ⴰⵙⵉⵔⴰ(2016-2021):
ⴰⵙⵉⵡⴹ ⵏ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 16 ⵢⵓⵏⵢⵓ 2020
ⵉⵙⵏⵎⴰⵍⴰ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⵏⵏⵙ ⵜⴰⵏⵎⵍⴰⵙⵙⵜ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ, ⴰⵙⵙ ⵏ ⵓⵙⵉⵏⴰⵙ 16 ⵢⵓⵏⵢⵓ 2020, ⵉⵥⵍⵉ ⵉⵎⵔⵙⵉ ⵏⵏⵙ ⵉ ⵜⵉⴹⴰⴼ ⴷ ⵓⵣⵣⵔⴰⴼ ⴷ ⵓⵙⵏⵎⴰⵍⴰ ⵏ ⵜⵡⵓⵔⵉⵡⵉⵏ ⵏ ⵓⵙⵇⵇⵉⵎ.
ⵖ ⵜⵣⵡⵉⵔⵉ ⵏ ⵜⵙⵎⵓⵏⵉ, ⵢⵓⵣⵏ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⵉⵙⵔⵖⴷⵏ ⴷ ⵉⵙⵉⵜⴰⵎ ⴱⴰⵀⵔⴰ ⴼⵓⵍⴽⵉⵏⵉⵏ ⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ, ⵖⵎⴽ ⴰⵏⵏ ⵓⵍⴰ ⵉ ⵓⵎⴰⴷⴰⵏ ⴰⵎⵖⵔⵉⴱⵉ ⵙ ⵜⵎⵍⴷⴰ ⵏ ⵓⵎⵓⵔⵙ ⵏ ⵓⴼⵍⴰⵢ ⵍⵍⵉ ⵉⵙⴽⵔ ⵓⴳⵍⵍⵉⴷ ⵉⵄⵣⵣⴰⵏ, ⵙⴰⵡⵍⵏ ⴼ ⵜⵓⵎⵔⵜ ⵏⵏⵙⵏ ⵉⴳⴳⵓⵜⵏ, ⵜⵜⵔⵏ ⵉ ⵕⴱⴱⵉ ⴰⴷ ⵉⵃⴼⴹ ⴰⴳⵍⵍⵉⴷ ⵉⴷⵓⵎ ⴼⵍⵍⴰⵙ ⵜⴰⴷⵓⵙⵉ.
ⵙ ⵜⵎⵍⴷⴰ ⴰⴷ, ⵙⴽⴽⵯⵜⵉⵏ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⵜⴰⵡⴰⴷⴰ ⵜⴰⴳⵍⴷⴰⵏⵜ ⵜⴰⵎⵔⵏⵓⵜ ⵖ ⵉⵍⵍⴰ ⵉⵎⴰⵏ ⵏ ⵜⴼⵍⵙⴰⵢⵉⵜ ⵉ ⵓⵎⴰⴷⴰⵏ ⵏⵏⵙ ⴰⵏⴰⵖⵍⴰⴼ, ⴷ ⵜⵡⵓⵔⵉⵡⵉⵏ ⵣⵣⵉⴳⵣⵏⵉⵏ ⵍⵍⵉ ⵉⵙⴽⴰⵔ ⴱⴰⴱ ⵏ ⵡⴰⴷⴷⵓⵔ ⵖ ⴽⵓ ⵉⴳⵔⴰⵏ ⵏ ⵓⵚⴽⴰⵡ ⴰⵏⴰⵎⵓⵔ.
ⵖ ⵓⵎⵏⵉⴷ ⵏ ⵓⵎⵏⴰⴹ ⴰⴼⵔⵉⵇⵉ ⴷ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵉⵙⵓⵜⴳ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⵉⵎⴰⵏ ⵉⵥⵉⵍⵏ ⵏ ⵜⵡⵉⵣⵉ ⵉⵍⵍⴰⵏ ⵖ ⵜⵙⵏⵜⴰⵢⵜ ⵜⴰⴳⵍⴷⴰⵏⵜ ⵎⵏⵉⴷ ⵏ ⵉⵡⴰⵏⴽⵏ ⵉⴼⵔⵉⵇⵉⵢⵏ ⴷ ⵜⵓⴳⴳⴰⵙ ⵥⵉⵍⵏⵉⵏ ⵎⵏⵉⴷ ⵏ ⵜⵓⵡⵊⴰ ⴰⴷ ⵖ ⵉⵍⵍⴰ ⵍⵎⵖⵔⵉⴱ, ⵢⵉⵔⵉ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ, ⴰⴷ ⵢⵉⵍⵉ ⵓⵙⴷⵓⵙ ⵏ ⵜⵡⵉⵙⵉ ⴷ ⵉⵡⴰⵏⴽⵏ ⴰⵢⵜⵎⴰⵜⵏ, ⴷ ⵓⴷⵔⴰⵡ ⵏ ⵓⵥⴰⵥⵓⵢ ⵏ ⵓⴱⴰⵢⵢⵓⵕ, ⴷ ⵓⵙⴽⵔ ⵏ ⵓⵎⵏⴰⴹ ⵏ ⵜⵡⵉⵙⵉ ⵉⵙⵎⵓⵏⵏ ⵜⵓⴳⴳⴰⵙ ⵉ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ.
ⵉⵙⴰⵡⵍ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⴼ ⵓⵙⵓⵜⴳ ⵏ ⵎⴰ ⴷ ⵜⵙⴽⴰⵔ ⵜⵎⵙⵙⵏⵜⵉⵜ ⵜⴰⵎⵖⵔⵉⴱⵉⵜ ⴷ ⵓⴼⵓⵙ ⴰⵎⵖⵔⵉⴱⵉ ⵏ ⵜⵡⵓⵔⵉ ⵏ ⵜⵎⵙⴽⴰⵔ ⵖ ⵢⴰⵏ ⵓⵣⵎⵣ ⵙⵇⵇⵉⵇⵏ ⵙ ⵓⵎⵙⴰⵙⴰ ⴷ ⵉⵙⵓⵖⴰⵍ ⵏ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵏ ⵜⴷⵓⵙⵉ, ⵜⵙⵙⴷⵓⵙ ⵙ ⵖⵎⴽ ⴰⵏⵏ ⵉⵎⴰⵏ ⴰⵏⴰⵎⵓⵔ ⴰⵎⵖⵔⵉⴱⵉ ⴷ ⵜⵓⴼⵔⴰⵢⵉⵏ ⵏ ⵜⴰⵢⵔⵉ ⴷ ⵜⵎⵎⵏⵡⴰⵍⵜ ⵉ ⵜⵎⵓⵔⵜ ⴰⴷ.
ⵖ ⵎⴰ ⴷ ⵉⵥⵍⵉⵏ ⵙ ⵜⵉⴹⴰⴼ, ⵉⵙⵔⵙ ⵓⵙⵉⵔⴰ ⵏ ⵓⵙⵇⵇⵉⵎ ⴰⵖⴰⵡⴰⵙ ⵏ ⵜⵡⵓⵔⵉ ⵏ ⵜⵖⵉⵎⵉⵜ ⵜⴰⵏⵎⵍⴰⵙⵙⵜ ⵍⵍⵉ ⵔⴰⴷ ⵢⵉⵍⵉ ⴼ ⵉⴳⵔⴰⵏ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵜⴷⵓⵙⵉ ⴷ ⵜⵥⴹⴰⵕⵜ ⴷ ⵉⵣⵓⵖⴰⵣ ⵙ ⵉⵙⵇⵙⵉⵜⵏ ⵉⴹⴼⵕ ⵓⵎⴹⴰⴽⴰⵕ. ⵙ ⵓⵣⵎⵣⵣⵓ, ⵉⵍⵍⴰ ⵓⵙⵓⵜⴳ ⵏ ⵜⵎⵢⴰⴷⴰⵙⵜ ⵏ ⵜⵡⵓⵔⵉ ⵍⵍⵉ ⵉⵙⵎⵖⵔⵏ ⴰⵎⴰⴹⴰⴽⴰⵕ ⴼ ⵢⴰⵏ ⵉⵎⵔⵙⵉ ⵃⵎⴰ ⴰⴷ ⵜⵉⵍⵉ ⵜⵓⵙⵙⵏⴰ ⵏⵏⵙ ⴰⴽⴽⵯ.
ⵖ ⵢⵉⴳⵔ ⵏ ⵓⵣⵣⵔⴰⴼ, ⵙⴽⵔⵏⵜ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⵏⵜⴰⵢⵉⵏ ⴳⴳⵓⵜⵏⵉⵏ ⴼ ⵢⵉⴳⵔ ⴰⴷⵓⵙⴰⵏ ⵙ ⵜⵙⵓⵎⵔⵜ ⵏ ⵓⵙⵍⴳⵏ ⵉⵣⴷⵉⵏ ⴷ ⵓⵙⵔⵙ ⵏ ⵓⵙⵇⵇⵉⵎ ⴰⵏⴰⵎⵓⵔ ⴰⵎⵛⴰⵡⴰⵕ ⵏ ⵜⴷⵓⵙⵉ ⵍⵍⵉ ⵢⵓⵣⵏ ⵓⵙⵉⵔⴰ ⵉ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ, ⵖⵎⴽ ⵍⵍⵉ ⵍⵍⴰⵏⵜ ⵜⵙⵓⵎⵔⵉⵏ ⴼ ⵜⵙⵏⵜⴰⵢⵉⵏ ⵢⴰⴹⵏⵉⵏ, ⵜⴰⵎⵣⵡⴰⵔⵓⵜ ⵜⵣⴷⵉ ⴷ ⵜⵓⵙⵙⵔⴰ ⵏ ⵜⴼⴳⵓⵔⵉⵏ ⵚⴰⵃⴰⵏⵉⵏ ⵉ ⵜⵎⵏⴰⴹⵉⵏ ⴷ ⵜⵎⵏⴱⴰⴹⵉⵏ ⴷ ⵜⵙⴳⵉⵡⵉⵏ ⴷ ⵜⴳⵔⴰⵡⵉⵏ, ⵜⵉⵙ ⵙⵏⴰⵜ ⵜⵣⴷⵉ ⴷ ⵉⵔⴳⴰⵢⵏ ⵏ ⵜⴳⵔⴰⵡⵉⵏ ⵜⵉⴷⵖⴰⵔⴰⵏⵉⵏ, ⵜⵉⵙ ⴽⵕⴰⴹⵜ ⵜⵣⴷⵉ ⴷ ⵓⵏⴰⴳⵔⴰⵡ ⵏ ⵉⵔⴳⴰⵢⵏ ⵚⴰⵃⴰⵏⵉⵏ ⵉ ⵜⴳⵔⴰⵡⵉⵏ ⵜⵉⴷⵖⴰⵔⴰⵏⵉⵏ ⴷ ⵜⵓⵚⴽⵉⵡⵉⵏ ⵏⵏⵙⵏⵜ, ⵉⵍⵍⴰ ⵓⵚⵕⵓⴼ ⵏⵏⵙⵏⵜ ⵉ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ.
ⵖ ⵉⵙⵏⴼⴰⵔⵏ ⵓⵏⴱⵉⴹⵏ, ⵉⵥⵕⴰ ⵓⵙⵉⵔⴰ ⵢⴰⵣⵏ ⵉ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵙⵢⴰⴼⵓⵜⵏ ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 63.18 ⵉ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⴹⴰⵀⵉⵕ ⵛⵛⴰⵔⵉⴼ ⵉⴳⴰⵏ ⴰⵙⵍⴳⵏ ⵉⵥⵍⵉⵏ ⴷ ⵜⵉⴽⴽⵉ ⵉ ⴽⵔⴰ ⵏ ⵉⴼⵍⵍⴰⵃⵏ ⵏ ⵉⴽⴰⵍⵉⵡⵏ ⵉⵏⴼⵍⴰⵃⵏ ⵏⵖ ⴳⴰⵏ ⵉ ⵜⴼⵍⵍⴰⵃⵜ ⵉⵍⵉⵏ ⵖ ⵍⵎⵍⴽ ⵓⵙⵍⵉⴳ ⵏ ⵓⵡⴰⵏⴽ.
ⵖ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵉⵜⵜⵓⵙⵏⴼⴰⵍⵏ, ⵉⵣⵣⵉⴳⵣ ⵓⵙⵉⵔⴰ ⵖ ⵓⵎⴹⴰⴽⴰⵕ ⵏ ⴽⵓ ⵜⵎⵙⵉⵔⵉⵏ ⴷ ⵜⵎⵙⴽⴰⵔ ⵏ ⵜⴱⵔⵉⴷⵜ ⵍⵍⵉ ⵙⵔⵙ ⵉⵥⵍⵉⵏ, ⵙ ⵢⴰⵜ ⵜⵎⵢⴰⴷⴰⵙⵜ ⵜⴰⵎⴰⴷⵔⴰⵡⵜ ⴷ ⴽⵓ ⵜⵉⵙⴳⵉⵡⵉⵏ ⵜⵉⵎⵏⵜⴰⵢⵉⵏ, ⵖⵎⴽ ⵍⵍⵉ ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵙⴰⵜⵉ ⴰⵣⵔⴼⴰⵏ ⴷ ⵓⵣⵣⵔⴰⴼ ⴷ ⵓⴱⵔⵉⴷ ⴰⵎⵣⵔⴰⵢ ⵏ ⴽⵔⴰ ⵏ ⵡⴰⴷⴷⴰⴷⵏ ⵍⵍⵉ ⵜ ⵉⵔⵡⴰⵙⵏ ⵖ ⵜⵓⴷⵔⵜ ⵜⴰⴱⵕⵍⴰⵎⴰⵏⵉⵜ ⵙ ⵓⵎⴰⵜⴰ. ⵉⵍⵍⴰ ⵓⵎⵙⴰⵙⴰ ⴼ ⵓⵛⵛⵉⵍ ⵏ ⵜⵉⵍⵉⵜ ⵏ ⵢⴰⵏ ⵓⵎⵛⴰⵛⴽⴰ ⴰⵎⴳⵔⴰⵡ ⵃⵎⴰ ⴰⴷ ⵢⵉⵍⵉ ⵓⵎⵓⵔⵙ ⵏ ⵓⵙⵔⵙ ⴰⴷ ⴰⵣⵣⵔⴰⴼ ⵍⵍⵉ ⴷ ⵉⵎⵎⴰⴳⴳⴰⵔⵏ ⴷ ⵢⴰⵜ ⵜⵉⵣⵉ ⴱⴰⵀⵔⴰ ⵉⵥⵍⵉⵏ.
ⵉⴳⴰ ⵓⵣⵣⵔⴰⵢ ⵏ ⵜⵡⵓⵔⵉ ⵏ ⵓⵣⵣⵔⴰⴼ ⴷ ⵜⵉⵏ ⵜⵉⴹⴰⴼ ⵏ ⵜⵎⵔⵙⵍⵜ ⵢⴰⵏ ⵓⵣⵎⵣⵣⵓ ⴰⴷ ⵉⵍⵉⵏⵜ ⵜⵎⵙⵉⵔⵉⵏ ⴼ ⵜⴼⵔⴽⴰ ⴰⴷ ⴷ ⵉⴷⵔⵉⵣⵏ ⵏⵏⵙ ⴼ ⴽⵉⴳⴰⵏ ⵏ ⵉⵙⵍⴳⵏⵏ ⵉⵎⴰⴷⴷⴰⵙⵏ ⴷ ⵉⵙⵍⴳⵏⵏ ⵢⴰⴹⵏⵉⵏ, ⵖⵎⴽ ⴰⵏⵏ ⴷ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵍⵍⵉ ⵉⴳⴰⵏ ⵜⴰⵙⴰⵡⵔⵜ ⴼ ⵉⵙⴷⴷⵉⴷ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⴰⴷ ⵢⵉⵍⵉ ⵓⵙⵡⵓⵔⵉ ⵏⵏⵙ ⵖ ⵜⵉⵣⵉ ⵉⴷⵔⵓⵙⵏ ⴷ ⵢⵓⵛⴽⴰⵏ ⵖ ⵜⵡⵓⵔⵉ ⵏ ⵓⵙⵇⵇⵉⵎ.
ⵖ ⵢⵉⴳⵔ ⵏ ⵓⵎⵢⴰⵡⴰⵙ ⴷ ⵜⵎⵔⵙⴰⵍ ⴷ ⵡⴰⵎⵎⴰⵙⵏ ⵏ ⵓⵔⵣⵣⵓ ⴷ ⵓⵏⵜⴰⵎ, ⵉⴼⴼⵓⵖ ⵓⵙⵉⵔⴰ ⵏ ⵓⵙⵇⵇⵉⵎ ⴰⴷ ⵜⵉⵍⵉ ⵜⵎⵢⴰⵇⵇⴰⵏⵜ ⴷ ⵜⵙⵎⵉⵔⵉⵜ ⵜⴰⵎⴰⵜⵜⵓⵢⵜ ⵏ ⵓⵙⵖⵉⵡⵙ ⴷ ⵡⴰⵎⵎⴰⵙ ⴰⵏⴰⵎⵓⵔ ⵏ ⵓⵏⵜⴰⵎ ⵍⵍⵉ ⴰⵙ ⵉⴹⴼⵕⵏ, ⵃⵎⴰ ⴰⴷ ⵢⵉⵍⵉ ⵓⵃⵟⵟⵓ ⵏ ⵜⵎⴽⵯⵜⵉⵜ ⵜⴰⴱⵕⵍⴰⵎⴰⵏⵉⵜ, ⵢⵉⵍⵉ ⵓⴽⵛⵎ ⵏ ⵓⴳⴷⵓⴷ ⵙ ⵓⵎⵍⴰⵏ, ⵉⵍⵉⵏ ⵡⴰⵔⵔⴰⵜⵏ ⵉⵍⵉⴽⵟⵕⵓⵏⵉⵢⵏ ⵍⵍⵉ ⴷ ⵉⵙⵙⴼⵓⵖ ⵓⵙⵇⵇⵉⵎ ⵏ ⵉⵎⵓⵔⴰ ⴷⴰⵔ ⵡⴰⵎⵎⴰⵙ ⴰⴷ.