ⵎⵉⴷⵔⴰⵏⴷ: ⵉⴷⵔⵓ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴳ ⵜⵙⵓⵜⵍⵜ ⵜⵉⵙ ⴽⴽⵓⵥⵜ ⵏ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵚⴹⵉⵚⵜ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ

ⵉⴷⵔⵓ ⵓⴽⴰⴱⴰⵕ ⵏ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴳ ⵜⵙⵓⵜⵍⵜ ⵜⵉⵙ ⴽⴽⵓⵥⵜ ⵏ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵚⴹⵉⵚⵜ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ, ⴳ 28 ⴽⵟⵓⴱⵕ ⴰⵔ 18 ⵏⵓⵡⴰⵏⴱⵉⵔ 2024 ⴳ ⵓⵙⵖⵉⵎ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ ⴳ ⵎⵉⴷⵔⴰⵏⴷ ⴳ ⵉⴼⴼⵓⵙ ⵏ ⵉⴼⵔⵉⵇⵢⴰ. 

ⵢⵓⵎⴰ ⵓⴽⴰⴱⴰⵕ: ⵎⴰⵙⵙⴰ ⵍⴰⵢⵍⴰ ⴷⴰⵀⵉ, ⵙⴳ ⵓⴳⵔⴰⵡ ⴰⵏⴰⵎⵓⵔ ⵏ ⵉⵏⵙⵉⵎⴰⵏⵏ, ⵎⴰⵙⵙⴰ ⵅⴰⴷⵉⵊⴰ ⴰⵕⵓⵀⴰⵍ ⵙⴳ ⵜⵔⴰⴱⴱⵓⵜ ⵏ ⵜⴳⵎⵉ ⴷ ⵜⵙⵔⵎⵓⵏⵜ, ⵎⴰⵙⵙ ⵄⴰⴱⴷ ⵚⵚⴰⵎⴰⴷ, ⵙⴳ ⵜⴳⵔⵓⵎⵎⴰ ⵏ ⵜⵣⵔⴼⵜ ⴷ ⵜⴳⵎⵉ, ⵙⴳ ⵓⵙⵇⵇⵉⵎ ⵏ ⵉⵎⵓⵔⴰ. ⵙⴳ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵎⴰⵙⵙ ⵢⵓⵙⵓⴼ ⴰⵢⴷⴷⵉ ⵙⴳ ⵜⵔⴰⴱⴱⵓⵜ ⵜⴰⵙⵔⵎⵓⵏⵜ-ⵜⵓⵣⵍⵜ ⵏ ⵍⵉⵜⵜⵉⵃⴰⴷ, ⵎⴰⵙⵙⴰ ⵀⴰⵏⴰ ⴱⵍⵅⵉⵔ, ⵙⴳ ⵜⵔⴰⴱⴱⵓⵜ ⵏ ⵜⴰⵎⵓⵏⵜ ⵜⴰⵎⴰⵜⴰⵢⵜ ⵏ ⵉⵎⵙⵡⵓⵔⵉⵢⵏ ⴳ ⵍⵎⵖⵔⵉⴱ. 

ⵜⵍⵍⴰ ⵜⵙⵓⵜⵍⵜ ⴰⴷ ⴳ ⵓⵎⵏⴰⴹ ⵏ ⵓⵙⵏⵜⵍ ⵏ ⵜⴰⴼⵓⵎⵓⵏⵜ ⵜⴰⴼⵔⵉⵇⵉⵜ ⵏ 2024: ⴰⵙⵙⴼⵔⴽ ⴰⴼⵔⵉⵇⵉ ⵉⵎⵙⴰⵙⴰⵏ ⴷ ⵜⴰⵙⵓⵜ 21: ⴰⵚⴽⵓ ⵏ ⵓⵏⴳⵔⴰⵡⵏ ⵏ ⵓⵙⵙⵍⵎⴷ ⴷ ⵓⵙⴰⵏⵉⵏ ⵉ ⵓⵙⴷⵓⵙ ⵏ ⵓⵙⵉⴷⴼ ⵙ ⵓⵍⵎⵎⵓⴷ ⴰⵎⴰⵜⴰⵢ ⴰⵙⵓⵍⴰⵏ ⴳ ⵜⵓⴷⵔⵜ, ⵉⵕⵡⴰⵏ ⴷ ⵉⵎⵙⴰⵙⴰⵏ ⴳ ⵉⴼⵔⵉⵇⵢ, ⴰⵙⵏⵜⵍ ⵍⵍⵉ ⵜⵙⵜⵉ ⵜⴰⵎⵓⵏⵜ ⵜⴰⴼⵔⵉⵇⵉⵜ ⵃⵎⴰ ⴰⴷ ⵢⴰⵡⵙ ⵓⵙⵙⵍⵎⴷ ⴳ ⵓⵙⵖⵓⴷⵓ ⵏ ⵜⵉⵍⴰⵡⵜ ⵜⴰⵏⴰⵎⵓⵏⵜ ⴷ ⵜⴷⵎⵙⴰⵏⵜ, ⵍⵍⵉ ⵉⴳⴰ ⴰⵙⵙⴰⵔⵓ ⴰⵙⵜⵔⴰⵜⵉⵊⵉ ⴳ ⵉⵎⴰⵍ ⵏ ⵓⵎⵏⵥⴰⵡ ⴷ ⵓⴱⵓⵖⵍⵓ ⵏ ⵉⵎⴰⴷⴰⵏⵏ ⵏⵏⵙ. 

ⴳ ⵜⵙⵓⵜⵍⵜ, ⵜⴰⴷ ⵉⵍⵉⵏ ⵉⵙⵎⵏⵉⵏⴷ ⴼ ⵓⵙⵎⴰⴷ ⴷ ⵓⵙⵙⵥⵕⴼ ⵏ ⵜⴰⵎⵓⵏⵜ ⵜⴰⴼⵔⵉⵇⵉⵜ ⵙ ⵜⵉⵍⵉⵜ ⵏ ⵓⵏⵙⵙⵉⵅⴼⵜ ⵏ ⵜⵙⵏⵓⵔⴰⵢⵜ ⵜⴰⴼⵔⵉⵇⵉⵜ ⴷ ⵡⴰⴷⴷⴰⴷ ⵏ ⵜⵎⴳⵓⵔⵉ ⴳ ⵉⴼⵔⵉⵇⵢⴰ ⴷ ⵉⵎⵏⴰⴷⵏ ⵏ ⵜⴳⵎⵉ ⵜⴰⴷⵎⵙⴰⵏⵜ ⵜⴰⵙⵓⵍⴰⵏⵜ ⴷ ⵜⴳⵎⵉ, ⴷ ⵡⴰⴷⴷⴰⴷ ⵏ ⵓⵏⴱⴰⴹ ⴷ ⵓⴼⵔⴰ ⴷ ⵜⵏⴼⵔⵓⵜ ⴷ ⵜⵎⵎⵙⵓⴳⵓⵔⵜ ⴷ ⵓⵙⵡⵓⴷⴷⵓ ⵏ ⵜⴰⵙⵙⴰⵙⵉⵏ ⴳ ⵓⵎⵏⵥⴰⵡ, ⴷ ⵓⵙⵏⵎⴰⵍⴰ ⵏ ⵓⴳⵔⴰⵡ ⵏ ⵜⵎⵖⴰⵔⵜ ⴷ ⵓⵙⵎⵏⵉⴷ ⵏ ⵓⵖⴰⵡⴰⵙ ⴰⵙⵜⵔⴰⵜⵉⵊⵉ 2024-2028 ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ. ⴷ ⵓⵙⵜⴰⵢ ⵏ ⵓⵎⴰⵔⵉ ⴰⵎⵣⵡⴰⵔⵓ ⵏ ⵓⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ ⵙⴳ ⵜⵔⴰⴱⴱⵓⵜ ⵜⴰⵙⴳⴰⵡⴰⵏⵜ ⵏ ⵉⵥⵥⵍⵎⴹ ⵏ ⵉⴼⵔⵉⵇⵢⴰ. 

ⵔⴰⴷ ⵢⵉⵍⵉ ⵓⵍⴰ ⵓⵙⵏⵎⴰⵍⴰ ⵏ ⵜⵙⵎⵓⵏⴰⵢ ⵏ ⵜⵙⵇⵇⵉⵎⵉⵏ ⵜⵉⵙⵓⵍⴰⵏⵉⵏ ⴷ ⵜⵔⵓⴱⴱⴰ ⵜⵉⵙⴳⴰⵡⴰⵏⵉⵏ ⴷ ⵜⵙⴳⵓⵎⴰⵏⵉⵏ, ⴷ ⵓⵎⴹⴰⴽⴰⵕ ⵏ ⵜⵉⵢⵢⴰⴼⵓⵜⵉⵏ ⵏ ⵜⵉⵍⴰⵍ ⵜⵜⴰⵡⵙⴽⴰⵔⵏⵉⵏ ⵙⴳ ⵜⴳⵔⴰⵡⵉⵏ ⴰⴷ ⴷ ⵓⵙⵖⵉⵡⵙ ⵏ ⵜⵉⵍⴰⵍ ⵏⵏⵙ ⵏ ⵉⵎⴰⵍ, ⴷ ⵓⵙⵏⵎⴰⵍⴰ ⵏ ⵜⵙⵎⵓⵏⵉ ⵜⴰⵙⴳⴳⵯⵙⴰⵏⵜ ⵏ ⵜⴳⵔⴰⵡⵜ ⵏ ⵉⵙⵉⵔⴰⵜⵏ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ ⵉ ⵓⵙⵔⵙ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⴳⴳⵯⴰⵙ ⵏ 2025. 

ⵉⵜⵜⵓⵙⵙⴰⵏⵎⴰⵙ ⵉⵙⵎⵓⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ ⵉⴱⵕⵍⴰⵎⴰⵏⵏ ⵏ ⵉⵡⴰⵏⴽⵏ ⵉⴳⵎⴰⵎⵏ ⴳ ⵜⴰⵎⵓⵏⵜ ⵜⴰⴼⵔⵉⵇⵉⵜ, ⵉⵜⵜⵓⵙⴽⴰⵔ ⵙ ⵓⵎⵙⴰⵙⴰ ⵏ ⵓⵎⵏⵏⵉ 5 ⵏ ⵓⵎⵇⵇⵏ ⴰⵎⵙⴽⴰⵔ ⵏ ⵜⴰⵎⵓⵏⵜ, ⵉⵙⵙⵏⵜⵉ ⵜⴰⵡⵓⵔⵉ ⵏⵏⵙ ⵜⴰⵎⴰⴷⴷⵓⴷⵜ ⴳ 2004. ⴰⵔ ⵉⵙⵡⵓⵔⵉ ⵉ ⵜⵡⵉⵣⵉ ⵏ ⵉⵎⴰⴷⴰⵏⵏ ⵉⴼⵔⵉⵇⵉⵢⵏ ⴳ ⵜⴳⵎⵉ ⵏ ⵓⵎⵏⵥⴰⵡ ⴷ ⵓⵙⵎⴰⴷ ⵏⵏⵙ ⴰⴷⵎⵙⴰⵏ, ⴷⴰⵔ ⴰⴼⵔⵉⵙ ⴰⵎⵛⴰⵡⴰⵕ ⴷ ⵡⵉⵏ ⵜⵉⴹⴰⴼ ⵏ ⵜⵎⵙⴰⵙⵜⵍⵜ ⴳ ⵜⴰⵎⵓⵏⵜ ⵜⴰⴼⵔⵉⵇⵉⵜ.