ⴰⵙⵉⵔⴰ(2016-2021):
ⴰⵙⵉⵡⴹ ⵏ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 13 ⴽⵟⵓⴱⵕ 2020
|
ⵉⵙⴳⵓⵎⵏ ⵏ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ, ⴰⵙⵉⵏⴰⵙ 13 ⴽⵟⵓⴱⵕ 2020 - ⵉⵏⴰⵡ ⴰⴳⵍⴷⴰⵏ ⴰⵎⴰⵜⵜⵓⵢ ⴷ ⵜⴱⵔⴰⵜⵉⵏ ⵏⵏⵙ ⴷ ⵡⴰⵎⵎⴰⴽⵏ ⵏⵏⵙ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ; - ⴰⵣⵣⵔⴰⴼ ⴷ ⵜⵉⴹⴰⴼ ⵉ ⵉⵙⵉⴳⴳⵉⵍ ⵏ ⵓⵣⵎⵣ; - ⴰⵎⵓⴽⵏ ⵏ ⵢⵉⴳⵔ ⴰⵎⴰⵜⴰⵢ ⴷ ⵜⵉⵍⴰⵍⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ. |
ⵉⵙⵏⵎⴰⵍⴰ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⵏⵏⵙ ⵜⴰⵏⵎⵍⴰⵙⵙⵜ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵥⵍⵉ ⵓⵖⴰⵡⴰⵙ ⵏⵏⵙ ⵉ ⵜⵡⵓⵔⵉ ⵏ ⵓⵙⵇⵇⵉⵎ ⴷ ⵉⵎⵏⴰⴷⵏ ⵏ ⵜⵡⵓⵔⵉ ⵏⵏⵙ.
ⵖ ⵜⵣⵡⵉⵔⵉ, ⵉⵙⵙⴽⵜⵉ ⴷ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⵜⵓⵎⴰⵢⵉⵏ ⵏ ⵉⵏⴰⵡ ⴰⴳⵍⴷⴰⵏ ⴰⵎⴰⵜⵜⵓⵢ ⵙ ⵜⵎⵍⴷⴰ ⵏ ⵓⵏⵏⵓⵕⵥⵎ ⵏ ⵜⵙⵓⵜⵍⵜ ⵜⴰⵣⵣⵔⴰⴼⵜ, ⵉⵏⵉⵏ ⴰⵙⵓⵜⴳ ⵏⵏⵙⵏ ⴷ ⵓⵙⵎⵖⵔ ⵏⵏⵙⵏ ⵉ ⵉⵙⵡⵓⴷⴷⵓⵜⵏ ⴷ ⵜⵎⵙⴽⴰⵔ ⵏ ⵡⴰⵔⴰⵢ ⵍⵍⵉ ⵉⵙⵔⵙ ⴱⴰⴱ ⵏ ⵡⴰⴷⴷⵓⵔ ⵉ ⵓⵏⵏⵓⵕⵥⵎ ⵏ ⵜⵙⵓⵜⵍⵜ ⴰⴷ, ⵖⵎⴽ ⵍⵍⵉ ⵙⵓⵜⴳⵏ ⴰⴷⵖⴰⵔ ⵍⵍⵉ ⵢⴰⴽⴽⴰ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵃⴼⴹ ⵕⴱⴱⵉ ⵉ ⵜⵎⵔⵙⵍⵜ ⵜⴰⵣⵣⵔⴰⴼⵜ ⵖ ⵓⴹⴼⵕ ⵏ ⵉⵙⴰⵡⵓⵔⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⵏ ⵜⴰⵔⵡⴰ ⵏ ⵓⵎⴰⴷⴰⵏ ⴰⵎⵖⵔⵉⴱⵉ ⵉⴳⴰⵏ ⴰⴱⵍⴰⵍ.
ⵖ ⵓⵙⵙⴽⵜⵉ ⵏ ⵜⴱⵔⴰⵜⵉⵏ ⴰⴷ ⵙⵜⵡⴰⵀⵎⵎⴰⵏⵉⵏ, ⵉⵙⴷⴷⵉⴷ ⵓⵏⵙⵙⵉⵅⴼ ⴷ ⵓⵙⵉⵔⴰ ⵏ ⵓⵙⵇⵇⵉⵎ ⴼ ⵜⵎⴰⵙⴰⵢⵜ ⵜⴰⵅⴰⵜⴰⵔⵜ ⵏ ⵓⵙⵎⵓⵔⵙ ⵏⵏⵙ ⵙ ⵉⵎⴰⵙⵙⵏ ⵉⴷⵙⵜⴰⵔⵏ ⵍⵍⴰⵏⵉⵏ ⵖ ⵉⴳⵔⴰⵏ ⵏ ⵜⵉⴹⴰⴼ ⴷ ⵓⵣⵣⵔⴰⴼ ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵓⵍⵜⴰⵖ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵃⵎⴰ ⴰⴷ ⵜⵜⵓⵙⴽⵉⵔⵏ ⵉⵡⵜⵜⴰⵙⵏ ⵥⵉⵍⵏⵉⵏ ⵏ ⵓⵙⵎⵖⵔ ⴰⴷⵎⵙⴰⵏ ⴷ ⵓⵙⴷⵓⵙ ⵏ ⵓⵏⴱⴰⴹ ⴷ ⵓⵙⴼⵍⵙ ⴰⵏⴰⵎⵓⵏ ⵢⵓⵎⴰⵏ ⵍⵍⵉ ⵔⴰⴷ ⵉⴳ ⵜⴰⵎⴰⵜⴰⵔⵜ ⵜⴰⵎⵣⴰⵔⴰⵢⵜ ⵉⴷⵔⴰⵏ ⵖ ⵜⵡⵉⵣⵉ ⵜⴰⵏⴰⵎⵓⵔⵜ ⴷ ⵓⴼⵔⴰⴳ ⵏ ⵜⵉⵣⵉ ⴷ ⵉⵣⵔⴼⴰⵏ ⵏ ⵓⴼⴳⴰⵏ.
ⵖ ⵢⵉⴳⵔ ⵏ ⵜⵉⴹⴰⴼ, ⵉⵎⴹⴰⴽⴰⵕ ⵓⵙⵉⵔⴰ ⴼ ⵓⵖⴰⵡⴰⵙ ⴰⵢⵢⵓⵔⴰⵏ ⵏ ⵉⴳⵔⴰⵏ ⵉⵎⴰⵡⵙⴰⵙⵏ, ⴷ ⵉⵙⵇⵙⵉⵜⵏ ⵉⵏⵎⵍⴰⵙⵙⵏ ⵏ ⵡⴰⵢⵢⵓⵔ ⵏ ⵏⵓⵡⴰⵏⴱⵉⵔ.
ⵖ ⵜⵙⵎⵉⴳⴰⵍ ⵏ ⵓⵙⴰⴳⴳⵯ, ⵉⵎⴹⴰⴽⴰⵕ ⵓⵙⵉⵔⴰ ⵏ ⵓⵙⵇⵇⵉⵎ ⴼ ⵜⵓⵜⵔⴰ ⵉⵥⵍⵉⵏ ⴷ ⵓⵙⵓⵔⵙ ⵏ ⵉⵙⴳⵏⴰⴼⵏ ⴷ ⵉⵙ ⵔⴰⴷ ⵓⵊⵉⴷⵏ ⵉ ⵜⵣⵣⵉⴳⵣⵜ ⵏ ⵓⴱⴰⵢⵢⵓⵕ ⵖ ⵓⵎⵏⵉⴷ ⵏ ⵜⵏⴽⴷⴰ ⵏ ⵜⵏⵓⴼⴰ ⵜⵉⴷⵓⵙⴰⵏⵉⵏ.
ⵖ ⵢⵉⴳⵔ ⵏ ⵓⵣⵣⵔⴰⴼ, ⵉⵣⵎⵎⵉⵎ ⵓⵙⵉⵔⴰ ⵏ ⵓⵙⵇⵇⵉⵎ ⵜⴰⵡⵓⵔⵉ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵖ ⵡⴰⵢⵢⵓⵔ ⵏ ⵛⵓⵜⴰⵏⴱⵉⵔ ⵖ ⵜⵖⵔⵉ ⵏ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴷ ⵓⵙⵏⵎⴰⵍⴰ ⵏ ⵉⵙⵉⵔⴰⵜⵏ ⵏ ⵜⵙⵇⵇⵉⵎⵉⵏ ⵉ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵜⵙⵓⵜⵍⵜ, ⵖⵎⴽ ⴰⵏⵏ ⴷ ⵓⵙⵓⵔⵙ ⵏ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⵍⴽⵎⵏⵉⵏ 210 ⵏ ⵜⵙⵓⵎⵔⵜ, ⵣⵎⵎⵉⵎⵏ ⴰⵜⵉⴳ ⵏ ⵜⵡⵓⵔⵉ ⴰⴷ ⴷ ⵓⵛⵛⵉⵍ ⵏ ⵓⵙⵖⵉⵡⵙ ⵏⵏⵙ ⴷ ⵜⵖⵔⵉ ⵏⵏⵙ ⵙ ⵓⵎⵙⴰⵙⴰ ⴷ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ.
ⵖ ⵓⵙⵎⵀⵍ ⵏ ⵜⵓⵎⴰⵢⵉⵏ ⵏ ⵓⴷⵓⵙⵜⵓⵔ ⴼ ⵓⵙⵏⵎⴰⵍⴰ ⵏ ⵜⵙⵇⵇⵉⵎⵜ ⵜⴰⵢⵢⵓⵔⴰⵏⵜ ⵉⵥⵍⵉⵏ ⵙ ⵜⵖⵔⵉ ⵏ ⵜⵙⵓⵎⵔⵉⵏ ⵏ ⵉⵙⵍⴳⵏⵏ, ⵔⴰⴷ ⵜⵜⵓⵚⵕⵉⴼ ⵜⵎⵢⴰⵣⴰⵏⵜ ⵉ ⵜⵏⴱⴰⴹⵜ ⴷ ⵓⵙⵎⵏⵉⴷ ⵏ ⵉⵎⵔⵙⵉ ⴼ ⵜⵉⵏⴰⵡⵜ ⵏ ⵉⵏⵙⵙⵉⵅⴼⵏ ⵖ ⵜⵙⵎⵓⵏⵉ ⵏⵏⵙ ⴷ ⵢⵓⵛⴽⴰⵏ.
ⵖ ⵓⵙⵎⵀⵍ ⵏ ⵉⵙⵡⴰⵍⴰⵢⵏ ⵉⴳⵍⴷⴰⵏⵏ ⴰⵜⵜⵓⵢⵏⵉⵏ ⵜⵜⵓⴱⴷⴰⵔⵏⵉⵏ ⵖ ⵉⵏⴰⵡ ⵏ ⵓⴷⴰⴱⵓ, ⵉⴼⴼⵖ ⵓⵙⵉⵔⴰ ⵏ ⵓⵙⵇⵇⵉⵎ ⴰⴷ ⵜⵉⵍⵉ ⵢⴰⵜ ⵜⵉⵏⴰⵡⵜ ⴼ ⵓⵎⵓⴽⵏ ⵏ ⵢⵉⴳⵔ ⴰⵎⴰⵜⴰⵢ ⵙ ⵜⵉⵍⵉⵜ ⵏ ⴽⵓ ⵉⵎⵙⴽⴰⵔⵏ.
ⵜⴳⴰ ⵜⵙⵏⵜⴰⵢⵜ ⴰⴷ ⵜⵉⵡⵉⵙⵉ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵃⵎⴰ ⴰⴷ ⵉⴱⴷⴷ ⴼ ⵜⵎⵓⴽⵔⵉⵙⵉⵏ ⵏ ⵜⵎⵔⵙⴰⵍ ⴷ ⵜⵎⵙⵙⵏⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵓⵙⵎⴽⵍ ⵏⵏⵙⵏⵜ.