ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵏⴼⴰⵔ ⵏ ⵓⵙⵍⴳⵏ ⴰⵙⴰⵜⵉ 03.22 ⵉⴳⴰⵏ ⴰⵎⵇⵇⵏ ⵏ ⵓⵙⵙⴰⵔⵓ
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 18 ⴽⵟⵓⴱⵕ 2022, ⴰⵙⵏⴼⴰⵔ ⵏ ⵓⵙⵍⴳⵏ ⴰⵙⴰⵜⵉ 03.22 ⵉⴳⴰⵏ ⴰⵎⵎⵇⵏ ⵏ ⵓⵙⵙⴰⵔⵓ, ⴳ ⵜⵖⵉⵎⵉⵜ ⵜⴰⵣⵣⵔⴰⴼⵜ ⵍⵍⵉ ⵉⵙⵙⵉⵅⴼ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵃⴰⴹⵔ ⵎⴰⵙⵙ ⵎⵓⵃⵙⵉⵏ ⵍⵊⴰⵣⵓⵍⵉ ⴰⵎⴰⵡⵙⴰⵙ ⴰⵎⴰⵔⵉ ⵖⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵜⵜⵓⵙⵎⴰⴳⴰⵍⵏ ⵙ ⵓⵙⵙⴰⵔⵓ ⴷ ⵜⵎⵏⴰⴳⴰⵔⵜ ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⴷ ⵎⴰⵙⵙ ⵎⵓⵚⵟⴰⴼⴰ ⴱⴰⵢⵜⴰⵙ ⴰⵎⴰⵡⵙⴰⵙ ⵉⵜⵜⵓⵙⵎⴰⴳⵍⵏ ⵙ ⵜⵣⴷⴰⵢⵉⵏ ⴰⴽⴷ ⵓⴱⵕⵍⴰⵎⴰⵏ, ⴰⵎⵙⵙⵉⵡⵍ ⴰⵎⴰⴷⴷⵓⴷ ⵙ ⵉⵙⵎ ⵏ ⵜⵏⴱⴰⴹⵜ.
ⵉⴽⵛⵎ ⵓⵙⵏⴼⴰⵔ ⴰⴷ ⴳ ⵓⵙⴰⵜⵉ ⵏ ⵓⵣⵣⴳⵉⵔ ⵏ ⵉⵙⵡⴰⵍⴰⵢⵏ ⵉⴳⵎⴷⴰⵏⵏ ⵍⵍⴰⵏⵉⵏ ⴳ ⵉⵏⴰⵡ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⵓⵕⵥⵥⵓⵎ ⵏ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ ⵏ ⵓⵙⴳⴳⵯⴰⵙ ⴰⵣⵣⵔⴰⴼ ⴰⵎⵣⵡⴰⵔⵓ ⴳ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵢⴰⵜ ⴷ ⵎⵔⴰⵡⵜ, ⵖ ⵜⵍⵍⴰ ⵜⵖⵔⵉ ⵉ ⵓⵙⵔⵙ ⵏ ⵓⵎⵇⵇⵏ ⴰⵎⴰⵢⵏⵓ ⵏ ⵓⵙⵙⴰⵔⵓ ⵖ ⵎⴰⴷ ⵢⴰⵥⵏ.
ⵉⵡⴰⵜⵜⵙ ⵓⵙⵏⴼⴰⵔ ⵏ ⵓⵙⵍⴳⵏ ⴰⵙⴰⵜⵉ 03.22 ⵉⴳⴰⵏ ⴰⵎⵇⵇⵏ ⵏ ⵓⵙⵙⴰⵔⵓ ⴰⴷ ⵉⵍⵎⴽ ⵓⵙⵙⴰⵔⵓ ⵓⵙⵍⵉⴳ ⵙⵉⵏ ⵉⴼⴽⵕⴰⴹⵏ ⵏ ⵓⵙⵙⴰⵔⵓ ⴰⵎⴰⵜⴰⵢ ⴳ 2035, ⵙ ⵓⵎⵙⴰⵙⴰ ⴷ ⵡⴰⵏⴰⵡ ⵓⵏⴳⵉⵎ ⴰⵎⴰⵢⵏⵓ ⵉⵡⴰⵜⵜⵙⵏ: ⴰⵙⴽⵔ ⵏ ⵉⴷⵖⴰⵔⵏ ⵏ ⵜⵡⵡⵓⵔⵉ ⴱⴷⴷⵏⵉⵏ, ⴰⵙⵉⵎⵥⵉ ⵏ ⵉⵎⵣⵔⴰⵢⵏ ⵊⴰⵔ ⵜⵙⴳⴳⵉⵡⵉⵏ ⵏ ⵜⴳⵍⴷⵉⵜ ⴳ ⵓⵎⵏⵉⴷ ⵏ ⵓⵙⵙⴰⵔⵓ, ⴰⵙⵡⴰⵍ ⵏ ⵓⵙⵙⴰⵔⵓ ⵉ ⵉⴳⵔⴰⵏ ⵉⵎⵣⵡⵓⵔⴰ ⴷ ⵡⵉⵏ ⵜⵣⵣⵓⵍⵉⵏ ⵏ ⵉⵎⴰⵍ, ⴰⵙⵖⵓⴷⵓ ⵏ ⵓⵏⵣⵡⵉ ⵏ ⵜⵡⵡⵓⵔⵉ ⴷ ⵓⵙⵙⵔⵅⵓ ⵏ ⵓⵙⵙⴰⵔⵓ, ⴰⵙⴷⵓⵙ ⵏ ⵓⴷⵖⴰⵔ ⵏ ⵜⴳⵍⴷⵉⵜ ⵃⵓⵎⴰ ⴰⴷ ⵜⴳ ⴰⵛⴰⵎⵓⵛ ⵏ ⵓⵙⵙⴰⵔ ⵏ ⴱⵕⵕⴰ ⵓⵙⵔⵉⴷ ⴳ ⵓⵎⵏⵉⴷ ⴰⵎⵏⵥⴰⵡ ⴷ ⵓⴳⵔⴰⵖⵍⴰⵏ, ⴰⵙⵙⵔⵇⴱ ⵏ ⵉⵚⵉⴼⵉⴹⵏ ⴷ ⵜⵉⵍⵉⵜ ⵏⵜ ⵎⵙⵙⵏⵜⴰⵢ ⵜⵉⵎⵖⵔⵉⴱⵉⵢⵉⵏ ⴳ ⵓⵙⵡⵉⵔ ⴰⴳⵔⴰⵖⵍⴰⵏ ⴷ ⵓⵙⵙⵔⵇⴱ ⵏ ⵓⵙⴼⵍⵙ ⵏ ⵉⴽⵛⵓⵎⵏ ⵙ ⵓⴼⴰⵔⵙ ⴰⴷⵖⴰⵔⴰⵏ.
ⵉⴳⴰ ⵓⵎⵇⵇⵏ ⴰⵎⴰⵢⵏⵓ ⵡⴰⴷ ⵉⴼⴰⵡⵏ ⴷ ⵢⵓⵎⴰⵏ ⵉ ⵉⴷ ⴱⴰⴱ ⵏ ⵓⵙⵙⴰⵔⵓ ⵎⴽ ⵏⵏⴰ ⴳⴰⵏ, ⵙ ⵓⵡⵇⵇⵔ ⴰⵎⵏⴰⴷ ⴰⵙⴳⴰⵡⴰⵏ ⴳ ⵓⵙⵖⵣⵏ ⵏ ⵜⵎⵢⴰⵇⵇⴰⵏⵉⵏ, ⵖⵎⴽ ⵍⵍⵉ ⵉⵙⵔⵙ ⵢⴰⵜ ⵜⵉⴽⴽⵉ ⵉⵥⵍⵉⵏ ⵉ ⵓⵎⵏⴰⴷ ⴰⴽⴰⵍⴰⵏ ⵙ ⵓⵙⵎⵓⵏ ⵊⴰⵔ ⵉⵙⵙⵔⵇⴱⵏ ⵜⵜⴰⵡⴱⴷⴰⵔⵏⵉⵏ ⴳ ⵓⵎⵇⵇⵏ ⴷ ⵎⴰⴷ ⴰⴽⴽⴰⵏⵜ ⵜⵙⴳⴳⵉⵡⵉⵏ ⴳ ⵉⵙⵙⵔⵇⴱⵏ. ⴳ ⵎⴰⴷ ⵉⵥⵍⵉⵏ ⵙ ⵉⵎⵖⵔⵉⴱⵉⵢⵏ ⵏ ⵓⵎⴰⴹⴰⵍ, ⵢⵓⵎⴰ ⵓⵙⵏⴼⴰⵔ ⵏ ⵓⵎⵇⵇⵏ ⴰⵎⴰⵢⵏⵓ ⵉⵎⵉⵙⵙ ⵏ ⵓⴹⴼⵕ ⴷ ⵢⵓⵙⴰⵏ ⵉ ⵚⴰⵃⴰ ⵏ 5.8 ⵎⵍⵢⵓⵏ ⵏ ⵓⵎⵖⵔⵉⴱⵉ ⵏ ⴱⵕⵕⴰ, ⵃⵎⴰ ⴰⴷ ⵢⵉⵍ ⵓⵙⵎⵖⵔ ⵏ ⵓⵏⵛⴽ ⵏ ⵓⵙⵙⴰⵔⵓ ⵏ ⵉⵎⵖⵔⵉⴱⵉⵢⵏ ⵏ ⴱⵕⵕ ⴷ ⵜⵥⴹⵕⵜ ⴳ ⵓⴼⴰⵔⵙ ⵏ ⵡⴰⵜⵉⴳ ⴷ ⵓⵙⴽⵔ ⵏ ⵉⴷⵖⴰⵔⵏ ⵏ ⵜⵡⵡⵓⵔⵉ.
ⵔⴰⴷ ⵉⴳ ⵓⵙⵍⴳⵏ ⴰⴷ ⴰⵙⵓⵔⵙ ⴰⵎⵣⵔⴰⵢ ⴳ ⵓⵙⵎⵖⵔ ⵏ ⵜⴳⵎⵉ ⴷ ⵓⵙⵖⵓⴷⵓ ⵏ ⵓⵙⵓⵔⵙ ⵏ ⵜⵎⴰⵣⵉⵔⵜ ⴳ ⵓⵎⵏⵉⴷ ⴰⴷⵎⵙⴰⵏ ⴷ ⵓⵏⵎⵏⴰⴹ ⴷ ⵓⵎⵏⵥⴰⵡ, ⵉⴳⴰ ⴰⵙⵍⴳⵏ ⵉⵙⵜⴰⵡⵀⵎⵎⴰⵏ ⵏ ⵓⵙⵎⵀⵍ ⵏ ⵡⴰⵏⴰⵡ ⵓⵏⴳⵉⵎ ⴰⵎⴰⵢⵏⵓ, ⴷ ⵓⵙⵔⵙ ⵏ ⵜⵔⵙⴰⵍ ⵏ ⵜⴷⵎⵙⴰ ⵉⴷⵓⵙⵏ ⴳ ⵓⵙⵡⵉⵔ ⴰⵎⴰⴹⵍⴰⵏ ⴷ ⵉⵎⵉⵙⵙ ⵏ ⵓⵙⵏⴰⵍ ⵏ ⵓⴼⴰⵔⵙ ⴰⴷⵖⴰⵔⴰⵏ.