ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵜⵖⵉⵎⵉⵜ ⵜⴰⵎⴳⴳⴰⵔⵓⵜ ⵏ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⴼ: ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⴳ ⵢⵉⴳⵔ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ

ⵙ ⵉⵙⵎ ⵏ ⵕⴱⴱⵉ 

ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ,

ⵎⴰⵙⵙⴰ ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ,

ⵉⵏⴱⴳⵉⵡⵏ ⵄⵣⵣⴰⵏⵉⵏ ⵏ ⵍⵎⵖⵔⵉⴱ,

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

 ⴷⴼⴼⵉⵔ ⵙⵉⵏ ⵡⵓⵙⵙⴰⵏ ⵏ ⵓⵎⴹⴰⴽⴰⵕ ⴼ ⵓⵙⵏⵜⵍ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ, ⴰⵎⵏⴰⴹ, ⴰⵏⴰⵡⵏ, ⵉⵡⵜⵜⴰⵙⵏ, ⴰⴷⵖⴰⵔ ⵏⵏⵙ ⴳ ⵉⴱⵔⵉⴷⵏ ⵏ ⵉⵙⵎⵓⵜⵜⵉⵢⵏ ⵉⴷⵉⵎⵓⵇⵔⴰⵟⵉⵢⵏ, ⵏⵙⵎⴷ ⴰⵙⵙ ⴰⴷ ⵜⵉⵏⴰⵡⵜ ⴰⴷ ⵜⴰⴳⵔⴰⵖⵍⴰⵏⵜ ⵉⵍⴰⵏ ⴰⴷⴷⵓⵔ ⵙ ⵓⴼⵔⴰⴳ ⴰⵎⴰⵜⵜⵓⵢ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵍⵍⵉ ⴷ ⵢⵓⵣⵏ ⵜⴰⴱⵔⴰⵜ ⵜⴰⵎⴰⵜⵜⵓⵢⵜ, ⵉⴷⵔⴰⵏ ⵙ ⵡⴰⵎⵎⴰⴽⵏ ⵏⵏⵙ, ⵉⴳⴰⵏ ⵜⵉⵏ ⵉⵎⴰⵍ, ⴳ ⵉⵍⵍⴰ ⵓⴱⵓⵔⵣ ⵙ ⵎⴰⴷ ⵜⵙⴽⵔ ⴳ ⵉⵎⵓⴽⴽⵏⵏ ⵙ ⵜⵏⴰⵔⴰ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ.  

ⵙ ⵓⴼⵔⴰⴳ ⴰⴳⵍⴷⴰⵏ ⴰⵎⴰⵜⵜⵓⵢ, ⵜⵍⴰ ⵜⵉⵏⴰⵡⵜ ⴰⴷ ⴰⵜⵉⴳ ⵍⵍⵉⵖ ⵜⵙⵎⵓⵏ ⵡⵉⵍⵍⵉ ⵍⵍⴰⵏⵉⵏ ⴳ ⵜⵡⵓⵔⵉ ⵏ ⵓⵙⵓⵎⵓ ⴷ ⵓⵎⵙⵓⵔⵓⴼ ⵍⵍⵉ ⵉⴳⴰⵏ ⵜⵉⵎⵙⴽⵔⵜ ⵉⵜⵜⵓⵔⵛⴰⵎⴰⵏ ⵙ ⵓⴼⵔⵉⵙ ⴰⵎⵖⵔⵉⴱⵉ, ⴷ ⵜⴳⵔⴰⵡⵉⵏ ⵜⵉⵣⵔⴼⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵜⵎⵖⵔⵉⴱⵉⵢⵉⵏ, ⴷ ⵉⴱⵕⵍⴰⵎⴰⵏⵉⵢⵏ, ⴷ ⵜⵏⴱⴰⴹⵜ ⵜⴰⵣⵣⵔⴰⴼⵜ, ⴷ ⵡⴰⵎⵓⵏ ⴰⵖⵔⵎⴰⵏ ⴰⵏⴰⵎⵓⵔ ⵉⵙⵡⵓⵔⵉⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ. 

ⴳ ⵓⵎⴰⴹⴰⵍ ⵏ ⵡⴰⵙⵙ ⴰⴷ, ⴳ ⵓⵎⵏⴰⴹ ⵏ ⵓⴱⵓⵖⵍⵓ ⵏ ⵉⵏⴰⵡⵏ ⵏ ⵓⵙⵏⵓⵃⵢⵓ ⵔ ⵜⵏⵉⵎⴰⵏⵉⵏ ⵜⵉⵏⴰⵎⵓⵔⵉⵏ, ⵏⵙⵖⴰⵡⵙⴰ ⵙ ⵡⴰⵏⴰⵡ ⵏ ⵉⵏⵎⵓⵇⵇⴰⵕⵏ ⴰⴷ, ⵍⵍⵉ ⵣⴷⵉⵏⵉⵏ ⴷ ⵜⵎⵙⴰⵔⵉⵏ ⵍⵍⴰⵏⵉⵏ ⴳ ⵓⴳⵯⵏⵙ ⵏ ⵜⴼⴳⴰⵏⵉⵏ, ⴷ ⵓⴼⵔⴰⴳ ⴷ ⵉⵣⵔⴼⴰⵏ ⵙ ⵡⴰⵎⵎⴰⴽⵏ ⵏⵏⵙⵏ ⴷ ⵜⴰⵙⵓⵜⵉⵏ ⵏⵏⵙⵏ ⵥⵍⵉⵏⵉⵏ, ⵜⵉⵎⵙⴰⵔⵉⵏ ⵉⵎⵓⵎⵏⵏ ⵙ ⵜⵎⵢⵉⴷⵉⵔⵜ ⵉⵛⵛⴰⵔⵏ ⴷ ⵓⵎⵣⵔⴰⵢ. 

ⵏⵎⵎⵔ ⴱⴰⵀⵔⴰ, ⴰⴷ ⵏⵙⵓⵏⴱⴳ ⵜⵓⴼⵔⵉⵢⵉⵏ ⵙⴳ ⵎⴰⵕⵕⴰ ⵉⵎⵏⵥⴰⵡ ⴷ ⵜⵙⴳⴳⵉⵡⵉⵏ ⵏ ⵍⵎⵖⵔⵉⴱⵏ ⴷ ⵜⴳⵔⴰⵡⵉⵏ ⵜⵉⴳⵔⴰⵖⵍⴰⵏⵉⵏ.  ⵏⵎⵎⵔ ⴱⴰⵀⵔⴰ, ⵍⵍⵉⵖ ⵏⵙⵏⵓⴱⴳ ⵉⵅⴰⵜⴰⵔⵏ ⵙⴳ ⵉⴼⵔⵉⵇⵢⴰ ⵙⴳ ⵉⴳⵔⴰⵏ ⵏ ⵉⵣⵔⴼⴰⵏ ⴷ ⵓⵙⵡⵉⵏⴳⵎ ⴷ ⵜⵙⴽⵍⴰ, ⴳⵉⵙⵏ ⴰⵎⴰⵔⴰ ⴰⵅⴰⵜⴰⵔ ⴰⴼⵔⵉⵇⵉ ⵍⵍⵉ ⵢⵉⵡⵉⵏ ⵜⴰⵙⵎⵖⵓⵔⵜ ⵏ ⵏⵓⴱⵍ ⴰⵙⵍⵎⴰⴷ ⵡⵓⵍ ⵙⵓⵢⵉⵏⴽⴰ ⵢⴰⵏ ⴳ ⵜⵎⵉⵜⴰⵔ ⵜⵉⵅⴰⵜⴰⵔⵉⵏ ⵏ ⵜⴷⵍⵙⴰ ⵜⴰⴼⵔⵉⵇⵉⵜ. 

ⵙⵙⵓⵔⴼⴰⵜ ⵉⵢⵉ ⵉⵖ ⵙⴰⵡⵍⵖ ⴼ ⵉⴼⵔⵉⵇⵢⴰ, ⵓⵔ ⵉⴳⵉ ⵍⵍⵉⵖ ⵏⵍⵍⴰ ⴳ ⵡⴰⴽⴰⵍ ⴰⴼⵔⵉⵇⵉ ⵉⴳⴰⵏ ⴰⵇⴱⵓⵔ, ⵎⴰⵛⵛ ⴰⵛⴽⵓ ⵏⵙⵙⵏ ⵜⴰⵙⵙⴰⵙⵜ ⵏⵏⵙ ⴳ ⵎⴰⴷ ⵉⵣⵔⵉⵏ ⴳ ⵓⵣⵎⵣ ⵏ ⵓⵙⴷⵓⵔⵔⵉ, ⴷ ⵡⴰⵔⴰⵣⵔⴼ, ⴷ ⵜⴰⵙⵙⴰⵙⵜ ⵏⵏⵙ ⴰⵙⵙ ⴰⴷ ⴷ ⵓⵏⴳⵔⴰⵡ ⴰⴳⵔⴰⵖⵍⴰⵏ ⵖ ⵓⵔ ⵜⵍⵍⵉ ⵜⵣⵔⴼⵜ, ⵖ ⴰⴽⴽⴰⵏ ⵉⴼⵔⵉⵇⵉⵢⵏ ⴰⵜⵉⴳ ⵏ ⵡⴰⵢⴷⴰ ⵏ ⵓⵙⴷⵓⵔⵔⵉ, ⴷ ⵡⴰⵜⵉⴳ ⵏ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵡⴰⵔⵜⴰⵣⵔⴼⵜ ⵏ ⵜⵏⵏⵓⴱⴹⴰ ⵜⴰⵎⴰⴹⵍⴰⵏⵜ. 

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ,

ⴷ ⴰⵏⵙⵙⵉⵅⴼ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ, ⴷ ⵓⴱⵕⵍⴰⵎⴰⵏⵉ ⵉⴽⵉⴳⴰⵏ ⵏ ⵜⵉⴽⴽⴰⵍ, ⵀⴰⵜⵉ ⴷⴷⵔⵖ, ⴷ ⵣⵔⵉⵖ ⴳ ⵓⴷⵖⴰⵔ ⵏ ⵓⵎⴰⵙⴰⵢ ⵉⵙⴽⴰⵔⵏ, ⴷ ⵜⴷⵉⵏⴰⵎⵉⵜⵉⵏ ⵏ ⵉⵎⵓⴽⴽⵏ ⵉⵣⵣⵔⴰⴼⵏ ⴷⵔⴰⵏⵉⵏ ⵍⵍⵉ ⴳⴰⵏ ⵉⵙⵖⵍⴰⴼ ⵏ ⵜⴳⵔⴰⵡⵜ ⵏ ⵓⵙⵓⵎⵓ ⴷ ⵓⵎⵙⵓⵔⵓⴼ ⴳ ⵍⵎⵖⵔⵉⴱ ⵉⵡⵙⵏⵉⵏ ⴳ ⵓⵙⵖⵣⵏ ⴷ ⵓⴷⵔⵉⵣ ⵏ ⵉⵣⵣⵔⴰⴼⵏ, ⴰⵢⵍⵍⵉ ⵉⴳⴰⵏ ⴰⵙⴽⵔ ⵏ ⵉⵙⵖⵍⴰⴼ ⵏ ⵜⴳⵔⴰⵡⵜ, ⴷ ⵓⵙⴽⵔ ⵏ ⵓⵣⵔⴼ, ⴷ ⵓⴼⵔⴰⴳ ⵏ ⵜⵉⵍⵉⵜ ⴷ ⵉⵎⴰⵍ ⵏ ⵜⵎⴰⵣⵉⵔⵜ ⵏⵏⵖ, ⵍⵍⵉⵖ ⵉⴳⴰ ⵓⵙⴽⵔ ⵏ ⵜⴳⵔⴰⵡⵜ ⵎⴽ ⵍⵍⵉ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ: “ⵜⴰⵖⵜⴰⵙⵜ ⵏ ⵜⵅⵅⵓⵜⵔⴰ ⴷ ⵜⵉⵔⴰⵜ”.

ⵓⵔ ⴳⴰⵏ ⵖⴰⵙ ⵉⵎⵓⴽⵏⵏ ⴷⵔⴰⵏⵉⵏ ⵍⵍⵉ ⵜⵙⵖⵣⵏ ⵜⵎⴰⵣⵉⵔⵜ ⵏⵏⵖ, ⵎⴰⵛⵛ ⵍⵍⴰⵏ ⵓⵍⴰ ⴼⴽⵉⴳⴰⵏ ⵏ ⵉⴳⵔⴰⵏ ⴷ ⵜⵎⵙⴰⵔⵉⵏ ⵏ ⵜⵙⵔⵜⵉⵜ ⴷ ⵜⴷⵎⵙⴰ ⴷ ⵡⴰⵎⵓⵏ ⴷ ⵜⴷⵍⵙⴰ, ⴷ ⵜⴱⵔⵖⴰⵣⵜ ⴳ ⵜⵖⵔⵉ ⵏ ⵓⵎⵣⵔⵓⵢ, ⴷ ⵓⵙⵏⴼⵍ ⵏⵏⵙ ⵉ ⵓⵎⵣⵔⵓⵢ ⵉⴷⴷⵔⵏ ⵉⵜⵜⴰⵡⵙⵏ ⴳ ⵜⴰⵎⵓⵏⵜ, ⴷ ⵓⵎⵓⴽⵏ ⵜⴰⵔ ⵜⴰⴳⵯⵉⵜ ⴷ ⵜⵎⵢⵉⵎⴰⵏⵜ ⴳ ⵎⴰⴷ ⵏⵙⴽⵔ. 

ⵎⴰ ⴰⴷ ⵢⵉⵡⵉⵏ ⴰⴷⵓⵙⵜⵓⵔ ⵏ 2011 ⵙ ⵜⵓⵎⴰⵢⵜ ⵏⵏⵙ ⵜⵉⵍⴻⵍⵍⵉⵜ, ⵍⵍⵉ ⵢⴰⴽⴽⴰⵏ ⵉⵣⵔⴼⴰⵏ ⴰⴽⴽⵯ, ⵉⵙⵔⵙ ⵜⵉⵔⵙⴰⵍ ⴷ ⵜⵓⵎⴰⵢⵉⵏ ⵍⵍⵉ ⵜⵏ ⵉⴹⵎⵏⵏ. 

ⴰⵔ ⵉⵙⴽⴰⵔ ⵍⵎⵖⵔⵉⴱ, ⴷ ⵎⴰⴷ ⵉⵙⴽⴰⵔ, ⵜⴰⵔ ⵜⴰⴱⴱⴰⵢⵢⵉⵏ ⵀⵔⵛⵏⵉⵏ, ⵙ ⵓⵚⴽⵓ ⴼ ⵓⵙⴳⵓⴷⵉ, ⴳ ⵓⵙⴰⵜⵉ ⵏ ⵓⵎⵙⴰⵙⴰ. ⵎⴰ ⵏⵏ ⵙⴳ ⵜⵉⵎⵉⵜⴰⵔ ⵏ ⵡⴰⵏⴰⵡ ⴰⵎⵔⵙⵍⴰⵏ ⴷ ⵓⴷⵉⵎⵓⵇⵔⴰⵟⵉ ⴰⵎⵖⵔⵉⴱⵉ. 

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ,

ⵎⴽ ⵍⵍⵉ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ, ⴰⵢⵍⵍⵉ ⵉⵙⴽⵔ ⵍⵎⵖⵔⵉⴱ ⴳ ⵢⵉⴳⵔ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ, ⵉⴳⴰ ⴳ ⵜⵎⵉⵜⴰⵔ ⵏ ⵓⵎⵣⵔⵓⵢ ⴰⵙⵔⵜⴰⵏ ⵏ ⵜⵎⴰⵣⵉⵔⵜ ⵏⵏⵖ. ⵉⴳ ⵙⴳ ⵜⵓⵏⵥⵉⵥⵟ ⵜⴰⴳⵍⴷⴰⵏⵜ, ⴷ ⵜⵥⵍⴰⵢⵜ ⵏ ⵍⵎⵖⵔⵉⴱ, ⵙ ⵓⵎⵣⵔⵓⵢ ⵏⵏⵙ ⴷ ⵜⵎⵔⵙⴰⵍ ⵏⵏⵙ. 

ⴰⵔ ⵎⵎⴰⵙⵍⴰⵏ ⵉⴰⵙⴰⵡⵓⵔⵏ ⵍⵍⵉ ⵉⴼⵔⴳ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⵎⴰⵕⵕⴰ ⵉⴳⵔⴰⵏ, ⵉⵡⵉⵣ ⴼ ⴰⴷ ⵜⵟⵟⵉⴼ ⵜⴷⵉⵎⵓⵇⵔⴰⵟⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴰⵏⴰⵎⴽ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⴷⵍⵙⴰⵏ ⵙ ⵉⵎⵏⴰⴷⵏ ⵉⴷⵖⴰⵔⴰⵏⵏ ⴷ ⵉⵏⴰⵎⵓⵏⵏ. 

ⵉⴳⴰ ⴰⵢⵍⵍⵉ ⵏⵙⴽⵔ ⴰⵢⴷⴰ ⴰⵏⴰⵎⵓⵔ ⴷ ⵓⵏⴼⴳⴰⵏ, ⵍⵍⵉ ⴷ ⵉⵇⵇⴰⵏ ⵓⴼⵔⴰⴳ ⵉ ⵜⴰⵙⵓⵜⵉⵏ ⴷ ⵢⵓⵛⴽⴰⵏ. ⵉⴳⴰ ⵙⴳ ⵜⵉⵔⵙⴰⵍ ⵍⵍⵉ ⴷ ⵉⵇⵇⴰⵏ ⵓⵙⵙⴰⵔⵓ ⵉ ⴽⵉⴳⴰⵏ ⵏ ⵜⵣⵣⵉⴳⵣⵜ ⴷ ⵓⵙⵓⵜⴳ ⴷ ⵉⵎⴰⵍ, ⴷ ⵡⴰⵍⴰⵢ ⵏ ⵜⵏⴰⵥⴰⵕⵉⵏ ⴷⴰⵜ ⵏⵏⵖ, ⴷ ⵜⵣⵣⵉⴳⵣⵜ ⵏ ⵜⵎⴰⵣⵉⵔⵜ ⵏⵏⵖ ⴳ ⵓⵙⴽⵔ ⵏ ⵜⴱⵔⴰⵜ ⵏⵏⵙ ⵜⴰⵎⵣⵔⴰⵢⵜ, ⵎⴽ ⵍⵍⵉ ⴱⴷⴷⴰ ⵜⴳⴰ ⵜⴰⵎⴰⵣⵉⵔⵜ ⵏ ⵓⴼⵔⴰ ⴷ ⵓⵙⵏⵓⴱⴳ ⴷ ⵓⵏⵏⵓⵕⵥⵎ. 

ⵉⴳⴰⵡ ⵡⴰⵢⴷⴰ ⴰⴷ, ⴰⵖⴱⴰⵍⴰ ⵏ ⵓⵙⵓⵜⴳ, ⵉⴳ ⵜⵉⵡⵉⵣⵉ ⵉ ⵓⵙⴱⴷⴷⵉ ⵏ ⵜⵏⴰⵥⴰⵕⵉⵏ ⵏ ⵍⵎⵖⵔⵉⴱ ⴰⵙⵙ ⴰⴷ, ⴷ ⵓⵎⴰⴹⴰⵍⴰ ⵏ ⵡⴰⵙⵙⴰ ⴷ, ⴳ ⵓⵎⵏⴰⴷ ⴳ ⵍⵍⴰⵏ ⵉⵙⵏⴼⵍⵏ ⴷⵔⴰⵏⵉⵏ ⴷ ⵜⵏⴰⵥⴰⵕⵉⵏ ⵜⵉⵎⴰⵢⵏⵓⵜⵉⵏ ⴳ ⵎⴰⵕⵕⴰ ⵉⴳⵔⴰⵏ. 

ⵉⴳⴰ ⴳ ⵜⵎⴰⵙⴰⵢⵜ ⵏⵏⵖ ⴰⵙⵙ ⴰⴷ ⴷ ⵉⵎⵙⴽⴰⵔⵏ ⴷ ⵜⵓⴼⵔⵉⵢⵉⵏ ⴰⴷ ⵏⵙⵡⵓⵔⵉ ⵉ ⵓⵙⵙⵕⵚ ⵏ ⵜⵎⵙⴽⵔⵜ ⵜⴰⵣⵔⴼⴰⵏⵜ ⴷ ⵜⵎⵔⵙⵍⴰⵏⵜ, ⴷ ⵓⵙⵎⵖⵔ ⵏ ⵜⵥⴹⴰⵕⵉⵏ ⵉ ⵜⵣⵣⵉⴳⵣⵜ ⵏ ⵜⵎⴰⵖⵜ ⵏ ⵍⵊⵉⵀⴰⴷ ⴰⵅⴰⵜⴰⵔ. 

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ,

ⵙ ⵡⴰⵜⴳ ⵏ ⵎⴰ ⵜⴷⵔⵓⵎ ⴳ ⵜⵉⵏⴰⵡⵜ ⴳ ⵙⵉⵏ ⵡⵓⵙⵙⴰⵏ ⴰⴷ, ⵔⴰⴷ ⵉⵥⵉⵍ ⴰⴷ ⵜ ⵏⵏ ⵜⵣⴰⵢⴷⵎ ⵏ ⵡⴰⵢⴷⴰ ⵏ ⵜⴷⵍⵙⴰ ⵜⴰⵣⵔⴼⴰⵏⵜ ⵜⴰⵎⵖⵔⵉⴱⵉⵜ ⴷ ⵜⴳⵔⴰⵖⵍⴰⵏⵜ ⵙ ⵜⵉⵔⵔⴰ ⴷ ⵜⵥⵕⵉⴳⵜ ⴳ ⵜⵓⵏⵖⵉⵍⵜ ⵖ ⵔⴰⴷ ⵉⵜⵜⴷⵔⵓ ⴳ ⵓⵎⵏⴰⴹ ⵎⵇⵇⵓⵕⵏ, ⵉⵓⴼⵔⴰⴳ ⵏ ⵜⵎⴽⵯⵜⵉⵜ ⴷ ⵓⵙⴱⵓⵖⵍⵓ ⵏ ⵓⵎⴹⴰⴽⴰⵕ ⴰⵎⴰⴷⵍⴰⵏⴼ ⵢⵉⴳⵔ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ ⴷ ⵉⵎⴰⵙⵙⵏ ⵏⵏⵙ. 

ⵜⴰⵏⵎⵎⵉⵔⵜ ⴼ ⵜⵡⵉⵣⵉ ⴷ ⵓⵙⵙⴼⵍⴷ ⵏⵏⵓⵏ.