ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵙⵏⵓⴱⴳ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵜⴳⴷⵓⴷⴰⵏⵜ ⵏ ⴼⵕⴰⵏⵚⴰ

* ⵎⴰⵙⵙ ⴰⵅⴰⵜⴰⵔ ⴰⵏⵙⵙⵉⵅⴼ ⵏ ⵜⴳⴷⵓⴷⴰⵏⵜ ⵏ ⴼⵕⴰⵏⵚⴰ ⵎⴰⵙⵙ ⵉⵎⴰⵏⵡⵉⵍ ⵎⴰⴽⵕⵓⵏ,

* ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⴳⵎⴰⵎⵏ ⵏ ⵓⴽⴰⴱⴰⵕ ⵏ ⵎⴰⵙⵙ ⴰⵏⵙⵙⵉⵅⴼ, 

* ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ,

* ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ,

* ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⴰⵡⵙⴰⵙⵏ,

* ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⴳⵎⴰⵎⵏ ⵏ ⵉⵙⵇⵇⵉⵎⵏ ⵏ ⵓⴱⵕⵍⴰⵎⴰⵏ,

 ⵙ ⵉⵙⵎ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵉⴳⴰ ⵉⵢⵉ ⵜⵓⵎⵔⵜ ⴰⴷ ⵙⵔⵓⵏ ⵙⴱⵔⵔⴽⵖ ⵎⴰⵙⵙ ⴰⵏⵙⵙⵉⵅⴼ, ⴳ ⵓⴱⵕⵍⴰⵎⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴷ ⵉⵏⴱⴳⵉ ⴰⵅⴰⵜⴰⵔ, ⴷⴰⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ. 

ⵎⴰⵙⵙ ⴰⵏⵙⵙⵉⵅⴼ, ⵉⴳⴰ ⵓⵔⵣⴰⴼ ⵏⵏⵓⵏ ⵉ ⵍⵎⵖⵔⵉⴱ ⵙ ⵜⵖⵔⵉ ⵉⵥⵉⵍⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵄⵣⵣⵓ ⵕⴱⴱⵉ, ⵜⴰⵎⴰⵜⴰⵔⵜ ⵏ ⵜⵣⴷⴰⵢⵉⵏ ⵏ ⵓⵎⵣⵔⵓⵢ ⴷ ⵜⴷⴷⵓⴽⴽⵯⵍⴰ ⵉⵕⵚⴰⵏ, ⵎⵓ ⴳⴳⵓⵜⵏ ⵉⵎⵏⴰⴷⵏ ⴷ ⵉⴳⵔⴰⵏ, ⵙⵎⵓⵏⵏⵉⵏ ⵜⴰⴳⴷⵓⴷⴰⵏⵜ ⵏ ⴼⵕⴰⵏⵚⴰ ⴷ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵉⴳ ⵓⵙⵏⵓⴱⴳ ⵏⵏⵓⵏ ⴷⴷⴰⵡ ⵍⵇⵓⴱⵜ ⴰⴷ, ⴱⴰⴱ ⵏ ⴽⵉⴳⴰⵏ ⵏ ⵜⵎⴰⵜⴰⵔⵜ, ⵉⴳ ⴰⴳⵣⵣⵓⵎ ⴼ ⵎⴰⴷ ⴷⵔⵓⵏⵜ ⵙⵏⴰⵜ ⵜⵎⵉⵣⴰⵔ ⵏⵏⵖ ⴰⵜⵉⴳⵏ ⵥⵉⵍⵏⵉⵏ ⴳⴳⵓⵜⵏⵉⵏ.

ⵉⴳⴰ ⵍⵃⴰⵍ ⴰⵜⵉⴳⵏ ⵏ ⵜⴷⵉⵎⵓⵇⵔⴰⵟⵉⵜ, ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵜⵎⵏⵏⴰⵡⵜ ⵜⴰⵙⵔⵜⴰⵏⵜ, ⴷ ⵜⵉⵏ ⵉⴽⴰⴱⴰⵕⵏ ⴷ ⵓⵡⴰⵏⴽ ⵏ ⵓⵣⴼ ⴷ ⵜⵎⵔⵙⴰⵍ ⴷ ⵉⴽⴽⴰⵏ ⵉⵙⵜⴰⵢⵏ ⵉⵍⴻⵍⵉⵢⵏ. 

 ⵎⴰⵙⵙ ⴰⵏⵙⵙⵉⵅⴼ, 

ⴰⵏⵓⴱⴳ ⴰⴷ ⵏⵏⵓⵏ ⴳ ⵓⴳⵯⵏⵙ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ ⵜⴰⵎⵖⵔⵉⴱⵉⵜ, ⵉⴳⴰ ⵜⴰⵎⵍⴷⴰ ⴰⴷ ⴷ ⵙⵙⴽⵯⵜⵉⵖ ⵎⴰⴷ ⵉⵍⵍⴰⵏ ⴳ ⵉⵏⴰⵡ ⴰⴳⵍⴷⴰⵏ ⴰⵎⴰⵜⵜⵓⵢ ⵍⵍⵉ ⵉⵙⵎⵏⵉⴷ ⴱⴰⴱ ⵏ ⵡⴰⴷⴷⵓⵜ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵉⴳⵎⴰⵎⵏ ⵏ ⵓⴱⵕⵍⴰⵎⴰⵏ ⵙ ⵜⵎⵍⴷⴰ ⵏ ⵓⵕⵥⵥⵓⵎ ⵏ ⵜⵡⴰⵍⴰ ⵜⴰⵣⵣⵔⴰⴼⵜ ⵏ ⵖⵉⵍⴰⴷ ⴳ 11 ⴽⵟⵓⴱⵕ, ⵍⵍⵉⵖ ⵉⵙⴰⵡⵍ ⴱⴰⴱ ⵏ ⵡⴰⴷⴷⵓⵔ ⵙ ⵉⵙⵎ ⵏⵏⵙ ⴷ ⵡⵉⵏ ⵓⵎⴰⴷⴰⵏ ⴰⵎⵖⵔⵉⴱⵉ ⴼ ⵓⵙⵏⵉⵎⵎⵔ ⵉⴳⴳⵓⵜⵏ ⴷ ⵓⵙⵓⵜⴳ ⵉ ⴼⵕⴰⵏⵚⴰ ⴼ ⵓⵙⵏⴰⵍ ⵉⴼⴰⵡⵏ ⵉ ⵜⵎⵖⵔⵉⴱⵉⵜ ⵏ ⵚⵚⵃⵕⴰ ⴷ ⵓⵙⵙⵏ ⵙ ⵜⵅⵅⵓⵜⵔⴰ ⵏ ⵜⴳⵍⴷⵉⵜ ⴳ ⵡⴰⴽⴰⵍ ⵏ ⵚⵚⵃⵕⴰ, ⴷ ⵓⵙⵏⴰⵍ ⵏ ⵜⵙⵏⵜⴰⵢⵜ ⵏ ⵓⵏⴱⴰⴷ ⴰⵏⵉⵎⴰⵏ ⴳ ⵓⵙⴰⵜⵉ ⵏ ⵜⵎⵓⵏⵜ ⵜⴰⵏⴰⴽⴰⵍⵜ ⵜⴰⵎⵖⵔⵉⴱⵉⵜ ⵍⵍⵉ ⵉⴳⴰⵏ ⵜⴰⵔⵙⵍⵜ ⵉⴳⴰⵏ ⵢⴰⵜ ⵉ ⵓⴼⵙⵙⴰⵢ ⵏ ⵓⵎⵏⵣⴰⵖ ⴰⵎⵏⴰⴹ ⵉⵜⵜⵓⵙⴽⴰⵔⵏ ⵅⴼ ⵜⴰⵎⵓⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ. 
ⵜⴳⴰ ⴰⵖ ⵜⴰⵎⵍⴷⴰ, ⵏⴽⴽⵏⵉ ⵉⵎⵙⵜⴰⵢⵏ ⵏ ⵓⵎⴰⴷⴰⵏ ⵏ ⵍⵎⵖⵔⵉⴱ, ⴰⴷ ⴰⵡⵏ ⵏⴻⵏⵏⴰ ⴰⵙⵏⵉⵎⵎⵔ ⴷ ⵓⵙⵉⵙⵙⵏ ⵏⵏⵖ ⴼ ⵡⴰⴷⴷⴰⴷ ⴰⴷ ⵉⵍⵍⴰⵏ ⴷ ⵜⵍⵍⵓⴳⵏⴰ, ⵏⵙⴷⴷⵉⴷ ⵎⴰⵙ ⵉⴼⵔⴷⴰⵏ ⵍⵍⴰⵏⵉⵏ ⴳ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ,ⵖⵎⴽ ⴰⵏⵏ ⴷ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ,  ⵔⴰⴷ ⴱⴷⴷⴰ ⴽⵯⵜⵜⵉⵏ ⴰⴷⴷⴰⴷ ⴰⴷ ⵉⵍⵍⴰⵏ ⴷ ⵜⵍⵍⵓⴳⵏⴰ ⴷ ⵓⵣⵔⴼ, ⵖⵎⴽ ⵍⵍⵉ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴰⴰⴳⵍⵍⵉⴷ, ⵎⴰⵙ ⴳⵉⴳⴰ ⵍⵃⴰⵍ, ⴳ ⵎⴰⴷ ⵉⵥⵍⵉⵏ ⵙ ⵜⴰⵎⵓⵏⵜ ⵜⴰⵏⴰⴽⵍⵜ ⵏ ⵜⴳⵍⴷⵉⵜ, ⵢⴰⵜ ⵜⵎⵙⴰⵔⵜ ⵉⵜⵜⵓⵎⵙⴼⵓⵣⵣⵔⵏⴷ ⵜⵉⵏ ⵜⵉⵍⵉⵜ ⵉ ⵎⴰⵕⵕⴰ ⵉⵎⵖⵔⵉⴱⵉⵢⵏ. 

ⵎⴰⵙⵙ ⴰⵏⵙⵙⵉⵅⴼ,

ⵉⴳⴰ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ, ⵍⵍⵉ ⵉⴷⴷⴰⵔ ⵡⴰⴷⴷⵓⵔ ⵏ ⵓⵙⵏⵓⴱⴳ ⵏⵏⵓⵏ ⴰⵙⵙ ⴰⴷ, ⵢⴰⵏ ⴳ ⵓⴷⵎⴰⵏ ⵏ ⵍⵍⵉ ⵙⴽⵔ ⵜⴷⵉⵎⵓⵇⵔⴰⵟⵉⵜ ⵜⴰⵎⵖⵔⵉⴱⵉⵜ ⴷ ⵉⵎⵓⴽⵏⵏ ⵏ ⵜⴳⴷⵉⵜ ⵏ ⵍⵎⵖⵔⵉⴱ ⵉ ⵢⴰⵏ ⵡⴰⵏⴰⵡ ⴰⴷⵉⵎⵓⵇⵔⴰⵟ ⵉⴳⴰⵏ ⴰⵇⴱⵓⵔ ⵉⵍⴰⵏ ⵉⵥⵓⵕⴰⵏ, ⵉⵙⴰⵜⵉ ⵜⵜ ⵓⴷⵓⵙⵜⵔ ⵏ ⵜⵣⵣⵉⴳⵣⵜ ⴷ ⵜⵍⴻⵍⵍⵉ ⵉⴱⴷⴷⵏ ⴼ ⵓⵡⵇⵇⵔ ⵏ ⵉⵣⵔⴼⴰⵏ ⵏ ⵓⴼⴳⴰⴱ ⴷ ⵜⴼⵔⵉⴼⵉⵏ, ⵍⵍⵉⴳⴰⵏⵉⵏ ⵜⵉⴼⴰⴷⵉⵡⵏ ⵏ ⵜⵣⵣⵉⴳⵣⵜ ⴷ ⵜⴳⵎⵉ ⴷ ⵓⵔⴳⴳⵉⴳ. 

ⴰⴱⵕⵍⴰⵎⴰⵏ ⵏ ⵍⵎⵖⵔⵉⴱ, ⵍⵍⵉ ⴽⵯⵏ ⵉⵙⵏⵓⴱⴳⵏ ⴰⵙⵙ ⴰⴷ, ⵉⴳⴰ ⴰⵙ ⴰⴷⴷⵓⵔ ⴰⴷ ⵢⵉⵍⵉ ⴳ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⴷ ⵓⵎⵙⴰⵡⴰⵍ ⴷ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵜⴰⴼⵕⴰⵏⵚⵉⵚⵜ, ⵍⵍⵉ ⴷ ⵉⵎⵓⵏ ⵙⴳ ⵉⵙⴳⴳⵯⴰⵙⵏ ⴳ ⵜⴳⵯⵎⴰⵜ ⵜⴰⵎⵔⵙⵍⴰⵏⵜ, ⴰⵢⵍⵍⵉ ⵉⵙⵙⵔⵅⴰⵏ ⴰⴷⵔⴰⵡ ⵏ ⵜⵎⵙⴽⴰⵔ ⵥⵉⵍⵏⵉⵏ ⴷ ⵓⵙⵏⴼⵍ ⵏ ⵉⵔⵣⴰⴼⵏ ⴷ ⵓⵎⵙⴰⵡⴰⵍ ⴳ ⵢⴰⵏ ⵓⵎⵏⴰⴹ ⵖ ⵜⵙⵖⴰⵡⵙⴰ  ⵜⴷⵉⵎⵓⵇⵔⴰⵟⵉⵜ ⵜⴰⵎⵔⵙⵍⴰⵏⵜ ⵙ ⵉⵎⵏⴰⴷⵏ ⵍⵍⵉ ⵜⵜ ⵉⵙⵙⴷⵓⵙⵏ, ⴷ ⵉⵙⵙⵕⵚⴰⵏ ⵜⴰⵎⵢⵉⵎⴰⵏⵜ ⵏ ⵉⵏⵎⵓⵔⴰⵏ.

ⴷⴰ ⵙⵎⴰⵢⵏⵓⵖ ⴰⵙⴱⵔⵔⴽ ⵙⵔⵓ, ⵎⴰⵙⵙ ⴰⵏⵙⵙⵉⵅⴼ, ⴷ ⴰⵔ ⴰⵡⵏ ⴰⵇⵔⴰⵖ ⴰⴷ ⵜⵙⵎⵏⵉⴷⵎ ⵉⵏⴰⵡ ⵏⵏⵓⵏ.