷ ⵜⵏⵏⵓⴱⴹⴰ ⵏ ⵜⵎⴽⵕⴰⴹ ⴳ ⵓⵙⴽⵔ ⵏ ⵉⵙⵏⴼⴰⵔⵏ, ⴷ ⵎⴰⴷ ⵉⵥⵍⵉⵏ ⵙ ⵓⵙⵜⴰⵢ ⵉⵥⵉⵍⵏ ⵏ ⵜⵙⵓⴳⴰⵔ ⴷ ⵉⵙⵓⴳⴰⵎ ⵉⵏⴼⴳⴰⵏⵏ ⴱⴷⴷⵏⵉⵏ ⴼ ⵜⵎⵙⵙⵓⴳⵓⵔⵜ ⴷ ⵓⴹⴼⵕ ⵏ ⵉⵙⵏⴼⴰⵔⵏ, ⴷ ⵓⵙⵜⴰⵢ ⵊⴰⵔ ⵉⵙⵜⴰⵢⵏ ⴷ ⵜⵙⵏⵙⵉ ⵏⵏⵙⵏ ⵉⵥⵉⵍⵏ, ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵥⵍⵉⵏ ⵙ ⵓⵙⵓⵊⴷ ⵏ ⵉⵖⴰⵡⴰⵙⵏ ⵉⵏⵎⵏⴰⴹⵏ ⵏ ⵓⵙⵓⵊⴷ ⵏ ⵡⴰⴽⴰⵍ, ⴷ ⵎⴰⴷ ⵉⵥⵍⵉⵏ ⵙ ⵉⵖⴰⵡⴰⵙⵏ ⵏ ⵜⴳⵎⵉ ⵜⴰⵙⴳⴰⵡⴰⵏⵜ, ⵍⵍⵉⵖ ⵉⴳⴰ ⵓⴱⵟⵟⵓ ⴰⵏⵎⵏⴰⴹ ⴷ ⵓⴷⵖⴰⵔⴰⵏ ⵏ ⵓⵙⵙⴰⵔⵓ ⴰⴳⴷⵓⴷⴰⵏ ⵉⵎⵉⵙⵙ ⵏ ⵡⴰⵍⴰⵢ ⴰⴷⵙⵍⴰⵏ ⵏ ⵜⴳⵎⵉ ⴷ ⵡⴰⴷ ⵉⵜⵜⴰⵡⵙⵏ ⴳ ⵓⵙⵖⵓⴷⵓ ⵏ ⵓⵏⵣⵡⵉ ⵏ ⵜⵡⵓⵔⵉⵢⵉⵏ ⴳ ⵓⵙⵡⵉⵔ ⴰⵏⵎⵏⴰⴹ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⴳ ⵜⴳⵉⵔⴰ ⵏ ⵜⴳⵓⵔⵉ ⴰⴷ ⵜⴰⵇⵇⵓⴹⴰⴹⵜ, ⴷⴰ ⴽⵯⵏ ⵙⵏⵉⵎⵎⵉⵔⵖ ⵜⵉⴽⴽⵍⵉⵜ ⵢⴰⴹⵏⵉⵏ ⴼ ⵜⵖⵔⵉ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉ ⵓⴷⵔⴰⵡ ⴳ ⵓⵏⵎⵓⵇⵇⴰⵔ ⴰⴷ ⴰⴱⵕⵍⴰⵎⴰⵏⵉ ⵡⵉⵙ ⵙⵎⵎⵓⵙ ⵏ ⵜⵎⵏⴰⴹⵉⵏ, ⵜⵜⵔⵖ ⴰⴷ ⵉⵍⵉⵏⵜ ⵜⵢⴰⴼⵓⵜⵉⵏ ⴷ ⵉⵙⵖⵍⴰⴼ ⵍⵍⵉ ⵔⴰⴷ ⵢⴰⵡⵙ ⴳ ⵓⵙⴷⵓⵙ ⵏ ⵜⵎⵏⴰⴹⵜ ⴳ ⵓⵙⵎⵖⵔ ⵏ ⵜⴳⵎⵉ ⵉⵙⵉⴷⴼⵏ ⴷ ⵉⵙⵓⵍⵏ, ⴰⵢⵍⵍⵉ ⵔⴰⴷ ⵢⴰⵡⵙ ⴳ ⵓⵙⵎⵖⵔ ⵏ ⵓⵙⵡⵉⵔ ⵏ ⵜⴳⵎⵉ ⵜⴰⵏⴼⴳⴰⵏⵜ ⴷ ⵜⴷⵖⴰⵔⴰⵏⵜ ⵍⵍⵉ ⴼ ⴱⴷⴷⴰ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵉⵃⴼⴹ ⵕⴱⴱⵉ.

ⴰⴷ ⴰⵖ ⴰⴽⴽⵯ ⵢⴰⵡⵙ ⵕⴱⴱⵉ ⴳ ⵎⴰⵖ ⵉⵍⵍⴰ ⵓⴼⵓⵍⴽⵉ ⵏ ⵜⵎⴰⵣⵉⵔⵜ ⵏⵏⵖ ⵙ ⵜⵏⴰⵔⴰ ⵉⵥⵉⵍⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ.