ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵕⵥⵥⵓⵎ ⵏ ⵜⵙⵎⵓⵏⵉ ⵉⵥⵍⵉⵏ ⵜⵉⵙ 30 ⵏ ⴼⵓⴱⵔⵉⵍ

ⵙ ⵉⵙⵎ ⵏ ⵕⴱⴱⵉ 

* ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, 

* ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⴷ ⵜⵏⵙⵙⵉⵅⴼⵉⵏ ⵏ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⴳ ⵜⵎⵉⵣⴰⵔ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⴷ ⵍⴽⴰⵔⴰⵢⵉⴱ ⴷ ⵍⵎⵉⴽⵙⵉⴽ, ⵉⵏⴳⴳⵯⴰ ⵄⵣⵣⴰⵏⵉⵏ

* ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵉⴽⴰⴱⴰⵕⵏ,

* ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⴳⵎⴰⵎⵏ ⵏ ⵜⴰⵢⵢⴰⵡⵉⵏ ⵜⵉⵏⴰⵎⵓⵔⵉⵏ, 

* ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⵖⵓⵔⵉ ⵜⵓⵎⵔⵜ ⵉⴳⴳⵓⵜⵏ, ⵍⵍⵉⵖ ⴷⵉⴷⵓⵏ ⵎⴰⴳⴳⴰⵔⵖ ⴰⵙⵙ ⴰⴷ, ⵉ ⵓⵙⴼⵓⴳⵍⵓ ⵏ ⵙⵉⵏ ⵉⵎⵣⵔⵓⵢⵏ ⵎⵇⵇⵓⵕⵏⵉⵏ ⴷⴰⵔ ⵓⵏⵎⵓⵇⵇⴰⵔ ⵏⵏⵖ ⴰⴱⵕⵍⴰⵎⴰⵏⵉ. ⴰⵎⵣⵡⴰⵔⵓ ⵉⴳⴰ ⴰⵙⴼⵓⴳⵍⵓ ⵏ 30 ⵏ ⵓⵙⴳⴳⵯⴰⵙ ⴼ ⵓⵙⴽⵔ ⵏ ⵜⵎⴰⴷⴷⴰⵙⵜ ⵏⵏⵓⵏ, ⵡⵉⵙ ⵙⵉⵏ ⴰⵙⴼⵓⴳⵍⵓ ⵏⵏⵖ ⵏ 10 ⵏ ⵓⵙⴳⴳⵯⴰⵙ ⴼ ⵜⵉⵍⵉⵜ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴷ ⴰⴳⵎⴰⵎ ⵉⵎⵥⵕⵉ ⴳ ⵓⵏⵎⵓⵇⵇⴰⵕ. 

ⵜⵉⵏⴳⴳⵯⴰ ⴷ ⵉⵏⴳⴳⵯⴰ, ⴳⴰⵏ ⵜⴰⵎⵍⴷⴰ ⵏ ⵉⵥⵉⵕ ⵏ ⵓⵙⴳⵓⴷⵉ ⵏ ⵜⵎⴰⴷⴷⴰⵙⵜ ⵏⵏⵓⵏ ⵜⴰⴱⵕⵍⵎⴰⵏⵉⵜ ⵃⵎⴰ ⴰⴷ ⵏⵙⵓⵜⴳ ⵎⴰⴷ ⵙⴽⵔⵏⵜ ⵜⵎⵉⵣⴰⵔ ⵏⵏⵓⵏ ⴳ ⵉⴳⵔⴰⵏ ⵏ ⵜⴷⵉⵎⵓⵇⵔⴰⵟⵉⵜ ⴷ ⵜⴳⵎⵉ, ⴷ ⵓⵙⵓⵜⴳ ⴰⵙⴳⴰⵡⴰⵏ ⵉⵍⴰⵏ ⴷⴰⵔⵏⵖ ⴰⴱⵓⵔⵣ ⴳ ⵍⵎⵖⵔⵉⴱ. ⴷ ⵜⴰⵎⵍⴷⴰ ⴰⴷ ⵏⵥⵕ ⵜⵉⵣⴷⴰⵢⵉⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴰⴽⴷ ⵜⵉⵎⵉⵣⴰⵔ ⵏⵏⵓⵏ ⴳ ⵓⵎⵢⴰⵡⴰⵙ ⴰⵙⵔⵜⴰⵏ ⴷ ⵓⴷⵎⵙⴰⵏ, ⴷ ⵓⵍⴰ ⵉⴱⵕⵍⴰⵎⴰⵏⵏ ⴷ ⵜⵏⴱⴰⴹⵉⵏ ⴷ ⵉⵎⵙⴽⴰⵔⵏ ⵉⴷⵎⵙⴰⵏⵏ. 

ⵔⵉⵖ ⴰⴷ ⵙⵏⵉⵎⵎⵔⵖ ⵛⵉⴳⴰⵏ ⵉⵎⴰⵙⴰⵢⵏ ⴷ ⵉⴳⵎⴰⵎⵏ ⵏ ⵉⴱⵕⵍⴰⵎⴰⵏ ⵏⵏⵓⵏ ⵉⵏⴰⵎⵓⵔⵏ, ⴼ ⵓⵙⵜⴰⵢ ⵏ ⵍⵎⵖⵔⵉⴱ ⵉ ⵓⵙⵏⵎⴰⵍⴰ ⵏ ⵜⵙⵎⵓⵏⵉ ⴰⴷ ⵜⴰⵅⴰⵜⴰⵔⵜ ⵍⵍⵉ ⵎⵓ ⵜⵙⵜⵉⵎ ⴰⵙⵏⵜⵍ: ⴰⵙⴱⴷⴷⵉ ⵏ ⵜⵏⴰⵥⴰⵕⵉⵏ ⵛⵛⴰⵔⵏⵉⵏ: ⵜⴰⵏⴼⵔⵓⵜ ⴷ ⵓⴼⵔⴰ ⴷ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵜⴳⵎⵉ ⵜⴰⴷⵎⵙⴰⵏⵜ”. ⴱⵔⵔⴽⴰⵜ ⵜⵉⴽⴽⵍⵉⵜ ⵢⴰⴹⵏⵉⵏ ⴷ ⵉⵏⴱⴳⵉⵡⵏ ⵄⵣⵣⴰⵏⵉⵏ ⴷ ⵉⵎⴷⴷⵓⴽⴽⵯⴰⵍ ⵙⵓⴼⵓⵏⵉⵏ.  

ⵜⵉⵏⴳⴳⵯⴰ ⴷ ⵉⵏⴳⴳⵯⴰ, ⵙ ⵓⵙⵜⴰⵢ ⴰⴷ, ⴰⵔ ⵜⴼⵜⵜⵓⵎ ⵙ ⵜⵎⵓⴽⵔⵉⵙⵉⵏ ⵅⴰⵜⵔⵏⵉⵏ ⵡⴰⵙⵙ ⴰⴷ ⵍⵍⴰⵏⵉⵏ ⴳ ⵜⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ, ⵍⵍⵉ ⵜⵜⵔⵙⵏⵉⵏ ⴼ ⵉⵙⵓⵔⵙⵏ ⵉⴳⵯⵏⵙⴰⵏⵏ ⵏ ⴽⵉⴳⴰⵏ ⵏ ⵜⵎⵉⵣⴰⵔ, ⵙⵍⴰⵡⴰⵏ ⴰⴽⴽⵯ ⵜⵉⵎⵉⵣⴰⵔ ⵏ ⵉⴼⴼⵓⵙ, ⵖ ⵍⵍⴰⵏⵜ ⵜⵎⵉⵣⴰⵔ ⵏⵏⵖ. 

* ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ, 

ⵙⴳ ⵜⵉⴳⵉⵔⴰ ⵏ ⵜⵎⴰⵖⵜ ⵜⴰⵎⴰⴹⵍⴰⵏⵜ ⵜⵉⵙ ⵙⵏⴰⵜ, ⵓⵔ ⵊⵊⵓ ⵍⵍⵉⵏ ⵉⵎⴰⵖⵏ ⵛⴷⴷⴰⵏⵉⵏ ⵀⵔⵛⵏⵉⵏ ⴰⵎ ⵡⵉⵍⵍⵉ ⵍⵍⴰⵏⵉⵏ ⴰⵙⵙ ⴰⴷ, ⴳ ⵓⴷⵖⴰⵔ ⵏ ⵜⵙⵉⵏⵔⴰⵏⵜ ⵏ ⵉⵛⵓⵎⴰⵛ ⵉⵍⵍⴰⵏ ⴳ ⵜⵎⵔⴰⵡⵉⵏ ⵙⴳ ⴰⵙⴳⴳⵯⴰⵙ ⵏ 1945, ⴰⵙⵙ ⴰⴷ ⵜⴳⴳⵓⵜ ⴱⴰⵀⵔⴰ ⵜⵉⵟⵟⵉⵜ, ⵉⴳⵓⵜⵏ ⵉⵎⵓⵍⵍⵉⵜⵏ, ⵜⵉⵍⵉ ⵜⴽⵕⴹⵉ ⴷ ⵓⴱⵔⵙⵙⵉⵡⴷ ⴳ ⴽⵉⴳⴰⵏ ⵏ ⵉⵎⵏⴰⴹⵏ ⵉⵙⴳⴰⵡⴰⵏⵏ, ⵉⴳⵓⵜⵏ ⵉⵙⵡⵉⵏⴳⵉⵎⵏ ⵉⵏⴰⵎⵓⵔⵏ ⴷ ⵜⵥⵍⴰⵢⵜ. ⴽⵛⵎⵏⵜ ⵜⵎⵏⵜⵍⵉⵏ ⵢⴰⴹⵏⵉⵏ ⵜⴰⵊⵓⵙⵔⵜⴰⵏⵜ ⵜⴰⴳⵔⴰⵖⵍⴰⵏⵜ ⴰⵎ ⵉⵙⵏⴼⵍⵏⵏ ⵓⵏⵣⵡⵉ ⴷ ⵉⴷⵔⵉⵣⵏ ⵏⵏⵙ ⴼ ⵜⵉⵕⵡⵉ ⵏ ⵜⵓⴷⵔⵜ, ⴷ ⵓⵔⴳⴳⵉⴳ ⴷ ⵓⵙⵡⵉⵔ ⵏ ⵜⵓⴷⵔⵜ, ⴷ ⵉⵣⵡⴰⴳⵏ  ⴷ ⵓⵣⵡⴰⴳ ⵍⵍⵉ ⵙⴽⵔⵏ ⵉⵎⴰⵖⵏ ⵏⵖ ⵜⵉⵎⵏⵜⵍⵉⵏ ⵏ ⵓⵏⵣⵡⵉ.

ⴳ ⵜⵙⴳⴰ ⵢⴰⴹⵏⵉⵏ, ⵉⵙⴷⵓⴷⴷⵓⵢ ⵓⴱⵔⵙⵙⵉⵡⴷ ⴰⵔⴳⴳⵉⴳ ⴳ ⴽⵉⴳⴰⵏ ⵏ ⵜⵙⴳⴰ, ⵉⵎⵓⵏ ⵓ ⵜⵥⵍⴰⵢⵜ ⴷ ⵜⴻⵟⵟⵓⵕⴼⴰ, ⴰⵢⵍⵍⵉ ⵉⵙⴷⵉⴷⴷⵉⵏ ⵜⴰⵏⴼⵔⵓⵜ ⴳ ⴽⵉⴳⴰⵏ ⵏ ⵜⵎⵉⵣⴰⵔ. 

ⴷⴰⵜ ⵏ ⵜⴰⵏⴹⴹⴰⵏⴳⵉⵡⵉⵏ ⴰⴷ ⴳ ⵜⵍⵍⴰ ⵜⴽⵕⴹⵉ ⴷ ⵓⴼⵙⵜⵉ ⴰⵡⴷ ⵏⵏⵜⵜⴰⵏ, ⵉⵇⵇⴰⵏ ⴷ ⴼ ⵉⴳⵔⴷⵏ ⵏ ⵜⵓⵏⵥⵉⵥⵜ ⴷ ⵓⴼⵔⴰ ⴷ ⵓⵙⵏⵍⵍⵉ, ⴰⵇⵇⵕⴰⵏⵉⵏ ⵉ ⵜⵎⵢⵉⴷⵉⵔⵜ ⵉⵛⵛⴰⵔⵏ ⴰⴷ ⴽⴽⵉⵏ ⴼ ⵉⵏⴰⵡ ⵏ ⵜⵎⴰⵖⵜ ⴷ ⵜⴽⵕⴷⵉ. ⵉⵇⵇⴰⵏ ⴷ ⴼ ⵜⵎⵉⵣⴰⵔ ⵏ ⵉⴼⴼⵓⵙ, ⵖ ⵍⵍⴰⵏⵜ ⵜⵎⵉⵣⴰⵔ ⵏⵏⵖ, ⴰⴷ ⵙⴽⵔⵏⵜ ⵜⵉⵎⴰⵙⴰⵢⵉⵏ ⵏⵏⵙⵏⵜ ⴳ ⵜⵉⵍⵉⵜ ⵏ ⵓⴼⵔⴰ ⴷ ⵓⵎⵢⴰⵡⴰⵙ ⴷ ⵜⵡⵉⵣⵉ ⴳ ⵓⵖⵓⵍ ⵏⵏⵙⵏⵜ ⵙ ⵜⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ. ⵜⵓⴷⵔⵜ ⵏ ⵓⴼⴳⴰⵏ ⴷ ⵜⵎⵉⵣⴰⵔ ⵏ ⵉⴼⴼⵓⵙ, ⵓⵔ ⵜⵜ ⵉⴳⵉ ⴰⴷ ⴰⵎⵥⵏⵜ ⴳⴰⵔ ⵉⴷⵔⵉⵣⵏ ⵏ ⵜⵙⵎⴰⴹⵍⴰⵏⵜ, ⴷ ⴰⴷ ⵓⵔ ⵉⵜⵜⵓⵙⵙⵍⵍⵉ ⵓⴳⵔⴷ ⵏⵏⵙ ⴳ ⵜⵖⵜⴰⵙⵜ ⵜⴰⴳⵔⴰⵖⵍⴰⵏⵜ. ⵜⵉⵎⵉⵣⴰⵔ ⵏ ⵉⴼⴼⵓⵙ ⵟⵟⴰⴼⵏⵜ ⵜⵉⵥⴹⴰⵕⵉⵏ ⴳⴳⵓⵜⵏⵉⵏ ⵍⵍⵉ ⴷ ⵉⵇⵇⴰⵏ ⵓⵙⵏⴼⵍ ⵙ ⵜⴱⵖⵓⵔⵉⵏ, ⵃⵎⴰ ⴰⴷ ⵟⵟⴼⵏⵜ ⴰⴷⵔⵉⵙ ⴳ ⵜⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ, ⴷ ⵓⴷⵖⴰⵔ ⴰⴳⴰⵎⴰⵏ ⵉⵎⵙⴰⵙⴰⵏ ⴷ ⵓⴷⵖⴰⵔ ⵏⵏⵙ ⴳ ⵜⴷⵍⵙⴰ ⴷ ⵉⵎⵣⴷⴰⵖⵏ ⴷ ⵜⵊⵓⵖⵕⴰⴼⵉⵜ ⴷ ⵜⴱⵖⵓⵔⵉⵏ ⵏ ⵓⴳⴰⵎⴰ. 

ⴰⵙⵜⴰⵢ ⴰⴷ ⵏⵏⵖ ⵉ ⵓⵙⵏⵜⵍ ⵏ ⵜⵏⴰⵥⴰⵕⵉⵏ ⵛⵛⴰⵔⵏⵉⵏ ⵏ ⵖⵉⵍⴰⴷ ⵉⴳⴰ ⴰⵙⵖⵡⵏ ⵏ ⵜⵎⵉⵣⴰⵔ ⵏⵏⵖ ⵉ ⵓⵙⴽⵔ ⵏ ⵡⴰⵡⵜⵜⴰⵙ ⴰⴷ. ⵜⵉⵎⵔⴰⵔⵓⵜⵉⵏ ⴼ ⵜⵏⴰⵥⴰⵕⵉⵏ ⴰⴷ ⵉⵖ ⴰⵡⵔ ⵜⵜⵉⵍⵉⵏⵜ ⴰⴱⵍⴰ ⵖ ⵣⵓⵏ ⵜⴰⵎⵍⴷⴰ ⴰⴷ ⵍⵍⵉ ⴰⵖ ⵉⵙⵎⵓⵏⵏ ⴰⵙⵙ ⴰⴷ, ⵀⴰⵜ ⵙⴳ ⵉⵡⵜⵜⴰⵙⵏ ⵏ ⵓⵏⵎⵓⵇⵇⴰⵕ ⵏⵏⵖ ⴰⴷ ⵢⴰⵡⵙ ⵓⴷⵖⴰⵔ ⴰⵎⵔⵙⵍⴰⵏ ⵏ ⵉⴱⵕⵍⴰⵎⴰⵏⵏ ⵏⵏⵖ ⵉⵏⴰⵎⵓⵔⵏ ⴳ ⵓⵙⴷⵙⵓ ⵏ ⵓⵎⴹⴰⴽⴰⵕ ⵅⴼ ⵜⵏⴰⵥⴰⵕⵉⵏ ⵍⵍⴰⵏⵉⵏ ⴷⴰⵜ ⵏⵏⵖ, ⴷ ⵓⵏⵄⴰⵕ ⴳ ⵓⵙⵡⵉⵔ ⴰⴳⵔⴰⵖⵍⴰⵏ ⵉ ⵜⵣⵔⴼⵜ ⵏ ⵉⵎⴰⴷⴰⵏⵏ ⵏ ⵉⴼⴼⵓⵙ ⴳ ⵓⵙⴱⴷⴷⵉ ⵏ ⵜⵎⵓⴽⵔⵉⵙⵉⵏ ⵏ ⵓⵣⵎⵣ ⴰⴷ. 

ⴳ ⵓⵎⵏⴰⴹ ⴰⴷ, ⵔⵉⵖ ⴰⴷ ⴷⵉⴷⵓⵏ ⴷⵔⵓⵖ ⵉⴼⵔⴷⴰⵙ ⵏ ⵓⵎⴹⴰⴽⴰⵕ ⴰⴷ ⴷ ⴰⵎⵖⵔⵉⴱⵉ, ⴷ ⵜⵉⵙ ⵙⵏⴰⵜ ⴷ ⴰⴼⵔⵉⵇⵉ ⵉⴼⵔⴽⵏ ⵙ ⵜⵥⴹⴰⵕⵉⵏ ⵏ ⵓⵎⵏⵥⴰⵡ ⵏⵏⵙ, ⵉⴼⵔⴽⵏ ⵓⵍⴰ ⵙ ⵉⵣⵔⴼⴰⵏ ⵏ ⵜⵎⵉⵣⴰⵔ ⵏ ⵉⴼⴼⵓⵙ ⵏⵏⵖ ⴳ ⵉⵎⵉⵥ ⵏ ⵜⴱⵖⵓⵔⵉⵏ ⵏⵏⵙⵏⵜ ⴷ ⵓⵙⴽⵔ ⵏ ⵜⵖⵜⴰⵙⵉⵏ ⵏⵏⵙⵏⵜ ⵜⵉⵙⵔⵜⴰⵏⵉⵏ ⴳ ⵓⵎⴰⵍⵓ ⵏ ⵜⵏⵓⴼⴰ ⵏ ⵉⵎⴰⴷⴰⵏⵏ ⵏⵏⵙⵏⵜ.

ⵉⵣⴷⵉ ⵓⵎⵣⵡⴰⵔⵓ ⵙ ⵜⵥⴹⴰⵕⵉⵏ ⵏ ⵜⵎⵉⵣⴰⵔ ⵏ ⵉⴼⴼⵓⵙ ⵙ ⵓⵎⴰⵜⴰ, ⴷ ⵉⴼⵔⵉⵇⵢⴰ ⴷ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ, ⵜⵉⵥⴹⴰⵕⵉⵏ ⴳⴳⵓⵜⵏⵉⵏ ⴷ ⵉⵇⵇⴰⵏ ⵓⵙⵎⵔⵙ ⴷ ⵓⵙⵏⴼⵍ ⵙ ⵜⴱⵖⵓⵔⵉⵏ ⵉ ⵚⴰⵃⴰ ⵏ ⵜⴳⵎⵉ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ ⵏ ⵉⵎⴰⴷⴰⵏⵏ ⵏⵏⵙ. 

ⵉⴷⵖⴰⵔⵏ ⴰⴷ ⵉⵀⵢⵓⵖⵕⴰⴼⵉⵢⵏ (ⵉⴼⵔⵉⵇⵢⴰ ⴷ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ) ⴳⵉⵙⵏ ⵓⴳⴳⴰⵔ ⵏ 70% ⵏ  ⵉⴽⴰⵍⵉⵡⵏ ⵉⵏⴼⵍⴰⵃⵏ ⴳ ⵓⵎⴰⴹⴰⵍ, ⵓⵔ ⵜⵜⵓⵙⵎⵔⴰⵙⵏ ⵖⴰⵙ ⵙ ⵓⵙⵖⵍ ⵉⵛⵃⴰⵏ. ⵜⵙⵙⵏⵎ, ⵜⵉⵏⴳⴳⵯⴰ ⴷ ⵉⵏⴳⴳⵯⴰ, ⵜⵉⵏⴰⵥⴰⵕⵉⵏ ⵅⴰⵜⵔⵏⵉⵏ ⵏ ⵜⵏⴼⵔⵓⵜ ⵏ ⵓⵜⵛⵓ ⴳ ⵓⵎⴰⴹⴰⵍ, ⴳ ⵓⵎⵏⴰⴹ ⵏ ⵜⴰⵙⵙⴰⵙⵉⵏ ⵏ ⵖⵉⵍⴰⴷ ⵓⵍⴰ ⵖ ⵉⵎⴰⵍ.

ⵉⵣⴷⵉ ⵡⵉⵙ ⵙⵉⵏ ⴷ ⵜⴱⵖⵓⵔⵉⵏ ⵜⵉⵏⴼⴳⴰⵏⵉⵏ ⵍⵍⵉ ⵏⵟⵟⴰⴼ, ⵜⴰⵙⵖⵍⵜ ⵜⴰⵅⴰⵜⴰⵔⵜ ⵏ ⵉⵎⵣⴷⴰⵖⵏ ⵏ ⵜⵎⴰⵣⵉⵔⵜ ⵏⵏⵖ ⴳⴰⵏ ⵉⵄⵔⵔⵉⵎⵏ ⵙⵖⴰⵡⵙⴰⵏⵉⵏ ⵙ ⵓⵙⵙⵍⵎⴷ ⴷ ⵓⵙⵎⵓⵜⵜⴳ ⴷ ⵓⵙⵉⴷⴼ ⵃⵎⴰ ⴰⴷ ⵉⵍⵉ ⴳ ⵓⴳⵯⵏⵙ ⵏ ⵜⴳⵎⵉ ⵜⴰⵎⴰⵜⴰⵢⵜ ⴷ ⵉⵎⵉⵙⵙ ⵏ ⵜⴷⵎⵙⴰ ⴷ ⵜⵏⵓⴼⴰ, ⴰⴼⴰⵔⵙ ⴷ ⵜⵙⵎⵓⵔⵜ.

ⵉⵣⴷⵉ ⵡⵉⵙ ⴽⵕⴰⴹ ⴷ ⵜⴱⵖⵓⵔⵉⵏ ⵏ ⵢⵉⵍ  ⵍⵍⴰⵏⵉⵏ ⴳ ⵜⵎⵉⵣⴰⴰⵔ ⵏ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⵉⴼⵔⵉⵇⵢⴰ, ⵟⵟⴰⴼⵏ ⵙⵉⵏ ⵉⵎⵏⵥⴰⵡⵏ ⵙⵉⵏ ⵢⵉⵍⵉⵏ ⴷ ⵙⵉⵏ ⵉⴳⵔⵡⴰⵏ, ⵙ ⵎⴰⴷ ⵢⴰⴽⴽⴰ ⵉⴳⵔ ⴰⴷ ⴰⵢⵍⴰⵏ ⴳ ⵜⵥⴹⴰⵕⵉⵏ ⵏ ⵓⵙⵎⵖⵔ ⵏ ⵜⴷⵎⵙⴰ ⵏ ⵢⵉⵍ ⴰⵎ ⵜⴰⵎⴰⵍⵍⴰⵢⵜ ⵏ ⵓⴼⵜⴰⵙ ⴷ ⵜⴳⵯⵎⵔⵜ, ⴷ ⵎⴰⴷ ⵉⵃⴹⴰ ⵓⴷⵔⴰⵡ ⴰⵢⵍⴰⵏ ⴳ ⵜⴱⵖⵓⵔⵉⵏ ⵏ ⵉⵣⵓⵖⴰⵣ ⴷ ⵉⵙⵍⵎⴰⵏ ⴳⴳⵓⵜⵏⵉⵏ, ⴷ ⵜⵉⵍⴰⵍⵜ ⵏ ⵢⵉⵍⵏ ⴳ ⵜⵙⴱⴱⴰⴱⵜ ⴷ ⵉⵙⵏⴼⵍⵏ ⴷ ⵓⵙⴷⵖⵔ ⴰⵙⵜⵔⴰⵜⵉⵊⵉ. 

ⵉⵣⴷⵉ ⵡⵉⵙ ⴽⴽⵓⵥ ⴷ ⵜⵥⴹⴰⵕⵉⵏ ⵏ ⵜⵎⵉⵣⴰⵔ ⵏⵏⵖ ⴳ ⵓⴼⴰⵔⵙ ⵏ ⵜⵥⴰⴹⴰⵕⵜ ⵜⴰⵣⴳⵣⴰⵡⵜ, ⵜⵉⵏ ⵉⵎⴰⵍ, ⴳ ⵉⵍⵍⴰ ⵓⵏⴰⵥⴰⵕ ⴰⵎⴰⴹⵍⴰⵏ ⴳ ⵓⵎⵏⴰⴹ ⵏ ⵉⵙⵏⴼⵍⵏ ⵏ ⵓⵏⵣⵡⵉ. 

 * ⵜⵉⵏⴳⴳⵯⴰ ⴷ ⵉⵏⴳⴳⵯⴰ,

ⴷⴰⵜ ⵏ ⵜⵥⴹⴰⵕⵉⵏ ⴰⴷ, ⵏⵍⵍⴰ ⴷⴰⵜ ⵏ ⵜⵏⴰⵥⴰⵕⵉⵏ ⵅⴰⵜⵔⵏⵉⵏ ⴷ ⵉⵇⵇⴰⵏ ⵓⵙⵏⴼⵍ ⵙ ⵜⵎⵍⴷⴰ ⵏ ⵜⴳⵎⵉ ⴷ ⵓⵙⵎⵖⵔ. ⵓⵙⵉⵏⵜ ⵜⵎⵉⵣⴰⵔ ⵏⵏⵖ ⴰⵥⴰⵥⵓ ⴷ ⵉⴷⵔⵉⵣⵏ ⵏ ⵉⵙⵏⴼⵍⵏ ⵏ ⵓⵏⵣⵡⵉ ⵓⴳⴳⴰⵔ ⵏ ⵜⵎⵉⵣⴰⵔ ⵢⴰⴹⵏⵉⵏ, ⴰⵢⵍⵍ ⵉⵙⵙⴷⵔⵓⵏ ⴰⵛⵃⵓ ⵉⵙⵙⵉⵎⵖⵓⵔ ⵜⵉⵎⴽⵕⴰⴹ ⵜⵉⴳⴷⵓⴷⵉⵏ ⴳ ⵜⵉⵣⵉ ⵖ ⵏⵏ ⵓⵔ ⵜⵣⵣⵔⵉ ⵜⵡⵉⵣⵉ ⵏⵏⵙ ⴳ ⵉⴳⴰⵣⵏ ⵙⴽⴰⵔⵏⵉⵏ ⵜⵉⵔⵖⵉ ⵏ ⵡⴰⴽⴰⵍ 12% ( 4% ⴳ ⵉⴼⵔⵉⵇⵢⴰ ⴷ 8% ⴳ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ, ⴰⵣⴳ ⵏⵏⵙⵏ ⵉⴽⴽ ⴰⴷ ⵜⴰⵥⴹⴰⵕⵜ ⵜⴰⵃⴼⵓⵕⵉⵜ ⵓⵔ ⴷ ⵉⴳⴰⵣⵏ ⵏ ⵜⵎⴳⵓⵔⵉ), ⵖⵎⴽ ⵍⵍⵉ ⵓⵔ ⵜⵉⵡⵉ ⵚⴰⵃⴰ ⵙⴳ ⵜⵡⵓⵔⵉ ⵏ ⵜⵎⴳⵓⵔⵉ ⴳ ⵎⴰⴷ ⵉⴽⴽⴰⵏ ⵜⵉⵎⵉⴹⴰ ⵏ ⵉⵙⴳⴳⵯⴰⵙⵏ ⵎⴳⴰⵍ ⵏ ⵜⵓⴷⴷⵉⵔⵉⵏ ⵏ ⵜⵎⴳⵓⵔⵉ ⵍⵍⵉ ⵉⵙⴽⵔⵏ ⵜⴰⵖⵔⵎⴰ ⵏⵏⵙ ⴼ ⵜⵎⴳⵓⵔⵉ. 

ⵜⴳⴰ ⵜⵎⵓⴽⵔⵉⵙⵜ ⵏ ⵓⵣⵡⴰⴳ ⵢⴰⵜ ⵙⴳ ⵜⵏⴰⵥⴰⵕⵉⵏ ⴷⴰⵜ ⵏⵏⵖ, ⵉⵖ ⵉⵣⵣⵉⴳⵣ ⵓⵙⵡⴰⵍⴰ ⴰⵎⴰⵜⴰⵢ ⵏ ⵉⵙⵖⵍⵏ ⵏ ⵜⵎⵓⴽⵔⵉⵙⵜ ⴰⴷ ⵎⴰⵙ ⵜⵍⵍⴰ ⴳ ⵢⵉⴳⵔ ⴰⵊⵢⵓⵖⵕⴰⴼⵉ ⵉⴳⴰⵏ ⵢⴰⵏ, ⴳ ⵉⵙⵡⵉⵔⵏ ⴰⵙⴳⴰⵡⴰⵏ ⴷ ⵡⵉⵏ ⵓⵏⵎⵥⴰⵡ, ⵀⴰⵜⵉ ⵉⵏⵎⵓⵔⴰⵏ ⵏⵏⵖ ⵉⵎⵣⵡⴰⴳⵏ ⴰⵔ ⵜⵜⵔⴼⵓⴼⵏ ⵓⴳⴰⵔ ⵏ ⵎⴰⴷ ⵉⵣⵔⵉⵏ ⴳ ⵓⵎⵏⴰⴹ ⵏ ⵓⵕⵓⵎ (Stigmatisation) , ⴳ ⵓⵣⵎⵣ ⵖ ⵉⴳⴰ ⵓⵣⵡⴰⴳ ⵉⵎⵉⵙⵙ ⵏ ⵓⵙⵏⴼⵍ ⵏ ⵓⴱⵓⵖⵍⵓ, ⴷ ⵡⵉⴷⴰ ⵜⵜⵣⵓⴳⵏⵉⵏ ⵀⴰⵜ ⴰⵔ ⵜⵜⵍⵉⵏ ⵙ ⵜⵖⵔⴰⴷ ⴷ ⵜⵡⵓⵔⵉ ⴷ ⵜⵏⴼⵔⵓⵜ. ⵖⵉ ⴷ ⴰⵖ ⵉⵍⵍⴰ ⵓⵙⵇⴷⵉ ⵏ ⵜⵣⴷⴰⵢⵜ ⵊⴰⵔ ⵓⵣⵡⴰⴳ ⴷ ⵜⴳⵎⵉ ⴷ ⵜⵡⵉⵣⵉ ⵜⴰⴳⵔⴰⵖⵍⴰⵏⵜ. 

 * ⵜⵉⵏⴳⴳⵯⴰ ⴷ ⵉⵏⴳⴳⵯⴰ, 

ⵥⴹⴰⵕⵏⵜ ⵜⵎⵉⵣⴰⵔ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⴷ ⵍⴽⴰⵕⴰⵢⵉⴱ ⴷ ⵍⵎⵉⴽⵙⵉⴽ ⴷ ⵍⵎⵖⵔⵉⴱ , ⵙ ⵉⴷⵖⴰⵔⵏ ⵏⵏⵙⵏⵜ ⵉⵊⵢⵓⵖⵕⴰⴼⵉⵢⵏ ⴷ ⵜⵥⴹⴰⵕⵉⵏ ⴷ ⵜⴷⵍⵙⴰ ⴰⴷ ⵙⴽⵔⵏⵜ ⵜⵉⵍⴰⵍⵜ ⵜⴰⵅⴰⵜⴰⵔⵜ ⵉ ⵡⴰⵍⴰⵢ ⵏ ⵜⵏⴰⵥⴰⵕⵉⵏ ⴰⴷ. ⵜⵉⵎⵉⵣⴰⵔ ⵏⵏⵖ ⴱⴷⴷⵏⵜ ⴼ ⵜⴷⵔⴰⵡⵜ ⵜⴰⴷⵍⵙⴰⵏⵜ ⴷ ⵜⵙⵏⵉⵍⵙⵜ ⵉⵛⵛⴰⵔⵏ ⵉⴱⵓⵖⵍⴰⵏ, ⴳⵉⵙⵏ ⵜⴰⴷⵉⵏⴰⵎⵉⵜ ⵜⵓⵏⴳⵉⵎⵜ ⵉⵙⵜⴰⵡⵀⵎⵎⴰⵏ, ⵎⵎⴰⵖⵏⵜ ⴼ ⵓⵙⵙⵕⵚⵓ ⵏ ⵜⴷⵉⵎⵓⵇⵔⴰⵟⵉⵜ ⴷ ⵓⵚⴽⵓ ⴰⵎⵔⵙⵍⴰⵏ ⵙ ⵜⵉⵔⴰⵜ ⵉⵎⵙⴰⵙⴰⵏ ⴷ ⵜⵎⵢⵓⵔⵉⵏ ⵜⵉⵎⵔⵙⵍⴰⵏⵉⵏ ⵜⵉⵏⴰⵎⵓⵔⵉⵏ. 

ⴰⵎ ⴰⴽⴽⵯ ⵜⵉⵎⵉⵣⴰⵔ ⵏⵏⵓⵏ, ⵉⵟⵟⴰⴼ ⵍⵎⵖⵔⵉⴱ ⵜⵉⵎⵍⴷⴰ ⵏ ⵓⵎⵣⵔⵓⵢ ⵉ ⵓⵎⵢⴰⵡⴰⵙ ⴷ ⵓⵙⵎⵖⵔ ⵏ ⵉⵙⵏⴼⵍⵏ ⴷ ⵓⵙⵙⴰⵔⵓ, ⵙ ⵓⴷⵖⴰⵔ ⵏⵏⵙ ⴳ ⵜⴰⵙⴳⴰ ⵏ ⴰⵟⵍⴰⵚⵉ ⴷ ⵡⴰⴷⴰⵙ ⵏⵏⵙ ⵉ ⵓⵕⵓⴱⴱⴰ ⴷ ⵓⵙⵙⵕⵙⵓ ⵏⵏⵙ ⴳ ⵓⴷⵔⴰⵡ ⵏⵏⵙ ⴰⴼⵔⵉⵇⵉ ⴷ ⵓⵏⴰⵎⵎⴰⵙ. 

ⴰⵎ ⵜⵉⵎⵉⵣⴰⵔ ⵏⵏⵓⵏ, ⵉⵟⵟⴰⴼ ⵍⵎⵖⵔⵉⴱ, ⴷ ⵔⴰⴷ ⵙⵓⵍ ⴱⴰⵀⵔⴰ ⵉⵟⵟⵉⴼ ⴰⵎⴰⵡⴰ ⴰⵙⵉⵍⴰⵏ ⵉⵜⵜⴰⵡⵙⵏ ⵉ ⵉⵙⵏⴼⵍⵏ ⴷ ⵓⵎⵢⴰⵡⴰⵙ ⵙ ⵉⴼⵜⴰⵙⵏ ⵏⵏⵙ ⴳ ⵢⵉⵍ ⵓⵎⵍⵉⵍ ⴰⵏⴰⵎⵎⴰⵙ ⴷ ⴰⵟⵍⴰⵚⵉ, ⵖ ⵍⵍⴰⵏ ⵉⴼⵜⴰⵙⵏ ⵏ ⵜⴳⵎⵎⵉ ⵜⵓⵎⵍⵉⵍⵜ, ⵟⴰⵏⴰⵊⴰ ⵜⴰⵏⴰⵎⵎⴰⵙⵜ, ⵏⵏⴰⴹⵓⵕ ⴳ ⵜⴰⴳⵓⵜ ⵏ ⵓⵏⴰⵎⵎⴰⵙ, ⴰⴼⵜⴰⵙ ⵏ ⴷⴷⴰⵅⵍⴰ ⴳ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ ⵍⵍⵉ ⵉⴳⴰⵏ ⵜⴰⵙⵉⵍⴰ ⵜⴰⴳⵔⴰⵖⵍⴰⵏⵜ ⵏ ⵉⵙⵏⴼⵍⵏ ⵊⴰⵔ ⵉⵎⵏⵥⴰⵡⵏ ⵏ ⵉⴼⵔⵉⵇⵢⴰ ⴷ ⵎⴰⵔⵉⴽⴰⵏ ⴷ ⵓⵕⵓⴱⴱⴰ ⴷ ⵜⵎⵉⵣⴰⵔ ⵢⴰⴹⵏⵉⵏ ⵏ ⵓⵎⴰⴹⴰⵍ. 

ⴳⴰⵏ ⵉⵙⵏⴼⴰⵔⵏ ⵉⵅⴰⵜⴰⵔⵏ ⵍⵍⵉ ⵉⵙⴽⴰⵔ ⵍⵎⵖⵔⵉⴱ ⴳ ⵜⵙⴳⴳⵉⵡⵉⵏ ⵏⵏⵙ ⵏ ⵉⴼⴼⵓⵙ, ⵜⵉⵎⵍⴷⴰ ⵏ ⵜⵉⴽⴽⵉ ⵏ ⵜⴷⵉⵏⴰⵎⵉⵜ ⵜⴰⵎⴰⵢⵏⵓⵜ ⵉ ⵓⵎⵢⴰⵡⴰⵙ ⴷ ⵉⵙⵏⴼⵍⵏ ⴰⴽⴷ ⴰⵢⵜⵎⴰⵜⵏ ⵏⵏⵖ ⴳ ⵉⴼⵔⵉⵇⵢⴰ. 

ⴳ ⵓⵎⵏⴰⴹ ⴰⴷ, ⵉⵇⵇⵏ ⴷ ⵓⴱⴷⴰⵔ ⵏ ⵜⵙⵏⵜⴰⵢⵜ ⵜⴰⵟⵍⴰⵚⵉⵜ ⵜⴰⵙⵜⵔⴰⵜⵉⵊⵉⵜ ⵍⵍⵉ ⵉⵕⵥⵎ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵅⴼ ⵓⵙⵙⵔⵅⵓ ⵏ ⵡⴰⴷⴰⴼ ⵏ ⵜⵎⵉⵣⴰⵔ ⵏ ⵓⴼⵜⴰⵙ ⴰⴼⵔⵉⵇⵉ ⵓⵔ ⵟⵟⴰⴼⵏⵉⵏ ⴰⴷⴰⴼ ⵙ ⵢⵉⵍ ⵃⵎⴰ ⴰⴷ ⵍⵎⴽⵏⵜ ⵜⴰⴷⴳⴰ ⵏ ⴰⵟⵍⴰⵚ, ⵍⵍⵉ ⵔⴰⴷ ⵉⵕⵥⵎ ⵜⵉⴷⴰⵏⵎⵉⵢⵉⵏ ⵅⴰⵜⵔⵏⵉⵏ ⴳ ⵓⵙⴽⵔ ⵏ ⵓⵎⴰⵡⴰ ⴰⵙⵉⵍⴰⵏ ⴳ ⵉⴱⵔⴷⴰⵏ ⴷ ⵉⴱⵔⴷⴰⵏ ⵏ ⵓⵣⵣⴰⵍ ⴷ ⵉⴼⵜⴰⵙⵏ ⴷ ⵓⵙⵏⴼⵍ ⵏ ⵜⵏⵣⵣⵓⵜⵉⵏ ⴷ ⵓⵎⵓⴷⴷⵓ ⵏ ⵉⵡⴷⴰⵏ ⴷ ⵜⵓⵚⴽⵉⵡⵉⵏ ⵏ ⵓⴼⵍⵍⴰ ⵖ ⵜⵍⵍⴰ ⵜⴻⵜⵉⴽⵏⵓⵍⵓⵊⵉⵜ ⵜⴰⵎⵓⵟⵟⵓⵏⵜ. 

ⵜⴰⵙⵏⵜⴰⵢⵜ ⴰⴷ ⵔⴰⴷ ⵜⴰⵡⵙ ⴳ ⵓⵙⴽⵔ ⵏ ⵉⵚⴰⵃⴰⵜⵏ ⵉⵙⵜⵔⴰⵜⵉⵊⵉⵢⵏ, ⴰⵛⴽⵓ ⵜⴱⴷⴷ ⴼ ⵜⵡⵉⵣⵉ, ⴷ ⵜⵉⵔⴰⵜ ⵉ ⵓⵙⵏⴼⵍ ⵏ ⵉⴼⵔⵉⵇⵢⴰ ⵙ ⵓⵎⵏⵥⴰⵡ ⵉⴱⵓⵖⵍⴰⵏ, ⵉⵏⴳⴳⵄⵏ ⵙ ⵉⵙⵓⴳⴰⵎ ⵏⵏⵙ ⴷ ⵜⵡⵓⵔⵉ ⵏ ⵜⴰⵔⵡⴰ ⵏⵏⵙ, ⴷ ⴰⴷ ⵜⴳ ⵜⴰⵙⴳⴰ ⵏ ⴰⵟⵍⴰⵚⵉ ⵉⴳⵔ ⵏ ⵉⵙⵏⴼⵍⵏ ⴷ ⵓⴱⵓⵖⵍⵓ ⵉⵛⵛⴰⵔⵏ.

ⴳ ⵜⵙⴳⴰ ⵢⴰⴹⵏⵉⵏ, ⵉⵙⴳⵓⴷⵉ ⵍⵎⵖⵔⵉⴱ ⵖⵎⴽ ⵍⵍⵉ ⵜⵙⵙⵏⵎⵜⵉⵎⵓⵣⴰⵢⵉⵏ ⵎⵇⵇⵓⵔⵏⵉⵏ ⴳ ⵢⵉⴳⵔ ⵏ ⵓⴼⴰⵔⵙ ⵏ ⵜⵥⴹⴰⵕⵜ ⵙⴳ ⵉⵖⴱⵓⵍⴰ ⵉⵎⴰⵢⵏⵓⵜⵏ, ⵎⴽ ⵍⵍⵉ ⵎⵎⴰⵍⴰⵏ ⵉⵙⵏⴼⴰⵔⵏ ⵉⵅⴰⵜⴰⵔⵏ ⵍⵍⵉ ⵉⵙⴽⴰⵔ ⴳ ⵓⵎⵏⵉⴷ ⵏ ⵜⵥⴹⴰⵕⵉⵏ ⵏ ⵜⴰⴼⵓⴽⵜ ⴷ ⵡⴰⴹⵓ, ⴷ ⵓⵀⵉⴷⵕⵓⵊⵉⵏ ⴰⵣⴳⵣⴰⵡ ⴳ ⵎⴰⴷ ⵢⴰⵥⵏ, ⴳⴰⵏⵜ ⵜⵎⵓⵣⴰⵢⵉⵏ ⵏⵏⵙ ⵜⵉⵎⵣⵔⴰⵢⵉⵏ ⴳ ⵉⴳⵔⴰⵏ ⵏ ⵜⴼⵍⵍⴰⵃⵜ ⴷ ⵜⴳⵯⵎⵔⵜ ⵜⴰⵢⵍⴰⵏⵜ ⵜⵉⴷ ⵜⵜⵓⵙⵙⴰⵏⵏⵉⵏ ⴳ ⵓⵙⵡⵉⵔ ⴰⵎⴰⴹⵍⴰⵏ.ⵎⴰ ⴰⵏⵏⴰ ⴷ ⵉⴳⴰⵏ ⵉⴳⵔⴰⵏ ⵢⴰⴹⵏⵉⵏ ⵏ ⵓⵎⵢⴰⵡⴰⵙ ⴷ ⵜⵎⴷⵔⴰⵡⵜ ⴷ ⵓⴷⵔⴰⵡ ⵏ ⵜⵎⵓⵣⴰⵢⵉⵏ.  

 * ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⵉⵖ ⴷ ⵏⵙⵙⴽⵯⵜⵉ ⵜⵉⵎⵏⵜⵍⵉⵏ ⵏ ⵜⵊⵢⵓⵖⵕⴰⴼⵉⵜ ⴷ ⵜⴷⵍⵙⴰ ⴷ ⵜⵓⵜⵍⴰⵢⵜ ⴷ ⵓⵙⵎⴰⵇⵇⵍ ⴰⵙⵜⵔⴰⵜⵉⵊⵉ, ⵉⴳⴰ ⵍⵎⵖⵔⵉⴱ ⵜⴰⵎⴰⵣⵉⵔⵜ ⵍⵍⵉ ⴷ ⵢⴰⵥⵏ ⵉ ⵜⵎⵉⵣⴰⵔ ⵏⵏⵓⵏ ⵎⴽ ⵍⵍⵉ ⵙⴷⴷⵉⴷⵖ, ⵜⴰⵎⴰⵣⵉⵔⵜ ⵏⵏⵖ ⵔⴰⴷ ⵜⴳ ⵜⴰⵙⵉⵍⴰ ⵏⵏⵓⵏ, ⴰⵔ ⴰⵡⵏ ⵜⴰⴽⴽⴰ ⴰⵥⵟⵟⴰ ⵏ ⵜⵣⴷⴰⵢⵉⵏ ⵏⵏⵙ ⴳ ⵉⴼⵔⵉⵇⵢⴰ ⴷ ⵓⵕⵓⴱⴱⴰ ⴷ ⵜⵙⴳⴰ ⵓⵕⵓⵜⴰⵏⴰⵎⵎⴰⵙⵜ, ⴷ ⵍⵇⴱⵍⵜ ⵜⴰⵏⴰⵎⴰⵎⵙⵜ ⴷ ⴰⵙⵢⴰ, ⴷⴰⵔⵙ ⵜⵉⵣⴷⴰⵢⵉⵏ ⵏ ⵓⵙⵏⴼⵍ ⵉⵍⴻⵍⵍⵉ ⴷ ⵜⵣⴷⴰⵢⵉⵏ ⵣⵣⵉⴳⵣⵏⵉⵏ ⵥⵍⵉⵏⵉ ⴰⴽⴷ ⵜⵓⴷⴷⵉⵙⵉⵏ ⵜⵉⴷⵎⵙⴰⵏⵉⵏ ⴷ ⵜⵎⵉⵣⴰⵔ ⵜⵉⵎⴷⴷⵓⴽⴽⵯⴰⵍ. 

ⵉⵇⵇⴰⵏ ⴷ ⴰⴷ ⵏⵙⵎⵔⵙ ⴰⵜⵉⴳⵏ ⵏⵏⵖ ⵛⵛⴰⵔⵏⵉⵏ, ⴷ ⵉⵎⵉⵥ ⵏⵏⵖ ⴼ ⵓⵏⵏⵓⵕⵥⵎ ⵃⵎⴰ ⴰⴷ ⵏⵏⵙⵕⵚⵓ ⴰⵎⴰⵢⴰⵡⴰⵙ ⵏⵏⵖ ⴰⴷⵎⵙⴰⵏ, ⵏⵙⵙⴷⵓⵙ ⴰⵙⵏⴰⵍ ⵉⵜⵜⵓⵙⵏⴼⴰⵍⵏ ⵊⴰⵔ ⵜⵉⵎⵉⵣⴰⵔ ⵏⵏⵖ, ⴳ ⵓⵙⴰⵜⵉ ⵏ ⵓⵡⵇⵇⵔ ⴷ ⵓⵙⵓⵜⴳ ⵍⵍⵉ ⴱⴷⴷⴰ ⵉⵍⵍⴰⵏ ⴳ ⵜⵣⴷⴰⵢⵉⵏ ⵏⵏⵖ, ⴷ ⵓⵙⴰⵜⵉ ⵏ ⵓⵡⵇⵇⵔ ⵏ ⵓⵙⵍⴳⵏ ⴰⴳⵔⴰⵖⵍⴰⵏ ⵉⴱⴷⴷⵏ ⴼ ⵓⵡⵇⵇⵔ ⵏ ⵜⵎⵓⵏⵜ ⵜⴰⵏⴰⴽⴰⵍⵜ ⵏ ⵉⵡⴰⵏⴽⵏ ⵏⵏⵖ, ⴰⵢⵍⵍⵉ ⵉⴳⴰⵏ ⵜⵉⵖⵔⵎⵜ ⵜⴰⵙⵉⵍⴰⵏⵜ ⴳ ⵓⵙⵍⴳⵏ ⴰⴷ ⴷ ⵜⵎⵏⵜⵉⵍⵜ ⵜⴰⵙⵉⵍⴰⵏⵜ ⵏ ⵓⵔⴳⴳⵉⴳ. 

ⴰⴷ ⵜⴳ ⵜⵎⵍⴷⴰ ⵏ ⵜⵣⵔⵉⵜ ⵏ ⵎⵔⴰⵡ ⵉⵙⴳⴳⵯⴰⵙⵏ ⴼ ⵜⵉⵍⵉⵜ ⵏⵏⵖ ⴳ ⵓⵏⵎⵓⵇⵇⴰⵕ ⵏⵏⵓⵏ, ⵜⵉⵣⵡⵉⵔⵉ ⵏ ⵜⵎⵖⵓⵜⵏ ⵜⴰⵎⴰⵢⵏⵓⵜ ⴳ ⵜⵣⴷⴰⵢⵉⵏ ⵏⵏⵖ ⵍⵍⵉ ⵙ ⵏⵔⴰ ⴰⴷ ⵙⵎⵖⵔⵏⵜ ⴰⵎⵢⴰⵡⴰⵙ ⴰⴷ ⵙ ⵜⵎⴷⵔⴰⵡⵜ ⴷ ⵓⵙⵏⴰⵍ ⵉⵜⵜⵓⵙⵏⴼⴰⵍⵏ, ⵙⵙⵏⴰⵜ ⴱⴷⴷⴰ ⵎⴰⵙ ⵜⵍⵍⴰⵎ ⴳ ⵜⴷⵔⴰⵡⵜ ⴷ ⵢⴰⵜ ⵜⵎⴰⵣⵉⵔⵜ ⵉⵖⵣⴰⵏⵏ ⵉⴼⴼⵔⴳⵏ ⴰⵜⵉⴳ ⵏ ⵜⴷⴷⵓⴽⴽⵯⵍⴰ, ⴷ ⵉⵜⵜⵓⵇⵇⴰⵔⵏ ⵉⵙⵖⴰⵡⵏⵏ ⴷ ⵜⵎⴰⵖⵓⵏⵉⵏ ⵏⵏⵙ ⵍⵍⵉ ⵉⵙⵙⵔⵓⵙ ⴼ ⵜⵎⵢⵉⵎⴰⵏⵜ ⵉⵜⵜⵓⵙⵏⴼⴰⵍⵏ. 

ⴰⵔ ⴷⴰⵖ ⵙⵔⵓⵏ ⵙⴱⵔⵔⴰⴽⵖ, ⵜⴰⵏⵎⵎⵉⵔⵜ ⴼ ⵓⵙⵙⴼⵍⴷ ⵏⵏⵓⵏ.