ⵉⵎⴹⴰⴽⴰⵕⵏ ⵊⴰⵔ ⵜⵙⵇⵇⵉⵎⵜ ⵏ ⴱⵕⵕⴰ ⴷ ⵓⴽⴰⴱⴰⵕ ⴰⴼⴰⵍⵉⵙⵟⵉⵏⵉ ⵙⴳ ⵜⵖⵔⵎⵜ ⵏ ⵍⵇⵓⴷⵙ

ⵜⵙⵏⵓⴱⴳ ⵎⴰⵙⵙⴰ ⵏⴰⴷⵢⴰ ⵍⵇⵏⵚⵓⵕⵉ, ⵜⴰⵎⴰⵔⵉⵜ ⵏ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵖⴰⵡⵙⵉⵡⵉⵏ ⵜⵓⵙⵍⵉⵎⵉⵏ ⴷ ⵉⵎⵖⵔⵉⴱⵉⵢⵏ ⵏ ⴱⵕⵕⴰ, ⴰⴽⴷ ⵎⴰⵙⵙ ⵄⴰⴱⴷ ⵍⵄⴰⵍⵉ ⴱⵕⵓⴽⵉ, ⴰⴽⵡⴰⵙ 24 ⴽⵟⵓⴱⵕ 2024 ⴳ ⵕⵕⴱⴰⵟ, ⴰⴽⴰⴱⴰⵕ ⴰⴼⵉⵍⵙⵟⵉⵏⵉ ⵙⴳ ⵓⴳⵔⴰⵡ ⴰⵏⴰⵎⵓⵔ ⴰⵎⴷⵏⴰⵏ ⵏ ⵍⵇⵓⴷⵙ ⴷ ⵜⴳⵔⴰⵡⵜ ⵜⵓⵙⵍⵉⵎⵜ ⵜⴰⵎⴰⵙⵉⵃⵉⵜ ⵉ ⵓⵙⵏⴰⵔⴰ ⵍⵇⵓⴷⵙ, ⵉⵍⵍⴰⵏ ⴳ ⵓⵔⵣⴰⴼ ⵉ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵜⵖⵓⵔⵉ ⵏ ⵜⵙⵏⵓⵔⴰⵢⵜ ⵏ ⵜⴳⵎⵎⵉ ⵏ ⵜⴷⵔⵉⵎⵜ ⵏ ⵍⵇⵓⴷⵙ ⴰⵛⴰⵔⵉⴼ ⵙⴳ 21 ⴰⵔ 28 ⴽⵟⵓⴱⵕ. 

ⵙ ⵉⵙⵎ ⵏ ⵓⴽⴰⴱⴰⵕ ⵏ ⴼⴰⵍⵉⵙⵟⵉⵏ, ⵉⵙⴰⵡⵍ ⵎⴰⵙⵙ ⴱⵉⵍⴰⵍ ⵀⴰⵛⵉⵎ ⵚⴰⴷⵉⵇ ⵎⵜⵜⵛⴰ, ⵉⵙⵏⵉⵎⵎⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴼ ⵡⴰⴷⴷⴰⴷ ⵏⵏⵙ ⴰⵎⵣⵔⴰⵢ ⵎⵏⵉⴷ ⵏ ⴼⴰⵍⵉⵙⵟⵉⵏ ⵍⵍⵉⵖ ⵉⴳⴰ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵍⵇⵓⴷⵙ, ⴷ ⵜⵏⴱⴰⴹⵜ ⴷ ⵓⵎⴰⴷⴰⵏ ⵏ ⵍⵎⵖⵔⵉⴱ ⴼ ⵓⵙⵏⴰⵍ ⵏ ⵜⵎⵙⴰⵔⵜ ⴰⴷ, ⵢⵉⵏⵉ ⵎⴰⵙ ⴷ ⵙⵓⵍ ⵉⵇⵇⴰⵏ ⴽⵉⴳⴰⵏ ⵏ ⵓⵙⵏⴰⵍ.

ⵙⵓⵜⴳⵏ ⵉⴳⵎⴰⵎⵏ ⵏ ⵓⴽⴰⴱⴰⵕ ⴰⵢⵍⵍⵉ ⵜⵙⴽⴰⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⵎⵏⵉⴷ ⵏ ⴼⴰⵍⵉⵙⵟⵉⵏ ⴷ ⵓⵙⵏⴰⵍ ⵉⵣⵣⵉⴳⵣⵏ ⵉ ⵍⵇⵓⴷⵙ ⴷ ⵖⴰⵣⵣⴰ, ⴷ ⵜⵉⵍⴰⵍⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵖⵔⵉⴱⵉ ⴳ ⵓⵙⵏⴰⵍ ⵏ ⵜⵎⵙⴰⵔⵜ ⵏ ⴼⴰⵍⵉⵙⵟⵉⵏ ⴳ ⵓⴱⵕⵍⴰⵎⴰⵏ ⴰⵄⵕⴰⴱ ⴷ ⵜⴰⵎⵓⵏⵜ ⵏ ⵉⵙⵇⵇⵉⵎⵏ ⵏ ⵉⵡⴰⵏⴽⵏ ⴳ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⵓⵙⵍⵉⵎ ⵉ ⵓⵙⵏⴰⵍ ⵏ ⵓⴱⴷⴷⴰⴷ ⵏ ⵓⵎⴰⴷⴰⵏ ⵏ ⴼⴰⵍⵉⵙⵟⵉⵏ ⴷ ⵓⵕⵥⵥⵓⵎ ⵏ ⵉⵔⵣⴰⴼⵏ ⵉ ⵍⵇⵓⴷⵙ ⵎⵏⵉⴷ ⵏ ⵡⴰⵄⵕⴰⴱⵏ ⴷ ⵉⵎⵓⵙⵍⵎⵏ. 

ⵜⵙⵓⵜⴳ ⵎⴰⵙⵙⴰ ⵏⴰⴷⵢⴰ ⵍⵇⵏⵚⵓⵕⵉ ⴰⵔⵣⴰⴼ ⴰⴷ, ⵜⵙⴰⵡⵍ ⴼ ⵓⵙⵏⴰⵍ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⴰⵏⵙⵙⵉⵅⴼ ⵏ ⵍⵇⵓⴷⵙ ⵉ ⵜⵎⵙⴰⵔⵜ ⵏ ⴼⴰⵍⵉⵙⵟⵉⵏ ⴳ ⵎⴰⵕⵕⴰ ⵉⵙⵡⵉⵔⵏ ⵖⵎⴽ ⴰⵏⵏ ⴷ ⵜⵡⵉⵣⵉ ⵏ ⵓⵎⴰⴷⴰⵏ ⴰⵎⵖⵔⵉⴱⵉ.  

ⵜⵙⵓⵜⴳ ⵎⴰⵙⵙⴰ ⵍⵇⵏⵚⵓⵕⵉ ⴰⵜⵉⴳ ⵏ ⵓⵙⴷⵓⵙ ⵏ ⵜⵎⵓⵏⵜ ⵜⴰⵄⵕⴰⴱⵜ ⴷ ⵜⵓⵙⵍⵉⵎⵜ ⵉ ⵓⵙⵏⴰⵔⴰ ⵏ ⵜⵎⵙⴰⵔⵜ ⵏ ⴼⴰⵍⵉⵙⵟⵉⵏ, ⵜⵉⵏⵉ ⴰⵙⵏⴰⵍ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵉⵔⴰ ⵏ ⵜⵎⵙⴰⵔⵜ ⵏ ⴼⴰⵍⵉⵙⵟⵉⵏ ⴳ ⵉⵏⵎⵓⵇⵇⴰⵔⵏ ⵉⵏⵎⵏⴰⴹⵏ ⴷ ⵉⴳⵔⴰⵖⵍⴰⵏⵏ. 

ⵉⵙⴷⴷⵉⴷ ⵎⴰⵙⵙ ⵄⴰⴱⴷ ⵍⵄⴰⵍⵉ ⴱⵕⵓⴽⵉ ⴰⴳⵎⴰⵎ ⵏ ⵜⵙⵇⵇⵉⵎⵜ ⴼⵓⵙⵏⴰⵍ ⴰⵙⵉⵍⴰⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ,  ⵉ ⵜⵙⵏⵓⵔⴰⵢⵜ ⵏ ⵜⴳⵎⵎⵉ ⵏ ⵜⴷⵔⵉⵎⵜ ⵏ ⵍⵇⵓⴷⵙ ⴰⵛⴰⵔⵉⴼ ⴷ ⵓⵎⴰⴷⴰⵏ ⵏ ⴼⴰⵍⵉⵙⵟⵉⵏ, ⵢⵉⵏⵉ ⵎⴰⵙ ⵍⵍⴰⵏⵜ ⵜⵣⴷⴰⵢⵉⵏ ⵏ ⵓⵎⵣⵔⵓⵢ ⵊⴰⵔ ⵍⵎⵖⵔⵉⴱ ⴷ ⴼⴰⵍⵉⵙⵟⵉⵏ. 

ⵢⵓⵎⴰ ⵓⴽⴰⴱⴰⵕ ⵏ ⴼⴰⵍⵉⵙⵟⵉⵏ: ⵎⴰⵙⵙ ⴱⵉⵍⴰⵍ ⵀⴰⵛⵉⵎ ⵎⵜⵜⵛⴰ ⴰⵏⴼⵍⵓⵙ ⴰⵎⴰⵜⴰⵢ ⵏ ⵓⴳⵔⴰⵡ ⴰⵏⴰⵎⵓⵔ ⴰⵎⴷⵏⴰⵏ ⵏ ⵍⵇⵓⴷⵙ, ⵎⴰⵙⵙ ⵃⴰⵜⵉⵎ ⵎⵓⵃⴰⵎⵎⴰⴷ ⵄⴰⴱⴷ ⵍⵇⴰⴷⵔ ⴰⵏⴼⵍⵓⵙ ⴰⵎⴰⵜⴰⵢ ⵏ ⵜⴳⵔⴰⵡⵜ ⵜⵓⵙⵍⵉⵎⵜ ⵜⴰⵎⴰⵙⵉⵃⵉⵜ ⵉ ⵓⵙⵏⴰⵔⴰ ⵏ ⵍⵇⵓⴷⵙ, ⵎⴰⵙⵙ ⵢⵓⵏⵙ ⵉⵙⵎⴰⵄⵉⵍ ⵉⴱⵕⴰⵀⵉⵎ ⵄⴰⵎⵎⵓⵕⵉ ⴰⵎⴰⵔⵉ ⵏ ⵓⴳⵔⴰⵡ ⴰⵏⴰⵎⵓⵔ ⴰⵎⴷⵏⴰⵏ ⵏ ⵍⵇⵓⴷⵙ, ⵎⴰⵙⵙⴰ ⵖⴰⴷⵉⵔ ⴼⴰⵡⵣⵉ ⵚⴰⴱⵕⵉ ⵊⴰⴱⵉⵔ ⵜⴰⵎⴰⵙⴰⵢⵜ ⵏ ⵓⵙⴷⴰⵡ ⵏ ⵓⵙⵙⵍⵎⴷ ⴳ ⵓⴳⵔⴰⵡ, ⴷ ⵎⴰⵙⵙ ⴱⴰⵛⵛⴰⵕ ⵙⴰⵄⵉⴷ ⴽⴰⵎⵉⵍ ⵅⴰⵟⵉⴱ ⴰⵎⴰⵙⴰⵢ ⵏ ⵓⵙⴷⴰⵡ ⵏ ⵍⴰⵇⵚⴰ ⴷ ⵜⵖⵔⵎⵜ ⵜⴰⵇⴱⵓⵔⵜ ⴷ ⵓⴼⵔⴰ ⴰⵎⴷⵏⴰⵏ ⴳ ⵓⴳⵔⴰⵡ, ⵎⴰⵙⵙ ⵄⴰⴷⵉⵍ ⵃⴰⵙⴰⵏ ⵎⵓⵃⴰⵎⵎⴰⴷ ⴰⴱⵓ ⵣⴰⵏⵉⴷ ⴰⵎⴰⵙⴰⵢ ⵏ ⵜⵣⴷⴰⵢⵉⵏ ⵜⵉⵏⴰⵎⵓⵔⵉⵏ, ⵎⴰⵙⵙ ⵄⵓⵎⴰⴷ ⵎⵓⵃⴰⵎⵎⴰⴷ ⵄⴰⴱⴷ ⴰⵍⵍⴰⵀ ⵄⴰⵡⴰⴹ ⴰⵎⴰⵙⴰⵢ ⵏ ⵜⵖⴰⵡⵙⵉⵡⵉⵏ ⵏ ⵓⴹⴼⵕ, ⵎⴰⵙⵙ ⴱⴰⵛⵛⴰⵕ ⵔⵓⴱⵉⵏ ⴼⴰⵍⵍⴰⵃ ⴰⴱⵓ ⵛⴰⵎⵙⵉⵢⵢⴰ ⴰⵎⵣⴷⴰⵢ ⵏ ⵓⴽⴰⴱⴰⵕ ⴰⴽⴷ ⵜⴰⵙⵏⵓⵔⴰⵢⵜ ⵏ ⵜⴳⵎⵎⵉ ⵏ ⵜⴷⵔⵉⵎⵜ ⵏ ⵍⵇⵓⴷⵙ, ⵎⴰⵙⵙ ⴰⵃⵎⴰⴷ ⵚⴰⴼⵉⵢⵢⴰ ⴰⵎⵛⵛⵉⵡⵕ ⴰⵣⵔⴼⴰⵏ ⵏ ⵓⴳⵔⴰⵡ.

ⵉⵃⴰⴹⵕ ⴳ ⵓⵙⵏⵓⴱⴳ ⵎⴰⵙⵙ ⵎⵓⵃⴰⵎⵎⴰⴷ ⵙⴰⵍⵎ ⵛⵛⵔⵇⴰⵡⵉ ⴰⵏⵎⵀⴰⵍ ⵉⵜⵜⵓⵙⵎⴰⴳⴰⵍⵏ ⵙ ⵓⵙⵡⵓⴷⴷⵓ ⵏ ⵜⵙⵏⵓⵔⴰⵢⵜ ⵏ ⵜⴳⵎⵎⵉ ⵏ ⵜⴷⵔⵉⵎⵜ ⵏ ⵍⵇⵓⴷⵙ ⴰⵛⴰⵔⵉⴼ.