ⴰⵙⵉⵡⴹ ⵏ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 08 ⴷⵓⵊⴰⵏⴱⵉⵔ 2020

ⵉⵙⵏⵎⴰⵍⴰ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⵏⵏⵙ ⵜⴰⵏⵎⵍⴰⵙⵙⵜ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⴰⵏⵙⵙⵉⵅⴼ ⵍⴰⵃⴱⵉⴱ ⵍⵎⴰⵍⴽⵉ, ⴰⵙⵙ ⵏ ⵓⵙⵉⵏⴰⵙ 08 ⴷⵓⵊⴰⵏⴱⵉⵔ 2020, ⵜⵥⵍⵉ ⵉ ⵜⵉⴹⴰⴼ ⴷ ⵓⵣⵣⵔⴰⴼ ⴷ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ.

ⵖ ⵜⵣⵡⵉⵔⵉ ⵏ ⵜⵙⵎⵓⵏⵉ, ⵉⵥⵕⴰ ⵓⵙⵉⵔⴰ ⴰⵙⵉⵡⴹ ⵏ ⵓⴱⵔⵙⵉⵔⴰ ⴰⴳⵍⴷⴰⵏ ⵖ ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ ⵉⵙⵡⴰⵍⴰⵢⵏ ⵏⵏⵙ ⴰⵜⵜⵓⵢⵏⵉⵏ ⵉ ⵜⵏⴱⴰⴹⵜ ⵃⵎⴰ ⴰⴷ ⵉⵜⵜⵓⴼⴽⵉ ⵓⵛⵕⴰⴹ ⵎⴳⴰⵍ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19 ⴱⴰⵟⵍ ⵉ ⵚⴰⵃⴰ ⵏ ⴽⵓ ⵉⵎⵖⵔⵉⴱⵉⵢⵏ.

ⵖ ⵜⵙⵎⵓⵏⵉ ⴰⴷ, ⵉⵙⴰⵡⵍ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⴼ ⵓⴱⵓⵔⵣ ⵏⵏⵙⵏ ⵎⵏⵉⴷ ⵏ ⵓⵅⵎⵎⴻⵎ ⵉⵣⵣⵉⴳⵣⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵏⵉⴷ ⵏ ⵜⴰⵔⵡⴰ ⵏ ⵓⵎⴰⴷⴰⵏ ⵏⵏⵙ ⴰⴱⵍⴰⵍ ⴷ ⵓⵅⵎⵎⴻⵎ ⵏⵏⵙ ⴰⵍⴰⵍⵍⵉ ⵖ ⴽⵓ ⵉⴼⵔⴷⴰⵙ ⵏ ⵡⴰⵎⵓⵏ ⵏⵏⵙ ⴷ ⵓⵣⴷⴰⵢ ⵏⵏⵙ ⴰⵍⴰⵍⵍⵉ ⴷ ⵉⵅⵎⵎⵉⵎⵏ ⵏⵏⵙⵏ ⴷ ⵡⴰⴷⴷⴰⴷⵏ ⵏⵏⵙⵏ ⵉⴷⵓⵙⴰⵏⵏ, ⴰⵢⵍⵍⵉ ⵎⵎⴰⵍⴰⵏ ⵡⴰⴷⴷⴰⴷⵏ ⵏⵏⵙ ⴷ ⵜⵖⵜⴰⵙⵉⵏ ⵏⵏⵙ ⵎⵓⵏⵏⵉⵏ ⴷ ⵜⵓⴼⵔⴰⵢⵉⵏ ⴷⵓⵙⵏⵉⵏ ⵙⴳ ⴰⴳⵍⵍⵉⴷ ⵉⵔⴰ ⵕⴱⴱⵉ ⵢⵉⵔⵉⵜ ⵓⵎⴰⴷⴰⵏ ⵏⵏⵙ.

ⵉⵙⵙⴽⵜⵉ ⴷ ⵓⵙⵉⵔⴰ ⵏ ⵓⵙⵇⵇⵉⵎ ⵓⵍⴰ ⴰⴱⵔⵉⴷ ⵖⵣⵣⵉⴼⵏ ⵙⴳ ⵜⵉⵣⵡⵉⵔⵉ ⵏ ⵓⴱⴰⵢⵢⵓⵕ ⴷ ⴰⵢⵍⵍⵉ ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⵙ ⴽⵓ ⵉⴼⵔⴷⴰⵙ ⵏⵏⵙ ⴷ ⵜⵣⵣⵓⵍⵉⵏ ⵏⵏⵙ ⴷ ⵉⵙⵡⵉⵔⵏ ⵏⵏⵙ ⵖ ⵜⵎⵙⵙⵓⴳⵓⵔⵜ ⴷ ⵜⵏⴼⵔⵓⵜ ⴷ ⵢⵉⴳⵔ ⴰⵄⵚⴽⵕⵉ ⴷ ⵜⵙⵏⵉⵊⵊⵉⵜ ⴷ ⵓⵙⵙⵍⵎⴷ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵃⴼⴹ ⵕⴱⴱⵉ ⵖ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵖ ⵉⵙⵡⵉⵔⵏ ⵣⴷⵉⵏⵉⵏ ⴷ ⵓⴼⴳⴰⵏ ⴷ ⵜⴷⵎⵙⴰ ⴷ ⵡⴰⵎⵓⵏ. ⵉⵙⵙⴽⵜⵉ ⴷ ⵓⵏⵙⵙⵉⵅⴼ ⴷ ⵓⵙⵉⵔⴰ ⵏ ⵓⵙⵇⵇⵉⵎ ⵙ ⵓⴱⵓⵔⵣ ⵜⵉⵢⴰⴼⵓⵜⵉⵏ ⵜⵉⴷⵉⴱⵍⵓⵎⴰⵙⵉⵢⵉⵏ ⵍⵍⵉ ⵙⵙⴷⵓⵙⵏⵉⵏ ⵜⵓⴼⵔⴰⵢⵜ ⵏ ⵜⵉⵍⵉⵜ ⵖ ⵡⴰⵎⵓⵔ ⴰⴷ ⵉⵄⵣⵣⴰⵏ, ⵜⵓⴼⵔⴰⵢⵜ ⴰⴷ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⴰⵙ ⴷ “ⵜⵓⴼⵔⴰⵢⵜ ⵢⴰⵜⵜⵓⵢⵏ ⵖ ⵜⵓⴷⵔⵜ ⵏⵏⵙ ⵉⴳⴰ ⵜⵜ ⵓⴱⵓⵔⵣ ⵏⵏⵙ ⵙ ⵜⵎⵖⵔⵉⴱⵉⵜ ⵏⵏⵙ”.

ⵖ ⵓⵣⵣⵔⴰⴼ, ⵉⵥⵕⴰ ⵓⵙⵉⵔⴰ ⴰⴹⵕⵉⵚ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵍⵍⵉ ⴷ ⵢⵓⵣⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵖ ⵜⵉⵖⵔⵉ ⵜⵉⵙ ⵙⵏⴰⵜ, ⴷ ⵜⵢⴰⴼⵓⵜⵉⵏ ⵏ ⵜⵡⵓⵔⵉⵡⵉⵏ ⵏ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵏⵜ ⴼ ⵓⵙⵏⴼⴰⵔ ⴰⴷ ⴷ ⵉⵙⵏⴼⵍⵏ ⵍⵍⵉ ⴼ ⵜⵙⵖⵣⵏ.

ⵉⵥⵕⴰ ⵓⵙⵉⵔⴰ ⵓⵍⴰ ⴰⵏⵇⵇⵉⵙ ⴼ ⵜⵏⵓⴼⴰ ⵏ ⵜⵎⵢⵉⵎⴰⵏⵜ ⴼ ⵉⵏⵚⵉⵕⵉⴼⵏ ⵉⵍⵉⴽⵟⵕⵓⵏⵉⵢⵏ, ⵔⴰⴷ ⵉⵍⵉⵏ ⵙⵉⵏ ⵉⵙⵏⴼⴰⵔⵏ ⴰⴷ ⵖ ⵓⵖⴰⵡⴰⵙ ⵏ ⵓⵙⵇⵇⵉⵎ ⵉ ⵜⵖⵉⵎⵉⵜ ⵏ ⵓⵙⵉⵏⴰⵙ 8 ⴷⵓⵊⴰⵏⴱⵉⵔ 2020.

ⵖ ⵜⵡⵓⵔⵉ ⵜⴰⵣⵣⵔⴰⴼⵜ ⵏ ⵓⵙⵇⵇⵉⵎ, ⵉⵥⵕⴰ ⵓⵙⵉⵔⴰ ⵜⴰⵣⵣⵉⴳⵣⵜ ⵏ ⵜⵡⵓⵔⵉ ⵏⵏⵙⵏⵜ ⴷ ⵓⵖⴰⵡⴰⵙ ⵍⵍⵉ ⵙⵓⵊⴰⴷⵏⵜ ⴼ ⵉⴹⵕⵉⵚⵏ ⵉⵣⵣⵔⴰⴼⵏ ⵍⵍⵉ ⴰⵙⵏⵜ ⵜⵜⵓⵚⵕⴰⴼⵏⵉⵏ, ⵉⴳ ⵓⵙⵉⵏⴰⵙ 22 ⴷⵓⵊⴰⵏⴱⵉⵔ 2020 ⴰⵣⵎⵣ ⴰⵢⵢⵓⵔⴰⵏ ⵉ ⵜⵖⵔⵉ ⴷ ⵓⵙⵜⴰⵢ ⵏ ⵜⵙⵓⵎⵔⵉⵏ ⵏ ⵉⵙⵍⴳⵏⵏ.

ⵉⵖⵔ ⵓⵙⵉⵔⴰ ⵏ ⵓⵙⵇⵇⵉⵎ ⵉ ⴽⵓ ⵜⵉⵙⵇⵇⵉⵎⵉⵏ ⵜⵉⵎⵏⵜⴰⵢⵉⵏ ⵉ ⵓⵙⵖⵉⵡⵙ ⴷ ⵓⵎⴹⴰⴽⴰⵕ ⵏ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⵍⵍⵉ ⵜⵇⴱⵍ ⵜⵏⴱⴰⴹⵜ.

ⴼ ⵜⵉⴹⴰⴼ, ⵔⴰⴷ ⵢⵉⵍⵉ ⵓⵖⴰⵡⴰⵙ ⵏ ⵜⵖⵉⵎⵉⵜⵉⵏ ⵏ 14 ⴷ 21 ⴷⵓⵊⴰⵏⴱⵉⵔ 2020 ⴼ ⵉⴳⵔⴰⵏ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⵉⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ, ⴷ ⵢⵉⴳⵔ ⴷ ⵜⵎⴳⵓⵔⵉ ⴷ ⵓⵙⵖⵏⵣⵉ ⴷ ⵜⴷⵎⵙⴰ ⵜⴰⵣⴳⵣⴰⵡⵜ ⴷ ⵜⵎⵓⵟⵟⵓⵏⵜ, ⴷ ⵢⵉⴳⵔ ⵏ ⵓⵎⵙⴰⵙⴰ ⵏ ⵡⴰⴽⴰⵍ ⴰⵏⴰⵎⵓⵔ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ ⴷ ⵢⵉⴳⵔ ⵏ ⵜⴳⵯⵏⵙⴰⵏⵜ ⴷ ⵜⴼⵍⵍⴰⵃⵜ ⴷ ⵜⴳⵎⵔⵜ ⵜⴰⵢⵍⴰⵏⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ ⴷ ⵜⵎⴰⵍⵍⴰⵢⵜ ⴷ ⵜⵉⵏⴷⵉ ⴷ ⵡⴰⵙⵙⴰⵢ ⵏ ⵉⴳⵏⵏⴰ ⴷ ⵜⴷⵎⵙⴰ ⵜⴰⵏⴰⵎⵓⵏⵜ.