ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⴰⵙⵉⵡⴹ ⵏ ⵜⵙⵎⵓⵏⵉ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⵢⵏⴰⵙ 1 ⵢⵓⵏⵢⵓ 2020
ⵉⵙⵏⵎⴰⵍⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⵍⴰⴽⵉ ⵜⴰⵙⵎⵓⵏⵉ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⵙⵙ ⵏ ⵡⴰⵢⵏⴰⵙ 1 ⵢⵓⵏⵢⵓ 2020, ⵜⵥⵍⵉ ⵉ ⵓⵙⵏⵎⴰⵍⴰ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ.
ⵖ ⵜⵣⵡⵉⵔⵉ ⵏ ⵜⵙⵎⵓⵏⵉ ⴰⴷ, ⵙⵙⴽⵜⵉⵏ ⴷ ⵉⵎⴷⵔⴰⵡⵏ ⵜⴰⵎⵙⴰⵔⵜ ⵜⴰⵎⵇⵇⵔⴰⵏⵜ ⵍⵍⵉ ⵜⴷⴷⵔ ⵜⵎⵜⵜⵉ ⵜⴰⵎⵖⵔⵉⴱⵉⵜ ⵍⵍⵉⵖ ⵉⵎⵎⵓⵜ ⵢⴰⵏ ⵖ ⵜⴰⵔⵡⴰ ⵏⵏⵙ ⵉⵎⵕⴹⵉⵢⵏ ⵉⴳⵍⵍⵉⵏ ⵏ ⵓⵎⵖⵏⴰⵙ ⴰⵙⴰⵍⵎⴰⴷ ⵄⴰⴱⴷ ⵕⵕⴰⵃⵎⴰⵏ ⵍⵢⵓⵙⴼⵉ, ⵜⴰⵎⵍⵍⴰ ⵏ ⵕⴱⴱⵉ ⴼ ⵉⵎⴰⵏ ⵏⵏⵙ, ⵙⵙⵇⵜⵉⵏ ⴷ ⵓⵍⴰ ⵉⴼⵔⵉⵙⵏ ⵉⵏⴰⵎⵓⵔⵏ ⴷ ⵉⵣⵔⴼⴰⵏⵏ ⴷ ⵉⵏⴼⴳⴰⵏⵏ ⵏ ⵉⴳⵍⵍⵉⵏ, ⵉⵏⵉⵏ ⴰⵙⵓⵜⴳ ⵏⵏⵙⵏ ⵉ ⵍⵄⵏⴰⵢⵜ ⵜⴰⴳⵍⴷⴰⵏⵜ ⵜⴰⵎⴰⵜⵜⵓⵢⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ, ⵍⵍⵉ ⵉⵙⵎⵓⵏⵏ ⵖ ⵉⴳⵍⵍⵉⵏ ⵏ ⵍⵢⵓⵙⴼⵉ ⴽⵓ ⴰⵎⵎⴰⴽⵏ ⵏ ⵓⵙⵓⵜⴳ ⵏ ⵉⴼⵔⵉⵙⵏ ⵏⵏⵙ ⴷ ⵜⴰⵢⵔⵉ ⵏ ⵜⵎⵓⵔⵜ ⵏⵏⵙ, ⵏⵜⵜⴰⵜ ⵍⵍⵉ ⵎⵓ ⵉⴷⴷⴰ ⵢⴰⵏ ⵖ ⵜⴰⵔⵡⴰ ⵏⵏⵙ ⵉⵎⵕⴹⵉⵢⵏ ⵍⵍⵉ ⵉⵣⵎⵎⵉⵎⵏ ⵢⴰⵜ ⵜⴼⵔⴽⴰ ⵉⵙⵜⴰⵡⵀⵎⵎⴰⵏ ⵖ ⵓⵎⵣⵔⵓⵢ ⴰⵜⵔⴰⵔ ⵏ ⵜⵎⴰⵣⵉⵔⵜ ⵏⵏⵙ ⵙ ⵓⵏⵎⵖⵓⵔ ⵏⵏⵙ ⴷ ⵜⵎⴰⵎⴽⵜ ⵏⵏⵙ ⵉⵥⵉⵍⵏ, ⵖⵎⴽ ⴰⵏⵏ ⴷ ⵜⵎⴰⵙⴰⵢⵜ ⴷ ⵓⵙⵖⵓⵏ ⵉⴼⴰⵡⵏ ⵙ ⵉⵎⵏⵣⴰⵢⵏ ⴷ ⵓⵙⵓⴼⵓ, ⵖⵎⴽ ⵍⵍⵉ ⵏⵉⵜ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵃⴼⴹ ⵕⴱⴱⵉ.
ⵖ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ, ⵜⵎⴷⴰⵡⴰⵍ ⵜⵙⵎⵓⵏⵉ ⴼ ⴽⵓ ⵉⴹⵕⵉⵚⵏ ⵥⵍⵉⵏⵉⵏ ⵙ ⵜⵖⵔⵉ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵉⵜⵜⵓⵙⵏⴼⴰⵍⵏ, ⵖⵎⴽ ⵍⵍⵉ ⵜⵜⵓⴱⴷⴰⵔⵏ ⵖ ⵓⴷⵓⵙⵜⵓⵔ ⴷ ⵓⵙⵍⴳⵏ ⴰⵎⴰⴷⴷⴰⵙ ⵏ ⵓⵙⵍⴳⵏ ⵏ ⵓⵥⵕⴼ ⴷ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵣⵎⵎⵉⵎⵏ ⵎⴰⵙ ⵉⴳⴰ ⴰⵙⵏⴼⴰⵔ ⵏ ⵓⵙⵍⴳⵏ ⴰⵥⵕⴼⴰⵏ ⴰⵎⵣⵡⴰⵔⵓ ⵉⵜⵜⵓⵙⵏⴼⴰⵍⵏ ⵖ ⵜⵉⴼⴰⵡⵜ ⵏ ⵓⴷⵓⵙⵜⵓⵔ ⴰⵎⴰⵢⵏⵓ ⵏ ⵜⴳⵍⴷⵉⵜ, ⵉⵏⵉⵏ ⵎⴰⵙ ⴷ ⵢⵓⵛⴽⴰ ⵓⵙⵓⵔⵙ ⵏ ⵓⵙⵎⵏⵉⴷ ⵏ ⵓⵙⵏⴼⴰⵔ ⴰⴷ ⵖ ⵢⴰⵏ ⵓⵎⵏⴰⴹ ⵉⵥⵍⵉⵏ ⵓⵔ ⵊⵊⵓ ⵉⵍⵍⵉⵏ ⵖ ⵜⵓⴷⵔⵜ ⵜⴰⴷⵎⵙⴰⵏⵜ ⴷ ⵜⵥⵕⴼⴰⵏⵜ ⵏ ⵜⵎⴰⵣⵉⵔⵜ ⵏⵏⵖ, ⵙⴷⴷⵉⴷⵏ ⴼ ⵡⴰⵜⵉⴳ ⵏⵏⵙ ⵖ ⵜⵣⴷⴰⵢⵜ ⵏ ⵓⵙⵇⵇⵉⵎ ⴷ ⵜⵏⴱⴰⴹⵜ ⴷ ⵓⵣⵓⵛⵛⵍ ⵏ ⵓⵙⵙⴰⵔⵓ ⵏ ⵓⵣⵎⵣ ⵏⵏⵙ ⵡⴰⵅⵅⴰ ⵍⵍⴰⵏⵜ ⵜⵎⵓⴽⵔⵉⵙⵉⵏ ⴷⵉⵙⵙ ⵉⵥⵍⵉⵏ, ⵉ ⵓⵙⴷⵔⵓ ⵏ ⵓⵎⴹⴰⴽⴰⵕ ⴷ ⵓⵙⴱⵓⵖⵍⵓ ⵏ ⵓⵙⵏⴼⴰⵔ ⵙ ⴰⵢⵍⵍⵉ ⵙⵉⴳⴳⵉⵍⵏⵜ ⴽⵓ ⵜⵉⴷⵓⵍⴰ ⵜⵉⵏⴰⵎⵓⵏⵉⵏ.
ⵍⵍⵉⵖ ⴱⴰⵀⵔⴰ ⵙⵜⴰⵡⵀⵎⵎⴰⵏ ⵉⵣⵎⴰⵣ ⴷ ⵢⵓⵛⴽⴰⵏ ⵖ ⵜⵡⵓⵔⵉ ⵏ ⵓⵙⵇⵇⵉⵎ, ⵉⵍⵍⴰ ⵓⵎⴷⴰⵡⴰⵍ ⴰⴷ ⵜⵜⵓⵙⴽⵉⵔⵏⵜ ⵜⵙⵎⵓⵏⴰⵢ ⵏ ⵓⵣⴷⴷⵓⵢ ⴷ ⵓⵎⵢⴰⵡⴰⴹ ⵉ ⵓⵙⵎⵓⵜⵜⴳ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⵉⵙⵎⴷⵏ ⵉ ⵜⵖⵔⵉ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⴰⵥⵕⴼⴰⵏ ⵉⵜⵜⵓⵙⵏⴼⴰⵍⵏ.
ⵖ ⵉⵎⵔⵙⵉ ⵏ ⵜⵉⴹⴰⴼ ⵜⴰⵏⵎⵍⴰⵙⵙⵜ, ⵖ ⵓⵙⴰⵜⵉ ⵏ ⵓⵙⵎⵀⵍ ⵏ ⵓⵖⴰⵡⴰⵙ ⵉⵥⵍⵉⵏ ⵙ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ, ⵉⵍⵍⴰ ⵓⵎⵛⴰⵛⴽⴰ ⴰⴷ ⵢⵉⵍⵉ ⵢⵉⴳⵔ ⵏ ⵜⵎⴰⵍⵍⴰⵢⵜ ⴷ ⵜⵏⵉⴷⵉ ⴷ ⵡⴰⵙⵙⴰⵢ ⵏ ⵉⴳⵏⵏⴰ ⴷ ⵜⴷⵎⵙⴰ ⵜⴰⵏⴰⵎⵓⵏⵜ ⴷ ⵜⵙⵓⵎⴰⵔ ⵏ ⵓⵙⵏⵊⵎ ⵏⵏⵙ ⵖ ⵓⵅⵎⵎⴻⵎ ⵏ ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⴳⵎⴰⵎⵏ ⵏ ⵓⵙⵇⵇⵉⵎ ⵖ ⵜⵖⵉⵎⵉⵜ ⵜⴰⵏⵎⵍⴰⵙⵙⵜ ⵏ ⵡⴰⵙⵙ ⵏ ⵡⴰⵢⵏⴰⵙ 8 ⵢⵓⵏⵢⵓ, ⵖⵎⴽ ⵍⵍⵉ ⵉⵍⵍⴰ ⵓⵎⵛⴰⵛⴽⴰ ⴰⴷ ⵜⵉⵍⵉ ⵜⵖⵉⵎⵉⵜ ⵜⴰⵢⵢⵓⵔⴰⵏⵜ ⵉⵥⵍⵉⵏ ⵙ ⵉⵙⵇⵙⵉⵜⵏ ⵣⴷⵉⵏⵉⵏ ⴷ ⵜⵙⵔⵜⵉⵜ ⵜⴰⵎⴰⵜⴰⵢⵜ ⴼ ⵉⵎⵔⵙⵉ:"ⴰⵖⴰⵡⴰⵙ ⵏ ⵜⵏⴱⴰⴹⵜ ⵉ ⵓⵙⴰⵍⵉ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ". ⵍⵍⵉ ⵔⴰⴷ ⵢⵉⵍⵉ ⴰⵙⵙ ⵏ 11 ⵢⵓⵏⵢⵓ ⵜⵉⴳⵉⵔⴰ ⵏ ⵎⴰ ⴷ ⵉⵍⵍⴰ ⵓⵙⵖⵉⵡⵙ ⵏⵏⵙ ⵉⵙⵎⴷⵏ ⵖⵔ ⵓⵙⵉⵔⴰ ⵏ ⵓⵙⵇⵇⵉⵎ ⵙ ⵓⵎⵛⴰⵛⴽⴰ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ.
ⵖ ⵜⵙⵏⵜⴰⵢⵜ ⵜⴰⴱⵕⵍⴰⵎⴰⵏⵉⵜ ⵖ ⵢⵉⴳⵔ ⵏ ⵓⵣⵣⵔⴰⴼ, ⵜⵎⴷⴰⵡⴰⵍ ⵜⵙⵎⵓⵏⵉ ⴼ ⵜⵓⴳⴳⴰⵙ ⵏ ⴽⵓ ⵉⴼⵔⴷⵉⵙⵏ ⵏ ⵓⵙⵇⵇⵉⵎ ⵉ ⵓⵙⵏⵙⵉ ⵉⵥⵉⵍⵏ ⵏ ⵜⵓⵎⴰⵢⵉⵏ ⵏ ⵓⵏⴳⵔⴰⵡ ⴰⴳⵯⵏⵙⴰⵏ, ⵜⵉⵍⵉ ⵜⵖⵔⵉ ⵉ ⵜⵏⴱⴰⴹⵜ ⴰⴷ ⵜⵏⵢⴰⵍⴽⴰⵎ ⴷ ⵓⵍⴳⴳⵓⴷ ⵃⵎⴰ ⴰⴷ ⵢⵉⵍⵉ ⵓⵙⵖⵉⵡⵙ ⵏ ⵜⵙⵏⵜⴰⵢⵜ ⴷ ⵓⵙⵎⵔⵙ ⵏⵏⵙ ⵍⵍⵉⵖ ⴷⴰⵔⵙ ⴰⵜⵉⴳ ⵏ ⵜⵡⵉⵙⵉ ⵜⴰⴱⵕⵍⴰⵎⴰⵏⵉⵜ ⵉ ⵓⵣⵔⴰⵢ ⵏ ⵜⵓⴳⵜ ⵏ ⵜⵎⵓⴽⵔⵉⵙⵉⵏ ⵏ ⵜⴱⵔⵉⴷⵉⵏ ⴷ ⵜⵣⵣⵔⴰⴼⵉⵏ ⴷ ⵜⴷⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ ⵍⵍⵉ ⴷ ⵎⵍⴰⵏⵜ ⵜⵎⵙⵓⵜⵍⵉⵏ ⵏ ⵓⵥⵍⴰⵢ ⴰⴷⵓⵙⴰⵏ ⴷ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ.