ⴰⵙⵉⵡⴹ ⴼ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵕⴰⵙ 13 ⵎⴰⵢⵢⵓ 2020

ⵉⵙⵏⵎⴰⵍⴰ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⵏⵏⵙ ⵜⴰⵏⵎⵍⴰⵙⵙⵜ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⴽⵕⴰⵙ 13 ⵎⴰⵢⵢⵓ 2020, ⵉⵥⵍⵉ ⵓⵖⴰⵡⴰⵙ ⵏⵏⵙ ⵏ ⵜⵡⵓⵔⵉ ⵉ ⵜⵉⴹⴰⴼ ⴷ ⵓⵣⵣⵔⴰⴼ ⴷ ⵓⵙⵏⵎⴰⵍⴰ ⵏ ⵜⵡⵓⵔⵉⵡⵉⵏ ⵏ ⵓⵙⵇⵇⵉⵎ.

ⵖ ⵓⵎⵏⵉⴷ ⵏ ⵜⵉⴹⴰⴼ: ⵉⴼⴼⵖ ⵓⵙⵉⵔⴰ ⵏ ⵓⵙⵇⵇⵉⵎ ⴰⴷ ⵉⵍⵉⵏⵜ ⵙⵏⴰⵜ ⵜⵖⵉⵎⵉⵜⵉⵏ ⴰⵙⵙ ⵏ ⵡⴰⵢⵏⴰⵙ 18 ⵎⴰⵢⵢⵓ, ⵔⴰⴷ ⵜⵥⵍⵉ ⵜⵎⵣⵡⴰⵔⵓⵜ ⵉ ⵉⵙⵇⵙⵉⵜⵏ ⵉⵎⵉⵡⴰⵏⵏ ⴼ ⵢⵉⴳⵔ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵉⵍⵖ ⴰⵣⵣⵓⵍⴰⵏ ⴷ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⵙ ⵉⵙⵇⵙⵉⵜⵏ ⵍⵍⵉ ⵉⴹⴼⵕ ⵓⵎⴹⴰⴽⴰⵕ. ⵖⵎⴽ ⵍⵍⵉ ⵔⴰⴷ ⵜⵉⵍⵉ ⵜⵖⵉⵎⵉⵜ ⵜⵓⵙⵎⵉⴷⵜ ⵉⵛⵛⴰⵔⵏ ⴷ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵖ ⵓⵙⴰⵜⵉ ⵏ ⵓⵎⵏⵏⵉ 68 ⵏ ⵓⴷⵓⵙⵜⵓⵔ, ⵔⴰⴷ ⵜⵥⵍⵉ ⵉ ⵓⵙⵓⵜⴳ ⵏ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵏ ⵉⵙⵉⵙⴼⵉⵡⵏ ⵥⵍⵉⵏⵉⵏ ⵙ ⵓⵙⵡⵓⴷⴷⵓ ⵏ ⵓⵥⵍⴰⵢ ⴰⴷⵓⵙⴰⵏ ⴷⴼⴼⵉⵔ ⵏ 20 ⵎⴰⵢⵢⵓ.

ⵖ ⵓⵎⵏⵉⴷ ⵏ ⵓⵣⵣⵔⴰⴼ: ⵉⵙⵔⵙ ⵓⵙⵉⵔⴰ ⵏ ⵓⵙⵇⵇⵉⵎ ⵜⵉⵡⵓⵔⵉⵡⵉⵏ ⵏ ⵜⵖⵉⵎⵉⵜ ⵜⴰⵣⵣⵔⴰⴼ ⵏ ⵡⴰⵙⵙ ⵏ ⵓⴽⵕⴰⵙ 13 ⵎⴰⵢⵢⵓ ⵉ ⵜⵖⵔⵉ ⴷ ⵓⵙⵜⴰⵢ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵙⵔⵙ ⵏ ⵉⴱⴹⵉⵢⵏ ⵥⵍⵉⵏⵉⵏ ⵣⴷⵉⵏⵉⵏ ⵙ ⵜⵎⵖⵓⵏⵉⵏ ⵏ ⵉⵎⵓⴷⴷⵓⵜⵏ ⴷ ⵜⵣⴷⵓⵖⵉⵏ ⵏ ⵜⵎⴰⵍⵍⴰⵢⵜ ⴷ ⵜⵎⵖⵓⵏⵉⵏ ⵏ ⵡⴰⵙⵙⴰⵢ ⵏ ⵉⴳⵏⵏⴰ ⵏ ⵉⵏⵎⵓⴷⴷⴰ.

ⵖⵎⴽ ⵍⵍⵉ ⵉⵎⴷⴰⵡⴰⵍ ⵓⵙⵉⵔⴰ ⵏ ⵓⵙⵇⵇⵉⵎ ⴼ ⵓⵙⵡⵓⴷⴷⵓ ⵏ ⵉⵙⵏⴼⴰⵔⵏ ⴷ ⵜⵙⵓⵎⴰⵔ ⵉⵍⵍⴰⵏ ⴷⴰⵔ ⵜⵙⵇⵇⵉⵎⵉⵏ ⴷ ⵓⵙⵖⵉⵡⵙ ⴷ ⵓⵙⵜⴰⵢ ⵏⵏⵙⵏ, ⵉⴱⴷⴷ ⴼ ⵡⴰⵜⵉⴳ ⵏ ⵜⵙⵏⵜⴰⵢⵉⵏ ⵜⵉⵣⵣⵔⴰⴼⵉⵏ ⵉⵍⴽⵎⵏ 190 ⵏ ⵜⵙⵓⵎⵔⵜ, ⵙⴽⵔⵏ ⵜⵏⵜ ⴽⵓ ⵜⵉⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵃⵎⴰ ⴰⴷ ⴳⵉⵏⵜ ⵜⴰⵎⵔⴰⵔⵓⵜ ⴼ ⵎⴰⵙ ⵉⵙⵖⴰⵡⵙⴰ ⵓⵣⵣⵔⴰⴼ ⵖ ⵉⴳⵔⴰⵏ ⵉⴷⵎⵙⴰⵏⵏ ⴷ ⵉⴷⵍⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⵡⵏⴹⴰⵏⵏ. ⵖⵎⴽ ⵍⵍⵉ ⵉⴱⴷⴷ ⵓⵙⵉⵔⴰ ⴼ ⵜⵙⵏⵜⴰⵢⵉⵏ ⵥⵉⵍⵏⵉⵏ ⴳⴰⵏⵉⵏ ⵜⵉⵙⵓⵎⴰⵔ ⵏ ⵉⵙⵍⴳⵏⵏ ⵍⵍⵉ ⴼⴽⴰⵏ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⵖ ⵓⵣⵎⵣ ⵏ ⵓⵥⵍⴰⵢ ⴰⴷⵓⵙⴰⵏ, ⵍⵍⵉ ⵉⵍⴽⵎⵏ 14 ⵏ ⵜⵙⵓⵎⵔⵜ ⴼ ⵜⵎⵙⴰⵔⵉⵏ ⵜⵉⴷⵎⵙⴰⵏⵉⵏ ⴷ ⵜⵥⵕⴼⴰⵏⵉⵏ ⴷ ⵜⵉⵏ ⵓⵙⵡⵓⴷⴷⵓ ⵖ ⵍⵍⴰⵏ ⵉⵙⵍⴳⵏⵏ ⵏ ⵜⵎⵖⵓⵏⵉⵏ ⴷ ⵉⵙⵖⵡⴰⵏ ⴷ ⵡⴰⵔⵔⴰⵣ ⴼ ⵉⵏⴳⴰⵙⵏ ⵏ ⵜⵡⵓⵔⵉ ⴷ ⵓⵃⵟⵟⵓ ⵏ ⵓⵎⵙⵎⵓⵔ ⴷ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⴷ ⵜⴳⵔⵉⵡⵜ ⵏ ⵉⵙⴰⴼⴰⵔⵏ ⴷ ⵓⵙⵍⴳⵏ ⴰⵙⴰⵜⵉ ⵏ ⵓⵏⴳⵔⴰⵡ ⴰⴷⵓⵙⴰⵏ, ⵍⵍⴰⵏⵜ ⵓⵍⴰ ⴼ ⵓⵙⴽⵔ ⵏ ⵜⵙⵎⵓⵏⴰⵢ ⵏ ⵓⵎⴷⵉⵡⴰⵍ ⵏ ⵉⵏⴳⵎⴰⵎⵏ ⵏ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵜⵎⵙⵙⵓⵔⵉⵏ ⵎⵓ ⵜⵎⵓⵜⵜⴰ ⵜⵎⴰⵙⴰⵢⵜ.

ⵍⵍⵉⵖ ⵉⵙⴷⴷⵉⴷ ⵓⵙⵉⵔⴰ ⵏ ⵓⵙⵇⵇⵉⵎ ⴼ ⵜⵉⵕⵡⵉ ⵏ ⵜⵡⵓⵔⵉ ⴰⴷ ⵜⴰⵣⵣⵔⴰⴼⵜ ⵉ ⵎⴰⵙ ⵙⵖⴰⵡⵙⴰⵏ ⵉⵏⵎⵓⵔⴰ ⴷ ⵜⵏⵎⵓⵔⴰ ⵉ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⵖ ⵢⵉⴳⵔ ⵏ ⵜⵣⴷⴰⵢⵉⵏ ⴷ ⵓⵙⵡⵓⴷⴷⵓ ⵏ ⴽⵔⴰ ⵏ ⵜⵎⵔⵙⴰⵍ, ⵉⴼⴼⵖ ⴰⴷ ⵢⴰⵣⵏ ⵉ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵃⵎⴰ ⴰⴷ ⵜⵉⵍⵉ ⵜⵎⴰⵎⴽⵜ ⵏ ⵓⵙⵖⵉⵡⵙ ⵏ ⵜⵙⵓⵎⴰⵔ ⴰⴷ ⵖ ⵎⴰⵏⵏ ⵓⵔ ⵢⴰⴳⴳⵓⴳⵏ.

ⵉⴼⴼⵖ ⵓⵙⵉⵔⴰ ⵏ ⵓⵙⵇⵇⵉⵎ ⵓⵍⴰ ⴰⴷ ⵜⵉⵍⵉ ⵜⵎⵢⴰⵣⴰⵏⵜ ⵉ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵃⵎⴰ ⴰⴷ ⵉⵍⵉⵏⵜ ⵜⵎⵙⴽⴰⵔ ⵏⵏⵙⵏⵜ ⵖ ⵓⵎⵏⵉⴷ ⴰⴷ.

ⵉⵎⴷⴰⵡⴰⵍ ⵓⵙⵉⵔⴰ ⵏ ⵓⵙⵇⵇⵉⵎ ⴼ ⵜⵎⵙⴽⴰⵔ ⵏ ⵡⴰⵔⴰⵢ ⵉⵍⵍⴰⵏ ⵖ ⵜⵙⵇⵇⵉⵎⵉⵏ ⴷ ⵜⵖⵉⵎⵉⵜⵉⵏ ⵜⵉⵎⴰⵜⴰⵢⵉⵏ, ⵉⵙⴷⴷⵉⴷ ⴼ ⵜⵉⵕⵡⵉ ⵏ ⵜⵖⵜⴰⵙⵉⵏ ⵉⵙⴽⵔ ⵖ ⵓⵣⵎⵣ ⵏ ⵓⵥⵍⴰⵢ ⴰⴷⵓⵙⴰⵏ, ⵉⵙⵓⵜⴳ ⵙ ⵓⵣⵎⵣⵣⵓ ⵜⵓⴳⴳⴰⵙ ⵏ ⴽⵓ ⵉⴳⵎⴰⵎⵏ ⵏ ⵓⵙⵇⵇⵉⵎ ⴼ ⵜⵡⵉⵙⵉ ⵏⵏⵙⵏ ⵙ ⵜⵉⵍⵉⵜ ⴷ ⵓⵏⵢⴰⵍⴽⴰⵎ ⵙ ⵜⵉⴳⴳⵓⴳⵜ ⵖ ⵜⵡⵓⵔⵉⵡⵉⵏ ⵏ ⵓⵙⵇⵇⵉⵎ.

ⵉⴱⴷⴷ ⵓⵙⵉⵔⴰ ⴼ ⵡⴰⵜⵉⴳ ⵏ ⵜⵉⵍⴰⵍⵜ ⵏ ⵓⵣⵣⵔⴰⴼ ⵍⵍⵉ ⵙⴽⵔⵏⵜ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵖ ⵉⵎⴰⵍⴰⵙⵙ ⴰⴷ, ⵖ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵙⵢⴰⴼⵓⵜⵏ ⴷ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵙⵔⵙ ⵏ ⵉⴱⴹⵉⵢⵏ ⵥⵍⵉⵏⵉⵏ ⵣⴷⵉⵏⵉⵏ ⵙ ⵜⵎⵖⵓⵏⵉⵏ ⵏ ⵉⵎⵓⴷⴷⵓⵜⵏ ⴷ ⵜⵣⴷⵓⵖⵉⵏ ⵏ ⵜⵎⴰⵍⵍⴰⵢⵜ ⴷ ⵜⵎⵖⵓⵏⵉⵏ ⵏ ⵡⴰⵙⵙⴰⵢ ⵏ ⵉⴳⵏⵏⴰ, ⵍⵍⵉ ⵜⵙⵖⵣⵏ ⵙ ⵓⵎⴰⴽⵕⴰⴹ ⴷⴼⴼⵉⵔ ⵏ ⵓⵙⵏⴼⵍ ⵏ ⴽⵔⴰ ⵜⵓⵎⴰⵢⵉⵏ ⵏⵏⵙ.

ⵖⵎⴽ ⵍⵍⵉ ⵉⵙⵓⵜⴳ ⵓⵙⵉⵔⴰ ⵏ ⵓⵙⵇⵇⵉⵎ ⵜⴰⵙⵎⵓⵏⵉ ⵍⵍⵉ ⵜⵙⴽⵔ ⵜⵙⵇⵇⵉⵎⵜ ⵏ ⵓⵙⵙⵍⵎⴷ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ, ⵙ ⵜⵉⵍⵉⵜ ⵏ ⵓⵎⴰⵡⵙⴰⵙ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵉⵍⵖ ⴰⵣⵣⵓⵍⴰⵏ ⴷ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ, ⵜⵥⵍⵉ ⵉ ⵓⵎⴹⴰⴽⴰⵕ ⴼ ⵜⵎⵙⴰⵔⵉⵏ ⵏ ⵓⵙⵙⵍⵎⴷ ⴷ ⵜⵎⵙⴽⴰⵔ ⵉⵍⵍⴰⵏ ⵖ ⵓⵣⵎⵣ ⵏ ⵓⵥⵍⴰⵢ ⴰⴷⵓⵙⴰⵏ ⴷ ⵉⵎⵏⵉⴷⵏ ⵏ ⵜⵡⵓⵔⵉ ⴷ ⵉⵖⴰⵡⴰⵙⵏ ⴷ ⵢⵓⵛⴽⴰⵏ.

ⵉⵣⵎⵎⵉⵎ ⵓⵙⵉⵔⴰ ⵏ ⵓⵙⵇⵇⵉⵎ ⵜⴰⵣⵣⵉⴳⵣⵜ ⵏ ⵜⵡⵓⵔⵉⵡⵉⵏ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵍⵍⵉ ⵉⴹⴼⵕⵏ ⵜⵉⵎⵙⴰⵔⵉⵏ ⴷ ⵉⵅⵎⵎⵉⵎⵏ ⵏ ⵓⵎⵏⴰⴷ ⴰⵎⴰⵜⴰⵢ ⴰⵏⴰⵎⵓⵔ ⵖ ⵓⵣⵣⵔⴰⴼ ⴷ ⵜⵉⴹⴰⴼ ⵙ ⵉⵎⴰⵏ ⵏ ⵜⵎⴰⵙⴰⵢⵜ ⴷ ⵜⵎⵓⵔⵉ.