ⵉⴷⵔⵓ ⵎⴰⵙⵙ ⵎⵓⵃⴰⵎⵎⴰⴷ ⵖⵉⵢⵢⴰⵜ, ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⴳⵔⴰⵡ ⵏ ⵉⵎⴰⵍ ⴷ ⵓⴳⵔⴰⵡ ⵡⵉⵙ ⴽⵕⴰⴹ ⵏ ⵜⵙⵇⵇⵉⵎⵉⵏ ⵏ ⵉⵎⴰⵍ

ⵉⴷⵔⵓ ⵎⴰⵙⵙ ⵎⵓⵃⴰⵎⵎⴰⴷ ⵖⵉⵢⵢⴰⵜ, ⴰⵎⴰⵔⵉ ⵏ ⵓⵏⵙⵙⵉⵅⴼ, ⴳ ⵓⴳⵔⴰⵡ ⵏ ⵉⵎⴰⵍ ⴷ ⵓⴳⵔⴰⵡ ⵡⵉⵙ ⴽⵕⴰⴹ ⵏ ⵜⵙⵇⵇⵉⵎⵉⵏ ⵏ ⵉⵎⴰⵍ, ⴳ ⵙⴰⵏⵜⵢⴰⴳⵓ ⵏ ⵛⵛⵉⵍⵉ ⵓⵙⵙⴰⵏ ⵏ 13 ⴷ 14 ⵉⵏⵏⴰⵢⵔ 2025 ⵍⵍⵉ ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵏⴳ ⵛⵛⵉⵍⵉ ⴷ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵕⵓⴱⴱⴰ. 

ⵉⵡⴰⵜⵜⵙ ⵓⴼⵔⴰⵡ ⴰⵙⴷⵓⵙ ⵏ ⵜⵏⵏⵓⴱⴹⴰ ⴷ ⵓⵙⵉⴷⴼ ⵏⵏⵙ ⴳ ⵜⵎⵙⴽⵔⵜ ⵜⴰⴱⵕⵍⴰⵎⴰⵏⵉⵜ, ⴷ ⵜⵉⵍⴰⵍⵜ ⵏ ⵉⴱⵕⵍⴰⵎⴰⵏⵏ ⴳ ⵓⵙⵖⵉⵡⵙ ⴰⵙⵜⵔⴰⵜⵉⵊⵉ ⴷ ⵓⵙⵡⵉⵏⴳⵎ ⴳ ⵉⵎⴰⵍ ⴷ ⵓⵙⵔⵙ ⵏ ⵜⵙⵔⵜⴰⵢ ⴷ ⵉⵣⵣⵔⴰⴼⵏ ⴷ ⵜⵉⴹⴰⴼ ⴷ ⵓⵙⴽⵔ ⵏ ⵜⵖⵜⴰⵙⵜ. 

ⴷⵔⵓⵏ ⴳ ⵓⴳⵔⴰⵡⴰⴷ ⵉⴳⵯⵏⵙⴰⵙⵏ ⵏ ⵉⴱⵕⵍⴰⵎⴰⵏⵏ ⵙⴳ ⵓⵎⴰⴹⴰⵍ ⴷ ⵉⴳⵯⵏⵙⴰⵙⵏ ⵏ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵡⴰⵎⵓⵏ ⴰⵖⵔⵎⴰⵏ. 

ⵍⵍⴰⵏ ⴳ ⵓⴳⵔⴰⵡ ⴰⴷ ⵉⵙⵏⵜⵍⵏ ⴰⴷ: 

* ⵜⵉⵏⴰⵥⴰⵕⵉⵏ ⵏ ⵜⵖⴰⵔⵉⵡⵉⵏ ⵏ ⵜⵖⵉⵙⵜ ⵜⴰⵎⴳⵓⵔⴰⵏⵜ.

* ⵜⵉⵏⴰⵥⴰⵕⵉⵏ ⵜⵉⵙⵉⵍⴰⵏⵉⵏ ⵏ ⵜⵏⵏⵓⴱⴹⴰ ⵜⴰⵎⵣⵡⴰⵔⵓⵜ

* ⵜⵉⵣⵣⵔⴰⴼⵉⵏ ⵏ ⵓⵙⵡⵓⴷⴷⵓ ⵏ ⵢⵉⵍⵏ ⵖⵓⵙⵏⵉⵏ ⴷ ⵓⵙⵡⵓⴷⴷⵓ ⴰⵢⵍⴰⵏ ⴰⵙⵓⵍⴰⵏ.

* ⵜⵉⵏⴰⵥⴰⵕⵉⵏ ⵏ ⵉⵎⴰⵍ ⵏ ⵜⵓⵙⵙⵏⴰ ⵏ ⵉⵜⵔⴰⵏ, ⴰⵙⴷⵓⵙ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⴷ ⵓⴷⵎⴰⵡⵏ ⵏ ⵜⵣⵣⵉⴳⵣⵜ ⵜⴰⵎⴰⵙⵙⴰⵏⵜ.

* ⴰⵙⵏⴼⵍ ⴰⵎⵓⵟⵟⵓⵏ ⴷ ⵉⵎⵢⴰⵡⴰⴹⵏ ⵣⵣⵉⴳⵣⵏⵉⵏ. 

ⵍⵍⴰⵏⵜ ⴳ ⵓⴳⵔⴰⵡ ⴽⵉⴳⴰⵏ ⵏ ⵜⵖⵉⵎⵉⵜⵉⵏ ⵜⵉⵎⴰⵜⴰⵢⵉⵏ ⴷ ⵜⵉⵏⵏⴰⵡⵉⵏ, ⵔⴰⴷ ⵉⵙⵙⴼⵖ ⵉⵙⵖⵍⴰⴼ ⵡⴰⵜⵜⵙⵏⵉⵏ ⴰⵙⵙⵔⵇⴱ ⵏ ⵉⴱⵕⵍⴰⵎⴰⵏⵏ ⵉ ⵓⵙⴽⵔ ⴷ ⵓⵙⴷⵓⵙ ⵏ ⵜⵙⵇⵇⵉⵎⵉⵏ ⵏ ⵉⵎⴰⵍ, ⴷ ⵓⵙⴷⵓⵙ ⵏ ⵓⵎⵙⴰⵡⴰⵍ ⴷ ⵓⵎⵢⴰⵡⴰⵙ ⵊⴰⵔ ⵉⴱⵕⵍⴰⵎⴰⵏⵏ ⴳ ⵓⵎⴰⴹⴰⵍ ⵅⴼ ⵜⵎⵙⴰⵔⵉⵏ ⵏ ⵉⵎⴰⵍ, ⴷ ⵓⵙⵏⴰⵍ ⵏ ⵓⵣⵣⴳⵉⵔ ⵏ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ. 

ⵜⵍⵍⴰ ⵜⵙⵡⵉⵏⴳⵎⵜ ⵏ ⵜⵙⵇⵇⵉⵎⵉⵏ ⵏ ⵉⵎⴰⵍ ⴳ ⵜⴳⵉⵔⴰ ⵏ ⵜⴰⵙⵓⵜ ⵜⵉⵙ 20, ⵍⵍⵉⵖ ⵙⵙⵏⵜⵉⵏ ⵉⴱⵕⵍⴰⵎⴰⵏⵏ ⴰⵜⵉⴳ ⵏ ⵓⵙⵎⴰⵢⵏⵓ ⴷ ⵓⵙⵡⵉⵏⴳⵎ ⵏ ⵉⵎⴰⵍ. ⴳ 2018, ⵜⵙⵏⵎⴰⵍⴰ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵜⵎⵜⵜⴰ ⵎⵓⵏⵏⵉⵏ ⴰⴳⵔⴰⵡ ⵏ ⵉⵎⴰⵍ ⵏ ⵉⴱⵕⵍⴰⵎⴰⵏⵏ, ⵉⵖⵔⴰ ⵉ ⵜⵙⵇⵇⵉⵎⵉⵏ ⵏ ⵉⵎⴰⵍ ⴳ ⵎⴰⵕⵕⴰ ⵉⴱⵕⵍⴰⵎⴰⵏⵏ. ⴳ 2022, ⵉⵍⵍⴰ ⵓⴳⵔⴰⵡ ⴰⵎⴰⴹⵍⴰⵏ ⴰⵎⵣⵡⴰⵔⵓ ⵏ ⵜⵙⵇⵇⵉⵎⵉⵏ ⵏ ⵉⵎⴰⵍ ⴳ ⴱⵔⵓⴽⵙⵉⵍ-ⴱⵉⵍⵊⵉⴽⴰ, ⴷⵔⵓⵏ ⴳⵉⵙ ⵓⴳⴳⴰⵔ ⵏ 100 ⵏ ⵓⴱⵕⵍⴰⵎⴰⵏ ⵙⴳ ⵓⵎⴰⴹⴰⵍ, ⵉⴼⴼⵖ ⴷ ⴳⵉⵙ ⵓⵙⵉⵡⴹ ⵏ ⴱⵔⵓⴽⵙⵉⵍ, ⵍⵍⵉ ⵉⵖⵔⴰⵏ ⵉ ⵓⵙⴷⵓⵙ ⵏ ⵜⵉⵍⴰⵍⵜ ⵏ ⵉⴱⵕⵍⴰⵎⴰⵏⵏ ⴳ ⵓⵙⴱⴷⴷⵉ ⵏ ⵜⵏⴰⵥⴰⵕⵉⵏ ⵏ ⵉⵎⴰⵍ. ⵉⴷⵔⵓ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⴳⵔⴰⵡ ⴰⵎⴰⴹⵍⴰⵏ ⵡⵉⵙ ⵙⵉⵏ ⴳ ⵎⵓⵏⵜⵉⴼⵉⴷⵓ ⵜⴰⵎⴰⵥⵓⵏⵜ ⵏ ⵓⵕⵓⴳⵡⴰⵢ ⴳ ⵛⵓⵜⴰⵏⴱⵉⵔ 2023, ⵙ ⵓⴹⴼⵕ ⵏ ⵓⵙⴽⵔ ⵏ ⵜⴰⵢⵢⴰⵡⵜ ⵜⴰⴱⵕⵍⴰⵎⴰⵏⵉⵜ ⵜⴰⵏⵎⵓⵔⵜ ⵜⴰⵎⵖⵔⵉⴱⵉⵜ ⵏ ⵜⵙⵇⵇⵉⵎⵉⵏ ⵏ ⵉⵎⴰⵍ ⴳ ⵓⵙⵇⵇⵉⵎ.