ⴰⵙⵉⵔⴰ(2016-2021):
ⴰⵙⵉⵡⴹ ⵏ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ, ⴰⵢⵏⴰⵙ 18 ⵉⵏⵏⴰⵢⵔ 2021
ⵉⵙⵏⵎⵎⴰⵍⴰ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⵏⵏⵙ ⵜⴰⵏⵎⵍⴰⵙⵙⵜ ⵍⵍⵉ ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ, ⴰⵢⵏⴰⵙ 18 ⵉⵏⵏⴰⵢⵔ 2021, ⵜⵥⵍⵉ ⵉ ⵜⵡⵓⵔⵉ ⵏ ⵜⵉⴹⴰⴼ ⴷ ⵓⵣⵣⵔⴰⴼ.
ⵖ ⵜⵉⴹⴰⴼ, ⵉⵙⵔⵙ ⵓⵙⵉⵔⴰ ⴰⵖⴰⵡⴰⵙ ⵏ ⵜⵡⵓⵔⵉ ⵏ ⵜⵖⵉⵎⵉⵜ ⵏ ⵉⵙⵇⵙⵉⵜⵏ ⵉⵎⵉⵡⴰⵏⵏ ⴼ ⵜⵙⵔⵜⵉⵜ ⵜⴰⵎⴰⵜⴰⵢⵜ ⵍⵍⵉ ⴼ ⵔⴰⴷ ⵉⵔⴰⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵖ: “ⵜⴰⵙⵔⵜⵉⵜ ⵜⵓⵏⴱⵉⴹⵜ ⵏ ⵓⵙⵏⴰⵍ ⵏ ⵓⵢⴰⴼⵓ ⴰⵏⴰⵎⵓⵔ”, ⴰⵢⵏⴰⵙ 1 ⴱⵕⴰⵢⵕ 2021.
ⵖ ⵜⵙⵎⵉⴳⴰⵍ ⵏ ⵓⵙⴰⴳⴳⵯ, ⵙ ⵓⵙⵡⵓⵔⵉ ⵙ ⵓⵎⵏⵏⵉ 109 ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ, ⵉⴼⴼⵖ ⵓⵙⵉⵔⴰ ⴰⴷ ⵢⵉⵍⵉ ⴰⵙⵎⵏⵉⴷ ⵏ ⵉⵏⵇⵇⵉⵙⵏ ⴼ ⵜⵙⵇⵓⵏⵙⵓⵜⵉⵏ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵓⵙⵓⵔⵙ ⵏ ⴽⵔⴰ ⵏ ⵉⵖⵣⵓⵜⵏ ⴳ ⵜⴳⵍⴷⵉⵜ ⵖ ⵜⵖⵉⵎⵉⵜⵉⵏ ⵜⵉⵎⴰⵜⴰⵢⵉⵏ ⵉ ⵓⵙⵎⵏⵉⴷ ⴷ ⵓⵎⴹⴰⴽⴰⵕ. ⵙ ⵓⵙⴽⵔ ⵙ ⵓⵎⵏⵏⵉ 125 ⴳ ⵓⵏⴳⵔⴰⵡ ⴰⴳⵯⵏⵙⴰⵏ, ⵔⴰⴷ ⵉⵜⵜⵓⵙⵎⵏⵉⴷ ⵓⵏⵇⵇⵉⵙ ⵏ ⵓⵏⴳⵔⴰⵡ ⴰⴷⵓⵙⴰⵏ ⵍⵍⵉ ⵜⵙⵓⵊⴰⴷ ⵜⵔⴰⴱⴱⵓⵜ ⵏ ⵜⵡⵓⵔⵉ ⵜⴰⵙⴳⵓⵎⴰⵏⵜ.
ⵙ ⵓⵎⵏⵏⵉ 296 ⴳ ⵓⵏⴳⵔⴰⵡ ⴰⴳⵯⵏⵙⴰⵏ, ⵔⴰⴷ ⵉⵜⵜⵓⵙⵎⵏⵉⴷ ⵓⵏⵇⵇⵉⵙ ⵏ ⵜⵔⴰⴱⴱⵓⵜ ⵏ ⵜⵉⴹⴰⴼ ⵏ ⵜⴷⵔⵉⵎⵜ ⵜⴰⵎⴰⵜⴰⵢⵜ ⴼ ⵓⴼⵏⵉⵇ ⵏ ⵓⵙⵓⵔⵙ ⴷ ⵓⵙⵡⵓⴷⴷⵓ, ⵖ ⵜⵖⵉⵎⵉⵜⵉⵏ ⵏ 2 ⴷ 9 ⴱⵕⴰⵢⵕ 2021.
ⵉⴱⴷⴷ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⴼ ⵡⴰⵜⵉⴳ ⵏ ⴰⵣⵣⵓⵍⴰⵏ ⵏ ⵉⵏⵇⵇⵉⵙⵏ ⵜⵜⵓⵙⴽⴰⵔⵏⵉⵏ ⵖ ⵉⵎⵏⵉⴷⵏ ⵏ ⵜⵖⵔⵉ ⴷ ⵓⵙⵎⵓⵏ ⵏ ⵓⵎⵍⴰⵏ ⴷ ⵉⵙⵖⵍⴰⴼ, ⵙⴷⴷⵉⴷⵏ ⴼ ⵓⵛⵛⵉⵍ ⵏ ⵓⵏⵢⴰⵍⴽⴰⵎ ⵏ ⵜⵏⴱⴰⴹⵜ ⴷ ⵜⵢⴰⴼⵓⵜ ⵏⵏⵙⵏ.
ⵖ ⵜⵉⵍⴰⵍⵜ ⵏ ⵓⵙⵇⵇⵉⵎ ⴼ ⵜⵙⵎⵉⴳⴰⵍ ⵏ ⵓⵙⴰⴳⴳⵯ, ⵉⴱⴷⴷ ⵓⵙⵉⵔⴰ ⵏ ⵓⵙⵇⵇⵉⵎ ⴼ ⵜⵡⵓⵔⵉ ⵏⵏⵙⵏⵜ ⵉⴳⴳⵓⵜⵏ ⴷ ⵓⵙⵡⵓⵔⵉ ⴼ ⵉⵎⵔⵙⵉⵡⵏ ⵙⵜⴰⵡⵀⵎⵎⴰⵏⵉⵏ, ⵜⵙⵡⵓⵔⵉ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴼ ⵜⴰⵙⵙⴰⵙⵜ ⵏ ⵜⴰⵣⵣⴰⵏⵉⵏ ⴷ ⵜⵎⵖⴰⵔⵉⵏ ⵉⵎⵖⵔⵉⴱⵉⵢⵏ ⵍⵍⵉ ⵏⵏ ⵜⵜⵓⴱⴱⴰⵢⵏⵉⵏ ⴳ ⵙⵓⵔⵉⵢⴰ ⴷ ⵍⵄⵉⵕⴰⵇ, ⵜⵙⴽⵔ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵏⵜ ⵜⴰⵙⵎⵉⴳⵍⵜ ⵏ ⵓⵙⴰⴳⴳⵯ ⴼ ⵜⵎⵔⵙⴰⵍ ⵏ ⵓⵙⴼⵍⵙ ⴷ ⵜⵉⴷ ⵜⵏⵜ ⵔⵡⴰⵙⵏⵉⵏ, ⵜⵉⵍⵉ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⴼ ⵜⵎⵔⵙⴰⵍ ⵏ ⵓⴼⵔⴰⴳ ⴰⵏⴰⵎⵓⵏ ⴷ ⴽⵔⴰ ⵏ ⵉⵙⴳⵏⴰⴼⵏ ⴷ ⵡⴰⵎⵎⴰⵙⵏ ⵏ ⵉⴷⴰⵎⵎⵏ ⴷ ⵜⵎⵀⵍⴰ ⵏ ⵉⵙⴰⴼⴰⵔⵏ ⴷ ⵜⵏⵎⴰⵇⵇⴰⵙⵉⵏ ⵏ ⵜⵎⴰⵡⴰⵙⵜ ⵏ ⵜⴷⵓⵙⵉ ⴳ ⵓⵙⴱⴷⴷⵉ ⵏ ⵜⵎⴰⵣⵉⵔⵜ ⵏⵏⵖ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⴷ ⵓⵙⵡⵓⵔⵉ ⵏ ⵜⵙⵇⵇⵉⵎⵜ ⵏ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⴼ ⵓⵙⵓⵔⵙ ⵏ ⵓⵙⵉⵔⴰ ⴰⵏⴰⵎⵓⵔ ⵏ ⵜⵉⴼⴰⵡⵜ ⴷ ⵡⴰⵎⴰⵏ ⵏ ⵜⵉⵙⵙⵉ.
ⵉⵏⵏⴰ ⵓⵙⵉⵔⴰ ⵏ ⵓⵙⵇⵇⵉⵎ ⵎⴰⵙ ⴷ ⵉⵇⵇⴰⵏ ⴰⴷ ⵜⵜⵓⴼⴽⵉ ⵉ ⵡⴰⵏⴰⵡ ⴰⴷ ⵏ ⵜⵉⴹⴰⴼ ⵜⵉⴼⴰⴷⵉⵡⵏ ⵏ ⵓⵎⵓⵔⵙ ⴷ ⵜⵉⵕⵡⵉ, ⵉⵙⴽⴽⵜⵉ ⴷ ⵜⵓⵎⴰⵢⵉⵏ ⵏ ⵓⵙⵍⴳⵏ ⴷ ⵓⵙⴰⵜⵉ ⴰⵙⵖⵓⵍⴰⵏ ⵍⵍⵉ ⵉⴳⴰⵏ ⴰⵙⵍⴳⵏ ⴰⴳⵯⵏⵙⴰⵏ ⵍⵍⵉⴰ ⴷ ⵉⵙⴽⵔ ⵓⵙⵉⵔⴰ ⵏ ⵓⵙⵇⵇⵉⵎ ⴳ ⵓⵎⵏⵉⴷ ⴰⴷ.
ⵖ ⵓⵣⵣⵔⴰⴼ, ⵉⵙⵙⴽⵜⵉ ⴷ ⵓⵙⵉⵔⴰ ⵏ ⵓⵙⵇⵇⵉⵎ ⵜⴰⵢⴰⴼⵓⵜ ⵏ ⵜⵡⵓⵔⵉ ⵏ ⵜⵙⵓⵜⵍⵜ ⴰⴷ ⴰⵔ ⴰⵢⵏⴰⵙ 18 ⵉⵏⵏⴰⵢⵔ, ⴳ ⵉⵍⵍⴰ 26 ⵏ ⵓⴹⵕⵉⵚ ⴳⵉⵙⵏ 4 ⵜⵙⵓⵎⵔⵉⵏ ⵍⵍⵉ ⵉⵙⵖⵣⵏ ⵓⵙⵉⵔⴰ ⵖ ⵜⵙⵓⵜⵍⵜ ⴰⴷ, ⵉⵙⴷⴷⵉⴷ ⴼ ⵓⵛⵛⵉⵍ ⵏ ⵓⵙⵖⵡⵏ ⵙ ⵡⴰⴽⵓⴷ ⴰⵢⵢⵓⵔⴰⵏ ⵉⵥⵍⵉⵏ ⵉ ⵜⵙⵓⵎⵔⵉⵏ ⴰⴷ, ⴷ ⵓⵛⵛⵉⵍ ⵏ ⵓⵙⵖⵉⵡⵙ ⵏ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⵍⵍⵉ ⵜⵜⵓⵚⵕⴰⴼⵏⵉⵏ ⵉ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⴳ ⵜⵙⵓⵜⵍⵜ ⴰⴷ.