ⴰⵙⴷⵓⵙ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⴳ ⵉⵎⴹⴰⴽⴰⵕⵏ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴷ ⵜⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵚⵉⵕⴱⵢⴰ

ⵉⵎⴹⴰⴽⴰⵕ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵕⴰⵙ 20 ⵏⵓⵡⴰⵏⴱⵉⵔ 2024 ⴳ ⵕⵕⴱⴰⵟ, ⴷ ⵎⴰⵙⵙⴰ Ana Brnabić ⵜⴰⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵚⵉⵕⴱⵢⴰ, ⵍⵍⵉ ⵉⵍⵍⴰⵏ ⴳ ⵓⵔⵣⴰⴼ ⴰⵎⴰⴷⴷⵓⴷ ⵉ ⵍⵎⵖⵔⵉⴱ ⴰⴽⴷ ⴰⴽⴰⴱⴰⵕ ⴰⴱⵕⵍⴰⵎⴰⵏⵉ ⴳ ⵜⵍⵍⴰ ⵎⴰⵙⵙⴰ Snezana Paunovic ⵜⴰⵎⴰⵔⵉⵜ ⵏ ⵜⵏⵙⵙⵉⵅⴼⵜ, ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵏ ⵜⴷⵎⵙⴰ ⴷ ⵜⴳⵎⵉ ⵜⴰⵙⴳⴰⵡⴰⵏⵜ ⴷ ⵜⵙⴱⴱⴰⴱⵜ ⴷ ⵜⵎⴰⵍⵍⴰⵢⵜ ⴷ ⵜⵥⴹⴰⵕⵜ ⴷ ⵎⴰⵙⵙ Muamer Bacevac ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵚⵉⵕⴱⵢⴰ-ⵍⵎⵖⵔⵉⴱ. 

ⵉⵃⴰⴹⵕ ⴳ ⵓⵏⵎⵓⵇⵇⴰⵔ ⴰⴷ ⵎⴰⵙⵙ Ivan Bauer ⴰⵎⵙⵇⵇⴰⴷ ⵏ ⵚⵉⵕⴱⵢⴰ ⴳ ⵕⵕⴱⴰⵟ, ⵢⵉⵍⵉ ⴼ ⵓⵙⴷⵙⵓ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ, ⴷ ⵓⵙⵏⴼⵍ ⵏ ⵜⴰⵏⵏⴰⵢⵢⵉⵏ ⵅⴼ ⵜⵎⵙⴰⵔⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵛⵛⴰⵔⵏⵉⵏ. 

ⴳ ⵜⵣⵡⵉⵔⵉ, ⵉⵙⵓⵜⴳ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵜⵉⵣⴷⴰⵢⵉⵏ ⵥⵉⵍⵏⵉⵏ ⵊⴰⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴳⴷⵓⴷⴰⵏⵜ ⵏ ⵚⵉⵕⴱⵢⴰ, ⵉⵙⵓⵜⴳ ⴰⴷⴷⴰⴷ ⵉⵥⵉⵍⵏ ⵏ ⵚⵉⵕⴱⵢⴰ ⵎⵏⵉⴷ ⵏ ⵜⵎⵓⵏⵜ ⵏ ⵡⴰⴽⴰⵍ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵢⵉⵏⵉ ⵎⴰⵙ ⵜⴳⴰ ⵜⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ ⵍⵍⵉ ⵉⵙⵎⵏⵉⴷ ⵍⵎⵖⵔⵉⴱ ⵉ ⵓⴼⵓⴽⴽⵓ ⵏ ⵓⵎⵣⴰⵖ ⵉⵜⵜⵓⵙⴽⴰⵔⵏ ⵅⴼ ⵚⵚⵃⵕⴰ ⵜⴰⵎⵖⵔⵉⴱⵉⵜ ⵜⴰⴷ ⵢⵉⵡⵉⵏ ⴰⵙⵏⴰⵍ ⴰⴳⵔⴰⵖⵍⴰⵏ ⵉⴳⴳⵓⵜⵏ. 

ⵉⵙⴰⵡⵍ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵓⵍⴰ ⴼ ⵜⵙⵏⵜⴰⵢⵉⵏ ⵜⵉⵙⵜⵔⴰⵜⵉⵊⵉⵢⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵉ ⵜⴳⵎⵉ ⵏ ⵉⴼⵔⵉⵇⵢⴰ, ⴰⵎ ⴰⵙⵏⴼⴰⵔ ⵏ ⵍⴳⴰⵣ ⵍⵎⵖⵔⵉⴱ-ⵏⵉⵊⵉⵔⵢⴰ, ⴷ ⵜⵙⵏⵜⴰⵢⵜ ⵏ ⵉⵡⴰⵏⴽⵏ ⵏ ⵉⴼⵔⵇⵉⵢⴰ ⴷ ⴰⵟⵍⴰⵚ, ⵖⵎⴽ ⴰⵏⵏ ⵙ ⵡⴰⴷⴰⴼ ⵏ ⵉⵡⴰⵏⴽⵏ ⵏ ⵙⵙⴰⵃⵉⵍ ⵙ ⵢⵉⵍ ⵏ ⵡⴰⵟⵍⴰⵚ, ⵖⵎⴽ ⴰⵏⵏ ⴷ ⴽⵉⴳⴰⵏ ⵏ ⵜⵎⵢⴰⵇⵇⴰⵏⵉⵏ ⴷ ⵉⵙⵏⴼⴰⵔⵏ ⵡⴰⵜⵜⵙⵏⵉⵏ ⴰⵙⴷⵓⵙ ⵏ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ ⴰⴽⴷ ⵜⵉⵎⵉⵣⴰⵔ ⵏ ⵓⵎⵏⵥⴰⵡ. 

ⴳ ⵜⵙⴳⵓⵔⵉ ⵏⵏⵙ ⵉ ⵜⵏⵖⵎⴰⵙⵜ, ⵜⵙⴷⴷⵉⴷ ⵎⴰⵙⵙⴰ Ana Brnabić  ⵜⴰⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵚⵉⵕⴱⵢⴰ ⵎⴰⵙ ⵉⴳⴰ ⵓⵔⵣⴰⴼ ⴰⴷ ⵙ ⵜⵖⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵎⴰⵜⴰⵔⵜ ⵏ ⵜⵣⴷⴰⵢⵉⵏ ⵏ ⵜⴷⴷⵓⴽⴽⵯⵍⴰ ⵜⴰⵇⵇⴱⵓⵔⵜ ⵉⴷⵓⵙⵏ ⵊⴰⵔ ⵚⵉⵕⴱⵢⴰ ⴷ ⵍⵎⵖⵔⵉⴱ ⵙⵍⴰⵡⴰⵏ ⴰⴽⴽⵯ ⴳ ⵓⵙⵡⵉⵔ ⴰⴱⵕⵍⴰⵎⴰⵏⵉ, ⵜⵙⵓⵜⴳ ⵜⵉⴳⵎⵉ ⵜⴰⵎⴰⵜⴰⵢⵜ ⵉⵍⵍⴰⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵜⵏⴰⵔⴰ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ. 

ⵜⵙⵓⵜⴳ ⵎⴰⵙⵙⴰ Ana Brnabić ⴰⴷⴷⴰⴷ ⵏ ⵍⵎⵖⵔⵉⴱ ⵉⵙⵏⴰⵍⵏ ⵜⴰⵎⵓⵏⵜ ⵏ ⵡⴰⴽⴰⵍ ⵏ ⵚⵉⵕⴱⵢⴰ, ⵜⵏⵏⵓⵔⵣ ⴰⴷ ⵢⴰⵡⵙ ⵓⵔⵣⴰⴼ ⴰⴷ ⴳ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⵣⵔⴼⴰⵏ, ⵜⵙⴰⵡⵍ ⴼ ⵜⵉⵍⴰⵍⵜ ⵏ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⴳ ⵓⵙⴷⵙⵓ ⵏ ⵓⵎⵙⴰⵡⴰⵍ ⴷ ⵓⵎⵢⴰⵡⴰⴹ ⵉⵙⵓⵍⴰⵏⵏ. 

ⵖⵎⴽ ⵍⵍⵉ ⵜⴼⴽⴰ ⵎⴰⵙⵙⴰ Ana Brnabić ⵜⴰⵖⵓⵔⵉ ⵜⴰⵎⴰⴷⴷⵓⴷⵜ ⵉ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵉ ⵓⵔⵣⴰⴼ ⵏ ⵜⵡⵓⵔⵉ ⵉ ⵚⵉⵕⴱⵢⴰ ⵍⵍⵉ ⵔⴰⴷ ⵉⴳⵜⴰⵎⵍⴷⴰ ⵏ ⵓⵙⵎⵖⵔ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ.