ⴰⵙⵉⵡⴹ ⴼ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, 01 ⴷⵓⵊⴰⵏⴱⵉⵔ 2020

ⵉⵙⵏⵎⴰⵍⴰ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⵜⴰⵏⵎⵍⵍⴰⵙⵜ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ, ⴰⵙⵙ ⵏ ⵓⵙⵉⵏⴰⵙ 1 ⴷⵓⵊⴰⵏⴱⵉⵔ 2020. ⵜⵥⵍⵉ ⵉ ⵜⵉⴹⴰⴼ ⴷ ⵓⵣⵣⵔⴰⴼ ⴷ ⵜⵣⴷⴰⵢⵜ ⵏ ⵓⵙⵇⵇⵉⵎ ⴷ ⵜⵎⵎⵔⵙⴰⵍ ⵜⵉⴷⵙⵜⴰⵔⵉⵏ ⴷ ⵉⵙⴽⴽⵉⵏⵏ ⵉⵎⵙⵙⵓⴳⵓⵔⵏ.

ⵖ ⵜⵣⵡⵉⵔⵉ, ⵉⵎⴷⴰⵡⴰⵍ ⵓⵙⵉⵔⴰ ⵏ ⵓⵙⵇⵇⵉⵎ ⴼ ⵜⵖⵉⵎⵉⵜ ⵜⴰⵢⵢⵓⵔⴰⵏⵜ ⵏ ⵡⴰⵢⵏⴰⵙ 30 ⵏⵓⵡⴰⵏⴱⵉⵔ ⴼ ⵉⵖⴰⵡⴰⵙⵏ ⵓⵏⴳⵉⵎⵏ ⵖ ⵜⵙⴳⴳⵉⵡⵉⵏ ⵏ ⵉⴼⴼⵓⵙ: ⵜⵉⵍⴰⵡⵜ ⴷ ⵉⵎⵏⵉⴷⵏ”. ⵉⵣⵎⵎⵉⵎ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⴰⵜⵉⴳ ⵏ ⵓⵙⵔⵙ ⴰⴷ ⴰⴷⵙⵜⴰⵔ ⴷ ⵡⴰⵜⵉⴳ ⵏ ⵉⵎⵔⵙⵉ ⵏⵏⵙ, ⴱⴷⴷⵏ ⴼ ⵜⴷⵓⵙⵉ ⵏ ⵉⵙⵉⵙⴼⵉⵡⵏ ⵜⵜⵓⴼⴽⴰⵏⵉⵏ ⴼ ⵉⵙⵏⴼⴰⵔⵏ ⵓⵏⴳⵉⵎⵏ ⵜⵜⵓⵙⴽⴰⵔⵏⵉⵏ ⵍⵍⵉ ⵉⵕⵥⵎ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ, ⴰⵢⵍⵍⵉ ⴷ ⵢⵉⵡⵉⵏ ⵢⴰⵜ ⵜⵏⴽⵔⴰ ⵜⵓⵏⴳⵉⵎⵜ ⵢⵓⵎⴰⵏ ⵖ ⴽⵓ ⵉⵙⵡⵉⵔⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⵏⵎⵏⴰⴹⵏ.

ⵜⵉⴹⴰⴼ ⵜⴰⵏⵎⵍⴰⵙⵙⵜ: ⵉⴼⴼⵖ ⵓⵙⵉⵔⴰ ⴰⴷ ⵢⵉⵍⵉ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵜⵖⵉⵎⵉⵜ ⵜⴰⵏⵎⵍⴰⵙⵙⵜ ⵏ ⵡⴰⵢⵏⴰⵙ 7 ⴷⵓⵊⴰⵏⴱⵉⵔ 2020 ⵖ ⵉⴳⵔⴰⵏ ⵏ ⵓⵎⴰⵡⴰ ⴷ ⵡⴰⵙⵙⴰⵢ ⴷ ⵍⵓⵊⵉⵙⵜⵉⴽ ⴷ ⵡⴰⵎⴰⵏ ⴷ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵉⵍⵖ ⴰⵣⵣⵓⵍⴰⵏ ⴷ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ.

ⵜⵉⵙⵎⵉⴳⴰⵍ ⵏ ⵓⵙⴰⴳⴳⵯ: ⵉⵥⵕⴰ ⵓⵙⵉⵔⴰ ⴷ ⵉⵎⵛⴰⵛⴽⴰ ⴷ ⴼ ⵜⵓⵏⵖⵉⵍⵜ ⵉⴳⴳⵓⵔⴰⵏ ⵏ ⵜⵍⴳⴰⵎⵜ ⵜⴰⴳⵯⵏⵙⴰⵏⵜ ⴼ ⵓⵙⵏⵎⴰⵍ ⵏ ⵜⵙⵎⵉⴳⴰⵍ ⵖ ⵍⵍⴰⵏⵜ ⵜⵓⵎⴰⵢⵉⵏ ⴼ ⵓⵙⵎⵓⵏ ⵏ ⵓⵙⴰⵜⵉ ⴰⵎⴰⴷⴷⴰⵙ ⴷ ⵓⵙⵏⵍⵍⵉ ⵏ ⵜⴱⵔⵉⴷⵉⵏ ⴷ ⵜⵎⵙⴽⴰⵔ ⴷ ⵓⵙⵉⵙⴼⵉⵡ ⵏ ⵉⵡⵜⵜⴰ ⵏ ⵜⵙⵎⵉⴳⴰⵍ ⵏ ⵓⵙⴰⴳⴳⵯ ⴷ ⵉⴳⵔⴰⵏ ⵏ ⵓⵙⵡⵓⵔⵉ ⵏⵏⵙⵏⵜ ⴷ ⵡⴰⵏⴰⵡ ⵏ ⵜⵉⵍⴰⵍ ⵏⵏⵙⵏⵜ.

ⵉⵙⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⴼ ⵡⴰⵜⵉⴳ ⵏ ⵓⵙⴰⵜⵉ ⵉⵎⵎⴰⵍⴰⵏ  ⴽⵉⴳⴰⵏ ⵏ ⵓⴷⵎⴰⵡⵏ ⵖ ⵜⵡⵓⵔⵉ ⵏ ⵓⵙⵇⵇⵉⵎ ⵖ ⵓⵎⵏⵉⴷ ⵏ ⵜⵉⴹⴰⴼ.

ⴰⵣⵣⵔⴰⴼ: ⵉⴼⴼⵖ ⵓⵙⵉⵔⴰ ⴰⴷ ⵜⵉⵍⵉ ⵜⵖⵉⵎⵉⵜ ⵜⴰⴳⴷⵓⴷⴰⵏⵜ ⴰⵙⵙ ⵏ 8 ⴷⵓⵊⴰⵏⴱⵉⵔ ⵖ ⵜⵙⵔⴰⴳⵜ ⵜⵉⵙ 16, ⵉ ⵜⵖⵔⵉ ⴷ ⵓⵙⵜⴰⵢ ⵏ ⵉⴹⵕⵉⵚⵏ ⵉⵣⵣⵔⴰⴼⵏ ⵓⵊⴰⴷⵏⵉⵏ.

ⵉⵥⵕⴰ ⵓⵙⵉⵔⴰ ⵢⴰⵣⵏ ⵉ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵏⵜ ⵙⵏⴰⵜ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⴼ ⵓⵙⵏⵎⴰⵍⴰ ⵏ ⵡⴰⵜⵉⴳⵏ ⵏ ⵉⵎⵙⵙⵉⵖⵏ, ⴷ ⵓⵣⵣⵔⴰⵢ ⵏ ⵡⴰⵔⵔⴰⵜⵏ ⵏ ⵜⵎⵙⵙⵓⵔⵜ ⵙⴰⵎⵉⵔ ⵉ ⵚⴰⵃⴰ ⵏ ⵓⵡⴰⵏⴽ.

ⵜⵉⵙⵎⵓⵏⴰⵢ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ: ⵍⵍⵉⵖ ⵉⵣⵎⵎⵉⵎ ⵓⵙⵉⵔⴰ ⴰⵜⵉⴳ ⵏ ⵜⵉⵍⴰⵍ ⵏ ⵜⵙⵇⵇⵉⵎⵉⵏ ⵙⴳ ⵜⵉⵣⵡⵉⵔⵉ ⵏ ⵉⵎⴰⵍⴰⵙⵙ ⵖ ⵓⵣⵣⵔⴰⴼ ⵙ ⵜⵖⵔⵉ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⴼ ⵜⵏⵓⴼⴰ ⵏ ⵜⵎⵢⵉⵎⴰⵏⵜ ⴼ ⵉⵏⵚⵉⵕⵉⴼⵏ ⵉⵍⵉⴽⵟⵕⵓⵏⵉⵢⵏ ⵖ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ ⴷ ⵉⵎⵖⵔⵉⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ, ⴷ ⵓⵙⵏⴼⴰⵔ ⴼ ⵓⵙⴱⴷⴷⵉ ⵏ ⵓⵙⵙⵉⵔⴷ ⵏ ⵉⴷⵔⵉⵎⵏ ⵖ ⵜⵙⵇⵇⵉⵎⵜ ⵏ ⵜⵣⵔⴼⵜ ⴷ ⵓⵣⵣⵔⴰⴼ ⴷ ⵉⵣⵔⴼⴰⵏ ⵏ ⵓⴼⴳⴰⵏ.

ⵉⵣⵎⵎⵉⵎ ⵓⵙⵉⵔⴰ ⴰⵙⵏⴳⵉⴷⴷⵉ ⵏ ⵜⵙⵎⵉⴳⴰⵍ ⵏ ⵓⵙⴰⴳⴳⵯ ⵖ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⴷ ⵜⵙⵇⵇⵉⵎⵜ ⵏ ⵓⵙⵙⵍⵎⴷ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ ⴷ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ ⴷ ⵉⵎⵖⵔⵉⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ ⴷ ⵜⵙⵇⵇⵉⵎⵜ ⵏ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ, ⵉⵙⵙⴽⵜⵉ ⴷ ⴰⵜⵉⴳ ⵏ ⵉⵎⵔⵙⵉⵡⵏ ⵍⵍⵉ ⴼ ⵔⴰⴷ ⵙⵡⵓⵔⵉⵏⵜ: ⴰⵙⵓⵔⵙ ⵏ ⵜⵎⵖⴰⵔⵉⵏ ⴷ ⵉⵃⵏⵊⴰⵔⵏ ⵖ ⵙⵓⵔⵢⴰ ⴷ ⵍⵄⵉⵔⴰⵇ, ⵜⵉⵎⵔⵙⴰⵍ ⵏ ⵓⴼⵔⴰⴳ ⴰⵏⴰⵎⵓⵏ, ⵜⴰⵎⵀⵍⴰ ⵏ ⵉⵙⴰⴼⴰⵔⵏ, ⵜⵉⵎⵔⵙⴰⵍ ⵏ ⵜⵙⵏⵉⵊⵊⵉⵜ, ⵜⵉⵏⵎⴰⵇⵇⴰⵙⵉⵏ ⵏ ⵜⵎⴰⵡⴰⵙⵜ ⵏ ⵜⴷⵓⵙⵉ ⴼ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⴰⵙⵉⵔⴰ ⵏ ⵓⵙⵉⵍⵖ ⴰⵣⵣⵓⵍⴰⵏ ⴷ ⵓⵙⵙⵉⴷⵔ ⵏ ⵜⵡⵓⵔⵉ ⴷ ⵓⵙⵉⵔⴰ ⴰⵏⴰⵎⵓⵔ ⵏ ⵜⵉⴼⴰⵡⵜ ⴷ ⵡⴰⵎⴰⵏ ⵏ ⵜⵉⵙⵙⵉ.  

ⵜⴰⵣⴷⴰⵢⵜ ⴷ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ: ⵉⵖⵔⴰ ⵓⵙⵉⵔⴰ ⵉⵎⵛⴰⵛⴽⴰ ⴷ ⴼ ⵜⵓⵜⵔⴰ ⵅⴼ ⵜⴰⵏⵏⴰⵢⵜ ⵏ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵏⵎⵏⴰⴹ ⴼ ⵓⵣⵣⵔⴰⵢ ⵏ ⵜⵉⵕⵡⵉ ⵏ ⵜⵡⵓⵔⵉ ⵏ ⵜⵏⵓⴼⴰ ⵏ ⵓⵡⴰⵏⴽ ⵜⵜⵓⵙⵡⵓⴷⴷⵓⵏⵉⵏ ⵙ ⵜⵖⴰⵔⵙⵜ ⵜⴰⵙⵉⵎⴰⵏⵜ.

ⴰⵙⵏⴼⴰⵔ ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⴼ “ⵜⵙⵎⵖⵓⵔⵜ ⵜⴰⵏⴰⵎⵓⵔⵜ ⵉ ⵜⵣⵔⴰⵡⵉⵏ ⴷ ⵉⵔⵣⵣⵓⵜⵏ ⴼ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ”:  ⴳⵉⵙ ⵜⵓⵎⴰⵢⵉⵏ ⴼ ⵜⴼⴰⴷⵉⵡⵉⵏ ⵏ ⵜⵙⵎⵖⵓⵔⵜ ⴷ ⵜⴱⵔⵉⴷⵜ ⵏ ⵜⵏⴼⴳⵓⵔⵜ ⴷ ⵜⵎⵥⵍⴰⵢ ⵏⵏⵙ.

ⵉⵙⵓⵜⴳ ⵓⵙⵉⵔⴰ ⵜⵓⵎⴰⵢⵉⵏ ⵏ ⵓⵙⵏⴼⴰⵔ ⴰⴷ, ⵉⴼⴼⵖ ⴰⴷ ⵙⵓⵍ ⴼⵍⵍⴰⵙ ⵢⵉⵍⵉ ⵓⵎⴹⴰⴽⴰⵕ.