ⴰⵙⵉⵔⴰ(2016-2021):
ⴰⵙⵉⵡⴹ ⴼ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ, ⴰⵙⵉⵏⴰⵙ 20 ⴽⵟⵓⴱⵕ 2020
ⵉⵙⵏⵎⴰⵍⴰ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⵏⵏⵙ ⵜⴰⵏⵎⵍⴰⵙⵙⵜ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵙⵙ ⵏ ⵓⵙⵉⵏⴰⵙ 20 ⴽⵟⵓⴱⵕ 2020, ⵜⵥⵍⵉ ⵉ ⵜⵉⴹⴰⴼ ⴷ ⵓⵣⵣⵔⴰⴼ ⴷ ⵓⵙⵏⵎⴰⵍⴰ ⵏ ⵜⵡⵓⵔⵉⵡⵉⵏ ⵏ ⵓⵙⵇⵇⵉⵎ.
ⵖ ⵜⵡⵓⵔⵉ ⵏ ⵜⵉⴹⴰⴼ, ⵉⵥⵍⵉ ⵓⵙⵉⵔⴰ ⵜⵉⵖⵉⵎⵉⵜ ⵏ ⵡⴰⵢⵏⴰⵙ 26 ⴽⵟⵓⴱⵕ ⵉ ⵉⴳⵔⴰⵏ ⵏ ⵜⴳⵯⵏⵙⴰⵏⵜ ⴷ ⵜⴷⵓⵙⵉ, ⴷ ⵓⵖⴰⵡⴰⵙ ⵏ ⵜⵖⵉⵎⵉⵜⵉⵏ ⵜⵉⵏⵎⵍⴰⵙⵙⵉⵏ ⵏ ⵓⵣⴳⵏ ⴰⵎⵣⵡⴰⵔⵓ ⵏ ⵡⴰⵢⵢⵓⵔ ⵏ ⵏⵓⵡⴰⵏⴱⵉⵔ ⵉ ⵉⴳⵔⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵣⴷⴰⵢⵉⵏ ⴷ ⵓⴱⵕⵍⴰⵎⴰⵏ ⴷ ⵓⵙⵓⵡⵓⵔⵉ ⴷ ⵓⵙⵉⴷⴼ ⴰⵣⵣⵓⵍⴰⵏ ⴷ ⵜⵎⴰⵍⵍⴰⵢⵜ ⴷ ⵜⵎⴳⵓⵔⵉ ⵜⴰⵇⴱⵓⵔⵜ, ⵉ ⵡⴰⵢⵏⴰⵙ 20 ⵏⵓⵡⴰⵏⴱⵉⵔ, ⴷ ⵉⴳⵔⴰⵏ ⵏ ⵜⴷⵍⵙⴰ ⴷ ⵉⵄⵔⵔⵉⵎⵏ ⴷ ⵜⵓⵏⵏⵓⵏⵜ ⴷ ⵜⵎⴳⵓⵔⵉ ⴷ ⵓⵙⵖⵏⵣⵉ ⴷ ⵜⴷⵎⵙⴰ ⵜⴰⵎⵓⵟⵟⵓⵏⵜ ⴷ ⵡⴰⵙⵙⴰⵢ ⴷ ⵍⵓⵊⵉⵙⵜⵉⴽ ⴷ ⵡⴰⵎⴰⵏ ⵉ ⵜⵖⵉⵎⵉⵜ ⵏ ⵡⴰⵢⵏⴰⵙ 9 ⵏⵓⵡⴰⵏⴱⵉⵔ 2020.
ⵉⴼⴼⵖ ⵓⵙⵉⵔⴰ ⵎⴰⵙ ⵉⵜⵜⵓⵎⴽⴰⵏ ⴰⴷ ⵉⵜⵜⵓⵏⵙⴼⵉⵍ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ ⵙ ⴰⵢⵍⵍⵉ ⴷ ⵢⵉⵡⵉ ⵓⵣⵎⵣ ⴷ ⵜⵎⵙⴰⵔⵉⵏ ⴷ ⴳⴳⵔⴰⵏⵉⵏ, ⵙ ⴰⵢⵍⵍⵉ ⵉⵍⵍⴰⵏ ⵖ ⵜⵙⵓⵎⵔⵉⵏ ⵏ ⵉⴼⵔⴷⴰⵙ ⵏ ⵓⵙⵇⵇⵉⵎ ⴷ ⵉⵎⴰⵢⵏⵓⵜⵏ ⵏ ⵓⵙⴰⵔⴰⴳ ⴰⵏⴰⵎⵓⵔ.
ⵉⵖⵔⴰ ⵓⵙⵉⵔⴰ ⴰⵖⴰⵡⴰⵙ ⴰⵣⵎⵣⴰⵏ ⵉⵥⵍⵉⵏ ⵙ ⵜⵖⵔⵉ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⴷ ⵓⵙⵜⴰⵢ ⵏⵏⵙ, ⵖ ⵜⵙⵇⵇⵉⵎⵜ ⵏ ⵓⵥⵕⴼ ⴷ ⵜⴳⵎⵉ ⵜⴰⴷⵎⵙⴰⵏⵜ ⴷ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵖ ⵎⴰⴷ ⵉⵥⵍⵉⵏ ⵙ ⵉⵙⵏⴼⴰⵔⵏ ⵏ ⵜⵎⵙⴰⵙⵜⵍⵉⵏ ⵜⴰⵢⵢⴰⵡⵉⵏ ⵏⵖ ⵜⵉⵖⵉⵎⵉⵜⵉⵏ ⵜⵉⵎⴰⵜⴰⵢⵉⵏ, ⵙ ⴰⵢⵍⵍⵉ ⵉⵍⵍⴰⵏ ⵖ ⵓⵙⵍⴳⵏ ⴰⵎⴰⴷⴷⴰⵙ ⵏ ⵓⵙⵍⴳⵏ ⵏ ⵓⵥⵕⴼ.
ⵉⵙⵙⴽⵜⵉ ⴷ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⴰⵜⵉⴳ ⵉⵙⵜⴰⵡⵀⵎⵎⴰⵏ ⵏ ⵓⵙⵔⵙ ⴰⴷ ⴰⴷⵙⵜⴰⵔ, ⵖ ⵉⵍⵍⴰ ⵓⵎⴹⴰⴽⴰⵔ ⵉⵙⵜⴰⵡⵀⵎⵎⴰⵏ ⵏ ⵜⵎⵙⴰⵙⵜⵍⵜ ⴷ ⵉⵙⵏⴼⴰⵔⵏ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ ⵍⵍⵉ ⴷⵉⴷⵙ ⵥⵍⵉⵏⵉⵏ.
ⵉⴼⴼⵖ ⵓⵙⵉⵔⴰ ⴰⴷ ⵢⵉⵍⵉ ⵓⵙⵎⵖⵔ ⵏ ⵓⴷⵔⴰⵡ ⵉ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⵖ ⵓⵙⵡⵓⴷⴷⵓ ⵉⵕⵡⴰⵏ ⵏ ⵓⵣⵎⵣ ⵉⵥⵍⵉⵏ ⵉ ⵜⵡⵓⵔⵉ ⴰⴷ.
ⵖ ⵓⵣⵣⵔⴰⴼ, ⵉⵥⵕⴰ ⵓⵙⵉⵔⴰ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⵍⵍⵉ ⴷ ⵜⵜⵓⵚⵕⴰⴼⵏⵉⵏ ⵉ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ, ⴳⴰⵏ 33 ⵏ ⵓⵙⵏⴼⴰⵔ ⴷ ⵜⵣⵣⵉⴳⵣⵜ ⵏ ⵜⵖⵔⵉ ⵏⵏⵙⵏ, ⵢⵉⵏⵉ ⵎⴰⵙ ⴷ ⵉⵇⵇⴰⵏ ⵓⵡⵇⵇⵔ ⵏ ⵉⵣⵎⴰⵣ ⵜⵜⵓⴱⴷⴰⵔⵏⵉⵏ ⵖ ⵓⵏⴳⵔⴰⵡ ⴰⴳⵯⵏⵙⴰⵏ, ⵖⵎⴽ ⵍⵍⵉ ⵉⵥⵕⴰ ⵎⴰⴷ ⵉⵥⵍⵉⵏ ⵙ ⵜⵣⴷⴰⵢⵜ ⵏ ⵍⵎⵖⵔⵉⴱ ⵜⴰⵙⵉⵏⵔⴰⵏⵜ ⴷ ⵜⴰⴳⵜⵉⵔⴰⵏⵜ ⵖ ⵉⵙⵏⴼⴰⵔⵏ ⵏ ⵜⵎⵢⴰⵇⵇⴰⵏⵉⵏ ⵍⵍⵉ ⴰⵙ ⴷ ⵉⵜⵜⵓⵚⵕⴰⴼⵏ, ⴷ ⵉⵙⵏⴼⴰⵔⵏ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ ⴷ ⵉⵡⵏⴹⴰⵏⵏ ⴷ ⵡⵉⵏ ⵓⵏⴱⴰⴹ.
ⵖ ⵜⵙⵓⵎⵔⵉⵏ ⵏ ⵉⵙⵍⴳⵏⵏ, ⵉⵙⵓⵜⴳ ⵓⵏⵙⵙⵉⵅⴼ ⴷ ⵓⵙⵉⵔⴰ ⵏ ⵓⵙⵇⵇⵉⵎ ⴰⵎⵢⴰⵡⴰⵙ ⵉⵥⵉⵍⵏ ⵍⵍⵉ ⴷ ⵜⵎⵍⴰ ⵜⵏⴱⴰⴹⵜ ⴼ ⴽⵉⴳⴰⵏ ⵏ ⵜⵙⵓⵎⵔⵉⵏ, ⵙⵍⴰⵡⴰⵏ ⴰⴽⴽⵯ ⵜⴰⵡⵓⵔⵉ ⵉⵣⵣⵉⴳⵣⵏ ⵏ ⵎⴰⵙⵙ ⴰⵎⴰⵡⵙⴰⵙ ⵏ ⵓⵡⴰⵏⴽ ⵉⵜⵜⵓⵙⵎⴰⴳⴰⵍⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵣⴷⴰⵢⵉⵏ ⴷ ⵓⴱⵕⵍⴰⵎⴰⵏ.
ⵖ ⵓⵎⵢⴰⵡⴰⵙ ⴰⴷ, ⵜⵏⵢⴰⵍⴰⴽⵎ ⵜⵏⴱⴰⴹⵜ ⴷ ⵙⵎⵎⵓⵙ ⴷ ⵎⵔⴰⵡ ⵏ ⵜⵙⵓⵎⵔⵜ ⵍⵍⵉ ⵙⵎⵏⵉⴷⵏⵜ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⵖ ⵉⵍⵍⴰ ⵓⵙⵍⴳⵏ ⵏ ⵜⵡⵓⵔⵉ ⴷ ⵓⵙⵍⴳⵏ ⴰⵏⴱⴽⴰⴹ ⴷ ⵜⴱⵔⵉⴷⵜ ⵜⴰⵏⴱⴽⴰⴹⵜ ⴷ ⵉⵣⵔⴼⴰⵏ ⵉⴳⴰⵎⴰⵏⵏ ⴷ ⵓⵙⴽⵔ ⵏ ⵜⵙⵎⵓⵏⴰⵢ ⵏ ⵜⵎⵙⵙⵓⵔⵉⵏ ⴳⴰⵏⵉⵏ ⵜⵉⵏ ⵜⵎⴰⵙⴰⵢⴰⵜ ⵉⵃⵓⴷⴷⴰⵏ ⴷ ⵓⵙⵡⵓⴷⴷⵓ ⵏ ⵡⴰⵔⵔⴰⵣⵏ, ⴷ ⵜⵙⵓⵎⵔⵜ ⵏ ⵓⵙⵍⴳⵏ ⴰⵙⴰⵜⵉ ⴼ ⵓⵏⵣⵡⵉ.
ⵉⴱⴷⴷ ⵓⵏⵙⵙⵉⵅⴼ ⴷ ⵓⵙⵉⵔⴰ ⵏ ⵓⵙⵇⵇⵉⵎ ⴼ ⵜⵓⵎⴰⵢⵉⵏ ⵏ ⵜⵙⵓⵎⵔⵉⵏ ⴰⴷ ⵍⵍⵉ ⵔⴰⴷ ⵢⴰⵡⵙ ⵖ ⵓⵙⵎⵖⵔ ⵏ ⵓⵙⵍⴳⵏ ⵙ ⵎⴰⴷ ⵉⵥⵍⵉⵏ ⴷ ⵜⵓⵎⴰⵏⵉⵏ ⵜⵉⵏⴰⵎⵓⵏⵉⵏ ⵣⴷⵉⵏⵉⵏ ⴷ ⵓⵙⵍⴳⵏ ⴰⵏⴱⴽⴰⴹ ⴷ ⵜⴷⵎⵙⴰⵏⵉⵏ ⴷ ⵜⵣⵔⴼⴰⵏⵉⵏ ⴷ ⵜⵡⵏⴹⴰⵏⵉⵏ, ⵉⴼⴼⵖ ⵓⵙⵉⵔⴰ ⴰⴷ ⵢⵉⵍⵉ ⵓⵙⵏⵖⵎⵙ ⵏ ⵜⵙⵇⵇⵉⵎⵉⵏ ⵜⵉⵎⵏⵜⴰⵢⵉⵏ ⵃⵎⴰ ⴰⴷ ⵢⵉⵍⵉ ⵓⵙⵖⵉⵡⵙ ⵏⵏⵙⵏⵜ ⴷ ⵓⵙⵎⴰⴷ ⵏ ⵜⴱⵔⵉⴷⵜ ⵏⵏⵙⵏⵜ.
ⵉⵎⴷⴰⵡⴰⵍ ⵓⵙⵉⵔⴰ ⵏ ⵓⵙⵇⵇⵉⵎ ⵓⵍⴰ ⴼ ⵜⵙⵎⵉⴳⴰⵍ ⵏ ⵓⵙⴰⴳⴳⵯ, ⵉⵎⵛⴰⵛⴽⴰ ⴷ ⴼ ⵜⵓⵜⵔⴰ ⵢⴰⴹⵏⵉⵏ ⴼ ⵜⵏⵎⴰⵇⵇⴰⵙⵉⵏ ⵍⵍⵉ ⵜⴱⵔⵎ ⵜⵎⴰⵡⴰⵙⵜ ⵏ ⵜⴷⵓⵙⵉ ⵖ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⴰⵢⵍⵍⵉ ⴼ ⴷ ⵢⴰⴷ ⵉⵎⵛⴰⵛⴽⴰ ⵓⵙⵉⵔⴰ ⵖ ⵎⴰⴷ ⵉⵣⵔⵉⵏ.