ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2021-2026:
ⵜⴰⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵙⵍⵓⴼⵉⵏⵢⴰ: “ⵉⴳⴰ ⵍⵎⵖⵔⵉⴱ ⴰⵎⴷⴷⴰⴽⴽⵯⵍ ⴷ ⵓⵎⴷⵔⴰⵡ”
ⵜⵙⴷⴷⵉⴷ ⵎⴰⵙⵙⴰ ⵓⵔⵙⴽⴰ ⴽⵍⴰⴽⵓⵙⴰⵔ ⵣⵓⴱⴰⵏⵙⵉⵜⵛ, ⴰⵙⵙ ⵏ ⵡⴰⵢⵏⴰⵙ, ⵎⴰⵙ ⵉⴳⴰ ⵍⵎⵖⵔⵉⴱ ⵉ ⵙⵍⵓⴼⵉⵏⵢⴰ “ⴰⵎⴷⴷⴰⴽⴽⵯⵍ ⴷ ⵓⵎⴷⵔⴰⵡ ⵍⵍⵉ ⴷⴷ ⵜⴷⵔⵓ ⴰⵜⵉⴳⵏ ⴷ ⵉⵏⴰⵔⵓⵣⵏ ⵛⵛⴰⵔⵏⵉⵏ ⵉ ⵓⴼⵔⴰ ⴷ ⵓⴱⵓⵖⵍⵓ ⴷ ⵓⵏⵔⴰⵎⴰⵙ ⵉⵜⵜⵓⵙⵏⴼⴰⵍⵏ”, ⵜⵉⵏⵉ ⴳ ⵓⵎⴹⴰⴽⴰⵕ ⵏⵏⵙ ⴷ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵍⵍⴰⵏ ⴳ ⵓⵔⵣⴰⴼ ⵏ ⵜⵡⵓⵔⵉ ⵉ ⵜⴳⴷⵓⴷⴰⵏⵜ ⵏ ⵙⵍⵓⴼⵉⵏⵢⴰ, ⵜⵉⵏⵉ: “ⵎⵎⵔⵖ ⵍⵍⵉⵖ ⵜⵙⴽⵔ ⵙⵍⵓⴼⵉⵏⵢⴰ ⴳ ⵍⵎⵖⵔⵉⴱ ⴰⵎⴷⴷⴰⴽⴽⵯⵍ ⴷ ⵓⵎⴷⵔⴰⵡ ⵍⵍⵉ ⴷ ⵏⴷⵔⵓ ⴰⵜⵉⴳⵏ ⴷ ⵉⵏⴰⵔⵓⵣⵏ ⵛⵛⴰⵔⵏⵉⵏ ⵉ ⵓⴼⵔⴰ ⴷ ⵓⴱⵓⵖⵍⵓ ⴷ ⵓⵏⵔⴰⵎⴰⵙ ⵉⵜⵜⵓⵙⵏⴼⴰⵍⵏ ”.
ⵜⵉⵏⵉ ⵎⴰⵙ ⴳⴰⵏ ⵉⵎⴹⴰⴽⴰⵕⵏ ⴰⴷ ⵜⴰⵎⵍⴷⴰ ⵏ ⵓⵙⴷⴷⵉ ⵏ ⵜⵣⴷⴰⵢⵉⵏ ⵥⵉⵍⵏⵉⵏ ⵊⴰⵔ ⵍⵎⵖⵔⵉⴱ ⴷ ⵙⵍⵓⴼⵉⵏⵢⴰ, ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⵊⴰⵔ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵙⵍⵓⴼⵉⵏⵢⴰ.
ⵜⵙⴰⵡⵍ ⵓⵍⴰ ⴼ ⵜⵎⵙⵙⴽⵯⵜⵉⵜ ⵏ ⵓⵏⵔⴰⵎⴰⵙ ⵉⵜⵜⵓⵣⵎⵎⴰⵎⵏ ⵊⴰⵔ ⵜⵉⵎⵔⵙⴰⵍ ⵜⵉⵣⵣⵔⴰⴼⵉⵏ ⴳ ⵓⵔⵣⴰⴼ ⵏⵏⵙ ⵉ ⵍⵎⵖⵔⵉⴱ ⴳ ⵏⵓⵡⴰⵏⴱⵉⵔ 2022, ⵖ ⵉⵍⵍⴰ ⵓⵙⴷⴷⴻⴷ ⴼ ⵓⵙⴷⵓⵙ ⵏ ⵜⵣⴷⴰⵢⵉⵏ ⴷ ⵓⵙⴷⵓⵙ ⵏ ⵓⵎⵙⴰⵡⴰⵍ ⵊⴰⵔ ⵜⵉⵎⵔⵙⴰⵍ ⵜⵉⵣⵣⵔⴰⴼⵉⵏ.
ⵜⵙⴷⴷⵉⴷ ⵎⴰⵙⵙⴰ ⵣⵓⴱⴰⵏⵙⵉⵜⵛ ⵎⴰⵙ ⵉⴳⴰ ⵓⵎⴹⴰⴽⴰⵕ ⴷ ⵎⴰⵙⵙ ⵟⴰⵍⴱⵉ ⵍⵄⴰⵍⴰⵎⵉ ⵜⴰⵎⵍⴷⴰ ⵏ ⵓⵙⵉⵙⴼⵉⵡ ⵏ ⵓⵙⵉⵡⴹ ⵉⵛⵛⴰⵔⵏ ⵍⵍⵉ ⵉⵣⵎⵎⵉⵎ ⵎⴰⵙⵙ ⵏⴰⵚⵉⵕ ⴱⵓⵕⵉⵟⴰ, ⴰⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⵉⴱⵉⵢⵏ ⵏ ⴱⵕⵕⴰ, ⴷ ⵜⵏⴳⴳⵯⵓⵜ ⵏⵏⵙ ⴳ ⵙⵍⵓⴼⵉⵏⵢⴰ, ⵜⴰⵏⵢⴰ ⴼⴰⵢⵓⵏ, ⴳ ⵡⴰⵢⵢⵓⵔ ⵏ ⵢⵓⵏⵢⵓ ⵉⵣⵔⵉⵏ, ⴳ ⵕⵕⴱⴰⵟ, ⴳ ⵉⴳⵔⴰⵏ ⵏ ⵜⴷⵍⵙⴰ ⴷ ⵓⵙⵙⵍⵎⴷ ⴷ ⵜⵎⴰⵙⵙⴰⵏⵉⵏ ⴷ ⵜⵡⵓⵔⵉⵡⵉⵏ ⴷ ⵜⵥⴹⴰⵕⵜ ⴷ ⵓⴼⵔⴰⴳ ⵏ ⵡⴰⵡⵏⴰⴹ ⴷ ⵜⴻⵜⵉⵇⵏⵉⵢⵉⵏ ⵜⵉⵣⴳⵣⴰⵡⵉⵏ.
ⵜⵉⵏⵉ ⵎⴰⵙ ⴳⴰⵏ ⵉⵎⴹⴰⴽⴰⵕⵏ ⵜⴰⵎⵍⴷⴰ ⵏ ⵓⵙⴷⴷⵉⴷ ⴼ ⵡⴰⵜⵉⴳ ⵏ ⵓⵎⵙⴰⵡⴰⵍ ⴰⵙⵓⵍⴰⵏ ⵊⴰⵔ ⵍⵎⵖⵔⵉⴱ ⴷ ⵙⵍⵓⴼⵉⵏⵢⴰ ⵅⴼ ⵜⵎⵙⴰⵔⵉⵏ ⵏ ⵜⵏⴼⵔⵓⵜ ⴷ ⵓⵣⵡⴰⴳ ⴷ ⵓⵍⵜⴰⵖ ⴰⵙⵉⵏⵔⴰⵏ ⵉ ⵓⵙⴷⵓⵙ ⵏ ⵏ ⵓⵎⵢⴰⵡⴰⵙ ⴳ ⵓⵙⴱⴷⴷⵉ ⵏ ⵓⵣⵡⴰⴳ ⴰⵔⵓⵍⴳⵉⵏ.
ⵜⵉⵏⵉ ⵎⴰⵙⵙⴰ ⵣⵓⴱⴰⵏⵙⵉⵜⵛ: “ⵏⴽⴽⵉⵏ ⴼⵔⴽⵖ ⵎⴰⵙ ⵔⴰⴷ ⵜⵣⵣⵉⴳⵣ ⵙⵍⵓⴼⵉⵏⵢⴰ ⴷ ⵍⵎⵖⵔⵉⴱ ⴰⵎⵙⴰⵡⴰⵍ ⵏⵏⵙⵏ ⵅⴼ ⵜⵎⵙⴰⵔⵉⵏ ⵛⵛⴰⵔⵏⵉⵏ ⴳ ⵉⵙⵡⵉⵔⵏ ⴰⵏⵎⵏⴰⴹ ⴷ ⵓⴳⵔⴰⵖⵍⴰⵏ”, ⵜⵙⴷⴷⵉⴷ ⵎⴰⵙⵙ ⵜⵜⴰⵡⵙ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⵜⵉⵍⴰⵍⵜ ⵜⴰⵙⵉⵍⴰⵏⵜ ⴳ ⵓⵙⴰⵜⵉ ⴰⴷ.
ⵍⵍⴰⵏ ⵉⵎⴹⴰⴽⴰⵕⵏ ⴰⴷ ⵙ ⵜⵉⵍⵉⵜ ⵏ ⵎⴰⵙⵙ ⵄⴰⵣⵣ ⴷⴷⵉⵏ ⴼⵔⵃⴰⵏ, ⴰⵎⵙⵇⵇⴰⴷ ⵏ ⵍⵎⵖⵔⵉⴱ ⴳ ⵙⵍⵓⴼⵉⵏⵢⴰ.